CHANCHIN ṬHA JOHANA ZIAK

1 A tîrin Thu a awm, Thu chu Pathian hnênah a awm, Thu chu pathian pakhat a ni. 2 Ani chu a tîrin Pathian hnênah a awm a. 3 Thil zawng zawng amah kal tlangin a lo awm a, amah kal tlang lovin eng thil mah a awm lo.

4 Amah avângin nunna a lo awm a, chu nunna chu mihringte tân êng a ni. 5 Tin, êng chu thim zîngah a lo êng a, thimin chu chu a hliahkhuh thei lo.

6 Pathian tirh mi pakhat a lo kal a, a hming chu Johana a ni. 7 Ani chu êng chungchâng hriattîr tûrin thuhretu angin a lo kal a, amah avânga mi zawng zawngin an rin theihna tûrin. 8 Ani chu, chu êng chu a ni lo va, chu êng chungchâng hriattîr tûr zâwka lo kal a ni.

9 Eng dik tak, mi tin tiêngtu tûr chu khawvêlah a lo kal dâwn e. 10 Ani chu khawvêlah a awm, khawvêl hi amah kal tlanga lo awm a ni; nimahsela, khawvêlin ani chu a hre lo. 11 Ama inah a lo kal a, ama mite ngeiin ani chu an lâwm si lo. 12 Nimahsela, amah lo lâwmtu zawng zawngte chu a hming chunga rinna an lantîr avângin Pathian fate nih theihna a pe a. 13 Anni chu thisena hrin an ni lo va, tisa duh zâwnga hrin an ni hek lo va, mipa duh zâwnga hrin pawh an ni hek lo, Pathian hrin an ni zâwk.

14 Tin, Thu chu tisaah a lo chang a, kan zîngah a lo awm ta. A ropuina chu kan hmu, pa fapa mal neih chhun anga a ropuina chu; ani chu Pathian duhsakna leh thutakin a khat a ni. 15 (Johana’n a chanchin a hriattîr tawh: “Ani chu, ‘Ka hnunga lo kal tûr khân mi lehkhalh tawh, ka awm hmaa awm reng tawh a ni si a,’ tia a chanchin ka sawia kha a ni,” tiin.) 16 Khawngaihna nasa tak leh thutaka a khah avângin, a khawngaihna nasa tak chu kan dawng reng ṭhîn. 17 Dân Thu chu Mosia kal tlanga pêk a nih avângin, khawngaihna nasa tak leh thutak chu Isua Krista kal tlanga lo awm tûr a ni. 18 Tu man eng lai mahin Pathian an hmu ngai lo, a Pa bula* awm pathian pakhat ni bawk, fapa mal neih chhun chuan a Pa chanchin a sawi tawh a ni.

19 Judate’n Jerusalem aṭangin puithiamte leh Levia chite chu Johana hnênah tîrin, “Tu nge i nih?” tiin an zawhtîr a. 20 Ani chuan: “Krista chu ka ni lo,” tiin a lo chhâng nghâl a. 21 Anni chuan a hnênah: “A nih chuan, Elija i ni em?” an ti a. Ani chuan: “Ka ni lo,” a ti a. “Zâwlnei i ni em?” an ti a. Ani chuan: “Ni lo!” tiin a chhâng a. 22 Tin, anni chuan a hnênah: “Min tîrtute kan chhân theih nân tu nge i nih? I chanchin min hrilh rawh,” an ti a. 23 Ani chuan: “‘Jehova* kawng ti ngîl rawh u,’ tia mi pakhat thlalêra au zâwlnei Isaia’n a sawia kha ka ni,” a ti a. 24 Chûng puithiamte leh Levia chite chu Pharisaite tirh an ni. 25 Tin, anni chuan a hnênah: “A nih leh, Krista emaw, Elija emaw, Zâwlnei emaw i nih si loh chuan engvângin nge i baptis ṭhin?” tiin an zâwt a. 26 Johana’n anni chu chhângin: “Kei chuan tuiin ka baptis ṭhîn, in zîngah mi pakhat in hriat loh a ding a ni. 27 Ani chu ka hnunga lo kal tûra chu a ni a, a pheikhawk hrui phelh tlâk pawh ka ni lo,” a ti a. 28 Chûng thilte chu Johana’n mite a baptis ṭhinna hmun, Jordan Lui râla awm Bethani khuaa thleng a ni.

29 Tin, a tûkah chuan a hnên lam pana Isua lo kal chu Johana’n a hmu a: “En teh u, Pathian Berâm No, khawvêl sual la botu tûr saw! 30 Ani saw: ‘Ka hnunga lo kal, mi lehkhalhtu, ka awm hmaa awm reng tawh,’ tia a chanchin ka sawia kha a ni. 31 Ani chu hre lo mah ila, Israelte’n amah an hriat theihna tûrin tuia baptis tûrin ka lo kal a ni,” a ti a. 32 Johana chuan heti hian a lo hriattîr tawh bawk a ni: “Vân aṭanga thlarau ṭhuro anga lo chhuk ka hmu a, a chungah a fu reng a. 33 Ani chu hre lo mah ila, tuia baptis tûra mi Tîrtu ngei khân ka hnênah: ‘Tu chungah pawh thlarau lo chhuk a, a chunga awm reng i hmuha chu, ani chu thlarau thianghlima baptistu tûr chu a ni,’ tiin min hrilh a. 34 Chu chu ka hmu tawh a, he mi hi Pathian Fapa a ni tih ka hriattîr tawh,” a ti a.

35 A tûk lehah chuan, Johana chu a zirtîr pahnihte nên an ding a. 36 Isua kal lai chu a en a: “En teh u, Pathian Berâm No saw!” a ti a. 37 Zirtîr pahnihin a thusawi chu an hriat chuan Isua chu an zui ta a. 38 Tin, Isua chu a hawi a, an rawn zui chu a hmu a. An hnênah: “Eng nge in zawn?” a ti a. Anni chuan a hnênah: “Rabbi, khawiah nge i thlen?” an ti a (Rabbi tih chu, “Zirtîrtu,” tihna a ni). 39 Tichuan, an hnênah: “Lo kal ula, in hmu ang,” a ti a. Tichuan, an kal a, a thlenna chu an hmu a, chumi nî chuan a hnênah an awm a. Chu chu, tlai lam dâr li vêl* a ni. 40 Simon Petera unaupa, Andria chu Johana thusawi hria a, Isua zuitu pahnihte zînga pakhat a ni a. 41 Ani chuan a hmasa berin a unaupa Simona a va zawng hmu a, a hnênah: “Messia kan hmu ta,” a ti a (Messia tih chu, “Krista,” tihna a ni). 42 Tichuan, Isua hnênah a hruai a, Isua’n ani chu a lo hmuhin a hnênah: “Nang hi, Johana fapa Simona i ni a, ‘Kipha,’ tiin an ko vang che,” a ti a (Kipha tih chu, “Petera,” tihna a ni).

43 Tin, a tûkah chuan Galili rama kal a tum a, Isua’n Philipa a hmu a, a hnênah: “Min zui rawh,” a ti a. 44 Philipa chu Andria leh Petera te khua Bethsaida khuaa mi a ni. 45 Philipa chuan Nathanaela a hmu a, a hnênah: “A chungchâng Mosia Dân lehkhabua inziak leh Zâwlneite’n an lo ziah kha kan hmu ta: Isua, Josefa fapa, Nazaret khuaa mi chu,” a ti a. 46 Nimahsela, Nathanaela chuan a hnênah: “Nazaret khua aṭangin thil ṭha a chhuak thei em ni?” a ti a. Philipa chuan a hnênah: “Lo kal la, en rawh,” a ti a. 47 Isua’n a lam pana Nathanaela lo kal a hmuh chuan, a chanchin heti hian a sawi a: “En teh u, Israel mi dik tak, mi bum tumna rêng nei lo saw,” a ti a. 48 Nathanaela chuan a hnênah: “Engtin nge mi hriat?” a ti a. Isua’n a hnênah: “Philipa’n a koh hma chea, theipui kûng hnuaia i awm lai khân ka hmu che asin,” a ti a. 49 Nathanaela chuan: “Rabbi, Pathian Fapa i ni, Israelte Lal i nih hi,” tiin a chhâng a. 50 Isua’n a hnênah: “Theipui kûng hnuaiah ka hmu che tia ka hrilh avâng che khân mi ring a ni maw? Heng thilte aia ropui zâwk hi i la hmu ang,” tiin a chhâng a. 51 Tin, Isua chuan a hnênah: “Tih tak meuhvin, tih tak meuhvin ka hrilh a che u, vân inhawnga mihring Fapa hnêna Pathian vântirhkohte chhuk leh chho in la hmu ang,” a ti a.

2 Tin, ni thum nîah chuan Galili rama Kana khuaah inneihna ruai ṭheh a ni a, chutah chuan Isua nu pawh a awm ve a. 2 Isua leh a zirtîrte pawh inneihna ruai ṭheh tûra sâwm an ni.

3 Uain a zo dâwn ta a, Isua nu chuan a hnênah: “Uain an nei ta lo ve,” a ti a. 4 Nimahsela, Isua’n a hnênah: “Nang nêna kan lo buaina tûr eng nge awm?* Ka hun a la thleng lo ve,” a ti a. 5 A nuin uain semtute hnênah chuan: “A hrilh apiang che u chu ti rawh u,” a ti a. 6 Tin, Judate insilfai dânin a phût angin, chutah chuan lung tuibêl paruk, tehkhâwng* hnih aṭanga tehkhâwng thum vêl ṭheuh dawng an hûng a. 7 Isua’n an hnênah: “Bêlahte hian tui chhûng khat rawh u,” a ti a. Tichuan, an chhûng khat a. 8 Tin, an hnênah: “Tûnah thâl ula, fatu hotu hnênah kalpui rawh u,” a ti a. Tichuan, an kalpui ta a. 9 Fatu hotu chuan tui, uaina lo chang ta chu a tem a, khawi aṭanga lo awm nge a hre lo va (tui thâltu chhiahhlawhte erawh chuan an hria a), fatu hotu chuan mopa* chu kovin, 10 a hnênah: “Mi tinin a tîrah uain ṭha chhawp chhuakin, mite an ruih hnuah a ṭha lo zâwk an chhawp chhuak ṭhîn. Nang chuan tûn thlengin uain ṭha i la nei a nih hi,” a ti a. 11 Isua’n he a thil mak* tih hmasa ber hi Galili rama Kana khuaah a ti a ni. Ani chuan a ropuizia a lantîr a. Tin, a zirtîrte chuan ani chu an ring ta a.

12 Chumi hnuah chuan a nu te, a unau te leh, a zirtîrte nên Kapernaum khuaah an zuk kal a. Nimahsela, chutah chuan ni rei tak an châm lo.

13 Tin, Judate Kalhlên Kût a lo hnai ta a, Isua chu Jerusalemah a han kal a. 14 Biak inah chuan bâwng te, berâm te leh, ṭhuro zuartute leh pawisa thlengtu lo ṭhute chu a hmu a. 15 Tin, vuakna hruihrual a siam hnuah, berâm leh bâwngte chu a zuartu zawng zawngte nên biak in aṭangin a hnawt chhuak a. Pawisa thlengtute pawisa thîrte chu paih darhsakin, an dawhkânte chu a nam thlûksak bawk a. 16 Ṭhuro zuartute hnênah chuan: “Hêng thilte hi heta ṭang hian la bo rawh u! Ka Pa in hi sumdâwnna inah* siam tawh suh u!” a ti a. 17 A zirtîrte chuan: “I in atâna ṭhahnemngaihnain ka lo khat ang,” tih ziak chu an hre chhuak a.

18 Tichuan, a thil tih chhân lêt nân Judate chuan a hnênah: “Hêng thilte ti tûr hian dikna i nei tih finfiah nân, eng chhinchhiahna nge min entîr dâwn?” an ti a. 19 Isua’n an hnênah: “He biak in hi ṭhiat ula, ni thum chhûngin ka sa ṭha leh ang,” a ti a. 20 Judate chuan: “He biak in hi kum 46 chhûng sak a ni a, nangin ni thum chhûngin i sa ṭha leh ang maw?” an ti a. 21 Nimahsela, biak in chungchâng a sawi chu ama taksa a sawina a ni. 22 Chuvângin, thihna ata a thawh leh hnuah a zirtîrte chuan chu thu chu a lo sawi tawh ṭhîn tih an hre chhuak a. Tichuan, Pathian Lehkha Thu leh Isua thusawi chu an ring ta a.

23 Tin, Kalhlên Kûta Jerusalema a awm lai chuan, a thil mak* tihte an hmu a, mi tam takin amah an ring ta a. 24 Nimahsela, Isua erawh chuan anni chu a la ring ngam lo. An vaia a hriat vek avâng leh, 25 mihring thinlunga awm a hriat avângin mihring chungchâng tu man an hrilh a ngai lo.

3 Tin, Judate rorêltu, Pharisai pakhat Nikodema a awm a. 2 Ani chu zânah Isua hnênah a lo kal a, a hnênah: “Rabbi, Pathian hnên aṭanga lo kal zirtîrtu i ni tih kan hria, Pathianin a awmpui loh chuan tu man thil mak* i tih angte hi an ti thei lo vang,” a ti a. 3 Isua’n ani chu chhângin: “Tih tak meuhvin, tih tak meuhvin ka hrilh a che, tu pawh a pian thar loh chuan Pathian Ramah a lût thei lo vang,” a ti a. 4 Nikodema chuan a hnênah: “Engtin nge mi a upat hnuin a pian leh theih ang? A vawi hnih nân a nu pum chhûngah lûtin, a piang nawn leh thei âwm si lo va,” a ti a. 5 Isua’n ani chu chhângin: “Tih tak meuhvin, tih tak meuhvin ka hrilh a che, tu pawh tui leh thlarau aṭanga a pian loh chuan Pathian Ramah a lût thei lo vang. 6 Tisa aṭanga piang chu tisa a ni a, thlarau aṭanga piang chu thlarau a ni. 7 ‘In piang thar tûr a ni,’ ka tih avâng hian mak ti suh. 8 Thlî a duh duhna lamah a tleh a, a ri i hre ṭhîn; nimahsela, khawi aṭanga lo kal nge tih leh khawiah nge a kal dâwn tih i hre si lo. Chutiang bawkin, thlarauva piangte chu i hre thiam lo vang,” a ti a.

9 Nikodema’n ani chu chhângin: “Chûng thil chu engtin nge a nih theih ang?” a ti a. 10 Isua chuan: “Israelte zirtîrtu ni siin, chûng thil chu i hre lo va maw? 11 Tih tak meuhvin, tih tak meuhvin ka hrilh a che, kan hriatte kan sawiin, kan hmuhte kan hriattîr ṭhîn. Nimahsela, kan thu hriattîr chu in âwih si lo. 12 Lei lam thil ka hrilh che u mah in âwih si loh chuan, vân lam thil hrilh che u ila engtin nge in âwih ang? 13 Chu bâkah, tu mah vânah an lâwn ngai lo, vân aṭanga lo chhuk mihring Fapa chauh lo hi chu. 14 Mosia’n thlalêra rûl a khai kân ang khân, mihring Fapa pawh hi khai kânin a awm tûr a ni. 15 Tu pawh amah ring apiangin chatuana nunna an neih theih nân.

16 “Pathianin khawvêl a hmangaih êm avângin a Fapa mal neih chhun a pe a, tu pawh amaha rinna lantîrtu apiang an boral loh va, chatuana nunna an neih zâwk nân. 17 Khawvêl rorêlsak tûrin Pathianin a Fapa khawvêlah a tîr lo, amah avânga khawvêl chhanhim a nih theihna tûrin a tîr zâwk a ni. 18 Tu pawh amaha rinna lantîrtu apiang chu rorêlsak an ni lo vang. Tu pawh rinna lantîr lotu apiang chu rorêlsak an ni tawh, Pathian Fapa mal neih chhun hming chunga rinna an lantîr loh avângin. 19 Khawvêlah êng a lo kal a; nimahsela, mite chuan thil sual an tih avângin êng aiin thim an duh zâwk a ni. Chuvângin, anni chu rorêlsak an ni ang. 20 Tu pawh thil sual ti apiangin êng an haw ṭhîn, an thil tihte a lan chhuah loh nân êngah pawh an lo kal lo. 21 Nimahsela, tu pawh thil dik titute chu êngah an lo kal ṭhîn, an thil tihte Pathian duh zâwng nên a inmil tih a lan chhuah theih nân,” a ti a.

22 Chumi hnu chuan, Isua leh a zirtîrte chu Judai ram thingtlâng khuaahte an kal a, chutah chuan hun eng emaw chen zirtîrte hnênah a awm a, anni chuan mite an baptis ṭhîn a.* 23 Johana pawhin Salim khaw bula awm Ainon-ah tui tam tak a awm avângin a baptis ṭhîn a; tin, mite chu a hnênah lo kalin, baptisma an chang ṭhîn a ni. 24 Chutih lai chuan, Johana chu tân ina khung a la ni si lo va.

25 Tin, Johana zirtîrte chu Juda mi pakhat nên intih thianghlimna dân chungchângah an inhnial a. 26 Tichuan, Johana hnênah an lo kal a: “Rabbi, Jordan Lui râla awm a chungchâng i hriattîra khân mite a baptis a, mi zawng zawng a hnênah an kal asin,” an ti a. 27 Johana chuan chhângin: “Vân aṭanga pêk a nih loh chuan, miin eng mah a dawng thei lo. 28 Nangni hi, ‘Krista ka ni lo; nimahsela, a hmaa mi tirh ka ni,’ tia ka sawi min hriatpuitute ngei in nih kha. 29 Monu neitu chu mopa a ni. Nimahsela, mopa ṭhian a thu ngai chânga lo ding chu, mopa aw a hriat chuan a lâwm êm êm ṭhîn. Chuvângin, kei pawh ka lâwm a kim e. 30 Krista zuitute chu an pung zêl tûr a ni a; nimahsela, kei mi zuitu erawh chu an kiam zêl tûr a ni,” a ti a.

31 Chung lam aṭanga lo chhuk chu mi zawng zawng chungah a awm a. Lei aṭanga lo chhuak erawh chu leia mi a ni a, lei lam thilte a sawi ṭhîn. Vân aṭanga lo kal chu mi zawng zawng chungah a awm a. 32 A thil hmuh leh hriatte chu a hriattîr ṭhîn a; nimahsela, a thu hriattîrte chu tu man an pawm lo. 33 A thu hriattîr pawm apiang chuan, Pathian chu mi dik a ni tih a thinlung zawng zawngin a ring a ni.* 34 Pathian mi tirh chuan Pathian thute a sawi ṭhîn, Pathianin phal taka a thlarau a pêk ṭhin avângin. 35 Pain Fapa a hmangaih a, a kutah thil engkim a pe tawh. 36 Fapa chunga rinna lantîrtu chuan chatuana nunna a nei ang. Fapa thu âwih lotu erawh chuan nunna a nei lo vang a, Pathian thinurna a chungah a awm reng zâwk ang.

