GALATIA KHUAA MITE HNENA LEHKHATHAWN

1 Kei tirhkoh Paula, mihringte tirh ni lo, mihring ruat pawh ni hek lo, Isua Krista leh thihna ata amah kai thotu Pa Pathianin tirhkohva an ruat leh, 2 ka hnêna awm unau zawng zawngte’n Galatia rama kohhrante chibai kan bûk a che u:

3 Kan Pa Pathian leh Lalpa Isua Krista hnên aṭanga khawngaihna nasa tak leh thlamuanna* in hnênah awm rawh se. 4 Krista chu kan Pathian leh Pa duh zâwng angin, he khawvêl* suaksual tak lak aṭanga min chhan chhuah theih nâna kan sualte la bo tûrin a inpe a ni. 5 Pathian hnênah chatuanin ropuina awm rawh se. Amen.

6 Krista khawngaihna nasa tak nêna nangmahni Kotu che u chu hawisan a, chanchin ṭha anga an sawi thute in pawm ta mai hi mak ka ti hle. 7 Chanchin ṭha dang a awm a ni lo va, nangmahni ti buaitu leh Krista chungchâng chanchin ṭha ti danglam duh mi ṭhenkhat an awm mai zâwk a ni. 8 Nimahsela, keimahni emaw, vân aṭanga lo chhuk vântirhkoh emaw pawhin, in hnêna kan puan chhuah ni lo chanchin ṭha dang a puan chhuah chuan, ani chu ânchhe dawngin awm rawh se. 9 Tûn hmaa kan sawi tawh ang khân ka’n sawi nawn leh teh ang: Tu pawh in pawm tawh ang ni lo, chanchin ṭha dang in hnêna puang chhuak apiang chu ânchhe dawngin awm rawh se.

10 Tûnah hian mihringte nge hmin ka tum Pathian? A nih loh leh, mihringte tih lâwm ka tum em ni? Mihringte ka la ti lâwm reng a nih chuan Krista bâwih ka ni lo vang. 11 Chuvângin, unaute u, chanchin ṭha in hnêna ka puan chhuah hi mihring aṭanga chhuak a ni lo tih in hriat ka duh a ni. 12 Mihring hnên aṭanga dawng ka ni lo va, mihring min zirtîr lah ka ni hek lo; Isua Krista thu puan chhuah avânga dawng ka ni zâwk.

13 Tûn hmaa Juda sakhuaa ka awm dân chu in hria e, Pathian kohhran nasa taka* ti duhdahin ka tih chhiat ṭhin kha. 14 Ka hnampuite zînga ka rualpui tam takte aiin nasa takin hma ka sâwn zâwk a, min thlahtute thurochhiah zawm kawngah nasa takin ṭhahnem ka ngai zâwk bawk. 15 Amaherawhchu, ka nu chhûl aṭanga min ti hrangtu leh a khawngaihna nasa tak avânga min kotu Pathian chuan, 16 hnam dangte hnênah a Fapa chungchâng chanchin ṭha ka puan chhuah theihna tûra ka hnêna a Fapa puan chhuah ṭha a tih lai khân, mihring tu mah* ka râwn nghâl lo va, 17 tirhkoh ka nih hmaa tirhkoh lo ni tawh Jerusalema awmte hnênah lah ka chho hek lo. Nimahsela, Arabia ramah ka kal a; tichuan, Damaska khuaah ka lêt leh ta a ni.

18 Tichuan, kum thum hnuah Kipha* tlawh tûrin Jerusalemah ka chho va, a hnênah ni 15 ka châm a. 19 Mahse, Lalpa unaupa Jakoba chauh lo chu tirhkoh dang tu mah ka hmu lo. 20 Tin, in hnêna ka thu ziahte chungchângah chuan dik takin ka ziak tih Pathianin min hriatpui a ni.

