CHANCHIN ṬHA LUKA ZIAK

1 Keini pawhin kan rin thil thlengte kha mi tam takin la khâwmin an ziak chhuak a, 2 an thu ziah chu mita hmutute leh Pathian thuchah puangtute hnên aṭanga kan hriat nên khân a inmil a ni. 3 Chuvângin, Theophil zahawm ber, kei pawhin a tîr aṭanga thil zawng zawng dik taka ka chhui avângin, a indawta i hnêna ziah ka tum ta a ni. 4 Ṭawngkama zirtîrna i dawn kha a dikzia kimchang taka i hriat theihna tûrin.

5 Judai ram lal Heroda* dam laiin, Abija pâwla mi puithiam pakhat Zakaria a awm a. A nupui chu Arona thlah* a ni a, a hming chu Elizabeti a ni. 6 An pahnih chuan Pathian mit hmuha mi fel tak an ni a, Jehova* thupêkte leh dân zawng zawngte chu sawisêl bovin an zâwm ṭhîn. 7 Nimahsela, Elizabeti chu a chin avângin fa an nei lo va, an pahnih chuan upa tak an ni tawh bawk.

8 Tin, Zakaria chuan an pâwl rawngbâwl hun a nih avângin, Pathian hmaah puithiam angin rawng a bâwl a, 9 puithiamte tih ṭhin dân angin, ani chu Jehova* hmun thianghlima rimtui hâl tûra a luh hun a lo thleng a. 10 Rimtui hâl chhûng chuan pâwnah mipui tam tak an ṭawngṭai a. 11 Tin, Jehova* vântirhkoh pakhat chu rimtui hâlna maichâm ding lamah dingin, a hnênah a rawn inlâr a. 12 Zakaria’n chu chu a hmuhin, a mangangin a hlau ta hle a. 13 Nimahsela, vântirhkoh chuan a hnênah: “Zakaria, hlau suh, i ngenna kha Pathianin a hria e, i nupui Elizabeti’n fapa a hring ang a, a hmingah Johana i sa tûr a ni. 14 I hlimin, nasa takin i lâwm ang a; a pian hunah chuan mi tam tak an lâwm bawk ang, 15 Jehova* mit hmuhin mi ropui tak a ni dâwn si a. Nimahsela, uain leh zu lam chi rêng rêng a in tûr a ni lo, a pian hma* aṭang rêngin thlarau thianghlimin a khat ang a, 16 Israela thlah tam tak chu an Pathian Jehova* lamah a hawi kîrtîr ang. 17 Tin, pate thinlung an fate lama hawi kîrtîr tûr leh thuâwih lote chu mi felte finna lama hawi kîrtîr tûrtein, Elija neih ang thlarau leh thiltihtheihna* nei a, Jehova* tâna inpeih tûra mite buatsaih tûrin a* hmaah a kal ang,” a ti a.

18 Zakaria chuan vântirhkoh hnênah: “Chu chu engtin nge a nih theih ang? Putar ka ni a, ka nupui pawh a upa tawh bawk si,” a ti a. 19 Vântirhkoh chuan ani chu chhângin: “Pathian hmaa ding ṭhîn, Gabriela ka ni a, nangmah be tûr leh he thu lâwmawm tak hrilh tûr chea tirh ka ni. 20 Nimahsela, ngai rawh! A hun taka thleng famkim tûr ka thusawite hi i rin loh avângin, chûng thilte a thlen hma chuan i ngawi reng ang a, i ṭawng thei lo vang,” a ti a. 21 Chutih lai chuan mipuite chuan Zakaria chu an nghâk reng a, hmun thianghlima a awm rei tâk êm avângin mak an ti hle a. 22 A lo chhuah chuan an hnênah eng thu mah a sawi thei ta lo va; tin, anni chuan hmun thianghlimah inlârna a hmu tih an hre thiam ta a. A ṭawng theih tâk loh avângin anni chu zaizir hlîrin a bia a. 23 Rawngbâwlna thianghlima* a inhmanna nîte a kim chuan a inah a hâw ta a.

24 Ni eng emaw zât hnuah a nupui Elizabeti chu a lo rai ta a, thla nga chhûng inah a inkhung a, ani chuan: 25 “Hei hi Jehova* thil min tihsak a ni, ani chuan min ngaihsakin ka hming chhiatnate a la bo ta,” a ti a.

26 A naupai a thla ruknaah chuan, Pathianin vântirhkoh Gabriela chu Galili rama Nazaret khuaah a tîr a. 27 Davida thlaha mi, Josefa nupui hual, nula thianghlim hnênah a tîr a, chu nula thianghlim hming chu Mari a ni. 28 A va thlen chuan vântirhkoh chuan a hnênah: “Chibai, Pathian duhsakna dawngtu, i hnênah Jehova* a awm e,” a ti a. 29 Nimahsela, vântirhkoh thusawi chuan ani chu a ti mangang ta hle a, vântirhkohvin chibai a bûkna awmzia chu hriatthiam a tum a. 30 Tin, vântirhkoh chuan a hnênah: “Mari, hlau suh, Pathian duhsakna i dawng si a. 31 Ngai teh! I rai ang a, fapa i hring ang a, a hmingah Isua i sa tûr a ni. 32 Tin, ani chu mi ropui tak a la ni ang a, Chungnungbera Fapa tia koh a ni ang. Pathian Jehova* chuan a pa Davida lalṭhutthlêng a pe ang a. 33 Ani chuan Jakoba thlahte chungah chatuanin ro a rêl ang a, a rorêlnain tâwp nî rêng a nei lo vang,”* a ti a.

34 Nimahsela, Mari chuan vântirhkoh hnênah: “Chu chu engtin nge a nih theih ang? Nula thianghlim ka ni si a!” a ti a. 35 Vântirhkoh chuan a hnênah: “Thlarau thianghlim i chungah a lo thleng ang a, Chungnungbera thiltihtheihnain a hliahkhuh ang che. Chuvângin, lo piang tûr chu mi thianghlim, Pathian Fapa tia koh a ni ang. 36 Tin, ngai teh! Mite’n a ching an tih ṭhin, i chhûngkhat Elizabeti khân a tar hnuin fapa a pai a, tûn thla hi a thla rukna a ni tawh. 37 Pathian tân chuan eng mah tih theih loh a awm si lo va,” a ti a. 38 Tin, Mari chuan: “Jehova* bâwihnu ka ni alâwm! I sawi ang ngei chuan ka chungah thleng rawh se,” a ti a. Vântirhkoh chuan a kalsan ta a.

39 A hnu lawkah, Mari chu Judai ram tlâng rama awm khaw pakhatah a zin chhuak ta nghâl a. 40 Tichuan, Zakaria inah lûtin Elizabeti chu chibai a bûk a. 41 Mari chibai bûkna aw a hriat veleh a naupai lai chu a chê a. Tin, Elizabeti chu thlarau thianghlimin a lo khat ta a. 42 Tichuan, aw ring taka auvin: “Hmeichhia zawng zawng zînga malsâwmna dawng nasa ber i ni, i naupai hi Pathianin malsâwm rawh se! 43 Ka Lalpa nu ka hnêna a lo kal hi ka va nihlawh êm! 44 En teh! Chibai min bûk veleh khân, lâwm avângin ka naupai hi a chê asin. 45 Jehova’n* i hnêna a sawi zawng zawngte a thlen famkimtîr vek dâwn tih i rin avângin nang pawh i nihlawh e,” a ti a.

46 Tin, Mari chuan: “Ka nunnain* Jehova* a chawimawi a, 47 ka thlarau pawh mi Chhandamtu Pathian chungah a lâwm êm êm a ni. 48 Ani chuan a bâwihnu dinhmun hniamzia hi a hmu si a. Ngai teh! Tûn aṭang hian chhuan zawng zawngin nihlawh min ti dâwn a ni, 49 Pathian thiltithei taka khân thil ropui tak min tihsak avâng leh a hming pawh a thianghlim avângin. 50 Amah ṭihtute chungah a zahngaihna chu eng lai pawhin a awm si a. 51 A kutin a thiltihtheihzia a lantîr a; an thiltuma an chapozia lantîrtute chu a ti darh ṭhîn. 52 Ani chuan lalṭhutthlêng aṭangin mi thiltitheite chu a paih thla a, mi hnuaihnungte chu a chawisâng ṭhîn; 53 ani chuan rilṭâmte chu thil ṭhatein a ti puar a, mi hausate chu kut ruakin a kal botîr ṭhîn. 54 A chhiahhlawh Israelte ṭanpui tûrin a lo kal a, chutiang chuan a thutiam a hre reng tih a lantîr a ni. 55 Ani chuan Abrahama leh a thlahte* chungah chatuanin a zahngaihna a lantîr tûr thu a tiam a, chu chu kan pi leh pute hnêna a lo sawi kha a ni,” a ti a. 56 Mari chu Elizabeti hnênah thla thum vêl a châm a; tichuan, a in lamah a haw leh ta a.

57 Tin, Elizabeti nau hrin hun chu a lo thleng a; tichuan, fapa a hring ta a. 58 A ṭhenawmte leh a laichînte chuan Jehova’n* a khawngaih* tih an hriatin an lawmpui hle a. 59 Tin, a ni riat nîah nausên serh tan tûrin anni chu an lo kal a, a hmingah a pa hming ang chiah Zakaria sak an tum a. 60 Nimahsela, a nu chuan: “Ni lo ve! Ani hi chu Johana tia sak zâwk tûr a ni,” a ti a. 61 Anni chuan a hnênah: “I laichînte zîngah hetiang hming pu hi tu mah an awm si lo va,” an ti a. 62 Tichuan, a pa chu nausên hming atâna sak a duh zaizirin an zâwt a. 63 Ani chuan a ziahna tûr thil phêk a dîl a: “A hming chu Johana a ni,” tiin a ziak a. An vai chuan mak an ti hle a. 64 Chawplehchilhin a kâ a lo inhawng a, a lei pawh inphelhin Pathian fakin a ṭawng chhuak ta a. 65 Tichuan, an chhehvêla mi zawng zawngte chuan an hlau ta a, chûng thilte chu Judai rama tlâng ram zawng zawngahte chuan an sawi darh a. 66 A hria apiangin chu chu an ngaihtuah a: “He naupang hi eng ang mi tak rawn ni ang maw?” an ti a. Ani chu Jehova’n* a awmpui si a.

67 Tichuan, a pa Zakaria chu thlarau thianghlimin a lo khat a, heti hian hrilh lâwkna thu a sawi a ni: 68 “Israelte Pathian Jehova* chu fakin awm rawh se, ani chuan a mite chu ngaihsakin a chhan chhuak ta si a. 69 A chhiahhlawh Davida chhûngte zîngah chhandamtu* thiltithei tak min pe ta. 70 Hei hi hmân laia a zâwlnei thianghlimte hmanga a lo sawi tawh a thutiam chu a ni. 71 Ani chuan kan hmêlmate leh min hawtu zawng zawngte laka min chhandam a tiam a. 72 Kan pi leh pute hnêna a lo tiam tawh ang khân kan chungah zah a ngai ang a, a thuthlung thianghlim chu a hre reng bawk ang. 73 Min thlahtu Abrahama hnêna a thutiam chu hei hi a ni. 74 Pathianin kan hmêlmate lak aṭanga min chhan chhuah hnuah, hlauhna nei lovin amah chibai min bûktîr ang, 75 kan dam chhûng zawnga a hmaa rinawm tak leh fel taka kan awm theihna tûrin. 76 Nang erawh chu ka fapa, Chungnungbera zâwlnei an ti ang che, Jehova* kawngte buatsaih tûrin a hmaah i kal dâwn si a. 77 An sualte ngaihdamna hmangin a mite chu a chhandam dâwn tih i hriattîr ang. 78 Kan Pathian chuan a khawngaihna avângin chûng zawng zawng chu a ti dâwn a ni. Chu khawngaihna chu vân aṭangin ni chhuak angin kan chungah a êng ang, 79 thima ṭhute leh thihna hlima awmte ên tûr leh remna kawnga kan kê hruai tûrin,” a ti a.

80 Tin, naupang chu tisa lam leh thlarau lamah lo ṭhang lian deuh deuhvin, Israel mite hnêna thu a hrilh hun a thlen hma loh thlalêrah a awm reng a.

2 Tin, chûng lai chuan Kaisara Augusta’n khawvêl puma mite chu hming ziak tûrin thu a pe a. 2 (Chu chu Kurinia, Suria ram awptu a nih laia hming ziah vawi khatna a ni.) 3 Tichuan, mi zawng zawng chu an pianna khua ṭheuhvah hming ziak tûrin an kal a. 4 Tin, Josefa pawh Davida chhûngte leh a thlahte zînga mi a nih avângin, Galili rama Nazaret khua aṭangin Judai rama Davida khua, Bethlehem an tihah chuan a kal a. 5 Hming ziak tûra a kal chuan, nau hring mai tawh tûr a nupui Mari pawh a hruai ve a. 6 Chuta an awm lai chuan a nau hrin a lo hun ta a. 7 Tichuan, a fa hmasa berah mipa a hring a, puanin a tuam a, khualbûka an len ve loh avângin ran chaw pêkna thlêngah a muttîr a.

8 Tin, chumi ram vêkah chuan berâm vêngtute an awm a, zânah an berâm rualte vêngin phûlah an riah chilh a. 9 Thâwklehkhatah, Jehova* vântirhkoh an hmaah a lo ding a; tichuan, Jehova* ropuinain an chhehvêl chu a ên a, an hlau ta êm êm mai a. 10 Vântirhkoh chuan an hnênah: “Hlau suh u, ngai teh u! Mi zawng zawng nasa taka ti lâwmtu tûr chanchin ṭha ka rawn thlen che u a ni. 11 Vawiinah hian, in tân Davida khuaah chhandamtu Lal Krista chu a piang ta. 12 Hei hi amah in hriat theihna tûr a ni: Nausên puana tuam, ran chaw pêkna thlênga mu in hmu ang,” a ti a. 13 Thâwklehkhatah, vântirhkoh bulah chuan vântirhkoh dang tam tak* an lo lang a, Pathian fakin: 14 “Chungnung bera awm Pathian chu ropui takin awm rawh se, a duhsakna dawngtu lei chunga mihringte* zîngah remna awm rawh se,” an ti a.

15 Tin, vântirhkohte’n vâna an chhohsan veleh, berâm vêngtute chuan: “Bethlehem khuaah kalin, Jehova* min hriattîr thil thlengte chu i va en ang u,” an ti a. 16 Tichuan, hmanhmawh takin an kal ta a; Mari, Josefa leh, ran chaw pêkna thlênga mu nausên chu an va hmu a. 17 Chutia an va hmuh hnu chuan, nausên chungchâng vântirhkohvin an hnêna a hrilh chu an sawi ta a. 18 Berâm vêngtute thusawi hretu zawng zawng chuan mak an ti hle a. 19 Nimahsela, Mari chuan chûng thu zawng zawng chu a thinlungah vawng rengin, a awmzia chu ngun takin a chhût a. 20 Tichuan, berâm vêngtute chu Pathianin a hriattîr ang ngeia engkim an hmuha an hriat avângin, Pathian chawimawi leh fak chungin an kîr leh ta a.

21 Ni riat hnu, a serh tan a lo hun chuan, a nu’n a pai hma aṭang tawha vântirhkohvin a hming tûr a lo sawi lâwk tawh angin, a hmingah Isua an sa a.

22 Tin, Mosia Dân anga an inthen thianghlim nî a lo thlen chuan, Jehova* hnêna hlân tûrin Jerusalem khuaah an chhohpui a. 23 Jehova* Dân thua: “Mipa fa piang hmasa ber* chu Jehova* hnênah hlan tûr a ni,” tia ziak ang khân. 24 Tichuan, Jehova* Dânin a sawi angin: “Ṭhuro tuak khat, a nih loh leh pârva no pahnih,” inthawi nân an hlân ta a.

25 Tin, ngai teh u! Jerusalem khuaah chuan mi pakhat Simeona a awm a, ani chu mi fel tak leh Pathian ngaihsak tak a ni a, Pathianin Israelte thlamuanna a pêk hun tûr a nghâk a, a chungah thlarau thianghlim a awm bawk. 26 Chu bâkah, Jehova* mi tirh, Krista a hmuh hma loh chuan a thih loh tûr thu thlarau thianghlim hmangin Pathianin a lo hriattîr tawh a ni. 27 Thlarau hruaiin Simeona chu biak inah chuan a lo kal a, nausên Isua chu Dânin a phût tihsak tûra a nu leh a pain an rawn hruai luh lai chuan, 28 nausên chu a pawm a, Pathian fakin: 29 “Aw, Lal Chungnungber, i sawi ang ngeiin i bâwih hi thlamuang takin i kaltîr dâwn ta, 30 ka mit hian chhandamna rawn thlentu tûr chu a hmu ta si a. 31 Mi zawng zawng hmuh tûra i buatsaih, 32 hnam dang mite tâna thimna la kiangtu tûr êng leh i mi Israelte ropuina tûr chu,” a ti a. 33 Tin, nausên chungchâng Simeona’n a sawi chu a nu leh a pate chuan mak an ti hle a. 34 Simeona’n anni chu malsâwmin, nausên nu Mari hnênah chuan: “Ngai teh! He nausên hi Israel mi tam takte tlûkna leh din chhuah lehna tûr atâna ruat a ni, mite hmuhsitna tuar tûra chhinchhiahna nên 35 (nang pawh Mari, lungngaihna nasa tak i la tuar ang),* mi tam takte thinlunga ngaihtuahnate a lan chhuah theih nân,” a ti a.

36 Tin, zâwlneinu Anni, Asera hnama Phanuela fanu a awm a. Ani chu tar tawh tak a ni a, nula thianghlim a nih laiin pasal a nei a, a pasal nên kum sarih chauh an chêng dûn a ni. 37 Ani chu hmeithai kum 84 mi a ni tawh a. Biak inah a awm reng ṭhîn a, chaw ngheia ngennate thlenin, a chhûn a zânin Pathian a be ṭhîn. 38 Chutih lai chuan Mari leh Josefa te hnênah a lo kal a, Pathian hnênah lâwmthu sawiin, Jerusalem chhanchhuahna nghâktu zawng zawngte hnênah chuan naupang chungchâng chu a sawi a.

39 Tin, Jehova* Dân ang zêla thil zawng zawng an tih zawh hnuin, Galili rama an khua Nazaret-ah an haw leh ta a. 40 Naupang chu lo ṭhang lian zêlin a lo chak deuh deuh va, finnaa khatin Pathian duhsakna a dawng chhunzawm zêl a.

41 A nu leh a pate chu Kalhlên Kût hmang tûrin kum tin Jerusalemah an kal ṭhîn a. 42 Tin, Isua chu kum 12 a tlin chuan, an tih ṭhin dân pângngai angin kût hmang tûrin an han chho va. 43 Kût a zawh chuan an haw a, naupang Isua erawh chu Jerusalemah a la awm reng a; nimahsela, a nu leh a pate chuan chu chu an hre lo va. 44 An ruala zinte bulah a awm emaw an ti a, ni khat an kal hnuah an chhûngkhatte leh an kalpuite zîngah an zawng ṭan a. 45 Nimahsela, an hmu lo va; tichuan, Jerusalemah an lêt leh a, hmun tinah an zawng ta a. 46 Tin, ni thum hnuah, Isua chu biak inah zirtîrtute zînga ṭhu a, an thusawi ngaithla a, zawhnate a lo zâwt lai an va hmu a. 47 A thu ngaithlatu zawng zawngte chuan thil a hriatzia leh a chhânnate chu mak an ti hle a. 48 A nu leh a pate’n an hmuh chuan mak an ti êm êm a, a nu chuan a hnênah: “Ka fapa, engvângin nge mangang taka min siam? I pa nên hian thlaphâng takin kan zawng che asin,” a ti a. 49 Ani erawh chuan an hnênah: “Engati nge min zawn? Ka Pa ina ka awm tûr hi in hre lo vem ni?” a ti a. 50 Nimahsela, an hnêna a thusawi chu an hre thiam lo va.

