TIRHKOHTE THIL TIH

1 Duh tak Theophil, ka lehkha ziak hmasaah khân Isua thil tih leh zirtîrna zawng zawng chanchin ka sawi tawh a, 2 a tirhkoh thlante hnêna thlarau thianghlim hmanga kaihhruainate a pêk zawh a, lâk chhohva a awm nî thleng chanchin kha. 3 Thih thlenga hrehawm a tawrh hnuah, a nung ngei a ni tih chiang taka an hriat theih nân an hnênah vawi tam tak a inlâr a. Ni 40 chhûngin chutiang chuan a inlâr fo va, Pathian Ram chungchâng a sawi ṭhîn. 4 An hnêna a awm lai chuan, heti hian thu a pe a: “Jerusalem khua hi chhuahsan lo ula, ka hnên aṭanga in hriat Pa thutiam kha nghâk reng rawh u; 5 Johana chuan tuiin a baptis ṭhîn a; nimahsela, tûn aṭanga ni rei lo te hnuah thlarau thianghlima baptis in ni ang,” tiin.

6 Tichuan, an awm khâwm laiin anni chuan a hnênah: “Lalpa, tûnah em ni Israelte tân lalram i din ṭhat leh dâwn?” tiin an zâwt a. 7 Ani chuan an hnênah: “Chûng thilte thlen hun tûr chu ruat tûrin vâna Pa chauhvin thuneihna a nei a, chu chu nangni lo hriat tûr a ni lo ve. 8 Nimahsela, in chunga thlarau thianghlim a lo thlen hunah thiltihtheihna in dawng ang a, Jerusalem khuaah te, Judai leh Samari ram zawng zawngah te leh, kâwlkil thlengin ka thuhretute in ni ang,” a ti a. 9 Chûng thute a sawi zawh chuan, an la en reng laiin lâk chhohvin a awm a, ani chu chhûmin a hliah a, an hmu thei ta lo va. 10 Lâk chhoh a niha vân lam an la en reng lai chuan, an bulah kawrfual vâr ha mi pahnih an lo ding a. 11 Anni chuan: “Galili mite u, engvângin nge vân lam ena in din reng? He Isua hi in hnên aṭanga vâna lâk chhohva a awm in hmuh ang chiah hian a lo kal leh ang,” an ti a.

12 Tin, Oliv tlâng aṭang chuan Jerusalemah an kîr leh a, chu tlâng chu Jerusalem aṭanga sabbath nîa kal phalna tâwk vêla hlaa awm a ni.* 13 An thlen chuan an awmna in chung pindanah an chho va. Chutah chuan, Petera bâkah Johana te, Jakoba leh Andria te, Philipa leh Thoma te, Bartholomaia leh Matthaia te, Alphaia fapa Jakoba te, mi ṭhahnemngai tak Simona te leh, Jakoba fapa Juda te an awm a. 14 Chûngho zawng zawng chu hmeichhe ṭhenkhat te, Isua nu Mari te leh, Isua unaute nên rilru hmun khat puin an ṭawngṭaiho ṭhîn a.

15 Ṭawngṭaia an awm khâwm ṭhin lai chuan, ni khat chu unaute zîngah Petera a ding a, (chuta kal khâwmte chu mi 120 vêl an ni) an hnênah: 16 “Unaute u, Isua mantute rawn hruaitu Juda chungchâng thlarau thianghlimin Davida hmanga a lo sawi lâwk Pathian Lehkha Thu kha a thlen famkim a ngai a ni. 17 Juda chu kan zîngah a tel ve ṭhîn a, he rawngbâwlnaah hian chan a nei ve bawk a ni. 18 (Chu pa ngei chuan a thil sual tiha a hlawh chhuahin hmun a lei a, a lu sawh zâwngin a tla a, a pum puak kehin a kawchhûngte chu a chhuak vek a. 19 Chu chu Jerusalema chêng zawng zawngin an hria a; tichuan, chu hmun chu an ṭawngin A·kel′da·ma an ti a, chu chu, “Thisen Hmun,” tihna a ni.) 20 Fakna hla buah, ‘A awmna chu khawharin awm sela, chutah chuan tu mah chêng suh se,’ tih leh ‘hotu a nihna chanvo chu mi dangin chelh rawh se,’ tiin a inziak si a. 21 Chuvângin, kan zînga Lalpa Isua a awm laia, kan hnêna awm ve ṭhîn mi pakhat thlan chhuah a ngai a ni. 22 Ani chu Isua’n Johana hnêna baptisma a chan aṭanga, kan hnên ata lâk chhohva a awm nî thlenga kan zînga awm leh, a thawhlehna mit ngeia hmutu a ni tûr a ni,” a ti a.

23 Tichuan, mi pahnih an rawt a, anni chu Josefa, Barsaba an tih, Justa tia an koh bawk leh Matthia te an ni. 24 Tin, anni chu an ṭawngṭai a: “Kan Pathian Jehova,* thinlung zawng zawng hretu, hêng mite pahnihah hian i mi thlan chu khawngaihin min hriattîr rawh. 25 Juda’n a chanvo a kalsan avângin, a aiawha he rawngbâwlna chanvo leh tirhkoh nihna chelhtu tûr hi a ni si a,” an ti a. 26 Tichuan, ṭhum an vâwr a, chu chu Matthia chungah a tla a; tin, ani chu tirhkoh 11-te rualin tirhkohva chhiar tel a ni ta a.

2 Tin, Pentikost Kût nî chuan an vaiin hmun khatah an awm khâwm a. 2 Thâwklehkhatah, vân aṭangin thlipui na tak tleh ang maiin ri a lo chhuak a, an ṭhutna in chu ri chuan a khat ta vek a. 3 Tin, leite chu mei alh ang maiin an hmu a, a insem darh a, an chungah pakhat ṭheuhvin a awm a. 4 Tichuan, thlarau thianghlimin an lo khat ta vek a, thlarauvin a ṭawngtîr ang zêlin ṭawng chi hrang hrangin an lo ṭawng ta a.

5 Chutih hun lai chu, vân hnuaia ram tin aṭanga sakhaw ngaihsak mi Judate Jerusalema an awm lai a ni a. 6 Tin, chu ri chu an hriat chuan mipui an lo pung khâwm a, zirtîrte thusawi chu anmahni ṭawng ṭheuhva an hriat avângin an rilru a buai hle a. 7 Anni chuan mak an ti hle a: “En teh u, hêng mi zawng zawngte hi Galili mi an ni lâwm ni? 8 A nih chuan, engtin nge kan pianpui ṭawng ṭheuhva kan hriat theih? 9 Parthai mi te, Media mi te, Elamitai mi te, Mesopotamia rama chêng te, Judai leh Kappadokia rama chêng te, Ponto leh Asia* rama awm te, 10 Phrugia leh Pamphulia rama awm te, Aigupta ram leh Kurini khaw bula Libia ram biala awm te, Rom khua aṭanga tlawhtu te, Judate leh Juda sakhuaa inlet te,* 11 Kret thliarkâra awm te leh, Arabia rama awmte kan ni si a. Nimahsela, Pathian thil tih ropui takte chungchâng an sawi mahni ṭawng ṭheuhva kan hriat hi,” an ti a. 12 Tin, an vai chuan mak an tiin a ngaihna an hre lo hle a: “Hei hi eng nge a awmzia?” tiin an inzâwt hlawm a. 13 Ṭhenkhat erawh chuan anni chu nuihsawhin: “Uain thar an rui a nih hi,” an ti a.

14 Nimahsela, Petera leh Sâwm Pakhatte chu an ding a, Petera chuan aw ring takin an hnênah: “Judai rama mite leh Jerusalema chêng zawng zawngte u, hei hi hria ula, ka thusawite hi ngun takin ngaithla rawh u. 15 Hêng mite hi in ngaih angin an rui lo ve, zîng dâr kua vêl* chauh a la nih hi. 16 Hei hi zâwlnei Joela hmanga lo sawi tawh kha a ni zâwk e: 17 ‘Pathianin, “Ni hnuhnûngahte chuan tisa zawng zawng chungah ka thlarau ka leih ang a, in fapate leh in fanute’n thu an hrilh lâwk ang a, in tlangvâlte’n inlârnate an hmu ang a, in putarte’n mumangahte an mang ang. 18 Tin, chûng nîahte chuan ka bâwih pate leh ka bâwih nute chungah pawh ka thlarau ka leih ang a, anni chuan thu an hrilh lâwk ang. 19 Tichuan, vânah thil makte leh leiah chhinchhiahnate ka hmuhtîr ang—chûngte chu thisen te, mei te leh, meikhûte a ni ang. 20 Tin, Jehova* ni ropui leh chhinchhiah tlâk tak a lo thlen hmain nî a thim ang a, thla thisenah a chang ang. 21 Tu pawh Jehova* hming lam apiang chu chhandam an ni ang,” tia a sawi kha,’ a ti a.

22 “Israel mite u, hêng thute hi hre rawh u: Nazaret Isua kha Pathian mi tirh a ni a, Pathianin amah kal tlangin in zîngah thil ropui tak te, thil mak te leh, chhinchhiahnate tiin chiang takin a lantîr kha, chu chu nangmahni ngeiin in hria e. 23 Pathianin Isua chu man a ni dâwn tih hre lâwk mah se, chutiang chuan a thlentîr a. Ani chu dân hre lo mite kutin banah in khêngbet a, in ti hlum ta a ni. 24 Nimahsela, ani chu thihna chelh hlen rual a nih loh avângin, Pathianin kai thovin, thihna ata a chhuah zalên a. 25 Davida’n a chungchâng heti hian a sawi a ni: ‘Jehova* chu ka hmaah* ka awmtîr reng a, tih nghîna ka awm ngai loh nân ani chu ka ding lamah a awm si a. 26 Chuvângin, ka thinlung a hlim a, lâwm takin thu ka sawi a ni. Tin, beiseina nên ka* nung ang; 27 Thlânah* mi hnutchhiah dâwn si lo va, i mi rinawm chu a ṭawih ral i phal hek lo vang. 28 Nangin nunna kawngte mi hriattîr a; i hmaah lâwmna nasa takin mi ti khat ang,’ tiin.

29 “Unaute u, min thlahtu kan pu Davida chungchâng tlang takin ka’n hrilh ang che u. Ani chu a thi tawh a, phûmin a awm tawh bawk a, a thlân pawh tûn thlengin he khuaah hian a la awm a ni. 30 Ani chu zâwlnei a ni a, Pathianin a hnêna, ‘I thlahte zînga pakhat i lalṭhutthlêngah a la ṭhu ang,’ tia a tiam pawh a hre bawk. 31 Ani chuan Krista thawhlehna a hmu lâwk a, ‘Thlâna* hnutchhiah a ni lo vang a, a taksa pawh a ṭawih ral hek lo vang,’ tih a sawi a ni. 32 Pathianin chu Isua chu a kai tho ta ngei a, chu chu kan vai hian a hretute kan ni e. 33 Chuvângin, ani chu Pathian ding lamah chawimawiin a awm a, Pa thutiam thlarau thianghlim chu dawngin, in hmuh leh in hriat ang hian kan chungah a leih ta a ni. 34 Davida chu vânah a lâwn chho lo; nimahsela, amah ngeiin, ‘Jehova’n* ka Lalpa hnênah: “Ka ding lamah ṭhu rawh, 35 i hmêlmate ka rah behtîr* hma loh che chuan,” a ti,’ tiin a sawi si a. 36 Chuvângin, bana in khenbeh tâk Isua kha, Pathianin Lalpa leh Kristaah a siam tih Israel mi zawng zawngin hre ngei rawh se,” a ti a.

37 Tin, chu thu an hriat chuan an inchhîr ta hle a, Petera leh tirhkoh dangte hnênah chuan: “Unaute u, eng nge kan tih tâk ang?” an ti a. 38 Petera chuan an hnênah: “Sim ula, in sualte ngaihdam a nih theih nân Isua Krista hmingin baptisma chang ṭheuh rawh u; tichuan, Pathianin a thlâwna a pêk thlarau thianghlim chu in dawng ang. 39 He thutiam hi nangmahni leh in fate tân te, hla taka awm zawng zawng tân te leh, kan Pathian Jehova* ngeiin a koh apiangte tân a ni e,” a ti a. 40 Thu dang tam tak sawiin an hnênah kim chang takin thu a hril a: “He chhuan sual tak lak aṭang hian inthiar fihlîm rawh u,” tiin anni chu a fuih a. 41 Tin, lâwm taka a thusawi pawmtu apiangin baptisma an chang a, chumi nî chuan mi 3,000 vêl laiin an lo pung ta a. 42 Tichuan, tirhkohte zirtîrna thu ngaihven rengin an awm a, an thil neih zawng zawngte inṭâwmin chawte an eiho va, ṭhahnemngai taka ṭawngṭaiin an awm reng a.

43 Tirhkohte chuan chhinchhiahnate leh thil mak tam tak an ti a, a hmutu apiang chuan Pathian an ṭih ta a. 44 Ringtu lo ni ta zawng zawngte chu awm khâwmin, an thil neih engkim an inṭâwm a. 45 An thil neihte leh an in leh lote an hralh a, an hralhna sum chu mi zawng zawng hnênah an mamawh ang zêlin an sem ṭhîn. 46 Nî tin biak inah inlungrual takin an awm khâwm ṭhîn a, an ei tûrte chu in hrang hrangah an keng khâwm a, chûngte chu hlim tak leh rilru inpawh takin an eiho ṭhîn. 47 Pathian an fak a, mi zawng zawng duhsak an hlawh a. Chu bâkah, Jehova* chuan chhandam ni tûrte chu ringtute zîngah nî tin a belhchhah zêl a.

3 Tin, Petera leh Johana chu ṭawngṭai hun lai, tlai lam dâr thum vêlah* biak inah an han chho va. 2 Chutah chuan, pa pakhat, pian tirh aṭanga kebai an rawn zâwn a, biak ina lûtte hnêna kut a dawh theih nân Kawngkhâr Mawi an tih, biak in kawngkhâr bulah chuan nî tin an rawn dah ṭhîn a. 3 Biak ina Petera leh Johana lût tûr a hmuh chuan, an hnênah kut a lo dawh a. 4 Petera leh Johana chuan chu pa chu ngun takin an en a, Petera chuan a hnênah: “Min han en teh,” a ti a. 5 Tichuan, an hnên aṭanga eng emaw hmuh inbeiseiin anni chu a en a. 6 Petera chuan: “Tangkarua leh rangkachak ka nei lo; nimahsela, ka neih chhun ka pe ang che. Nazaret Isua Krista hmingin tho la, kal rawh!” a ti a. 7 Tichuan, a kut ding lamah vuanin a kai tho va, chawplehchilhin a kête chu a lo dam ta nghâl a. 8 Tin, a zuang tho va, kêin a kal ta a. Kal leh zuang leh Pathian fak chung zêlin an rualin biak inah a lût ve a. 9 Mi zawng zawngin kêa a kal leh Pathian a fak chu an hmu a. 10 Tin, anni chuan biak ina Kawngkhâr Mawi bula kutdawha ṭhu ṭhîna kha a ni tih an hre ta a, mak an tiin, a chunga thil thleng chu rin harsa an ti hle a.

11 Tin, ani chuan Petera leh Johana a la vawn reng lai chuan mi zawng zawngin mak an ti êm êm a, Solomona Hulhliap an tihah chuan an hnênah an rawn tlân khâwm a. 12 Petera’n chu chu a hmuhin, mite hnênah chuan: “Israel mite u, engvângin nge hei hi mak in tih? Keimahni thiltihtheihna leh Pathian kan ngaihsakna avânga he mi hi kaltîr thei ang maiin engvângin nge min en reng? 13 Abrahama te, Isaaka te leh, Jakoba te Pathian, kan pi leh pute Pathian chuan in mantîr tâk a Chhiahhlawh Isua, Pilata’n chhuah a tum chung pawha in duh loh kha a chawimawi ta a nih hi. 14 Ni e, mi thianghlim leh fel tak kha in duh lo va, tualthattu chhuahsak tûr che uin in dîl ta zâwk a. 15 Tichuan, nunna Petu atâna ruat chu in ti hlum ta a. Nimahsela, Pathianin ani chu thihna ata a kai tho va, chu chu a hretute kan ni e. 16 A hming avâng leh amah kan rin avângin, in hmuh leh in hriata hi tihdamin a awm a. Amah* kan rinnain, he mi hi in vaia hmaah a tidam ta var a ni. 17 Unaute u, in rorêltute ang chiah khân nangni pawhin in thil tih kha in hre lo tih ka hria. 18 Nimahsela, Pathianin hetiang kawng hian, zâwlnei zawng zawngte kâa Krista’n hrehawm a tuar tûr thu a lo sawi lâwk kha a thlen famkimtîr a ni.

19 “Chuvângin, in sualte ngaihdam* a nih theih nân sim ula, hawikîr leh rawh u. Chutichuan, Jehova* hnên* aṭang ngeiin hahdamna hunte a lo thleng thei ang a, 20 in tâna ruat Krista Isua pawh a rawn tîr thei ang. 21 Pathianin hmân laia a zâwlnei thianghlimte kâa a lo sawi, thil zawng zawng siam ṭhat lehna hun a thlen hma chuan, ani chu vânah a awm reng tûr a ni. 22 Mosia ngeiin: ‘In Pathian Jehova’n* in unaute zîng aṭangin keimah ang zâwlnei hi a la ruatsak ang che u. In hnêna a sawi apiang chu in zâwm tûr a ni. 23 Tin, chu zâwlnei thusawi zâwm lo apiang chu mite zîng aṭanga tih boral tûr a ni,’ a tih kha. 24 Zâwlnei Samuela aṭanga inṭanin, zâwlnei zawng zawngte khân hêng nîte chungchâng hi fiah takin an lo sawi tawh a ni. 25 Chûng zâwlneite chuan Pathianin in pi leh pute hnêna thu a lo thlun tawh chungchâng an sawi a, chu thuthlung chu in tân pawh a ni. Pathianin Abrahama hnênah: ‘I thlah* avângin leia chhûngkua zawng zawng malsâwm an la ni ang,’ tia thu a lo tiam tawh avângin. 26 Pathianin a Chhiahhlawh chu a kaihthawh hnuah, in thil sual tihte simtîr tûr che u leh malsâwm tûr che uin in hnênah a rawn tîr hmasa a ni,” a ti a.

4 Tin, Petera leh Johana’n mite hnêna thu an sawi lai mêkin puithiam te, biak in hotu te leh, Saddukaite an hnênah an lo kal a. 2 Tirhkohte’n mite an zirtîr avâng leh thihna ata Isua a thawhleh thu vântlâng hmaa an puanzâr avângin an lungni lo hle a. 3 Tin, anni chu an man a, tlai lam a nih tawh avângin a tûk thlengin an hrêng a. 4 Nimahsela, tirhkohte thusawi ngaithlatu tam tak chu ringtute an lo ni a, mipa ringawt pawh 5,000 vêl lai an ni.

5 A tûkah chuan an rorêltu te, upa te leh, dân hre mite* chu Jerusalemah an kal khâwm a. 6 An zîngah chuan puithiam lal Anna bâkah, Kaiapha te, Johana te, Alexandra te leh, puithiam lal chhûngkhat zawng zawngte an tel a. 7 Petera leh Johana chu an zîngah an dintîr a: “Eng thiltihtheihnain nge hêng thilte hi in tih a, tu hmingin nge in tih?” tiin an zâwt a. 8 Tin, Petera chu thlarau thianghlimin a lo khat ta a, an hnênah:

“Rorêltute leh upate u, 9 he kebai chunga thil ṭha kan tih chungchâng leh a lo dam tâk dân hi in hre duh em ni? 10 Nangni zawng zawng leh Israel mi zawng zawngte hian hre rawh u, bana in tih hlum tâk Nazaret Isua Krista, Pathianin thihna ata a kaihthawh leha hming avângin, ani hi in hmaah dam takin a ding a nih hi. 11 Isua chu ‘nangni in satute lung duh loh, a kila lung pawimawh ber lo ni ta’ kha a ni e. 12 Mi dang tu ma hnênah chhandamna a awm lo va, vân hnuaia mihring hming sak zîngah chhandamna kan hmuh theihna tûr hming dang rêng rêng a awm hek lo,” a ti a.

13 Tin, Petera leh Johana huaisenzia an hmuh a, lehkha thiam lo leh mi pângngai mai an ni tih an hriat chuan mak an ti hle a. Tichuan, Isua hnênah an awm ṭhîn tih an lo hre ta a. 14 Kebai dam ta kha, zirtîr pahnihte bula a ding an hmuh chuan, chhân ngaihna rêng rêng an hre lo va. 15 Tichuan, Sanhedrin* aṭanga chhuak tûra thu an pêk hnuin, anniho chu an inrâwn khâwm a: 16 “Hêng mite hi engtin nge kan tih ang? Thup theih rual loh thil mak chhinchhiah tlâk tak an ti a, Jerusalema chêng zawng zawngin chu chu an hria a, keini lahin a dik loh thu kan sawi thei si lo. 17 Chuvângin, hei hi mite zînga a darh zêl loh nân anni hi vau ila, tu hnênah mah he hminga thu sawi leh tawh lo tûrin i hrilh ang u,” an ti a.

18 Tichuan, anni chu an ko va, Isua hminga eng mah sawi tawh lo tûr leh zirtîr tawh lo tûrin thu an pe a. 19 Nimahsela, Petera leh Johana chuan anni chu chhângin: “Pathian mit hmuhin, Pathian thu zawm aiin in thu zawm a dik zâwk leh zâwk loh nangmahni ngeiin rêl rawh u. 20 Keini erawh chu kan thil hmuh leh hriatte hi sawi lovin kan awm thei lo a ni,” an ti a. 21 Tichuan, vawi khat dang an vau leh hnuah, hremna tûr chhan an hmuh loh avâng leh mipui avângin anni chu an chhuah ta a, thil thleng avâng khân mi zawng zawngin Pathian an chawimawi si a. 22 Thil mak* tia an tih dam pa chu kum 40 a chuang tawh a ni.

23 Chhuah an nih hnuah, Petera leh Johana chu zirtîr dangte hnênah an kal a, puithiam lalte leh upate’n an hnêna an sawite chu an hrilh a. 24 Chu chu an hriat chuan, inlungrual taka Pathian hnênah ṭawngṭaiin:

“Lal Chungnungber, vân te, lei te, tuifinriat te leh, a chhûnga awm zawng zawngte Siamtu i ni. 25 Nang chu thlarau thianghlim hmanga i chhiahhlawh kan pu Davida kal tlanga: ‘Engvângin nge hnamte chu an thinur a, mite chuan thil eng mah lo mai mai an ngaihtuah? 26 Leia lalte chu Jehova* leh a hriak thiha* do tûrin an inbuatsaih a, rorêltute pawh anmahni do tûrin an kal khâwm a,’ tia sawitu i ni. 27 He khuaah hian, hriak i thih i chhiahhlawh thianghlim Isua do tûrin, Heroda leh Pontia Pilata te chu hnamte leh Israel mite nên an pung khâwm ta ngei a. 28 Anni chu i thil sawi lâwk thlentîr tûrin an pung khâwm a, chu chu i duh zâwng nêna inmilin, i thiltihtheihnain i thlentîr a ni. 29 Tûnah chuan Aw Jehova,* khawngaihin an mi vaunate hi lo hria la, i bâwihte hi huaisen takin i thu sawitîr zêl la, 30 i chhiahhlawh thianghlim Isua hminga mite ti dam tûr leh, chhinchhiahnate leh thil makte ti tûrin i kut phar zêl ang che,” an ti a.

31 Tin, Pathian hnêna dîlna an thlen zawh* chuan an awm khâwmna chu a lo nghîng a, an vaiin thlarau thianghlimin an lo khat a, Pathian thu huai takin an sawi a.