21 Chumi hnuah chuan, Suria leh Kilikia ramahte ka kal a. 22 Nimahsela, Krista nêna inpumkhata awm Judai rama kohhranahte chuan mi mal taka hriat ka la ni lo va. 23 Anni chuan: “Tûn hmaa min ti duhdahtu khân, tih chhiat a tum ṭhin rinna chungchâng chanchin ṭha a puang mêk a ni,” tih thu chauh an hre ṭhîn a. 24 Tichuan, keimah avângin Pathian an chawimawi ta a.

2 Tichuan, kum 14 hnuah Barnaba rualin Jerusalemah ka han chho leh a, Tita pawh ka hruai ve a. 2 Kal tûra hriattîr ka nih avânga han chho ka ni. Tichuan, hnamte zînga ka puan chhuah chanchin ṭha chu an hnênah ka hriattîr a. Nimahsela, ka rawngbâwlna hi a thlâwn mai a ni lo tih ti chiang tûrin, chu chu unaupa zahkai takte hmaah chauh ka ti a ni. 3 Nimahsela, ka hnêna awm Tita chu Grik mi a ni chung pawhin serh tan tûra tih luih a ni lo. 4 Chuvâng chuan harsatna a lo thleng a, chu chu unau der a rûka lo lûtte vâng a ni. Bâwiha min siam theih nân Krista Isua nêna pumkhat kan nih avânga zalênna kan neih chu enthla tûrin anni chu a rûkin an lo lût a ni. 5 Chanchin ṭha thutak hi in hnêna a awm zawm zêl theihna tûrin, hun rei lo te* chhûng lek pawh an thuhnuaiah kan awm lo.

6 Nimahsela, mi pawimawh anga langte chungchângah chuan, eng ang mi pawh ni sela ka tân an danglam chuang lo, Pathianin mihring pâwn lam lan dân a en si lo va. Chûng mi zahkai takte chuan eng thil thar mah min hrilh lo. 7 Chutih ahnêkin, serhtan lohte tân chanchin ṭha kawltîr ka ni tih an hria a ni; serhtante tâna chanchin ṭha Petera hnêna kawltîr a nih ang chiah khân. 8 Serhtante tâna tirhkoh ni tûra Petera ti chaktu ngei khân, hnam dangte tâna tirhkoh ni tûrin kei pawh min ti chak si a. 9 Ka hnênah khawngaihna nasa tak pêk a ni tih an hriat chuan, bante anga hriat Jakoba te, Kipha te leh, Johana te chuan hnam dangte hnêna kan kal theihna tûr leh, anni pawh serhtante hnêna an kal theihna tûrin, kei leh Barnaba chu an hnathawhpui* kan nih chhinchhiah nân an kut ding lam min pe a. 10 Anni chuan unau retheite hre reng tûr chauhvin min ngên a; tin, keipawhin chu chu ṭhahnemngai taka tih ka tum tlat a ni.

11 Nimahsela, Kipha* chu Antiokei khuaa a lo kal khân, thil dik a ti lo* tih a lan chian êm avângin hmaichhan ngeiah ka dodâl a. 12 Jakoba mi tirhte an lo thlen hma chuan hnam dangte hnênah a ei ṭhîn a, an lo thlen hnuah erawh chuan chûng serhtanhote chu a hlauh avângin an hnênah a ei tawh lo va, a inti hrang ta a ni. 13 Juda dangte pawh amah ang chuan an vervêk ve ta hlawm a; tichuan, Barnaba meuh pawh an vervêknaa hruai bovin a awm a. 14 Nimahsela, chanchin ṭha thutak nêna inmilin an awm lo tih ka hmuh chuan an vaia hmaah Kipha* hnênah chuan: “Nang Juda mi ni siin, Judate anga awm lovin hnam dangte angin i awm a, engtin nge hnam dangte chu Judate awm anga awm luihtîr i tum theih?” ka ti a.