51 Tichuan, Isua chu a nu leh a pa rualin a chhuk a, Nazaret-ah an haw ta a, an thu âwihin a awm reng a. A nu chuan chûng zawng zawng chu a thinlungah a vawng reng a. 52 Tin, Isua chu lo ṭhang lian zêlin a fing telh telh a, Pathian leh mihringte duhsak a hlawh deuh deuh va.

3 Tiberia Kaisara kum sâwm panga a lal kum, Pontia Pilata Judai ram awptu a nih lai, Heroda* Galili ram rorêltu a nih lai, a unaupa Philipa Ituria leh Trakonitis rama rorêltu a nih lai, Lusania Abilene rama rorêltu a nih lai, 2 puithiam lalte zînga pakhat Anna leh puithiam lalber Kaiapha hun laiin thlalêra awm Zakaria fapa Johana hnênah Pathian thu a lo thleng a.

3 Tichuan, Johana chu Jordan Lui kam ram vêl zawng zawngah chuan a kal a, mite hnênah an simzia târ lan nâna baptisma chang tûrin thu a hril a. 4 Zâwlnei Isaia lehkhabua: “Thlalêra au ri chuan: ‘Jehova* kawng sial ula, a kawngte ti ngîl rawh u! 5 Ruam tin chhûn khah a ni ang a, tlâng tin leh mual tinte râwt hniam a ni ang; kawng kawite tih ngîl a ni ang a, kawng bumbohte tih mâm a ni ang; 6 tin, tisa* zawng zawngin Pathian chhandamna an la hmu ang,’” tih ziak ang khân.

7 Tichuan, a hnêna baptisma chang tûra lo kal mipuite hnênah chuan: “Rûl tûr nei thlahte u, Pathian thinurna tlânsan tûrin tuin nge hrilh che u? 8 In sim tak zet tih in thil tihin lantîr rawh u. ‘Abrahama thlahte kan ni,’ tiin sawi suh u. Ka hrilh a che u, Pathianin hêng lungte aṭang hian Abrahama thlahte a din thei a ni. 9 Thing bul tinah hreipui dah a ni tawh. Tichuan, thing tin rah ṭha chhuah lo apiang chu kih a, meia paih a ni ang,” tiin a sawi a.

10 Tin, mipuite chuan a hnênah: “A nih chuan, eng nge kan tih tâk ang?” tiin an zâwt a. 11 Ani chuan an hnênah: “Kawr pahnih nei chuan, a nei lo hnênah pakhat pe sela, ei tûr nei pawhin a nei lo hnênah sem ve rawh se,” a ti a. 12 Chhiahkhawntute hial pawh baptisma chang tûrin an lo kal a, anni chuan a hnênah: “Zirtîrtu, kan tih tûr chu eng nge ni?” an ti a. 13 Ani chuan an hnênah: “Chhiah bituk zât aia tam phût* suh u,” a ti a. 14 Tin, sipaite pawh a hnênah an lo kal a: “Kan tih tûr chu eng nge ni?” tiin an zâwt a. Ani chuan: “Tu mah hnehchhiah* suh ula, dik lo takin hêk hek suh u; tin, in hlawhah lungawi rawh u,” a ti a.

15 Tin, mite chuan Krista an beisei avângin an vaiin Johana chu: “Krista a ni thei mai ang em?” tiin an ngaihtuah a. 16 Johana chuan chhângin an vaia hnênah: “Kei chuan tuiin ka baptis che u a; nimahsela, kei aia ropui zâwk a lo kal ang. A pheikhawk hrui phelh tlâk pawh ka ni lo. Ani chuan thlarau thianghlim leh meiin a baptis ang che u. 17 Buh sî zah faina* kengin a hruih* chu a zâp fai hliau ang a, buhte chu a buh zêmah khungin, a sîte erawh chu mei mit thei lovah a hâl ral ang,” a ti a.

18 Tichuan, thu dang tam tak sawiin, mite hnênah chanchin ṭha a hril zawm zêl a. 19 Nimahsela, Johana chuan Galili rama rorêltu Heroda chu a unaupa nupui Herodi nupuia a neih avâng leh a thil sual tih zawng zawng avângin a zilh a. 20 Chuvângin, Heroda chuan thil sual dang a ti leh a, Johana chu tân inah a khung ta a ni.

21 Mite chuan baptisma an chang a, Isua pawhin a chang ve a. A ṭawngṭai laiin vân a lo inhawng a, 22 thlarau thianghlim chu ṭhuro pian hmang ang pu-a rawn chhukin a chungah a fu a; tin, vân aṭangin: “Nang hi ka Fapa duh tak, min ti lâwm êm êmtu i ni,” tiin aw a lo chhuak a.

4 Tichuan, Isua chu thlarau thianghlimin a khat a, Jordan Lui aṭangin a lêt leh a, thlalêrah thlarauva hruaiin a awm a. 2 Chutah chuan ni 40 chhûng a awm a. Chûng hun chhûng chuan eng mah a ei loh avângin, a tâwpah a ril a lo ṭâm ta a; tin, Diabola’n ani chu a thlêm a. 3 A hnênah: “Pathian fapa i nih chuan, he lung hi chawa chang tûrin hrilh rawh,” a ti a. 4 Mahse, Isua’n: “‘Mihring hi chaw chauhvin a nung lo vang,’ tih ziak a ni,” tiin a chhâng a.

5 Tin, a hruai chho va, rei lo te chhûngin khawvêl ram zawng zawng a entîr a. 6 Diabola chuan a hnênah: “Hêng zawng zawng chunga thuneihna leh ropuina hi ka pe ang che, ka hnênah pêk a ni tawh si a, ka duh apiang hnênah ka pe bawk ṭhîn. 7 Chuvângin, vawi khat chauh pawh bawkkhupa chibai min bûk chuan, hêng zawng zawng hi i ta a ni vek ang,” a ti a. 8 Isua chuan: “‘I Pathian Jehova* chauh chibai i bûk tûr a ni a, ama rawng chauh i bâwl tûr a ni,’ tih ziak a ni,” tiin a chhâng a.

9 Tin, Jerusalemah a hruai a, biak ina hmun sâng lai berah a dintîr a. A hnênah: “Pathian fapa i nih chuan heta ṭang hian zuang thla rawh. 10 ‘Nangmah ṭanpui tûr leh vênghim tûrin a vântirhkohte thu a pe ang a, 11 lung i chhuih loh nân an kutin an dâwm ang che,’ tih ziak a ni si a,” a ti a. 12 Isua erawh chuan: “‘I Pathian Jehova* i fiah tûr a ni lo,’ tih a ni ve bawk e,” tiin a chhâng a. 13 Tin, Diabola’n kawng tinrênga a thlêm zawh chuan, hun remchâng dang nghâkin a kalsan ta rih a.

14 Tin, Isua chu thlarau thiltihtheihnain Galili ramah a lêt leh a. Chumi ram vêl zawng zawngah chuan a chungchânga thu ṭha tak tak an sawite chu a thang chhuak ta a. 15 Chu bâkah, an inkhâwmna inahte a zirtîr a, ani chu mi zawng zawngin an fak a.

16 Tichuan, a seilenna khua Nazaret-ah a kal a. Sabbath nîa a tih ṭhin dânin inkhâwmna inah a lût a, Pathian Lehkha Thu chhiar tûrin a ding a. 17 Tin, tu emawin zâwlnei Isaia lehkha zial chu a hnênah a pe a. Lehkha zial chu a phelh a, he thuziak hi a hmu a: 18 “Retheite hnêna chanchin ṭha hril tûra hriak mi thih avângin Jehova* thlarau chu ka chungah a awm a, ani chuan salte hnêna chhuah zalen an nih tûr thu hrilh tûr te, mitdel hnêna mit vâr lehna thu sawi tûr te, hnehchhiaha awmte chhuahtîr tûr te leh, 19 tûn hi Jehova’n* mite chunga duhsakna a lantîr hun a nih thu puang tûrtein min tîr a ni,” tih hi. 20 Tichuan, lehkha zial chu a zial ṭha a, amah rawn petu chu pe lêt lehin a ṭhu a; tin, inkhâwmna ina awm zawng zawng chuan amah chu an en ta ṭhup a. 21 Tichuan, an hnênah: “Vawiinah hian Pathian thu ka chhiar tâk kha a thleng famkim ta,” a ti a.

22 Tin, an vaiin ani chu an fak a. Khawngaihna thu a sawite chu mak an ti hle a. Tichuan: “He mi hi Josefa fapa a ni lâwm ni?” an ti a. 23 Chu veleh an hnênah: “He tehkhin thu, ‘Doctor, nangmah inti dam rawh. Kapernaum khuaa thil tam tak i tihte kha kan lo hria a, i seilenna khuaah pawh hian ti ve rawh,’ tih hi ka chungchâng sawi nân in la hmang ngei ang,” a ti a. 24 Tin, ani chuan: “Tih tak meuhvin ka hrilh a che u, zâwlnei tu mah an seilenna khuaa lawm hlawh an awm ngai lo. 25 Thu dik ka hrilh a che u: Elija hun laia kum thum leh thla ruk ruah a sûr loh va, ram puma ṭâm nasa tak a tlâk lai khân, Israel ramah hmeithai tam tak an awm a. 26 Nimahsela, Elija kha chûng hmeichhiate zînga tu hnênah mah tirh a ni lo va. Sidon rama Zarephath khuaa hmeithai hnênah chauh tirh a ni. 27 Chu bâkah, zâwlnei Elisa hun lai khân Israel ramah phâr tam tak an awm a. Nimahsela, Suria mi Naamana chauh lo chu tu mah tih thianghlim* an ni lo,” a ti a. 28 Tichuan, a thusawi hretu inkhâwmna ina awm zawng zawngte chu an thinrim ta hle a. 29 Tin, an tho va, hmanhmawh takin Isua chu khawpui pâwnah an hruai chhuak a, khâma nam thlâk tumin an khaw innghahna khâm kovah chuan an hruai a. 30 Nimahsela, mipui chu a tâwn tlang a, a kal ta zêl a.

31 Tin, Galili rama Kapernaum khuaah a chhuk thla a, Sabbath Nîah mite chu a zirtîr a. 32 Thunei taka thu a sawi avângin a zirtîr dân chu mak an ti hle a. 33 Tin, inkhâwmna inah chuan ramhuaiin a man mi pakhat a awm a, ani chuan ring taka auvin: 34 “Nazaret Isu, nang nên hian eng inzawmna nge kan neih? Min ti boral tûrin i lo kal em ni? Pathian Mi Thianghlima i ni tih chiang takin ka hria e,” a ti a. 35 Nimahsela, Isua chuan: “Ngawi la, a kawchhûng aṭang khân lo chhuak rawh,” tiin a hau va. Tichuan, mite hmuh laia a tih tlûk hnuah, amah ti na lovin ramhuai chu a kawchhûng aṭang chuan a lo chhuak ta a. 36 Tin, an vaiin mak an ti hle a: “A thusawite chuan thil a va ti thei êm! Thuneihna leh thiltihtheihna nên ramhuaite thu a pe a, an lo chhuah hi!” an ti hlawm a. 37 Tichuan, a chanchin chu a chhehvêl ram tinah a thang chhuak ta a.

38 Inkhâwmna in aṭanga a chhuah chuan Simona inah a lût a. Tin, Simona pizawn* chu nasa takin a khua a lo sik a, amah ṭanpui tûrin an ngên a. 39 Tichuan, a bulah a ding a, a khawsik chu a ti dam a, Simona pizawn chu a tho ta nghâl a, anni chu ei tûr a buatsaihsak a.

40 Ni tlâk dâwnah chuan, natna chi hrang hrang neite chu a hnênah an rawn hruai a. An chungah a kut a nghat ṭheuh va, a ti dam ta vek a. 41 Ramhuaite pawh: “Pathian Fapa i ni,” tia auvin, mi tam tak kawchhûng aṭangin an lo chhuak a. Nimahsela, anni chu a hau va, Krista a ni tih an hriat avângin an ṭawng a phal lo va.

42 Tichuan, khua a vâr veleh hmun fianrialah a kal a. Tin, mipuite chuan amah an zawng a, a awmnaah chuan an lo kal a. An hnêna awm reng tûrin an ngên a. 43 Nimahsela, ani chuan an hnênah: “Khaw dangahte pawh Pathian Ram chanchin ṭha ka hril tûr a ni, chumi avâng chuan tirh ka ni si a,” a ti a. 44 Tichuan, Judai rama inkhâwmna inahte thu a hril zêl a.

5 Ṭum khat chu, Pathian Thu ngaithla tûra a hnên lam pana mipuite an innêk huai huai laiin, Isua chu Gennesaret dîl* kamah a ding a. 2 Chutah chuan lawng pahnih a hmu a; nimahsela, sangha mantute chu an lawng aṭanga chhukin an lênte an lo su a. 3 Lawng pakhat, Simona ta zâwkah chuan a chuang a, vaukam aṭanga kar sawn deuh tûrin a hrilh a. Tichuan, a ṭhu a, lawng aṭang chuan mipuite chu a zirtîr ṭan ta a. 4 Thu a sawi zawh chuan Simona hnênah: “Dîl thûk lam pan la, sangha man tûrin i lên dêng rawh,” a ti a. 5 Simona erawh chuan: “Zirtîrtu, zankhuain rim takin kan dêng a, eng mah kan man lo. Nimahsela, i thuin ka dêng leh ang e,” a ti a. 6 An han den chuan sangha tam tak an man ta a. Tichuan, an lênte chu a ṭet ṭan ta mai a. 7 Tin, lawng danga an sangha manpuite chu anmahni ṭanpui tûrin an hui a. An lo kal a, lawng chu a pahniha pil lek lek khawpin an chhûngkhat ve ve a. 8 Chu chu a hmuhin, Simon Petera chu Isua hmaah a ṭhingṭhi a, a hnênah: “Lalpa, i bula awm tlâk pawh ka ni lo. Mi sual ka nih hi,” a ti a. 9 Sangha tam tak an man avângin Simona leh a bula awmte chuan mak an ti hle si a. 10 Chutiang bawkin, a sangha manpui Zebedaia fapa, Jakoba leh Johana te pawh chuan mak an ti hle a. Isua erawh chuan Simona hnênah: “Hlau suh, tûn aṭang chuan mihring i man tawh ang,” a ti a. 11 Tichuan, lawngte chu vaukam lamah an kar phei a. Engkim kalsanin ani chu an zui ta a.

12 Ṭum khat chu, khaw pakhata Isua a awm laiin, chu khuaah chuan phârin a bawm khah vek mi pakhat a awm a, Isua a hmuh chuan bawkkhupin a hnênah: “Lalpa, i duh chuan mi ti thianghlim thei e,” tiin a ngên a. 13 Tin, Isua chuan a ban a, a khawih a: “Ka duh e, lo thianghlim tawh ang che,” a ti a. A phâr chu a lo dam ta nghâl a. 14 Tin, chu pa hnênah chuan tu mah hrilh lo tûrin thu a pe a: “Mahse, kal la, puithiam hnênah va inentîr la, i dam tawh tih an hriat theihna tûrin Mosia dânin kaihhruaina a pêk angin thilpêk chu va hlân ang che,” tiin a hrilh a. 15 Mahse, Isua chanchin chu a lo thang zêl a, a thu ngaithla tûr leh an dam lohnate tih damsak ni tûrin mipui tam tak an lo kal khâwm a. 16 Chuti chung pawhin, ṭawngṭai tûrin hmun fianrialah a kal ṭhîn a.

17 Ni khat chu Isua’n mite a zirtîr laiin, Galili leh Judai ram khaw tin leh Jerusalem aṭanga lo kal Pharisaite leh dân zirtîrtute chutah chuan an ṭhu ve a. Mite ti dam tûrin Jehova’n* a thiltihtheihna a pe a. 18 Tin, ngai teh u! Mi ṭhenkhatin zeng pakhat, a mutna chawpin an rawn zâwn a. Anni chuan Isua hmaa dah tûrin zâwn luh an tum a. 19 Nimahsela, mipui an tam êm avângin an zâwn lût thei lo va, in chungah an lâwn chho va, in chung chu ṭhiatin, Isua hmaa mipui zîngah chuan a mutna chawpin muangchângin an thlâk thla ta a. 20 An rinna a hmuhin Isua chuan: “I sualte chu ngaihdam a ni tawh e,” a ti a. 21 Tichuan, dân hre mite leh Pharisaite chuan: “Pathian sawichhetu hi tu nge maw a nih le? Pathian chauh lo chu sualte ngaidam thei tu nge awm?” tiin an ngaihtuah a. 22 Nimahsela, Isua’n an thil ngaihtuahte chu a lo hria a, an hnênah: “In thinlungah eng nge in ngaihtuah? 23 ‘I sualte chu ngaihdam a ni tawh e,’ tia sawi nge, ‘Tho la, kal rawh,’ tia sawi hi awlsam zâwk? 24 Eng pawh ni se, mihring Fapa hian leia sual ngaihdam theihna a nei tih in hriat ka duh a ni,” a ti a. Zeng hnênah chuan: “Ka hrilh a che, tho la, i mutna kha la la, haw tawh rawh,” tiin a hrilh a. 25 Chu veleh, an hmaah chuan a tho ta nghâl a, a mutna chu lain, Pathian chawimawi chung zêlin a haw ta a. 26 Tichuan, an vaiin mak an ti hle a, Pathian an chawimawi ta a. Mak an tih êm avângin: “Vawiinah hian thil ropui tak kan hmu a ni,” an ti a.

27 Chumi hnuah chuan a kal chhuak a. Chhiah pêkna hmuna lo ṭhu chhiahkhawntu Levia* chu a hmu a, a hnênah: “Min zui rawh,” a ti a. 28 Tichuan, a tho va, engkim kalsanin a zui ta nghâl a. 29 Levia chuan a inah Isua tân ruai ropui tak a buatsaih a. Chhiahkhawntute leh mi dang tam takin an kîlpui a. 30 Tichuan, Pharisaite leh an dân hre mite chu a zirtîrte chungah phunnawiin, an hnênah: “Engvângin nge chhiahkhawntute leh mi sualte bulah in ei a, in in?” an ti a. 31 Isua’n anni chu chhângin: “Dam lote’n doctor an mamawh a, mi hrisêlte erawh chuan an mamawh lo. 32 Mi felte tâna lo kal ka ni lo va, mi sualte simtîr tûr zâwka lo kal ka ni,” a ti a.

33 Anni chuan a hnênah: “Johana zirtîrte chu chaw ngheiin ṭhahnemngai takin an ṭawngṭai ṭhîn a; chutiang bawkin, Pharisai zirtîrte pawhin an ti ṭhîn. Nimahsela, i zirtîrte erawh chuan an eiin an in zêl mai si,” an ti a. 34 Isua’n an hnênah: “Mopa* a awm chhûng chuan mopa ṭhiante chu chaw in ngheitîr thei dâwn em ni? 35 Nimahsela, an hnên ata mopa an hruai bo nîte a lo la thleng ngei ang a, chûng nîahte chuan chaw an la nghei ang,” a ti a.