32 Chu bâkah, zirtîr tam takte chu thinlung leh rilru hmun khatin an awm a, an zînga pakhat mahin an thil neihte chu an ta bîk angin an sawi lo; chu aiin, an thil neih zawng zawngte chu an inṭâwm zâwk a ni. 33 Tin, tirhkohte chuan thiltihtheihna nasa tak nên Lalpa Isua thawhlehna chungchâng thu an hriattîr zawm zêl a, Pathianin a khawngaihna nasa tak chu an vaia chungah a lantîr a. 34 An zîngah tu mah tlachham an awm lo; in leh lo nei zawng zawngte chuan an hralh a, an hralhna sum chu rawn kengin, 35 tirhkohte ke bulah an dah a. Tichuan, mi tin mamawh ang ṭheuh zêlin tirhkohte chuan an sem ṭhîn a. 36 Tin, Josefa, tirhkohte’n, “Barnaba,” tia an koh bawk (chu chu, “Mi Dangte Fuihtu,”* tihna a ni), Levia chi, Kupra thliarkâra mi chuan 37 ram a nei a, chu chu hralhin, a hralhna sum chu tirhkohte ke bulah a rawn dah a.

5 Nimahsela, Anania leh a nupui Saphiri chuan an ram an hralh a. 2 Anania chuan a nupui hriatpuiin an hralhna sum ṭhenkhat chu a zêp ṭhen a, a bâk zawng chu rawn lain tirhkohte ke bulah chuan a rawn dah a. 3 Nimahsela, Petera chuan: “Anania, thlarau thianghlim bum tûr leh ram man zêp ṭhen tûrin, engvângin nge Setana i inthununtîr? 4 I hralh hma khân ram chu i ta a ni lo vem ni? I hralh hnuah pawh i hralhna sum chu i kutah a awm lo vem ni? Engtin nge hetiang thil sual tih hi i ngaihtuah theih? Mihring hnêna dâwt sawi i ni lo va, Pathian hnêna dâwt sawi i ni zâwk e,” a ti a. 5 Chûng thute a hriat chuan Anania chu a tlu a, a thi ta a. Tin, chumi chungchâng hriate chuan an hlau ta êm êm a. 6 Tichuan, tlangvâlte chu an tho va, a ruang chu puana tuamin an zâwn chhuak a, an phûm ta a.

7 Tin, chu thil a thlen aṭanga dârkâr thum hnu vêlah, a nupui chu thil thleng eng mah hre lovin a lo lût a. 8 Petera chuan a hnênah: “Min hrilh rawh, ram chu heti zât chauh hian maw in hralh?” a ti a. Ani chuan: “Aw, khati zât khân a ni,” a ti a. 9 Petera chuan a hnênah: “Engvângin nge Jehova* thlarau fiah tûra in inthurual? Kawngkhâr pâwn lama ke pên ri chu i hria em? I pasal phûmtute ke pên ri a nih chu, nang pawh an zâwn chhuak ang che,” a ti a. 10 Chu veleh, a ke bulah chuan tluin a thi ta nghâl a. Tlangvâlte an lo luh chuan, ani chu thiin an rawn hmu a; tichuan, an zâwn chhuak a, a pasal bulah an phûm ta a. 11 Kohhran pum pui leh chumi chungchâng hretu zawng zawngte chuan an hlau ta hle a.

12 Chu bâkah, tirhkohte chuan mite zîngah chhinchhiahnate leh thil mak tam tak an ti zawm zêl a; tin, Solomona Hulhliapah chuan an vaiin an inhmu khâwm ṭhîn a. 13 Nimahsela, mi dang tu mah an zîngah an tel ve ngam lo; chutih rualin, mite’n anni chu an fak hle a ni. 14 Chu mai bâkah, Lalpa ringtu a hmei a pa tam tak an pung zêl a. 15 Tichuan, dam lote chu kawngpuiah an rawn zâwn chhuak a, chutah chuan Petera a kal paha a hlimthla talin an zînga ṭhenkhat a hliah theih nân, khum têahte leh pherahte an muttîr a. 16 Tin, Jerusalem chhehvêla awm khuate aṭangin dam lote leh ramhuaiin a tih buaite hruaiin mi tam tak an lo kal a; tichuan, an vaiin an lo dam ta vek a.

17 Nimahsela, puithiam lalber leh Saddukaite zirtîrna pawmtu a hnêna awm zawng zawng chu an tho va, îtsîknain an lo khat a. 18 Tichuan, tirhkohte chu an man a, vântlâng tân inah an khung a. 19 Mahse, zânah Jehova* vântirhkohvin tân in kawngkhârte chu hawngin a hruai chhuak a, an hnênah: 20 “Kal ula, biak inah dingin, nunna chungchâng thu zawng zawng hi mite hnênah va sawi zêl rawh u,” a ti a. 21 Chu thu an hriat hnu chuan, khawvâr veleh biak inah lûtin an zirtîr ṭan ta a.

Chutih lai chuan, puithiam lalber leh a hnêna awmte chuan, Sanhedrin-a* rorêltute leh Israel mite zînga upaho zawng zawng chu an ko khâwm a; tichuan, tirhkohte chu an hmaa rawn hruai tûrin tân inah chuan vêngtute an tîr a. 22 Nimahsela, vêngtute an va thlen chuan anni chu tân inah chuan an hmu lo va; tichuan, lêt lehin heti hian an va sawi a: 23 “Tân in chu him taka inkalh leh vêngtute pawh kawngkhâr bula dingin kan hmu a; nimahsela, kan hawn chuan a chhûngah tu mah kan hmu lo,” tiin. 24 Biak in hotu leh puithiam lalte’n chûng thute an hriat chuan, chumiin a thlen theih tûrte ngaihtuahin an mangang ta hle a. 25 Nimahsela, tu emaw lo kalin, an hnênah: “En teh u! Tân ina in khungte khân biak inah dingin mite an zirtîr a nia,” tiin a rawn hrilh a. 26 Tin, biak in hotu chu a hote nên an kal chhuak a, anni chu an rawn hruai a; nimahsela, mipuiin lunga an den an hlauh avângin tharum an hmang lo.

27 An rawn hruai chuan Sanhedrin hmaah an dintîr a. Tin, puithiam lalber chuan zawhna zâwtin, 28 an hnênah: “He hminga zirtîr tawh lo tûr hian khauh takin thu kan pe che u a ni lâwm ni? Nimahsela, en teh u! In zirtîrna thuin Jerusalem in tih khah vek tawh hi, he pa thihna mawh hi min phurhtîr in tum a ni,”* a ti a. 29 Petera leh tirhkoh dangte chuan ani chu chhângin: “Mihring thu aiin Pathian thu kan zâwm zâwk tûr a ni.* 30 Bana* khai kânga in tih hlum tâk Isua kha, kan pi leh pute Pathianin a kai tho va. 31 Israelte an inlamlêt theih nân leh sual ngaihdamna an dawn theih nân, Pathianin ani chu Palai Ropui Ber leh Chhandamtu niin a kut ding lamah a chawimawi ta a ni. 32 Chûng thil chu a hretute kan ni a, Pathianin an rorêltu anga amah pawmtute leh a thu zâwmtute hnêna a pêk thlarau thianghlim pawhin a hriatpui bawk,” an ti a.

33 Chûng thu an hriat chuan an thinrim hle a, tirhkohte chu tih hlum an tum ta a. 34 Nimahsela, Pharisai pakhat Gamaliela chu Sanhedrin-ah a ding a, ani chu mi zawng zawng ngaihsân Dân zirtîrtu a ni a, ani chuan tirhkohte chu pâwna chhuahtîr rih tûrin thu a pe a. 35 Tichuan, an hnênah: “Israel mite u, hêng mite chunga in thil tih tumah hian fîmkhur rawh u. 36 Tûn hma pawh khân mi pawimawh taka inngai Theoda a awm a, a pâwl chu mi 400 vêl laiin an zawm a. Nimahsela, ani chu tih hlum a ni a, amah zuitu zawng zawng pawh an darh vek a, eng mah an ni tawh lo. 37 Chu pa hnuah chuan, chhiarpui laiin Galili mi Juda kha a lo awm leh a, amah zui tûrin mite a thlêm thlu a. Ani pawh chu tih hlum a ni a, amah zuitu zawng zawng pawh an darh ta vek a. 38 Chuvângin, ka hrilh a che u, he thil thlengah pawh hian hêng mite chungah hian eng mah ti lovin chhuah zâwk rawh u. An thil tih tum leh tih mêkte hi mihring aṭanga chhuak a nih chuan a tâwp ve leh mai ang. 39 Nimahsela, Pathian aṭanga chhuak a nih erawh chuan, in ti tâwp thei lo vang; chuti lo chuan, Pathian ngei dodâl in lo ni hlauh palh ang e,” a ti a. 40 Tichuan, a thurâwn chu an pawm a, tirhkohte chu kovin an vua a, Isua hminga thu sawi tawh lo tûra thu pein an kaltîr ta a.

41 Tichuan, Sanhedrin hma aṭang chuan an kal chhuak a, Isua hming avânga mualpho tuar tlâka ngaih an nih avângin an lâwm hle a. 42 Nî tin biak inah leh in tinahte, Krista Isua chanchin ṭha zirtîr leh puan chhuah chu an bâng chuang lo.

6 Tin, chûng hun lai, zirtîrte an pun chhoh zêl lai chuan, nî tin ei tûr semnaah an hmeithaite an ngaihsak tâwk loh avângin, Grik ṭawng hmang Judate chu Hebrai ṭawng hmang Judate chungah an phunnawi a. 2 Sâwm Pahnihte chuan zirtîr zawng zawngte chu ko khâwmin, an hnênah: “Pathian thu zirtîr bânsan a, dawhkâna ei tûr sem kan tân a dik lo ve. 3 Chuvângin, unaute u, nangmahni ngeiin thlarau leh finnaa khat mi hmingṭha mipa pasarih in zîng aṭangin thlang chhuak ula, anni chu he hna thawk tûr hian kan ruat ang e. 4 Nimahsela, keini chu Pathian hnêna ṭawngṭai leh a thu zirtîrin kan awm zêl ang,” an ti a. 5 An thusawi chuan zirtîr zawng zawngte chu a ti lâwm a; tichuan, rinna leh thlarau thianghlima khat mipa an thlang chhuak a, anni chu Stephana te, Philipa te, Prokora te, Nikanora te, Timona te, Parmena te leh, Antiokei khuaa mi Juda sakhuaa inlet* Nikola te an ni. 6 Anni chu tirhkohte hnênah an hruai a, an ṭawngṭai hnuin an chungah an kut an nghat a.

7 Tichuan, Pathian thu chu a darh zau zêl a, Jerusalem khuaah chuan zirtîrte nasa takin an pung zêl a, puithiam tam tak pawh zirtîrte an rawn ni ta a.*

8 Tin, Pathian duhsakna leh thiltihtheihnaa khat Stephana chuan, mite zîngah thil mak leh chhinchhiahna ropui takte a ti a. 9 Nimahsela, mi ṭhenkhat Inkhâwmna Ina Sal Chhuakhote* chu Kurini leh Alexandria khuaa mi ṭhenkhat leh, Kilikia leh Asia* rama mi ṭhenkhat nên Stephana hnial tûrin an lo kal a. 10 Nimahsela, Stephana chuan finna nasa tak leh thlarau thianghlim ṭanpuinaa thu a sawi avângin anni chuan an hnial hneh lo va. 11 Tichuan, “He mi hian Mosia leh Pathian a sawichhiat kan hria,” tia sawi tûrin a rûkin mite an thlêm thlu a. 12 Tin, mi te, upa te leh, dân hre mite an fuihpawrh a, anni chuan Stephana chu rawn pan thutin, tih luihnain an man a, Sanhedrin-ah* an hruai a. 13 Anni chuan thuhretu derte an rawn hruai a, chûng mite chuan: “He mi hian he hmun thianghlim hi sawichhiain, Dân kalhin thu a sawi fo ṭhîn. 14 ‘Nazaret Isua’n he in hi a ṭhiat ang a, Mosia Dân min pêkte a ti danglam ang,’ tia a sawi kan hria,” an ti a.

15 Tin, Sanhedrin-a ṭhu zawng zawng chuan Stephana chu an en reng a, a hmêl chu vântirhkoh hmêl ang maiin an hmu a.

7 Nimahsela, puithiam lalber chuan: “Hêng thute hi a dik em?” a ti a. 2 Stephana chuan: “Unaute leh pate u, min ngaithla teh u. Ropuina Pathian chu kan pu Abrahama hnênah Haran khuaa a awm hma, Mesopotamia rama a awm laiin a inlâr a, 3 a hnênah: ‘I ram leh i chhûngkhatte hnên aṭang hian kal chhuak la, ram ka la entîr tûrah che chuan kal rawh,’ a ti a. 4 Tichuan, Kaldaiho ram aṭang chuan kal chhuakin Haran khuaah a va awm ta a. A pa thih hnuah, chuta ṭang chuan Pathianin tûna in awmna ramah hian a insawntîr leh a ni. 5 Chutih lai chuan, Pathianin rochan tûr eng mah, a ke nghahna tham lek pawh a la pe lo va; nimahsela, fa a la nei lo chung pawhin, amah leh a hnua a thlahte ro atân he ram hi pêk a tiam a ni. 6 Nimahsela, Pathianin a hnênah a thlahte chu mi ramah mikhual* an la nih tûr thu leh, mite’n kum 400 chhûng salah siama an la tih duhdah tûr thu a hrilh a. 7 Tin, Pathianin, ‘Sala an tânna tûr hnam chu ro ka rêlsak ang a, chumi hnuah chuan an lo chhuak ang a, he hmunah hian ka hnênah rawngbâwlna thianghlim an hlân ang,’ tiin a sawi bawk.

8 “Pathianin a hnênah serhtan thuthlung a pe bawk a. Tin, Abrahama’n Isaaka a neih hnuah a ni riat nîah a serh a tansak a, Isaaka chuan Jakoba a nei a, Jakoba chuan thlahtu 12-te kha a nei a. 9 Tin, thlahtute chuan Josefa an îtsîk a; tichuan, Aigupta ramah an hralh a. Nimahsela, a hnênah Pathian a awm a. 10 A hrehawm tawrhna zawng zawngah a chhan chhuak a, Aigupta lal Pharaoa duhsak hlawhtîrin, a hmaah a finzia lantîr theihna hun a pe a. Pharaoa chuan ani chu Aigupta ram awptuah leh a lal in enkawltuah a ruat a. 11 Tin, Aigupta leh Kanaan ram zawng zawngah chuan ṭâm a lo tla a, hrehawm nasa tak a lo thleng a, kan pi leh pute chuan ei tûr rêng rêng an hmu thei ta lo va. 12 Jakoba’n Aigupta ramah buh a awm tih a hriat chuan, kan pi leh pute chu a vawi khat nân a tîr chhuak a. 13 A vawi hnihnaah chuan, Josefa chu a unaute hnênah a inhriattîr a; tin, Josefa chhûngte chu Pharaoa’n a lo hre ta a. 14 Tichuan, Josefa’n a pa Jakoba leh a chhûngte zawng zawng chu Kanaan ram chhuahsan a, Aigupta rama kal tûrin thu a thawn a, chuta kal zât chu mi 75 an ni. 15 Tin, Jakoba chu Aigupta ramah chuan a chhuk a, chutah chuan a thi a, kan pi leh pute pawh chutah chuan an thi a. 16 An ruhte chu Sekem thlengin an zâwn a, chutah chuan Abrahama’n Sekem khuaa Hamora fapate hnên aṭanga tangkaraw pawisaa a lei thlânah chuan an phûm ta a.

17 “Pathianin Abrahama hnêna a puan chhuah a thutiam a lo thlen dâwn hnaihah chuan, Israel mite chu Aigupta ramah chuan nasa takin an lo pung ta a, 18 Josefa hre lo lal dang Aigupta rama a lo lal thleng khân. 19 Chu lal chuan kan pi leh pute chungah thil ṭha lo tak tiin, an nausênte an dam chhuah loh nâna paih tûrin thu a pe a. 20 Chutih lai chuan Mosia a lo piang a, ani chu a duhawm hle a,* a nu leh pate’n thla thum chhûng an inah an enkawl a. 21 Nimahsela, a nu leh a pate’n loh theih loh avânga an paih tâk hnu chuan Pharaoa fanuin a la a, a fapa angin a enkawl ta a. 22 Tin, Mosia chu Aigupta mite finna zawng zawng zirtîr a ni a. Ani chu thusawi thiam tak niin thil ropui tak takte a ti a.

23 “Tin, kum 40 a tlin chuan a unau Israel mite chu tlawh a tum ta a. 24 An zînga pakhat tih duhdah tuar lai a hmuh chuan a chhan a, tih duhdah tuartu phuba chu lain Aigupta mi chu a ti hlum ta a. 25 Ani chuan Pathianin amah hmangin anni chu a chhandam dâwn tih a unaute chuan an hriat a ring a; nimahsela, an hre si lo va. 26 A tûkah chuan, an hnênah a kal leh a, mi pahnih insual lai a va hmu a, anni chu inremtîr tumin: ‘Unau in nih kha, engvângin nge in insual?’ a ti a. 27 Nimahsela, a ṭhenawm kutthlâktu zâwk chuan Mosia chu nam sawnin: ‘Tuin nge kan chunga rorêltuah leh hotuah ruat che? 28 Nimina Aigupta mi i tih hlum ang khân min tih hlum ve i tum a ni maw?’ a ti a. 29 Chu chu a hriatin Mosia chu a tlân bo va, Midian ramah ram dang mi angin a chêng a, chutah chuan fapa pahnih a nei a.

30 “Kum 40 a liam hnuah Sinai Tlâng bul thlalêra hnim buk alhah vântirhkoh pakhat a hnênah a inlâr a. 31 Mosia’n chu chu a hmuhin a thil hmuh chu mak a ti hle a. En fiah tûra a va pan hnaih chuan Jehova* awin: 32 ‘Kei hi i pi leh pute Pathian, Abrahama te, Isaaka te leh, Jakoba te Pathian ka ni,’ tia a sawi chu a hria a. Tin, Mosia chu a khûr a, a enfiah zawm ngam ta lo va. 33 Jehova* chuan a hnênah: ‘I pheikhawk kha phelh rawh, i dinna kha hmun thianghlim a ni si a. 34 Aigupta rama ka mite rah beha an awm chu chiang takin ka hmu a, an rûm ri pawh ka hria a ni, anmahni chhan chhuak tûrin ka lo chhuk a nih hi. Ti teh, Aigupta ramah ka tîr ang che,’ a ti a. 35 Chu Mosia chu: ‘Tuin nge rorêltuah leh hotuah ruat che?’ tia an hnâwl tâk ngei kha a ni a, hnim buka a hnêna vântirhkoh inlâr hmangin, Pathianin hotu leh chhan chhuaktu ni tûrin a tîr a ni. 36 Mosia chuan kan pi leh pute chu Aigupta ram aṭangin a hruai chhuak a, ani chuan Aigupta ramah te, Tuipui Senah te leh, thlalêra kum 40 an awm chhûngte khân thil makte leh chhinchhiahnate a ti a.

37 “Chu Mosia chu Israel mite hnêna: ‘Pathianin in unaute zîng aṭangin keimah ang zâwlnei hi a la ruatsak ang che u,’ tia sawitu kha a ni. 38 Ani chu thlalêra Israel mite zînga awm, Sinai Tlânga amah betu vântirhkoh leh kan pi leh pute bula awm kha a ni a. Ani chuan Pathian thu nungte a hria a, in hnênah a hlân chhâwng a ni. 39 Kan pi leh pute chuan a thu an zâwm duh lo va, ani chu hawisanin an thinlungin Aigupta rama lêt leh a duh a. 40 Arona hnênah: ‘Min hruaitu tûr pathiante min siamsak rawh. Aigupta aṭanga min hruai chhuaktu Mosia lah hi a chungah eng nge thleng kan hre si lo,’ an ti a. 41 Tin, chûng lai chuan bâwng no lem an siam a, milem hmaah chuan inthawina an hlân a, an thil siam chu lâwmin ruai an ṭheh a. 42 Tichuan, Pathianin anni chu a hawisan a, vâna thil awm nî te, thla te leh, arsite an biak theih nân a kalsan ta a, Zâwlneite lehkhabua: ‘Aw, Israel mite u, thlalêrah khân kum 40 chhûngin ka hnênah thilhlan leh inthawinate in hlân em ni? 43 Nimahsela, Moloka puan in leh chibai bûk atâna in siam arsi pathian Rephana lim chu in zâwn ṭhîn a. Chuvângin, Babulon piah lamah ka hnawt bo vang che u,’ tia a inziak ang khân.

44 “Kan pi leh pute’n thlalêrah khân Pathianin a awmpui tih târ langtu puan in an nei a, chu chu Pathianin Mosia a biak laia a lem a hmuhtîr ang chiaha siam a ni. 45 Tin, kan pi leh pute khân chu chu chhawm zêlin, Pathianin an hmaa a hnawh chhuah tâk hnamte awmna ramah khân Josua hovin an luhpui a, chu chu Davida hun thleng khân hetah hian a awm reng a ni. 46 Davida chuan Pathian duhsak a hlawh a, ani chuan Jakoba Pathian tân in sak a duh thu a sawi a. 47 Nimahsela, amah ni lovin Solomona’n in chu a sa ta zâwk a ni. 48 Amaherawhchu, Chungnungbera chu kuta sak inahte a awm lo, zâwlneiin: 49 ‘Jehova’n* heti hian a ti: “Vân hi ka lalṭhutthlêng a ni a, lei hi ka ke nghahchhan a ni. Eng ang in nge mi saksak ang? Ka chawlhna hmun pawh khawiah nge? 50 Hêng zawng zawng hi ka kuta ka siamte an ni lo vem ni?”’ tia a sawi ang khân.

51 “Mi luhlul, beng chhu ngawng leh thinlung sak takte u,* thlarau thianghlim in dodâl fo ṭhîn, in pi leh pute’n an tih ṭhin ang khân. 52 Zâwlneite zîngah in pi leh pute’n an tih duhdah loh tu nge awm? Mi fel tak lo kal tûr puang lâwktute chu an ti hlum a, tûnah chu mi fel tak phatsantute leh ti hlumtute in lo nih tâk hi. 53 Pathianin vântirhkohte hmangin Dân a pe che u a; nimahsela, in zâwm si lo,” a ti a.

54 Tin, chûng thute an hriat chuan an thinur ta hle a, Stephana chu an ha an ṭhial khum a. 55 Nimahsela, Stephana chu thlarau thianghlimin a lo khat a, vân lam a thlîr reng a, Pathian ropuizia leh Pathian ding lama Isua ding a hmu a. 56 Tin, ani chuan: “En teh u! Vânte inhawng leh Pathian ding lama mihring Fapa ding ka hmu,” a ti a. 57 Chu veleh an theih tâwpa ringin an au va, an beng an hup a, ani chu an pan khâwm ta nghâl a. 58 Khawpui pâwna an hruai hnuah, lungin an dêng a. Thuhretu derte chuan an kawrfualte chu tlangvâl pakhat Saula ke bulah an dah a. 59 Tin, an den laiin Stephana chu: “Lalpa Isu, ka nunna* ka kawltîr a che,” tiin a ṭawngṭai a. 60 Tichuan, a ṭhingṭhi a, ring taka auvin: “Jehova,* an thil sual tih mawh hi phurhtîr suh ang che,” a ti a. Chu thu a sawi zawh chuan thihnaah a muhîl ta a.

8 Saula pawhin Stephana tih hlum chu a remti a.

Chumi nî aṭang chuan Jerusalema awm kohhrana unaute chungah nasa taka tih duhdahna a lo inṭan a; tirhkohte tih loh, mi dang zawng zawng chu Judai leh Samari ram hmun tinah an darh ta vek a. 2 Nimahsela, Pathian ngaihsak tute emawin Stephana ruang chu lain an phûm a, nasa takin an ṭah a. 3 Saula erawh chuan kohhrana unaute chu nasa takin a bei ṭan ta a. In tinah luh khungin, a hmei a pain a hnûk chhuak a, tân inah a khung ṭhîn a.

4 Nimahsela, kal darh tate khân an kalna hmun apiangah chanchin ṭha an hril zêl a. 5 Tin, Philipa chu Samari khawpuiah a chhuk a, an hnênah Krista chanchin a puang a. 6 Tin, mipuite chuan Philipa thusawi chu rilru hmun khat puin an ngaithla a, a thil mak tihte chu an hmu bawk a. 7 Mi tam takin ramhuai an pai a, chûng ramhuaite chu ring taka auvin an lo chhuak a. Chu bâkah, zeng leh kebai tam tak tih dam an lo ni ta a. 8 Tichuan, chu khuaa awmte chu an lâwm hle a.