15 Keini chu Juda mi rênga piang kan ni a, hnam dang mi sualte ang kan ni lo. 16 Mi chu dân thil tihte vâng ni lovin, Isua Krista rin avâng chauhvin mi fela puan a ni tih kan hria. Dân thil tihte vâng ni lo va, Krista rin avânga mi fela puan kan nih theihna tûrin Krista Isuaah rinna kan nghat a ni. Tu mah* dân thil tihte avângin mi fela puan an ni dâwn si lo va. 17 Krista avânga mi fela puan nih theihna tûr kan zawn laia mi sual kan lo nih si chuan, Krista chu sual rawngbâwltu a ni tihna em ni? Ni lul lo ve! 18 Ka thil ṭhiah tawhte ngei pawh ka sak ṭhat leh si chuan bawhchhetu ka ni tih ka lantîr a ni ang. 19 Pathian lama ka nun theihna tûrin dân avângin dân lamah ka thi tawh si a. 20 Krista ruala bana khenbehin ka awm tawh. Chuvângin, a nung chu keimah ka ni tawh lo va, Krista chu keimahah a nung tawh zâwk a ni. A nihna takah chuan, tûna tisaa ka nung hi min hmangaih a, ka tâna inpetu Pathian Fapa ka rin avânga nung ka ni. 21 Pathian khawngaihna nasa tak chu ka hnâwl* lo ve, felna chu dân avânga awm ni sela chuan, Krista chu eng mah lo mai atâna thi a ni dâwn si a.

3 Aw, Galatia mi âte* u! He sual thununa awm tûr hian tuin nge hruai che u? Bana Isua Krista tih hlum a nih chungchâng zirtîrna fiah tak in dawn tawh kha. 2 He thil pakhat hi ka zâwt* duh che u a ni: Thlarau in dawn kha dân thil tihte vâng nge ni a, in thu hriatte in rin vâng zâwk? 3 Hetiang khawp hian in â* a ni maw? Thlarau kawng in zawh ṭan* tawh chu tisa kawng zawhin in zawh zo* dâwn em ni? 4 Eng mah lo mai atân hrehawm tam tak in tuar em ni? Eng mah lo mai atân a ni lo tih ka chiang a ni. 5 A nih chuan, thlarau petu che u leh in zînga thil mak ropui takte titu khân in dân thil tihte avângin nge a tih a, in thu hriatte in rin avâng zâwkin? 6 Abrahama chungchâng hi ngaihtuah teh u, ani chuan “Jehova* a ring a, chu chu a felnaah ruat a ni.”

7 Rinna vawngtute chu Abrahama fate an ni tih chiang takin in hria e. 8 Tin, Pathian Lehkha Thu chuan Pathianin hnam dang mite chu an rinna avângin mi felah a puang dâwn tih hriain, Abrahama hnênah: “Nangmah hmangin hnam zawng zawng malsâwm an ni ang,” tiin chanchin ṭha a lo hrilh lâwk a ni. 9 Chutichuan, rinna vawngtute chu rinna neitu Abrahama rualin malsâwm an ni ang.

10 Dân thil tiha innghat zawng zawngte chu ânchhe dawngin an awm a ni: “Dân lehkhabua inziak zawng zawngte zâwm reng lo apiang chu ânchhe dawngin an awm ṭhîn,” tih ziak a ni si a. 11 Chu bâkah, dân avângin tu mah Pathian hmaah mi fela puan an ni lo tih chiang takin a lang a ni, “Mi fel chu a rinna avângin a nung ang,” tih a ni si a. 12 Tin, Dân chu rinnaah a innghat lo. Nimahsela, “Tu pawh chûng thilte titu chu, chûngte avâng chuan a nung ang,” tih a ni zâwk e. 13 Krista chuan min lei a, kan aia ânchhe dawng niin Dân ânchhe lak aṭangin min chhuah zalên a ni: “Bana khai kân apiang chu ânchhe dawng a ni,” tih ziak a ni si a. 14 Chutichuan, Abrahama malsâwmna chu Isua Krista hmangin hnam dangte chungah a lo thleng ang, Pathianin pêk min tiam thlarau thianghlim chu kan rinna avânga kan dawn theihna tûrin.