36 Tehkhin thu dang pawh an hnênah a sawi a: “Tu mahin puan thar hlep thlain, puan hluiah an bel ngai lo. Chutianga an tih chuan, puan thar chuan a hlui chu a ti thlêr ang a, puan hlui leh a thar pawh chu a inmil lo vang. 37 Chu bâkah, tu man savun peng* hluiah uain thar an thun ngai lo. Chutianga an thun chuan uain thar chuan savun peng chu a ti puak ang a, uainte chu a bua ang a, savun peng chu a chhe mai ang. 38 Nimahsela, uain thar chu savun peng tharah thun zâwk tûr a ni. 39 Tu man uain hlui an in zawhin a thar an in duh ngai lo, ‘A hlui nge nge a tui,’ an ti ṭhîn si a,” a ti a.

6 Tin, sabbath nîah buh hmunte a pal tlang a, a zirtîrte chuan buh vuite chu an thliak a, an kuta nuai faiin an ei a. 2 Tichuan, Pharisai ṭhenkhatin: “Engvângin nge Sabbath Nîa tih thiang lo in tih?” an ti a. 3 Isua erawh chuan: “A mite nêna an rilṭâm laia Davida thil tih kha in chhiar ngai lo vem ni? 4 Pathian ina a luh dân leh, amah leh a mite tâna ei thian loh, puithiamte chauhvin an ei thian chhangdah puithiam lalberin a pêk a, a ei a, a mite pawh a pêk ve thu kha in chhiar ngai lo vem ni?” tiin a chhâng a. 5 Tichuan, an hnênah: “Mihring Fapa hi Sabbath Lal a ni,” a ti a.

6 Sabbath ni dangah chuan inkhâwmna inah lûtin a zirtîr a. Chutah chuan mi pakhat a kut ding lam zeng a awm a. 7 Dân hre mite leh Pharisaite chuan Isua chu kawng eng emawti taka an hêk theih nân, Sabbath Nîa a tih dam dâwn leh dâwn loh ngun takin an lo enthla a. 8 Ani erawh chuan an ngaihtuahnate a hria a; tichuan, kut zeng hnênah chuan: “Tho la, a laiah hian ding rawh,” a ti a. Tin, a tho va, chutah chuan a ding ta a. 9 Tin, Isua’n an hnênah: “Nangniho hi ka zâwt a che u, Sabbath Nîa thil ṭha tih nge thiang a, thil ṭha lo tih? Nunna chhanhim nge thiang a, tih boral?” a ti a. 10 Anniho chu a enkual hnuah chu pa hnênah chuan: “I kut phar rawh,” a ti a. A phar a, a kut chu a lo dam leh ta a. 11 Nimahsela, anni chu thinurin an puak keh lek lek a, Isua chunga an tih tûr sawiin an inrâwn khâwm a.

12 Ni khat chu tlângah ṭawngṭai tûrin a kal a, Pathian hnênah zankhuain a ṭawngṭai a. 13 A tûkah chuan a zirtîrte chu a hnênah a ko va, an zîng aṭangin 12 a thlang chhuak a, tirhkohte tih hming a vuah a. 14 Anni chu Simona, Petera tia a hming a phuahsak te, a unaupa Andria te, Jakoba te, Johana te, Philipa te, Bartholomaia te, 15 Matthaia te, Thoma te, Alphaia fapa Jakoba te, “mi ṭhahnemngai tak,” tia koh Simona te, 16 Jakoba fapa Juda te leh, phatsantu lo ni ta Juda Iskariota te an ni.

17 Tichuan, an rualin a chhuk a, hmun zâwlah a ding a. Chutah chuan a zirtîr tam tak an awm a. A thusawi ngaithla tûr leh an natnate tih damsak duh Judai ram zawng zawng leh Jerusalem khua aṭang te, tuifinriat kama awm Tura leh Sidon ram aṭangtea lo kal mipui tam tak an awm bawk. 18 Ramhuai sawisakte hial pawh an lo dam ta a. 19 Mite’n amah an deh apiangin, amah aṭanga thiltihtheihna chhuakin an natnate a ti dam ṭhîn a. Chuvângin, mi zawng zawngin deh an tum a.

20 Tichuan, a hawi chho va, a zirtîrte chu enin heti hian a sawi ṭan ta a:

“Nangni retheite u, in hlim e, Pathian Ram in ta a ni si a.

21 “Nangni tûna rilṭâmte u, in hlim e, in la tlai dâwn si a.

“Nangni tûna ṭapte u, in hlim e, in la nui dâwn si a.

22 “Mihring Fapa avânga mite’n an huat che u a, an hnâwl che u a, an sawisêl che u a, mi sual anga in hming an sawichhiat* hun apiangin hlim rawh u. 23 Chûng thilte chu an pi leh pute’n zâwlneite chunga an lo tih ṭhin tho kha a ni. Chumi nîah chuan hlim ula, lâwmin zuang rawh u, vânah lâwmman ropui tak in nei si a.

24 “Nimahsela, nangni hausate u, in chunga thleng tûr chu a va râpthlâk dâwn êm! Nuam in chen tûr zawng zawng chu in chên zo tawh si a.

25 “Nangni tûna tlaite u, in chunga thleng tûr chu a va râpthlâk dâwn êm! In ril a la ṭâm dâwn si a.

“Nangni tûna nuite u, in chunga thleng tûr chu a va râpthlâk dâwn êm! Lungngaiin in la ṭap dâwn si a.

26 “Mi zawng zawngin an fak hunah che u, in chunga thil thleng tûr chu a va râpthlâk dâwn êm! Chu chu an pi leh pute’n zâwlnei derte chunga an tih ṭhin dân a ni si a.

27 “Nimahsela, nangni ka thusawi ngaithlatute u, ka hrilh a che u: In hmêlmate chu hmangaih zawm zêl ula, nangmahni hawtute chungah thil ṭha ti zêl ula, 28 ânchhia lawhtu che u chu malsâwm zêl ula, hmusittu che u chu ṭawngṭaisak zawm zêl ang che u. 29 In biang lehlama bêngtu hnênah chuan a lehlam pawh dawh rawh u, in kawrchung lâksaktu che u hnênah chuan in kawr pawh ui suh ang che u. 30 A dîltu apiang che u chu pe ula, in thil lâksaktu che u chu dîl leh tawh suh u.

31 “Miin in chunga an tiha in duh tûr ang chiah chu mi chungah pawh ti ve rawh u.

32 “Nangmahni hmangaihtute chauh in hmangaih hian, fak in phû bîkna eng nge awm? Mi sualte pawhin anmahni hmangaihtute chu an hmangaih si a. 33 In chunga thil ṭha titute chungah chauh thil ṭha in tih hian, fak in phû bîkna eng nge awm? Mi sualte pawhin chutiang chuan an ti ṭhîn asin. 34 Tin, rûl leh thei tûr che u a in beiseite hnênah chauh in pûktîr* hian, fak in phû bîkna eng nge awm? Mi sualte pawhin mi sual vêkte hnênah an pûktîr ang zât chiah hmuh lêt leh inbeiseiin an pûktîr ṭhîn asin. 35 Nimahsela, nangni erawh chuan in hmêlmate hmangaih zawm zêlin thil ṭha ti zêl ula, a lêt leh eng mah beisei lovin pûktîr zêl ang che u. Tichuan, Pathian hnên aṭangin lâwmman ropui tak in dawng ang a, Chungnungbera fate* in ni ang. Ani chuan lâwm nachâng hre lote leh mi sualte chungah pawh ngil a nei si a. 36 In Pa chu mi khawngaih* thei tak a nih angin, nangni pawh mi khawngaih thei tak ni zêl rawh u.

37 “Chu bâkah, sawisêl tawh suh u; chutichuan, sawisêlin in awm lo vang. Mi dangte thiam loh chantîr tawh suh u; chutichuan, thiam loh chantîrin in awm lo vang. Ngaidam zêl rawh u; chutichuan, ngaihdam in ni ang. 38 Pe zêl rawh u; chutichuan, pêkin in awm ang. Duhsak taka teh a, beng muk a, sawi muk a, liam zawih zawihin in mal chungah an pe ang che u. In tehna ngai bawkin an tehsak dâwn si che u a,” a ti a.

39 Tichuan, anni chu tehkhin thu a hrilh bawk a: “Mitdelin mitdel a hruai thei dâwn em ni? Hruai ta se, khuarkhurumah an tla dûn lo vang maw? 40 Zirlai chu a zirtîrtu chungah a awm lo; nimahsela, ṭha taka zirtîrna dawng tawh apiang chu a zirtîrtu ang a ni ang. 41 Engvângin nge mahni mita thing tlâwn* awm chu hmu si lovin, i unau mita hmawlh tê awm chu i va hmuh ni? 42 Nangmah ngeiin i mita thing tlâwn awm hmu si lovin, engtin nge i unau hnênah, ‘I mita hmawlh tê awm kha mi lâk chhuahtîr rawh,’ tia i sawi theih ang? Mi vervêk! I mita thing tlâwn awm kha la chhuak hmasa phawt rawh; tichuan, i unau mita hmawlh tê awm chu la chhuak tûrin fiah takin i hmu thei ang.

43 “Thing ṭhain rah chhia a chhuah thei lo va, thing chhia lahin rah ṭha a chhuah thei hek lo. 44 Thing tin a rah aṭangin a hriat a ni. Thinghlîngnei kûngah theipui an lo ngai lo, hnimhlîngneiah pawh grêp an lo ngai hek lo. 45 Mi ṭha chuan a thinlung ro bâwm ṭha aṭangin thil ṭhate a phawrh chhuak a; mi sual erawh chuan a ro bâwm ṭha lo aṭangin thil ṭha lote a phawrh chhuak ṭhîn; thinlunga khat liam chu kâin a sawi ṭhîn si a.

46 “A nih leh, engvângin nge ka thusawite zâwm si lo va, ‘Lalpa! Lalpa!’ tia min koh? 47 Tu pawh ka hnêna lo kal a, ka thusawite hria a, zâwm chu eng ang mi nge a nih ka hrilh ang che u: 48 Ani chu in satu, thûk taka lai a, lungpui chunga a lungphûm remtu ang chu a ni. Tin, tui a lo lian a, chu in chu a han nuai chuan ṭha taka sak a nih avângin a nghîng lo. 49 Amaherawhchu, ka thusawite hriaa zâwm lotu chu, lungphûm rem lova leia in satu ang chu a ni. Lui tui lianin a han nuai chuan, in chu a tlu chhe ta mai a, nasa takin a sawp chhe ta a ni,” a ti a.

7 Mite hnêna a sawi tûr a sawi zawh chuan Kapernaum khuaah a lût a. 2 Sipai za hotu bâwih, a pûin a ngainat êm êm chu nasa taka dam lovin a thi lek lek a. 3 Sipai za hotuin Isua chanchin a lo hriat chuan lo kal a, a bâwih tih damsak tûra ngên tûrin Juda upa ṭhenkhat a hnênah a tîr a. 4 Isua bul an va thlen chuan nasa taka ngênin: “A ngenna i tihsak hi a phû a ni, 5 kan hnam hi a hmangaihin kan inkhâwmna in pawh hi ama min saksak a ni si a,” an ti a. 6 Tin, Isua chu an rualin a kal ta a. Nimahsela, in a thlen dâwn hnaihin sipai za hotu chuan a hnênah a ṭhiante tîrin: “Ka pu, lo kal buai duh suh, ka in chhûng i luhna tlâk a ni lo ve. 7 Chuvângin, i hnêna lo kal tlâkah pawh ka inngai lo a ni. Amaherawhchu, thu chauh pawh sawi la, ka chhiahhlawh hi a dam mai ang. 8 Kei pawh mi thuhnuaia awm ve tho ka ni a, ka hnuaiah sipaite an awm a, pakhat hnênah, ‘Kal rawh!’ ka tih chuan a kal a, mi dang hnênah, ‘Lo kal rawh!’ ka tih chuan a lo kal a, ka bâwih hnênah, ‘Hei hi ti rawh!’ ka tih chuan a ti ṭhîn,” tiin a sawitîr a. 9 Isua’n chûng thute a hriat chuan, sipai za hotu chu mak a ti hle a, amah zuitu mipui lam chu hawiin: “Ka hrilh a che u, Israelte zîngah pawh hetiang khawpa rinna nasa nei hi ka hmu lo,” a ti a. 10 Tin, a mi tirhte ina an va lêt leh chuan bâwih chu dam ṭha takin an va hmu a.

11 Chumi hnu lawkah, Nain khua an tihah chuan a kal a, a zirtîrte leh mipui tam tak a rualin an kal ve a. 12 Khawpui kawngkhâr bul a thlen chuan, ngai teh! Mitthi an rawn zâwn chhuak a, a nu fapa neih chhun a ni. A nu chu hmeithai a ni a, khaw chhûnga mi tam takin an zui a. 13 Lalpa’n hmeithai chu a hmuhin a khawngaih ta êm êm a, a hnênah: “Ṭap tawh suh,” a ti a. 14 Tin, a va pan a, mitthi zâwnna* chu a khawih a, a zâwntute chu an ding a. Tichuan: “Tlangvâl, thu ka pe a che: Tho rawh!” a ti a. 15 Mitthi chu ṭhu chhuakin a ṭawng ta a; tichuan, Isua’n a nu hnênah a pe a. 16 Tin, an zain an hlau ta a, Pathian chawimawiin: “Kan zîngah zâwlnei ropui tak a lo chhuak ta,” an ti a, “Pathianin a mite a ngaihsak leh ta,” an ti bawk a. 17 A thil tih chanchin chu Judai ram leh a chhehvêl ram zawng zawngah a thang chhuak ta a.

18 Tichuan, Johana zirtîrte’n chûng thu zawng zawng chu Johana an hrilh a. 19 Johana chuan a zirtîr pahnih a ko va, anni chu Lalpa hnêna: “Lo Kal Tûra chu i ni em? Nge ni a, mi dang kan la beisei dâwn?” tia zâwt tûrin a tîr a. 20 Tin, a mi tirhte Isua hnên an lo thlen chuan: “Baptistu Johana’n, ‘Lo Kal Tûra chu i ni em? Nge ni a, mi dang kan la beisei dâwn?’ tia zâwt tûr chein min tîr a ni,” an ti a. 21 Chutih lai chuan Isua’n dam lo te, natna khirh tak tak nei te leh, ramhuaiin a mante tam tak a ti dam a, mitdel tam takte mit a tih vârsak bawk a. 22 Tin, anni chu chhângin: “Kal ula, Johana chu in thil hmuh leh hriatte hi va hrilh rawh u: Mitdelte mit a lo vâr ta, kebaite kêin an kal ta, phârte tih thianghlim an ni ta, bengngawngte beng a lo vâr ta, mitthite kaihthawh an nih bâkah, mi retheite hnênah pawh chanchin ṭha hrilh a ni ta. 23 Ka chungchânga rinhlelhna nei lo* chu a hlim e,” a ti a.

24 Johana mi tirhte an kal hnu chuan, Isua’n mipuite hnênah Johana chungchâng chu a sawi ṭan ta a: “Eng en tûrin nge thlalêrah in kal chhuah? Phairuang* thli chhêm nghîn en tûrin em ni? 25 A nih leh, eng en tûrin nge in kal chhuah? Thawmhnaw man to inbel en tûrin em ni? Chûng thawmhnaw man to inbel a, nuamsa taka khawsate chu lal inahte asin an awm ṭhin. 26 A nih chuan, eng en tûr chiahin nge in kal chhuah? Zâwlnei en tûrin em ni? Ni e, ka hrilh a che u, Johana chu zâwlnei a ni a; nimahsela, zâwlnei dang zawng zawng aiin a ropui zâwk a ni. 27 Ani chu: ‘Ngai teh u! Ka chanchin kengtu chu i hmaah ka tîr ang a, ani chuan i kawng a sial ang,’ tia a chanchin an ziaha kha a ni. 28 Ka hrilh a che u, hmeichhe hrin tawh zîngah Johana aia ropui zâwk tu mah an awm lo; nimahsela, Pathian Rama mi tê ber pawh ani aiin a ropui zâwk a ni,” a ti a. 29 (Chhiahkhawntute leh mi zawng zawngin chu chu an hriatin, Johana baptisma an lo chan tawh avângin Pathian felzia an puang chhuak ta a. 30 Nimahsela, Pharisaite leh Dân hre takte chuan Johana baptisma an chan ve loh avângin, an hnêna Pathian pêk kaihhruainate chu an hnâwl a ni.)

31 “A nih chuan, he chhuan hi tute nên nge ka tehkhin ang? Eng ang mi nge an nih? 32 Anni chu naupang bazâra ṭhu a: ‘Phênglâwng kan tumsak che u a, in lâm si lo va; lungngaiin kan ṭap a, in ṭap ve si lo,’ tia inau tawnte ang chu an ni. 33 Chutiang bawkin, Baptistu Johana a lo kal a, chhang a ei lo va, uaiin pawh a in lo va; nimahsela, nangni’n: ‘Ramhuai a zâwl a ni,’ in ti a. 34 Mihring Fapa a lo kal a, a eiin a in a; nimahsela, nangni’n: ‘En teh u! Chaw leh uain heh tak, chhiahkhawntute leh mi sualte ṭhian saw!’ in ti leh bawk si. 35 Mahse, finna chu a rah aṭangin a lang chhuak ṭhîn,” a ti a.

36 Tin, Pharisaite zînga pakhatin chaw eiah a sâwm a. Chuvângin, Pharisai inah chuan lûtin dawhkân a kîl a. 37 Ngai teh! Chumi khuaa hmeichhe sual tia hriat pakhatin, Pharisai inah chaw a ei tih a hriat chuan alabasta ûmin hriak rimtui a rawn keng a. 38 A ke bul a hnung lamah chuan awmin a ṭap a, a kête chu a mittuiin a far huh a, a samin a hru a. Tin, a kête chu a fâwp ngawih ngawih a, hriak rimtui chu a leih a. 39 Chumi a hmuh chuan, amah sâwmtu Pharisai chuan a rilruin: “He mi hi zâwlnei a nih tak zet chuan, amah khawihtu hmeichhia hi tu nge a nih a, eng ang mi nge a nih hriat âwm tak, mi sual a ni si a,” a ti a. 40 Nimahsela, Isua’n a hnênah: “Simon, thil hrilh tûr che ka nei,” a ti a. Ani chuan: “Zirtîrtu, min hrilh ta che!” a ti a.

41 “Mi pahnihin pawisa pûktîrtu pakhat lei an bâ a, pakhat chuan denarii* 500 a bâ a, a dang chuan 50 a ba thung a. 42 A rulhna tûr eng mah an neih loh avângin an pahnih chuan a ngaidam ve ve a. Chutichuan, an pahnihah tuin nge ani chu hmangaih zâwk ang?” a ti a. 43 Simona chuan: “A ngaihdam tam zâwka chuan a nih ka ring,” tiin a chhâng a. Isua’n a hnênah: “I ti dik e,” a ti a. 44 Hmeichhe lam chu hawiin, Simona hnênah chuan: “He hmeichhia hi i hmu em? I ina ka rawn luh khân, ka ke silna tûr tui min pe lo va; nimahsela, he hmeichhia hi chuan a mittuiin ka kête a ti huh a, a samin a hru a ni. 45 Nangin min fâwp lo va, he hmeichhia erawh hi chuan ka rawn luh tirh aṭangin bâng lovin ka kête a la fâwp ngawih ngawih a ni. 46 Nangin ka lûah hriak i leih lo va, he hmeichhia erawh hi chuan ka kêah hriak rimtui a leih a ni. 47 Chuvângin, ka hrilh a che, a sualnate chu tam* hle mah se, a hmangaih êm avângin ngaihdamin a awm ta. Amaherawhchu, tlêm tê chauh an ngaihdamsaka chuan, tlêm tê chauhvin a hmangaih ṭhîn,” a ti a. 48 Tin, hmeichhe hnênah chuan: “I sualte chu ngaihdam a ni ta,” a ti a. 49 A dawhkân kîlpuite chuan: “Sualte hial pawh ngaidamtu hi tu nge maw a nih le?” an ti a. 50 Nimahsela, Isua’n hmeichhe hnênah chuan: “I rinnain a chhandam che a ni, thlamuang takin kal rawh,” a ti a.