9 Tin, chu khuaah chuan mi pakhat Simona a awm a, ani chu mi ropui takah a inchhâl a, dawi thil a tih ṭhinte chu Samari rama awmte chuan mak an ti ṭhîn hle. 10 Mi zawng zawng, mi tê ber aṭanga mi lian ber thlengin ani chu an ngaihsak ṭhîn a: “He paah hian Pathian Thiltihtheihna Ropui Tak a awm a ni,” an ti a. 11 Tin, a dawi hmanga hun rei tak chhûng mak ti taka a lo siam tawh ṭhin avângin, anni chuan an ngaihsak hle a. 12 Nimahsela, Pathian Ram chanchin ṭha leh Isua Krista hming puangtu Philipa an rin hnu chuan, a hmei a pain baptisma an chang ta a. 13 Simona ngei pawh chu ringtu a lo ni a, baptisma a chan hnuah Philipa hnênah a awm reng a; tin, Philipa thil mak tihte leh thil ropui tak tak tihte a hmuh chuan mak a ti hle a.

14 Tin, Jerusalema awm tirhkohte chuan Samari rama mite’n Pathian thu an pawm ta tih an hriatin, an hnênah Petera leh Johana an tîr a. 15 Anni chu Samari ramah chuan an zuk kal a, an thlen chuan thlarau thianghlim an dawn theih nân an ṭawngṭaisak a. 16 Lalpa Isua hminga baptisma chang chauh an la ni a, an zînga tu mahin thlarau thianghlim an la dawng si lo. 17 Tichuan, Petera leh Johana chuan an chungah an kut an nghat a, thlarau thianghlim an dawng ta a.

18 Tirhkohte’n an chunga kut an nghahna apiangte’n thlarau thianghlim an dawng zêl tih a hmuhin, Simona chuan tirhkohte hnênah pawisa pêk a tum a. 19 Ani chuan: “An chunga kut ka nghahna apiangte’n thlarau thianghlim an dawn ve theihna tûrin he thuneihna hi min pe ve rawh u,” a ti a. 20 Nimahsela, Petera’n a hnênah, “Pathian thilthlâwnpêk pawisaa lei theih i inrin avângin, i pawisa kha i ruala tih boralin awm rawh se. 21 He thilah hian tel vena leh chanvo rêng i nei lo ve, Pathian mit hmuhah i rilru put hmang a dik si lo va. 22 Chuvângin, sim la, i kawng ṭha lo zawhte hi bânsan rawh. Jehova’n* a ngaihdam theih nân che ṭawngṭaiin, i ngaihtuahna ṭha lo hi thlâk ang che; 23 tûr ang mai i ni tih leh fel lohna bâwih i ni tih ka hria,” a ti a. 24 Simona’n anni chu chhângin: “In sawi tâkte kha eng mah ka chunga a thlen loh nân, Jehova* hnênah ṭawngṭaiin min dîlsak rawh u,” a ti a.

25 Tichuan, hmun tina kim chang taka thu an hril hnuah leh Jehova* thute an sawi hnuin, Jerusalemah an haw leh a, an haw pahin Samari mite chênna khaw tam takah thu an hril zêl a.

26 Tin, Jehova* vântirhkohvin Philipa a bia a, a hnênah: “Tho la, chhim lama awm Jerusalem aṭanga Gaza pan thlâkna kawngah khân kal rawh,” a ti a. (Chu chu thlalêr kawng a ni.) 27 Tichuan, a tho va, a kal ta a; tin, chutah chuan Ethiopia mi, mi tilreh, Ethiopia lalnu Kandaki hnuaia thuneihna sâng tak nei, a ro zawng zawng enkawltu a hmu a. Ani chu Jerusalema Pathian be tûra kal a ni a, 28 a haw lamah chuan a tawlailîrah ṭhuin, zâwlnei Isaia thuziakte chu a riin a chhiar a. 29 Tin, thlarau thianghlim chuan Philipa hnênah: “Kal la, tawlailîr saw va hnaih rawh,” a ti a. 30 Philipa chu a sîrah a va tlân a, zâwlnei Isaia thuziakte a ria a chhiar chu a hria a, a hnênah: “I thu chhiarte kha i hre thiam em?” a ti a. 31 Ani chuan: “Tu ma mi hrilhfiah lohvin engtin nge ka hriatthiam theih ang?” a ti a. Tichuan, Philipa chu a bula ṭhu tûrin a sâwm a. 32 Tin, Pathian Lehkha Thu a chhiar lai chu hei hi a ni: “Berâm ang maiin talh tûra hruai a ni a, berâm no a hmul mêttu hmaa ngawi renga a awm angin ani chuan a kâ a âng lo. 33 Tih mualphova a awm chhûngin dik lo taka rorêlsak a ni a. Amah thlahtute chungchâng chu tuin nge sawi ang? Lei aṭanga a nunna lâk bo a ni si a,” tih hi.

34 Tin, mi tilreh chuan Philipa hnênah: “Khawngaihin min han hrilh teh. Zâwlnei hian tu chungchâng nge a sawi? Ama chungchâng nge ni a, mi dang chungchâng?” a ti a. 35 Philipa chuan a thu lo chhiar lai mêk aṭanga ṭanin, Isua chungchâng chanchin ṭha a hnênah a hrilh a. 36 Tin, kawnga an kal lai chuan tui awmna hmun an thleng a, mi tilreh chuan: “En teh! Heta hi tui a awm e; baptisma ka channa tûr engin nge mi dâl?” a ti a. 37* —— 38 Tichuan, tawlailîr chu ti ding tûrin thu a pe a, Philipa leh mi tilreh chu tuiah chuan an zuk chhuk a; tin, Philipa chuan ani chu a baptis ta a. 39 Tui aṭanga an chhuah chhoh chuan, Jehova* thlarauvin Philipa chu a la bo ta nghâl a, mi tilreh chuan a hmu leh ta miah lo va; nimahsela, lâwm takin a kal zêl a. 40 Philipa erawh chu Asdod khuaah a kal a, Kaisari khua a thlen hma loh chuan khaw tinah chanchin ṭha a hril zêl a.

9 Saula erawh chuan, Lalpa zirtîrte vauna thu leh thah a tum thu a la sawi reng a, puithiam lalber hnênah kalin, 2 Lalpa Kawnga* kal a hmuh apiangte chu, a hmei a paa phuar chunga Jerusalema a hruai theihna tûrin, Damaska khuaa inkhâwmna intea pêk tûr lehkhate a dîl a.

3 Tin, Damaska khaw pana a kal lai, a thlen dâwn hnaihin thâwklehkhatah vân aṭangin êngin a rawn chhun a. 4 Tichuan, leiah a tlu a, awin a hnêna: “Saula, Saula, engvângin nge mi tih duhdah?” tia a sawi chu a hria a. 5 Ani chuan: “Lalpa, tu nge i nih?” tiin a zâwt a. Chu aw chuan: “Isua, i tih duhdah hi ka ni. 6 Nimahsela, tho la, khuaah lût la, i tih tûr hrilh i ni ang,” a ti a. 7 Tin, a kalpuite chu sawi tûr hre lovin an ding reng a, aw chu hre mah se, tu mah an hmu si lo. 8 Saula chu lei aṭang chuan a tho va, meng mah se, eng mah a hmu thei ta lo va. Tichuan, a kutah kaiin, Damaska khuaah an hruai lût a. 9 Ni thum chhûng khaw hmu lovin a awm a, eng mah a eiin a in hek lo.

10 Damaska khuaah chuan zirtîr pakhat Anania a awm a, Lalpa’n inlârnain a hnênah: “Anania!” a ti a. Ani chuan: “Lalpa, heta hi ka awm e,” a ti a. 11 Lalpa chuan a hnênah: “Tho la, kawtthlêr, ‘Ngîl,’ an tihah kal la, Juda ina awm Tarsa khaw mi Saula va zawng rawh. Ngai teh! Ani chu a ṭawngṭai mêk a, 12 khua a hmuh leh theih nâna a chunga i kut i nghat lai inlârnaah a hmu a ni,” a ti a. 13 Nimahsela, Anania chuan: “Lalpa, chu pa chuan Jerusalema i mi thianghlimte a tih duhdah nasatzia mi tam takin an sawi ka hria a ni. 14 Tin, hetah pawh i hming lamtu zawng zawngte a man* theihna tûrin, puithiam lalte hnên aṭangin phalna a nei bawk,” a ti a. 15 Nimahsela, Lalpa chuan a hnênah: “Kal mai rawh! Ani chu hnamte hnênah te, lalte hnênah te leh, Israel mite hnênahte ka chanchin puang tûra ka thlan a ni si a. 16 Ka hming avânga hrehawm a tawrh tûr zawng zawngte chiang takin ka hmuhtîr dâwn a ni,” a ti a.

17 Tichuan, Anania chu a kal a, inah chuan a va lût a, a chungah kut nghatin: “Ka unaupa Saula, i lo kal lama kawnga i hnêna inlâr Lalpa Isua khân, khua i hmuh leh theih nân leh thlarau thianghlima i khah theih nân, i hnênah hian min rawn tîr a ni,” a ti a. 18 Thâwklehkhatah a mit aṭangin phuhlip ang tak hi a tla a; tichuan, khua a lo hmu leh thei ta a. Tin, a tho va, baptisma a chang a, 19 chaw a ei a, a lo chak ṭha leh ta a.

Damaska khuaah chuan zirtîrte hnênah ni eng emaw zât a châm a, 20 inkhâwmna inahte chuan Isua chu Pathian Fapa a nih thu a puang ta nghâl a. 21 A thusawi hretu zawng zawng chuan mak an ti hle a: “He pa hi Jerusalema Isua hming lamtute chunga hrehawm tam tak thlentu kha a ni lo vem ni? Heta a lo kal chhan pawh anmahni man a, puithiam lalte hnêna hruai* a ni lo vem ni?” an ti a. 22 Nimahsela, Saula chu a lo chak zual deuh deuh va, Damaska khuaa Juda awmte chu, Isua chu Krista a nih thu fiah taka hriattîrin a hnial dang ṭhîn a.

23 Tin, ni tam tak a liam hnuah, Judate chuan amah tih hlum tumin an phiarru a. 24 Nimahsela, amah an phiarrûkna thu chu Saula’n a lo hria a. Tin, amah an tih hlum theih nân, khawpui kulh kawngkhârahte chuan a chhûn a zânin an châng ṭhîn a. 25 Chuvângin, a zirtîrte chuan ani chu an hruai a, zânah kulh tukverhah bâwmin an thlâk thla a.

26 Jerusalem a thlen chuan, zirtîrte zînga tel a tum a; nimahsela, anni chuan zirtîr a nih an rin loh avângin, an vaiin an hlau va. 27 Tin, Barnaba chu amah ṭanpui tûrin a lo kal a, tirhkohte hnênah hruaiin, kawnga Lalpa a hmuh dân te, Lalpa’n a biak dân te leh, Damaska khuaa Isua hminga huai taka thu a sawi dânte chu chipchiar takin an hnênah a hrilh a. 28 Tichuan, Saula chu an hnênah a awm reng a, Jerusalemah zalên taka lût chhuakin, Lalpa hmingin huai takin thu a sawi ṭhîn a. 29 Ani chuan Grik ṭawng hmang Judate hnênah thu sawiin, anni chu a hnial ṭhîn a; chuvâng chuan, tih hlum an tum phah ta a. 30 Unaute’n chu chu an hriatin, Kaisari khuaah an hruai thla a, Tarsa khuaah an kaltîr a.

31 Tichuan, Judai ram te, Galili ram te leh, Samari ramtea kohhran zawng zawng chu thlamuang taka awmin an nghet deuh deuh va. Ṭih chunga Jehova* rawng an bâwl avâng leh, thlarau thianghlim thlamuanna avângin an lo pung ta zêl a.

32 Tin, Petera chu ram zawng zawng fanga a zin kual pahin, Ludda khuaa awm zirtîrte hnênah a zuk kal a. 33 Chutah chuan mi pakhat Ainia, a zen avânga kum riat lai khuma mu tawh a zuk hmu a. 34 Petera chuan a hnênah: “Ainia, Isua Krista’n a ti dam a che. Tho la, i khum kha siam rawh,” a ti a. Tichuan, a tho ta nghâl a. 35 Ludda leh Saron phaia chêng zawng zawngte’n Ainia chunga thil thleng an hmuh chuan, Lalpa ringtute an lo ni ta a.

36 Tin, Joppa khuaah chuan zirtîr pakhat Tabithi a awm a, chu chu lehlin a nih chuan, “Dorki,”* tihna a ni. Ani chuan thil ṭha tam tak tiin, khawngaih thilthlâwnpêk tam tak a pe ṭhîn a. 37 Ludda khuaa Petera a awm lai chuan Dorki chu a dam lo va, a thi ta a. Tichuan, an bual fai a, in chung pindanah an zalh a. 38 Ludda khua chu Joppa khaw bul lawka awm a ni a, zirtîrte’n chu khuaah chuan Petera a awm tih an hriatin: “Khawngaihin kan hnênah lo kal thuai rawh,” tia ngên tûrin a hnênah mi pahnih an tîr a. 39 Tin, Petera chu a tho va, an rualin a kal ta a. A va thlen chuan in chung pindanah an hruai a, Petera bulah chuan hmeithai zawng zawng an awm a, Dorki’n a dam laia kawr leh kawrfual a siamsakte chu ṭap chungin an lo hmuh a. 40 Tin, Petera chuan an vaiin a chhuahtîr vek a, ṭhingṭhiin a ṭawngṭai a. Tichuan, ruang lam chu a hawi a: “Tabithi, tho rawh!” a ti a. Tabithi chu a lo meng a, Petera a hmuh chuan a lo ṭhu chhuak ta a. 41 Petera chuan banin a kai tho va; tichuan, mi thianghlimte leh hmeithaite chu a ko va, anni chuan Tabithi chu a nung leh tih an rawn hmu a. 42 Chu chu Joppa khaw pum puiin an hre ta vek a, mi tam tak Lalpa ringtu an rawn ni ta a. 43 Petera chu Joppa khuaah chuan savun siamtu Simona inah hun eng emaw chen a châm a.

10 Tin, Kaisari khuaah chuan mi pakhat Kornelia a awm a, ani chu Italy pâwla* sipai za hotu a ni. 2 Kornelia chu Pathian ṭih mi a ni a, an chhûngkuain Pathian an bia a, mite hnênah khawngaih thilthlâwnpêk tam tak a pe ṭhîn a, Pathian hnênah a ṭawngṭai fo ṭhîn bawk. 3 Tichuan, tlai lam dâr thum vêlah* inlârnaa Pathian vântirhkoh a hnêna lo kal chu chiang takin a hmu a, ani chuan: “Kornelia!” a ti a. 4 Kornelia chuan ani chu a en reng a, a hlau va, a hnênah: “Lalpa, eng nge ni?” a ti a. Vântirhkoh chuan a hnênah: “I ṭawngṭainate leh khawngaih thilthlâwnpêk i pêk ṭhinte kha Pathianin a hmu a, a hre reng a ni. 5 Tichuan, tûnah hian Joppa khuaah mite tîr la, Petera tia koh Simona chu va kohtîr rawh. 6 Ani chu tuifinriat kama awm savun siamtu Simona inah a thleng a ni,” a ti a. 7 Amah betu vântirhkohvin a kalsan veleh, ani chuan a chhiahhlawh pahnih leh a rawngbâwltute zînga sakhaw ngaihsak mi tak sipai pakhat a ko va. 8 Ani chuan an hnênah engkim hrilhin Joppa khuaah chuan a tîr ta a.

9 Tin, a tûka kawnga an kal lai, khua an thlen dâwn hnaihah chuan, Petera chu chhûn dâr sâwm pahnih vêlah* ṭawngṭai tûrin in chung zâwlah a chho va. 10 Nimahsela, a ril a ṭâm ta êm êm a, chaw ei a duh a, ei tûr an siam lai chuan inlârna a hmu a. 11 Tichuan, vân inhawng leh thil eng emaw, puan hlai tak ang, a kil lia inhlîng, leia rawn uai thla hi a hmu a. 12 A chhûngah chuan leia nungcha ke pali nei chi tinrêng te, bawkvâka kal chî te leh, chunglêng savate an awm a. 13 Tin, awin a hnênah: “Peter, tho la, talh la, ei rawh!” a ti a. 14 Nimahsela, Petera chuan: “Ni lo ve, Lalpa, thil bawlhhlawh leh thianghlim lo rêng rêng ka ei ngai lo,” a ti a. 15 Tin, aw chuan a vawi hnih nân a rawn bia a, a hnênah: “Pathianin a tih thianghlim tawh chu bawlhhlawh ti suh,” a ti leh a. 16 Chutianga vawi thum a thlen hnu chuan, chu thil chu vânah lâk chhoh a ni ta nghâl a.

17 Petera’n inlârnaa a thil hmuhte awmzia a la ngaihtuah buai mêk lai chuan, Kornelia mi tirhte chuan Simona in chu zawng hmuin, kawngkhâr bulah an lo ding a. 18 Anni chuan in neitu chu an au va, chutah chuan Petera tia koh Simona chu a thlen leh thlen loh an zâwt a. 19 Petera’n inlârna chungchâng a la ngaihtuah reng lai chuan, thlarauvin a hnênah: “Ngai teh! Mi pathumin an zawng a che. 20 Chuvângin, tho la, chhuk la, rinhlelhna nei hauh lovin anni chu zui rawh, ka mi tirhte an ni si a,” a ti a. 21 Tichuan, Petera chu a chhuk a, chûng mite hnênah chuan: “In mi zawn chu heta hi ka awm e, in lo kal chhan chu eng nge ni?” a ti a. 22 Anni chuan: “Sipai za hotu Kornelia, mi fel leh Pathian ṭih mi, Judate zînga mi hmingṭha tak chu a ina ko tûr che leh, i thusawi ngaithla tûra vântirhkoh thianghlim hmanga Pathian kaihhruainate pêk a ni,” an ti a. 23 Tichuan, anni chu ko lûtin, a lo mikhual a.

Tin, a tûkah chuan an rualin a kal a, Joppa khuaa unau ṭhenkhat pawh a rualin an kal ve a. 24 A tûk lehah chuan Kaisari khua chu a thleng a, Kornelia chuan anni chu lo nghâkin, a chhûngkhatte leh a ṭhian ṭhate chu a lo ko khâwm a. 25 Petera a va thlen chuan, Kornelia chuan lo hmuakin a ke bulah bawkkhupin chibai a bûk a. 26 Nimahsela, Petera chuan kaithovin: “Tho rawh, kei pawh mihring ve mai ka ni,” a ti a. 27 Amah be chungin inah chuan a lût a, mi tam tak lo awm khâwm chu a va hmu a. 28 Ani chuan an hnênah: “Judate tân hnam dang mite kawm leh an hnêna kal a thian lohzia chiang takin in hria e; nimahsela, tu mah bawlhhlawh leh thianghlim lo ka ti tûr a ni lo tih Pathianin min hriattîr a ni. 29 Chuvângin, min rawn koh veleh khân hnial lovin ka lo kal a nih hi. Tichuan, ka zâwt a che, min rawn koh chhan chu eng nge ni?” a ti a.

30 Tin, Kornelia chuan: “Ni li kal ta tûn ang hun, tlai lam dâr thum vêlah* ka inah ka ṭawngṭai a. Chutih lai chuan mi pakhat, puan êng tak sin ka hmaah a lo ding a. 31 Ani chuan: ‘Kornelia, i ṭawngṭaina kha ngaihthlâk a ni a, khawngaih thilthlâwnpêk i pêk ṭhinte pawh kha Pathianin a hre reng a ni. 32 Chutichuan, Joppa khuaah mi tîr la, Simona, Petera an tih chu va kohtîr rawh. Ani chu tuifinriat kama savun siamtu Simona inah a thleng a ni,’ a ti a. 33 Tichuan, i hnênah mi ka rawn tîr ta nghâl a, heta i lo kal hi i ti ṭha hle mai. Tûnah chuan Jehova’n* sawi tûra a tih zawng zawng che ngaithla tûrin, kan vaiin Pathian hmaah hetah hian kan awm a nih hi,” a ti a.

34 Chu veleh, Petera chuan heti hian a sawi ṭan ta a: “Tûnah chuan, Pathianin mi duhsak bîk a nei lo tih ka hre thiam tak zet ta. 35 Nimahsela, hnam tin zîngah tu pawh amah ṭih a, thil dik ti apiangin ani chu an ti lâwm ṭhîn. 36 Ani chuan mi zawng zawng Lalpa, Isua Krista kal tlangin remna chanchin ṭha Israel mite hnênah a thawn a. 37 Johana’n baptisma thu a hrilh hnu, Galili aṭanga inṭana Judai ram puma mite sawi huai huai thu kha in hria e: 38 Nazaret mi Isua chanchin, Pathianin thlarau thianghlima hriak a thih dân leh thiltihtheihna a pêk dân chungchâng kha, Pathianin a awmpui avângin thil ṭha ti a, Diabola sawisak zawng zawngte ti damin ram pum pui a fang ṭhîn a. 39 Tin, Judai ram leh Jerusalema a thil tih zawng zawng hriatpuitute kan ni; nimahsela, banah khai kângin ani chu an ti hlum ta a. 40 Pathianin ani chu a ni thum nîah a kai tho va, mite hnêna inlâr theihna hun a pe a, 41 mi zawng zawng hnênah erawh chuan a ni lo; keini, Pathianin a hma aṭanga hriatpuitu atâna a lo ruat tawh sa, thihna ata a thawhleh hnua a hnêna eia inte hnênah chauh hian a ni. 42 Chu bâkah, amah ngei chu Pathianin mi nung leh mitthi rorêlsaktuah a ruat tih mite hnêna puang tûr leh, kim chang taka hriattîr tûrin thu min pe bawk. 43 Ani chu, ‘Tu pawh amah ring apiangin a hmingin sualte ngaihdamna an dawng ang,’ tia zâwlnei zawng zawngte’n a chanchin an hriattîr ṭhina kha a ni,” a ti a.

44 Petera’n chûng thute a la sawi lai mêk chuan, Pathian thu ngaithlatu zawng zawngte chungah chuan thlarau thianghlim a lo thleng a. 45 Petera ruala lo kal ringtu serhtante chuan, hnam dangte chungah pawh Pathian thilthlâwnpêk thlarau thianghlim chu leih a nih avângin mak an ti hle a. 46 Ram dang ṭawngtea an ṭawng leh Pathian an chawimawi chu an hre si a. Tichuan, Petera’n: 47 “Keimahni anga thlarau thianghlim dawngtu hêng mite hi tuia baptisma chang lo tûrin tuin nge dang thei ang?” a ti a. 48 Tichuan, Isua Krista hminga baptisma chang tûrin anni chu thu a pe a. Tin, anni chuan ni eng emaw zât châm tûrin an ngên a.

11 Judai rama tirhkohte leh unaute chuan, hnam dangte pawhin Pathian thu an pawm ta tih an hria a. 2 Tin, Petera’n Jerusalem a thlen chhoh chuan, serhtan thlâwptute chuan ani chu sawisêlin,* 3 a hnênah: “Serhtan lohte inah kalin, an hnênah i ei a,” an ti a. 4 Chu veleh, Petera chuan thil awm dân chu chipchiar takin an hnênah a hrilhfiah a:

5 “Joppa khuaa ka ṭawngṭai laiin inlârna ka hmu a, thil eng emaw* puan hlai tak ang, a kil lia inhlîng, vân aṭanga rawn uai thla ka hmu a, ka bulah tak a lo awm a. 6 Ngun takin ka en a, a chhûngah chuan leia nungcha ke pali nei te, ramsa hlauhawm te, bawkvâka kal chî rannung te leh, chunglêng savate ka hmu a. 7 Tin, awin: ‘Peter, tho la, talh la, ei rawh!’ tia min hrilh ka hre bawk a. 8 Nimahsela, kei chuan: ‘Ni lo ve, Lalpa, thil bawlhhlawh leh thianghlim lo rêng rêng ka kâah a lût ngai lo,’ ka ti a. 9 A vawi hnihna atân vân aṭanga aw chuan min bia a: ‘Pathianin a tih thianghlim tawh chu nangin bawlhhlawh ti suh,’ tiin min chhâng a. 10 Chutianga vawi thum a thlen hnu chuan, engkim chu vânah khai chhohvin a awm leh ta a. 11 Chutih lai tak chuan, Kaisari aṭanga ka hnêna an rawn tirh mi pathumte chu ka thlenna inah chuan an lo thleng reng tawh a. 12 Tichuan, thlarauvin rinhlelhna nei hauh lova anmahni zui tûrin min hrilh a. Tin, hêng unau parukte pawh hian min zui ve bawk a; tichuan, chu pa inah chuan kan lût ta a.