4 Tin, Johana aiin Isua’n zirtîr a siam tam zâwkin, a baptis tam zâwk thu Pharisaite’n an hria tih Lalpa’n a lo hriat chuan— 2 Isua chuan a baptis lo va, a zirtîrte zâwkin an baptis a ni— 3 Judai ram chhuahsanin Galili ram lam a pan leh a. 4 Nimahsela, Samari ram a kal tlang a ngai a. 5 Tichuan, Samari rama khaw pakhat Sukar khua a lo thleng a, chu chu Jakoba’n a fapa Josefa hnêna ram a pêk bula awm a ni. 6 Chutah chuan Jakoba tuichhunchhuah* a awm a. Tin, Isua chu a kal hah avângin tuichhunchhuah bulah chuan a ṭhu a, chutih lai chu chhûn dâr sâwm pahnih vêl* a ni.

7 Samari hmeichhe pakhat tui chawi tûrin a lo kal a. Isua’n a hnênah: “In tûr mi pe rawh,” a ti a. 8 (A zirtîrte chu khaw chhûngah ei tûr leiin an kal si a.) 9 Chu Samari hmeichhia chuan a hnênah: “Nang Juda mi i ni a, kei lah Samari hmeichhia ka ni si a, engati nge ka hnênah in tûr mi dîl?” a ti a. (Juda mite’n Samari mite an be ngai si lo.) 10 Isua’n ani chu chhângin: “Pathian thilthlâwnpêk leh i hnêna, ‘In tûr mi pe rawh,’ tia sawitu hi hria ni la chuan a hnênah i dîl zâwk ang a, ani chuan tui nung a pe ang che,” a ti a. 11 Ani chuan a hnênah: “Ka pu, tui khai chhuahna tûr eng mah i nei si lo va, tuichhunchhuah lah a thûk si. Khawi aṭangin nge chu tui nung chu i neih? 12 He tuichhunchhuah min petu, min thlahtu Jakoba chuan a fapate leh a ran rualte nên he tuichhunchhuaha mi hi an in ṭhîn a; ka pu, ani aiin i ropui zâwk em ni?” a ti a. 13 Isua’n ani chu chhângin: “Tu pawh he tui in apiang chu a tuihâl leh ang. 14 Ka pêk tûr tui in apiang erawh chu a tuihâl leh tawh ngai lo vang. Tui ka pêk chu a kawchhûngah tui hna ang a lo ni ang a, chu chuan chatuana nunna a pe ang,” a ti a. 15 Hmeichhia chuan a hnênah: “Ka pu, chu tui chu min pe rawh, ka tui a hâl tawh loh nân leh tui chawi tûra he hmuna ka rawn kal a ngaih tawh loh nân,” a ti a.

16 Ani chuan a hnênah: “Kal la, i pasal va ko la, he hmunah hian lo kal ang che u,” a ti a. 17 Hmeichhia chuan: “Pasal ka nei hlei nêm,” tiin a chhâng a. Isua’n a hnênah: “‘Pasal ka nei hlei nêm,’ tia i sawi hi i ti dik e. 18 Pasal panga i nei tawh a, tûna i chênpui hi i pasal a ni lo. Chuvângin, i sawi dik e,” a ti a. 19 Hmeichhia chuan a hnênah: “Ka pu, zâwlnei i nih ngei dâwn hi. 20 Kan pi leh pute’n he tlângah hian Pathian chibai an bûk ṭhîn a; nimahsela, nangni chuan Jerusalem chauh hi amah chibai bûkna hmun tûr a ni in ti a,” a ti a. 21 Isua’n a hnênah: “Hmeichhia, tih tak meuhvin ka hrilh a che, he tlângah kher lo pawh, Jerusalemah kher lo pawh Pa chibai in bûk hun a lo la thleng ang. 22 Nangni chuan in hriat loh chibai in bûk ṭhîn a; keini erawh chuan kan hriata chu chibai kan bûk ṭhîn, chhandamna chu Judate hnên aṭanga inṭan a nih avângin. 23 Nimahsela, a hun a thleng dâwn ta, tûnah pawh a thleng tawh mêk a ni. Pathian chibai bûktu dik takte’n thlarau leh thutakin Pa chibai an bûk ang, chutianga amah chibai bûktu tûr chu Pain a zawng si a. 24 Pathian chu Thlarau a ni a, amah chibai bûktute chuan thlarau leh thutakin chibai an bûk tûr a ni,” a ti a. 25 Hmeichhia chuan a hnênah: “Messia, Krista an tiha chu a lo kal dâwn tih ka hria. Ani chu a lo kal hunah, kan hnênah thil engkim a puang chhuak ang,” a ti a. 26 Isua’n a hnênah: “Keimah, a betu che hi amah chu ka ni,” a ti a.

27 Chutih lai chuan a zirtîrte chu an lo thleng a, hmeichhia a lo biak avâng chuan mak an ti hle a; nimahsela, tu man: “Eng nge i duh?” emaw, “Engvângin nge hmeichhia kha i biak?” emaw pawh an ti lo. 28 Tin, hmeichhia chuan tuibêl chu a hnutchhiah a, khuaah a va kal a, mite hnênah: 29 “Ka thil tih apiang min hrilh zêltu mi pakhat a awm a. Lo kal ula, en teh u. Krista a ni thei mai lo maw?” a ti a. 30 Tin, khua aṭang chuan chhuakin Isua hnênah an kal ta a.

31 Chutih lai chuan, zirtîrte chuan: “Rabbi, ei ta che,” tiin an ngên a. 32 Nimahsela, an hnênah: “In hriat loh chaw ei tûr ka nei,” a ti a. 33 Tichuan, zirtîrte chu: “Miin ei tûr an rawn kensak emaw ni le?” tiin an inzâwt hlawm a. 34 Isua’n an hnênah: “Mi tîrtu duh zâwng tih leh a hna thawh zawh hi ka chaw a ni. 35 ‘Buh sengna tûrin thla li a la awm,’ in ti ṭhîn a ni lâwm ni? Ka hrilh a che u, dâk ula, lote en rawh u, seng theih tûrin a êng tawh a ni. 36 A sengtuin hlawh a la tawh a, chatuana nung tûrin rah a seng khâwm mêk a ni, a tuhtu leh a sengtu an lâwm dun theih nân. 37 ‘Pakhatin a tuh a, pakhatin a seng ṭhîn,’ tih thu hi a dik e. 38 In thawhrim rah ni lo seng tûrin ka tirh che u hi, mi dangin rim takin an thawk a, nangni’n an thawhrim rah in seng a ni,” a ti a.

39 Hmeichhiain, “Ka thil tih zawng zawngte min hrilh,” tia a hriattîr avâng khân, chu khuaa Samari mi tam tak chuan Isua chu an ring ta a. 40 Tin, Samari mite a hnênah an lo kal a, an hnêna châm tûrin an ngên a; tichuan, ni hnih a châm ta a. 41 Mi dang tam tak pawhin a thusawite avâng chuan ani chu an ring ta a. 42 Tin, anni chuan hmeichhe hnênah chuan: “Tûnah chuan i thusawi avâng chauhva ring kan ni tawh lo, keimahni ngeiin a thusawite kan hre si a, ani hi khawvêl chhandamtu a ni ngei tih kan hre ta,” an ti a.

43 Tin, ni hnih hnuah chuan Galili lam panin a chhuak a. 44 Nimahsela, Isua ngeiin zâwlnei chu ama khaw lama chawimawia a awm ngai loh thu a lo sawi tawh a. 45 Tin, Galili a thlen chuan Jerusalema kût laia a thil tih zawng zawngte an hmuh avângin, Galili mite chuan an lo lâwm a, anni pawh kûtah chuan an kal ve si a.

46 Tichuan, tui uaina a chantîrna khua, Galili rama Kana khuaah khân a kal leh a, Kapernaum khuaah chuan lal upa pakhat fapa dam lo a awm a. 47 Judai ram aṭangin Galili ramah Isua a lo kal tih a hriat chuan lal upa chu Isua hnênah a kal a, a fapa chu thih ngama a dam loh avângin Kapernaum khuaa kal a, tih damsak tûrin a ngên a. 48 Nimahsela, Isua’n a hnênah: “Nangni hian chhinchhiahnate leh thil makte in hmuh loh chuan in âwih ngai lo vang,” a ti a. 49 Lal upa chuan a hnênah: “Lalpa, ka fapa a thih hmain lo chhuk hrâm rawh,” tiin a ngên a. 50 Isua’n a hnênah: “Kal tawh rawh le, i fapa chu a dam tawh e,” a ti a. A hnêna Isua thusawite chu a ring a, a kal ta a. 51 Tin, a kal chhuk lai mêkin a chhiahhlawhte chuan a fapa a dam leh tawh thu hrilh tûrin an lo hmuak a. 52 Ani chuan an hnênah a dam hun lai tak chu a zâwt a. Anni chuan a hnênah: “Nimin chawhnu dâr khat vêl* khân a khawsik a reh a ni,” tiin an chhâng a. 53 Naupang pa chuan chu chu Isua’n: “I fapa chu a dam tawh e,” tia a hrilh hun ngei kha a ni tih a hre ta a. Tichuan, amah leh a ina chêng zawng zawng chuan Isua an ring ta a. 54 Hei hi Judai ram aṭanga Galili rama a lêt leh hnua Isua thil mak* tih vawi hnihna a ni.

5 Chumi hnu chuan Judate kût pakhat a awm a, Isua chu Jerusalemah a han kal a. 2 Jerusalemah chuan Berâm Kawngkhâr bulah Hebrai ṭawnga Beth·za′tha an tih dîl pakhat, hulhliap panga nei a awm a. 3 Chutah chuan dam lo te, mitdel te, kebai te leh, kut emaw, kê emaw zengte an awm hlawm a. 4* —— 5 Chutah chuan kum 38 lai dam lo tawh mi pakhat a awm a. 6 Isua’n chu pa mu lai chu a hmu a, hun rei tak chhûng a dam lo tawh tih a hriat chuan a hnênah: “Dam i duh em?” a ti a. 7 Dam lo chuan a hnênah: “Ka pu, tui a rawn fâwnin dîla min dahtu tûr ka nei lo va, ka pan chhûngin mi dangin min luh khalh ṭhîn,” tiin a chhâng a. 8 Isua’n a hnênah: “Tho la! I âwngphah* kha la la, kal rawh,” a ti a. 9 Tichuan, chu pa chu chawplehchilha lo damin, a âwngphah* chu lain a kal ta nghâl a.

Chu chu Sabbath Nî a ni. 10 Tin, Judate’n lo dam taa hnênah chuan: “Sabbath Nî a ni a, i âwngphah* i ken a thiang lo ve,” an ti a. 11 Nimahsela, ani chuan: “Min ti damtu khân, ‘I âwngphah* la la, kal rawh,’ min ti a ni,” tiin a chhâng a. 12 Anni chuan a hnênah: “‘I âwngphah* la la, kal rawh,’ tia hrilhtu che chu tu nge ni?” tiin an zâwt a. 13 Nimahsela, lo dam taa chuan tu nge a nih a hre lo, Isua chu mipui zîngah a lo kal bo tawh si a.

14 Chumi hnuah chuan Isua’n ani chu biak inah a hmu a, a hnênah: “Tûnah chuan i dam tawh a, i chunga thil ṭha lo lehzual a thlen loh nân thil sual ti leh tawh suh ang che,” a ti a. 15 Tin, chu pa chu Judate hnênah a va kal a, amah ti damtu chu Isua a nih thu a hrilh a. 16 Sabbath Nîa chûng thilte chu a tih avângin Judate chuan Isua chu nasa takin an dodâl ta a. 17 Nimahsela, ani chuan an hnênah: “Ka Pain tûn thleng hian hna a la thawk reng a, kei pawhin ka thawk reng a ni,” tiin a chhâng a. 18 Judate chuan Sabbath bawhchhiaa an ngaih avâng leh Pathian chu ka Pa tia ko va, mite’n Pathian tluka an ngaih a duh nia an hriat avângin, amah thah dân tûr an zawng nasa lehzual a.

19 Tichuan, Isua’n an hnênah: “Tih tak meuhvin, tih tak meuhvin ka hrilh a che u, Fapain Pa thil tih a hmuhte chauh lo chu mahniin eng mah a ti thei lo, Pa thil tih apiang chu Fapa pawhin a ti ṭhîn. 20 Pain Fapa a hmangaih avângin a thil tih zawng zawng a entîr ṭhîn, mak in tihna tûrin chûng aia ropui zâwk chu a la entîr ang. 21 Pain mitthite kai tho va, a ti nung ṭhîn angin, Fapa pawhin a duh apiang a ti nung ṭhîn. 22 Pain tu mah ro a rêlsak ngai lo, rorêlna zawng zawng chu Fapa kutah a hlân tawh, 23 mi zawng zawngin Pa an chawimawi ang bawka Fapa pawh an chawimawi theihna tûrin. Tu pawh Fapa chawimawi lo apiang chuan amah tîrtu Pa pawh a chawimawi lo a ni. 24 Tih tak meuhvin, tih tak meuhvin ka hrilh a che u, tu pawh ka thusawite hriaa mi Tîrtu ring apiang chuan chatuana nunna a nei ang a, thiam loh changin* a awm lo vang a, thihna ata nunna a nei zâwk ang.

25 “Tih tak meuhvin, tih tak meuhvin ka hrilh a che u, a hun a thleng dâwn ta, tûnah pawh a thleng tawh mêk, mitthite’n Pathian Fapa aw an hria ang a, a ngaihventu apiang an nung ang. 26 Pain nunna pêk theihna a nei ang bawkin, Fapa hnênah pawh nunna pêk theihna a pe si a. 27 Mihring Fapa a nih avângin rorêl tûra thuneihna pawh a pe bawk. 28 Hei hi mak ti suh u, hriatrengna thlâna awm zawng zawngte’n Pathian Fapa aw an hriat hun a lo thleng ang a, 29 thlân aṭangin an chhuak vek ang; thil ṭha ti ṭhînte chu nunna changin an tho leh ang a, thil sual ti ṭhînte erawh chu rorêlsaka awm tûrin an tho leh ang. 30 Mahniin eng mah ka ti thei lo. Ka hriat angin ro ka rêl ṭhîn a, ka rorêlna chu a fel a ni. Mahni duh zâwng ni lo va, mi tîrtu duh zâwng ka zawn zâwk avângin.

31 “Mahni chanchin hriattîr ni ila, ka thu hriattîr chu a dik lo vang. 32 Ka chanchin hriattîrtu mi dang a awm a, ka chanchin a hriattîrte chu a dik tih ka hria. 33 Nangni’n Johana hnênah mite in tîr a, ani chuan thutak a lo hriattîr kha. 34 Nimahsela, hêng thilte hi mihringte hriatpuina ka mamawh vânga sawi ka ni lo va, chhandam in nih theih nâna sawi ka ni zâwk. 35 Johana chu khâwnvâr alh leh êng tak a ni a, a êngah chuan rei lo te chhûng hlim taka awm rih in duh a ni. 36 Nimahsela, Johana hriattîr aia thu hriattîr tûr ropui zâwk ka nei, ka Pain thawh zawh tûra mi pêk, tûna ka thawh mêkte hian Pain mi tîr tih a hriattîr si a. 37 Pa mi tîrtu ngei chuan ka chanchin a hriattîr tawh, eng lai mahin a aw in hre ngai lo va, a hmêl lah in hmu ngai hek lo. 38 A mi tirha chu in rin loh avângin a thu pawh in thinlungah in vawng reng lo.

39 “Chatuana nunna in neih theihna tûr a nih in rin avângin, Pathian Lehkha Thu chu ngun takin in zir ṭhîn a, chu chuan ka chanchin a hriattîr a ni. 40 Nimahsela, nunna in neih theih nân ka hnênah in lo kal duh si lo. 41 Mihringte chawimawina ka mamawh lo, 42 in thinlungah Pathian hmangaihna in nei lo tih ka hre chiang hle si a. 43 Ka Pa hmingin ka lo kal a; nimahsela, min lâwm si lo, mi dang mahni hmingin lo kal sela, in lo lâwm âwm si a. 44 Pathian dik hnên aṭanga lo kal chawimawina zawng si lo va, mahni inchawimawi tawn in lawm avângin engtin nge min rin theih ang? 45 Pa hnêna ka hêk che u ring suh u, a hêktu tûr che u mi pakhat a awm, ani chu in rin Mosia kha a ni. 46 Mosia ring ni ula chuan kei pawh min ring ang, ani chuan ka chanchin a ziak si a. 47 Nimahsela, a thu ziakte in rin si loh chuan, engtin nge ka thusawite in rin theih ang?” a ti a.

6 Chumi hnuah chuan Isua chu Galili Dîl, Tiberia Dîl tia an koh bawk râl lehlamah chuan a kal a. 2 Tin, thil mak* ropui takte tia dam lote a ti dam tih an hmuh avângin mipui tam tak chuan ani chu an zui zêl a. 3 Tin, Isua chu tlângah chuan a chho va, chutah chuan a zirtîrte nên an ṭhu a. 4 Judate Kalhlên Kût chu a hnai tawh a. 5 Isua a han hawi vêl chuan mipui tam takin amah an rawn pan tih a hmu a; tichuan, Philipa hnênah: “Hêng mipuite ei tûr chhang hi khawiah nge kan lei ang?” a ti a. 6 Nimahsela, chu chu Philipa fiah nâna a sawi a ni, ani chuan a tih tûr chu a hre si a. 7 Tin, Philipa chuan: “Denarii* za hnih man chhangpêr leiin, tlêm tê têin sem pawh ni ila, a la daih chuang lo vang,” tiin a chhâng a. 8 A zirtîrte zînga pakhat Simon Petera unaupa Andria chuan Isua hnênah: 9 “Hetah hian mipa naupang pakhat, barli chhangpêr panga leh nghate pahnih nei a awm a. Nimahsela, hêng mi zozai tân hian eng tham nge ni ang?” a ti a.

10 Isua chuan: “Mite kha ṭhuttîr rawh u,” a ti a. Chu hmunah chuan phûl a awm duai a; tichuan, an ṭhu a, chûng mipuite zîngah chuan patling 5,000 vêl an tel a ni. 11 Isua’n chhangpêr chu a la a, lâwmthu a sawi zawhin chuta ṭhute hnênah chuan a sem a. Chutiang bawkin, nghatê pawh chu a sem a; tichuan, puar takin an ei ta hlawm a. 12 An ei puar hnu chuan Isua’n a zirtîrte hnênah: “Eng mah rîral awm lo tûrin a bâng nawite kha la khâwm rawh u,” a ti a. 13 Tichuan, an la khâwm a, barli chhangpêr panga an ei bâng nawi chu bâwmrâng 12 khat lai a ni.

14 Mite’n a thil mak tih chu an hmuhin: “He mi hi Zâwlnei, khawvêla lo kal tûra chu a nih ngei dâwn hi,” an ti a. 15 Isua’n amah mana lala siam tumin an lo kal dâwn tih a hria a, tlângah amah chauhvin a kal hrang leh ta a.

16 Khua a lo tlai chuan zirtîrte chu dîl lam panin an chhuk a. 17 Lawngah chuangin dîl râl lehlama awm Kapernaum khua chu an pan a. Khua a lo thim ta a, Isua lah chu an hnênah a la thleng si lo. 18 Thli na tak a tleh avângin tui chu a fâwn nasa hle a. 19 Nimahsela, mêl thum emaw, mêl li emaw vêl* an thlen chuan, Isua chu dîl chunga kala lawng rawn panin an hmu a, an hlau ta hle a. 20 Nimahsela, Isua’n an hnênah: “Hlau suh u, keimah ka ni e!” a ti a. 21 Tichuan, hlim takin lawngah an chuantîr a, an kal tumna chu an thleng ta mai a.