8 A hnu lawkah, Isua chuan thu hril leh Pathian Ram chanchin ṭha puang chungin khaw lian leh khaw tête a fang zêl a. A hnênah Sâwm Pahnihte pawh an awm a, 2 hmeichhe ṭhenkhat ramhuai lak aṭanga chhuah zalen tâkte leh dam lo tih dam tâkte pawh an tel bawk a: A kawchhûng aṭanga ramhuai pasarih lo chhuak, Magdalini an tih Mari te, 3 Heroda in enkawltu Chuza nupui Joani te, Susani te leh, an thil neiha an rawngbâwlsaktute chu.

4 Khaw tin aṭanga a hnêna lo kalte leh mipui tam tak an lo pung khâwm a; tichuan, tehkhin thu hmangin a zirtîr a: 5 “Lo neitu pakhat a buh chî theh tûrin a feh a. A theh laiin a ṭhen kawngsîrah a tla a, miin an rap a, chunglêng savate’n an rawn ei zo ta a. 6 A ṭhen lung hmun lei panah a tla a, a ṭo hnuah a hnâwn loh avângin a ro leh ta mai a. 7 A ṭhen hnimhlîngnei zîngah a tla a, an ṭo rualpui hlîngte chuan a dîp ral ta a. 8 Nimahsela, a ṭhen chu lei ṭhaah a tla a, an lo ṭo hnuin a lêt 100-tein rah an chhuah a,” a ti a. Tin, chûng thute a sawi zawh chuan: “Beng nei tawh phawt chuan hre rawh se,” tiin ring takin a sawi a.

9 Tichuan, a zirtîrte’n chu tehkhin thu awmzia chu an zâwt a. 10 Ani chuan: “Pathian Ram thurûk thianghlim chu in tân zawng hriat phal a ni a; nimahsela, mi dang tân chuan tehkhin thu mai a ni; en mah sela, an hmuh lohna tûr leh ngaithla mah sela, a awmzia an hriat lohna tûrin. 11 Tehkhin thu awmzia chu hei hi a ni: Buh chî chu Pathian thu a ni a. 12 Kawng sîra tlate chu thu hre tawhte an ni a; mahse, an rin loh va, chhandam an nih lohna tûrin Diabola a lo kal a, an thinlung aṭangin thu chu a lâksak ṭhîn. 13 Lung hmun lei pana tlate chu thu an hriat veleha lâwm taka pawmtute chu an ni; nimahsela, zung an kaih lo. Rei lo te chhûng an ring a; mahse, fiahna an tawhin an bânsan mai ṭhîn. 14 Hlîng zînga tlate chu thu hre tawhte an ni; nimahsela, nuna lungkhamna te, hausakna te leh, nawmsaknate chuan a dîp ral a, an puitling ta ṭhîn lo a ni. 15 Lei ṭhaa mite erawh chu hêng mite hi an ni, thinlung ṭha tak pu-a an ngaihthlâk hnua vawng reng a, chhel taka rah chhuah ṭhînte hi.

16 “Tu mahin khâwnvâr an chhit hnuin bêlin an khuh ngai lo, khum hnuaiah pawh an dah ngai hek lo, ina lo lût apiangin a êng an hmuh theihna tûrin a dahna hmunah an dah zâwk ṭhîn. 17 Puan chhuah loh tûra thuhrûk eng mah a awm lo va, fîmkhur taka thup pawh hriat chhuah loh tûr leh lang chhuak lo tûr pakhat mah a awm hek lo. 18 Chuvângin, in ngaihthlâk dânah fîmkhur rawh u, tu pawh a nei apiang chu pêk belh an ni ang a; nimahsela, tu pawh a nei lo apiang chu neia an inhriat chhun pawh lâksak an ni ang,” a ti a.

19 Tin, a nu leh a unaute a hnênah an lo kal a; nimahsela, mipui avângin a bul hnai an thleng thei lo va. 20 Tin, a hnênah: “Nangmah hmu duhin i nu leh i unaute pâwnah an ding reng asin,” tiin an rawn hrilh a. 21 Ani chuan: “Hêng Pathian thu hriaa zâwmte hi ka nu leh ka unaute an ni,” tiin anni chu a chhâng a.

22 Ni khat chu a zirtîrte nên lawngah an chuang a, an hnênah: “Dîl râl lehlamah sâwn i kai ang u,” a ti a. Lawng chuan an kal ta a. 23 Nimahsela, an kal lai chuan ani chu a lo muhîl a. Thâwklehkhatah, dîlah chuan thlipui na tak a lo tleh a, an lawng chu tuiin a khat dâwn ta mai a, dinhmun hlauhawm takah an ding a. 24 Tichuan, Isua chu an va kai tho va, a hnênah: “Zirtîrtu, Zirtîrtu, kan boral tak ngial dâwn e!” an ti a. Tin, a tho va, thlî leh tuifâwn nasa tak chu a hau va; tichuan, a bâng a, a reh ta ṭhuap mai a. 25 Ani chuan an hnênah: “Khawiah nge in rinna a awm?” a ti a. Nimahsela, anni chuan an hlauvin mak an ti hle a: “He mi hi tu nge maw a nih le? Thlî leh tuite hial pawh thu a pe a, a thu an âwih hi!” an ti hlawm a.

26 Tin, Galili râl lehlama awm Gerasin ram vaukam chu an thleng a. 27 Isua khawmuala a chhuah chuan, khuaa mi ramhuaiin a man pakhatin ani chu a rawn tâwk a. Hun rei tak chhûng thawmhnaw ha lovin a awm tawh a, inah awm lovin thlânmualahte a awm zâwk a ni. 28 Isua a hmuh veleh ṭapin a hmaah a bawkkhup a: “Isu, Pathian Chungnungbera Fapa, nang leh kei hian eng inzawmna nge kan neih? Ka ngên a che, min sawisa lul suh,” tiin ring takin a au va. 29 (Isua’n chu pa kawchhûng aṭang chuan ramhuai chu chhuak tûrin thu a lo pe tawh si a. Ramhuai chuan vawi tam tak a man tawh a, ani chu khaidiata thlungin kawl an buntîr ṭhîn a, an vêng reng ṭhîn; nimahsela, an phuarnate chu ti chatin, ramhuai chuan hmun fianrialahte a hruai ṭhîn.) 30 Isua’n ani chu: “Tu nge i hming?” tiin a zâwt a. A kawchhûnga ramhuai tam tak an luh avângin, ani chuan: “Legion-a,”* a ti a. 31 Tichuan, leilâwta* kal tûra thu pe lo tûrin nasa takin an ngên a. 32 Tin, tlângah chuan vawk rual an tla a, anni chuan vawk kawchhûnga luh phalsak tûrin an ngên a; tichuan, a phalsak ta a. 33 Ramhuaite chu, chu pa kawchhûng aṭang chuan an lo chhuak a, vawk kawchhûngah chuan an lût a. Tin, vawk rualte chu dîl kam âwih pang lam panin chak takin an tlân a, dîlah chuan an tla hlum ta a. 34 Nimahsela, a vulhtute’n thil thleng chu an hmuhin an tlân a, khawpuiah leh a chhehvêlahte chuan an va sawi a.

35 Tin, mipuite chu thil thleng en tûr chuan an kal chhuak a, Isua hnên an lo thleng a. Ramhuai tam takin an chhuahsan tâka kha thawmhnaw inbel leh rilru pângngai tak puin Isua ke bula a ṭhu an rawn hmu a; tin, an hlau ta hle a. 36 Thil thleng hmutute chuan an hnênah ramhuaiin a man pa tih dam a nih dân chu an lo hrilh a. 37 Tichuan, Gerasene ram chhehvêla mi tam tak chuan an hlauh êm avângin, Isua chu an hnên aṭanga kal bo tûrin an ngên a. Tin, Isua chu kal chhuak tûrin lawngah a chuang ta a. 38 Nimahsela, ramhuaite’n an chhuahsan tâk pa khân a hnêna awm zêl a ngên chiam a, Isua erawh chuan a phal lo va, a hnênah: 39 “I inah haw la, Pathianin thil a tih sak che hi mite hnênah va hrilh rawh,” a ti a. Tichuan, a kal ta a, Isua’n a tâna a tih sakte chu khawpui chhûng zawng zawngah a tlângaupui ta a.

40 Isua a lo lêt leh chuan, amah lo nghâk rengtu mipuite chuan ṭha takin an lo lâwm a. 41 Nimahsela, ngai teh! Inkhâwmna ina hotu Jaira an tih chu a lo kal a. Isua ke bulah bawkkhupin a ina kal tûrin a ngên a, 42 a fanu neih chhun kum 12 mi vêl chu a thi lek lek si a.

Isua a kal laiin mipuite chuan an nêk huai huai a. 43 Chutah chuan, hmeichhe pakhat kum 12 lai thi pûta dam lo a awm a, ani chu tu man an ti dam thei lo. 44 Hnung lam aṭanga panin, Isua kawrfual hmâwr chu a dek a; tichuan, chawplehchilhin a thi pût chu a reh ta nghâl a. 45 Tin, Isua’n: “Tu nge mi dek?” a ti a. An deh loh thu an vaia an sawi chuan Petera’n: “Zirtîrtu, mipuiin an hual vêl che a, an nêk huai huai che alâwm,” a ti a. 46 Mahse, Isua chuan: “Tu emawin mi dek a ni, keimah aṭangin thiltihtheihna a chhuak tih ka hria,” a ti a. 47 Hmeichhia chuan a inthup thei dâwn lo tih a hriatin, khûr chunga lo kalin Isua hmaah chuan a ṭhingṭhi a. Tichuan, Isua a deh chhan leh chawplehchilha a lo dam tâk dân chu mi zawng zawng hmaah chuan a puang ta a. 48 Nimahsela, Isua’n a hnênah: “Ka fanu, i rinnain a ti dam che a ni. Thlamuang takin kal rawh,” a ti a.

49 A la ṭawng lai mêkin, Jaira in aṭang chuan mi pakhat a lo kal a: “I fanu a thi ta, zirtîrtu hi ti buai duh tawh suh,” a ti a. 50 Isua’n chu thu a hriat chuan Jaira hnênah: “Hlau suh, ring mai rawh; tichuan, a nung leh ang,” a ti a. 51 In a va thlen chuan Petera, Johana, Jakoba leh, hmeichhe naupang nu leh pate chauh lo chu tu mah a ruala luh ve a phal lo va. 52 Mite chuan naupang chu an ṭah a, an âwm an chûm a. Ani erawh chuan: “Ṭap tawh suh u, naupang hi a thi lo va, a muhîl a ni zâwk e,” a ti a. 53 Chu veleh, naupang chu a thi tawh tih an hriat avângin Isua chu deusawh takin an nuih a. 54 Nimahsela, naupang kut chu vuanin: “Bawihte, tho rawh!” a ti a. 55 Tichuan, a lo nung leh a, a tho ta nghâl a; tin, Isua chuan ei tûr eng emaw pe tûrin thu a pe a. 56 A nu leh pate chu an hlim hle a, ani erawh chuan thil thleng chu tu mah hrilh lo tûrin a ti tlat a.

9 Tichuan, Sâwm Pahnihte chu a ko khâwm a, ramhuai zawng zawngte chunga thiltihtheihna leh thuneihna a pe a, natnate tih dam theihna a pe bawk a. 2 Tin, anni chu Pathian Ram chanchin hril tûr leh dam lote ti dam tûrin a tîr chhuak a. 3 An hnênah: “In zin chhuahnaah tiang te, iptê te, chhang te, pawisate* keng suh u, kawr pahnih* keng hek suh u. 4 Nimahsela, khawi inah pawh in luhna apiangah, chu khua in chhuahsan hma loh zawng chutah chuan awm reng ang che u. 5 Tin, khawi hmunah pawh mite’n an dawnsawn duh loh che u chuan, chu khua aṭang chuan chhuak ula, vaukhân an ni tawh tih hriattîr nân in kephaha vaivut chu thing thla ang che u,” a ti a. 6 Tichuan, an kal chhuak a, chanchin ṭha hrilin khaw tin an fang a, hmun tinah dam lote an ti dam bawk a.

7 Tin, Lal Heroda’n* thil thleng zawng zawng chu a lo hria a; mi ṭhenkhatin, “Johana kha thihna ata a lo tho leh a ni,” tia an sawi avângin a rilru a buai hle a. 8 Mi dangte erawh chuan, “Elija a rawn inlâr a ni,” an ti a, mi dang lehte chuan, “Hmân laia zâwlneite zînga pakhat a rawn tho leh a ni,” an ti bawk a. 9 Heroda chuan: “Johana chu a lû ka tan tawh kha. A nih chuan, hetianga a chungchâng ka hriata hi tu nge ni?” a ti a. Tichuan, amah chu hmuh a tum ta a.

10 Tin, tirhkohte an rawn lêt leh chuan Isua hnênah an thil tih zawng zawng an hrilh a. Chu veleh, anni chu hruaiin Bethsaida khua an tihah chuan a kal hranpui ta a. 11 Nimahsela, mipuiin chu chu an hriatin ani chu an zui a. Tin, Isua’n mipuite chu ṭha takin a lo lâwm a, Pathian Ram chanchin hrilhin tih dam ngai apiangte chu a ti dam zêl a. 12 Tin, tlai lam a lo nih chuan Sâwm Pahnihte chu lo kalin a hnênah: “Hmun fianrial taka awm kan ni si a; chuvângin, mipuite hi riahna tûr leh ei tûr an hmuh theih nân kan chhehvêl khuaahte kaltîr rawh,” an ti a. 13 Nimahsela, Isua’n an hnênah: “Nangmahni’n ei tûr pe rawh u,” a ti a. Anni erawh chuan: “Keimahni ngei kal a, ei tûr kan lei a nih loh chuan, hêng mi zawng zawngte tân hian chhangpêr panga leh sangha pahnih chauh lo chu, thil dang eng mah kan nei lo,” an ti a. 14 Patling ringawt pawh 5,000 vêl lai an awm si a. Nimahsela, Isua’n a zirtîrte hnênah: “A pâwl pâwlin 50 vêl zêlin ṭhuttîr rawh u,” a ti a. 15 Chutiang chuan an ti a, an ṭhuttîr ta vek a. 16 Tichuan, chhangpêr panga leh sangha pahnih chu a la a, vân lam hawiin a ṭawngṭai a.* A phel a, mipuite hnêna sem tûrin zirtîrte chu a pe ta a. 17 Tin, an vaiin an ei a, an puar ta hlawm a, a bâng nawi an la khâwm a, bâwmrâng 12 lai a ni.

18 A hnuah, amah chauhva a ṭawngṭai laiin zirtîrte chu a hnênah an lo kal a, Isua’n anni chu: “Mipuite’n tu nge a ni min tih?” tiin a zâwt a. 19 Anni chuan: “‘Baptistu Johana a ni,’ an ti che a, mi dangte chuan, ‘Elija a ni,’ an ti che a, mi dang lehte chuan, ‘Hmân laia zâwlneite zînga pakhat a lo tho leh a ni,’ an ti che,” tiin an chhâng a. 20 Tichuan, an hnênah: “A nih leh, nangni’n tu nge a ni min tih?” a ti a. Tin, Petera’n: “Pathian mi tirh, Krista chu i ni,” tiin a chhâng a. 21 Tin, chu thu chu tu mah hrilh lo tûrin anniho chu uluk takin a chah a. 22 Ani chuan: “Mihring Fapa chuan hrehawm tam tak a tuar ang a, upa te, puithiam lal te leh, dân hre mite’n ani chu hnâwlin an ti hlum ang a, ni thum nîah kaihthawhin a awm ang,” a ti a.

23 Tichuan, mi zawng zawng hnênah heti hian a sawi a: “Tu pawhin mi zui a duh chuan mahni tâna nung tawh lovin, nî tin a nghaisakna ban* puin mi zui reng rawh se. 24 Tu pawh a nun chhanhim tum apiangin a chân ang a; nimahsela, tu pawh keimah avânga a nun chân apiangin a chhanhim ang. 25 A nih leh, miin khawvêl hi a pumin nei se, mahni inti chhia emaw, a nun chân emaw si sela, a tân eng hlâwkna nge awm ang? 26 Tu pawh keimah leh ka thute zahpui apiang chu mihring Fapain ama ropuina te, a Pa ropuina te leh, vântirhkoh thianghlimte ropuina nêna a lo kal hunah chu mi chu a zahpui ve ang. 27 Nimahsela, tih tak meuhvin ka hrilh a che u, heta ding ṭhenkhat hi Pathian Ram an hmuh thlenga thi hauh lo tûr an awm,” a ti a.

28 Tin, chûng thute a sawi aṭanga a ni riatna vêlah Petera, Johana leh, Jakoba te hruaiin ṭawngṭai tûrin tlângah a lâwn a. 29 A ṭawngṭai lai chuan a hmêl lan dân a lo danglam a, a lo vâr ta sur mai a. 30 Tin, ngai teh! Ani chu mi pahnihin an bia a; chu mite chu Mosia leh Elija an ni. 31 Anni chu ropuinaa inthuamin an inlâr a, Jerusalema thleng famkim tûr Isua kal chhuah dân tûr chungchâng an sawi a. 32 Tin, Petera, Jakoba leh, Johana te chu an muhîl a; nimahsela, an han harh chuan Isua ropuizia leh a bula mi pahnih ding chu an hmu a. 33 Chûng mite’n Isua an kalsan dâwn lai chuan Petera’n Isua hnênah: “Zirtîrtu, heta awm hi kan tân a ṭha e. Chuvângin, bûktê pathum i sa ang u, i tân pakhat, Mosia tân pakhat, Elija tân pakhat,” a ti a. Petera chuan eng nge a sawi pawh a hre lo. 34 Nimahsela, chûng thute a sawi lai chuan chhûm a lo zîng a, anni chu a rawn hliah a; tichuan, an hlau ta hle a. 35 Tin, chhûm aṭang chuan: “Hei hi ka Fapa, ka thlana chu a ni. A thusawi ngaithla rawh u,” tiin aw a lo chhuak a. 36 Aw a reh hnu chuan, Isua chauh chu an hmu ta a. Anni chu an ngawi reng a, an thil hmuhte chu hun eng emawti chhûng tu hnênah mah an hrilh lo.