15 Unaute u, tehkhin thuin ka sawi a ni: Thuthlung hi mihring hmang chauhva nemngheh a nih pawhin, vawi khat nemngheh a nih tawh chuan tu man an paih bo emaw, an belhchhah emaw ngai lo. 16 Tin, Abrahama leh a thlahin* Pathian thutiamte an dawng a. “I thlahte* hnênah,” tia mi tam tak chungthu sawi anga sawi lovin, “I thlah* hnênah,” tiin mi pakhat chung thu a sawi zâwk a, chu chu Krista a ni. 17 Chu bâkah, hei hi ka sawi a ni: A hmasain Pathianin Abrahama hnênah thu a thlung a, a hnu kum 430-ah a mite hnênah Dân a pe a; nimahsela, chu Dân chuan thuthlung chu eng mah lovah a siam lo va, Pathianin Abrahama hnêna a pêk thutiam pawh eng mah lovah a chantîr hek lo. 18 Ro luah tûr chu dân ṭanchhan ni sela chuan, thutiam ṭanchhan a ni tawh lo vang. Nimahsela, Pathianin thutiam avângin Abrahama hnênah ro luah tûr chu a pe a ni.

19 A nih leh, engvângin nge Dân chu pêk a nih? Thlah* a lo lan hma zawnga bawhchhiatnate ti lang tûrin, Dân chu thutiam dawngtute hnênah pêk a ni a; vântirhkohte’n palai hmangin mite hnênah an pe a ni. 20 Mi pakhat chauh telnaah palai an awm ngai lo, Pathian erawh chu pakhat chauh a ni. 21 A nih leh, Dân chuan Pathian thutiamte a kalh em ni? Kalh lo ve! Nunna pe theitu dân pêk ni sela chuan, felna chu dân avângin a awm ngei tûr a ni si a. 22 Nimahsela, Isua Krista rin avânga thutiam chu, chumia rinna lantîrtute hnêna pêk a nih theih nân Pathian Lehkha Thu chuan thil zawng zawng chu sual khuahkhirhna hnuaiah a dah vek a ni.

23 Amaherawhchu, rinna lo thlen hma khân rinna lo lang tûr chu thlîrin, dân hnuaia vênhima awmin a khuahkhirhna hnuaiah kan awm a. 24 Chutichuan, rinna avânga mi fela puan kan nih theihna tûrin, Dân chu Krista lama min hruai tûra min vêngtu* a lo ni a. 25 Nimahsela, tûnah chuan rinna a lo thleng tawh a, vêngtu* hnuaiah kan awm tawh lo.

26 A nihna takah chuan, Krista Isua in rin avângin Pathian fate in ni vek a ni. 27 Nangni Kristaa baptisma chang tawh zawng zawngte chu Krista chuan in inthuam tawh si a. 28 Juda mi leh Grik mi inthliar hranna a awm lo va, bâwih leh mi zalên inthliar hranna a awm lo va, mipa leh hmeichhia inthliar hranna a awm hek lo, Krista Isua nêna inpumkhatin in vaiin pakhat in ni si a. 29 Chu bâkah, Krista ta in nih chuan, Abrahama thlah* in ni tak zet a, Abrahama hnêna tiam ro luahtu tûrte in ni.

4 Tin, hei hi ka sawi a ni; ro luahtu tûr chu naupang a la nih chhûng chuan engkim chunga lalpa ni mah se, bâwih nên a danglam chuang lo. 2 A pa hun tiam a thlen hma loh chuan, ani chu kaihruaitute leh enkawltute hnuaiah a awm ṭhîn. 3 Chutiang bawkin, keini pawh naupang kan nih lai khân khawvêl thilte* bâwihah kan awm a. 4 Nimahsela, hunbi a lo kim chuan hmeichhe hrin ni tûr leh dân hnuaia piang tûrin Pathianin a Fapa chu a rawn tîr a. 5 Chutiang chuan, faa lâk kan nih theihna tûrin a Fapa chuan dân hnuaia awmte chu leiin, a chhuah zalên thei ang.