22 A tûkah chuan, dîl râl lehlama awm mipuite chuan lawng a awm tawh lo tih an hmu a. A hmain chutah chuan lawng tê pakhat a awm a; mahse, Isua chu a zirtîrte rualin chu lawngah chuan a chuang lo, a zirtîrte chu anmahni chauhvin an chhuak si a. 23 Nimahsela, Tiberia aṭanga lo kal lawngte chu, Lalpa’n lâwmthu a sawi zawha chhang an eina hmun bul a lo thleng a. 24 Tin, mipuite’n chu hmunah chuan Isua leh a zirtîrte an awm lo tih an hriatin, chûng lawngahte chuan an chuang a, Isua zawng tûrin Kapernaum lam an pan ta a.

25 Dîl râl lehlama Isua an va hmuh chuan a hnênah: “Rabbi, engtik khân nge he lai hmun hi i thlen?” an ti a. 26 Isua’n anni chu chhângin: “Tih tak meuhvin, tih tak meuhvin ka hrilh a che u, ka thil mak* tihte in hmuh vâng ni lovin, chhangpêr puar taka in ei avânga mi zawng in nih hi. 27 Chaw chhe thei ni lovin, chatuan nun neih theihna chaw chhe thei lo, mihring Fapain a pêk tûr che u chu in hmuh theih nân theih tâwp chhuah rawh u; chutianga ti tûr chuan Pa Pathianin ani chu a pawm tih a nemnghet tawh si a,” a ti a.

28 Tin, anni chuan a hnênah: “Pathian hna thawk zo tûrin eng nge kan tih ngai?” an ti a. 29 Isua’n anni chu chhângin: “Pathian hna chu hei hi a ni, a mi tirha chunga rinna in lantîr hi,” a ti a. 30 Tin, anni chuan a hnênah: “Kan hmuha kan rin theih nân che eng thil mak* nge i tih ang? Eng nge i tih dâwn? 31 Kan pi leh pute kha chuan thlalêrah manna an ei ṭhîn: ‘Ani chuan vân aṭangin ei tûr chhang a pe a,’ tih ziak ang khân,” an ti a. 32 Isua’n an hnênah: “Tih tak meuhvin, tih tak meuhvin ka hrilh a che u, Mosia’n vâna mi chhang a pe lo che u a; nimahsela, ka Pa erawh chuan vâna mi chhang dik tak a pe che u a ni. 33 Pathian chhang chu vân aṭanga lo chhuk a, khawvêl hnêna nunna petu chu a ni si a,” a ti a. 34 Tin, anni chuan a hnênah: “Lalpa, chu chhang chu min pe reng rawh,” an ti a.

35 Isua’n an hnênah: “Kei hi nunna chhang chu ka ni. Tu pawh ka hnêna lo kal apiang chu, a rilṭâm leh tawh ngai lo vang a. Tin, tu pawh ka chunga rinna lantîrtu apiang chu a tuihâl leh tawh ngai hek lo vang. 36 Nimahsela, ka hrilh tawh che u ang khân, min hmuh pawhin min la ring chuang si lo. 37 Pain mi pêk zawng zawngte chu ka hnênah an lo kal ang a; tin, ka hnêna lo kalte chu ka hnar bo ngai lo vang. 38 Mahni duh zâwng ti tûr ni lovin, mi tîrtu duh zâwng ti tûra vân aṭang lo chhuk ka ni si a. 39 Hei hi mi tîrtu duh zâwng chu a ni, ka hnêna mi pêk zawng zawngte chu pakhat mah hloh lo ila, ni kin nîah anni chu kai tho ila. 40 Tin, hei hi ka Pa duh zâwng chu a ni, Fapa hriaa a chunga rinna lantîrtu apiangin chatuana nunna nei sela; tin, keiin ani chu ni kin nîah ka kai tho vang,” a ti a.

41 Tin: “Vân aṭanga lo chhuk chhang chu ka ni,” tia a sawi avângin Judate chu a chungah an phunnawi ta a. 42 “He mi hi Isua, Josefa fapa, a nu leh a pate pawh kan hriat kha a ni lâwm ni? Engtin nge, ‘Vân aṭanga lo chhuk ka ni,’ tia a sawi theih?” an ti a. 43 Tichuan, Isua’n an hnênah: “Phunnawi tawh suh u. 44 Pa mi tîrtuin a hîp loh chu tu mah ka hnênah an lo kal thei lo; tin, keiin ani chu ni kin nîah ka kai tho vang. 45 Zâwlneite thu-ah: ‘Jehova* zirtîrin an awm vek ang,’ tih ziak a ni. Chuvângin, tu pawh Pa thu hriaa a zirtîrna pawm apiang chu ka hnênah an lo kal ṭhîn. 46 Tu man Pa an hmu ngai lo, Pathian hnên aṭanga lo kala chauh lo hi chuan, ani chuan Pa chu a hmu a ni. 47 Tih tak meuhvin, tih tak meuhvin ka hrilh a che u, tu pawh mi ring apiang chuan chatuana nunna a nei ang.

48 “Kei hi nunna chhang chu ka ni. 49 In pi leh pute’n thlalêrah khân manna an ei na a, an thi leh tho va. 50 Nimahsela, vân aṭanga lo chhuk chhang ei apiang erawh chu an thi lo vang. 51 Kei hi chhang nung, vân aṭanga lo chhuk chu ka ni. Tu pawhin he chhang hi a ei chuan chatuanin a nung ang; khawvêlin nunna a neih theih nâna ka pêk tûr chhang chu ka tisa hi a ni si a,” a ti a.

52 Tichuan, Judate chu: “Engtin nge he mi hian a tisa hi ei tûrin min pêk theih ang?” tiin an inhnial ta a. 53 Isua’n an hnênah: “Tih tak meuhvin, tih tak meuhvin ka hrilh a che u, mihring Fapa tisa in ei a, a thisen in in loh chuan nunna in nei lo vang.* 54 Tu pawh ka tisa ei a, ka thisen in apiang chuan chatuana nunna a nei ang a; tin, keiin ani chu ni kin nîah ka kai tho vang. 55 Ka tisa hi chaw dik tak a ni a, ka thisen pawh hi in tûr dik tak a ni si a. 56 Ka tisa ei a, ka thisen in apiang nên chuan inpumkhatin kan awm reng a ni. 57 Pa, eng lai pawha nung renga chuan min tîr a, Pa avânga nung ka nih ang bawkin, tu pawh ka tisa ei chu keimah avângin a nung ang. 58 Hei hi vân aṭanga lo chhuk chhang chu a ni. In pi leh pute’n an ei a, a hnua an thih leh thona chhang ang kha a ni lo. Tu pawh he chhang eitu apiang erawh chu chatuanin a nung ang,” a ti a. 59 Chûng thute chu Kapernaum khuaa inkhâwmna ina a zirtîr laia a sawite a ni.

60 Chûng thute an hriat chuan a zirtîr tam tak chuan: “A thusawi hi pawm theih a ni lo, tuin nge dawngsawng thei ang?” an ti a. 61 Nimahsela, chumi thu-ah chuan a zirtîrte an phunnawi tih Isua’n a hria a: “He thu hian a ti lungni lo che u em ni?* 62 Mihring Fapa hi tûn hmaa a awmnaa a lâwn chho lai hmu ta ula engtin nge ni ang? 63 Nunna petu chu thlarau a ni a, tisa chuan ṭangkaina rêng a nei lo; in hnêna ka sawite hi thlarau thianghlim aṭanga lo chhuak a ni a, nunna a pe thei a ni. 64 Nimahsela, in zîngah rinna nei lo mi ṭhenkhat in awm,” a ti a. Isua chuan a tîr aṭang rêngin rinna nei lotute leh amah phatsantu tûr chu a hre reng si a. 65 Ani chuan: “Hei vâng hi alâwm in hnênah, ‘Pain kal phalna a pêk loh chuan, tu mah ka hnênah an lo kal thei lo,’ tia ka sawi kha,” a ti a.

66 Chûng thute avâng chuan a zirtîr tam tak chu Isua zui tawh lovin, an thil kalsan tâkte lamah an kîr leh a. 67 Tichuan, Isua’n Sâwm Pahnihte hnênah chuan: “Nangni pawhin kal bo in duh ve em?” a ti a. 68 Simon Petera chuan chhângin: “Lalpa, tu hnênah nge kan kal bo chuan ang? Nangin chatuana nunna thlentu thute i sawi alâwm. 69 Pathian Mi Thianghlima chu i ni tih kan ring a, hriat pawh kan hria e,” a ti a. 70 Tin, Isua’n an hnênah: “Nangni sâwm pahnihte hi ka thlan che u in ni. Nimahsela, in zînga pakhat hi sawichhetu* a ni,” a ti a. 71 Ani chuan Simon Iskariota fapa Juda chungchâng a sawi a ni, Juda chu Sâwm Pahnihte zînga pakhat ni mah se, amah phatsantu tûr a ni si a.

7 Chumi hnuah chuan Isua’n Galili ram chu a fang zêl a, Judai ram erawh chu Juda mite’n amah thah tuma an zawn avângin a fang duh lo va. 2 Nimahsela, Judate Bâwkte Kût chu a hnai tawh a. 3 Tin, a unaute chuan a hnênah: “I zirtîrte pawhin i thil tihte hi an hmuh theih nân heta ṭang hian chhuak la, Judai ramah kal rawh. 4 Tu man hmingthan duh siin a rûkin thil an ti ngai lo, hêng thilte hi i tih rau rau chuan khawvêl hriatah ti ta che,” an ti a. 5 A unaute chuan amah an ring si lo va. 6 Isua’n an hnênah: “Ka hun a la thleng lo ve, nangni hun erawh eng lai pawhin a thleng reng a ni. 7 Khawvêlin huat nachhan tûr che u a nei lo, kei erawh chu mi hua a ni, a thil tihte a sualzia ka hriattîr ṭhin avângin. 8 Kûtah chuan han kal rawh u; kei chu ka hun a la thlen rih loh avângin he kûtah hian ka kal rih lo vang,” a ti a. 9 Chûng thute a sawi zawh hnu chuan Galili ramah a la awm rih a.

10 Nimahsela, kût hmang tûra a unaute an chhoh hnu chuan, ani pawh mite hriat loh tûrin a rûk têin a chho ve a. 11 Tin, kût hmannaah chuan Judate’n: “Kha pa kha khawiah nge a awm?” tiin Isua chu an zawng a. 12 Mipuite chuan a chungchâng an sawi sup sup a. Ṭhenkhatin: “Mi ṭha tak a ni,” an ti a. Mi dangte erawh chuan: “Teuh lo mai. Mipui a bum zâwk a ni,” an ti thung a. 13 Nimahsela, Judate an hlauh avângin tu mahin a chungchâng chu mite hriatah an sawi ngam lo.

14 Kût ṭan a nih aṭanga a ni lina vêlah, Isua chuan biak inah kalin a zirtîr ṭan a. 15 Tin, Judate chuan mak an ti hle a: “Engtin nge he mi hian tu ma zirtîrna dawng si lovin,* Pathian Lehkha Thu heti taka a hriat theih?” an ti a. 16 Isua’n anni chu chhângin: “Ka thu zirtîrte hi ka ta a ni lo va, mi tîrtu ta a ni zâwk. 17 Tu pawh Ama duh zâwng tih duh chuan ka thu zirtîrte hi Pathian hnêna mi nge, keima ngaih dân tih a hria ang. 18 Tu pawh mahni ropuina zawng chuan mahni ngaih dân a sawi ṭhîn a; nimahsela, tu pawh a tîrtu ropuina zawng chu, chu mi chu mi dik tak a ni a, amahah fel lohna rêng a awm lo. 19 Mosia’n Dân a pe che u a ni lâwm ni? Nimahsela, chu Dân chu tu man in zâwm lo. Engvângin nge min tih hlum in tum?” a ti a. 20 Mipui chuan: “Ramhuai i zâwl a nih hi. Tuin nge tih hlum tum che?” an ti a. 21 Isua’n an hnênah: “Thil pakhat chauh ka ti a, in vaiin mak in ti a. 22 Mosia’n serhtan chungchânga dân a pêk che u avângin sabbath nîah pawh serh in tan ṭhîn. A nihna takah chuan, chu chu Mosia hun lai aṭanga awm ṭan ni lovin, pi leh pute hun lai aṭang daih tawha awm a ni. 23 Mipain Mosia Dân a bawhchhiat loh nâna sabbath nîa serh a tan si chuan, engvângin nge sabbath nîa mi ka tih dam avânga ka chunga in thinur êm êm? 24 Pâwn lam lan dân enin rorêl tawh suh ula, fel takin rêl zâwk rawh u,” a ti a.

25 Jerusalema chêng mi ṭhenkhat chuan: “He pa hi tih hlum an tum kha a ni lâwm ni? 26 Nimahsela, en teh u! Vântlâng hmaah thu a sawi a, tu man an chhâng lêt si lo. Rorêltute hian Krista ni ngeiin an hre ta tihna em ni ang? 27 Amaherawhchu, he mi hi khawia mi nge a nih kan hria a, Krista a lo kal hunah erawh chuan khawia mi nge a nih tu man an hre lo vang,” an ti a. 28 Tin, Isua chuan biak ina a zirtîr laiin ring takin: “Kei min hria a, khawia mi nge ka nih in hre bawk e. Mahni thua lo kal ka ni lo, mi Tîrtu chu a awm tak zet a; nimahsela, ani chu in hre lo. 29 Kei erawh chuan a aiawha lo kal ka nih avângin ka hria a, Ani chuan min tîr a ni,” a ti a. 30 Tichuan, amah man theihna tûr hun remchâng an zawng a; nimahsela, an hmu lo, a hun a la thleng si lo va. 31 Mipui zînga tam tak erawh chuan ani chu an ring a: “Krista pawh lo kal se, ani ai hian thil mak* a ti tam bîk dâwn chuang em ni?” an ti a.

32 Isua chungchângah mipui an phunnawi tih Pharisaite’n an hriat chuan, puithiam lalte leh Pharisaite chuan Isua man tûrin biak in vêngtute chu an tîr a. 33 Isua chuan: “In hnênah rei lo tê ka la awm ang a, chumi hnuah min Tîrtu hnênah ka kal ang. 34 Min zawng ang a; nimahsela, min hmu lo vang, ka awmnaah pawh in lo kal thei lo vang,” a ti a. 35 Tichuan, Judate chuan: “Kan hmuh theih lohna tûrin he mi hi khawiah nge maw kal a tum le? Grik mite zînga chêng Juda mite hnênah kalin, Grik mite zirtîr a tum emaw ni le? 36 ‘Min zawng ang a; nimahsela, min hmu lo vang, ka awmnaah pawh in lo kal thei lo vang,’ tia a sawi awmzia hi eng nge ni ang?” an ti a.

37 Tin, kût ni tâwp ber, ni ropui berah chuan Isua chu a ding a, ring takin: “Tu pawh a tui a hâl chuan ka hnênah lo kal sela, in rawh se. 38 Tu pawh mi ring chu Pathian Lehkha Thuin a sawi angin: ‘A chhûngril aṭangin nunna petu lui a luang chhuak ang,’” a ti a. 39 Chu chu amah ringtute’n an la dawn tûr thlarau chungchâng a sawina a ni; nimahsela, Isua chawimawia a la awm rih loh avângin thlarau chu an la dawng lo. 40 Chûng a thusawite hretu mipui zînga ṭhenkhat chuan: “He mi hi Zâwlnei a nih ngei hi,” an ti a. 41 Mi dangte chuan: “He mi hi Krista a ni,” an ti a. Nimahsela, ṭhenkhat erawh chuan: “Krista chu Galili ram aṭanga lo chhuak tûr a ni em ni? 42 Krista chu Davida thlah aṭangin, Davida awmna khua Bethlehem aṭanga lo chhuak tûrin Pathian Lehkha Thuin a sawi lo vem ni?” an ti a. 43 Tichuan, amah avângin mipui zîngah inṭhen hranna a lo awm ta a. 44 An zînga ṭhenkhatin man an duh a; nimahsela, tu mahin an man lo.

45 Tichuan, biak in vêngtute chu puithiam lalte leh Pharisaite hnênah an lêt leh a, anni chuan: “Engvângin nge in rawn man loh?” an lo ti a. 46 Biak in vêngtute chuan: “Tu mahin sawtiang sâwn thu an la sawi ngai lo,” tiin an chhâng a. 47 Pharisaite chuan: “Nangni pawh bumin in awm ve ta a ni maw? 48 Rorêltute leh Pharisaite zîngah amah ring pakhat tal pawh an awm tawh em ni? 49 Hêng Dân hre lo mipuite hi ânchhe dawng mai an ni,” tiin an chhâng a. 50 A hmaa Isua hnêna lo kal Nikodema kha an zîngah a tel ve a, an hnênah: 51 “Kan Dân anga mi thiam loh kan chantîr duh chuan, a thil tih hre tûrin a thusawi kan ngaithla hmasa phawt tûr a ni lâwm ni?” a ti a. 52 Anni chuan a hnênah: “Nang pawh hi Galili rama mi i ni ve elo? Zâwlnei tu mah Galili ram aṭangin an chhuak lo vang tih Pathian Lehkha Thu-ah zawng la, i hmu ang,” an ti a.*

8 12 Tin, Isua’n an hnênah thu a sawi leh a: “Kei hi khawvêl êng ka ni, tu pawh mi zui apiang chu thimah a kal lo vang a, nunna êng a nei zâwk ang,” a ti a. 13 Tichuan, Pharisaite chuan a hnênah: “I chanchin i hriattîr a ni; i thu hriattîr hi a dik lo ve,” an ti a. 14 Isua’n anni chu chhângin: “Ka chanchin hriattîr pawh ni ila, ka thu hriattîr hi a dik a ni; ka lo kalna leh ka kalna tûr ka hriat avângin. Nangni erawh chuan ka lo kalna leh ka kalna tûr in hre lo. 15 Nangni chuan mihring ngaihtuah dânin ro in rêl a, kei erawh chuan tu mah ro ka rêlsak lo. 16 Nimahsela, tu emaw rorêlsak pawh ni ila, keimah chauh ni lovin, Pa mi tîrtu nêna kan rêl dâwn avângin, ka rorêlna chu a dik ang. 17 In Dân thu-ah ngei pawh: ‘Mi pahnihin an hriatpui chuan a dik a ni,’ tih a inziak bawk. 18 Keiin ka chanchin ka hriattîr a, Pa mi tîrtuin ka chanchin a hriattîr bawk,” a ti a. 19 Tin, anni chuan a hnênah: “I Pa chu khawiah nge a awm?” an ti a. Isua chuan: “Kei min hre lo va, ka Pa pawh in hre hek lo. Kei min hria ula chuan ka Pa pawh in hria ang,” tiin a chhâng a. 20 Chûng thute chu biak ina a zirtîr laia thawhlâwm bâwm bula a sawi a ni. Nimahsela, a hun a la thlen loh avângin tu mahin ani chu an man lo.