37 Tin, a tûka tlâng aṭanga an chhuk chuan mipui tam takin ani chu an lo hmuak a. 38 Ngai teh! Mipui zîng aṭang chuan pa pakhat hi rawn au chhuakin: “Zirtîrtu, ka fapa hi ṭanpui* tûrin ka ngên a che, ka fa neih chhun a ni si a. 39 Ngai teh! Ramhuaiin a man ṭhîn a, a au chhuak thut ṭhîn, a kâ aṭanga chil phuan tla zawih zawih khawpin a ti khûr ṭhîn a, nasa taka a sawisak hnuah chauh a chhuahsan ṭâwk ṭhîn. 40 I zirtîrte hnênah hnawt chhuak tûrin ka ngên a; nimahsela, an thei si lo,” a ti a. 41 Isua chuan: “Chhuan rinna nei lo leh suaksual takte u, engtia rei nge in zîngah ka awm ang a, ka dawh ang che u? I fapa chu hetah hian rawn hruai rawh,” a ti a. 42 Tin, a rawn pan lai mêk pawhin ramhuai chuan leiah ti tluin a ti khûr chiam a. Nimahsela, Isua’n ramhuai chu hauvin naupang chu a ti dam a, a pa hnênah a pe kîr leh a. 43 Tichuan, an vaiin Pathian thiltihtheihna ropui tak chu mak an ti hle a.

An vaia a thil tihte mak an tih êm êm lai chuan Isua’n a zirtîrte hnênah: 44 “Ngun takin ngaithla ula, hêng thute hi hre reng ang che u, mihring Fapa hi phatsan a ni ang a, a hmêlmate kutah pêk a ni dâwn si a,” a ti a. 45 Nimahsela, anni chuan a thusawi awmzia chu an hre thiam lo va. An hriatthiam theih lohna tûrin an lakah thup a ni, zawh lah an zâwt fiah ngam bawk si lo va.

46 Tin, an zînga ropui ber chungchângah an inkârah inhnialna a lo chhuak a. 47 Isua’n an ngaihtuahnate chu a hria a, naupang tê kaiin a bulah a dintîr a. 48 An hnênah: “Tu pawh ka hming avânga he naupang tê lâwm apiang chu kei mi lâwm a ni; tin, tu pawh kei mi lâwm chu mi Tîrtu lâwm a ni. In zînga tê ber anga awm hi a ni ropui ni,” a ti a.

49 Johana’n: “Zirtîrtu, tu emaw i hminga ramhuaite hnawt chhuak kan hmu a, kan zînga mi a nih loh avângin chutianga ti lo tûr chuan kan khap asin,” a ti a. 50 Isua erawh chuan a hnênah: “Khap duh tawh suh u, tu pawh nangmahni dodâl lotu che u chu in lama ṭang a ni si a,” a ti a.

51 Tin, Isua vâna lâk chhoh a hun dâwn hnaihah chuan, Jerusalema kal a tum tlat a. 52 Tichuan, a hmaah chanchin kengtute a tîr a. Tin, anni chu an kal a, a tâna thil lo buatsaih lâwk tûrin Samari mite khuaah an lût a. 53 Nimahsela, Jerusalem khuaa kal a tum tlat* avângin anni chuan an lo lâwm lo va. 54 Zirtîr Jakoba leh Johana’n chu chu an hmuhin: “Lalpa, hêngho kâng ral vek tûr hian vân aṭangin mei ko thla ila i duh em?” an ti a. 55 Nimahsela, lehhawiin anni chu a hau va. 56 Tichuan, khaw dangah an kal ta a.

57 Tin, kawnga an kal lai chuan mi pakhatin a hnênah: “I kalna apiangah ka zui ang che,” a ti a. 58 Isua erawh chuan a hnênah: “Sihalte’n kua an nei a, chunglêng savate pawhin bu an nei a, mihring Fapa erawh hi chuan lu nghahna tûr a nei lo,” a ti a. 59 Tichuan, mi dang hnênah: “Min zui rawh,” a ti a. Ani chuan: “Lalpa, ka pa a thih thlenga a bula awm tûrin min kaltîr hmasa phawt rawh;* tichuan, ka vui liam zawhah ka zui ang che,” a ti a. 60 Nimahsela, a hnênah: “Mitthite’n* an mitthite chu vui rawh se, nang erawh chu kal la, Pathian Ram chanchin hi va puang darh rawh,” a ti a. 61 Tin, mi dang leh chuan: “Lalpa, ka zui ang che; nimahsela, ka chhûngte min thlahtîr hmasa phawt rawh,” a ti a. 62 Isua’n a hnênah: “Tu pawh lei lehnaa a kut nghat a, hnung lama thil awmte entu chu Pathian Ram mi ni tlâk a ni lo,” a ti a.

10 Tin, chumi hnuah chuan Lalpa’n mi dang 70 a ruat a, a kalna tûr khaw tinah leh hmun tinah, a hmaah pahnih zêlin a tîr chhuak a. 2 Tichuan, an hnênah: “Buh seng tûr a tam hle a; nimahsela, a sengtute an tlêm hle. Chuvângin, buh Neitupa hnênah chuan buh sengtu tûrte tîr chhuak tûrin ngên rawh u. 3 Kal rawh u! Chinghne zînga berâm tirh angin ka tirh chhuah che u hi. 4 Pawisa ip te, iptê te, pheikhawkte keng suh ula, kalkawngah tu mah chibai bûk* suh u. 5 In luhna in apiangah: ‘He inah hian thlamuanna* awm rawh se,’ tiin sawi hmasa ang che u. 6 Chutah chuan, thlamuanna ngainatu* a awm chuan, in thlamuanna chu a chungah a awm ang a. Thlamuanna ngainatu a awm loh erawh chuan, in hnênah a lo lêt leh ang. 7 Thlamuanna ngainatu awmna inah chuan châm reng ula, an pêk apiang che u chu eiin in ang che u, hnathawktu chu hlawh hmu tlâk a ni si a. In hrang hrangah thleng lâwr suh ang che u.

8 “Tin, khua in luhna apiangah an lo lawm che u chuan, an chhawp apiang che u chu ei ula, 9 chuta dam lote chu ti dam ula, an hnênah: ‘Pathian Ram a hnai ta!’ tiin hrilh ang che u. 10 Nimahsela, khua in luhna apiangah an lo lawm loh che u chuan, an kawtthlêrahte kal chhuak ula, an hnênah: 11 ‘In khuaa vaivut, kan kephaha kai pawh nangmahni vaukhân nân kan tât fai e. Nimahsela, hei hi hre rawh u, Pathian Ram chu a lo hnai ta!’ tiin sawi ang che u. 12 Ka hrilh a che u, chumi nîah chuan Sodom khaw tawrh aiin chu khaw tawrh tûr chu a nasa zâwk ang.

13 “Korazin leh Bethsaida khuate u, in chunga thleng tûr chu a va râpthlâk dâwn êm! Nangmahnia thil mak tihte kha Tura leh Sidon khaw chunga tih ni sela chuan, saiip puan sina vuta ṭhuin an sim daih tawh ang. 14 Nimahsela, rorêlnaah chuan Tura leh Sidon khaw tawrh aiin in tawrh tûr chu a nasa zâwk ang. 15 Nang pawh Kapernaum, vân thlengin chawimawi i ni dâwn em ni? Thlân* thlengin i chhuk zâwk ang!

16 “Tu pawh nangmahni ngaithlatu chuan kei mi ngaithla a ni. Tu pawh a hnâwltu che u chuan kei pawh mi hnâwl a ni. Chu mai a ni lo, tu pawh kei mi hnâwltu chuan mi Tîrtu pawh a hnâwl a ni,” a ti a.

17 Tichuan, 70-te chu lâwm takin an lo lêt leh a: “Lalpa, i hming avângin ramhuaite pawh kan thu thuin an awm asin,” an ti a. 18 Chu veleh, ani chuan an hnênah: “Ṭêk anga Setana vân aṭanga a lo tla kha ka hmu asin. 19 Ngai teh u! Rûlte leh khawmualkaikuangte rah beh theihna leh, hmêlma thiltihtheihna zawng zawng chunga thuneihna ka pe a che u; chuvângin, eng mahin a ti na hauh lo vang che u. 20 Nimahsela, ramhuaite in thu thua an awm avângin lâwm suh u, vâna in hming ziak a nih avângin lâwm zâwk rawh u,” a ti a. 21 Chutih lai tak chuan, Isua chu thlarau thianghlima lo khatin, a lâwm ta êm êm a: “Ka Pa, lei leh vân Lalpa, hêngte hi mi fing leh mi thiamte lakah fîmkhur takin i thup a, naupang tê anga inngaitlâwmte hnêna i puan chhuah avângin, mi zawng zawng hmaah ka fak a che. Aw ka Pa, chu chu i duh dân a ni rêng si a. 22 Ka Pain engkim mi kawltîr tawh, Pa tlukin tu man Fapa an hre lo va, Fapa tlukin tu man Pa an hre hek lo; Fapain Pa nihna dik tak a hrilhate chauh lo chuan,” a ti a.

23 Tichuan, a zirtîrte nên chauhva an awm laiin an hnênah: “In thil hmuh ang hmutute chu an hlim e. 24 Ka hrilh a che u, zâwlnei tam tak leh lal tam takin in thil hmuhte hi hmuh an châk ṭhîn a; nimahsela, an hmu si lo, in thil hriatte hi hriat an châk ṭhîn a; nimahsela, an hre si lo,” a ti a.

25 Tin, ngai teh! Dân hre tak mi pakhat a ding a, Isua fiah nân: “Zirtîrtu, chatuan nunna ka neih theih nân eng nge ka tih ngai?” tiin a zâwt a. 26 Isua’n a hnênah: “Dân lehkhabuah eng nge inziak? Chutah chuan eng nge i chhiar ṭhin?” a ti a. 27 Ani chuan: “‘I Pathian Jehova* chu i thinlung zawng zawngin, i nunna* zawng zawngin, i chakna zawng zawngin, i rilru zawng zawngin i hmangaih tûr a ni,’ tih leh, ‘Nangmah i inhmangaih angin i vêngte pawh i hmangaih tûr a ni,’ tih hi,” tiin a chhâng a. 28 Isua’n a hnênah: “I chhâng dik e; chutiang chuan ti reng la, nunna i hmu ang,” a ti a.

29 Nimahsela, chu pa chuan a felzia lantîr tumin Isua hnênah: “Ka vêngte chu tute nge ni?” tiin a zâwt a. 30 Isua’n ani chu chhângin: “Mi pakhat Jerusalem khua aṭangin Jeriko khaw lam panin a kal a, kawngah suamhmangte a tâwk a, anni chuan a thawmhnawte hlihsakin an vaw hrep a, thi lek lekin an kalsan a. 31 Tin, chu kawngah chuan puithiam pakhat a zuk kal hlauh va; nimahsela, chu pa chu a hmuh veleh kawng sîr lehlamah a hêl ta mai a. 32 Chutiang bawkin, chu hmunah chuan Levia chi pakhat a lo thleng a, ani chu a hmuhin kawng sîr lehlamah a hêl ve leh ta mai a. 33 Nimahsela, Samari mi pakhat khual zinin chu hmun chu a lo thleng a, ani chu a hmuhin a khawngaih ta êm êm a. 34 Tichuan, a va pan a, a hliamahte chuan hriak leh uain a leih a, a tuamsak a. Tichuan, a sabengtung chungah chuantîrin khualbûkah a hruai a, a enkawl ta a. 35 A tûkah chuan denarii* pahnih a phawrh a, khualbûk vêngtu chu pein a hnênah: ‘Lo enkawl la, hemi bâka i sênso chu ka rawn kîr leh hunah ka rûl leh ang che,’ a ti a. 36 Chûng mi pathumte zîngah chuan, suamhmangte tâwktu vêngte chu tu ber nge nia i rin?” a ti a. 37 Ani chuan: “Khawngaihna* nei taka amah ṭanpuitu chu,” a ti a. Tichuan, Isua’n a hnênah: “Kal la, chutiang chuan va ti ve rawh,” a ti a.

38 Tin, an kal zêl a, khaw pakhatah a lût a. Chutah chuan, hmeichhe pakhat Marthi chuan a inah a lo mikhual a. 39 Ani chuan unaunu Mari a nei a, Mari chuan Lalpa ke bulah ṭhuin a thusawi a ngaithla a. 40 Marthi erawh chu ei rawng bâwlin a buai hle a. Tichuan, Isua hnênah lo kalin: “Lalpa, ka unaunuin hêng thilte keimah chauhva ti tûra min ring hi pawi i ti lo vem ni? Lo kala min pui tûrin hrilh rawh,” a ti a. 41 Lalpa’n ani chu chhângin: “Marthi, Marthi, thil tam tak ngaihtuahin i buai a nih kha. 42 Kan mamawh chu tlêm tê chauh a ni, thil chi khat chauh pawh a tâwk e. Mari’n chan ṭha* a thlang a, chu chu lâksak tûr a ni lo ve,” a ti a.

11 Tin, Isua chu khawi hmunah emaw a ṭawngṭai a, a ṭawngṭai zawh chuan a zirtîrte zînga pakhatin a hnênah: “Lalpa, Johana’n a zirtîrte ṭawngṭai dân a zirtîr ang khân min zirtîr ve rawh,” a ti a.

2 Tichuan, an hnênah: “In ṭawngṭai apiangin heti hian sawi ang che u: ‘Kan Pa, i hming tih thianghlim ni rawh se.* I Ram lo thleng rawh se. 3 Nî tin kan ei khawpin chaw min pe ang che. 4 Kan sualte min ngaidam ang che, keini pawhin kan lei batu* apiangte kan ngaidam ṭhîn si a; thlêmnaah min hruai lût suh ang che,’” a ti a.

5 Tin, ani chuan an hnênah: “In zînga pakhatin ṭhian nei ta ang ula, zan laiah a hnênah va kalin, ‘Ṭhiana, chhangpêr pathum mi pûktîr rawh, 6 ka ṭhian pakhat zinin mi rawn tlawh a, ei tûr chhawp tûr eng mah ka nei si lo,’ ti ang sela. 7 A ṭhian chuan in chhûng aṭangin: ‘Min ti buai suh. Kawngkhâr kalh a ni tawh a, ka fate pawh khumah ka bulah an mu tawh. Thovin eng mah ka pe thei lo che,’ tiin lo chhâng sela. 8 Ka hrilh a che u, a ṭhian a nih avângin thovin eng mah va pe lo mah sela, a dîl ngut ngut avângin a tho vang a, a mamawh apiang a pe ang. 9 Chuvângin, ka hrilh a che u, dîl zawm zêl rawh u; tichuan, pêk in ni ang; zawng zawm zêl rawh u; tichuan, in hmu ang; kik zawm zêl rawh u; tichuan, hawnsak in ni ang. 10 A dîl apiangte chuan an dawng ang a, a zawng apiangte chuan an hmu ang a, a kik apiangte chu hawnsak an ni ang. 11 A nih leh, nangni paho zînga tu emaw hi a fapain sangha dîl sela, tuin nge sangha aiah rûl pe ang che u? 12 A nih loh leh, artui dîl sela, tuin nge khawmualkaikuang pe ang che u? 13 Nangni mi sualte mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe nasa lehzual dâwn êm!” a ti a.

14 A hnuah, Isua’n ramhuai ṭawng thei lo a hnawt chhuak a. Ramhuaiin a chhuahsan hnuah, ṭawng thei lova chu a lo ṭawng ta a, mipui chuan mak an ti hle a. 15 Nimahsela, an zînga ṭhenkhat chuan: “Ramhuaite lal Beelzebula* avângin ramhuaite a hnawt chhuak a nih hi!” an ti a. 16 Tin, mi dangte chuan amah fiah nân, vân aṭanga chhinchhiahna hmuhtîr tûrin an phût a. 17 Ani chuan an ngaihtuahnate a lo hria a, an hnênah: “Eng ram pawh mahni indo apiang chu an tlu chhe ṭhîn a, khawi chhûngkua pawh mahni indo apiang chu a keh darh ṭhîn. 18 Chutiang bawkin, Setana pawh mahni a indo chuan, engtin nge a lalram a din chhuah ang? Nangni lahin Beelzebula avânga ramhuaite hnawt chhuak angin min sawi si a. 19 Beelzebula avânga ramhuaite hnawt chhuak ka nih chuan, in zirtîrte’n tu thiltihtheihnain nge ramhuaite an hnawh chhuah? Chuvângin, in zirtîrte ngeiin in thusawi dik lohzia hi an la hai lang ang. 20 Nimahsela, Pathian kutzungṭang avânga ramhuaite hnawt chhuak ka nih chuan, in hriat loh hlânin Pathian Ram a lo thleng tihna a ni ang. 21 Mi chakin râlthuam famkima a in a vên chuan a thil neihte chu a him reng ṭhîn. 22 Nimahsela, amah aia chak zâwkin a rawn beiha a hneh chuan, a rinchhan a râlthuam zawng zawng chu lâksakin, a thil lâksakte chu a sem darh ṭhîn. 23 Tu pawh ka lama ṭang lo chuan mi do a ni; tin, tu pawh min lâk khâwmpui lo chuan a ti darh a ni.

24 “Mi pakhat kawchhûng aṭanga lo chhuak ramhuai chu awmna tûr hmun dang zawngin thlalêrah a vâk kual a; nimahsela, pakhat mah a hmu lo va. Tichuan, ‘Ka chhuahsan tâka hnênah khân ka lêt leh mai teh ang,’ a ti a. 25 A va lêt leh chuan, chu pa chu phiah fai leh cheimawi ang maiin a va hmu a. 26 Tin, a kal chhuak a, amah aia sual zâwk ramhuai dang pasarih a rawn hruai a, chu pa kawchhûngah chuan an lût ta a; tichuan, chu pa dinhmun chu a hma aiin a chhe lehzual a ni,” a ti a.

27 Tin, chûng thute a sawi lai chuan, mipui zîng aṭangin hmeichhe pakhat a lo au chhuak a, a hnênah: “Nangmah hringtunu leh a hnutêa châwmtu che chu a va hlim dâwn êm!” a ti a. 28 Isua erawh chuan: “Ni lo, Pathian thu hriaa zâwmtute hi an hlim zâwk e!” a ti a.

29 Mipuite an rawn pun khâwm chuan, Isua chuan: “He chhuan hi chhuan sual tak an ni; chhinchhiahna an zawng a; nimahsela, Jona chhinchhiahna chauh lo chu pêk an ni lo vang. 30 Jona kha Ninevi khuaa mite tâna chhinchhiahna a ni ang khân, mihring Fapa pawh hi he chhuan tân hian chhinchhiahna a ni ang. 31 Seba lalnu pawh kha rorêlna nîah chuan he chhuan rual hian kaihthawh a ni ang a, Solomona finna ngaithla tûra hmun hla tak aṭanga a lo kal avângin, he chhuan sualzia hi a la târ lang ang. En teh u! Solomona aia ropui zâwk heta hi a awm e. 32 Ninevi khuaa mite kha rorêlna nîah chuan he chhuan rual hian kaihthawh an ni ang a, Jona thu hrilh pawma an inlamlêt avângin, he chhuan sualzia hi an la târ lang ang. En teh u! Jona aia ropui zâwk heta hi a awm e. 33 Miin khawnvâr a chhit hnuin hmun biru takah a dah ngai lo va, a khuh bo ngai hek lo; ina lo lût apiangin a êng an hmuh theihna tûrin a dahna hmunah a dah zâwk ṭhîn. 34 Taksa khâwnvâr chu i mit a ni. I mit a fiah chuan i taksa pum a êng chhuak ang a, i mit a fiah loh erawh chuan i taksa pawh a thim ang. 35 Chutichuan, nangmahnia êng chu thim a nih loh nân fîmkhur rawh u. 36 Tin, i taksa pum chu thim lai awm lova a ên chuan, khâwnvâr êngin a chhun êng che ang hian i êng chhuak vek ang,” a ti a.