13 “Ani chuan a ina vântirhkoh a hmuh dân min hrilh a, vântirhkoh chuan: ‘Joppa khuaah mi tîr la, Simona, Petera an tih chu va kohtîr rawh. 14 Ani chuan nang leh i chhûngte zawng zawng chhandam in nih theihna tûr a hrilh ang che u,’ tiin a sawi a. 15 Nimahsela, thu ka han sawi ṭan chuan, a tîra thlarau thianghlim kan chunga a thleng ang khân, an chungah pawh a lo thleng ta a. 16 Chu veleh: ‘Johana chuan tuiin a baptis ṭhîn a; nimahsela, nangni erawh chu thlarau thianghlima baptis in la ni ang,’ tia Lalpa’n a sawi kha ka hre chhuak leh ta a. 17 Chuvângin, Pathianin keini Lalpa Isua Krista ringtute hnêna min pêk, thilthlâwnpêk ang bawk kha an hnêna a pêk si chuan, kei tehlul hian Pathian ka dang thei dâwn em ni?”* a ti a.

18 Chûng thute an hriat chuan an hnial ta lo va.* “Chuti a nih chuan, Pathianin hnam dangte pawh nunna an neih theih nâna sim tûrin a duh a nih chu,” tiin Pathian an chawimawi ta a.

19 Tin, Stephana an tih duhdah avânga darh tate chu Phoiniki ram te, Kupra thliarkâr te leh, Antiokei khua thlengin an kal a; nimahsela, Juda mite hnênah chauh thu an hril a. 20 An zînga ṭhenkhat Kupra thliarkâr leh Kurini khua aṭangin Antiokei khuaah an lo kal a, Grik ṭawng hmangte hnênah thu sawiin, Lalpa Isua chanchin ṭha an puang a. 21 Anni chu Jehova’n* a ṭanpui a, mi tam tak ringtu lo niin Lalpa an zui ta a.

22 An chanchin chu Jerusalema kohhran beng a lo thlen chuan, Antiokei khua thlengin Barnaba an tîr chhuak ta a. 23 A va thlen chuan, Pathian khawngaihna nasa tak a hmu a, a lâwm hle a, thinlung zawng zawnga Lalpa thu zâwm zêl tûrin an vaiin a fuih a. 24 Ani chu mi ṭha tak a ni a, thlarau thianghlim leh rinnaa khat a ni. Chuvâng chuan, mipui tam takin Lalpa an ring ta a. 25 Tichuan, Saula a hmuh hma lohva zawng tûrin Barnaba chu Tarsa khuaah a kal ta a. 26 A hmuh hnuah Antiokei khuaah a hruai a. Chutah chuan kum khat zet kohhrana unaute bulah an awm a, mi tam tak a zirtîr ṭhîn a, Antiokei khua chu Pathian kaihhruainaa zirtîrte Kristian tia an koh hmasakna ber a ni.

27 Chûng hun lai chuan, Jerusalem aṭangin Antiokei khuaah zâwlneite an zuk kal a. 28 An zînga pakhat Agaba chu a ding a, lei pum puia ṭâm nasa tak a tlâk tûr thu thlarau thianghlim ṭanpuinain a sawi lâwk a, chu ṭâm chu Klaudia hun lai khân a tla a ni. 29 Tin, zirtîrte chuan Judai rama chêng an unaute tân an theih tâwk ṭheuhva chhawmdâwlna* thawn an tum a. 30 Upate hnêna ṭanpuina thawnin chutiang chuan an ti a, chu chu Barnaba leh Saula’n an kensak a ni.

12 Chutih hun lai vêl chuan, lal Heroda’n kohhrana mi ṭhenkhat a ti duhdah ṭan a. 2 Ani chuan Johana unaupa Jakoba chu ngûnhnâma sât hlum tûrin sipaite thu a pe a. 3 Chu chuan Judate a ti lâwm tih a hmuhin, Petera pawh man tûrin a sipaite chu a hrilh a. (Chu chu, Chhang Dawidim Telh Loh Kût lai a ni.) 4 Sipaite chuan Petera chu manin tân inah an khung a, sipai pâwl liin, pali ṭheuh zêlin an invên chhâwk a, ani chuan Kalhlên Kût zawha mite hmaa hruai chhuah* a tum a ni. 5 Chuvângin, Petera chu tân ina khung a la ni rih a; nimahsela, kohhrana unaute chuan nasa takin Pathian hnênah an ṭawngṭaisak a.

6 Tin, Heroda’n Petera hruai chhuah a tum hma zân chuan Petera chu khaidiat pahnih bunin sipai pahnih inkârah a mu a; kawngkhâr bula vêngtute pawhin tân in chu an vêng reng a. 7 Nimahsela, ngai teh! Jehova* vântirhkoh pakhat a lo ding a, tân in chhûng chu a lo êng a, Petera chu a dârah khawihin a kai tho va, a hnênah: “Tho vat rawh!” a ti a. Tichuan, khaidiatte chu a kut aṭangin a tla ta a. 8 Vântirhkoh chuan a hnênah: “I thawmhnaw ha la, i pheikhawk bun rawh,” a ti a. Petera chuan chutiang chuan a ti a. A hnuah vântirhkoh chuan: “I kawrfual ha la, min zui zêl rawh,” a ti a. 9 Tichuan, a chhuak a, a zui zêl a. Nimahsela, vântirhkoh thil tih chu a tak a ni tih a hre lo, inlârna a hmu emaw a ti a ni. 10 Vêngtute awmna hmasa ber leh a dawttu an pelh hnu chuan, tân in aṭanga chhuak a, khawpui luhna tûr thîr kawngkhâr chu an thleng a. Chu kawngkhâr chu an tân amahin a inhawng a. An chhuah hnuah kawtthlêr pakhatah an chhuk a, vantirhkoh chuan a kalsan ta nghâl a. 11 Tin, Petera chuan thil thleng chu a tak ngei a ni tih a hre ta a, ani chuan: “Tûnah chuan Jehova’n* a vântirhkoh tîrin, Heroda kut aṭang leh Judate’n ka chunga thleng tûra an beisei zawng zawng lak aṭangin min chhan chhuak tih dik takin ka hre ta,” a ti a.

12 Chumi a hriat hnu chuan Johana, Marka tia an kohva nu Mari inah a kal a; chutah chuan, mi tam tak awm khâwmin an lo ṭawngṭai a. 13 In hungna kawngkâ a kik chuan, hawng tûrin chhiahhlawh nula Rodi a va kal a. 14 Petera aw a ni tih a hriat chuan a lâwm hle a, kawngkâ chu hawng lovin inah a tlân lût a. In hungna kawngkâa Petera a awm thu a va sawi a. 15 Anni chuan a hnênah: “I â ta a nih hi,” an ti a. Nimahsela, ani chu Petera ngei a nih thu sawiin a ṭang tlat a. Anni chuan: “A vântirhkoh a nih chu,” an ti a. 16 Petera erawh chuan kawngka bulah awmin a la kik reng a, an han hawna amah an hmuh chuan mak an ti hle a. 17 Nimahsela, ani chuan ngawi tûrin anni chu a kutin a zâp a, Jehova’n* tân in aṭanga a hruai chuah dân chu kimchang takin a hrilh a. An hnênah: “Hêng thilte hi Jakoba leh unau dangte hnênah va hrilh rawh u,” a ti a. Tichuan, a chhuak a, hmun dangah a kal ta a.

18 Khua a lo vâr chuan, sipaite chu Petera a awm tâk loh avângin an buai ta hle a. 19 Heroda chuan nasa takin a zawntîr a; nimahsela, an hmu lo va. Vêngtute chu thu zâwt fiahin, hrem tûra hruai tûrin thu a pe a. Heroda erawh chu Judai ram aṭangin Kaisari khuaah a zuk kal a, chutah chuan hun eng emaw chen a awm a.

20 Tin, Tura leh Sidon mite chungah chuan a thinur hle a. Lal Heroda ram aṭanga ei turte lei ṭhîn chûng rama chêngte chu rilru hmun khat puin an lo kal a. Lal in enkawltu Blasta chu anmahni ṭanpui tûrin an ngên a. Tichuan, lal chu inremna thu an sawipui ta a. 21 Ni khat chu mite an kal khâwm ṭumin, Heroda chuan lal thuam a inbel a, rorêlna ṭhutthlêngah ṭhuin mipui hmaah thu a sawi ta a. 22 Chuta kal khâwmte chu: “Pathian aw a ni, mihring aw a ni lo!” tiin an au va. 23 Heroda chuan Pathian hnêna chawimawina a hlan loh avângin, Jehova* vântirhkohvin chawplehchilhin a hrem a, rûlhûtin a ei a, a thi ta a.

24 Nimahsela, Jehova* thu chu darh zau zêlin ringtu an lo pung zêl a.

25 Barnaba leh Saula erawh chu Jerusalema chhawmdâwlna hna an thawh zawhin an lêt leh a, Johana, Marka tia koh bawk chu an hruai ve a.

13 Antiokei khuaa kohhranah chuan zâwlneite leh zirtîrtute an awm a, anni chu: Barnaba te, Nigera tia koh Sumeona te, Kurini khuaa mi Lukia te, rorêltu Heroda lehkha zirpui Manaina te leh, Saula te an ni. 2 Anni chu Jehova* rawngbâwl* leh chaw ngheia an awm laiin, Pathianin a thlarau thianghlim hmangin, “Barnaba leh Saula hi hna thawk tûrin ka ko va; chuvângin, ka tân ti hrang rawh u,” tiin a hrilh a. 3 Tichuan, chaw ngheia an ṭawngṭai zawhin, an chungah an kut an nghat a, an kaltîr ta a.

4 Tin, Barnaba leh Saula chu Pathian thlarau thianghlim tirhin Selukia khuaah an kal a, chuta ṭang chuan lawngin Kupra thliarkâr an pan ta a. 5 Salamis khua an thlen chuan, Judate inkhâwmna inahte chuan Pathian thu an hril ṭan ta a. Johana’n anni chu a ṭanpui a.

6 Thliarkâr pum pui chu Paphos thlenga an fan chhuah hnuah, Juda mi pakhat dawithiam leh zâwlnei der Bar-Isua an hmu a. 7 Ani chu Kupra thliarkâra rorêltu* mi fing tak Serjia Paula hnêna awm a ni a. Serjia Paula chuan Pathian thu hriat a châk êm avângin, Barnaba leh Saula chu a hnênah a ko va. 8 Nimahsela, dawithiam Eluma (Eluma tih chu dawithiam tihna a ni) chuan rorêltu chu Pathian thu ngaithla lo tûra a rilru lâk pên tumin anni chu a dodâl a. 9 Tichuan, Saula, Paula tia koh bawk chu thlarau thianghlimin a lo khat a, Eluma chu a en reng a. 10 A hnênah: “Nang mi bum hmang leh sualna tinrênga khat pa, nang Diabola fapa, nang felna tinrêng hmêlma pa, engtia rei nge Jehova* kawng dikte i tih khawloh zawm zêl dâwn? 11 En rawh! Jehova’n* a hrem ang che, i mit a del ang a, hun eng emawti chhûng ni êng i hmu lo vang,” a ti a. Chawplehchilhin chhûm chhah tak leh thimin a bawh ta nghâl a. Tichuan, amah kaitu tûr a dap ta ruai a. 12 Tin, rorêltuin thil thleng chu a hmu a, Jehova* zirtîrna chu mak a tih êm avângin ringtu a lo ni ta a.

13 Tin, Paula chu a ṭhiante nên Paphos khua aṭangin lawngin an chhuak a, Pamphulia rama Perga khua an thleng a. Mahse, Johana’n anni chu kalsanin, Jerusalemah a lêt leh ta a. 14 Nimahsela, anni chu Perga khua aṭanga kal zêlin, Pisidia rama Antiokei khua an thleng a. Sabbath nîah inkhâwmna inah lûtin an ṭhu a. 15 Vântlâng hmaa Dân leh Zâwlneite thu chhiar a nih hnuah, inkhâwmna in hotute chuan Paula leh Barnaba hnênah: “Unaute u, mite tân hian fuihna thu sawi duh in neih chuan sawi rawh u,” an ti a. 16 Tichuan, Paula chu a ding a, ngawi tûrin anni chu a kutin a zâp a:

“Israel mite leh Pathian ṭihtute u, ngaithla rawh u. 17 Hêng Israel mite Pathian hian kan pi leh pute kha a thlang a, Aiguptaa ram dang mi anga an awm lai khân anni chu a chawimawi a. Chuta ṭang chuan bân pharin a hruai chhuak ta a. 18 Tin, thlalêra kum 40 chhûng vêl an awm lai khân, an chungah dawhtheihna a lantîr reng a. 19 Kanaan rama hnam sarihte a tih boral hnuah, an ram chu rochun atân kan pi leh pute hnênah a pe a. 20 Chûng zawng zawng chu kum 450 chhûng vêla thleng a ni.

“Chumi hnuah, zâwlnei Samuela thlengin an hnênah rorêltute a pe a. 21 Nimahsela, a hnuah lal an dîl a, Pathianin Benjamina hnama mi, Kisa fapa Saula chu kum 40 chhûng an chunga rorêl tûrin a pe a. 22 Pathianin ani chu a lâk bo hnuah an lal atân Davida a thlang a, a chanchin heti hian a hriattîr tawh a ni: ‘Jesaia fapa Davida, ka thinlung ang pu mi ka hmu ta, ani chuan ka duh zâwng zawng zawng a ti ang,’ tiin. 23 A thutiam angin, Pathianin chu mi thlah* aṭang chuan Israelte chhandamtu Isua a rawn thlen a. 24 Isua a lo thlen hmain Johana chuan an simzia târ lan nâna baptisma chang tûrin, Israel mi zawng zawng hnênah thu a hril a. 25 Nimahsela, Johana’n a rawngbâwlna a zawh dâwn hnaihah: ‘Tu nge nia min ngaih? Ani chu ka ni lo. Mahse, ngai teh u! Ka hnuah mi pakhat a lo kal ang, kei chu a pheikhawk phelh tlâk pawh ka ni lo,’ a ti a.

26 “Unaute u, Abrahama thlahte leh in zînga Pathian ṭihtute u, chu chhandamna thu chu Pathianin kan hnênah a rawn thlen ta a ni. 27 Jerusalema chêngte leh an rorêltute’n ani chu an hre si lo. Ro an rêlsak khân, sabbath nî apianga vântlâng hmaa chhiar ṭhin Zâwlneite thusawi kha an thlen famkimtîr a ni. 28 A chungah tih hlumna tûr chhan eng mah an hmu lo chung pawhin, Pilata hnênah ti hlum tûrin an ngên a. 29 A chungchânga thuziak zawng zawng an thlen famkimtîr zawhin, ani chu ban* aṭangin an la thla a, thlânah* an zalh ta a. 30 Nimahsela, Pathianin thihna ata a kai tho va, 31 Galili aṭanga Jerusalema amah zui chhotute hnênah ni tam tak chhûng a inlâr a. Tûnah chûng mite chuan a chungchâng mite hnênah an puang a ni.

32 “Kan pi leh pute hnêna Pathian thutiam chungchâng chanchin ṭha in hnênah kan sawi a nih hi. 33 Pathianin Isua kai thovin, keini an thlahte chungah hian chu chu a thlen famkimtîr a ni. Fakna hla* pahnihnaa: ‘Ka fapa i ni a, vawiinah hian i pa ka ni ta,’ tia a inziak ang chiah khân. 34 Thi thei leh ṭawih thei taksa pu leh tawh ngai lo tûrin Pathianin ani chu thihna ata a kai tho va: ‘Davida hnêna ka tiam hmangaihna kha, i chungah rinawm* takin ka lantîr ang,’ tia sawiin chumi dikzia chu a nemnghet a. 35 Fakna hla* dangah pawh: ‘I mi rinawm chu a ṭawih ral i phal lo vang,’ tiin a sawi bawk. 36 Kawng lehlamah, Davida chuan a dam chhûng zawng Pathian duh zâwng tiin thihnaah a muhîl ta a, a pi leh pute hnênah an zalh a, a ruang pawh a ṭawih ral tawh a ni. 37 Nimahsela, Pathianin a kaihthawha erawh kha chu a ṭawih ral ve lo.

38 “Chuvângin, unaute u, hei hi hre rawh u, amah avâng chauhvin sualte ngaihdamna a lo awm a, chu chu in hnênah puan chhuah mêk a ni. 39 Mosia Dâna thiam in chan theih lohna zawng zawngah khân, amah avângin a ringtu apiangte chu thiam chang an ni. 40 Chuvângin, Zâwlneite sawi kha in chunga a thlen loh nân fîmkhur rawh u: 41 ‘Hmusittute u, en rawh u, mak ti ula, boral rawh u, mi tu pawhin kimchang takin hrilh che u mah sela, in âwih ngai loh tûr hna in dam laiin ka thawk a nih hi,’ tih hi,” a ti a.

42 Tin, an kal chhuak a, mite chuan chumi chungchâng chu Sabbath Nî lo awm leh tûra sawi tûrin an ngên a. 43 Inkhâwm bânah chuan Judate leh Juda sakhuaa inlet* Pathian betu mi tam takin Paula leh Barnaba chu an zui a, anni chuan Pathian khawngaihna nasa tak dawng tlâka awm reng tûrin anmahni zuitute chu an lo fuih a.

44 Sabbath Nî a lo thlen leh chuan, khuaa mi zawng zawng deuhthaw chu Jehova* thu ngaithla tûrin an lo kal khâwm a. 45 Judate’n mipuite an hmuh chuan thîknain an lo khat a. Tichuan, Paula thusawi chu hnialin Pathian an sawichhe ta a. 46 Tin, Paula leh Barnaba chuan huaisen takin an hnênah: “Pathian thu hi in hnêna sawi hmasak tûr a ni; nimahsela, in ngaihthlâk duh loh avâng leh chatuana nung tlâk in ni lo tih nangmahni ngeiin in lantîr avângin, hnam dangte hnênah thu kan hril tawh ang. 47 Jehova’n:* ‘Hnam dangte ti êngtu atân ka ruat a che, kâwlkil thlenga chhandamtu i nih theih nân,’ tiin thu min pe si a,” tiin an sawi a.

48 Hnam dangte’n chu thu an hriat chuan an lâwm hle a, Jehova* thu ropuizia an sawi a, an thinlunga chatuan nunna petu thutak pawm duhna nei zawng zawngte chu ringtu an lo ni a. 49 Tichuan, Jehova* thu chu ram pumah a darh chhuak ta a. 50 Nimahsela, Judate chuan Pathian ṭihtu hmeichhe zahawmte leh khawtlâng hruaitute an fuihpawrh a, Paula leh Barnaba chu tih duhdahtîrin an ram aṭangin an hnawt chhuak a. 51 Paula leh Barnaba chuan anmahni vaukhân nân an kêa vaivut an thing thla a; tichuan, Ikonion khuaah an kal ta a. 52 Tin, zirtîrte chu lâwmna leh thlarau thianghlimin an khat zawm zêl a.

14 Tin, Ikonion khuaah chuan Paula leh Barnaba chu Judate inkhâwmna inah an lût a. Thiam taka thu an sawi avângin Juda mi leh Grik mi tam tak ringtu an lo ni a. 2 Nimahsela, Juda mi ring duh lote chuan hnam dangte chu fuihpawrhin, unaute chu an huattîr a. 3 Tin, tirhkohte chu rei tak an châm a, Jehova* thuneihnain huai takin thu an hril ṭhîn a. Pathianin anmahni hmanga chhinchhiahna leh thil mak tam tak tiin, a khawngaihna nasa tak thu chu a hriattîr ṭhîn a. 4 Nimahsela, khuaa mi tam tak chu an inṭhen a, ṭhenkhatin Judate an ṭan a, mi dangin tirhkohte chu an ṭan thung a. 5 Hnam dang te, Juda te leh, an rorêltute chuan zahthlâk taka siam leh lunga den an tum a. 6 Tirhkohte’n chu chu an hriatin, Lukaoni khua te, Lustra khua te, Derbe khua te leh, a chhehvêl ramahte an tlânchhia a. 7 Chûng hmunahte chuan chanchin ṭha an hril zêl a.

8 Tin, Lustra khuaah chuan pian tirh aṭanga ke zeng mi pakhat a ṭhu ṭhîn a. 9 Chu pa chuan Paula thusawi chu a ngaithla a. Paula chuan ani chu a en reng a, rinna a nei tih leh tih dam a ni thei tih a rinzia a hmuh chuan: 10 “I kêin ding rawh,” tiin aw ring takin a hrilh a. Tichuan, chu pa chu a zuang tho va, kêin a kal ta a. 11 Mipuite’n Paula thil tih chu an hmuhin, Lukaoni ṭawngin: “Pathiante chu mihring anga rawn changin kan hnênah an lo chhuk a nih hi!” tiin ring takin an au va. 12 Tichuan, Barnaba chu, ‘Zeusa,’* tiin an ko va, Paula erawh chu thusawitu ber a nih avângin, ‘Hermesa,’* tiin an ko thung a. 13 Khawpui luhna bula awm Zeusa biak ina puithiam pakhat chuan, khawpui kawngkhâr bulah bâwng pate rawn kaiin, pangpâr ṭhite a rawn keng a, puithiam leh mipuite chuan Paula leh Barnaba hnênah inthawina hlan an tum a.

14 Nimahsela, tirhkoh Barnaba leh Paula’n chu chu an hriatin, an kawrfual an pawt thlêr a. Mipui zîngah chuan hmanhmawh taka tlân lûtin, aw ring takin: 15 “Ṭhiante u, engvângin nge hêng thilte hi in tih? Keini pawh in hrehawm tawrh ang bawk tuar mihring ve mai kan ni. Hêng thil sâwt lote hi hawisana vân te, lei te, tuifinriat te leh, a chhûnga awm zawng zawngte siamtu Pathian nung lam in lo hawi theihna tûrin, in hnênah chanchin ṭha kan puang a nih hi. 16 Hmân laiin hnam zawng zawngte chu anmahni duh dâna an awm a phalsak a. 17 Chuti chung pawhin, a thil ṭha tihtein a inhriattîr a, vân aṭanga ruah pe che uin, in thil thar chhuahte nasa takin a ti pung a, ei tûra ti tlai che uin, in thinlung lâwmnain a ti khat ṭhîn,” an ti a. 18 Chûng an thil sawite hmang chuan mipuite chu an hnêna inthawi lo tûrin an khap thei ta hrâm a.

19 Amaherawhchu, Antiokei khua leh Ikonion khua aṭanga lo kal Judate chuan mipuite chu an hmin a. Tichuan, Paula chu lungin an dêng a, a thi emaw tiin khaw pâwnah an hnûk chhuak a. 20 Nimahsela, zirtîrte’n an din hual laiin Paula chu a rawn tho va, khuaah chuan a lût leh a. Tin, a tûkah Barnaba nên Derbe khuaah an kal ta a. 21 Chu khuaah chuan chanchin ṭha hril a, zirtîr tam tak an siam hnuah Lustra khuaah te, Ikonion khuaah te leh, Antiokei khuaahte an kîr leh a. 22 Chutah chuan zirtîrte ti chakin: “Hrehawm tam tak tuarin Pathian ramah kan lût tûr a ni rêng a ni,” tia sawiin rinnaa nghet reng tûrin an fuih a. 23 Chu bâkah, kohhran tinah upate ruatin, chaw ngheiin an ṭawngṭai a. Paula leh Barnaba chuan an rin Jehova* hnênah anni chu an kawltîr a.

24 Tichuan, Pisidia ram kal tlangin Pamphulia ramah an lût a. 25 Perga khuaa thu an hrilh hnuin, Attalia khuaah an chhuk thla a. 26 Chuta ṭang chuan Antiokei panin lawngin an chhuak a, chu khua chu tûna an hnathawh zawh tâk thawk tûra unaute’n Pathian khawngaihna nasa tak an kawltîrna hmun kha a ni.