21 Tichuan, an hnênah: “Ka kal bo dâwn a, nangni’n min zawng ang a; amaherawhchu, in sualnaah in thi ang. Ka kalna tûrah in kal ve thei lo vang,” tiin a sawi leh a. 22 Judate chuan: “Mahni intih hlum a tum em ni? Engvângin nge, ‘Ka kalna tûrah in kal ve thei lo vang,’ tia a sawi?” an ti a. 23 Tin, an hnênah heti hian a sawi zawm a: “Nangni chu hnuai lam aṭanga chhuak in ni a, kei erawh chu chung lam aṭanga chhuak ka ni. Nangni chu he khawvêl aṭanga chhuak in ni a, kei erawh chu he khawvêl aṭanga chhuak ka ni lo. 24 Chuvângin a ni, ‘In sualnaah in thi ang,’ tia ka sawi. Ka nihna ka sawi hi in âwih loh chuan in sualnaah in thi ang,” a ti a. 25 Tichuan, a hnênah: “Tu nge maw i nih le?” an ti a. Isua’n anni chu chhângin: “Hrilh che u mah ila awmzia a awm chuang lo vang. 26 In chungchâng thu-ah sawi tûr leh rêl tûr tam tak ka nei. A nihna takah chuan, mi Tîrtu chu a dik a, a hnên aṭanga ka hriatte ngei chu khawvêlah hian ka sawi a ni,” a ti a. 27 Anni chuan Pa chungchâng an hnênah a sawi tih an hre thiam lo va. 28 Tichuan, Isua’n: “Mihring Fapa hi in khai kân hnuah, ani chu ka ni tih leh keima thuin eng mah ka ti lo va, Pain min zirtîr ang chiahin hêng thute hi ka sawi zâwk a ni tih in hria ang. 29 Mi Tîrtu chu ka hnênah a awm a, eng lai pawha a lâwm zâwng ka tih ṭhin avângin, ani chuan min thlahthlam lo,” a ti a. 30 Chûng thute a sawi lai chuan mi tam takin ani chu an ring ta a.

31 Tin, Isua’n amah ringtu Judate hnênah chuan: “Ka thu in âwih reng chuan ka zirtîrte in ni tak tak ang. 32 Tichuan, thutak in hria ang a, thutak chuan a chhuah zalên ang che u,” a ti a. 33 Anni chuan a hnênah: “Abrahama thlahte kan ni a, tu bâwih mah kan la ni ngai lo. Engtin nge, ‘Chhuah zalen in ni ang,’ tia i sawi theih?” tiin an chhâng a. 34 Isua’n anni chu chhângin: “Tih tak meuhvin, tih tak meuhvin ka hrilh a che u, thil sual titu apiang chu sual bâwihah a tâng a ni. 35 Chu bâkah, bâwih chu inah kumkhuain a awm reng lo va; fapa erawh chu kumkhuain a awm reng ṭhîn. 36 Chuvângin, Fapain a chhuah zalen che u chuan in zalên tak zet ang. 37 Abrahama thlahte in ni tih ka hria e. Nimahsela, ka thu in pawm loh avângin min thah in tum si. 38 Kei chuan ka Pa hnêna ka awm laia ka thil hmuhte ka sawi ṭhîn a, nangni erawh chuan in pa hnên aṭanga in thil hriatte in ti ṭhîn,” a ti a. 39 Anni chuan a hnênah: “Kan pa chu Abrahama a ni,” tiin an chhâng a. Isua’n an hnênah: “Abrahama fate ni ula chuan, Abrahama thil tih angte in ti ang chu. 40 Nimahsela, Pathian hnên aṭanga ka hriat thutak ka hrilh che u a, nangni erawh chuan min thah in tum si. Abrahama chuan hetiang thil hi a ti ngai lo vang. 41 Nangni chuan in pa thil tih angte in ti ṭhîn,” a ti a. Anni chuan a hnênah: “Sâwn* kan ni lo ve; Pa pakhat kan nei, Pathian chu,” an ti a.

42 Isua’n an hnênah: “Pathian in Pa a nih chuan min hmangaih ang chu, Pathian hnên aṭanga lo kalin hetah ka awm si a. Keima thua lo kal ka ni lo, Ani chuan mi tîr zâwk a ni. 43 Engvângin nge ka thusawi in hriatthiam loh? Ka thu in pawm theih loh vâng a ni. 44 Nangni chu in pa Diabola aṭanga chhuak in ni a, in pa duh zâwngte tih in duh ṭhîn. Ani chu ama duh dâna a kal aṭang khân tualthattu a ni a; amahah thutak a awm loh avângin thutakah a ding nghet lo. Dâwt sawi hmang leh dâwt pa a nih avângin, amah aṭanga chhuak dâwt thu a sawi a ni. 45 Kei erawh chuan thutak ka hrilh che u avângin nangni’n min ring lo a ni. 46 In zîngah thiam loh min chantîr thei tu nge awm? Thutak ka sawi a nih chuan, engvângin nge nangni’n min rin loh? 47 Pathian hnên aṭanga lo chhuak chuan Pathian thusawite a ngaithla ṭhîn. Hei hi in ngaihthlâk loh chhan a ni, Pathian hnên aṭanga lo chhuak in nih loh avângin,” a ti a.

48 Judate chuan ani chu: “‘Samari mi, ramhuai zâwl i ni,’ kan tih che kha kan ti dik a ni lâwm ni?” tiin an chhâng a. 49 Isua’n anni chu chhângin: “Ramhuai zâwl ka ni lo, ka Pa ka chawimawi zâwk a ni. Nangni’n min ti hmingchhia a nih hi. 50 Nimahsela, ka mawina tûr ka zawng lo. Chawimawia awm tûra min duhtu chu Pathian a ni a, Ani chu rorêltu a ni. 51 Tih tak meuhvin, tih tak meuhvin ka hrilh a che u, tu pawhin ka thu a zawm chuan a thi ngai lo vang,” a ti a. 52 Judate chuan a hnênah: “Tûnah chuan ramhuai zâwl i ni tih kan hre ta. Abrahama a thi tawh a, zâwlneite pawh an thi tawh bawk. Nimahsela, nang chuan, ‘Mi tu pawhin ka thu a zawm chuan a thi ngai lo vang,’ i ti si. 53 Kan pa thi ta Abrahama ai khân i ropui zâwk em ni? Zâwlneite pawh an thi tawh, tu nge nia i inngaih?” an ti a. 54 Isua’n anni chu chhângin: “Mahni inchawimawi ni ila, ka mawinain awmzia a nei lo vang. Min chawimawitu chu ka Pa a ni, kan Pathian tia in sawi kha. 55 Nimahsela, nangni’n ani chu in hre lo va, kei erawh chuan ka hria. Ani chu ka hre lo ti ila, nangmahni ang bawka dawthei ka ni ang. Nimahsela, ani chu ka hria a, a thu pawh ka zâwm bawk ṭhîn. 56 In pa Abrahama khân ka lo kalna nî hmuh a inbeiseina avângin a lâwm êm êm ṭhîn a. Tin, a hmu ta ngei a,* a lâwm hle a ni,” a ti a. 57 Tichuan, Judate chuan a hnênah: “Kum 50 pawh i la tling lo va, Abrahama i hmu a maw?” an ti a. 58 Isua chuan an hnênah: “Tih tak meuhvin, tih tak meuhvin ka hrilh a che u, Abrahama awm hma pawhin ka awm tawh,” a ti a. 59 Tichuan, amah den nân lung an chhar a. Nimahsela, Isua chu a biru a, biak in aṭang chuan a chhuak ta a.

9 Tin, Isua chuan a kal pahin pian tirh aṭanga mitdel pakhat a hmu a. 2 A zirtîrte chuan a hnênah: “Rabbi, mitdel saa a piang hi ama tih sual nge ni a, a nu leh a pa tih sual?” tiin an zâwt a. 3 Isua’n anni chu chhângin: “He pa hian a ti sual lo va, a nu leh a pate pawhin an ti sual hek lo. Hetianga a awm hi Pathian hnathawh a lan chhuah theihna tûr a ni. 4 Chhûn a nih lai hian mi Tîrtu hna kan thawk tûr a ni, tu man hna an thawh theih loh hun, zân a lo thleng dâwn si a. 5 Khawvêla ka awm chhûng hian khawvêl êng ka ni,” a ti a. 6 Chûng thute a sawi zawh chuan leiah chil a chhâk a, a chilin lei a ti diak a, chu chu a mitah a hnawih a. 7 A hnênah: “Kal la, Silom dîlah va sil rawh,” a ti a. (Silom tih chu, “Tirh,” tihna a ni.) Tichuan, a kal a, a va sil a, mit vârin a lo lêt leh a.

8 Tichuan, a vêngte leh a kutdawh lai hmu ṭhîntute chuan: “He pa hi ṭhua kutdawh ṭhîn kha a ni lo vem ni?” an ti a. 9 Ṭhenkhatin: “Amah ngei kha a nih hi,” an ti a. Mi dangte chuan: “Ni lo. Mahse, an inang khawp mai,” an ti a. Ani chuan: “Amah kha ka ni e,” a ti a. 10 Tin, anni chuan: “A nih chuan engtin nge i mit a lo vâr?” tiin an zâwt a. 11 Ani chuan: “Isua an tih khân lei a ti diak a, ka mitah hnawihin, ‘Silom dîlah va kal la, sil rawh,’ min ti a. Tichuan, ka kal a, ka va sil a, ka hmu thei ta a ni,” tiin a chhâng a. 12 Anni chuan a hnênah: “Chu pa chu khawiah nge a awm?” an ti a. Ani chuan: “Ka hre lo,” a ti a.

13 Anni chuan a hmaa mitdela kha Pharisaite hnênah an hruai a. 14 Isua’n lei ti diak a, a mit a tih vâr nî chu Sabbath Nî a lo ni kher kher a. 15 Tin, chumi ṭumah chuan Pharisaite pawhin a mit a lo vâr tâk dân chu an zâwt a. Ani chuan an hnênah: “Lei ti diakin ka mitah a hnawih a. Tichuan, ka sil a, ka lo hmu thei ta a ni,” a ti a. 16 Pharisai ṭhenkhat chuan: “Sabbath a serh loh avângin, he pa hi Pathian hnên aṭanga lo kal a ni lo,” an ti a. Mi dangte chuan: “Engtin nge mi sualin hetiang thil makte* hi a tih theih ang?” an ti a. Tichuan, an zîngah inṭhen hranna a lo awm ta a. 17 Tin, mitdel hnênah chuan: “I mit a tih vârsak che avângin ani chu engtin nge i ngaih?” an ti leh a. Chu pa chuan: “Ani chu zâwlnei a ni,” a ti a.

18 Nimahsela, Judate chuan mit lo vâr taa nu leh pate an koh hma chuan, ani chu mitdel a ni ṭhîn a, khua a lo hmu thei ta, tih chu an âwih lo va. 19 Anni chuan: “Ani hi in fapa mitdel saa piang in tih kha a ni em? A nih chuan, engtin nge tûnah a lo hmuh theih tâk?” tiin an zâwt a. 20 A nu leh a pate chuan: “Hei hi kan fapa a ni tih kan hria a, mitdel sain a piang tih pawh kan hre bawk. 21 Nimahsela, tûna a lo hmuh theih tâk dân hi kan hre lo va, a mit tih vârsaktu pawh kan hre hek lo. Amah hi zâwt mai rawh u, puitling a ni alâwm, a chanchin chu aman sawi rawh se,” an ti a. 22 A nu leh a pate chuan Judate an hlauh avângin chûng thute chu an sawi a ni. Judate chuan tu pawh ani chu Krista anga pawmtu apiangte chu inkhâwmna in aṭanga hnawh chhuah tûr tia rem an lo tih tlân tawh avângin. 23 Chuvâng chuan a ni, a nu leh a pate’n: “Puitling a ni alâwm. Amah zâwt rawh u,” an tih ni.

24 Tichuan, a vawi hnihna atân mitdel chu an ko leh a, a hnênah: “Pathian chawimawi rawh, he mi hi mi sual a ni tih kan hria,” an ti a. 25 Ani chuan: “Mi sual a nih leh nih loh ka hre lo. Thil pakhat ka hria, ka mit a del ṭhîn a, tûnah erawh ka hmu thei ta,” tiin a chhâng a. 26 Tin, anni chuan a hnênah: “I chungah eng thil nge a tih? Engtin nge i mit a tih vâr?” an ti a. 27 Anni chu chhângin: “Ka hrilh tawh che u a, in hre duh lo a nih kha. Engvângin nge in hriat leh duh tâk? Nangni pawh a zirtîrte nih ve in duh ta em ni?” a ti a. 28 Chu veleh, anni chuan deusawh takin: “Nang hi kha pa zirtîr kha i ni a, keini erawh chu Mosia zirtîrte kan ni. 29 Pathianin Mosia a bia tih kan hria. He pa erawh hi chu khawi lama mi nge a nih kan hre lo ve,” an ti a. 30 Chu pa chuan anni chu chhângin: “Chu tak chu a ni, a makna chu! Khawi aṭanga lo kal nge a nih in hre lo va; mahse, ka mit a tih vâr miau si hi. 31 Pathianin mi sualte thusawi a ngaithla lo tih kan hria. Nimahsela, tu pawh Pathian ṭih a, a duh zâwng ti apiangte chu a ngaithla ṭhîn. 32 Hmân lai aṭang tawhin tu mahin mitdel saa piang mit an tih vârsak thu hriat a la ni ngai lo. 33 He mi hi Pathian lak aṭanga chhuak ni lo sela chuan, eng mah a ti thei lo vang,” a ti a. 34 Anni chuan a hnênah: “Nang, sual lailet dêra piang hian min zirtîr vei a ni maw?” an ti a. Tichuan, an hnawt chhuak ta a!

35 Isua’n an hnawt chhuak tih a lo hria a, ani chu zawng chhuakin, a hnênah: “Mihring Fapa i ring em?” a ti a. 36 Chu pa chuan: “Ka pu, ani chu ka rin theih nân, amah chu tu nge ni? Min hrilh rawh,” a ti a. 37 Isua’n a hnênah: “Amah chu i hmu tawh a, a be mêktu che hi a ni alâwm,” a ti a. 38 Chu pa chuan: “Lalpa, ka ring a che,” a ti a. Tichuan, kûnin Isua chu chibai a bûk ta a. 39 Tin, Isua chuan: “He khawvêl hi rorêlsak a nih theihna tûrin khawvêlah hian ka lo kal a ni. Hmu thei lote’n an hmuh theihna tûr leh hmu theite mit a lo del theihna tûrin,” a ti a. 40 A bula awm Pharisaite’n, chûng thute an hriat chuan a hnênah: “Keini pawh mitdelah min ngai em ni?” an ti a. 41 Isua chuan an hnênah: “Mitdel ni ula chuan sual in nei lo vang. Nimahsela, tûnah, ‘Kan hmu thei,’ in ti si a. Chuvângin, in sual chu a awm reng a ni,” a ti a.

10 “Tih tak meuhvin, tih tak meuhvin ka hrilh a che u, berâm huangah a kawngkhâr aṭanga lût lo va, hmun dang aṭanga lâwn lût chu rûkru leh suamhmang a ni. 2 Nimahsela, a kawngkhâr aṭanga lût chu berâm vêngtu a ni. 3 Kawngkhâr vêngtuin ani chu a hawnsak ṭhîn a, berâmte’n a aw an ngaithla ṭhîn. A berâmte chu an hminga kovin a hruai chhuak ṭhîn a. 4 A berâm zawng zawng a hruai chhuah hnuah an hma a hruai a, a aw an hriat avângin berâmte’n an zui ṭhîn. 5 Berâmte chuan an hriat lohva chu an zui lo vang a, an tlânchhiatsan zâwk ang, a aw chu an hriat ṭhan loh avângin,” a ti a. 6 Isua’n chu tehkhin thu chu an hnênah a sawi a; nimahsela, anni chuan a thusawi chu an hre thiam lo.

7 Tichuan, Isua’n an hnênah thu a sawi leh a: “Tih tak meuhvin, tih tak meuhvin ka hrilh a che u, kei hi berâm kawngkhâr chu ka ni. 8 Keimah anga insawia lo kal zawng zawngte chu rûkrute leh suamhmangte an ni; nimahsela, berâmte chuan anni chu an ngaithla lo. 9 Kei hi kawngkhâr chu ka ni; tu pawh keimaha lût chu a him ang a, ani chu a lûtin a chhuak ang a, ei tûr a hmu bawk ang. 10 Rûkru chu ru tûr leh, ti hlum tûr leh, ti chhe tûr chauhva lo kal a ni. Kei erawh chu nunna an neih theih nân, chatuana nunna an neih theih nâna lo kal ka ni. 11 Kei hi berâm vêngtu ṭha ka ni; berâm vêngtu ṭha chuan a berâmte tân a nun a pe ṭhîn. 12 Berâm vêng tûra inhlawhfa leh berâm neitu ni lo chuan, chinghne lo kal a hmuhin berâmte chu hnutchhiahin a tlânchhe ṭhîn a; tin, chinghnia chuan berâmte chu sehin a ti darh ṭhîn. 13 Ani chu inhlawhfa a nih avângin berâmte chu a ngaihsak lo a ni. 14 Berâm vêngtu ṭha ka ni. Ka berâmte chu ka hria a, ka berâmte pawhin min hria. 15 Pain mi hriat angin kei pawhin Pa chu ka hria a; ka berâmte tân ka nun ka pe a ni.

16 “He berâm huanga mi lo pawh hi berâm dang ka nei; anni pawh ka la rawn hruai lût tûr a ni, ka aw an hria ang a; tichuan, vêngtu pakhat neiin berâm rual khat an lo ni ang. 17 Hei hi Pain min hmangaih chhan a ni, ka dawn leh theihna tûra ka nun ka pêk dâwn avângin. 18 Tu man min lâksak lo vang a, keima thuin ka pe zâwk ang. Pe tûrin thuneihna ka nei a, dawng leh tûr pawhin thuneihna ka nei bawk. He thupêk hi ka Pa hnên aṭanga ka dawn a ni,” a ti a.

19 Chûng thute avâng chuan, Judate zîngah inṭhen hranna a lo awm leh a. 20 An zînga tam takin: “Ramhuai a zâwl a, a â a nih hi. Engvângin nge a thusawi in ngaihthlâk?” an ti a. 21 Mi dangte chuan: “Hêng thute hi ramhuai zâwl thusawi a ni lo. Ramhuaiin mitdelte mit a ti vâr thei dâwn em ni?” an ti a.

22 Chutih lai chu Jerusalema Inpumpêkna Kût hman lai a ni a. Chu chu thlasik lai a ni. 23 Tin, Isua chu biak ina Solomona hulhliapah a kal a. 24 Tichuan, Judate’n ani chu rawn hualin, a hnênah: “Engtia rei nge rilru mumal pu lova min awmtîr dâwn? Krista i nih chuan, tlang takin min hrilh rawh,” an ti a. 25 Isua’n anni chu chhângin: “Ka hrilh tawh che u a, in âwih lo a nih kha. Ka Pa hminga thil ka tihte hian ka chanchin a hriattîr a ni. 26 Nimahsela, ka berâm in nih loh avângin in âwih lo a nih hi. 27 Ka berâmte chuan ka aw an hria a, kei pawhin anni chu ka hria, anni chuan min zui ṭhîn. 28 An hnênah chatuan nunna ka pe a, tih boral an ni ngai lo vang; tin, tu mahin ka kut aṭangin min chhuhsak hek lo vang. 29 Ka Pain min pêk chu thil dang zawng zawng aiin a ropui zâwk a, Pa kut aṭang chuan tu mahin an chhuhsak thei lo vang. 30 Kei leh Pa chu pumkhat kan ni,” a ti a.