6 Tin, fate in nih avângin Pathian chuan a Fapa thlarau chu kan thinlungah a rawn tîr a, chu chu: “Abba,* Ka Pa!” tiin a au chhuak a ni. 7 Bâwihte in ni tawh lo va, fate in ni tawh zâwk e. Fate in nih chuan, Pathian zâra ro luahtu tûrte in ni.

8 Nimahsela, Pathian in hriat loh lai khân pathian dik lote bâwihah in awm a. 9 Mahse, tûnah Pathian in lo hriat hnu ni lo va, Pathian mi hriat in lo nih hnu zâwk hian, engati nge he khawvêl thil* ṭangkai lote zui leh tûra hawikîr leh in duh tâk? 10 Nî te, thla te, hun te, kumte urhsûn takin in serh ṭhîn. 11 In tâna theih tâwp ka chhuahnate hi eng emawti takin a thlâwn mai ang tih ka hlau a ni.

12 Unaute u, keimah ang ni tûrin ka ngên a che u, kei pawh nangmahni ang ka nih ṭhin kha. Ka chungah eng mah in ti sual lo ve. 13 Mahse, in hnêna chanchin ṭha hrilh theihna hun remchâng ka neih hmasak ber kha ka dam loh vâng a ni tih in hria. 14 Ka tisa lam dinhmun kha in tân fiahna ni mah se, nangni chuan min hmusit lo va, min ten hek lo;* Pathian vântirhkoh angin, Krista Isua ang maiin min lo lâwm zâwk a nih kha. 15 Hlimna in neih ṭhin kha khawiah nge a awm tâk? Theih ni sela chuan, in mitte kher chhuakin min pe tawh ang tih ka hriatpui si che u a. 16 A nih leh, thutak ka hrilh avâng che u khân in hmêlma ka lo ni ta em ni? 17 Nangmahni hmin tum mi ṭhahnemngai tak dang an awm a, tum ṭha tak nei erawh an ni lo; anmahni phûr taka in zui theihna tûrin ka lak aṭanga lâk hran che u an duh a ni. 18 Amaherawhchu, ka awm lai chauh ni lo va, tum ṭha tak neia mi tu emawin ṭhahnemngai taka a zawng che u hi a ṭha e. 19 Ka fa duh takte u, nu nau veiin nâ a tuar angin nangmahni avângin nâ ka tuar leh a ni, Krista mizia in lantîr hma loh chuan he nâ hi ka tuar zawm zêl ang. 20 Ka ngaihtuah êm che u avângin tûnah pawh in zînga awm a, ṭawngkam nêm zâwka sawi hial asin ka duh ni.

21 Dân hnuaia awm duhte u, min han hrilh teh u. Dân thu in ngaithla ṭhîn lo vem ni? 22 “Abrahama’n fapa pahnih a nei a, pakhat chu bâwihnu lakah a ni a, pakhat chu bâwih ni lo lakah a ni,” tih ziak a nih kha. 23 Nimahsela, bâwihnu laka mi chu mihring dân pângngai* anga piang a ni a, bâwih ni lo laka mi erawh chu thutiam avânga piang a ni. 24 Chûngte chu entîrna lemchan anga ngaih theih a ni a; chûng hmeichhiate chu thuthlung pahnih an ni, pakhat zâwk chu Sinai Tlânga mi, bâwih ni tûra fate hringtu Hagari a ni. 25 Tin, Hagari chuan Arabia rama Sinai Tlâng ai a awh a, ani dinhmun chu tûn laia Jerusalem dinhmun nên hian a inang a ni, a fate nên bâwih an ni si a. 26 Nimahsela, chung lam Jerusalem chu bâwih a ni lo va, ani chu kan nu a ni.