27 An thlen hnu chuan, kohhrana unaute an ko khâwm a, Pathianin anmahni hmanga thil tam tak a tihte leh, hnam dangte pawhin an rin theihna tûra kawng a hawnsakziate chu an hrilh a. 28 Tin, zirtîrte hnênah chuan hun rei tak an châm ta a.

15 Tin, Judai ram aṭangin mi ṭhenkhat an lo chhuk a, anni chuan unaute chu: “Mosia dân anga serh in tan loh chuan chhandam in ni thei lo vang,” tiin an zirtîr a. 2 Nimahsela, chûng mite ngaih dân leh Paula leh Barnaba ngaih dân chu a inkalh a, nasa taka an inhnial hnuah, Paula te, Barnaba te leh, mi ṭhenkhat chu serhtan chungchâng sawipui tûra Jerusalema tirhkohte leh upate hnêna chho tûrin ruahmanna an siam a.

3 Tichuan, kohhrana unaute’n an thlah hnuah, chûng mite chuan Phoiniki leh Samari ram pal tlang zêlin, hnam dangte’n Pathian lam an hawi thu chipchiar takin an hrilh pah zêl a, chu chuan unau zawng zawngte a ti lâwm hle a ni. 4 Tin, Jerusalem an thlen chuan kohhrana unau te, tirhkoh te leh, upate’n ṭha takin an lo lâwm a, anmahni hmanga Pathianin thil tam tak a tihte chu an hrilh a. 5 Nimahsela, Pharisaite zirtîrna pawmtu ṭhenkhat, ringtu ni tate chu an ṭhutna aṭangin an ding chhuak a: “An tân serhtan a ngai a, Mosia Dân pawh zâwm tûra thupêk pêk an ngai a ni,” an ti a.

6 Tichuan, tirhkohte leh upate chu chumi chungchâng ngaihtuah tûr chuan an kal khâwm a. 7 Sawihona nasa tak* neih a nih hnuah, Petera chu thovin an hnênah: “Unaute u, hnam dangte’n chanchin ṭha an hriat nân leh an rin theih nân Pathianin in zîng aṭangin mi thlang tih hmânah in hre tawh e. 8 Thinlung hretu Pathianin kan hnêna min pêk ang bawk khân, an hnênah pawh thlarau thianghlim pein anni chu a pawm tih a lantîr tawh a. 9 Tin, keini leh anni min thliar hrang lo va, rinnain an thinlung a ti thianghlim zâwk a ni. 10 Chutichuan, engvângin nge kan pi leh pute leh keini pawhin kan phurh zawh loh nghâwngkawl kha, zirtîrte nghâwnga bah tuma tûnah hian Pathian in fiah ni? 11 Lalpa Isua khawngaihna nasa tak avângin chhandam kan ni ang tih kan rin ang bawk hian anni pawhin an ring a ni,” a ti a.

12 Tichuan, an vaiin an ngawi ta a, Barnaba leh Paula’n Pathianin hnam dangte zînga anmahni hmanga chhinchhiahnate leh thil mak tam tak a tih an sawite chu an ngaithla a. 13 Thu an sawi zawh chuan Jakoba’n: “Unaute u, min ngaithla teh u. 14 Kan hriat tawh angin, Pathianin hnam dangte a hriat reng dân leh, an zîng aṭanga a hming pu tûrte a thlan ṭan dân Sumeona’n min hrilh tawh a. 15 Chûng thute chu Zâwlneite thuziak nên a inrem a ni. Chutah chuan, heti hian a inziak a: 16 ‘Chûng hnuah chuan ka lêt leh ang a, Davida in* chim tawh chu tung ding lehin, a chhe laite ka siam ṭha ang a, ka din ṭha leh ang. 17 Tin, mi dang a la bâng zawngte chuan hnam tina mite nên thinlung zawng zawnga Jehova* an zawn theih nân, hêng thilte titu Jehova* chuan a hming an put thu a sawi tawh a, 18 chu chu hmân lai aṭangin a hre tawh a ni,’ tiin. 19 Chuvângin, ka thu tlûkna* chu Pathian rawngbâwl duh hnam dangte ti buai lo va, 20 milem biakna thil bawlhhlawh lak aṭang te, nungchang bawlhhlawhna* lak aṭang te, sa rehhlum* eina lak aṭang te leh, thisen lak aṭangtea inthiar fihlîm tûra lehkha thawn hi a ni. 21 Hmân lai aṭang tawhin Mosia chuan khaw tinah a thute hriltu a nei reng ṭhîn, a lehkhabu ziahte chu sabbath nî apianga inkhâwmna inahte a rîa an chhiar ṭhin avângin,” a ti a.

22 Tin, tirhkoh te, upa te leh, kohhran pum pui chuan an zîng aṭanga an thlan chhuahte chu Paula leh Barnaba ruala Antiokei khuaa kaltîr an remti tlâng a. Tichuan, unaute zînga kaihruaitu Barsaba tia koh Juda leh Sila te an tîr ta a. 23 He thu hi ziakin anni chu an kentîr a:

“In unaute, tirhkohte leh upate hian Antiokei khua te, Suria ram leh Kilikia rama awm hnam dang unaute chibai kan bûk a che u! 24 Mi ṭhenkhat kan zîng aṭangin an kal chhuak a, an thusawia ti buai che uin, hruai sual an tum che u tih kan lo hria a, anni chu eng kaihhruaina mah kan pe si lo va. 25 Chuvângin, mite thlang chhuak a, kan hmangaih tak Paula leh Barnaba ruala in hnêna rawn tirh kan remti tlâng a. 26 Paula leh Barnaba hi kan Lalpa Isua Krista hming avânga an nun hlân ngamte an ni. 27 Kan lehkhathawna thute tho hi ṭawngkâa an hrilh theihna tûr che uin, Juda leh Sila kan rawn tîr a nih hi. 28 Tichuan, thlarau thianghlim leh keinin hêng thil pawimawhte chauh lo hi chu, in chungah phurrit dang belhchhah loh ṭha kan ti: 29 milem hmaa thilhlan lak aṭang te, thisen lak aṭang te, sa rehhlum* eina lak aṭang te leh, nungchang bawlhhlawhna* lak aṭangtein inthiar fihlîm reng rawh u. Chûng thilte lak aṭanga in inthiar fihlîm a nih chuan in tân a ṭha ang. Dam takin awm rawh u!” tiin.

30 Tichuan, chûng mite chu an chhuak a, Antiokei khuaah an chhuk a, zirtîr zawng zawngte chu ko khâwmin, lehkhathawn chu an pe a. 31 Lehkhathawn chu an chhiar zawhin fuihna thu avâng chuan an lâwm hle a. 32 Juda leh Sila chuan zâwlnei an nih bawk avângin, unaute chu thu tam tak sawia fuihin an ti chak a. 33 Chutah chuan hun eng emaw chen an awm hnuin, anmahni tîrtute hnêna kîr leh tûrin unaute chuan thlamuang takin an thlah liam ta a. 34* —— 35 Paula leh Barnaba erawh chu mi dang tam tak nên, Jehova* thua chanchin ṭha zirtîr leh puang chhuakin Antiokei khuaah chuan an awm reng a.

36 Ni eng emaw zât hnuah, Paula chuan Barnaba hnênah: “Tûnah hian lêt leh ila, khaw tina Jehova* thu kan hrilhnaa unaute kha, eng nge an an tih hre tûrin i tlawh ang hmiang,” a ti a. 37 Barnaba chuan Marka tia koh, Johana chu hruai a tum tlat a. 38 Paula erawh chuan Pamphulia ram aṭanga anmahni a kalsan avâng leh, thu hril tûra an hnêna a kal ve tâk loh avâng khân hruai a duh lo va. 39 Tichuan, nasa takin an inhnial a, an inṭhen hrang ta a; tin, Barnaba chuan Marka a hruai a, Kupra thliarkâr lamah lawngin an kal ta a. 40 Paula chuan Sila a thlang a, Paula chunga a khawngaihna nasa tak lantîr tûra Jehova* hnêna unaute an ṭawngṭai hnuah an kal chhuak ta a. 41 Suria ram leh Kilikia ram fang chhuakin, Paula chuan kohhrana unaute chu a ti nghet zêl a.

16 Tin, Paula chuan Derbe khua a thleng a, chumi hnuah Lustra khuaah a kal leh a. Chutah chuan zirtîr pakhat Timothea a awm a, a nu chu ringtu Juda hmeichhia a ni a, a pa erawh chu Grik mi a ni. 2 Lustra leh Ikonion khuaa unaute chuan ani chu an fak hle. 3 Paula chuan Timothea chu amah zui tûra a duh thu a sawi a; tichuan, a hruai a, chu hmuna Juda awmte avâng chuan a serh a tansak a, chuta awmte chuan a pa chu Grik mi a ni tih an hre vek si a. 4 Khaw tina an kal pahin Jerusalema awm tirhkohte leh upate thu rêl thlûk kha, an zawm atân an hrilh zêl a. 5 Tichuan, kohhrana unaute chu rinnaah an nghet telh telh a, nî tin an pung zêl a.

6 Chu bâkah, thlarau thianghlimin Asia* rama thu hrilh a khap avângin, Phrugia leh Galatia ram an fang chhuak ta a. 7 Musia ram an thlen chuan Bithunia rama kal an tum a; nimahsela, Isua thlarauvin* a remti lo va. 8 Tichuan, Musia ram kal tlangin, Troas khaw lamah an chhuk ta a. 9 Tin, zânah Paula chuan inlârnaah Makedonia rama pa pakhat dingin a hnêna: “Makedonia ramah lo kal la, min pui rawh,” tia a ngên lai chu a hmu a. 10 Inlârna a hmuh zawh veleh, chu rama mite hnêna chanchin ṭha hril tûr chuan Pathianin min ko tih hriain, Makedonia ramah kal kan tum ta nghâl a.

11 Tichuan, Troas khua aṭangin lawngin kan chhuak a, tluang takin Samothraki thliarkâr kan thleng a, a tûkah Neapoli khua kan thleng leh a. 12 Tin, chuta ṭang chuan Phillipi khuaah kan kal a, chu khua chu Makedonia rama khaw pawimawh ber a ni. Chutah chuan ni eng emaw zât kan châm a. 13 Sabbath nîah chuan ṭawngṭai tûra mite an kal khâwmna hmun nia kan rin, kulh kawngkhâr pâwna lui bulah chuan kan kal a. Chutah chuan ṭhuin, chuta awm hmeichhiate hnênah chuan thu kan hril ṭan a. 14 Tin, Thuatira khuaa puan sen duk zuartu leh Pathian betu Ludi chuan kan thusawite chu a ngaithla a. Paula thusawite a pawm theih nân, Jehova’n* a thinlung chu zau takin a hawnsak a. 15 Amah leh a chhûngte’n baptisma an chan hnu chuan: “Jehova* chunga rinawma min ngaih chuan lo kal ula, ka inah lo thleng rawh u,” tiin min sâwm chiam a. Amah zui tûrin min ti ta tlat a.

16 Tin, ṭawngṭaina hmun pana kan kal laiin, ramhuai zâwl aienthiam chhiahhlawh hmeichhe pakhatin min tâwk a, ani chuan a aienna hmangin a pute tân sum tam tak a thawk chhuak ṭhîn a. 17 Chu hmeichhia chuan Paula leh keini chu min zui reng a: “Hêng mite hi Pathian Chungnungbera bâwihte an ni a, chhandam in nih theih dân tûr an hrilh che u a nih hi,” tiin a au va. 18 Chutiang chuan ni tam tak chhûng a ti a. A tâwpah Paula chuan a ning a, lehhawiin ramhuai hnênah chuan: “Isua Krista hmingin a kawchhûng aṭang khân chhuak tûrin thu ka pe a che,” a ti a. Tichuan, a lo chhuak ta nghâl a.

19 Tin, a pute’n an sum lâk luhna a tâwp tih an hriat chuan, Paula leh Sila chu an man a, bazâra rorêltute hnênah an hnûk lût a. 20 Khawpui chhûnga rorêltute hnênah an hruai a: “He mite hian kan khua hi nasa takin an ti buai a ni. Juda mi an ni lehnghâl, 21 Rom mi kan ni tih hre reng siin kan tâna tih ve thiang lote chu an zirtîr a ni,” an ti a. 22 Tin, mipui chu anmahni bei tûrin a rualin an lo thawk a, khawpui chhûnga rorêltute chuan an kawrfualte an pawh thlêrsak hnuah, tianga vaw tûrin thu an pe a. 23 Vawi tam tak an vuak hnuah tân inah an khung a, tân in vêngtu hnênah chuan uluk taka vêng tûrin thu an pe a. 24 Tân in vêngtu chuan, chutiang thupêk a dawn avâng chuan, anni chu tân in chhûngril berah a khung a, an kêahte chuan thing kawl a buntîr bawk a.

25 Nimahsela, zan lai vêlah Paula leh Sila chu an ṭawngṭai a, Pathian fakin hla an sa a, mi tângte chuan an ngaithla a. 26 Thâwklehkhatah lîr nasa tak a lo nghîng a, tân in chu nasa takin a lo nghîng ta a. Chu bâkah, kawngkhâr zawng zawng chu a lo inhawng ta nghâl a, mi tin khaidiatte leh thing kawlte chu a lo inphelh ta vek a. 27 Tân in vêngtu a lo harh a, tân in kawngkhâr inhawngte a hmuh chuan, mi tângte chu an tlân chhuak emaw tiin a ngûnhnâm a phawi a, intih hlum a tum a. 28 Nimahsela, Paula chuan ring takin: “In tina suh, kan vaiin hetah kan awm e!” a ti a. 29 Tin, tân in vêngtu chuan a chhiahhlawh hnênah khâwnvârte a dîl a, hmanhmawh takin a lût a, hlauh avângin a khûr a, Paula leh Sila hmaah chuan a bawkkhup a. 30 Anni chu a hruai chhuak a, an hnênah: “Pute u, chhandam ni tûrin eng nge ka tih ang?” a ti a. 31 Anni chuan: “Pathian chhandamna dawng tûr chuan Lalpa Isua i ring tûr a ni a, i chhûngte tân pawh chutiang bawk chu a ni,” an ti a. 32 Tichuan, Paula leh Sila chuan amah leh a ina awm zawng zawng hnênah Jehova* thu an sawi a. 33 Tin, chumi zân la la chuan anni chu a hruai a, an hliamte chu a silsak a, amah leh a ina chêng zawng zawngin baptisma an chang ta nghâl a. 34 Tichuan, anni chu a inah a hruai a, dawhkânah ei tûr a chhawpsak a, Pathian ringtu an lo nih tâk avângin amah leh a ina chêng zawng zawng chu an hlim ta hle a.

35 Khua a lo vâr chuan, khawpui chhûnga rorêltute chuan tân in vêngtu hnênah: “Khâng mite kha chhuah rawh,” tia hrilh tûrin vêngtute chu an tîr a. 36 Tân in vêngtu chuan an thusawi chu Paula hnênah hrilhin: “Khawpui chhûnga rorêltute’n chhuah tûr che uin mi an rawn tîr a. Chuvângin, tûnah lo chhuak ula, thlamuang takin kal rawh u,” a ti a. 37 Nimahsela, Paula chuan an hnênah: “Rom mi kan ni a, thiam loh chang pawh kan ni lo va, chuti chung chuan vântlâng hmuhah min vua a, tân inah min khung a, tûnah a rûkin min chhuah an tum leh si maw? A ni thei lo vang! Anmahni ngei lo kalin min rawn hruai chhuak rawh se,” a ti a. 38 Vêngtute chuan chûng thute chu khawpui chhûnga rorêltute hnênah chuan an va hrilh a. Rom mi an ni tih an hriat hnu chuan chûng mite chuan an hlau ta hle a. 39 Tichuan, lo kalin Paula leh Sila chu ngaihdam an rawn dîl a, an hruai chhuah hnuah khua aṭanga chhuak tûrin an ngên a. 40 Nimahsela, tân in aṭanga an chhuah hnu chuan Ludi inah an kal a. Tin, unaute an hmuh chuan an fuih a, an chhuak ta a.

17 Paula leh Sila chu Amphipoli khua leh Apollonia khua kal tlangin Thessalonika khua an thleng a, chutah chuan Judate inkhâwmna in a awm a. 2 Tin, Paula chu a tih ṭhin dân pângngaiin inkhâwmna inah a lût a, inkhâwmhote chu sabbath ni vawi thum Pathian Lehkha Thu aṭangin a chhûtpui a. 3 Krista chu hrehawm tuar tûr a ni tih leh, mitthi zîng ata tho leh tûr a ni tih Pathian Lehkha Thu aṭanga hrilhfiahin a hmuhtîr a. Ani chuan: “He Isua, a chungchâng ka hrilh che u hi Krista chu a ni,” a ti a. 4 Chuvâng chuan, an zînga ṭhenkhat chu ringtu an lo ni a, Paula leh Sila chu an zawm ta a. Pathian betu Grik mi tam tak leh hmeichhe zahawm tam tak an tel ve a.

5 Nimahsela, Judate chuan an thîk a, mi sual ṭhenkhat bazâra ṭhu mai maite chu an khâwm a, tam tak an koh khâwm hnuah khawpui chu an chawk buai ta a. Jasona in kawngkhâr chu ti chhiain an lût a, Paula leh Sila chu mipui zînga hruai chhuah an tum a. 6 An hmuh tâk lovah chuan, Jasona leh unau ṭhenkhat chu khawpuia rorêltute hnênah an hnûk lût a, mipuite chuan ring taka auvin: “Khawvêl chawk buaitute kha hetah pawh an awm e, 7 Jasona hian a lo mikhual a. Hêng mite hian, ‘Lal dang Isua a awm,’ tia sawiin Kaisara thupêk an kalh a ni,” an ti a. 8 Chûng thute an hriat chuan mipui leh khawpuia rorêltute chu an mangang ta hle a. 9 Jasona leh mi dangte hnên aṭanga tlanna sum an lâk hnuin anni chu an kaltîr ta a.

10 Unaute chuan a zân a zânin Paula leh Sila chu Beroia khuaah an kaltîr ta nghâl a, an va thlen chuan Judate inkhâwmna inah an lût a. 11 Chuta mite chu Thessalonika khuaa mite ai chuan an rilru a ṭha zâwk a, lâwm takin thu chu an pawm a, an thu hriatte chu a dik leh dik loh hriat nân, nî tin Pathian Lehkha Thu-ah ngun takin an zir chiang ṭhîn a. 12 Chutichuan, mi tam tak ringtu an lo ni a, Grik hmeichhe zahawmte leh mipa ṭhenkhat pawh ringtu an lo ni bawk a. 13 Nimahsela, Thessalonika khuaa Judate’n Beroia khuaah pawh Paula’n Pathian thu a hril tih an hriat chuan, mipui fuihpawrha ti buai tûrin an lo kal a. 14 Tichuan, unaute’n Paula chu tuipui kam thlenga kal tûrin an tîr chhuak ta nghâl a. Sila leh Timothea erawh chu chutah chuan an la awm reng a. 15 Paula chu Atheni khua thlengin an thlah a. Amah thlahtute hnênah Sila leh Timothea chu a hnêna kal vat tûra a chah hnuin anni chu an lêt leh ta a.

16 Tin, Paula’n Atheni khuaa Sila leh Timothea a nghah lai chuan, khua chu milemin a khat tih a hmu a, a ngaimawh ta hle a. 17 Tichuan, Judate leh Pathian betu mi dangte chu inkhâwmna inah a chhûtpui ṭhîn a, bazâra awmte pawh nî tin a chhûtpui bawk ṭhîn. 18 Nimahsela, Epikuria leh Stoik mi fing ṭhenkhatin ani chu an rawn hnial a. A ṭhenin: “He mi kamtam hian eng nge sawi a tum?” an ti a. Mi dangin: “Ram dang pathiante thu hriltu a ni âwm e,” an ti a. Chutianga an sawi chhan chu, Paula’n Isua leh thawhlehna chungchâng chanchin ṭha a puan chhuah vâng a ni. 19 Tichuan, ani chu Areopagi-ah an hruai a, a hnênah: “He zirtîrna thar i sawi hi a awmzia min hrilh thei ang em? 20 Kan la hriat ngai loh thute i sawi si a. Chuvângin, hêng thilte awmzia hi hriat kan duh a ni,” an ti a. 21 Atheni khuaa mi zawng zawng leh chuta mikhual awmte chuan, an hun âwl chu thil dang tih nân hmang lovin, thu thar sawi nân emaw, ngaihthlâk nân emaw an hmang ber ṭhîn. 22 Paula chu Areopagi lai takah dingin:

“Atheni khuaa mite u, in vai hian kawng engkimah sakhaw ngaihsak tak in ni tih ka hmu a, mi dangte aiin pathiante in ṭih zâwk tih pawh ka hmu bawk. 23 Ka kal kual vêl pahin chibai in bûk ṭhinte ngun takin ka en a, chutah chuan, ‘Hriat Loh Pathian Tân,’ tih inziahna maichâm pawh ka hmu bawk a. Chuvângin, in hriat loh chibai in bûk ṭhina kha, chu mi chanchin ngei chu ka hrilh che u hi a ni. 24 Pathian chu khawvêl leh a chhûnga awm zawng zawngte siamtu a ni a, lei leh vân Lalpa a nih avângin kuta sak inahte a awm lo va. 25 Eng mah tlâkchham a neih loh avângin, mihringte kuta rawngbâwlsak a mamawh hek lo. Amah ngei chu mite hnêna thaw te, nunna te leh, thil zawng zawngte petu a ni si a. 26 Ani chuan mi pakhat aṭangin lei pum pui luahtu tûr hnam zawng zawng a siam a, hun bîte a ruat a, mihringte tân an awmna chin tûr a siamsak bawk a, 27 chu chu Pathian an zawn theih nân a ni. Hmuh ngei tuma an zawn chuan an hmu thei ang, ani chuan min hlat lo ṭheuh si a. 28 Amah avângin kan nung, kan chê, kan awm a ni si a. In hla phuahtu ṭhenkhatte ngei pawhin, ‘Keini pawh a fate* kan ni,’ tia an sawi ang khân.

29 “Chuvângin, Pathian fate kan nih si chuan, Pathian chu mihringte suangtuah ang leh an ker chawp rangkachak emaw, tangkarua emaw, lung emaw ang hi niah kan ngai tûr a ni lo. 30 Pathian chuan mite’n amah an hriat loh lai hunte kha a haider a; nimahsela, tûnah chuan hmun tina mi zawng zawngte chu sim tûrin a hrilh ta a ni. 31 Leia awmte dik taka ro a rêlsak hun tûr nî a ruat fel tawh a, a rêltu tûr pawh a ruat tawh bawk. Chu mi chu mi zawng zawng hriat atân mitthi zîng ata a kai tho a ni,” a ti a.

32 Tin, mitthi thawhlehna thu an hriat chuan mi ṭhenkhatin an nuihsawh a, mi dangte erawh chuan: “Hemi chungchâng hi i hnên aṭangin kan la ngaithla leh ang,” an ti a. 33 Tichuan, Paula’n anni chu a kalsan ta a. 34 Nimahsela, mi ṭhenkhatin ani chu an zui a, ringtu an lo ni ta a. An zîngah chuan, Areopagi rorêlnaa rorêltu Dionusia te, hmeichhe pakhat Damari te leh, mi dangte an tel a ni.

18 Chumi hnuah chuan, Paula chu Atheni khua aṭanga chhuakin Korinth khuaah a kal ta a. 2 Juda mi pakhat Akuila a hmu a, ani chu Ponto rama piang a ni a, Klaudia’n Juda mi zawng zawng Rom khua chhuahsan tûra thu a pêk avânga a nupui Priskilli nêna Italy aṭanga rawn thleng hlim an ni. Tichuan, anni chu a va tlawh a, 3 an hnathawh ang thawk a nih avângin an inah awmin an hnênah a thawk ve a, an eizawnna chu puan in siam a ni. 4 Ani chuan sabbath nî apiangin inkhâwmna inah thu a sawi ṭhîn a,* Judate leh Grik mite chu a hmin ṭhîn.