37 Chûng thu a sawi lai chuan Pharisai pakhatin chaw eiah a sâwm a. Tichuan, Isua chu lûtin dawhkân a kîl a. 38 Nimahsela, Pharisai chuan Isua’n zanriah a kîl hmain a kut a sil* lo tih a hmuh chuan mak a ti hle a. 39 Lalpa erawh chuan a hnênah: “Nangni Pharisaite hian no leh thlêng pâwn lam in sil fai a, in chhûng lam erawh chu duhâmna leh suahsualnain a khat si. 40 Nangni mi âte u! A pâwn lam siamtuin a chhûng lam pawh a siam lo vem ni? 41 Chuvângin, mi retheite hnêna thilpêk in pêk hunah thinlung takin pe ang che u; tichuan, thil engkimah in lo thianghlim ang. 42 Nangni Pharisaite u, pudina te, pardi te, huan thlai tinrêngte sâwma pakhat in pe ṭhîn a; nimahsela, rorêlna dik leh Pathian hmangaihna in ngaihthah avângin in chunga thleng tûr chu a va râpthlâk dâwn êm! Sâwma pakhat chu in pe tûr a ni ngei mai; nimahsela, rorêlna dik leh Pathian hmangaihna ngaihthah phah nân in hmang tûr a ni lo. 43 Pharisaite u, inkhâwmna inah a hma lama* ṭhut leh bazâra chibai bûkte in duh ṭhin avângin in chunga thleng tûr chu a va râpthlâk dâwn êm! 44 Thlân* tih hriat mai theih loh,* hre lo va a chunga mite an kalna ṭhin ang chu in nih avângin, in chunga thleng tûr chu a va râpthlâk dâwn êm!” a ti a.

45 Dân hre tak pakhatin Isua chu chhângin: “Zirtîrtu, hêng thute i sawi hian keini pawh min sawichhe tel a ni,” a ti a. 46 Tin, ani chuan: “Nangni Dân hre takte u, in chunga thleng tûr chu a va râpthlâk dâwn êm! Mite chu phurrit tak takte in phurhtîr ṭhîn a; nimahsela, nangni erawh chuan chûng phurte chu in kutzungṭang pakhat pawhin in khawih duh si lo!

47 “In chunga thleng tûr chu a va râpthlâk dâwn êm! Zâwlneite thlân* in siam a, anni chu in pi leh pute thah an ni si! 48 In pi leh pute thil tih in hriatpui mai bâkah, in remtihpui a ni; anni’n zâwlneite an that a, nangni’n an thlânte in siam si a. 49 Chuvângin alâwm Pathian finna pawhin hetianga a lo sawi: ‘An hnênah zâwlneite leh tirhkohte ka tîr ang a, ṭhenkhat ti hlumin ṭhenkhat an ti duhdah ang, 50 khawvêl awm ṭan tirh ata zâwlnei zawng zawngte thisen mawh chu he chhuan hian a phurh theihna tûrin, 51 Abela thisen aṭanga maichâm leh biak in inkâra an tih hlum tâk Zakaria thisen mawh thlengin,’ tiin. Ni e, ka hrilh a che u, an thisen chhuak avângin he chhuan hi hrem a la ni ang.

52 “Nangni Dân hre takte u, hriatna chabi in kal bopui avângin in chunga thleng tûr chu a va râpthlâk dâwn êm! Nangni in lût duh lo va, a lût tûrte lah in khap bawk si!” a ti a.

53 Tin, chuta ṭanga a chhuah chuan, dân hre mite leh Pharisaite chuan ani chu an mil lo ṭan ta hle a; tichuan, zawhna tam tak an zâwt ta sek a, 54 a thusawia amah an hêk theihna tûr zawngin an châng reng a.

12 Chutih lai chuan, mipui sâng tam tak an rawn kal khâwm a, anni chu an inrap nawk nawk a. Isua chuan a hmasa berin a zirtîrte hnênah heti hian a sawi a: “Pharisaite dawidim, vervêkna lakah chuan fîmkhur rawh u. 2 Hai lan loh tûra fîmkhur taka thup eng mah a awm lo va, hriat chhuah loh tûr thurûk pakhat mah a awm hek lo. 3 Chuvângin, thima in sawi apiang chu êngah hriat a ni ang a, pindan chhûngrila zâwi têa in sawi chu in chung aṭanga tlângaupui a ni ang. 4 Chu bâkah, ka hrilh a che u, ṭhiante u, taksa ti hluma a hnua thil dang eng mah ti thei lote chu hlau suh u. 5 Nimahsela, hlauh tûr chu ka hrilh ang che u: A tih hlum hnu pawha Gehenna-a* paih tûra thuneihna neitu chu hlau rawh u. Ni e, ka hrilh a che u, Amah ngei chu hlau rawh u. 6 Pawisa thîr hlutna nei tlêm tak pahnihin* chawngzawng panga an hralh ṭhîn a ni lâwm ni? Nimahsela, an zînga pakhat mah Pathianin a theihnghilh lo. 7 In samzai zawng zawngte pawh hi chhiar vek a ni asin. Hlau suh u, chawngzawng tam tak aiin in hlu zâwk hle si a.

8 “Ka hrilh a che u, tu pawh mite hmaa mi ṭan apiang chu mihring Fapa hian Pathian vântirhkohte hmaah a ṭan ve ang. 9 Nimahsela, tu pawh mite hmaa mi phat apiang chu Pathian vântirhkohte hmaah phat a ni ve ang. 10 Tu pawh mihring Fapa sawichhia apiang chu ngaihdam an ni ang a; nimahsela, tu pawh thlarau thianghlim sawichhia apiang chu ngaihdam an ni lo vang. 11 Vântlâng hmaah te, rorêltute hmaah te leh, thuneitute hmaahte an hruai hunah che u, in thiamthu sawi dân tûr leh in thusawi tûr chu lungkham suh u. 12 Chutih hunah chuan, in thusawi tûr chu thlarau thianghlimin a hriattîr dâwn che u a ni,” a ti a.

13 Tin, mipui zîng aṭangin tuin emaw a hnênah: “Zirtîrtu, ka unaupa hnênah ro min sem ve tûrin hrilh rawh,” a ti a. 14 Isua’n a hnênah: “Mihring, tuin nge in pahniha inkâra rorêltu leh ro semtuah mi ruat?” a ti a. 15 Tichuan, an hnênah: “Fîmkhur ula, duhâmna zawng zawng lakah invêng rawh u, miin thil tam tak nei mah se, a thil neihte chuan nunna a pe thei si lo,” a ti a. 16 Tichuan, an hnênah tehkhin thu a sawi a: “Mi hausa tu emawin buh leh bâl tam tak a thar a. 17 Ani chu, ‘Ka buh leh bâl dah khâwmna tûr ka nei si lo, eng nge ka tih tâk ang?’ tiin a inngaihtuah a. 18 Tichuan, ‘Heti hian ka ti teh ang: Ka chhêk inte hi ṭhiatin, a aia lian zâwk ka sa ang a, chutah chuan ka buh leh bâl zawng zawngte leh ka thil neih zawng zawngte hi ka dah khâwm ang. 19 Tichuan: “Kum tam tak chhûng atân thil ṭha tam tak i khâwl khâwm a, hahchâwl la, eiin in la, hlim takin awm rawh,” tiin ka inhrilh ang,’ a ti a. 20 Nimahsela, Pathianin a hnênah, ‘Mi â, zâninah hian i nunna an lâksak dâwn che. A nih chuan, i thil khâwl khâwm sate hi tu tâ nge ni ta ang?’ a ti a. 21 Mahni tâna ro khâwl khâwm a, Pathian lama hausa si lo chu an chungah chutiang chuan a thleng ṭhîn,” a ti a.

22 Tichuan, a zirtîrte hnênah: “Chuvângin, ka hrilh a che u, ‘Eng nge kan ei ang?’ tiin in nunna chungchângah leh, ‘Eng nge kan hâk ang?’ tiin in taksa chungchângah lungkham tawh suh u. 23 Ei tûr aiin nunna a hlu zâwk a, thawmhnaw ai pawhin taksa a hlu zâwk si a. 24 Choâkte hi ngaihtuah rawh u, buh an tuh lo va, an ât hek lo va; chhêk in emaw, buh in emaw an nei hek lo. Nimahsela, Pathianin a châwm si a. Nangni chu savate ai chuan in hlu zâwk daih lo vem ni? 25 In zînga tuin nge a lungkham avânga a nunna rei lo te chhûng lek pawh pawt sei thei awm? 26 Chutiang thil tê tham tê pawh in tih theih si loh chuan, engvângin nge thil dangte chu in lungkham ṭhin? 27 Ram tûktinpârte ṭhan dân hi ngaihtuah rawh u, hna an thawk lo va, la an kai hek lo; nimahsela, ka hrilh a che u, Solomona meuh pawh a ropuina zawng zawnga thuam a nih khân, hêng tûktinpâr pakhat tluk pawh hian thuamin a awm lo asin. 28 Ram hnim vawiina awm a, a tûka thuka hâl ral leh mai tûr mah Pathianin chuti khawpa a thuam a nih chuan, nangni rinna nei tlêmte u, thawmhnaw a va pe nasa zâwk dâwn che u êm! 29 Chuvângin, in ei tûr leh in in tûr chungchâng thu chu lungkham tawh suh ula, mangang* lutuk tawh hek suh u. 30 Chûng zawng zawng chu hnam dangte’n* nasa takin an zawng ṭhîn; nimahsela, chûngte chu in mamawh tih in Pain a hria a ni. 31 Chu aiin, a Lalram zawng zêl ula; tichuan, chûng zawng zawng chu pêk belh in ni ang.

32 “Pâwl tlêmte u, hlau suh u, Lalram pêk che u in Pain a remti tawh si a. 33 In thil neihte hralh ula, khawngaih thilthlâwnpêkte pe rawh u.* In tân pawisa ip chhe thei lote insiam rawh u, rûkruin a hnaih theih lohna leh rannungin a ei chhiat theih lohna hmun vâna ro chhe thei lo chu. 34 In ro awmna apiangah in rilru* pawh a awm dâwn si a.

35 “Thawmhnaw hain inring rengin awm ula,* in khâwnvâr pawh alh reng rawh se. 36 Inneihnaa kal an pu a rawn haw a, kawngkhâr a kik veleha hawng nghâl thei tûra lo nghâktute ang chu ni rawh u. 37 An pu a lo haw huna bâwih inring renga awm a hmuhte chu an hlim ang. Tih tak meuhin ka hrilh a che u, a kâwng a hrêng ang a, anni chu chaw kîl tûrin a ṭhuttîr ang a, an hnênah ei tûr a pe ang. 38 Zân vên vawi hnihna* emaw, a vawi thumna* emaw pawha a lo haw a, inring renga awm a hmuhte chu an hlim ang. 39 Nimahsela, hei hi hre rawh u. In neituin rûkru lo kal hun tûr hria sela chuan a inah a luhtîr lo vang. 40 Nangni pawh inring rengin awm rawh u, in rin loh hunah* mihring Fapa hi a lo kal dâwn si a,” a ti a.

41 Tin, Petera’n: “Lalpa, he tehkhin thu hi kan tân chauhva sawi nge i nih a, mi zawng zawng tân?” a ti a. 42 Lalpa chuan: “Sum enkawltu rinawm,* fing tak, a puin a chhiahhlawhte chunga a hun taka an chaw chan tûr pe reng tûra a ruat tûra chu tu ber nge ni ang? 43 A pu a lo haw huna bâwih chutianga thawk a hmuha chu a hlim ang! 44 Dik takin ka hrilh a che u, a neih zawng zawng chunga hotuah a ruat ang. 45 Nimahsela, chu bâwih chuan, ‘Ka pu a lo haw lawk dâwn lo ve,’ tia ngaihtuahin chhiahhlawh dangte lo vuain, eia inin lo rui sela, 46 a pu chu a beisei loh nîah leh a hriat loh dârkârah a lo haw ang a, ani chu a na thei ang bera hremin, mi rinawm lote zîngah a dah ang. 47 Tin, chu bâwih, a pu duh zâwng hre reng chung si a, lo inring lo va, a pu duh anga ti lo chu vawi tam tak vuak a ni ang. 48 Nimahsela, hriat loh avânga vuakna khawp thil ti chu vawi tlêm tê chauh vuak a ni ang. Tichuan, tu pawh tam tak an pêka hnênah chuan tam tak phût a ni ang a; tin, mawhphurhna tam tak an pêka hnênah chuan tam tak phût a ni bawk ang.

49 “Leiah hian kâng mei ti chhuak tûra lo kal ka ni, tûnah pawh kâng tawh sela ka ti hle mai! 50 Baptisma chan tûr chi dang ka nei, chumi a zawh fel hma chu ka thaw a va ipik êm! 51 Leiah hian remna thlentîr tûra lo kal emaw min ti em ni? Ni lo ve, ka hrilh a che u, inṭhen darhna thlentîr tûra lo kal ka ni zâwk. 52 Tûn aṭang chuan chhûngkua an inṭhen darh ang, mi panga awmna chhûngkua a nih chuan pathumin pahnih an do vang a, pahnihin pathum an do vang. 53 Pain a fapa a do vang a, fapain a pa; nuin a fanu a do vang a, fanuin a nu; a pasala nuin mo a do vang a, movin a pasala nu a do bawk ang,” a ti a.

54 Tin, mipui hnênah pawh chuan: “Khawthlang lama chhûm lo chhuak in hmuhin, ‘Thlipui a lo tleh dâwn e,’ in ti a. A lo tleh ngei ṭhîn. 55 Chhim thlî a lo tleh tih in hriatin, ‘Khua a lum dâwn e,’ in ti a. Chutiang ngei chuan a lo thleng bawk ṭhîn. 56 Mi vervêkte u, lei leh vân lan dân enin, khaw awm dân tûr in hre thiam si a; nimahsela, engvângin nge tûna thil thleng mêkte hi in hriatthiam loh? 57 Engvângin nge thil dik leh dik lo pawh nangmahni’n in rêl mai loh? 58 I laka thubuai theh lûttu nêna rorêltu hnên lam in pan laiin, in inhmuh thiam lohna chu chinfel tum rawh. Chuti lo chuan, rorêltu hmaah a hruai ang che a, rorêltu chuan vêngtu kutah pe chein, vêngtu chuan tân inah a khung mai ang che. 59 Ka hrilh a che, pawisa thîr pakhat* lek pawh i pêk kim loh chuan, chuta ṭang chuan i chhuak tawp lo vang,” a ti a.

13 Chutih lai tak chuan, chuta awm tute emawin Pilata’n inthawina hlântu Galili mite a tih hlum thu Isua hnênah an hrilh a. 2 Isua chuan an hnênah: “Chûng Galili mite’n chutiang thil an tawh avâng chuan, Galili rama mi dang zawng zawng aiin an sual zâwk tihna a ni em? 3 Ni lo ve! Ka hrilh a che u, nangni pawh in sim loh chuan chutiang bawka tih boral vek in ni ang. 4 A nih leh, Siloam in sâng chimin mi 18 a delhhlumte kha, Jerusalema chêng mi dang zawng zawngte aia an sual zâwk vâng a ni em? 5 Ni lo ve! Ka hrilh a che u, nangni pawh in sim loh chuan anmahni ang bawka tih boral vek in ni ang,” tiin a hrilh a.

6 Tichuan, he tehkhin thu hi a sawi zawm a: “Pa pakhatin a grêp huanah theipui kûng pakhat a nei a, a kûngah chuan a rah a va zawng a; nimahsela, pakhat mah a hmu lo. 7 Tin, grêp huan enkawltu hnênah chuan, ‘He theipui kûngah hian a rah zawngin kum thum lai ka rawn kal ṭhîn a; nimahsela, pakhat mah ka hmu lo. Kit daih rawh! Engvângin nge hmun luaha a awm reng?’ a ti a. 8 Ani chuan a hnênah, ‘Ka pu, kum khat dang awmtîr leh rih la, a vêlah lei laiin, lei ṭha ka vûr ang e. 9 Chumi hnuah a rah chuan a ṭha ang a, a rah loh erawh chuan min kihtîr dâwn nia,’ a ti a,” tiin.

10 Tin, Sabbath Nîin inkhâwmna in pakhatah a zirtîr a. 11 Ngai teh! Hmeichhe pakhat ramhuai a pai avânga kum 18 chhûng zet dam lo tawh a awm a, ani chu a zâng a kûl a, a ding ngîl thei tawh hauh lo va. 12 Isua’n a hmuh veleh a hnênah: “Hmeichhia, i dam lohna ata tih dam i ni ta,” a ti a. 13 Tichuan, a chungah a kut a nghat a, chawplehchilha lo ding ngîl nghâlin Pathian a chawimawi ta a. 14 Nimahsela, Isua’n Sabbath Nîa mi a tih dam avângin inkhâwmna in hotu chu a thinur hle a, mipui hnênah chuan: “Hnathawh nân ni ruk a awm a, chûng nîahte chuan lo kalin intih damtîr rawh u, Sabbath nîah ni lovin,” a ti a. 15 Nimahsela, Lalpa’n ani chu chhângin: “Vervêkte u, nangniho hian Sabbath Nîah in bâwng pa emaw, in sabengtung emaw a thlunna hmun aṭanga phelhin, tui in tûrin in hruai chhuak ṭhîn lo vem ni? 16 He hmeichhia, Abrahama thlah, Setana’n kum 18 chhûng zet a lo phuar tawh hi, Sabbath nîah pawh phelh tûr a ni dâwn lâwm ni?” a ti a. 17 Tin, chûng thute a sawi lai chuan amah dodâltu zawng zawngte chu an zak hle a, mipuite erawh chu thil ropui a tih zawng zawng avâng chuan an lâwm hle a ni.

18 Tin, heti hian a sawi zawm a: “Pathian Ram chu eng ang nge ni a, eng nên nge ka tehkhin ang? 19 Chu chu miin anṭam chi fang khat la a, a huana a theh ang chu a ni. A lo ṭhang lian a, thing a lo ni a, a zârahte chuan chunglêng savate’n bu an chhep ṭhîn,” a ti a.

20 Heti hian a sawi leh a: “Pathian Ram chu eng nên nge ka tehkhin theih ang? 21 Chu chu hmeichhiain dawidim a lâk a, a thawh vek thlenga chhangphut tehkhâwng lian tak thum* zînga a phûm ang chu a ni,” a ti a.

22 Tichuan, zirtîr chung leh Jerusalem khaw lam pan chung zêlin, khaw lian leh khaw tête a fang zêl a. 23 Mi pakhatin a hnênah: “Lalpa, chhandamte chu tlêm tê chauh em ni an nih?” a ti a. Ani chuan an hnênah: 24 “Kawngka zîma lût tûrin theih tâwp chhuah rawh u. Ka hrilh a che u, mi tam takin luh an tum ang a; nimahsela, an lût thei lo vang. 25 In neituin kawngkâ a kalh hnuah chuan pâwna ding a, kawngkâ kikin, ‘Lalpa, min hawnsak rawh,’ in la ti ang. Nimahsela, ani chuan: ‘Khawi lama mi nge in nih ka hre lo va che u,’ tiin a la chhâng ang che u. 26 Tichuan, ‘I bulah kan eiin kan in a, kan kawtthlêrahte pawh i zirtîr ṭhin kha,’ tiin in la sawi ang. 27 Nimahsela, ani chuan, ‘Khawi lama mi nge in nih ka hre lo va che u. Nangni thil sual titu zawng zawngte u, ka hnên aṭang hian kal bo rawh u!’ a la ti ang che u. 28 Abrahama te, Isaaka te, Jakoba te leh, zâwlnei zawng zawngte Pathian Rama an awm in hmuh hunah, nangni erawh chu pâwna paih chhuah in nih avângin ṭap leh ha ṭhialin in awm ang. 29 Tin, chhak leh thlang, chhim leh hmâr aṭangin mite an lo kal ang a, Pathian Ramah dawhkân an kîlho vang. 30 Ngai teh u! A hnuhnûng bera awmte zîngah a hmasa bera la awm tûrte an awm a; a hmasa bera awmte zîngah pawh a hnuhnûng bera la awm tûrte an awm,” a ti a.