27 “Nang hmeichhe ching, fa hrin nei lo, lâwm rawh; nang hmeichhia, nau vei ngai lo, hlim takin au rawh; pasal nei fate aiin hmeichhe khawhar fate chu an tam zâwk si a,” tih ziak ang khân. 28 Chutichuan, unaute u, Isaaka ang khân thutiam fate in ni. 29 Nimahsela, mihring dân pângngai* anga piang chuan thlarau thianghlim thiltihtheihnaa piang chu a ti duhdah ṭan ang khân, tûnah pawh chutiang bawk chu a thleng a ni. 30 Eng pawh ni se, Pathian Lehkha Thuin eng nge a sawi? “Bâwihnu leh a fapa chu hnawt chhuak rawh, bâwihnu fapa chuan bâwih ni lo fapa chu ro a luahpui dâwn si lo,” tiin a sawi a ni. 31 Chutichuan, unaute u, bâwihnu fate kan ni lo va, bâwih ni lonu fate kan ni zâwk e.

5 Chutiang zalênna chuan Krista’n min zalentîr ta a. Chuvângin, ding nghet ula, bâwih nihna nghâwngkawl chu bât leh tawh suh u.

2 En teh u! Kei Paula’n ka hrilh che u hi, serhtan in nih chuan Krista thil tihte chu in hlâwkpui lo vang. 3 Serhtan apiangte chuan Dân thu zawng zawng zâwm tûrin mawhphurhna an nei tih ka hriattîr leh a nih hi. 4 Dân avânga mi fela puan nih tumtute u, Krista lak aṭangin in hrang ta; a khawngaihna nasa tak chu in hawisan si a. 5 Keini erawh chuan rinna avânga lo awm felna chu beiseiin, thlarauvin kan nghâk fan fan a ni. 6 Krista nêna inpumkhata nungte tân chuan serhtan emaw, tan loh emawin hlutna a nei lo; nimahsela, hmangaihna avânga rinna thil tih erawh chuan hlutna a nei a ni.

7 Ṭha takin in tlân ṭhin kha. Thutak zâwm zêl lo tûrin tuin nge dâl che u? 8 Hetiang thlêmna hi a Kotu che u hnên aṭanga lo kal a ni lo ve. 9 Dawidim tlêm têin chhang hlâwm chu a pumin a fan chhuak ṭhîn. 10 Nangni Lalpa nêna inpumkhata awmte hian ngaihtuahna dang in pu lo vang tih ka ring tlat a ni; nimahsela, buaina thlentu che u chu tu pawh ni se, a phû tâwka rorêlsak a ni ang. 11 Unaute u, kei hian serhtan thu la hril reng ta ila, tih duhdah ka la ni reng dâwn em ni? Chutiang chu ni sela chuan, nghaisakna ban* chu tlûkna thlentu a ni tawh lo vang. 12 Nangmahni ti buaitu che u chu mi tilrehah insiam law law se* ka duh a ni.

13 Unaute u, mi zalên ni tûra koh in ni; nimahsela, chu zalenna chu tisa châknate ûmna remchângah hmang suh ula, hmangaihnain rawng inbâwlsak tawn zâwk rawh u. 14 “Nangmah i inhmangaih angin i vêngte pawh i hmangaih tûr a ni,” tih thupêk pakhatah hian Dân thu zawng zawng a famkim* tawh si a. 15 In inseh tawn a, in inei tawn reng si chuan, in intih boral tawn loh nân fîmkhur rawh u.

16 Nimahsela, hei hi ka sawi a ni, thlarau hruainain kal reng rawh u; tichuan, tisa châkna chu in puitlin hauh lo vang. 17 Tisa duh zâwng chuan thlarau a do va, thlarau pawhin tisa a do si a; in thil tih duh ngawih ngawih pawh in tih lohna tûrin anni chu an indo tawn a ni. 18 Chu bâkah, thlarau hruaia in awm chuan dân hnuaiah in awm lo.

19 Tin, tisa thil tihte chu chiang takin a lang a ni. Chûngte chu nungchang bawlhhlawhna te,* thianghlim lohna te,* tîmna nei lova thil sual tihna te,* 20 milem biakna te, ramhuai zâwlna te, thinurna te, innghirnghona te, thîkna te, thinur puah kehna te, inhnialna te, inṭhen hranna te, pâwl hrang dinna te, 21 îtsîkna te, zuruihna te, khuahkhirhna awm lo hlimhlawp bâwlna te leh, chutiang thilte chu a ni. Chûng thilte chungchângah chuan, ka vaukhân tawh che u ang khân ka vaukhân leh a che u, chutiang thil tih chîngte chuan Pathian Ram an luah lo vang.