31 Judate chuan amah den nân lung an chhar leh a. 32 Isua’n an hnênah: “Pa hnên aṭanga chhuak hnathawh ṭha tam tak ka entîr che u a. Eng hna avâng khân nge lunga min den in tum?” a ti a. 33 Judate’n ani chu chhângin: “Hnathawh ṭha vâng ni lovin, Pathian i sawichhiat avângin kan dêng dâwn che; nang hi mihring ni si a, pathiana i insiam avângin,” an ti a. 34 Isua’n anni chu chhângin: “In Dân lehkhabuah, ‘“Nangni hi pathiante* in ni,” ka tih kha,’ tiin a inziak lo vem ni? a ti a. 35 Pathian Lehkha Thu thlâk theih a ni si lo va, Pathianin a Thua hrem tlâk nia a târ lante mah ‘pathiante’ tia a koh si chuan, 36 Pain a tih thianghlima khawvêla a tirh hnênah hian, ‘Pathian Fapa ka ni,’ tia ka sawi avângin, ‘Pathian i sawichhia,’ min ti maw? 37 Ka Pa hna ka thawk lo a nih chuan min ring suh u. 38 Nimahsela, ka thawk a nih chuan ka thusawite ring lo mah ula, ka hnathawhte tal hi ring rawh u, Pa nên kan inpumkhat tih chiang taka in hriat theih nân,” a ti a. 39 Tichuan, man an tum leh a; nimahsela, an man theih lohna tûrin a tlân chhuak a.

40 Tichuan, a tîra Johana’n mite a baptis-na Jordan Lui râlah khân a kal leh a; tin, chutah chuan a awm ta reng a. 41 Mi tam tak a hnênah an lo kal a, anni chuan: “Johana’n thil mak* eng mah a ti lo; nimahsela, he pa chungchâng Johana’n a sawi zawng zawng kha a dik a ni,” an ti a. 42 Chutah chuan mi tam takin amah an ring ta a.

11 Tin, mi pakhat Lazara a dam lo va; ani chu Mari leh a unaunu* Marthi te awmna Bethani khuaa awm a ni. 2 Mari chu Lalpa hriak rimtui leih a, a sama a kê hrûk hulsaktu kha a ni a, dam lo Lazara chu a unaupa* a ni. 3 Tin, a farnute chuan Isua hnênah: “Lalpa, i hmangaih tak kha a dam lo ve,” tia sawi tûrin mi an tîr a. 4 Nimahsela, Isua’n chu chu a hriatin: “He natna hi thihna tûr a ni lo va, Pathian ropuina tûr a ni zâwk e, hemi avâng hian Pathian Fapa hi chawimawia a awm theihna tûrin,” a ti a.

5 Tin, Isua’n Marthi te, Mari te leh, Lazara te chu a hmangaih a. 6 Nimahsela, Lazara a dam lo tih a hriatin, a awmna hmunah chuan ni hnih a la châm a. 7 Tin, chumi hnuah chuan zirtîrte hnênah: “Judai ramah i kal leh ang u,” a ti a. 8 Zirtîrte chuan a hnênah: “Rabbi, tûn hnai lawk khân Judate’n lunga den an tum che kha, chutah chuan i kal leh dâwn a maw?” an ti a. 9 Isua’n anni chu chhângin: “Dârkâr 12 chhûng khua a êng a ni lâwm ni? Tu pawh khaw ênga kal chu a tlu hauh lo vang, he khawvêl êng hi a hmuh avângin. 10 Nimahsela, tu pawh zâna kal chu amahah êng a awm loh avângin a tlu ang,” a ti a.

11 Chûng thute a sawi hnu chuan: “Kan ṭhian Lazara chu a muhîl ta a, amah kai tho tûrin ka kal dâwn a ni,” tiin a sawi belh a. 12 Zirtîrte chuan a hnênah: “Lalpa, a muthilh chuan a ṭha leh mai ang chu,” an ti a. 13 Isua erawh chuan a thih thu a sawi a ni. Nimahsela, anni chuan a mut hahchawlh thu a sawi emaw an ti a. 14 Tin, Isua chuan tlang takin an hnênah: “Lazara a thi a ni, 15 in rinna ti nghet lehzual tûr thil ka tih dâwn avângin chuta ka awm lo chu ka lâwm a ni. Nimahsela, a hnênah i kal ang u,” tiin a sawi a. 16 Phîra tia an koh Thoma chuan a zirtîrpuite hnênah: “Isua ruala thih a ngai a nih pawha thi ve tûrin i kal ang u,” a ti a.

17 Isua a va thlen chuan, Lazara chu thlânah* ni li lai zalh a ni tawh tih a hria a. 18 Tin, Bethani khua chu Jerusalem aṭanga mêl hnih vêla* hlaa awm a ni. 19 Juda mi tam tak chu Marthi leh Mari hnênah an unaupa* a thih avânga thlamuan tûrin an lo kal a. 20 Tin, Marthi’n Isua a lo kal tih a hriat chuan amah hmuak tûrin a kal a; nimahsela, Mari chu inah a la ṭhu reng a. 21 Tin, Marthi chuan Isua hnênah: “Lalpa, hetah awm la chuan ka unaupa* a thi lo tûr. 22 Mahse, tûnah pawh Pathian hnêna i dîl apiang Pathianin a pe ang che tih ka hria,” a ti a. 23 Isua’n a hnênah: “I unaupa* a tho leh ang,” a ti a. 24 Marthi chuan a hnênah: “Ni kin nîa thawhlehnaah chuan a tho leh ang tih ka hria e,” a ti a. 25 Isua’n a hnênah: “Kei hi thawhlehna leh nunna ka ni. Tu pawh keimaha rinna lantîrtu chu thi mah sela, a nung leh ang; 26 nung dama awm tu pawh ka chunga rinna lantîrtu chu an thi ngai lo vang. Chu chu i ring em?” a ti a. 27 Ani chuan a hnênah: “Ring e, Lalpa; Krista, Pathian Fapa, khawvêla lo kal tûra chu i ni tih ka ring e,” a ti a. 28 Chûng thute a sawi zawh chuan a kal a, a unaunu* Mari chu a rûk têa kovin: “Zirtîrtu a lo thleng a, a ko che a ni,” a ti a. 29 Chu chu a hriatin Mari chu rang takin a tho va, Isua hnênah chuan a kal ta a.

30 Isua chu khuaah a la lût lo va, Marthi’n a va hmuahna hmunah chuan a la awm reng a. 31 Tin, in chhûnga awm amah thlamuantu Judate’n Mari rang taka thova a kal chhuak an hmuh chuan, thlânah* ṭap tûrin a kal dâwn emaw an ti a, an zui a. 32 Mari’n Isua awmna hmun a thlena amah a hmuh chuan, a ke bulah bawkkhupin a hnênah: “Lalpa, hetah awm la chuan ka unaupa* a thi lo tûr,” a ti a. 33 Isua’n Mari ṭap leh a ruala lo kal Judate ṭap a hmuh chuan, a rilruin a rûm a, a lungngai ta hle a. 34 Ani chuan: “Khawiah nge in zalh?” a ti a. Anni chuan a hnênah: “Lalpa, lo kal la, en rawh,” an ti a. 35 Isua chu a ṭap ta a. 36 Chu veleh, Judate chuan: “En teh u, Lazara hi a lo va hmangaih êm!” an ti a. 37 Nimahsela, an zînga ṭhenkhat chuan: “Mitdelte mit ti vârtu hian Lazara hi thi lo tûrin a dang thei lo vem ni?” an ti a.

38 Tin, Isua chu a rilruin a rûm leh a, thlânah* chuan a lo kal a. Thlân* chu pûk a ni a, a kawngkâ chu lunga khâr a ni a. 39 Isua chuan: “Lung hi lum sawn rawh u,” a ti a. A thia farnu Marthi chuan a hnênah: “Lalpa, tûnah chuan a uih tawh ang, ni li lai a ni tawh si a,” a ti a. 40 Isua’n a hnênah: “I rin chuan Pathian ropuizia i hmu ang ka ti che a ni lâwm ni?” a ti a. 41 Tichuan, lung chu an lum sawn a. Isua chuan vân lam enin: “Ka Pa, min ngaihthlâk avângin ka lâwm e. 42 Min ngaithla reng ṭhîn tih ka hria; nimahsela, mipui dingho avângin chu chu ka sawi a ni, nangin mi tîr tih an rin theihna tûrin,” a ti a. 43 Chûng thute a sawi zawh chuan ring takin: “Lazar, lo chhuak rawh!” a ti a. 44 Mitthi chu a kut leh a kê puana tuam chungin a lo chhuak a, a hmai pawh puanin a intuam a. Isua’n an hnênah: “Phelh ula, kaltîr rawh u,” a ti a.

45 Tichuan, Mari hnêna lo kal Isua thil tih hmutu Juda tam tak chuan amah chu an ring ta a. 46 Nimahsela, an zînga ṭhenkhat chu Pharisaite hnênah an va kal a, Isua thil tih chu an hrilh a. 47 Tin, puithiam lalte leh Pharisaite chuan Sanhedrin-a* mite chu an ko khâwm a, an hnênah: “Eng nge kan tih tâk ang? He mi hian thil mak* tam tak a ti si a. 48 Hetianga kan awmtîr reng chuan mi zawng zawngin an ring ang a, Rom mite lo kalin kan hmun* leh kan hnam hi an rawn thunun mai ang,” an ti a. 49 Nimahsela, an zînga pakhat, chumi kuma puithiam lalber Kaiapha chuan an hnênah: “Nangni hian eng mah in hre lo, 50 hnam pum pui tih borala a awm aiin, mi tam tak aia mi pakhat a thih in tân a ṭha zâwk tih in ngaihtuah hek lo,” a ti a. 51 Nimahsela, chu chu a rilru puak chhuaka sawi a ni lo, chumi kuma puithiam lalber a nih avângin, Judate tâna Isua a thih tûr thu a sawi lâwkna a ni. 52 Chu chu Judate tân chauh ni lovin, Pathian fa hmun hrang hranga darh tate pumkhat an nih theihna tûr a ni bawk. 53 Tin, chumi nî aṭang chuan amah thah tumin an phiarru ta a.

54 Chuvângin, Isua chu Judate zîngah a langin a kal tawh lo va, chu hmun chu chhuahsanin thlalêr bula awm Ephraim khuaah a kal a, chutah chuan zirtîrte nên an awm ta reng a. 55 Tin, Judate Kalhlên Kût chu a lo hnai ta a, Kalhlên Kût inṭan hmaa dân anga inti thianghlim tûrin, thingtlâng khua aṭangin mi tam tak Jerusalemah an han chho va. 56 Tichuan, Isua an zawng a, biak in chhûngah chuan ding khâwmin: “Eng nge in ngaih dân? Kûtnaah a rawn kal lo vang maw?” tiin an inzâwt hlawm a. 57 Nimahsela, puithiam lalte leh Pharisaite chuan Isua an man theih nân, a awmna hria apiangin an hnêna hriattîr tûrin thupêk an lo chhuah tawh a ni.

12 Kalhlên Kût thlen hma ni rukah, Isua chu thihna ata a kaihthawh tâk Lazara awmna Bethani khua a lo thleng a. 2 Tin, chutah chuan a tân zanriah an buatsaih a, Marthi’n anni chu a vil a, Lazara erawh chu Isua kîlpuitute zîngah a tel a. 3 Tin, Mari chuan nard hriak rimtui eng mah pawlh loh, man to tak, ûm khat* a rawn keng a, Isua kêah leihin a samin a kête chu a hru hul a. Tin, in chu hriak rimtui rim chuan a khat ta vek a. 4 Nimahsela, a zirtîrte zînga pakhat, amah phatsantu tûr Juda Iskariota chuan: 5 “Engvângin nge he hriak rimtui hi denarii* 300-a hralh a, mi retheite hnêna pêk a nih zâwk loh?” a ti a. 6 Nimahsela, chu chu mi retheite a ngaihtuah vânga sawi a ni lo, ani chu rûkru a ni a, pawisa bâwm a kawl a, chuta pawisa awmte chu a rûk ṭhin vâng zâwk a ni. 7 Isua chuan: “Engtin mah ti suh u, mi phûm nî atâna min lo buatsaih lâwk nâna ti a nih hi. 8 Mi retheite chu in hnênah an awm reng a, kei erawh chu in hnênah ka awm reng lo vang,” a ti a.

9 Chutih lai chuan, Juda mipui tam takin Bethani khuaah a awm tih an lo hria a, Isua hmu tûrin an lo kal a. Nimahsela, Isua hmuh an duh vâng chauh ni lovin, thihna ata a kaihthawh tâk Lazara hmuh an duh tel bawk a ni. 10 Tin, puithiam lalte chuan Lazara pawh tih hlum tumin an phiarru ta a. 11 Chutianga an phiarrûk chhan chu, amah avânga Juda mi tam tak Bethani khuaa kal a, Isua an rin vâng a ni.

12 A tûkah chuan, kût hmang tûra lo kal mipui tam takin Isua’n Jerusalem a pan thu an lo hria a. 13 Tichuan, tûmkau kengin amah hmuak tûrin an kal chhuak a: “Aw Pathian, ani hi chhandam rawh! Jehova* hminga lo kal Israel Lal chu malsâwmin awm rawh se!” tiin an au va. 14 Isua’n sabengtung tuai a hmuh chuan a chungah a chuang a: 15 “Hlau suh, Zion fanu. En teh! I lal chu sabengtung tuai chunga chuangin a lo kal e,” tih ziak ang khân. 16 A tîrin a zirtîrte chuan chûng thilte chu an hre thiam lo va; nimahsela, Isua chawimawia a awm hnuah, chûng mipuite thil tih chu Isua chungchâng Pathian Lehkha Thua inziakte kha a ni tih an hre chhuak a.

17 Tin, thlân* aṭanga Lazara a koh chhuah lai leh, thihna ata a kaihthawh laia a hnêna awm mipuite chuan, an thil hmuh chu an hriattîr zêl a. 18 Chu thil mak* chu a ti tih an hriat avângin mipuite chuan an lo hmuak a ni. 19 Tin, Pharisaite chuan: “Eng mah kan tih theih loh hi in hmu em? En teh u! Khawvêlin amah an zui tâk hi,” an ti hlawm a.

20 Tin, kûtnaa Pathian be tûra lo kalte zîngah Grik mi ṭhenkhat an awm a. 21 Anni chu Galili rama Bethsaida khaw mi Philipa hnênah an lo kal a, a hnênah: “Ka pu, Isua hmuh kan duh e,” tiin an ngên a. 22 Philipa chuan Andria a va hrilh a. Andria leh Philipa chuan Isua an va hrilh ve leh a.

23 Nimahsela, Isua’n anni chu chhângin: “Mihring Fapa chawimawia a awm hun a thleng ta. 24 Tih tak meuhvin, tih tak meuhvin ka hrilh a che u, buhhûm fang khat hi leia a tlâk a, a thih phawt loh chuan fang khat a ni reng ṭhîn; nimahsela, a thih chuan rah tam tak a chhuah ṭhîn. 25 Tu pawh a nun thlahlel chuan a chân ang a; nimahsela, tu pawh he khawvêla a nun chân inhuam* chuan chatuana nung tûrin a humhim ang. 26 Tu pawhin ka rawngbâwl a duh chuan mi zui rawh se, ka awmnaah ka rawngbâwltu pawh a awm ang. Tu pawh ka rawngbâwl duh chu Pain a chawimawi ang. 27 Tûnah hian ka rilru a mangang hle a, eng nge ka sawi tâk ang? Ka Pa, thil lo thleng tûr lak aṭang hian* min chhanhim rawh. Nimahsela, hei hi leia ka kal chhan a ni si a. 28 Ka Pa, i hming chawimawi rawh,” a ti a. Tichuan, vân aṭangin: “Ka chawimawi tawh a, ka chawimawi leh bawk ang,” tiin aw a lo chhuak a.

29 Chuta ding mipuite chuan chu chu an hriatin khawpui ri emaw an ti a. Mi dangte chuan: “Vântirhkohvin a bia a ni,” an ti thung a. 30 Isua chuan an hnênah: “He aw hi ka tân ni lovin, in tâna lo chhuak a ni. 31 He khawvêl hi rorêlsak mêk a ni a, he khawvêl rorêltu hi paih chhuah a ni ang. 32 Tin, kei hi lei ata khai kâna ka awm chuan, mi chi tinrêng ka lamah ka hîp ang,” a ti a. 33 Chu chu a thih dân tûr hriattîr nâna sawi a ni. 34 Tin, mipuite chuan a hnênah: “Krista chu chatuanin a awm reng tûr a ni tih Dân thuin a sawi kan hria. ‘Engtin nge mihring Fapa chu khai kânin a awm tûr a ni,’ tia i sawi theih? Mihring Fapa chu tu nge ni?” an ti a. 35 Tin, Isua’n an hnênah: “In zîngah êng rei lo tê a la awm ang. Thimin a hliahkhuh loh nân che u, êng in neih lai hian kal rawh u; tu pawh thima kal chuan a kalna chin a hre lo. 36 Chuvângin, êng in neih lai hian êngah rinna lantîr rawh u, êng fate in nih theih nân,” a ti a.

Isua’n chûng thu chu a sawi zawh chuan a kal a, anni chu a bihrûksan ta a. 37 An hmaah thil mak* tam tak ti mah se, ani chu an ring si lo. 38 Zâwlnei Isaia’n: “Jehova,* kan thu hriattîrte hi tuin nge ring? Jehova’n* a thiltihtheihna* chu tu hnênah nge a lantîr?” tia a sawi kha a thlen famkim theih nân. 39 An rin theih loh chhan chu Isaia’n heti hian a lo sawi leh bawk a ni: 40 “Ani chuan an mitte ti delin an thinlung a ti sak a; chuti lo chuan, an mitin an hmu ang a, an thinlunga hre thiamin an hawi kîr ang a, keiin ka lo ti dam hlauh dah ang e,” tiin. 41 Isaia’n chûng thute chu Krista ropuizia a hmuh avânga a chanchin a sawina a ni. 42 Chutichung pawhin, rorêltute zînga tam takin ani chu an ring a; nimahsela, Pharisaite avângin Isua an ring tih an lantîr lo, inkhâwmna in aṭanga hnawh chhuah an nih loh nân; 43 Pathian mit hmuha ropui aiin mihring mit hmuha ropui an duh zâwk si a.