31 Chutih lai tak chuan, Pharisai ṭhenkhat an lo kal a, a hnênah: “Chhuak la, heta ṭang hian kal bo rawh. Heroda’n thah che a duh a ni,” an ti a. 32 Ani chuan an hnênah: “Kal ula, chu sihal hnênah chuan, ‘Ngai rawh! Vawiinah leh naktûkah ramhuaite hnawt chhuakin dam lote ka ti dam ang a, a tûk lehah ka zo chauh vang,’ tiin va hrilh rawh u. 33 Eng pawh ni se, vawiinah te, naktûkah te leh, tûk lehahte pawh ka kal zêl ang, Jerusalem khaw pâwnah zâwlnei tih hlum theih a ni si lo va. 34 Jerusalem, Jerusalem, zâwlneite ti hlumtu leh i hnêna tirhte lunga dêng hlumtu, âr puiin a note a thla hnuaia a awp khâwm angin, vawi eng zât nge i fate awp khâwm ka tum kha! Nimahsela, i duh si lo. 35 Ngai teh! Pathianin he in* hi a kalsan ang. Ka hrilh a che: ‘Jehova* hminga lo kal chu malsâwmin awm rawh se!’ tia i sawi hma loh chuan min hmu leh tawh lo vang,” a ti a.

14 Ṭum dangah chuan, Sabbath Nîah Pharisai hotute zînga pakhat inah chaw ei tûrin a kal a, anni chuan ngun takin an enthla a. 2 Tin, ngai teh! A hmaah chuan a dam lohna avânga vûng mi pakhat a awm a. 3 Isua chuan Dân lam hre takte leh Pharisaite hnênah chuan: “Sabbath Nîah tih dam a thiang nge thiang lo?” tiin a zâwt a. 4 Anni erawh chu an ngawi reng a. Tichuan, Isua’n chu pa chu vuanin, a ti dam a, a kaltîr ta a. 5 An hnênah: “In zîngah a fapa emaw, a bâwng pa emaw tuichhunchhuahah tla ta sela, Sabbath nîah pawh ni se tuin nge khai chhuak nghâl lo vang che u?” a ti a. 6 Chu thu chu an chhâng thei lo va.

7 An mi sâwmte’n ṭhutna ṭha ber berte an thlang tih a hriat chuan, an hnênah tehkhin thu a sawi a: 8 “Tuin emaw inneih ruai ṭheh tûra a sâwm hunah che u chuan, ṭhutna ṭha berah ṭhu suh ang che u. Nangni aia mi zahawm zâwk tu emaw a lo sâwm mai thei si a. 9 Tin, a sâwmtu che u chu lo kalin, ‘Ani hi i ṭhutnaah hian ṭhu zâwk rawh se,’ a rawn ti ang a. Tichuan, zak takin ṭhutna ṭha lo berah in ṭhu mai ang. 10 Nimahsela, sâwm in nih hunah kal ula, ṭhutna ṭha lo berah va ṭhu ang che u. Tichuan, a sâwmtu che u chu lo kalin, in hnênah, ‘Ṭhiana, ṭhutna ṭha zâwkah ṭhu rawh,’ a rawn ti ang che u. Tichuan, in chaw kîlpui zawng zawngte hmaah chawimawiin in awm ang. 11 Tu pawh mahni inchawimawi chu tih mualphovin a awm ang a, tu pawh inngaitlâwm chu chawimawiin a awm dâwn si a,” a ti a.

12 A hnuah amah sâwmtu hnênah chuan: “Chhûnah emaw, tlaiah emaw ruai i buatsaih hunah i ṭhian te, i unau te, i chhûngkhat laina te leh, in vênga mi hausate sâwm suh ang che. Chuti lo chuan, an sâwm ve leh ang che a, an rûl leh che tihna a ni ang. 13 Nimahsela, ruai i buatsaih hunah mi rethei te, piangsual te, kebai te leh, mitdelte sâwm zâwk ang che. 14 Chûng mite chuan rulh lehna tûr che eng mah an neih loh avângin i hlim ang. Mi felte thawhlehnaah rulh i ni dâwn si a,” a ti a.

15 Chûng thute a hriat chuan, a chaw kîlpui zînga pakhat chuan: “Pathian Rama chaw kîltu* tûr chu a hlim e,” a ti a.

16 Isua’n a hnênah: “Mi pakhatin zanriah ropui tak a buatsaih a, mi tam tak a sâwm a. 17 Zanriah ei a lo hun chuan a mi sâwmte hnênah, ‘Lo kal rawh u, tûnah chuan engkim peih a ni tawh e,’ tia sawi tûrin a bâwih a tîr chhuak a. 18 Nimahsela, an vaiin chhuanlam an siam ṭheuh va. A hmasa ber chuan a hnênah, ‘Huan ka lei a, a en tûra ka kal a ngai; a pawi ka ti khawp mai, ka lo kal thei lo vang,’ a ti a. 19 Tin, mi dang chuan, ‘Bâwng tuak nga ka lei a, enfiah tûrin ka kal dâwn a, a pawi ka ti khawp mai, ka lo kal thei lo vang,’ a ti a. 20 Mi dang leh chuan, ‘Nupui nei hlim ka ni a, ka lo kal thei lo vang,’ a ti a. 21 Tichuan, bâwih chu lo kalin a pu hnênah chûng thute chu a hrilh a. Tin, in neitupa chu a thinrim hle a, a bâwih hnênah chuan, ‘Khawpuia kawtthlêr lian leh têahte kal chhuak vat la, mi rethei te, piangsual te, mitdel te leh, kebaite rawn hruai rawh,’ a ti a. 22 A hnuah bâwih chuan, ‘Ka pu, i thupêk ang khân tih a ni tawh a; nimahsela, hmun ruak a la awm ta fo mai,’ a ti a. 23 Tin, a pu chuan bâwih hnênah, ‘Kawngpuiah leh kawng têahte kal chhuak la, ka in a khah theih nâna lo lût tûrin mite va hmin rawh. 24 Ka hrilh a che u, ka sâwm tâkte zînga pakhat mahin ka zanriah buatsaih hi an ei lo vang,’ tiin a hrilh a,” a ti a.

25 Tin, a zinnaah mipui tam takin an zui a, an lam hawiin an hnênah: 26 “Tu pawh ka hnêna lo kal chuan a pa te, a nu te, a nupui te, a fa te, a unaupa te, a unaunu te leh, ama nunna ngei pawh a huat loh chuan* ka zirtîr a ni thei lo vang. 27 Tu pawh a nghaisakna ban* pu-a mi zui lo chu ka zirtîr a ni thei lo vang. 28 In zîngah tu pawhin in sâng sak tum ula, tuin nge a sak zawhna tûr khawp sum a neih leh neih loh ṭhua chhût hmasa lo vang che u? 29 Chuti lo chuan, a lungphûm phûm siin a sa zo thei si lo vang a, a hmutu apiangin an nuihzat ang a, 30 ‘He pa hian in a rel uai a, a sa zo leh thei si lo,’ an ti mai ang. 31 A nih leh, lal tuin nge lal dang do tûra a kal chhuah hmain, sipai 20,000 nêna amah do tûra lo kal chu sipai 10,000 nêna a beih lêt theih dâwn leh dâwn loh ṭhua thurâwn la hmasa lo vang? 32 A beih lêt theih dâwn loh chuan, lal dang chu hla taka a la awm laiin remna siam tûrin palai a tîr chhuak ngei ang. 33 Chutiang bawkin, in zînga tu pawh a thil neih zawng zawng kalsan vek lo apiang chu, ka zirtîr a ni thei lo vang tih hre reng rawh u.

34 “Chi hi a ṭha e. Nimahsela, a dâk tawh chuan engtin nge tih al leh theih a nih ang? 35 Lei atân emaw, lei ṭha atân emaw a hman tlâk loh va, an paih mai ṭhîn. Beng nei tawh phawt chuan hre rawh se,” a ti a.

15 Tin, chhiahkhawntute leh mi sualte chu Isua thusawi ngaithla tûrin a hnênah an lo kal khâwm a. 2 Pharisaite leh dân hre mite chu: “He pa hian mi sualte a kâwm a, an hnênah a ei ve ṭhîn,” tiin an phunnawi a. 3 Tichuan, anni chu he tehkhin thu hi a hrilh a: 4 “In zînga mi pakhatin berâm 100 neiin an zînga pakhat bo ta ang sela, 99-te chu thlalêrah hnutchhiahin, a bo pakhat chu a hmuh hma loh a zawng dâwn lâwm ni? 5 A hmuh leh chuan lâwm takin a kokîah a pu a. 6 Tin, in a thlen chuan, a ṭhiante leh a ṭhenawmte ko khâwmin an hnênah, ‘Mi lawmpui rawh u, ka berâm bo kha ka hmu leh ta e,’ a ti a. 7 Ka hrilh a che u, chutiang bawkin mi fel 99 sim tûr nei lote chungah aiin, mi sual pakhat sim chungah vâna mite an lâwm zâwk ang.

8 “Tin, hmeichhe pakhatin tangkaraw pawisa sâwm* neiin chûng zînga pakhat chu ti bo ang sela, khâwnvâr chhî-a a in phiatin ngun takin a zawng dâwn lâwm ni? 9 Tin, a hmuh leh chuan a ṭhiante leh a ṭhenawmte ko khâwmin, ‘Mi lawmpui rawh u, ka tangkaraw pawisa bo kha ka hmu leh ta e,’ a ti a. 10 Chutiang bawkin, ka hrilh a che u, mi sual pakhat sim chungah Pathian vântirhkohte an lâwm ṭhîn,” a ti a.

11 Tin, ani chuan: “Pa pakhatin fapa pahnih a nei a. 12 A naupang zâwk chuan a pa hnênah, ‘Ka pa, ka rochan tûr mi pe rawh,’ a ti a. A pa chuan a thil neihte chu a fapa pahnih hnênah chuan a sem ta a. 13 Ni rei lo te hnuah, a fapa naupang zâwk chu a thil neih zawng zawngte la khâwmin ram hla takah a kal a, chutah chuan nuamsa taka va awmin a thil neihte chu a khawhral ta mai mai a. 14 A thil neih zawng zawng a khawhral vek hnuah, chu ram pum puiah chuan ṭâm nasa tak a lo tla a, ei tûr nei lovin a awm ta a. 15 Ani chu a kal a, chu rama mi pakhat chu a va bêl a, chu pa chuan lo lama vawk rual enkawl tûrin a lo ruai a. 16 Tin, vawk chawte* chuan inhnawh puar a duh hle a, tu man ei tûr an pe si lo.

17 “A inhriat chhuah chuan, ‘Ka pa hnêna inhlawhfate’n chhang ei sên loh an neih laiin, kei lah hetah rilṭâmin ka thi mai dâwn si a! 18 Ka tho vang a, ka pa hnênah ka kal ang a, a hnênah: “Ka pa, vâna mi chungah leh i chungah thil ka ti sual a ni. 19 I fapa ni tlâk pawh ka ni tawh lo, i hlawhfa pakhat angin min awmtîr ve mai rawh,” ka ti ang,’ a ti a. 20 Tichuan, a tho va, a pa hnênah a kal ta a. Hla taka a la awm laiin a pa chuan a lo hmu a, a khawngaih ta êm êm a, a tlân a, a kuah a, a fâwp ta ngawih ngawih a. 21 Tin, a fapa chuan a pa hnênah, ‘Ka pa, vâna mi chungah leh i chungah thil ka ti sual a ni. I fapa ni tlâk pawh ka ni tawh lo,’ a ti a. 22 Nimahsela, a pa chuan a bâwihte hnênah, ‘Rang takin kawrfual ṭha ber rawn la ula, hâktîr rawh u, zungbun buntîrin pheikhawk buntîr ula, 23 bâwng no thau tak kha rawn kaiin, talh bawk ula, hlim takin i ei ang u. 24 He ka fapa hi a thi a, a lo nung leh ta; a bo va, kan hmu leh ta a nih hi,’ a ti a. Tichuan, hlim takin an awm ta a.

25 “Tin, a fapa upa zâwk lova awm chu a rawn haw a, in a thlen dâwn hnaih chuan rimawi tum ri leh lâm thâwm a hria a. 26 Tichuan, chhiahhlawhte zînga pakhat chu kovin thil thleng chu a zâwt a. 27 Chhiahhlawh chuan a hnênah, ‘I nau a lo haw leh a, i pain dam taka a hmuh leh avângin bâwng no thau ṭha tak a talh a ni,’ a ti a. 28 Tichuan, a thin a rim ta hle a, in chhûngah chuan a lût duh ta lo va. A pa chu a rawn chhuak a, ani chu a rawn thlêm a. 29 Ani chuan a pa hnênah, ‘En teh! Kum tam tak chhûng i rawng ka bâwl tawh a, i thu âwih loh lai ka nei ngai lo; nimahsela, ka ṭhiante nêna kan ei atân kêl tê tak ngial pawh min la pe ngai si lo. 30 Nimahsela, he i fapa, nawhchizuarte hnêna i thil neihte khawhraltu hi a lo haw veleh bâwng no thau tak i lo talhsak leh si a,’ a ti a. 31 Tin, a pa chuan a hnênah, ‘Ka fapa, ka hnêna awm reng i ni alâwm, ka thil neih zawng zawngte hi i ta vek a ni e. 32 Hlim leh lâwm taka awm tûr kan ni alâwm, i nau hi a thi a, a lo nung leh ta a; a bo va, kan hmu leh ta si a,’ a ti a,” tiin a sawi a.

16 Tin, zirtîrte hnênah he thu hi a sawi bawk a: “Mi hausa pakhatin sum enkawltu* a nei a, a sum a hman ralsak mai mai avângin a hnênah an hêk a. 2 Tichuan, a sum enkawltu chu kovin, ‘I chungchâng ka lo hriat hi engtizia nge ni? Sum i enkawl dân i chhinchhiahna min pe rawh, tûn aṭang chuan in chhûng i enkawl thei tawh lo vang,’ a ti a. 3 Sum enkawltu chuan a rilruin, ‘Ka puin sum enkawltu ka nihna aṭangin min bân dâwn si a, eng nge ka tih tâk ang? Lei lai tûrin ka chak tâwk lo va, kutdawh lah chu ka zak bawk si. 4 Sum enkawltu ka nihna aṭanga bân ka nih hunah, mite’n an ina min awmtîr theihna tûrin ka tih tûr ka hre ta,’ a ti a. 5 Tichuan, a pu leibatute chu a mal malin a ko va, a hmasa ber hnênah chuan, ‘Ka pu lei eng zât nge i bat?’ a ti a. 6 Ani chuan, ‘Oliv hriak tehkhâwng* za,’ a ti a. Tin, a hnênah, ‘I batna lehkha hi la la, ṭhuin 50 ziak thuai rawh,’ a ti a. 7 Mi dang hnênah chuan, ‘Nang, eng zât nge i bat?’ a ti a. Ani chuan, ‘Buh tehkhâwng lian tak za,’* a ti a. A hnênah, ‘I batna lehkha hi la la, 80 ziak rawh,’ a ti a. 8 A pu chuan sum enkawltu chu fel lo hle mah se, fing taka thil a tih avângin a fak a ni. He khawvêl* fate hi remhriatna kawngah chuan êng fate aiin an fing zâwk.

9 “Ka hrilh a che u: He fel lohna khawvêla in hausaknate hian ṭhiante siam rawh u, chûng thilte a boral huna chatuana awmna hmuna an awmtîr theihna tûr che uin. 10 Tlêm tê chunga rinawm chu tam tak chungah pawh a rinawm ṭhîn a, tlêm tê chunga rinawm lo chu tam tak chungah pawh a rinawm lo ṭhîn. 11 Chuvângin, fel lohna khawvêla in hausaknate in hman dânah mah, in rinawmzia in fiah theih si loh chuan, tuin nge thil dik chu kawltîr ang che u? 12 Tin, mi dangte thil neih chungah mah in rinawmzia in fiah theih si loh chuan, tuin nge in ta tûr chu pe ang che u? 13 Chhiahhlawh tu mahin hotu pahnih rawng a bâwl kawp thei lo, pakhat huain pakhat a hmangaih ang, a nih loh leh pakhat pawmin pakhat a hnâwl ang. Pathian leh Sum rawng in bâwl kawp thei lo ve,” a ti a.

14 Pharisai sum ngainatute’n chûng thu zawng zawng chu an hriatin, ani chu an nuihsawh a. 15 Ani erawh chuan an hnênah: “Mi mit hmuha inti fel mai in ni e; nimahsela, Pathianin in thinlung a hria. Mihringte’n chawimawi tlâka an ngaih chu Pathian tân chuan thil tenawm mai a ni si a.

16 “Dân thu leh zâwlneite thu chu Johana’n rawng a bâwl ṭan thleng khân a awm a. Chumi hun aṭang chuan, Pathian Ram chanchin ṭha chu puan a ni a, chuta luh tum chuan mi zawng zawngin theih tâwp an chhuah ṭhîn. 17 Dân thua chhut han pakhat lek pawh famkim lova a awm aiin, lei leh vân boral a awl zâwk.

18 “Tu pawh a nupui ṭhena mi dang nei apiang chu a uirê a ni; tin, tu pawh mi nupui ṭhen hnu nei apiang chu a uirê bawk a ni.

19 “Mi hausa pakhat puan sen duk leh puan zai sîn inbel ṭhîn a awm a, nî tin nuamsa takin a khawsa ṭhîn. 20 Nimahsela, kutdawh pakhat Lazara, pânin a bawm khah vek chu a tual kawngkhâr bulah an muttîr ṭhîn a. 21 Ani chuan mi hausa dawhkân aṭanga ei tûr bâng nawi tlate chu ei a châk a, uite chuan a pânte chu an liahsak ṭhîn. 22 Tin, hun eng emawti hnuah chuan, kutdawh chu a thi a, vântirhkohte’n Abrahama bulah* an hruai a.

“Tin, mi hausa pawh chu a thi a, an phûm ta a. 23 Thlânah* chuan hrehawm tuarin a awm a, a han en chho va, hla taka Abrahama leh a bula* Lazara awm chu a han hmu a. 24 Tichuan, Abrahama chu kovin, a hnênah, ‘Ka Pa Abraham, min khawngaih la,* Lazara kha a kutzungṭang hmâwr tuiah chiahtîr la, ka lei ti dai tûrin rawn tîr rawh, he mei alh nasa tak hian min ti hrehawm hle si a,” a ti a. 25 Nimahsela, Abrahama chuan, ‘Ka fapa, i dam lai khân thil ṭha zawng zawng i nei a, Lazara erawh chuan thil ṭha lote a chan kha hre reng rawh. Tûnah ani chu hetah thlamuang takin a awm a, nang erawh chuan hrehawm i tuar ve ta a nih kha. 26 Hêng thil zawng zawng bâkah hian, he lama mite hi kha lama an lo kal theih lohna tûr leh, kha lama mite pawh he lama an lo kal theih lohna tûrin kan inkârah hian leikak nasa tak siam a ni,’ a ti a. 27 Tin, ani chuan, ‘A nih leh ka pa, ani chu ka pa ina kaltîr tûrin ka ngên a che, 28 unau mipa panga ka nei a, he hrehawm tawrhna hmuna an lo kal ve lohna tûrin ṭhahnemngai takin zuk hrilh teh se,’ a ti a. 29 Nimahsela, Abrahama chuan, ‘Mosia leh Zâwlneite an nei alâwm, an thusawi chu ngaithla ang hmiang,’ a ti a. 30 Tin, ani chuan, ‘Ni lo ve, ka pa Abraham, mitthi zînga mi ngei hi kal sela an sim ang,’ a ti a. 31 Nimahsela, Abrahama chuan a hnênah, ‘Mosia leh Zâwlneite thusawi an ngaihthlâk loh chuan, mitthi tho leh thusawi pawh an ngaithla chuang lo vang,’ a ti a,” tiin.