5 Tin, Makedonia ram aṭanga Sila leh Timothea an lo chhuk chuan Paula chuan, a hun zawng zawng chu thu hrilh nân a hmang ta a, ‘Isua chu Krista a ni,’ tih Judate hnênah a hriattîr ṭhîn a. 6 Nimahsela, ani chu dodâla an sawichhiat zawm zêl avângin, a silhfên a thing a, an hnênah: “In thisen mawh chu nangmahni chung ngeiah tla rawh se. Kei chu ka fihlîm e. Tûn aṭang chuan hnam dangte hnênah ka kal tawh ang,” a ti a. 7 Chuta* ṭang chuan a kal chhuak a, mi pakhat Tita Justa inah a lût a, ani chu Pathian betu a ni a, a in chu inkhâwmna in bul chiaha awm a ni. 8 Tin, inkhâwmna in hotu Krispa leh a chhûngte zawng zawng chu Lalpa ringtu an lo ni a. Korinth khuaa chanchin ṭha hretu mi tam tak pawhin an ring a, baptisma an chang ta a. 9 Chu bâkah, Paula chuan zânah inlârna a hmu a, Lalpa’n a hnênah: “Hlau suh, thu sawi zêl la, ngawi suh ang che, 10 i hnênah ka awm si a, tina tûr chein tu man an bei lo vang che, he khuaah hian mi tam tak ka nei a ni,” tia a sawi a hria a. 11 Tin, chutah chuan Pathian thu zirtîrin an zîngah kum khat leh thla ruk a awm ta a.

12 Tin, Akaia rama Galliova rorêltu* a nih laiin, Judate chuan inthuruala Paula beiin rorêlna hmunah an hruai a. 13 Anni chuan: “He pa hian dân kalha Pathian be tûrin mite a thlêm ṭhîn,” an ti a. 14 Tin, Paula’n thusawi a tum laiin Galliova chuan Judate hnênah: “Aw, Judate u, he pa hian thil dik lo emaw, thil sual emaw a ti a nih chuan dawhthei taka ngaihthlâk che u chu thil inâwm tak a ni. 15 Nimahsela, thusawi te, hming te leh, in dânte chungchânga inhnialna mai a nih chuan nangmahni’n chingfel rawh u. Chûng thilte rêl chu ka duh lo ve,” a ti a. 16 Rorêlna hmun aṭang chuan anni chu a hnawt bo ta a. 17 Tichuan, an vaiin inkhâwmna in hotu Sosthena chu an man a, rorêlna ṭhutthlêng hmaah chuan an vua a. Nimahsela, chûng thilah chuan Galliova chuan inhnamhnawihna eng mah a nei lo.

18 Nimahsela, ni tam tak a châm hnuah, Paula chuan unaute chu ṭha taka thlahin Suria ramah lawngin a kal ta a, Priskilli leh Akuila pawhin an zui ve a. Tin, Paula chuan thutiam a neih avângin Kenkriai khuaah a lû a mêt a. 19 Tichuan, Ephesi khua an thleng a, chutah chuan anni chu a kalsan ta a; tin, inkhâwmna inah a lût a, Judate chu Pathian Lehkha Thu a chhûtpui a. 20 Rei tak châm tûrin an ngên a; mahse, ani chuan rem a ti lo va. 21 Nimahsela, an hnênah: “Jehova’n* rem a tih chuan in hnênah ka lo kal leh ang,” tiin anni chu ṭha takin a thlah a. Tichuan, Ephesi khua aṭang chuan lawngin a chhuak a, 22 Kaisari khuaah a chhuk a. Chumi hnuah a chho va,* kohhrana unaute chu chibai a bûk a; tichuan, Antiokei khuaah a chhuk ta a.

23 Chutah chuan hun eng emaw chen a awm hnuin a kal chhuak a, Galatia ram leh Phrugia ram fang chhuakin zirtîr zawng zawngte chu a ti chak a.

24 Tin, Juda mi pakhat Apollova, Aleksandria khuaa piang chu Ephesi khuaah a lo thleng a, ani chu thusawi thiam tak a ni a, Pathian Lehkha Thu a hre hle bawk. 25 Ani chu Jehova* kawng thu zirtîrna dawng* tawh a ni a, thlarau thianghlim avângin ṭhahnemngaihnain a khat a, Isua chanchin chu dik taka sawiin a zirtîr ṭhîn a; nimahsela, Johana baptisma thu chauh a hria a ni. 26 Tichuan, inkhâwmna inah huai takin thu a sawi ṭan ta a, Priskilli leh Akuila te’n a thusawi an hriat chuan an hnênah an hruai a, Pathian kawng thu dik lehzualin an hrilhfiah a. 27 Tin, Apollova chu Akaia rama kal a duh avângin, unaute chuan chuta awm zirtîrte hnênah chuan ṭha taka lo lâwm tûra fuihna lehkha an ziak a. Chu hmun a va thlen chuan, Pathian khawngaihna nasa tak avânga ringtu lo ni tate chu nasa takin a ṭanpui a. 28 ‘Isua chu Krista a ni,’ tih Pathian Lehkha Thu aṭanga hmuhtîrin, Judate zirtîrna a dik lohzia vântlâng hmaah urhsûn tak leh ngun takin a hrilhfiah ṭhîn.

19 Tin, Korinth khuaa Apollova a awm laiin, Paula chu tuipui hlat lam ramte fangin Ephesi khuaah a chhuk a. Chutah chuan zirtîr ṭhenkhat a hmu a, 2 an hnênah: “Ringtu in rawn nih khân thlarau thianghlim in dawng em?” a ti a. Anni chuan: “Eng a! Thlarau thianghlim a awm tih pawh kan hre ngai lo,” tiin an chhâng a. 3 Tin, ani chuan: “A nih leh, eng baptisma nge in chan?” a ti a. Anni chuan: “Johana baptisma,” an ti a. 4 Paula chuan: “Johana chuan a hnua lo kal tûr Isua ring tûra mite hrilhin, an simzia târ lan nân a baptis ṭhîn,” a ti a. 5 Chu thu an hriat chuan, Lalpa Isua hmingin baptisma an chang ta a. 6 Paula’n an chunga a kut a han nghah chuan, thlarau thianghlim an lo dawng ta a; tichuan, ram dang ṭawngtea ṭawngin hrilh lâwkna thute an sawi a. 7 An vaiin mipa 12 vêl an ni.

8 Paula chuan thla thum chhûng inkhâwmna inah lûtin huai takin thu a sawi ṭhîn a, Pathian Ram chungchâng sawiin ngun takin a chhûtpui ṭhîn. 9 Nimahsela, mi ṭhenkhatin luhlul taka ring duh lo va, mipui hmaa Lalpa Kawng* chungchâng ṭha lo taka an sawi chuan anni chu a kalsan a, an zîng aṭanga zirtîrte ti hrangin, Turanna zirna inah nî tin thu a sawi ṭhîn a. 10 Chutiang chuan kum hnih chhûng a ti a, Asia* rama chêng Judate leh Grik mi zawng zawng pawhin Lalpa thu chu an lo hre ta a.

11 Tichuan, Pathianin Paula hmangin thil mak ropui tak takte a ti ṭhîn a. 12 Tin, Paula inhrûkna puante leh a puan vente chu dam lote hnênah an rawn keng a, an natnate chu lo damin ramhuaite pawh an lo chhuak ṭhîn a. 13 Nimahsela, Juda mi ṭhenkhat ramhuai hnawt chhuaka zin kual ṭhînte chuan: “Paula’n a chanchin a hriattîr ṭhin Isua hmingin a chhûng ata chhuak tûrin tih tak zetin thu ka pe a che,” tiin Isua hminga ramhuaite hnawh chhuah an tum ve ṭhîn a. 14 Juda puithiam lal Skeva fapa pasarihte chuan chutiang chuan an ti ṭhîn a ni. 15 Nimahsela, ramhuai chuan an hnênah: “Isua ka hria a, Paula pawh ka hria; nimahsela, nangni hi tute nge maw in nih le?” a ti a. 16 Tichuan, ramhuai pai chuan anni chu a zuan a, a bei a, pakhat tê têin a hneh a, anni chu saruak leh hliam tuarin chu in aṭang chuan an tlânchhe ta a. 17 Chu chu Ephesi khuaa chêng Judate leh Grik mi zawng zawngte’n an lo hriat chuan an vaiin an hlau ta hle a, Lalpa Isua hming chu chawimawiin a awm ta a. 18 An zînga tam tak ringtu ni tate chu lo kalin, an thil chîn ṭhinte chu zêp lovin an puang a. 19 Tin, dawithiam tam takin an lehkhabute an rawn la khâwm a, mi zawng zawng hmaah an hâl a. A hlut zâwng an chhût a, tangkaraw pawisa 50,000 man lai a ni. 20 Tichuan, Jehova* thu chu nasa taka darh zêlin a ding chang zêl a.

21 Chûng thilte a thlen hnu chuan, Paula chuan Makedonia leh Akaia ram a fan hnuah Jerusalema kal a tum tlat a. Ani chuan: “Chuta ka kal hnuah Rom khuaah pawh ka kal tûr a ni,” a ti a. 22 Tichuan, a rawngbâwlsaktute zînga pahnih, Timothea leh Erasta chu Makedonia ramah a tîr a, ani erawh chu Asia ramah hun eng emaw chen a awm rih a.

23 Chutih lai chuan, Lalpa Kawng* chungchâng thu avângin buaina nasa tak a lo chhuak a. 24 Tin, tangkaraw chhertu Demetria, tangkaraw hmanga pathiannu Artemi* lem dahna chher ṭhîn a awm a, ani chuan chutiang siam thiamte chu hlâwkna nasa tak a thlen ṭhîn a. 25 A thawhpuite leh tangkaraw chhertu dangte chu ko khâwmin: “Ṭhiante u, he hna hi kan hausakna a ni tih in hria e. 26 Nimahsela, he Paula hian Ephesi khuaah chauh ni lovin, Asia ram zawng zawng deuhthawah mipui tam tak thlêm thluin, hêng kuta siam pathiante hi Pathian tak tak an nih loh thu a sawi chu an ring ta tih in hmuin in hria e. 27 Chu chu a dik lo va, mite’n kan eizawnna hi an sawichhe mai ang. Tin, pathiannu ropui tak Artemi* biak in hi eng mah lo maiah an ngai ang. Asia ram zawng zawng leh lei pum puia mite’n pathiannu Artemi* hi an bia a; nimahsela, Paula thusawi avângin an be tawh lo mai ang,” a ti a. 28 Chu chu an hriatin an thinur ta hle a; tichuan: “Ephesi khuaa Artemi* hi ropui tak a ni,” tiin an au va.

29 Tichuan, khawpui chu buainain a khat ta a, mi zawng zawng chu ennawm chhuahna hmunah hmanhmawh takin an tlân lût a, Paula zin rualpui Makedonia mi Gaia leh Aristarka chu an rualin an hnûk lût a. 30 Paula chu mipui zîngah chuan luh a tum a; nimahsela, zirtîrte chuan an phal lo va. 31 Kût leh infiamna huaihawttu a ṭhiante pawhin Paula hnênah thu thawnin, a nun thâpa ennawm chhuahna hmuna lût lo tûrin an ngên a. 32 Kal khâwmte chuan thu hrang hrang an au chhuahpui a, an buai nuaih nuaih a, an zînga a tam zâwk chuan an kal khâwm chhan pawh an hre lo. 33 Tin, an zîng aṭang chuan Aleksandra an hruai chhuak a, Judate chuan hma lamah an nam phei a, ani chuan mipuite chu a kuta zâpin thil awmzia hrilhfiah a tum a. 34 Nimahsela, Juda mi a ni tih an hriat chuan an vaiin: “Ephesi khuaa Artemi* hi ropui tak a ni,” tiin dârkâr hnih vêl an au rual a.

35 Khuaa thuneitu ber chuan mipuite a ngawihtîr hnuin: “Ephesi khuaa mite u, Ephesi khua hi Artemi* ropui tak biak in leh vân aṭanga lo tla a lim enkawltu a ni tih tu nge hre lo awm? 36 Chûng thilte chu hnial rual a nih si loh chuan inbeng dai ula, ngaihtuah chiang lovin thil ti suh u. 37 Heta in rawn hruaite hi biak in rawktute an ni lo va, kan pathiannu sawichhetute lah an ni hek lo. 38 Chutichuan, Demetria leh a tangkaraw chherpuite hian tu lakah pawh thubuai an neih chuan rorêl nî kan nei a, rorêltute* pawh kan nei alâwm; chûng nîahte chuan an thubuai chu rawn thlen ang hmiang. 39 Nimahsela, chumi piah lam thil tih in duh chuan, dân anga rorêl inkhâwm nîah sawi fiah tûr a ni. 40 Vawiina thil thleng hian dinhmun hlauhawm takah min dah a ni, mumal nei lova hêng mite pun khâwm chhan hi kan sawi theih loh avângin, hel tuma puh theih kan ni si a,” a ti a. 41 Tin, chu thu a sawi zawh chuan kal khâwmte chu a hawtîr ta a.

20 Tin, bengchheng chu a reh hnuin Paula’n zirtîrte a kohtîr a, anni chu a fuih hnuah ṭawngkam ṭhaa thlahin, Makedonia rama kal tûrin a chhuak ta a. 2 Chuta awmte hnêna fuihna thu tam tak sawi a, chu ram chu a fan chhuah hnuah Grik ram a thleng a. 3 Chutah chuan thla thum a châm a; nimahsela, lawnga Suria ram pan a tum laiin Judate’n thah an tum tih a hriat avângin, Makedonia ram kal tlanga lêt leh a tum ta zâwk a. 4 Paula rual chuan Beroia khuaa mi Purrha fapa Sopatera te, Aristarka te leh, Thessalonika khuaa mi Sekunda te, Derbe khuaa mi Gaia te, Timothea te leh, Asia* rama mi Tukika leh Trophima te an kal ve a. 5 Anni chu an kal hmasa a, Troas khuaah min lo nghâk a. 6 Chhang Dawidim Telh Loh Kût zawhah Philippi khua aṭangin lawngin kan chhuak a, ni nga hnuah Troas khua chu kan thleng a, chutah chuan ni sarih kan châm a.

7 Kâr khata ni hmasa berah chuan chaw ei tûra kan awm khâwm laiin, Paula chuan a tûka kal chhuah a tum avângin an hnênah thu a sawi a, zan lai thlengin a sawi zêl a. 8 Tin, kan awm khâwmna in chung pindanah chuan khâwnvâr tam tak a awm a. 9 Tukverha ṭhu tlangvâl pakhat Eutuka chu Paula thusawi lai chuan a lo muthlu a, in chhâwng thumna aṭang chuan a tla a, thiin an chhar a. 10 Nimahsela, Paula chu a chhuk a, a chungah a bawk a, a kuah a: “Thlaphâng suh u, a thi lo ve,” a ti a. 11 Tichuan, Paula chu a chho leh a, chaw a ei a.* Khawvâr thlengin thu a sawi a; chumi hnuah chuan a kal chhuak ta a. 12 Tin, tlangvâl chu damin an hruai haw a, an thla a lo muang ta êm êm a.

13 Tichuan, lawnga chuangin Asso khua kan pan a, chu khua chu Paula’n amah kan lamna hmun tûra min hrilh a ni a, ani erawh chu kêin a kal ta a. 14 Tin, Asso khuaa kan inhmuh chuan lawngah kan chuantîr a, Mitulini khua kan pan ta a. 15 Chuta ṭang chuan a tûkah lawngin kan chhuak leh a, Kio thliarkâr kan thleng a. Tin, a tûk lehah Samo thliarkâr kan thleng a, a tûk lehah chuan Mileti khua kan thleng ta a. 16 Paula chuan Asia rama a awm rei loh nân Ephesi khua chu lawnga pelh a tum a, a theih chuan Jerusalema Pentikost Kût nî hman a tum avângin a hmanhmawh a ni.

17 Tin, Mileti khua aṭang chuan Ephesi khuaah thu thawnin, kohhran upate chu a hnênah kal tûrin a ti a. 18 An lo thlen chuan Paula’n an hnênah: “Asia ram ka tlawh hmasak ber nî aṭanga in zînga ka awm dân kha chiang takin in hria e. 19 Judate’n min phiarrûk avânga mittui tla chung leh hrehawm tam tak tuar chungin Lalpa rawng inngaitlâwm taka* ka bâwl ṭhin kha. 20 In ṭhatna tûr eng mah hrilh che u ka hreh lo va, vântlâng zîngah leh in tina zirtîr che u pawh ka hreh hek lo. 21 Tin, Judate leh Grik mite hnênah pawh sima Pathian lam an hawi a ngaih thu leh, kan Lalpa Isuaa rinna an neih a ngaih thu chipchiar taka ka hriattîr ṭhin kha. 22 Tin, ngai rawh u! Tûnah hian thlarauvin min tirh avângin Jerusalemah ka kal dâwn a, chu hmuna ka chunga thil thleng tûr chu ka hre lo, 23 thlarau thianghlimin khaw tina min hrilh angin, tân ina khung leh hrehawm tam tak tawrh ka hmabâk tih chauh ka hria. 24 Nimahsela, Lalpa Isua hnên aṭanga ka dawn rawngbâwlna, Pathian khawngaihna nasa tak chungchâng chanchin ṭha hi kim chang taka hriattîr a, ka tlânsiakna hi ka hlen chhuah phawt loh chuan, ka nun ngei pawh hian ka tân pawimawhna rêng a nei lo ve.*

25 “Tin, ngai rawh u! Nangni zawng zawng, Lalram thu ka hrilh ṭhinna che u hian, ka hmêl in hmu leh tawh lo vang. 26 Chuvângin, mi zawng zawng thisena* ka fihlîmzia min hriatpui tûrin vawiinah hian ka ko che u a ni, 27 Pathian thiltum zawng zawng hrilh che u ka hreh si lo va. 28 A Fapa thisena a lei Pathian kohhran vêng tûrin, thlarau thianghlimin an zîng aṭangin enkawltu atân a ruat tawh che u a; chuvângin, nangmahni leh berâm zawng zawngte chungah fîmkhur rawh u. 29 Ka kal hnuin, in zîngah chinghne kawlhte an lo lût ang a, berâmte chu râwng takin an cheibâwl ang tih ka hria, 30 in zîng aṭang ngei pawhin, zirtîrte an lama ṭantîr tuma zirtîrna dik lo sawi an lo la awm ang.

31 “Chuvângin, harhvâng takin awm ula,* kum thum chhûng mittui nên a chhûn a zâna ka zilhhau ṭhin che u kha hre reng ang che u. 32 Pathian leh a khawngaihna nasa tak thu, nangmahni ti chaka mi thianghlim zawng zawngte zînga rochan pe theitu che u chuan vênghim che u rawh se. 33 Tangkarua te, rangkachak te, silhfênte tu ta mah neihsak ka tum ngai loh kha. 34 Hêng kutte hian ka mamawh leh ka hnêna awmte mamawh ka thawk chhuak tih nangmahni ngeiin in hria e. 35 Hetiang kawnga rim taka thawk hian thil zawng zawng ka tih hmuh ṭhin che u kha. Chak lote in ṭanpui tûr a ni a, Lalpa Isua thusawi pawh hi in hre reng tûr a ni, amah ngeiin: ‘Mi dang hnên aṭanga thil dawn aiin, mi hnêna in pêk chhuahin in hlim zâwk ang,’ a tih kha,” a ti a.

36 Chûng thute a sawi zawh chuan, an vaia ṭhingṭhitpuiin a ṭawngṭai a. 37 Tichuan, an vaiin nasa takin an ṭap a, Paula chu an kuah a, an fâwp ta ngawih ngawih a, 38 a hmêl an hmuh leh tawh loh tûr thu a sawi chu an lungngaih chhan ber a ni. Tichuan, lawng thlengin Paula chu an thlah ta a.

21 Anni chu lungchhe taka kan kalsan hnuah lawngin kan chhuak a, ngîl taka kalin Koi thliarkâr kan thleng a, a tûkah Rodi thliarkâr kan thleng leh a, chuta ṭang chuan Patara khua kan thleng a. 2 Phoiniki lama kal tûr lawng pakhat kan hmu a, chutah chuan kan chuang a, kan chhuak ta a. 3 Kupra thliarkâr hmuh theihna lam kan thlen chuan vei lamah kan kal pêl a, Suria ram lam pan zêlin lawng bungruate thiar chhuahna hmun tûr Tura kan thleng a. 4 Tichuan, zirtîrte kan zawng chhuak a, an hnênah ni sarih kan châm a; nimahsela, thlarauvin an hnêna a thil hriattîrte avângin Paula chu Jerusalema kal lo tûrin vawi tam tak an hrilh a. 5 Tin, kan châm hun chhûng a zawh chuan kan chhuak a, kan kal zêl a. Nimahsela, an vaiin hmeichhiate leh naupangte nên khawpui pâwn thlengin min thlah a. Tuifinriat kamah chuan ṭhingṭhiin kan ṭawngṭai a. 6 Kan inmangṭha ta hlawm a; tichuan, lawngah kan chuang a, anni pawh an haw ta a.

7 Tichuan, Tura khua chu lawnga chhuahsanin, Ptolemai khua kan thleng a; tin, unaute kan chibai a, an hnênah ni khat kan châm a. 8 Tin, a tûkah chuan kan chhuak a, Kaisari khua kan thleng a, chanchin ṭha hriltu Philipa inah kan lût a, ani chu mipa pasarihte* zînga pakhat kha a ni, a hnênah kan châm ta a. 9 Philipa chuan fanu nula* pali a nei a, anni chu zâwlnei an ni. 10 Tin, chuta ni tam tak kan châm hnuah chuan, Judai ram aṭangin zâwlnei pakhat Agaba a lo chhuk a. 11 Kan hnênah a lo kal a, Paula kâwnghrên chu lain, a kête leh a kutte chu amahin a inphuar a: “Thlarau thianghlimin, ‘He kâwnghrên neitu hi Jerusalema Judate’n hetiang hian an phuar ang a, hnam dangte kutah an pe ang,’ a ti e,” tiin a sawi a. 12 Tin, chu thu kan hriat chuan, keini leh chuta awmte chuan Paula chu Jerusalema chho lo tûrin kan ngên a. 13 Paula erawh chuan: “Engati nge in ṭah a, min tih lunghnual in tum? Lalpa Isua hming avângin Jerusalemah chuan phuar chauh pawh ni lovin, thih pawh ka inhuam asin,” a ti a. 14 A rilru kan thlâk thei lo tih kan hriat chuan: “Jehova* duh angin thleng rawh se,” tiin kan dang zawm duh ta lo va.*

15 Chumi hnu chuan zin chhuak tûrin kan insiam a, Jerusalemah kan han kal a. 16 Kaisari khuaa zirtîr ṭhenkhat pawh kan rualin an kal ve a, anni chuan kan thlen in tûr Kupra thliarkâra zirtîr hmasate zînga pakhat Nasona hnênah min hruai a. 17 Jerusalem kan thlen chuan, unaute’n hlim takin min lo lâwm a. 18 A tûkah chuan, Paula chu Jakoba hmu tûrin kan rualin a kal ve a, upa zawng zawngte pawh an lo awm a. 19 Tin, anni chu chibai a bûk zawhin, a rawngbâwlna hmanga hnam dangte zînga Pathian thil tihte chu chipchiar takin a hrilh ṭan ta a.

20 Chu chu an hriatin Pathian an chawimawi ta a; tichuan, Paula hnênah: “Unaupa, Judate zîngah ringtu sâng tam tak an awm tih i hmu a, anni chu Dân* lama ṭhahnemngai tak vek an ni. 21 Nimahsela, anni chuan, ‘Paula’n hnam dangte zînga Juda awm zawng zawngte a zirtîr a; chuvângin, Mosia Dân an hawisan a ni. Tin, an fate tân serhtan a ngai tawh lo tih leh an hnam dânte zawm a ngai tawh lo a ti,’ tiin i chungchânga thuthang an lo hria a. 22 A nih chuan, engtin nge ni ta ang? I lo thleng tih an hre ngei dâwn si a. 23 Chuvângin, kan hrilh ang che hian ti ang che: Pathian hnêna thutiam nei lai mipa pali kan nei a. 24 Chûng mite chu hruai la, dân ang takin an rualin inti thianghlim la, an lu mehna man tumsak ang che. Tichuan, mi tinin i chungchânga thuthang an hriatte chu a dik lo tih leh Dân thu ṭha takin i zâwm tih an hria ang. 25 Hnam dangte zînga ringtu rawn ni tate tân chuan, milem hmaa thilhlan lak aṭang te, thisen lak aṭang te, sa rehhlum* eina lak aṭang te leh, nungchang bawlhhlawhna* lak aṭangtea inthiar fihlîm reng tûrin kan thu tlûkna ziakin an hnênah kan thawn tawh a ni,” an ti a.