44 Nimahsela, Isua chuan ring taka auvin: “Tu pawh mi ring chuan keimah chauh ni lovin, mi tîrtu pawh a ring a ni. 45 Tin, tu pawh mi hmu chuan mi Tîrtu pawh a hmu bawk. 46 Khawvêlah hian êng angin ka lo kal a ni, tu pawh mi ring apiang thima a awm reng loh nân. 47 Nimahsela, tu pawh ka thusawi hriaa zâwm lo chu thiam loh ka chantîr lo vang; khawvêl thiam loh chantîr tûr ni lovin, khawvêl chhandam tûr zâwka lo kal ka ni si a. 48 Tu pawh mi hnâwltu leh ka thusawi pawm lotu chuan thiam loh chantîrtu tûr pakhat a nei. Ka thusawite ngei khân, ni kin nîah ani chu thiam loh a chantîr ang. 49 Mahni thuin ka sawi si lo, Pa mi tîrtuin ka sawi tûr leh ka zirtîr tûr chungchângah thu min pe zâwk a ni. 50 A thupêk chu chatuana nunna a ni tih ka hria. Chuvângin, eng pawh sawi ila, Pain mi hrilh ang zêlin ka sawi a ni,” a ti a.

13 Tin, Isua’n khawvêl chhuahsan a, Pa hnêna a kal hun a thleng tawh dâwn tih Kalhlên Kût hmain a hria a, khawvêla awm a hmangaih, a tate chu a tâwp thlengin a hmangaih reng a ni. 2 Zanriah an ei laiin, Diabola chuan Simona fapa Juda Iskariota thinlungah chuan, Isua phatsan duhna a lo neihtîr tawh a. 3 Tin, Isua chuan Pain a kutah thil engkim a pe tawh tih leh Pathian hnên aṭanga lo kal a ni a, Pathian hnênah a kîr leh dâwn tih hre reng chungin, 4 zanriah a ei lai chu a tho va, a kawrfual a phelh a, a sîrah a dah a. Inhrûkna puan lain, a kâwngah a hrêng a. 5 Chumi hnuah chawhtawlhah tui a dah a, a zirtîrte kê chu silin, inhrûkna puan a hrên chuan a hru hul zêl a. 6 Tichuan, Simon Petera hnên a lo thleng a. Petera chuan a hnênah: “Lalpa, ka kê i sil dâwn a maw?” a ti a. 7 Isua’n a hnênah: “Ka thil tih hi tûnah i hre thiam lo a ni; nimahsela, nakinah i la hre thiam ang,” tiin a chhâng a. 8 Petera chuan a hnênah: “Ka kê i sil hauh lo vang,” a ti a. Isua’n: “Ka silsak loh che chuan ka hnênah chan i nei lo vang,” tiin a chhâng a. 9 Simon Petera chuan a hnênah: “A nih chuan Lalpa, ka kê chauh ni lovin, ka kut leh ka lû pawh le,” a ti a. 10 Isua’n a hnênah: “Tu pawh inbual tawh chu a kê bâk sil a ngai lo, a pumin a fai a ni. Nangni pawh in fai e, in vai erawh chuan a ni lo,” a ti a. 11 Amah phatsantu tûr chu a hre si a. Chuvângin a ni: “In vai chuan in fai lo,” tia a sawi ni.

12 Tin, an kê a sil zawh chuan a kawrfual dah kha a ha leh a, dawhkân kîl lehin an hnênah: “In chunga ka thil tih hi a awmzia in hria em? 13 Nangni’n, ‘Zirtîrtu’ leh ‘Lalpa’ min ti ṭhîn, in ti dik e, ka ni rêng si a. 14 Chuvângin, kei Lalpa leh Zirtîrtu mahin in kê ka sil chuan, nangni pawh in kê in insilsak tûr a ni. 15 In chunga ka tih anga in tih vena tûrin entawn tûr ka siamsak che u a nih hi. 16 Tih tak meuhvin, tih tak meuhvin ka hrilh a che u, bâwih chu a pu aiin a ropui lo va, a tirha pawh a tîrtu aiin a ropui hek lo. 17 Chûng thilte chu in hre tawh a, in hriat anga in tih chuan in hlim ang. 18 In vaia chungchâng ka sawi lo; ka thlante chu ka hria. Nimahsela, hei hi: ‘Ka chhang eitu chu ka hmêlma a lo ni ta,’ tih Pathian Lehkha Thu kha a thlen famkim theihna tûr a ni. 19 Chu thil lo thleng tûr chu ka hrilh che u hi; chuvângin, ka chunga a lo thleng in hmuh hunah, he Pathian Lehkha Thu hian ka chungchâng a sawi tih in hria ang. 20 Tih tak meuhvin, tih tak meuhvin ka hrilh a che u, tu pawh ka mi tirh lâwm apiang chu kei mi lâwm an ni a, kei mi lâwm apiang chu mi Tîrtu lâwm an ni,” a ti a.

21 Chûng thute a sawi zawh chuan, Isua chu a rilruin a mangang ta êm êm a: “Tih tak meuhvin, tih tak meuhvin ka hrilh a che u, in zînga pakhatin min phatsan ang,” tiin tlang takin a sawi a. 22 Tu chungchâng ber nge a sawi tih hre lovin zirtîrte chu an inen hlawm a. 23 Zirtîrte zînga pakhat Isua’n a hmangaiha chuan, Isua hnaih takah* dawhkân a kîl a. 24 Chuvângin, Simon Petera chuan zaizirin chu mi hnênah chuan: “Min hrilh teh, tu chungchâng nge a sawi?” tiin a zâwt a. 25 Tin, chu mi chuan Isua âwm nghêngin a hnênah: “Lalpa, chu chu tu nge ni?” a ti a. 26 Isua’n: “Chhang them ka chiah a, ka pêk tûra chu a ni,” a ti a. Tichuan, chhang a chiah hnuah, Simon Iskariota fapa Juda hnênah a pe a. 27 Juda chuan chhang them a lâk hnuah, a kawchhûngah chuan Setana a lût a. Tin, Isua’n a hnênah: “I tih tûr chu ti thuai rawh,” a ti a. 28 Nimahsela, dawhkân kîltute zîngah tu mahin chu thu a hrilh chhan chu an hre lo. 29 Ṭhenkhatin Juda chu pawisa bâwm kawltu a nih avângin Isua’n, “Kût atâna kan mamawh lei rawh,” a tihna emaw, mi retheite hnêna thil pe tûra a hrilhna emaw an ti a. 30 Tichuan, chhang them a lâk hnuah a chhuak ta nghâl a. Chu chu zân a ni.

31 Tin, a kal chhuah hnu chuan Isua’n: “Mihring Fapa hi chawimawiin a awm ta, Pathian pawh amah avângin chawimawiin a awm a ni. 32 Pathian ngeiin ani chu a chawimawi ang a, a chawimawi nghâl ang. 33 Ka ṭhiante u,* in hnênah rei lo tê ka la awm ang. Min la zawng ang a; nimahsela, Judate hnêna ka hrilh ang chiahin, ‘Ka kalnaah chuan in lo kal thei lo vang,’ tih nangni pawh ka hrilh che u a nih hi. 34 Thupêk thar ka pe a che u, inhmangaih tawn ula; keiin ka hmangaih che u ang bawk hian, nangni pawh inhmangaih tawn rawh u. 35 In inhmangaih tawn chuan, mi zawng zawngin ka zirtîrte in ni tih an hria ang,” a ti a.

36 Tin, Simon Petera chuan a hnênah: “Lalpa, khawiah nge i kal dâwn?” a ti a. Isua chuan: “Ka kalnaah chuan min zui thei rih lo vang; nimahsela, nakinah min la zui ang,” a ti a. 37 Petera chuan a hnênah: “Lalpa, engvângin nge tûnah ka zui theih loh che? I tân chuan thih pawh ka inhuam asin,” a ti a. 38 Isua’n ani chu chhângin: “Ka tân thih i inhuam tak zet a maw? Tih tak meuhvin, tih tak meuhvin ka hrilh a che, vawi thum mi phat hma loh chu âr a khuang lo vang,” a ti a.

14 “In thinlung mangang suh se. Pathian chungah rinna lantîr ula; ka chungah pawh rinna lantîr ve rawh u. 2 Ka Pa inah awmna tam tak a awm. Awm lo sela chuan ka hrilh tawh ang che u, in tân hmun siamin ka kal dâwn e. 3 Tin, ka kal ang a, in tân hmun ka han siam zawhah ka lo kal leh ang a, ka awmnaa in awm ve theihna tûrin ka hnênah ka hruai ang che u.* 4 Ka kalna tûr leh a kawng chu in hria e,” a ti a.

5 Thoma chuan a hnênah: “Lalpa, i kalna tûr kan hre si lo va, engtin nge a kawng chu kan hriat theih ang?” a ti a.

6 Isua’n a hnênah: “Kei hi kawng leh thutak leh nunna ka ni. Keimah kal tlang lovin, tu mah Pa hnênah an thleng ngai lo. 7 Nangni’n min hria ni ula chuan, ka Pa pawh in hre tawh ngei ang; tûn aṭang hian ani chu in hria a, in hmu tawh bawk,” a ti a.

8 Philipa’n a hnênah: “Lalpa, Pa chu min hmuhtîr rawh; tichuan, kan lungawi ang,” a ti a.

9 Isua’n a hnênah: “Philip, in zîngah hetiang khawpa rei ka awm tawh chung pawhin, min la hre lo a ni maw? Tu pawh mi hmu chu Pa hmu a ni, engtin nge ‘Pa chu min hmuhtîr rawh,’ i tih theih? 10 Pa nên kan inpumkhat tih i ring lo em ni? In hnêna ka thusawite hi ka ngaih dâna sawi ka ni lo; nimahsela, ka hnêna awm reng Pain keimah hmangin a hna a thawk zâwk a ni. 11 Pa nên kan inpumkhat tih hi ring rawh u; a nih loh pawhin, a duh zâwng anga ka thil tih in hmuhte hi ring rawh u. 12 Tih tak meuhvin, tih tak meuhvin ka hrilh a che u, tu pawh ka chunga rinna lantîrtu chuan ka thawh ang hi a la thawk ang; hêng aia ropui zâwkte pawh hi a la thawk ang, Pa hnêna ka kal dâwn avângin. 13 Tin, eng pawh ka hminga in dîl apiang, chu chu ka ti ang. Fapa avânga Pa chawimawia a awm theihna tûrin. 14 Eng pawh ka hminga in dîl apiang chu ka ti zêl ang.

15 “Nangni’n min hmangaih chuan ka thupêkte in zâwm ang. 16 Tin, Pa hnênah ka dîl ang a, ani chuan in hnêna chatuana awm tûr ṭanpuitu* dang a pe ang che u. 17 Chu chu thutak târ langtu thlarau thianghlim a ni; mahse, khawvêlin chu chu a hmuh loh va, a hriat hek loh avângin a dawng thei lo. Nangni erawh chuan in hria; in hnênah a awm a, nangmahnia a awm reng bawk avângin. 18 Fahrah angin ka kalsan lo vang che u. In hnênah ka lo kal leh ang. 19 Rei lo te hnuah khawvêlin mi hmu tawh lo vang; nimahsela, nangni erawh chuan min hmu ang. Kei ka nung a, nangni pawh in nun dâwn avângin. 20 Chumi nîah chuan ka Pa nên kan inpumkhat tih leh, keimah leh nangni pawh kan inpumkhat tih in hria ang. 21 Tu pawh ka thupêkte pawm a, zâwmtu chu min hmangaihtu a ni. Tin, tu pawh min hmangaihtu chu ka Pain a hmangaih ang; tin, kei pawhin ani chu ka hmangaih ang a, a hnênah chiang takin ka inhriattîr ang,” a ti a.

22 Tin, Iskariota ni lo zâwk Juda chuan: “Lalpa, engvângin nge kan hnêna chiang taka inhriattîr i tum laia, khawvêl mite hnêna inhriattîr i tum si loh?” a ti a.

23 Isua’n ani chu chhângin: “Tu pawhin min hmangaih chuan ka thu a zâwm ang a, ani chu ka Pain a hmangaih ang. Tin, a hnênah kan lo kal ang a, a hnênah kan awm reng ang. 24 Tu pawh min hmangaih lo chuan ka thute a zâwm lo. In thu hriatte kha ka ta a ni lo va, Pa mi tîrtu ta zâwk a ni.

25 “Hêng thute hi in hnêna ka la awm lai hian ka hrilh che u a ni. 26 Nimahsela, ṭanpuitu, thlarau thianghlim, Pain ka hminga a rawn tirh tûr chuan, chu ngei chuan thil zawng zawng a zirtîr ang che u a, ka thil hrilh zawng zawng che u hi a hriat chhuahtîr leh ang che u. 27 Thlamuanna* ka hnutchhiah che u a ni; ka thlamuanna* ka pe a che u. Thlamuanna* ka pêk che u hi, khawvêlin a pêk che u nên a inang lo. In thinlung mangang suh se, hlauh pawh hlau hek suh se. 28 ‘Ka kal bo dâwn a, in hnênah ka lo kal leh ang,’ tia in hnêna ka sawi in hriat kha. Nangni’n min hmangaih chuan Pa hnêna ka kal dâwn avângin in lâwm tûr a ni, Pa chu keimah aiin a ropui zâwk si a. 29 Chu chu a lo thlen hmain tûnah hian ka hrilh che u a ni, a lo thlen huna in rin theihna tûrin. 30 In hnênah thu tam tak ka sawi tawh lo vang, khawvêl rorêltu a lo kal mêk si a, ani chuan ka chungah thuneihna rêng a nei lo. 31 Nimahsela, Pa ka hmangaih tih khawvêlin a hriat theih nân, Pain thu mi pêk ang zêlin ka ti ṭhîn a ni. Tho ula, heta ṭang hian i kal ang u.

15 “Kei hi grêp hrui dik tak ka ni a, ka Pa chu huan enkawltu a ni. 2 Keimaha pêng rah lo apiang chu a paih ṭhîn a, rah chhuahtu apiang chu tam lehzuala rah an chhuah theih nân a thian fai ṭhîn. 3 In hnêna ka thusawite avâng khân nangni chu in fai tawh e. 4 Keimahah awm reng rawh u; tichuan, kei pawh nangmahniah ka awm reng ang. A pêng chuan grêp hrui a zawm reng loh chuan a rah thei lo ang bawkin, nangni pawh keimaha in awm reng loh chuan in rah thei lo vang. 5 Kei hi grêp hrui chu ka ni a, nangni hi a pêngte in ni. Tu pawh keimaha awm reng leh amaha ka awm rengna chu, chu mi ngei chu tam takin a rah ṭhîn; ka tel lo chuan eng mah in ti thei si lo va. 6 Tu pawh keimaha awm reng lo chu pêng tan chhum, ro ṭhîn ang chu a ni. Tin, mite’n chûng pêngte chu la khâwmin meiah an paih lût a, a kâng ral ṭhîn. 7 Keimaha in awm reng a, ka thusawite nangmahnia a awm reng chuan, in duh apiang dîl ula tihsak in ni ang. 8 Tam taka in rah zawm zêl a, ka zirtîrte in ni tih in lantîr hian ka Pa chu chawimawiin a awm a ni. 9 Pain min hmangaih ang chiahin kei pawhin ka hmangaih che u a ni; ka hmangaihnaah awm reng rawh u. 10 Ka thupêkte in zawm chuan ka hmangaihnaah in awm reng ang, kei pawhin ka Pa thupêkte ka zâwm a, a hmangaihnaa ka awm reng ang bawk hian.

11 “Ka lâwmna chu nangmahnia a awm theih nân leh in lâwm a kim theih nân, hêng thute hi in hnênah ka sawi a ni. 12 Hei hi ka thupêk chu a ni, keiin ka hmangaih che u ang hian inhmangaih tawn rawh u. 13 Miin a ṭhiante tâna a nun a hlan aia hmangaihna nasa zâwk tu man an nei lo. 14 Ka thupêk in zawm chuan ka ṭhiante in ni ang. 15 Bâwih ka ti tawh lo vang che u, bâwih chuan a pu thil tih a hre si lo va. Ṭhiante ka ti tawh zâwk ang che u, ka Pa hnên aṭanga ka thu hriat zawng zawng ka hrilh tawh si che u a. 16 Nangni’n min thlang lo va, keiman ka thlang zâwk che u a ni. Rah tam tak chhuah zawm zêl tûr leh in rah chu a awm reng theih nân ka ruat bawk a che u; tichuan, Pa hnêna ka hminga in dîl apiang chu a pe dâwn che u nia.

17 “Hêngte hi in hnêna ka thupêk chu a ni, inhmangaih tawn rawh u. 18 Khawvêlin a huat che u chuan, nangni a huat hma che u pawhin kei min haw tawh tih hria ang che u. 19 Khawvêl mite ang ni ula chuan, khawvêlin ama mite chu a hmangaih tûr. Nimahsela, khawvêl mite ang in ni lo va, khawvêl aṭanga ka thlan chhuah che u avângin khawvêlin a hua che u a ni. 20 In hnêna ka hrilh tawh che u kha hre reng rawh u: Bâwih chu a pu aiin a ropui lo. Kei min tih duhdah tawh chuan nangni pawh an ti duhdah ang che u; ka thusawi an zawm chuan in thusawi pawh an zâwm ang. 21 Nimahsela, ka hming avângin chûng zawng zawng chu in chungah an la ti ang, mi Tîrtu chu an hriat loh avângin. 22 An hnênah lo kalin, thu sawi lo ila chuan sualna an nei lo tûr. Nimahsela, tûnah chuan an sualnaah hian chhuanlam tûr rêng an nei lo. 23 Tu pawh min hua chuan ka Pa pawh a hua a ni. 24 An zîngah tu ma la tih ngai loh thilte ti lo ila chuan sualna an nei lo tûr; nimahsela, tûnah chuan min hmuin min hua a, ka Pa pawh an haw bawk. 25 Nimahsela, chu chu: ‘Anni chuan chhan awm lovin min hua,’ tia an Dân thua inziak kha a famkim theih nân a thleng a ni. 26 Ka Pain ṭanpuitu a pêk tûr che u chu in hnênah ka rawn tîr ang a, ka Pa hnên aṭanga lo kal thutak târ langtu, chu thlarau thianghlim chuan ka chanchin a hriattîr ang. 27 Chutiang bawkin, nangni pawh a tîr aṭanga ka hnêna awm in nih avângin ka chanchin in hriattîr tûr a ni.

16 “Hêng thute hi in tlûk loh nân in hnênah ka sawi a ni. 2 Mite’n inkhâwmna in aṭangin an la hnawt chhuak ang che u a, nangmahni ti hlumtu apiangin Pathian hnêna rawngbâwlna thianghlim hlân anga an inngaih hun a lo la thleng ang. 3 Chûng thilte chu Pa leh keimah min hriat loh avângin an la ti ang. 4 Amaherawhchu, chûng thilte a lo thlen hun chuan, ka hrilh tawh che u tih in hriat chhuah nân hêng thute hi in hnênah ka sawi a ni.