22 Kawng lehlamah chuan, thlarau rah erawh chu hmangaihna te, hlimna te, remna te,* dawhtheihna te, ngilneihna te, ṭhatna te, rinna te, 23 nunnêmna te,* insûmtheihnate a ni zâwk e. Chutiang kalh zâwngin dân a awm lo. 24 Chu bâkah, Krista tate chuan tisa chu a duhnate leh a châknate chawpin banah an khêngbet tawh a ni.

25 Thlarauva nung kan nih chuan thlarau hruai ang zêlin i kal bawk ang u. 26 Inelna chawk tho va, inîtsîk tawnin i inngaihlu lo vang u.

6 Unaute u, miin hre lova sual kawng a zawh chuan, nangni thlarau lama puitlingte u, chutiang mi chu zaidam* takin siam ṭhat tum rawh u. Nimahsela, nangni pawhin thlêmna in tâwk thei tih hriain fîmkhur ang che u. 2 In phurritte inchhâwk tawn ṭhîn rawh u; chutiang chuan, Krista dân in zâwm famkim ang. 3 Eng mah ni si lova mi pawimawha inngai chuan mahni a inbum mai a ni. 4 Mi tinin mahni thil tihte bih chiang ṭheuh rawh se; chutichuan, mi dang nêna inkhaikhinnaah ni lovin, ama chung chauhvah lâwm nachhan tûr a nei ang. 5 Mi tinin mahni phur an phur ṭheuh dâwn si a.*

6 Chu bâkah, tu pawh Pathian thu zirtîrna dawngtu* chuan chutiang zirtîrtu* hnênah chuan thil ṭha zawng zawng pe ve rawh se.

7 Bumin awm suh u: Pathian chu nuihsawh rual a ni lo ve. Miin a theh apiang chumi vêk chu a seng dâwn si a. 8 Mahni tisa lama thehtu chuan tisaa mi chhiatna a seng ang a, thlarau lama thehtu erawh chuan thlarauva mi chatuana nunna a seng ang. 9 Chutichuan, thil ṭha tih hi i ning lo vang u, ning* lova kan tih zêl chuan a hun takah kan seng dâwn si a. 10 Tin, hun remchâng* kan neih chhûng hian mi zawng zawng chungah thil ṭha i ti ang u; a bîk takin, rinnaa kan chhûngte chungah i ti lehzual ang u.

11 Ka kut ngeia hawrawp hraw pui puia ka ziah lehkhathawn hi en teh u.

12 Tisa lama lan mawi duhtu* apiangte chu serh tan luihtîr tumtu che u an ni a, chutianga serhtan chu Krista nghaisakna ban* avânga tih duhdahna pumpelh nân chauh a ni. 13 Serhtante ngei pawh chuan Dân chu an zâwm si lo va, in taksaah inchhuanna tûr an neih theih nâna serh tantîr duh mai che u an ni. 14 Nimahsela, kei chuan kan Lalpa Isua Krista nghaisakna ban* chauh lo chu thil dang eng mah ka chhuang ngai lo vang; ka tân chuan, amah avângin khawvêl a thi* tawh a, khawvêl tân pawh amah avângin ka thi tawh a ni. 15 Serhtan emaw, serhtan loh emaw chu a pawimawh lo va, thil siam thar erawh chu a pawimawh a ni. 16 Chu thu zâwmtu zawng zawngte chungah chuan remna* leh zahngaihna awm rawh se; ni e, Pathian Israelte chung ngeiah chuan.

17 Tûn aṭang chuan tu mahin min ti buai tawh suh se, ka taksaah hian Isua bâwih nih chhinchhiahnate ka pu si a.

18 Unaute u, rilru put hmang ṭha in lantîr avângin, kan Lalpa Isua Krista khawngaihna nasa tak chu in hnênah awm rawh se. Amen.