26 Tichuan, a tûkah Paula’n chûng mite chu hruaiin, an rualin dân ang takin a inti thianghlim a. An intih thianghlim hun a zawh nîa puithiamin an vaia tâna thilhlan a hlan theih nân, dân ang taka an intih thianghlimna ni sarih a tâwp hun tûr hrilh tûrin biak inah an lût a.

27 Tin, ni sarih a tlin dâwn hnaihah chuan, Asia* rama Judate’n Paula chu biak inah an hmu a; tichuan, mipuite an fuihpawrh a, ani chu an man a: 28 “Israel mite u, min ṭanpui rawh u! He pa hian hmun tinah kan mi te, kan Dân te leh, he hmun kalh hian mi tin a zirtîr a. Chu bâkah, Grik mite hial pawh biak inah hruai lûtin, he hmun thianghlim hi a ti bawlhhlawh tawh a ni,” tiin an au va. 29 A hmain Ephesi khuaa mi Trophima nên khaw chhûngah an lo hmuh dun tawh avâng leh Paula’n ani chu biak ina a hruai luh an rin avânga chutianga sawi chu an ni. 30 A khaw pumin an buai ta nuaih nuaih a, tlân khâwmin mite chuan Paula chu an man a, biak in pâwnah hnûk chhuakin kawngkâte chu an khâr ta nghâl a. 31 Thah an tum lai chuan, Jerusalema awm zawng zawngte an buai nuaih nuaih thu chu sipai pâwl hotu beng a lo thleng a. 32 Tichuan, sipai pâwl hotu chu sipaite leh sipai za hotute hruaiin an hnênah a tlân thla ta nghâl a. Tin, mipuite chuan sipai pâwl hotu leh sipaite an hmuhin, Paula chu an vaw chhunzawm ta lo va.

33 Sipai pâwl hotu chu a lo kal hnai a, Paula chu mana khaidiat pahniha phuar tûrin thu a pe a; tichuan, mite hnênah tu nge a nih a, eng nge a tih a zâwt fiah a. 34 Nimahsela, mipuite chuan thu hrang hrang an au chhuahpui a, an buai nuaih nuaih avânga eng mah a hriat chian theih loh avângin, ani chu sipaihote awmnaa hruai tûrin thu a pe a. 35 Mahse, Paula’n kailâwn a thlen chuan, mipuite’n tih nat an tum avângin sipaite’n an châwi kân a ngai hial a. 36 Mi zawng zawngin: “Ti boral rawh u!” tia au chungin an zui zêl si a.

37 Sipaiho awmnaa an hruai luh dâwn lai chuan, Paula’n sipai pâwl hotu hnênah chuan: “Thil eng emaw ka sawi thei ang em?” a ti a. Ani chuan: “Grik ṭawng i thiam elo? 38 A nih chuan, hmâna helna nasa tak chawk chhuak a, thlalêra tualthah hmang mi 4,000 vêl hruai chhuaktu Aigupta mi kha i ni lo tihna em ni?” a ti a. 39 Tin, Paula chuan: “Kei hi Juda mi, Kilikia rama khawpui pawimawh tak Tarsa khua leh tui ka ni a. Chuvângin, hêng mite hnêna thusawi min phalsak tûr hian ka ngên a che,” a ti a. 40 A phalsak hnu chuan, Paula chu kailâwnah chuan a ding a, mipuite chu a kutin a zâp a. An ngawi ta ṭhuap mai a; tichuan, Hebrai ṭawngin an hnênah:

22 “Unaute leh pate u, tûnah hian ka thiamthu sawi hi lo ngaithla rawh u,” a ti a. 2 Hebrai ṭawngin an hnênah thu a sawi tih an hriat chuan, an ngawi lehzual a, ani chuan an hnênah: 3 “Kilikia rama Tarsa khuaa piang Juda mi ka ni a, he khuaah hian Gamaliela ke bulah lehkha ka zir ṭhîn a. Min thlahtute Dân khermei tak zâwm tûra zirtîrna dawng tawh leh, vawiina nangni zawng zawng ang bawk hian Pathian tâna ṭhahnemngai ve bawk ka ni. 4 He Kawnga* mite hi thi khawp hialin ka ti duhdah ṭhîn a, a hmei a paa phuarin tân inah ka khungtîr ṭhîn. 5 Puithiam lalber leh upaho zawng zawng pawhin chu thu chu min hriatpui a ni. An hnên aṭangin Damaska khuaa awm Juda hruaitute hnêna pêk tûr lehkha ka la bawk a, chuta awmte man tûr leh phuar chunga Jerusalema hruai tûrin ka kal a.

6 “Nimahsela, chutia ka kal lai, Damaska khua ka thlen dâwn hnaihah chuan, chhûn lai takah vân aṭangin vawilehkhatah êng nasa takin min rawn chhun a. 7 Tichuan, leiah ka tlu a, awin ka hnênah: ‘Saula, Saula, engvângin nge mi tih duhdah?’ tia a sawi ka hria a. 8 Kei chuan: ‘Lalpa, tu nge i nih?’ ka ti a. Ani chuan ka hnênah: ‘Nazaret Isua, i tih duhdah hi ka ni,’ a ti a. 9 Tin, ka kalpuite chuan êng chu hmu mah se, min betu aw erawh chu an hre lo va. 10 Chu veleh: ‘Lalpa, eng nge ka tih ang?’ ka ti a. Lalpa chuan ka hnênah: ‘Tho la, Damaska khuaah kal la, chutah chuan i tih tûra ruat zawng zawng chu hrilh i ni ang,’ a ti a. 11 Nimahsela, chu êng ropui tak avânga eng mah ka hmuh theih tâk lohvah chuan, ka kalpuite chuan Damaska khua thlengin min kai a.

12 “Tin, mi pakhat Anania, Pathian ṭihtu leh Dân zâwmtu, chuta Juda chêng zawng zawngte’n an fak chu ka hnênah a lo kal a. 13 Ka bulah dingin, ka hnênah: ‘Unaupa Saula, i mit lo vâr leh rawh se!’ a ti a. Chutih lai tak chuan ka en chho va, ani chu ka hmu ta a. 14 Ani chuan: ‘Kan pi leh pute Pathianin a duh zâwng hre tûr te, mi fel hmu tûr te leh, a thusawi hre tûrtein a thlang tawh che a ni. 15 I thil hmuh leh hriatte kha mi zawng zawng hnêna a tâna hriattîrtu tûr i nih dâwn avângin. 16 Tûnah hian eng nge i la nghah? Tho la, Isua hming lamin baptisma chang la; tichuan, Pathianin i sualte a ngaidam ang,’ a ti a.

17 “Nimahsela, Jerusalema ka lêt leh hnua biak ina ka ṭawngṭai laiin inlârna ka hmu a. 18 Lalpa’n ka hnênah: ‘Hmanhmawh takin Jerusalem hi chhuahsan rawh, ka chungchâng thu i hriattîr hi an pawm dâwn loh avângin,’ tia a sawi ka hria a. 19 Tin, kei chuan: ‘Lalpa, nangmah ringtute chu tân inah ka khung a, inkhâwmna in tinah ka vaw ṭhîn tih, anmahni ngeiin chiang takin an hria a ni. 20 I thuhretu Stephana thisen a chhuah lai khân, amah ti boraltute bulah dingin rem ka tihpui a, an kawrfualte ka vênsak bawk a,’ ka ti a. 21 Nimahsela, ani chuan ka hnênah: ‘Kal rawh, hla taka awm hnam dangte hnênah ka tîr dâwn che a ni,’ min ti a,” a ti a.

22 Chu thu a sawi thleng chuan an ngaithla a. Tichuan, aw ring takin: “He pa hi ti hlum rawh u, dam tlâk a ni lo ve!” an ti a. 23 An au va, an kawrte an paih avâng leh vaivut an vâwr avângin, 24 sipai pâwl hotu chuan Paula chu sipaite awmnaa hruai lût tûrin thu a pe a, chutianga Paula ti hlum tûra an auh nachhan dik tak a hriat theihna tûrin, savun hruihruala vaw chunga thu zâwt fiah tûrin a ti a. 25 Nimahsela, vuak tûra an phuar laiin, Paula chuan a bula ding sipai za hotu hnênah chuan: “Rom mi,* thiam loh chantîr pawh la ni si lo* hi in tân vuak a thiang em ni?” a ti a. 26 Sipai za hotuin chu chu a hriat chuan, sipai pâwl hotu hnênah kalin a va hrilh a, a hnênah: “Engtia tih zêl nge i tum? Ani hi Rom mi a ni si a,” a ti a. 27 Tichuan, sipai pâwl hotu chu Paula hnênah kalin: “Min han hrilh teh, Rom mi i ni em ni?” tiin a zâwt a. Paula chuan: “Aw, ni e,” tiin a chhâng a. 28 Sipai pâwl hotu chuan: “He khua leh tui nihna hi sum tam takin ka lei asin,” a ti a. Paula erawh chuan: “Kei chu Rom mi rênga piang ka ni,” a ti a.

29 Chu veleh, amah vaw chunga thu zawh fiah tumtute chuan an kalsan ta nghâl a, sipai pâwl hotu chuan Paula chu Rom mi a ni tih a hriat hnu chuan, a phuar avângin a hlau ta hle a.

30 Tin, a tûkah chuan Judate’n an hêk nachhan hriat ngei a duh avângin ani chu a chhuah a, puithiam lalte leh Sanhedrin-a* rorêltu zawng zawng chu kal khâwm tûrin thu a pe a. Tin, Paula chu a hruai thla a, an zîngah a dintîr a.

23 Paula chuan Sanhedrin-a rorêltute chu a en reng a, an hnênah: “Unaute u, vawiin thleng hian thil dik lo eng mah ka ti lo tih, chhia leh ṭha hriatna thiang tak neiin Pathian hmaah ka sawi thei a ni,” a ti a. 2 Tin, puithiam lalber Anania chuan Paula bula dingte hnênah chuan, a kâa bêng tûrin thu a pe a. 3 Paula erawh chuan a hnênah: “Nang, bang hnawih vâr pa, Pathianin a bêng zâwk ang che. Dân anga ro min rêlsak tûrin i ṭhu a; nimahsela, min bêng tûra thu pein Dân i bawhchhe leh si maw?” a ti a. 4 A bula dingte chuan: “Pathian puithiam lalber i va zah lo ve!” an ti a. 5 Paula chuan: “Unaute u, puithiam lalber a ni tih ka hre lo a ni. ‘In mite chunga rorêltu lakah thu ṭha lo i sawi tûr a ni lo,’ tih ziak a ni si a,” a ti a.

6 Tin, Paula’n a zâtve Saddukai an ni a, mi dang zawng erawh Pharisai an ni tih a hriatin, Sanhedrin-ah chuan auvin: “Unaute u, Pharisai ka ni a, Pharisai fapa pawh ka ni. Mitthi thawhleh beiseina thu-ah rorêlsakin ka awm a nih hi,” a ti a. 7 Chu thu a sawi avâng chuan, Pharisaite leh Saddukaite inkârah inhnialna nasa tak a lo chhuak a, chuta kal khâwmte chu an inṭhen ta a. 8 Saddukaite chuan, ‘Thawhlehna a awm lo va, vântirhkoh emaw, thlarau emaw pawh a awm hek lo,’ an ti a. Nimahsela, Pharisaite erawh chuan chûng zawng zawng chu a awm tih an ring si a.* 9 Tichuan, an awrâwl a ring ta hle a, Pharisaite zînga dân hre mi ṭhenkhat chuan dingin: “He pa hi a sualna eng mah kan hmu lo, thlarau pawhin, vântirhkoh pawhin bia se eng nge pawi?” tia sawiin an ṭang tlat a. 10 Inhnialna chu a nasat telh telh avângin, sipai pâwl hotu chuan Paula chu an pawt sawm mai ang tih a hlau va. Sipaite chu zuk kal a, Paula chu mipui zîng aṭanga rang taka hruai chhuak a, sipaite awmnaa kalpui tûrin thu a pe a.

11 Chumi zân chuan a bulah Lalpa a lo ding a, a hnênah: “Huai takin awm rawh! Jerusalema ka chungchâng kimchang taka i hriattîr ang chiah hian Rom khuaah pawh i hriattîr tûr a ni,” a ti a.

12 A tûkah chuan, Judate chuan Paula ti hlum tûrin ruahmanna an siam a, Paula an tih hlum hma loh chu eng mah eia in lo tûrin chhia an chham a. 13 Chutianga chhechhamtute chu mi 40 aia tam an ni. 14 Chûng mite chu puithiam lalte leh upate hnênah an kal a: “Paula kan tih hlum hma loh chuan eng mah ei lo tûrin chhia kan chham tlat tawh a ni. 15 Chuvângin, nangni hian Sanhedrin-a rorêltute nên sipai pâwl hotute hnênah, Paula chungchâng tam lehzuala hriat duh anga insawiin, Paula chu in hnênah rawn hruai thlâktîr rawh u. A lo thlen hmain amah ti boral tûrin kan lo inring ang e,” an ti a.

16 Nimahsela, Paula farnua fapain chân an tum thu chu a lo hria a, sipaite awmnaah chuan lûtin Paula chu a va hrilh a. 17 Tin, Paula chuan sipai za hotute zînga pakhat a ko va, a hnênah: “He tlangvâl hi sipai pâwl hotu hnênah hruai rawh, a hnênah hrilh tûr eng emaw a nei a ni,” a ti a. 18 Tichuan, ani chu hruaiin, sipai pâwl hotu hnênah chuan a kalpui a: “Mi tâng Paula khân min ko va, he tlângvâl hian eng emaw hrilh tûr che a neih avângin, i hnêna hruai tûrin min ti a ni,” a ti a. 19 Sipai pâwl hotu chuan tlangvâl chu kaiin, a hruai hrang a: “Min hrilh tûr chu eng nge ni?” tiin a zâwt a. 20 Ani chuan: “Judate’n Paula chungchâng tam lehzuala hriat duh anga insawiin, naktûkah Sanhedrin-a Paula hruai thla tûra ngen che an remti tlâng a. 21 Nimahsela, an ngen angin tihsak suh ang che, an zînga mi 40 aia tamin an châng reng si a. Tin, Paula an tih hlum hma loh chu eng mah eia in lo tûrin chhia an chham a. Tûnah hian an ngenna i phalsak nghâkin an inring reng a ni,” a ti a. 22 Sipai pâwl hotu chuan tlangvâl chu: “He thu hi min hriattîr tih tu mah hrilh suh ang che,” tia thu a pêk hnuah a kaltîr ta a.

23 Tichuan, sipai za hotu pahnih a ko va, an hnênah: “Zân dâr 9 vêla* Kaisari khua pan tûrin sipai 200, sakawr chungchuang mi 70 leh, fei keng mi 200 buatsaih rawh u. 24 Tin, ram awptu Felika hnêna him taka a thlen theih nân, Paula chuanna tûrin sakawrte buatsaih bawk rawh u,” a ti a. 25 Heti hian lehkhathawn a ziak bawk a:

26 “Kei Klaudia Lusia hian, Ram Awptu zahawm ber Felika hnênah he lehkha hi ka thawn e: Chibai! 27 He pa hi Judate’n manin tih hlum an tum a. Nimahsela, Rom mi a ni tih ka hriatin, ka sipaite hruaiin rang takin ka kal a, ka chhan chhuak ta a ni. 28 An hêk nachhan hriat ka duh avângin an Sanhedrin-ah ka hruai thla a. 29 An Dân nêna inkûngkaih thila hêk a ni tih ka hmu chhuak a; nimahsela, thihna khawp emaw, tân ina khungna khawp emaw eng mah a tih ka hre lo. 30 Tin, amah an phiarrûkna thu hriattîr ka nih veleh i hnênah ka rawn tîr nghâl a, hêktute pawh i hmaa amah an hêkna thu sawi tûrin thu ka pe bawk a ni,” tiin.

31 Sipaite chuan thupêk an dawn angin, Paula chu a zân a zânin Antipatri khuaah an hruai a. 32 A tûkah sakawr chungchuang mite chuan an kalpui zêl a, sipai dangte erawh chu sipaite awmnaah an lêt leh a. 33 Tin, sakawr chungchuang mite chuan Kaisari khua an thleng a, ram awptu hnênah lehkhathawn chu pein, Paula pawh chu a hnênah an hlân a. 34 Tichuan, lehkhathawn chu a chhiar a, Paula chu a awmna ram a zâwt a, Kilikia rama mi a ni tih a hre ta a. 35 Ani chuan, “Nangmah hêktute an lo thlen hunah i thubuai hi chipchiar takin ka ngaithla ang,” a ti a. Tichuan, Heroda lal ina daha vêng tûrin thu a pe a.

24 Tin, ni nga hnuah puithiam lalber Anania chu upa ṭhenkhat leh vântlâng hmaa thusawitu* Tertulla te nên an lo chhuk a, Paula laka thubuai an neih chu ram awptu hnênah chuan an sawi a. 2 Tertulla chu thusawi tûra koh a nih chuan, ram awptu Felika hmaah Paula chu a hêk ṭan ta a:

“Thlamuang taka kan awm avângin i chungah kan lâwm e, dik taka ro i rêl avângin he hnam hian hma a sâwn a ni. 3 Felik Zahawm Ber, hêng zawng zawng avânga kan lâwmna hi hmun tinah kan sawi chhuak fo ṭhîn. 4 Nimahsela, ka tih buai rei loh nân che, i ngilneihna avânga rei lo tê min ngaithla tûrin ka ngên a che. 5 He pa hi buaina siamtu a ni a, lei pum puia Juda mi awm zawng zawngte zînga helna chawk chhuaktu leh Nazaret sakhaw pâwla a hotu ber a ni tih kan hria. 6 Biak in tih bawlhhlawh a tum bawk a; chuvângin, kan man ta a ni. 7* —— 8 Amah i zâwt a nih chuan, kan hêknate hi a dik a ni tih i hre thei ang,” a ti a.

9 Judate pawhin, “Chûng thute chu a dik a ni,” tiin an lo thlâwp ve a. 10 Tin, ram awptuin Paula chu thusawi tûra zaizira a han hrilh chuan, Paula chuan:

“He hnam chungah hian kum tam tak chhûng ro i rêl tawh tih ka hriat chian êm avângin, lâwm takin ka thiamthu ka sawi dâwn a ni. 11 Jerusalema Pathian be tûra ka han kalna kha, ni 12 aiin a la rei lo tih nangmah ngeiin i finfiah thei ang. 12 Biak inah emaw, inkhâwmna inahte emaw, khawpui chhûngah emaw pawh ni se, mi ka hnial emaw, mipui ka fuihpawrh emaw an hmu hek lo vang. 13 Tûna an mi hêknaah pawh hian finfiahna an pe thei hek lo vang che. 14 Nimahsela, hei erawh i lakah ka pha lo, Dân leh Zâwlneite thuziak zawng zawng ring chungin sakhaw pâwl thar tia an koh, kawng dân angin ka pi leh pute Pathian hnênah rawngbâwlna thianghlim ka hlân ṭhîn. 15 Tin, mi felte leh fel lote thawhlehna a awm ang tih Pathian lamah ka beisei a, chu chu hêng mite pawh hian an beisei ve a ni. 16 Chumi avâng chuan, Pathian leh mihring hmaah chhia leh ṭha hriatna thiang* vawn reng ka tum hrâm hrâm ṭhîn. 17 Kum tam tak hnuah, ka mite hnêna ṭanpuina sum pe tûr leh Pathian hnêna inthawina hlân tûrin Jerusalemah ka kal a. 18 Chûng thilte ka tih lai chuan biak inah dân ang taka thianghlimin min hmu a; nimahsela, ka hnênah mipui an awm lo va, buaina chhuak lah a awm hek lo. Amaherawhchu, Asia* ram aṭangin Juda ṭhenkhat an lo kal a. 19 Chûng mite chuan ka lakah thubuai eng pawh an nei a nih tak zet chuan, min hêk tûrin i hmaah hian an awm tûr a ni. 20 A nih loh leh, heta awmte hian dân ka bawhchhia tih an hmu a nih chuan, Sanhedrin* hmaa ka din lai khân sawi ang hmiang. 21 He thil pakhat chauh lo hi chu, an zînga ka din lai khân ka au chhuahpui lo: ‘Vawiinah hian mitthi thawhlehna thu-ah in hmaah rorêlsakin ka awm a ni!’ tih hi,” a ti a.

22 Nimahsela, Felika chuan Lalpa Kawng* chanchin chu chiang takin a hre tawh a: “Sipai pâwl hotu Lusia a lo chhuk hunah in chungchâng hi ka la rêl ang,” tia sawiin anni chu a kaltîr ta rih a. 23 Tin, sipai za hotu hnênah chuan Paula chu a ṭhiante’n a mamawh an tihsak theihna tûra, zalenna eng emaw chen pe chunga vêng tlat tûrin thu a pe a.

24 Ni eng emaw zât hnuah, Felika chu a nupui Juda mi Drusilli nên an lo kal a, Felika chuan Paula a kohtîr a, Krista Isua ring tih awmzia a sawi chu a ngaithla a. 25 Nimahsela, felna te, insûmtheihna te leh, rorêlna lo awm tûr chungchângte Paula’n a sawi chuan Felika chuan a hlau ta hle a, a hnênah: “Tûnah chuan kal rih phawt la, hun remchâng ka neih hunah ka rawn kohtîr leh ang che,” a ti a. 26 Tichuan, Paula’n thamna a pêk a beisei avângin a ko ngun lehzual a, a be ṭhîn a. 27 Tin, kum hnih a liam hnuah, Felika chu Porkia Festa’n a thlâk a; nimahsela, Felika’n Judate duhsakna dawn a duh avângin Paula chu tân inah chuan a hnutchhiah a.

25 Tichuan, Festa chu Judai ram bial a thlen a, a hnêna thuneihna hlan a nih aṭanga ni thum hnuah, Kaisari khua aṭangin Jerusalemah a han chho va. 2 Puithiam lalte leh Juda puipate chuan Paula an hêkna thu chu a hnênah an lo thlen a. Tin, Festa hnênah chuan, 3 Paula chu Jerusalema kaltîr tûrin an ngên a. Nimahsela, kalkawnga lo chân a, tih hlum an tum a ni. 4 Festa erawh chuan, Paula chu Kaisari khuaa tântîr zawm zêl a nih tûr thu leh amah ngei pawh a lêt leh vat tûr thuin a chhâng a. 5 Ani chuan: “Chuvângin, in zînga thuneitute’n min zui thla sela, thil sual a ti a nih chuan hêk rawh se,” a ti a.

6 Tichuan, an zînga ni riat aṭanga ni sâwm vêl a châm hnuah Kaisari khuaah a chhuk a, a tûkah rorêlna ṭhutthlêngah a ṭhu a, Paula chu rawn hruai lût tûrin thu a pe a. 7 A lo luh chuan, Jerusalem aṭanga lo chhuk Juda mite chuan an din hual a, thubuai rit tak takin an hêk a, a finfiahna erawh an nei thei si lo.

8 Nimahsela, Paula chuan: “Judate Dân thu kalhin emaw, biak in kalhin emaw, Kaisara kalhin emaw eng thil sual mah ka ti lo,” tiin a thiamthu a sawi a. 9 Festa chuan Judate duhsak hlawh a duh avângin Paula chu: “Jerusalema chho va, chutah chuan hêng thute hi ka hmaa rêlsak i duh em?” a ti a. 10 Nimahsela, Paula chuan: “Rorêlsak ka nihna hmun tûr, Kaisara rorêlna lalṭhutthlêng hmaah ka ding a nih hi. Judate chungah eng thil sual mah ka ti lo, chu chu nang pawhin i hre chiang hle a ni. 11 Thil sual titu ka nih tak zet a, thihna khawp thil sual eng pawh ka ti a nih chuan, thih ka hnial lo ve; amaherawhchu, hêng mite min hêkna hi eng mah lo mai a nih chuan, an duh anga an hnêna min pe tûrin tu man dikna an nei lo. Kaisara hnêna thlen ka ngên e!” a ti a. 12 Tin, Festa chuan a rorêlpuite a biak zawhin: “Kaisara hnêna thlen i ngên a, Kaisara hnênah i kal ngei ang,” tiin a chhâng a.