“A tîra hêng thute ka hrilh loh nachhan che u chu in hnêna ka la awm vâng a ni. 5 Tûnah chuan mi Tîrtu hnênah ka kal tawh dâwn a; nimahsela, in zînga tu mahin, ‘Khawiah nge i kal dâwn?’ tiin min zâwt si lo. 6 Hêng thute hi in hnêna ka sawi avângin, in thinlung chu lungngaihnain a khat a. 7 Nimahsela, thu dik ka hrilh a che u, ka kal bo tûr hi in ṭhatna tûr a ni. Ka kal bo loh chuan ṭanpuitu chu in hnênah a lo kal dâwn si lo, ka kal erawh chuan chu ṭanpuitu chu in hnênah ka rawn tîr ang. 8 Ṭanpuitu a lo thlen hunah chuan, khawvêl hnênah hian sual chungchâng thu te, felna chungchâng thu te leh, rorêlna chungchâng thute chu chiang takin a hriattîr ang. 9 A hmasa berin, ka chunga rinna an lantîr loh avângin sual chungchâng thu chu a hriattîr ang a. 10 Tichuan, Pa hnêna ka kal dâwn avâng leh min hmuh tawh dâwn loh avângin felna thu chu a hriattîr ang. 11 Chumi zawhah, he khawvêl rorêltu hi rorêlsaka a awm avângin rorêlna thu chu a hriattîr bawk ang.

12 “In hnênah sawi tûr tam tak la nei mah ila, tûnah chuan in hre thiam thei rih lo vang. 13 Nimahsela, chu ṭanpuitu, thutak târ langtu thlarau thianghlim chu a lo thlen hunah chuan, thutak zawng zawngah a hruai ang che u. Ama ngaih dânin thu a sawi dâwn si lo va, a thu hriatte a sawi zâwk ang. Tin, in hnênah thil lo thleng tûrte a puang chhuak ang. 14 Ani chuan min chawimawi ang, ka hnên aṭanga a thu hriatte in hnêna a puan chhuah dâwn avângin. 15 Pain a thil hriat zawng zawng min hrilh tawh. Chuvâng chuan a ni, ‘Ṭanpuitu chuan ka hnên aṭanga a thu hriatte in hnênah a puang chhuak ang,’ ka tih ni. 16 Rei lo te hnuah nangni’n min hmu tawh lo vang a; nimahsela, rei lo te hnuah bawk nangni’n min hmu leh ang,” a ti a.

17 Tin, a zirtîr ṭhenkhat chuan: “‘Rei lo te hnuah nangni’n min hmu lo vang a, rei lo te hnuah bawk nangni’n min hmu leh ang,’ a tih leh ‘Pa hnêna ka kal dâwn avângin,’ tia kan hnêna a sawi hi eng nge a awmzia?” tiin an inzâwt hlawm a. 18 Anni chuan: “‘Rei lo tê,’ a tih hi eng a sawina nge ni? A thusawi awmzia hi kan va hre lo ve,” an ti a. 19 Isua’n zawh duh an nei tih a hria a, an hnênah: “‘Rei lo te hnuah nangni’n min hmu lo vang a, rei lo te hnuah bawk nangni’n min hmu leh ang,’ tia ka sawi chhan hriat tumin in inzâwt hlawm a ni maw? 20 Tih tak meuhvin, tih tak meuhvin ka hrilh a che u, in mittui a tlain, in la rûm ang a; nimahsela, khawvêl erawh chu a lâwm ang; in lungngai ang a; nimahsela, in lungngaihna chu lâwmnaah a la chang ang. 21 Hmeichhiain nau a vei lai chuan, a hun a thlen avângin nâ a tuar ṭhîn;* nimahsela, nau a hrin veleh khawvêla nau lo piang chuan a tih lâwm êm avângin, a hrehawm tawrh chu a hre chang tawh lo. 22 Tin, nangni pawh tûnah in lungngai a; nimahsela, min hmuh leh hunah in thinlung a lâwm ang a, in lâwmna chu tu mahin an lâksak lo vang che u. 23 Chumi nîah chuan eng mah min zâwt tawh lo vang. Tih tak meuhvin, tih tak meuhvin ka hrilh a che u, Pa hnênah eng pawh in dîl apiang ka hmingin a pe ang che u. 24 Tûn thleng hian ka hmingin eng mah in la dîl lo. Dîl rawh u; tichuan, in hmu ang, in lâwm a kim theih nân.

25 “Hêngte hi tehkhin thuin in hnênah ka sawi a ni. Tehkhin thua in hnêna ka sawi tawh loh hun a lo thleng ang. Nimahsela, Pa chanchin tlang takin ka hrilh ang che u. 26 Chumi nîah chuan ka hmingin Pa hnênah in dîl ang; chu chu, ‘Ka dîlsak ang che u,’ ka tihna a ni lo. 27 Pa ngeiin a hmangaih si che u a, nangni’n kei min hmangaih avâng leh Pathian aiawha lo kal ka ni tih in rin avângin. 28 Pa aiawhin khawvêlah ka lo kal a ni. Tûnah chuan khawvêl chhuahsanin Pa hnênah ka kîr leh dâwn ta,” a ti a.

29 A zirtîrte chuan: “Lalpa, tûnah chuan tehkhin thu i hman loh avângin i thusawite kan hre thiam ta. 30 Tin, thil zawng zawng i hria tih leh mite ngaihtuahna i hriat avângin tu man zawhna an zawh che i ngai lo tih kan hre bawk. Chuvâng chuan, Pathian hnên aṭanga lo kal i ni tih kan ring a ni,” an ti a. 31 Isua’n anni chu chhângin: “Tûnah chuan in ring tawh maw? 32 Ngai teh u! Mahni in ṭheuhva haw darh a, keimah chauhva min thlahthlam hun a lo thleng thuai ang. Nimahsela, Pain min awmpui avângin ka mal lo ve. 33 Hêng thute hi keimah avânga thlamuanna* in neihna tûrin in hnênah ka sawi a ni. Khawvêlah hian hrehawm in tuar ang; nimahsela, huaisen takin awm rawh u! Keiin khawvêl ka ngam ta,” a ti a.

17 Isua’n chûng thute a sawi zawh chuan vân lam enin: “Ka Pa, a hun a thleng ta. I fapa chawimawi rawh, i fapain a chawimawi theihna tûr chein; 2 a hnêna mi zawng zawng chunga thuneihna i pêk ang chiah a, a hnêna i pêk zawng zawngte hnêna chatuana nunna a pêk theihna tûrin. 3 Hei hi chatuana nunna a ni, nang Pathian dik awm chhun leh i tirh Isua Krista hriat* hi. 4 Khawvêlah ka chawimawi tawh che a, hnathawh tûr min pêk kha ka thawk zo tawh e. 5 Chuvângin, ka Pa, khawvêl* awm hmaa i bula ropuina ka neih khân, i hnênah min chawimawi rawh.

6 “Khawvêla mi, mi pêkte hnênah hian i hming ka hriattîr tawh. I ta an ni a, anni chu min pe a; tin, anni chuan i thu an zâwm ta. 7 Nangin thil mi pêk zawng zawngte kha i hnên aṭanga chhuak a ni tih tûnah chuan an hre ta; 8 an hnêna sawi tûra min tih zawng zawng kha ka sawi tawh avângin. Tin, anni chuan chûngte chu an pawm a, i aiawha kal ka ni tih chiang taka an hriat tawh bâkah, nangin min tîr tih an ring tawh bawk. 9 An tâna ngensak ka ni; khawvêl tâna ngensak ka ni lo, nangin mi pêkte tân zâwk a ni; anni chu i ta an ni si a. 10 Ka thil neih zawng zawngte hi i ta a ni a, i ta chu ka ta a ni. Tin, an zîngah chawimawiin ka awm ta.

11 “Kei khawvêlah ka awm tawh lo vang a, anni erawh chu khawvêlah an la awm ang. Kei zawng i hnênah ka rawn kîr dâwn ta. Ka Pa thianghlim tak, nang leh kei pumkhat kan nih anga anni pawh pumkhat an nih ve theihna tûrin, nangmah ngeiin min pêk i hming avângin anni chu vênghim rawh. 12 An hnêna ka awm chhûng zawng, nangmah ngeiin min pêk i hming avângin anni chu ka vênghim ṭhîn. An zînga pakhat mah boral awm lovin ka vênghim a ni, boralna fapa tih chauh lo kha chu, Pathian Lehkha Thu a thlen famkim theihna tûrin. 13 Nimahsela, tûnah i hnênah ka rawn kîr dâwn ta, hêng thute hi khawvêlah ka sawi a ni, ka lâwmna neih hi a kima an neih ve theihna tûrin. 14 An hnênah i thu ka pe tawh; nimahsela, khawvêlin anni chu a hua a ni, khawvêla mite ang an nih loh avângin, kei khawvêla mite ang ka ni lo ang bawk hian.

15 “Anni chu khawvêl aṭanga la chhuak tûrin ka ngên lo che a, mi sual laka vênghim tûrin ka ngên zâwk che a ni. 16 Anni chu khawvêl mite ang an ni lo, kei khawvêl mite ang ka ni lo ang bawk hian. 17 Anni chu thutakin ti thianghlim rawh,* i thu chu thutak a ni. 18 Nangin khawvêla mi tîr ang hian, kei pawhin anni chu khawvêlah ka tîr a ni. 19 Tin, an tân ka inti thianghlim a ni, anni pawh thutaka tih thianghlim an nih theihna tûrin.

20 “Hêng mite tân chauhva ngensak ka ni lo, an thu avânga keimah min la ring tûrte tân pawh ka ngensak a ni. 21 Ka Pa, chutiang chuan an vaiin pumkhat an ni thei ang a, keimahni nên pawh an inpumkhat thei ang, nang leh kei kan inpumkhat ang bawk hian. Chu chu, nangin min tîr tih khawvêlin a rin theihna tûr a ni. 22 Nang leh kei pumkhat kan nih anga anni pawh pumkhat an nih theihna tûrin, ropuina min pêk kha an hnênah ka pe tawh. 23 Kei leh anni chu kan inpumkhat a, nang leh kei pawh kan inpumkhat a ni, pumkhat an nihna a famkim theihna tûrin. Tichuan, nangin min tîr tih leh min hmangaih angin anni chu i hmangaih tih khawvêlin a hre thei ang. 24 Ka Pa, nangin mi pêkte hi ka awmnaa awm tûrin ka duh a ni, nangin min hmangaih avânga khawvêl* awm hmaa ropuina mi pêk kha an hmuh theihna tûrin. 25 Ka Pa Fel tak, khawvêlin a hre lo che a, kei erawh chuan ka hria che a ni. Hêngho pawh hian nangin mi tîr tih an hria e. 26 An hnênah i hming ka hriattîr tawh a, ka hriattîr zêl ang. Min hmangaihna kha anmahnia a awm theihna tûr leh kei pawh anmahni nêna kan inpumkhat theihna tûrin,” a ti a.

18 A ṭawngṭai zawhin, Isua chu a zirtîrte nên Kidron Ruam lehlama awm huanah an lût a. 2 Tin, chu hmunah chuan Isua leh a zirtîrte an kal ṭhin avângin, amah phatsantu Juda pawhin chu hmun chu a hria a ni. 3 Juda chuan sipaiho bâkah, puithiam lalte leh Pharisaiho vêngtute chu a rawn hruai a, anni chuan meichher te, khâwnvâr te leh, hriamhreite an keng a. 4 A chunga thil thleng tûr zawng zawng hre chungin Isua chu a rawn pên chhuak a, an hnênah: “Tu nge in zawn?” a ti a. 5 Anni chuan: “Nazaret Isua,” tiin an chhâng a. Ani chuan: “Keimah hi ka ni e,” a ti a. Tin, amah phatsantu Juda pawh an zîngah a ding ve a.

6 Nimahsela, Isua’n an hnênah, “Keimah hi ka ni e,” tia a han sawi chuan an hnung tawlh a, leiah chuan an tlu hlawm a. 7 Tin, ani chuan an hnênah: “Tu nge in zawn?” tiin a zâwt leh a. Anni chuan: “Nazaret Isua,” an ti a. 8 Isua chuan: “Keimah hi ka ni tih ka hrilh tawh che u kha. Kei min zawng in nih chuan anniho hi kaltîr rawh u,” a ti a. 9 Chu chu: “Nangin mi pêkte kha pakhat mah ka hloh lo,” tia a lo sawi tawh a thlen famkim theih nân a ni.

10 Tin, Simon Petera chuan a ngûnhnâm pai chu phawiin, puithiam lalber bâwih chu a sat a, a beng ding lam a sah thlâksak a. Chu bâwih hming chu Malka a ni. 11 Isua erawh chuan Petera hnênah: “Ngûnhnâm kha a paiah thun rawh. Pain no mi pêk hi ka in lo vang maw?” a ti a.

12 Tichuan, sipai te, an hotu leh, Judate vêngtute chuan Isua chu an man a. 13 Tin, ani chu Ana hnênah an hruai hmasa a, Ana chu chumi kuma puithiam lalber Kaiapha puzawn* a ni. 14 Kaiapha chu Judate hnêna, ‘Mi tam tak aia mi pakhat a thih an tân a ṭha zâwk,’ tia thurâwn petu kha a ni.

15 Simon Petera leh zirtîr dang pakhatin Isua chu an zui a. Chu zirtîr chu puithiam lalber hmêlhriat a ni a, Isua chu puithiam lalber kawtlai thlengin a zui a. 16 Tin, Petera chu kawngkhâr pâwn lamah chuan a ding a. Tichuan, puithiam lalber hmêlhriat zirtîr chu va chhuakin kawngkhâr vêngtu chu a bia a, Petera chu a hruai lût a. 17 Kawngkhâr vêngtu chhiahhlawh nula chuan Petera hnênah: “Nang pawh he pa zirtîrte zînga pakhat i ni lâwm ni?” a ti a. Ani chuan: “Ka ni lo,” a ti a. 18 Bâwihte leh vêngtute chuan a vawh avângin mahni intih lum nân an meihawl chhêm chu din hualin an lo ai a. Petera pawhin an zînga dingin a ai ve a.

19 Tin, puithiam lal* chuan Isua chu a zirtîrte chanchin leh a thu zirtîr chungchâng a zâwt a. 20 Isua’n ani chu chhângin: “Mi zawng zawng hmaah thu ka sawi ṭhîn. Juda zawng zawngte kal khâwmna inkhâwmna inah leh biak inah ka zirtîr ṭhîn a, eng mah a rûkin ka sawi lo. 21 Engvângin nge kei min zawh? Ka thusawi hretute hi zâwt ta che. En teh! Hêng mite hian ka thusawite chu an hria alâwm,” a ti a. 22 Chûng thute a sawi zawh chuan, chuta ding vêngtute zînga pakhat chuan Isua chu a hmaiah a bêng a, a hnênah: “Khatiang khân puithiam lal i chhâng a maw?” a ti a. 23 Isua’n ani chu chhângin: “Thu dik ka sawi lo a nih chuan, ka sawi dik loh chu mi hriattîr ta che; nimahsela, thu dik ka sawi chung pawhin engvângin nge mi ben?” a ti a. 24 Tin, Ana chuan Isua chu phuar chunga puithiam lalber Kaiapha hnêna hruai tûrin thu a pe a.

25 Tin, Simon Petera chu mei lum aiin chutah chuan a la ding reng a. Anni chuan a hnênah: “Nang pawh hi a zirtîrte zînga pakhat i ni lâwm ni?” an ti a. Ani chuan: “Ka ni lo,” tiin a phâ a. 26 Puithiam lalber bâwih zînga pakhat, Petera’n a beng a sah thlâksak pa chhûngkhat chuan a hnênah: “Nang pawh huanah khân a bulah ka hmu che a ni lâwm ni?” a ti a. 27 Nimahsela, Petera chuan a pha leh a, chu velah âr a khuang ta nghâl a.

28 Tichuan, Isua chu Kaiapha hnên aṭangin Pilata inah an hruai a. Chu chu zîng hma tak a ni. Nimahsela, anni chu Kalhlên Kût chaw an ei theih nâna an intih bawlhhlawh lohna tûrin Pilata inah chuan an lût lo. 29 Pilata chu pâwnah lo chhuakin an hnênah: “He pa hian eng thil sual nge a tih?” a ti a. 30 Anni chuan a hnênah: “He pa hi thil sual titu ni lo sela chuan, i hnênah kan rawn hruai tawp lo vang,” tiin an chhâng a. 31 Tin, Pilata chuan an hnênah: “Nangmahni’n hruai ula, in dân angin rorêlsak ta che u,” a ti a. Tin, Judate chuan a hnênah: “Mi tu mah ti hlum tûrin thuneihna kan nei lo,” an ti a. 32 Chu chu Isua’n a thih dân tûr a lo sawi tawh a thlen famkim theih nân a ni.

33 Tichuan, Pilata chu a inah a lût leh a, Isua chu kovin a hnênah: “Judate Lal i ni em?” a ti a. 34 Isua’n ani chu chhângin: “Hei hi nangma rilru puak chhuaka min zâwt nge i nih a, mi dangin ka chungchâng an hrilh che?” a ti a. 35 Pilata chuan: “Juda mi ka ni em ni? I hnampuite ngei leh puithiam lalte’n ka hnênah an rawn hruai che a nih hi. Eng thil nge i tih?” a ti a. 36 Isua’n ani chu chhângin: “Ka Lalram chu he khawvêla mi hi a ni lo. Ka Lalram chu he khawvêla mi ni sela chuan, Judate hnêna pêk ka nih lohna tûrin min zuitute’n an bei ang. Nimahsela, ka Lalram chu he khawvêla mi hi a ni lo,” a ti a. 37 Tichuan, Pilata’n a hnênah: “A nih chuan, lal i ni maw?” a ti a. Isua’n ani chu chhângin: “Lal ka nih thu nangmah ngeiin i sawi alâwm. Thutak hriattîr hi ka lo pian chhan leh he khawvêla ka lo kal chhan a ni asin. Tu pawh thutak nunpuitu apiangin ka thusawi an ngaihthla ṭhîn,” a ti a. 38 Pilata chuan a hnênah: “Thutak chu eng nge ni?” a ti a.

Chu thu a sawi zawh chuan a kal chhuak leh a, Judate hnênah: “He mi hi thiam loh chantîr nachhan tûr rêng ka hmu lo. 39 Amaherawhchu, Kalhlên Kûtah mi tâng pakhat ka chhuahsak ṭhîn che u a. Chuvângin, Judate Lal hi chhuahsak che u ila in duh em?” a ti a. 40 Tin, anni chu: “He pa hi ni lovin, Barabba zâwk min chhuahsak rawh!” tiin an au va. Barabba chu suamhmang a ni.

19 Tin, Pilata chuan sipaite hnênah Isua chu hruai a, savun hruihruala vaw tûrin a hrilh a. 2 Sipaite chuan hlîng lukhum phiarin an khumtîr a, puan sen duk an sintîr bawk a. 3 A hnênah an lo kal a: “Chibai, nang Judate Lal!” an ti a. Tin, anni chuan a hmaiah an bêng bawk a. 4 Pilata chu pâwnah chhuak lehin an hnênah: “En teh u! He mi hi thiam loh chantîr nachhan tûr rêng ka hmu lo tih in hriat theihna tûrin, in hnênah ka rawn hruai chhuah hi,” a ti a. 5 Tichuan, Isua chu hlîng lukhum khum chung leh puan sen duk sin chungin pâwnah a lo chhuak a. Tin, Pilata chuan an hnênah: “En teh u! He mipa hi!” a ti a. 6 Nimahsela, puithiam lalte leh vêngtute’n ani chu an hmuh chuan: “Banah khêngbet rawh! Banah khêngbet rawh!”* tiin an au va. Pilata’n an hnênah: “Nangmahni’n hruai ula, ti hlum rawh u,* thiam loh chantîrna tûr rêng ka hmu si lo va,” a ti a. 7 Judate chuan ani chu chhângin: “Dân kan nei a, Pathian fapaa a insiam avângin, chumi dân ang chuan a thi tûr a ni,” an ti a.