13 Ni eng emaw zât hnuah, lal Agrippa leh Berniki chu Festa chibai bûk tûrin Kaisari khua an lo thleng a. 14 Ni tam tak an châm avângin Festa chuan Paula thubuai chu lal Agrippa hnênah chuan a hrilh a:

“Felika khân mi tâng pakhat a hnutchhiah a, 15 Jerusalema ka awm laiin puithiam lalte leh Juda upate’n a chungchâng min hrilh a, thiam loh chantîr tûrin min ngên a. 16 Nimahsela, kei chuan mi tu pawh amah hêktute hmaichhana an hêkna chungchânga thiamthu sawina hun pawh nei lo va, thiam loh chantîr chu Rom mite tih dân a nih loh thu sawiin ka lo chhâng a. 17 Tin, an lo thlen chuan rei rial lovin, a tûkah rorêlna ṭhutthlêngah ka ṭhu a, ani chu rawn hruai tûrin thu ka pe a. 18 Tichuan, a hêktute chu an ding a, thil tam takin an hêk a; nimahsela, ka lo rin angin an hêk leh si lo. 19 An sakhaw chungchâng leh mi pakhat thi tawh, Paula’n a nung leh tia a sawi Isua chungchâng avânga inhnial mai an lo ni a. 20 Chu inhnialna chu chinfel dân tûr ka hriat loh avângin, ani chu Jerusalemah kal a, chu thubuai chu, chuta rêlsak a duh leh duh loh ka zâwt a. 21 Nimahsela, Paula chuan Lalber Augusta* thu tlûkna a nghah laia tân rih a ngen tâk zâwk avângin, Kaisara hnêna ka tirh hma zawng ani chu tâng rih tûrin thu ka pe ta a ni,” a ti a.

22 Tin, Agrippa chuan Festa hnênah: “Keimah ngeiin a thusawi ngaihthlâk ka duh e,” a ti a. Festa chuan, “Naktukah i ngaithla dâwn nia,” a ti a. 23 A tûkah chuan, Agrippa leh Berniki chu ropui takin an lo kal a, sipai pâwl hotute leh khuaa mi pawimawhte nên rorêlna inah chuan an lût a. Festa chuan Paula chu rawn hruai lût tûrin thu a pe a, an rawn hruai lût ta a. 24 Tichuan, Festa chuan: “Lal Agrippa leh kan zînga awm zawng zawngte u, he pa in hmuh hi Juda mi zawng zawngin, ‘Nung tlâk a ni tawh lo,’ tia au va, Jerusalemah leh he hmuna min ngena kha a ni a. 25 Nimahsela, thihna khawp eng thil mah a tih ka hre lo va. Tin, Lalber Augusta hnêna a thubuai thlen a ngen angin, a hnêna tirh ka tum ta a. 26 Nimahsela, ka Lalpa hnênah chuan a chungchâng thu ziah tûr mumal eng mah ka nei lo va. Chuvângin, thu zawh fiah a nih hnua, ziah tûr eng emaw tal ka neih theih nân in vaia hmaah, a bîk takin Lal Agrippa hmaah hian ka rawn hruai a ni. 27 An hêkna thute hriattîrna tel lova Rom khuaa mi tâng tirh chu thil inâwm niin ka hre si lo,” a ti a.

26 Agrippa chuan Paula hnênah: “I thiamthu sawi phalsak i ni e,” a ti a. Tin, Paula chuan a kut a phar chhuak a, heti hian a thiamthu a sawi ta a:

2 “Lal Agrippa, vawiinah hian i hmaa dinga Judate’n min hêkna zawng zawnga ka thiamthu ka sawi thei tûr hi ka lâwm hle. 3 Judate hnam dân zawng zawng leh an inhnialna i hriat chian êm avângin ka lâwm lehzual a ni. Chuvângin, dawhthei taka min ngaithla tûrin ka ngên a che.

4 “Ka naupan lai aṭanga Jerusalema ka awm thlengin Juda mi tam takin min hria a. 5 An duh chuan, Pharisai ka ni ṭhîn tih an hrilh thei ang che. Pharisaite Pathian biak dân chu, Juda dangte Pathian biak dân aiin a khirh zâwk a. 6 Nimahsela, Pathianin kan pi leh pute hnêna a thutiam kha a thlen famkimtîr ang tih ka beisei avângin, tûnah hian rorêlna hmaah ka ding a nih hi. 7 Chu thuthiam bawk chu a thlen famkimna hmuh beiseiin, kan hnam 12-te khân a chhûn a zânin Pathian hnênah ṭhahnemngai takin rawngbâwlna thianghlim an hlân ṭhîn a. Aw Lalber, chu beiseina avâng chuan Judate’n min hêk a ni.

8 “Engvângin nge nangni hian Pathianin mitthi a kai tho tih chu awihawm lohva in ngaih?* 9 Kei pawhin Nazaret Isua hming kalh zâwnga thil tam tak tih a ṭhat ka lo ring ṭhîn a. 10 Chutiang chiah chuan Jerusalemah ka ti ṭhîn. Puithiam lalte hnên aṭanga thuneihna ka dawn avângin, tân inahte mi thianghlim tam tak ka khung ṭhîn a, tih hlum ka remtihpui bawk ṭhîn. 11 Inkhâwmna in zawng zawngahte hremin, tih luihnain an rinna phatsantîr ka tum ṭhîn a; an chunga ka thinur nasat êm avângin, anmahni ti duhdah tûrin khaw dang thleng thlengin ka kal ṭhîn.

12 “Chutianga ti tûra puithiam lalte thuneihna leh thupêk kenga Damaska khua ka pan laiin, 13 Aw Lalber, kawnga ka kal lai, chhûn lai takin vân aṭangin êng, ni êng aia êng zâwk kei leh ka zinpuite vêla lo êng ka hmu a. 14 Tichuan, kan vaiin kan tlu a, awin Hebrai ṭawngin: ‘Saula, Saula, engvângin nge mi tih duhdah? Chhunna tiang* i khen reng hian a tina che a ni,’ a tih ka hria a. 15 Kei erawh chuan: ‘Lalpa, tu nge i nih?’ ka ti a. Lalpa chuan: ‘Isua, i tih duhdah hi ka ni. 16 Nimahsela, tho la, ding rawh. Ka chungchânga i thil hmuhte leh ka la hmuhtîr tûr che puang chhuak tûra, ka chhiahhlawh leh thuhretu atâna thlang tûr chein, i hnênah ka rawn inlâr a ni. 17 Tin, an hnêna ka tirhna che hêng mite leh hnam dangte lak aṭang hian ka chhanhim ang che. 18 An mit ti vâr tûr te, thim hawisana êng lam hawitîr tûr te leh, Setana thuneihna hawisana Pathian lam hawitîr tûrtein; chutichuan, min rin avângin an sualte ngaihdamna leh tih thianghlim tawhte zînga rochan an dawng thei ang,’ a ti a.

19 “Chuvângin, Lal Agrippa, chu inlârnaa Isua min hrilh ang chuan ka ti ta a ni. 20 A hmasa berin, Damaska khuaa mite hnênah, chumi hnuah Jerusalema mite hnênah leh, Judai ram zawng zawng leh hnam dangte hnênah pawh sim tûr leh, an sim tak zetzia thil tiha lantîrna hmanga Pathian lama an hawi theihna tûrin thu ka hril ṭhîn a. 21 Chu chu Judate’n biak inah min man a, min tih hlum an tum chhan chu a ni. 22 Amaherawhchu, Pathian hnên aṭanga ṭanpuina ka dawn avângin, vawiin thleng hian mi lian leh mi tête hnênah ka la hriattîr reng a. Zâwlneite leh Mosia’n thleng tûra an sawite chauh lo kha chu thu dang eng mah ka sawi lo. 23 ‘Krista chu hrehawm tuar tûr leh thihna ata kaihthawh hmasak ber tûr a ni a, ani chuan hêng mite leh hnam dangte hnênah êng thu a hriattîr ang,’ tih kha,” a ti a.

24 Paula’n chutianga a thiamthu a sawi lai mêk chuan Festa’n ring takin: “Paula i â tawh a nih hi! I zir tamnain a ti â zo tawh che a nih hi!” a ti a. 25 Nimahsela, Paula chuan: “Festa Zahawm Ber, ka â lo asin, rilru fîm tak puin thu dik tak ka sawi zâwk a ni e. 26 Chûng thilte chu lalin a hriat chian êm avângin, a hnênah huai takin ka sawi thei a nih hi. Chûng thilte chu a rûka tih a nih loh avângin, a hriat loh eng mah a awm lo tih ka chiang a ni. 27 Lal Agrippa, Zâwlneite chu i ring em? I ring tih ka hria e,” a ti a. 28 Agrippa erawh chuan Paula hnênah: “Rei lo te chhûngin Kristian ni tûrin min thlêm thlu ṭêp alâwm maw le,” a ti a. 29 Paula chuan: “A rei emaw, rei lo emaw nang chauh ni lovin, vawiina ka thusawi ngaithlatu zawng zawngte hi keimah ang ni tûrin Pathian hnênah ka dîl a ni, hêng khaidiatte erawh hi chu bun ve lovin,” a ti a.

30 Tichuan, lal chu ram awptu te, Berniki te leh, an bula ṭhute nên chuan an tho va. 31 Nimahsela, an chhuah pahin: “He mi hian thihna khawp emaw, tân ina khungna khawp emaw eng thil mah a tih loh hi,” tiin an sawi hlawm a. 32 Agrippa chuan Festa hnênah: “Kaisara hnêna thlen dîl lo sela chuan, he pa hi chhuah mai theih a nih hi maw le,” a ti a.

27 Chutichuan, lawnga Itali rama kan kal tûr thu an tih tlûk veleh, Paula leh mi tâng dangte chu Augusta sipai pâwla mi, sipai za hotu Julia hnênah an hlân a. 2 Asia* rama tuifinriat kama khaw awmte tlawh tûr Adramuttini khaw lawngah chuangin kan chhuak ta a, Makedonia rama Thessalonika khuaa mi Aristarka pawh kan rualin a kal ve a. 3 A tûkah Sidon khua kan thleng a, Julia chu Paula chungah a ṭha* hle a, a ṭhiante hnêna kal a phalsak a. Chutiang chuan, Paula chu a ṭhiante’n an ṭanpui thei a ni.

4 Tin, chuta ṭang chuan lawngin kan chhuak leh a; nimahsela, thlîin a ni lo lama min beng avângin, Kupra thliarkâr phên thli nat lohna lamah kan kal ta a. 5 Kilikia leh Pamphulia ram tuipui kamte kan pelh hnuin, Lukia rama Mura lawng chawlh hmun kan thleng a. 6 Chutah chuan sipai za hotu chuan Aleksandria khua aṭanga lo kal Itali lam pan tûr lawng a hmu a, chu lawngah chuan min chuantîr ta a. 7 Ni eng emaw zât muangchânga kan kal hnuah, harsa takin Nido khua kan thleng thei hrâm a. Thlîin hma lam pan thei lova min siam avângin, thli nat lohna hmun Kret thliarkâr hrûl Salmoni lamah kan kal a. 8 Harsa ti takin vaukam hrûlah kan kal a, Litengsâwl Mawi* an tih hmun kan thleng a, chu chu Lasai khaw bula awm a ni.

9 Ni tam tak a ral hnu chuan, Inremna Nî chaw nghei hun pawh a pelh hial tawh avângin lawnga zin chhuah chu a hlauhawm ta hle a, Paula chuan mite chu thurâwn a pe a. 10 An hnênah: “Ṭhiante u, tûna lawnga kal zêl hian chhiatna nasa tak a thlen thei tih leh, bungrua leh lawng mai bâkah, kan nunna hial pawh kan chân thei tih ka hria a ni,” a ti a. 11 Nimahsela, sipai za hotu chuan Paula thusawi aiin, lawngpu leh lawng neitu thusawi chu a ngaithla ta zâwk a. 12 Thlasik tuar nân chu lawng chawlhna chu a remchân tâwk loh avângin, mi tam zâwkin kal chhuah a, Phoiniki khua thlen hrâm a, chuta thlasik hman chu an duh a. Phoiniki khua chu Kret thliarkâra lawng chawlhna pakhat a ni a, hmâr chhak leh chhim chhak hawi zâwnga awm a ni.

13 Chhim thlî a tleh heuh heuh tâkah chuan, Phoiniki khua chu thleng thei tûrah an inngai a; tichuan, thîrchakai chu khai chhuakin, Kret thliarkâr kam hrûlah an kal chhuak ta a. 14 Nimahsela, rei lo te hnuah thli na tak, Eurakuilo* an tih chu a lo tleh a. 15 Lawng chu thli na takin a nuai avângin, thli tâwn zâwngin hma lam a pan thei ta lo va. Eng mah kan tih theih tâk lovah chuan, thlî chuan a duhna lam lamah min lên a. 16 Thliarkâr tê tak tê pakhat Kauda an tih phên lamah min lên phei a; mahse, lawng mei lama lawnglêng* inthlung chu harsa takin kan thunun thei hrâm a. 17 Lawnglêng chu lawnga an khai hnuin hruizên chuan lawng hnuai lamah vêt kualin, an phuar bet ta tlat a. Lawng chu Surti* vaukama a tân an hlauh avângin, a puanzârte chu an ti hniam bawk a; tichuan, thlî chuan min lên min lên a. 18 Thlipuiin nasa taka min nuai avângin, a tûkah chuan lawng ti zâng tûrin bungraw ṭhenkhat an paih chhuak a. 19 Tin, a ni thumnaah chuan lawng bungruate chu an paih chhuak leh a.

20 Ni tam tak chhûng nî leh arsi a lang lo va; tin, thlipui na takin* min nuai reng bawk avângin, dam chhuah inbeiseina rêng kan nei tawh lo. 21 Rei tak chaw ei lova an awm hnuah Paula chu an zîngah a ding a, an hnênah: “Ṭhiante u, Kret thliarkâr aṭanga chhuak lo tûra ka thurâwn kha zâwm ula chuan, he chhiatna leh chânna hi a thleng lo tûr. 22 Nimahsela, huai taka awm tûrin ka fuih a che u, in zînga tu mah an boral lo vang a, lawng erawh hi chu a keh chhia ang. 23 Nizân khân ka biak ṭhin leh a rawng ka bâwl ṭhin Pathian chuan ka hnênah a vântirhkoh a rawn tîr a. 24 Ani chuan: ‘Paula, hlau suh, Kaisara hmâah i ding tûr a ni. Ngai teh! Pathianin lawnga i chuanpui zawng zawngte nên hian a chhanhim dâwn che u a ni,’ tiin min hrilh a. 25 Chuvângin, ṭhiante u, hlau suh u, hrilh ka nih ang chiah khân Pathianin a ti ang tih ka ring a ni. 26 Nimahsela, thliarkâr khawiah emaw min lên chhuak tûr a ni,” a ti a.

27 Tin, a zan 14-naah chuan Adria Tuipuiah thlîin min lên min lên a, zan laiah chuan lawng mite chuan khawmual khawi lai emaw kan hnaih niin an hria a. 28 Tichuan, tui thûk lam chu an teh a, hlam 20* niin an hria a. Rei lo te hnuah an teh leh a, hlam 15* niin an hria a. 29 Lung kan sut palh an hlau va; tichuan, lawng mei lamah thîrchakai pali an thlâk a, khawvâr hlân an nghâkhlel hle a. 30 Nimahsela, lawng mite chu lawng hma lama thîrchakai thlâk tûr anga awmin, tuipuiah chuan lawnglêng chu an thlâk thla a, lawng aṭanga tlân bo an tum ta a. 31 Paula chuan sipai za hotu leh sipaite hnênah chuan: “Hêng mite hi lawnga an awm reng loh chuan in him thei lo vang,” a ti a. 32 Tichuan, sipaite chuan lawnglêng hruite chu an ti chat a, a tla ta a.

33 Tin, khawvâr dâwnah Paula chuan an vaiin chaw ei tûrin a ngên a. An hnênah: “Vawiin hi eng mah ei lova thlaphâng taka in nghahna, a ni 14-na a ni ta. 34 Chuvângin, chaw ei tûrin ka ngên a che u; hei hi in himna tûr a ni e, in zîngah tu ma samzai pakhat mah a boral lo vang,” a ti a. 35 Chu thu a sawi zawh chuan chhang a la a, an vaia hmaah Pathian hnênah lâwmthu a sawi a; tin, a phel a, a ei ṭan ta a. 36 Tichuan, an vaia thlamuang taka awmin, chaw an ei ve ta a. 37 Lawnga chuang chu mi 276 lai kan ni. 38 Puar taka chaw an ei kham hnu chuan buh chu tuifinriata paihin lawng chu an ti zâng a.

39 Khua a vâr chuan khawmual chu khawi lai nge a nih an hre lo va; nimahsela, ṭiaupho nei tuipui kam an hmu a, an theih chuan lawng chu ṭiauphova khalh chhuah an tum a. 40 Tichuan, thîrchakai phuarnate chu an ti chat a, tuipuiah chuan an hnutchhiah a. Chumi rual chuan a kar herna phuarnate chu an phelh a, hma lam puanzâr chu thli chhêm tûr zâwngin an ti sâng a, ṭiaupho chu an pan ta a. 41 Tuifâwn na tak intawhna an va sut chuan lawng hma lam chu leiah a insu bûr ta tlat a, tih chêt theih rual a ni ta lo va. Tichuan, tuifâwn chuan lawng mei lam chu nasa takin a ti keh sawm ṭan ta a. 42 Chu veleh, sipaite chuan mi tângte chu tui hleuh va, an tlân bo loh nân thah an tum ta a. 43 Nimahsela, sipai za hotu chuan Paula chu chhanhim a duh avângin an thil tih tum chu a khap a, tui hleuh thiam apiang tuipuia zuang thla a, khawmuala hleuh kai hmasa tûrin thu a pe a. 44 Mi dangte chu thingphel chungah emaw, lawng keh them chungah emaw chuang tûrin thu a pe bawk a. Tichuan, an vaiin khawmualah him takin an kai ta vek a.

28 Him taka vaukam kan thlen hnu chuan, chu thliarkâr chu Malta a ni tih kan hre ta a. 2 Chu thliarkâra awmte* chuan kan chungah ngilneihna nasa tak an lantîr a. Ruah a sûr avâng leh khua a vawh avângin mei an chhêm a, kan vaiin ṭha takin min lo lâwm a. 3 Tin, Paula’n thing têl khat a fawm a, meiah a tuah a, a sat avângin rûl tûr nei a lo chhuak a, a kutah chukin a tâng reng a. 4 Chu thliarkâra awmte chuan a kuta rûl tûr nei inkhai reng chu an hmuhin: “He pa hi tualthattu a ni chiang mai, tuipui aṭangin dam khawchhuak mah sela, Dik Taka Rorêltu* chuan a dam zawm zêl a phal lo a nih hi,” an ti hlawm a. 5 Nimahsela, rûl tûr nei chu meiah a thing thla a, rûl chukna avâng chuan engtin mah a awm lo va. 6 Anni erawh chuan a vûn emaw, a thih nghâl emaw an ring a. Rei tak an nghah hnuah pawh engtin mah a awm lo tih an hmuh chuan an rilru thlâkin, ‘pathian a nih hi,’ an ti ta a.

7 Chumi kiang vêla huante chu, chu thliarkâra rorêltu Publia ta a ni a, ani chuan min lo lâwm a, ni thum chhûng nuam takin min thleng a. 8 Tin, Publia pa chu khawsik leh santên avângin a mu reng a. Paula chu a hnênah a lût a, a ṭawngṭai a, a chungah a kut a nghat a, a ti dam ta a. 9 Chu thil thlen hnuah chuan, thliarkâra dam lo dang zawng zawngte pawh Paula hnênah an lo kal a, an dam ta hlawm a. 10 An lâwmzia lantîr nân thilpêk tam tak min pe a, lawnga kan chhuah dâwnah chuan kan mamawh engkim min pein, lawngah chuan min hlânsak a.

11 Thla thum hnuah lawng pakhat, a hma lama Zeusa fapate lim chuanna Alexandria aṭanga lo kal, thliarkâra thlasik chhûng awm tawhah chuan chuangin kan chhuak ta a. 12 Surakus lawng chawlh hmun kan thleng a, chutah chuan ni thum kan châm a. 13 Chuta ṭang chuan kan chhuak a, Regium khua kan thleng a, a tûkah chhim thlî a lo tleh a, a tûk lehah Puteoli khua kan thleng a. 14 Chutah chuan unaute kan hmu a, an hnêna ni sarih châm tûrin min ngên a. Kan châm hnuah, Rom khua panin kan chhuak leh ta a. 15 Rom khuaa unaute’n chuta kan kal tûr thu an lo hriat chuan, min hmuak tûrin Appia Bazâr leh Khualbûk Pathum awmna thlengin an lo kal a. Paula’n anni chu a hmuhin Pathian hnênah lâwmthu a sawi a, a lo chak phah ta a. 16 A tâwp a tâwpah, Rom khua chu kan thleng ta a, Paula chu sipai vênna hnuaiah amaha awm phalsak a ni a.

17 Nimahsela, ni thum hnuah Paula chuan Juda puipate a ko khâwm a. An lo kal khâwm chuan an hnênah: “Unaute u, mite leh kan pi leh pute tih dân kalha eng mah ka ti lo chung pawhin Jerusalemah tântîr ka ni a, Rom mite hnênah hlan ka ni. 18 Zawhnate min zawh hnu chuan, Rom mite chuan min tih hlumna tûr chhan eng mah an hmuh loh avângin min chhuah an duh a. 19 Nimahsela, Judate’n chu chu an hnial avângin loh theih lova Kaisara hnêna ka thlen a ngai a. Mahse, chu chu ka mite hêkna tûr ka neih vânga ti ka ni lo. 20 Chuvângin, nangmahni hmu a, in hnêna thu sawi tûrin ka ko che u a ni. Israelte’n an beiseia avâng khân he khaidiata phuar hi ka ni si a,” a ti a. 21 Anni chuan a hnênah: “Judai ram aṭangin i chungchânga lehkhathawn kan dawng lo va, chuta ṭanga lo kal tu mahin i chanchin a ṭha lo zâwnga rawn thlenin an sawi hek lo. 22 Nimahsela, he pâwl hi hmun tinah sawichhiat a ni tih kan hria a; chuvângin, i hnên aṭang ngeia i ngaih dânte hriat a ṭha kan ti a ni,” an ti a.

23 Tichuan, amah hmuhna tûr nî an ruat a, chumi nî chuan a hmaa lo kalte aia tam zâwk a thlen inah an lo kal a. Zîng aṭanga tlai thlengin anni chu Pathian Ram chungchâng chipchiar taka hriattîrin a hrilhfiah a, Isua an rin theih nân Mosia Dân thu aṭang leh Zâwlneite thu aṭangin hmin a tum a. 24 Mi ṭhenkhatin a thusawi chu an ring a, mi dangte chuan an ring lo va. 25 An ngaih dân a inan loh avânga an kal chhuah ṭan tâkah chuan, Paula’n he thu pakhat hi a sawi a:

“Thlarau thianghlimin in pi leh pute hnêna zâwlnei Isaia kal tlanga a lo sawi kha a dik tak zet mai. 26 ‘Hêng mite hnênah hian va kal la, heti hian sawi rawh: “A hriat zawng in hria ang a; nimahsela, a awmzia in hre lo vang. A en zawng in en ang a; nimahsela, in hmu lo vang. 27 Hêng mite thinlung hi lung ang maiin a sak a ni, an bengin hre mah se, an ngaithla duh lo, an maimitchhîng bawk a; chuti lo chuan, an mita hmuin an bengin an hria ang a, an thinlunga hre thiamin an hawikîr ang a, keiin ka lo ti dam hlauh dah ang e,” tiin,’ tih hi. 28 Chuvângin, Pathian hnên aṭanga he chhandamna thuchah hi hnam dangte hnênah puan chhuah a ni tawh tih hre rawh u; anni chuan an ngaithla ngei ang,” a ti a. 29* ——

30 Tin, Paula chu Rom khuaah chuan a in luahah kum hnih pumhlûm a awm a, a hnêna lo kal zawng zawngte chu ṭha takin a lo lâwm ṭhîn a. 31 Dodâltu awm lovin, tîmna nei hauh lovin* an hnênah Pathian Ram thu a hril a, Lalpa Isua Krista chungchâng a zirtîr ṭhîn a.