8 Pilata’n an thusawi a hriat chuan a hlau lehzual a. 9 Tichuan, a inah a lût leh a, Isua hnênah: “Khawi lam mi nge i nih?” a ti a. Nimahsela, Isua chuan engtin mah a chhâng lo. 10 Tin, Pilata chuan a hnênah: “Min be duh lo vei maw? Chhuah tûr leh ti hlum* tûr chein thuneihna ka nei tih i hre lo vem ni?” a ti a. 11 Isua’n ani chu chhângin: “Chung lam aṭanga pêk i nih loh chuan, ka chungah thuneihna rêng i nei lo vang. Chuvângin, i hnêna min petu kha a sualna a nasa zâwk a ni,” a ti a.

12 Chumi avâng chuan, Pilata’n chhuahtîr dân kawng a zawng nasa lehzual a; nimahsela, Judate chuan: “He pa hi i chhuah chuan Kaisara ṭhian i ni lo vang. Tu pawh lala insiam chuan Kaisara a dodâl a ni,” an ti a. 13 Tin, Pilata’n chûng thute a han hriat hnu chuan Isua chu a hruai chhuak a, Lung Rem, Hebrai ṭawnga Gab′ba·tha an tih hmuna rorêlna ṭhutthlêngah chuan a ṭhu a. 14 Chu chu Kalhlên Kût Inbuatsaihna nî, chhûn dâr 12 vêl* a ni a. Tin, Judate hnênah chuan: “En teh u! In lal hi!” a ti a. 15 Nimahsela, anni chu: “Ti boral rawh! Ti boral rawh! Banah khêngbet rawh!”* tiin an au va. Pilata chuan an hnênah: “In lal hi ka ti hlum ang maw?” a ti a. Puithiam lalte chuan: “Kaisara lo chu lal dang kan nei lo,” tiin an chhâng a. 16 Tichuan, Pilata chuan bana tih hlum tûrin an hnênah a pe ta a.

Tin, anni chuan Isua chu an hruai ta a. 17 Isua chuan a nghaisakna ban* chu puin, Hebrai ṭawnga Gol′go·tha tia an koh, Luruh Hmun panin a kal chhuak ta a. 18 Chutah chuan mi dang pahnih nên banah an khêngbet a, a laiah Isua an khêngbet a, mi dang pahnihte chu a sîr lehlam lehlamah an khêngbet a. 19 Pilata chuan lehkha ziakin nghaisakna banah* chuan a târ a. Chutah chuan: “Nazaret Isua, Judate Lal,” tiin a inziak a ni. 20 Bana Isua an khenbehna hmun chu khawpui bul a nih avângin, lehkha inziak chu Juda mi tam takin an chhiar a. Chu chu Hebrai ṭawng te, Latin ṭawng te leh, Grik ṭawngtea ziah a ni. 21 Nimahsela, Juda puithiam lalte chuan Pilata hnênah: “‘Judate Lal,’ tiin ziak suh. ‘Judate Lal ka ni, a ti,’ tiin ziak zâwk rawh,” an ti a. 22 Pilata chuan: “Ka ziah tawh chu, ka ziah tawh a ni mai,” tiin a chhâng a.

23 Tin, sipaite’n Isua bana an khenbeh zawh chuan a thawmhnaw an la a, hmun liah phelin pakhat ṭheuhvin an insem a, a silhfên chhûng zâwk pawh an la a. Nimahsela, a silhfên chhûng zâwk chu ṭhui loh kawr, a nghâwng aṭanga a tlâng thlenga tah a ni. 24 Tin, anni chuan: “Pawt thlêr lovin, a neitu tûr hriat nân ṭhum i vâwr ang u,” an ti a. Chu chu Pathian Lehkha Thu: “Ka silhfênte an insem a, ka kawr atân ṭhum an vâwr a,” tih a thlen famkim theih nân a ni a. Sipaite chuan chûng chu an ti ta ngei a ni.

25 Isua nghaisakna ban* bulah chuan a nu te, a nu unaunu* te; Klopa nupui Mari te leh, Mari Magdalini te an ding a. 26 Tin, Isua’n a nu leh zirtîr a hmangaiha kha a bula ding a hmuh chuan, a nu hnênah: “En teh! I fapa kha!” a ti a. 27 Zirtîr hnênah chuan: “En teh! I nu kha!” a ti bawk a. Chumi hun aṭang chuan zirtîr chuan a inah a hruai ta a.

28 A hnuah, Isua’n a Pa vâna miin ti tûra a tih zawng zawngte a ti zo ta tih a hriat chuan: “Ka tui a hâl e,” a ti a. Chu chu Pathian Lehkha Thu a thlen famkim theih nâna sawi a ni. 29 Chutah chuan bêl pakhat uain thûra khat a awm a. Tichuan, sponge* pakhat chu uain thûrah chiahin husop* tiangah an târ a, a hmui an han dehtîr a. 30 Uain thûr a tem hnuin Isua chuan: “Ti tûra min tih zawng zawng kha ka ti zo ta!” a ti a. Tichuan, a kûn a, a thi ta a.

31 Chu chu Inbuatsaihna nî a nih avângin, Sabbath Nîa ruangte chu nghaisakna bana a awm reng loh nân (chu chu Sabbath ni ropui a ni si a), Judate chuan Pilata hnênah an kête ti tliak a, ruangte chu lâk thlâk an dîl a. 32 Tichuan, sipaite chu lo kalin, Isua bula khenbeh mi pahnihte kê chu an ti tliak a. 33 Nimahsela, Isua bul an lo thlen chuan ani chu a thi tawh tih an hmu a, a kête chu an ti tliak ve lo va. 34 Amaherawhchu, sipaite zînga pakhatin a nâkah feiin a chhun a, chu veleh thisen leh tui a lo chhuak ta nghâl a. 35 Chu chu zirtîr, Isua’n a hmangaiha khân a hmu a, a hriattîr tawh bawk. A thu hriattîr chu a dik a, amah pawhin a thusawi chu a dik tih a hria, nangni pawhin in rin theihna tûrin chûng thute chu a sawi a ni. 36 Chûng thilte chu Pathian Lehkha Thuin: “A ruh pakhat mah tih tliah a ni lo vang,” tia a sawi a famkim theihna tûra thleng a ni. 37 Pathian Lehkha Thu dang pawhin: “An chhuna chu an la en ang,” tih a sawi bawk.

38 Chûng thilte a thlen hnuah chuan, Josefa Arimathai khuaa mi, Isua zirtîr, Judate a hlauh avânga inthup chuan Pilata hnênah Isua ruang lâk a dîl a, Pilata chuan a phalsak a. Tichuan, ani chu lo kalin ruang chu a la thla ta a. 39 Nikodema, a tîra Isua hnêna zâna lo kal kha, thil phut rimtui tak murra leh aloe* chawhpawlh pound* za vêla rit kengin a lo kal bawk a. 40 Tichuan, Isua ruang chu an la a, Judate inphûm dân angin thil rimtuite nên puanin an tuam a. 41 Tin, amah an tih hlumna* hmunah chuan huan a lo awm hlauh mai a, chu huanah chuan tu mah la zalh ngai lohna thlân* thar a awm a. 42 Chu chu Judate Inbuatsaihna nî a nih avâng leh thlân chu a bul lawka awm a nih avângin, chutah chuan Isua ruang chu an zalh ta a.

20 Tin, chawlhkâr khata ni hmasa berah chuan, Mari Magdalini chu zîng hma tak, khua a la thim laiin thlânah* chuan a va kal a, lung chu thlân* aṭanga lum sawn sain a va hmu a. 2 Tichuan, Simon Petera leh zirtîr dang Isua’n a hmangaiha hnênah a lo tlân a, an hnênah: “Thlân aṭangin Lalpa an la bo va, khawiah nge an zalh kan hre lo,” a ti a.

3 Tin, Petera leh zirtîr dang chu thlân lam panin an chhuak a. 4 An pahnih chuan a rualin an tlân a; nimahsela, zirtîr dang chu Petera ai chuan a tlân chak zâwk a, thlân chu a thleng hmasa a. 5 Kûnin a chhûng chu a bih a, puan zai sîn awmte chu a hmu a; nimahsela, a chhûngah a lût lo va. 6 Tin, Simon Petera pawh a hnungah a rawn thleng ve a, ani chu thlânah chuan a lût a. Puan zai sîn awmte chu a hmu a. 7 A lû tuamna puan chu puan dangte zînga awm lovin, zial sain a hrangin a awm a. 8 Tin, zirtîr dang thlân thleng hmasa zâwk pawh chu a lût ve a; tichuan, a hmu a, a ring ta a. 9 Thihna ata a tho leh tûr a ni tih Pathian Lehkha Thu kha an la hre thiam si lo va. 10 Tichuan, zirtîrte chu an inah an haw leh ta a.

11 Mari erawh chu thlân kiang, pâwn lamah chuan ṭap chungin a la ding reng a. Ṭap chung chuan a kûn a, thlân chhûng chu a bih a. 12 Isua ruang zalhnaah chuan vântirhkoh pahnih puan vâra inthuam, pakhat a lu lamah leh pakhat a ke lama ṭhu a va hmu a. 13 Anni chuan a hnênah: “Engvângin nge i ṭah?” an ti a. Mari chuan an hnênah: “Ka Lalpa an la bo va, an zalhna ka hre lo a ni,” a ti a. 14 Chu chu a sawi zawhin a hawi a, Isua ding chu a hmu a; nimahsela, Isua a ni tih a hre lo va. 15 Isua’n a hnênah: “Engvângin nge i ṭah? Tu nge i zawn?” a ti a. Ani chuan huan enkawltu emaw a ti a, a hnênah: “Ka pu, a ruang i la sawn a nih chuan i zalhna min hrilh rawh; tichuan, ka la ang,” a ti a. 16 Isua’n a hnênah: “Mari!” a ti a. Mari chu a hawi a, a hnênah Hebrai ṭawngin: “Rab·bo′ni!” a ti a. (Chu chu, “Zirtîrtu!” tihna a ni.) 17 Isua’n a hnênah: “Mi vuan tawh suh, tûn thlengin Pa hnênah ka la lâwn chho lo a ni. Nimahsela, kal la, ka unaute hnênah, ‘Ka Pa, in Pa, ka Pathian, in Pathian hnênah ka lâwn chho dâwn e,’ a ti e, va ti rawh,” a ti a. 18 Mari Magdalini chu a kal a, zirtîrte hnênah: “Lalpa chu ka hmu ta!” tiin a va hrilh a. Tin, Isua’n a hnêna a thusawite chu a hrilh a.

19 Chumi nî, chawlhkâr khata ni hmasa ber tlai lamah chuan, zirtîrte chuan Judate an hlauh avângin an awmna in kawngkhârte chu an kalh a. Tin, Isua a lo kal a, an zîngah dingin, an hnênah: “In chungah thlamuanna* awm rawh se,” a ti a. 20 Chu thu a sawi zawh chuan, an hnênah a kutte leh a nâk a entîr a. Tin, Lalpa an hmuh chuan zirtîrte chu an lâwm hle a. 21 Isua’n an hnênah: “In chungah thlamuanna* awm rawh se. Pain mi tîr angin kei pawhin ka tirh che u hi,” tiin a sawi leh a. 22 Chumi a sawi zawh chuan anni chu a chhêm a, an hnênah: “Thlarau thianghlim dawng rawh u. 23 Tu sual pawh in ngaihdam chuan ngaihdam an ni ang a; tu sual pawh in ngaihdam loh chuan ngaihdam an ni lo vang,” a ti a.

24 Nimahsela, Sâwm Pahnihte zînga pakhat Phîra tia an koh Thoma chu Isua a lo kal lai chuan an zîngah a awm ve lo va. 25 Tin, zirtîr dangte chuan a hnênah: “Lalpa kan hmu ta!” an ti a. Nimahsela, Thoma chuan an hnênah: “A kuta thîr khenna hnuhmate ka hmuh a, an khenna kuaa ka kutzungṭang rawlh a, a nâka ka zen hma loh chuan ka ring ngai lo vang,” a ti a.

26 Tichuan, ni riat hnuah a zirtîrte chu in chhûngah an awm khâwm leh a, Thoma pawh an hnênah a awm ve a. Kawngkhârte chu inkalh mah se, Isua chu lo lûtin an zîngah a ding a, an hnênah: “In chungah thlamuanna* awm rawh se,” a ti a. 27 Tin, Thoma hnênah chuan: “I kutzungṭangin khawih la, ka kutte hi en rawh, rawn ban la, ka nâk hi zen rawh, ringhlel tawh lovin* ring mai rawh,” a ti a. 28 Thoma’n ani chu chhângin: “Ka Lalpa leh ka Pathian!” a ti a. 29 Isua’n a hnênah: “Min hmuh avângin i ring a ni maw? Hmu lova ringte chu an hlim e,” a ti a.

30 Isua’n he lehkha ziala târ lan loh thil mak* dang tam tak pawh a zirtîrte hmaah a ti tih a chiang hle. 31 Nimahsela, hêngte hi Isua chu Krista, Pathian Fapa a ni tih in rin theihna tûr leh, in rin avânga a hminga nun in neih theihna tûra ziak a ni.

21 Chumi hnuah, Isua chu Tiberia Dîlah zirtîrte hnênah a inlâr leh a. Hetiang kawng hian a inlâr a ni. 2 Chuta awmte chu Simon Petera te, Thoma (Phîra tia koh) te, Galili rama Kana khuaa mi Nathanaela te, Zebedaia fapa te leh, a zirtîr dang pahnihte an ni. 3 Simon Petera chuan an hnênah: “Sangha man tûrin ka kal dâwn,” a ti a. Anni chuan a hnênah: “I rualin kan lo kal ve ang e,” an ti a. Tichuan, an kal chhuak a; nimahsela, chumi zân chuan eng mah an man lo.

4 Khua a lo vâr chuan Isua chu dîl kamah a ding a, zirtîrte erawh chuan Isua a ni tih an hre lo va. 5 Tin, Isua’n an hnênah: “Ṭhiante u, ei tûr eng emaw* in nei lo maw?” a ti a. Anni chuan: “Nei lo!” tiin an chhâng a. 6 Ani chuan an hnênah: “Lawng ding lamah khân lên dêng ula, sangha ṭhenkhat in man ang,” a ti a. Tichuan, an dêng a, sangha a tam êm avângin an hnûk chhuak zo lo va. 7 Tichuan, zirtîr Isua’n a hmangaiha khân Petera hnênah: “Lalpa a nih saw!” a ti a. Tin, Simon Petera’n Lalpa a ni tih a hriat chuan, a kawr a ha a,* saruaka awm* a ni si a; tin, dîlah chuan a zuang thla ta a. 8 Nimahsela, zirtîr dangte chuan sanghaa khat lên hnûk chungin lawng tê chuan an rawn pan a, vaukam aṭanga feet 300 vêl* leka hlaa awm an ni si a.

9 Vaukam an thlen chuan meihawl inchhêm, a chunga sangha leh chhang inhem an hmu a. 10 Isua’n an hnênah: “Tûna in sangha man ṭhenkhat kha rawn la rawh u,” a ti a. 11 Tin, Simon Petera chu lawngah chuan a va chuang a, sangha lian tak tak 153 laia khat lên chu vaukamah chuan a hnûk chhuak a. Tam hle mah se, lên chu a ṭet lo. 12 Isua’n an hnênah: “Lo kal ula, tûkṭhuan* ei rawh u,” a ti a. Zirtîrte zînga tu mahin: “Tu nge i nih?” tiin an zâwt ngam lo. Lalpa a ni tih an hre si a. 13 Isua a lo kal a, chhang chu lain an hnênah a pe a; chutiang bawkin, sangha pawh chu a pe bawk a. 14 Chu chu, Isua thihna ata a thawhleh hnua a zirtîrte hnêna a inlâr vawi thumna a ni.

15 Tûkṭhuan* an ei zawh chuan, Isua’n Simon Petera hnênah: “Simon, Johana fapa, hêngte ai hian min hmangaih zâwk em?” a ti a. Ani chuan a hnênah: “Aw, Lalpa, ka ngaina che tih i hria e,” a ti a. Isua chuan a hnênah: “Ka berâm note châwm rawh,” a ti a. 16 A vawi hnihna atân a hnênah: “Simon, Johana fapa, min hmangaih em?” a ti leh a. Petera chuan: “Aw, Lalpa, ka ngaina che tih i hria e,” tiin a chhâng a. Isua’n a hnênah: “Ka berâm note enkawl rawh,” a ti a. 17 A vawi thumna atân a hnênah: “Simon, Johana fapa, min ngaina em?” a ti a. A vawi thumna atân: “Min ngaina em?” tia a zawh avângin Petera chu a lungngai ta hle a. Tichuan, a hnênah: “Lalpa, engkim i hria a; ka ngaina che tih i hria e,” a ti a. Isua’n a hnênah: “Ka berâm note châwm rawh. 18 Tih tak meuhvin, tih tak meuhvin ka hrilh a che, i naupan lai chuan nangmahin thawmhnaw i ha a, i duhna apiangah i kal ṭhîn. Nimahsela, i upat hunah i kutte i phar ang a, mi dangin thawmhnaw an hâktîr ang che a, i duh lohna hmunah an hruai ang che,” a ti a. 19 Chu chu, engtianga thiin nge Petera’n Pathian a la chawimawi dâwn tih târ lan nâna sawi a ni. Isua’n chu thu a sawi zawh chuan Petera hnênah: “Min zui zêl rawh,” a ti a.

20 Petera chu a hawi a, zanriah an kîl laia Isua âwm nghêng a: “Lalpa, a phatsantu tûr che chu tu nge ni?” tia zâwttu zirtîr, Isua’n a hmangaiha khân a rawn zui a hmu a. 21 Tin, Petera’n ani chu a hmuhin Isua hnênah: “Lalpa, ani chungah hian eng nge thleng ang?” a ti a. 22 Isua’n a hnênah: “Ka lo kal thlenga ani hi awm reng tûra ka duh a nih chuan, i lo buaina tûr eng nge awm? Nang chuan min zui zêl rawh,” a ti a. 23 Tichuan, chu zirtîr chu thi lo tûr angin unaute zîngah thu a lo darh a. Nimahsela, Isua’n a hnênah, ‘A thi lo vang,’ a ti lo va: “Ka lo kal thlenga ani hi awm reng tûra ka duh a nih chuan, chu chuan nang nên inkûngkaihna eng nge a neih?” tiin a sawi zâwk a ni.

24 Chu zirtîr chu hêng thute hriattîrtu leh ziaktu hi a ni a, a thu hriattîr chu a dik a ni tih kan hria.

25 Isua thil tih dang tam tak pawh a la awm a, chûngte chu kim chang taka ziah ni vek sela chuan, lehkha zialte chu khawvêlah hian a len ka ring lo.