17 Tin, Isua’n a zirtîrte hnênah: “Tlûkna lo thleng tûr chu pumpelh theih a ni lo. Nimahsela, tlûkna awmtîrtu chunga thleng tûr chu a va râpthlâk dâwn êm! 2 Hêng naupang tê ang mite zînga pakhat lek pawh a tih tlûk ai chuan, buh râwt sawmna lung awrhtîr a, tuifinriata thlâk chu a tân a ṭha zâwk ang. 3 Fîmkhur rawh u. I unauvin thil sual a tih chuan zilh la, a inchhîr chuan ngaidam rawh. 4 Ni khatah i chunga vawi sarih thil a tih sual pawhin, i hnêna vawi sarih rawn kal a, ‘Min ngaidam rawh,’ a tih chuan, i ngaidam tûr a ni,” a ti a.

5 Tin, tirhkohte chuan Lalpa hnênah: “Rinna nghet lehzual nei tûrin min ṭanpui rawh,” an ti a. 6 Lalpa chuan: “Anṭam mu fang khat tiat rinna in neih chuan he thingtheihmu kûng hnênah hian, ‘Lo inphawi la, tuifinriatah sâwn inphun rawh!’ in ti ang a, in thu a âwih mai ang.

7 “In zînga tuin emaw bâwih lei lettu emaw, berâm vêngtu emaw nei ula, ani chu lo aṭanga a rawn haw veleh tuin nge, ‘Lo kal la, dawhkân rawn kîl nghâl rawh,’ ti ang che u? 8 Chu aiin, a hnênah, ‘Inthlâk la, ka zanriah tûr mi buatsaihsak la, ka eia ka in zawh hma loh min vil reng rawh, chumi hnuah i eiin i in dâwn nia,’ tuin nge ti zâwk lo vang che u? 9 A tih tûr ve rêng a tih avângin bâwih hnênah chuan lâwmthu a sawi dâwn em ni? 10 Chutiang bawkin, in tih tûr zawng zawng in tih hnuah: ‘Bâwih ṭangkai lo kan ni e. Kan tih tûr rêng kan ti a ni,’ tiin sawi ang che u,” a ti a.

11 Tichuan, Jerusalem lam panin, Samari leh Galili ramrî chu a pal tlang a. 12 Tin, khaw pakhata a luh dâwn laiin, phâr sâwmin ani chu an hmu a; nimahsela, hla takah an ding a. 13 Tichuan, aw ring takin: “Isu, Zirtîrtu, min khawngaih* rawh!” an ti a. 14 Anni chu a hmuh chuan an hnênah: “Kal ula, puithiamte hnênah va inentîr rawh u,” a ti a. Tin, an kal lai chuan an lo thianghlim ta a. 15 An zînga pakhat chu a dam ta tih a inhriat veleh, aw ring taka Pathian chawimawi chungin a lêt leh a. 16 Isua ke bulah bawkkhupin lâwmthu a hrilh a. Ani chu Samari mi a ni nghe nghe a. 17 Isua chuan: “Mi sâwmte kha an lo thianghlim vek a ni lâwm ni? Mi dang pakuate kha khawiah nge an awm? 18 He hnam dang mi lo hi Pathian chawimawi tûra lo lêt leh pakhat mah an awm na nge?” a ti a. 19 Tichuan, a hnênah: “Tho la, kal rawh; i rinnain a ti dam che a ni,” a ti a.

20 Pharisaite’n Pathian Ram lo thlen hun tûr an zawhna chu heti hian a chhâng a: “Pathian Ram chu langsâr taka hmuh theihin a lo thleng lo ve. 21 Mite’n, ‘En teh u, heta hi!’ emaw, ‘Sawta saw!’ emaw an ti hek lo vang. Ngai teh u! Pathian Ram chu in zîngah a awm a ni,” a ti a.

22 Tichuan, a zirtîrte hnênah: “Mihring Fapa dam lai nîte hi, ni khat lek pawh hmuh in châk nî a lo la thleng ang a; nimahsela, in hmu lo vang. 23 Mite’n, ‘En teh u, sawta saw!’ emaw, ‘En teh u, heta hi!’ emaw tiin in hnênah an la sawi ang. Kal chhuak suh ula, anni chu zui hek suh u. 24 Kâwlphein vân tâwp aṭanga a tâwp lehlam thleng a ên ṭhîn ang hian, mihring Fapa lo awm lehna nî pawh chutiang chiah chu a ni ang. 25 Nimahsela, hrehawm tam tak a tuar hmasa tûr a ni a; tin, he chhuan hian a hnâwl bawk ang. 26 Nova dam lai nîtea thil thleng ang bawk kha, mihring Fapa lo awm lehna nîahte chuan a thleng bawk ang: 27 Nova lawnga a luh a, Tuilêtin an vaia a tih boral vek thlengin, an eiin an in a, nupui pasal an innei ṭhîn. 28 Chutiang bawkin, Lota dam lai nîtea thil thleng ang khân: an eiin an in a, an leiin an hralh a, thlaite chîngin inte an sa a. 29 Nimahsela, Lota’n Sodom khua a chhuahsan nîah chuan vân aṭangin mei leh kât a sûr a, anni chu a ti boral ta vek a. 30 Mihring Fapa a inlâr nîah pawh chutiang bawk chu a ni ang.

31 “Chumi nîah chuan in chunga awm chu in chhûnga a thil neihte la tûrin chhuk suh se; chutiang bawkin, lova awm pawh a thil neihte la tûrin a haw tûr a ni lo. 32 Lota nupui hre reng rawh u. 33 Tu pawh a nun humhim tum apiangin a chân ang a; nimahsela, tu pawh a nun chân apiangin a humhim ang. 34 Ka hrilh a che u, chumi zân chuan khum pakhatah mi pahnih an mu ang a; pakhat lâk a ni ang a, pakhat hnutchhiah a ni ang. 35 Hmeichhe pahnih buh râwtsawmna hmunah buh râwtsawmin an awm ang a, pakhat lâk a ni ang a, pakhat hnutchhiah a ni ang,” a ti a. 36* —— 37 Tin, anni chuan a hnênah: “Lalpa, khawiah maw?” an ti a. Ani chuan an hnênah: “Khawiah pawh ruang awmna apiangah mupuite* an awm khâwm ang,” a ti a.

18 Tichuan, Isua’n an hnênah beidawng lova ṭawngṭai ziah a ngai tih hriattîr nân tehkhin thu a hrilh zawm a: 2 “Khaw pakhatah hian Pathian hlauhna leh mihring zahna nei lo rorêltu pakhat a awm a. 3 Chu khuaah chuan hmeithai pakhat a awm bawk a, ‘Thubuai ka neihpui lakah hian dik takin ro min rêlsak rawh,’ tia sawiin rorêltu hnênah chuan a va kal fo ṭhîn a. 4 Rorêltu chuan hun eng emawti chhûng chu a lo ṭanpui duh lo va; nimahsela, a hnuah a rilruin, ‘Pathian hlau lovin mihring zah lo mah ila, 5 he hmeithai hian mi tih buai reng avângin dik takin ro ka rêlsak mai teh ang; chuti lo chuan, lo kal fovin a thil dîl hian min la ti hah hrep palh ang e,’ a ti a,” tiin a sawi a. 6 Tin, Lalpa chuan: “Rorêltu chu fel lo viau mah se, a thusawite kha in lo hria em? 7 A nih chuan, Pathianin a chhûn a zâna amah autu a mi thlante chungah rorêlna dik a thlentîr ngei dâwn lâwm ni? Chu mai a ni lo, an chungah dawhtheihna a lantîr bawk ang. 8 Ka hrilh a che u, an chungah rorêlna dik a thlentîr thuai ang. Nimahsela, mihring Fapa a lo kal hunah leiah hian chutiang rinna chu a rawn hmu ang em?” a ti a.

9 Tin, mi ṭhenkhat fel intite leh mi dang engah maha ngai lo tute hnênah he tehkhin thu hi a sawi bawk a: 10 “Mi pahnih ṭawngṭai tûrin biak inah an chho va, pakhat chu Pharisai a ni a, pakhat chu chhiahkhawntu a ni. 11 Pharisai chu a ding a, a rilruin hetiang hian a ṭawngṭai a, ‘Aw Pathian, mi dangte anga hlêpru te, fel lo te, uirête ka nih loh avâng leh, he chhiahkhawntu ang pawh hi ka nih loh avângin ka lâwm e. 12 Chawlhkâr khatah vawi hnih chaw ka nghei ṭhîn a; ka thil neih zawng zawng aṭangin sâwma pakhat ka pe ṭhîn,’ a ti a. 13 Chhiahkhawntu erawh chu hla takah a ding a, vân lam pawh en ngam lovin, ‘Aw Pathian, kei mi sual hi mi khawngaih rawh,’* tiin a âwm a chûm a chûm a. 14 Ka hrilh a che u, chu pa chu a haw a, Pathian mit hmuhah chuan, chu Pharisai ai chuan a fel zâwk a ni. Tu pawh mahni inchawimawi chu tih mualphovin a awm ang a; nimahsela, tu pawh inngaitlâwm chu chawimawiin a awm dâwn si a,” a ti a.

15 Tin, mite chuan a deh atân a hnênah an nausênte an rawn hruai a; nimahsela, zirtîrte’n chu chu an hmuhin an lo hau va. 16 Nimahsela, Isua’n nausênte chu a hnêna rawn hruai tûra tiin: “Naupangte kha ka hnênah rawn kaltîr ula, lo dang suh u; Pathian Ram chu hetiang mite ta hi a ni si a. 17 Tih tak meuhvin ka hrilh a che u, Pathian Ram chu naupang têin a lawm anga lâwm lo apiang a chhûngah an lût tawp lo vang,” a ti a.

18 Tin, rorêltute zînga pakhatin a hnênah: “Zirtîrtu ṭha, chatuana nunna ka neih theih nân eng nge ka tih ang?” tiin a zâwt a. 19 Isua chuan a hnênah: “Engvângin nge Zirtîrtu ṭha tia min koh? Pathian chauh lo chu tu mah ṭha an awm lo. 20 Thupêkte chu i hria alâwm: ‘Uirê suh, tual that suh, ru suh, thuhretu derah ṭang suh, i nu leh i pa chawimawi rawh,’ tihte hi,” a ti a. 21 Tichuan, a hnênah: “Chûng zawng zawng chu naupang tê ka nih lai aṭang tawhin ka zâwm reng ṭhîn alâwm,” a ti a. 22 Chu chu a hriatin Isua’n a hnênah, “Thil pakhat tih hmaih i la nei: I thil neih zawng zawng hralh la, i hralhna sum chu mi retheite hnênah sem ang che; tichuan, vânah ro i nei ang; tin, lo kal la, mi zui ang che,” a ti a. 23 Chu thu a han hriat chuan, mi hausa tak a nih avângin a lungngai ta hle a.

24 Isua’n ani chu enin: “Sum ngahte tân Pathian Rama luh a va harsa dâwn êm! 25 Mi hausa Pathian Rama luh aiin, sanghâwngsei puan ṭhuina hriau benga luh tlang a awl zâwk ang,” a ti a. 26 A thusawi hretute chuan: “Tu nge chhandam ni thei ta ang?” an ti a. 27 Ani chuan: “Mihring tih theih loh hi Pathian tân chuan tih theih a ni,” a ti a. 28 Tin, Petera chuan: “Ngai teh! Kan thil neihte kalsanin kan zui ta che a,” a ti a. 29 Isua’n an hnênah: “Tih tak meuhvin ka hrilh a che u, tu pawh Pathian Ram avânga a in emaw, a nupui emaw, a unaute emaw, a nu leh pate emaw, a fate emaw kalsan chu, 30 tûn dam chhûng la la hian a lêt tam taka hmu lo tûr tu mah an awm lo, hun lo la awm tûra chatuana nunna nên,” a ti a.

31 Tin, ani chuan Sâwm Pahnihte chu a hruai hrang a, an hnênah: “Ngai teh u! Jerusalem khuaah kan chhoh dâwn hi, mihring Fapa chungchânga zâwlneite thuziak zawng zawng kha a thleng famkim dâwn a ni. 32 Ani chu hnam dangte hnênah pêk a ni ang a, nuihza siam nân an hmang ang a, zahthlâk taka siam leh chil chhâk a ni ang. 33 Tin, savun hruihruala an vuak hnuah, an ti hlum ang a; nimahsela, ni thum nîah a tho leh ang,” tiin a sawi a. 34 Amaherawhchu, chûng thilte awmzia chu an hre lo, an laka thup a nih avângin a thusawite chu an hre thiam lo a ni.

35 Isua Jeriko khua a thlen dâwn hnaih chuan, mitdel pakhat hian kawng sîra ṭhuin kut a lo dawh a. 36 Mipui kal thâwm a hriat chuan thil awmzia a zâwt a. 37 A hnênah: “Nazaret Isua a lo kal a ni,” an ti a. 38 Chu veleh ani chu: “Isu, Davida Fapa, min khawngaih* rawh!” tiin a au chhuak ta a. 39 A hma lama kal mipuite chuan ani chu ngawi tûra hrilhin an hau va; ani erawh chu ring lehzualin: “Davida Fapa, min khawngaih* rawh!” tiin a au chhunzawm zêl a. 40 Tichuan, Isua chu a ding a, a hnêna rawn hruai tûrin thu a pe a. A bul a rawn thlen chuan a hnênah: 41 “Eng nge tihsak che ila i duh?” tiin a zâwt a. Ani chuan: “Lalpa, ka mit hian khua hmu leh thei se ka duh a ni,” a ti a. 42 Isua’n a hnênah: “Lo hmu leh thei tawh ang che; i rinnain a ti dam che a ni,” a ti a. 43 Tichuan, chawplehchilhin a lo hmu leh thei ta nghâl a, Pathian chawimawi chungin Isua chu a zui ta a. Tin, chu chu an hmuhin mi zawng zawngin Pathian an fak a.

19 Tin, Isua chu Jeriko khuaah lûtin a kal zêl a. 2 Chutah chuan mi pakhat Zakaia a awm a; ani chu chhiahkhawntu hotu a ni a, mi hausa tak a ni. 3 Ani chuan Isua chu hmuh a châk hle a; nimahsela, mipui avâng leh a tawi êm avângin a hmu thei lo va. 4 Isua kalna tûr kawngah chuan lo va tlân khalhin amah a hmuh theih nân theipui kûngah a lâwn a. 5 Tin, Isua’n chu hmun a rawn thlen chuan a hawi chho va, a hnênah: “Zakai, lo chhuk thuai rawh, vawiinah hian i inah ka thleng dâwn a ni,” a ti a. 6 Chu veleh a chhuk nghâl a, Isua chu lâwm takin a mikhual ta a. 7 Mipuite’n chu chu an hmuhin, an vaiin: “Mi sual ina thleng tûrin a kal tâk saw,” tiin an phunnawi a. 8 Zakaia erawh chu a ding a, Lalpa hnênah: “En teh, Lalpa, ka thil neih zâtve mi retheite hnênah ka pe ang a, dik lo taka an thil ka lâksakte chu a lêt liin ka rûl leh ang,” a ti a. 9 Tin, Isua’n a hnênah: “Vawiinah he inah hian chhandamna a lo thleng ta, ani pawh hi Abrahama fapa a nih avângin. 10 Mihring Fapa hi kawng bote zawng tûr leh chhandam tûra lo kal a ni si a,” a ti a.

11 Chûng thute an ngaihthlâk lai chuan Jerusalem khua a thlen dâwn tawh avâng leh, Pathian Ram lo thleng nghâl tûra an ngaih avângin tehkhin thu dang a sawi leh a. 12 Ani chuan: “Lal fapa pakhat lala ruat a nih hnua lo kîr leh tûrin ram hla takah a zin a. 13 A bâwih sâwmte chu kovin an hnênah mina* sâwm a pe a, ‘Ka lo lêt leh hma loh hei hian lo sumdâwng rawh u,’ tiin a hrilh a. 14 Nimahsela, a khua leh tuite chuan ani chu an hua a, ‘He mi hi kan lal atân kan duh lo,’ tia sawi tûrin palaite an tîr zui ve nghâl a.

15 “Lala ruat a nih hnua a rawn kîr leh chuan a bâwih, pawisa* a pêkte chu an sumdâwnna aṭanga hlâwkna an hmuh zât a hriat theih nân a ko khâwm a. 16 Tin, a hmasa ber chu a rawn kal a, ‘Lalpa, i mina khat khân mina sâwm dang ka thawk chhuak asin,’ a ti a. 17 Ani chuan a hnênah, ‘Bâwih ṭha, i ti ṭha e! Thil tlêm tê chunga i rinawmzia i lantîr avângin, khaw sâwm chunga thuneituah awm ang che,’ a ti a. 18 Tin, a pahnihna a lo kal a, a hnênah, ‘Lalpa, i mina khat khân mina dang panga ka thawk chhuak asin,’ a ti a. 19 Chu mi hnênah pawh chuan, ‘Nang pawh khaw panga chunga hotuah awm rawh,’ a ti a. 20 Nimahsela, mi dang pakhat a lo kal a, ‘Lalpa, heta hi i mina khat kha, puana tuamin ka dah ṭha a. 21 Mi khirh tak i nih avângin ka hlau che a ni; i dah luh loh pawh i la chhuak a, i tuh loh pawh i seng ṭhîn si a,’ a ti a. 22 Ani chuan a hnênah, ‘Bâwih sual, i thusawi ngeiin thiam loh ka chantîr ang che. Mi khirh tak ka ni tih leh, ka dah luh lohnaah pawh la chhuakin, ka tuh loh pawh ka seng ṭhîn tih i hria maw? 23 A nih chuan, engvângin nge ka pawisa* hi a pung awma pûktîrtute hnênah* i dah loh? Tichuan, ka lo thlen veleh a pung nên ka la tûr,’ a ti a.

24 “Tin, a bula dingte hnênah chuan, ‘A mina khat kha lâksak ula, mina sâwm neitu hnênah khân pe rawh u,’ a ti a. 25 Nimahsela, anni chuan a hnênah, ‘Lalpa, ani chuan mina sâwm a nei alâwm!’ an ti a. 26 ‘Ka hrilh a che u, tu pawh a nei apiang chu pêk belh a ni ang a; a nei lo erawh chu a neih chhun pawh lâksak a ni ang. 27 Chu bâkah, hêng ka hmêlma an lal atâna min duh lotute hi rawn hruai ula, ka hmaah hian ti hlum rawh u,’ a ti a,” tiin.

28 Chûng thute a sawi zawh hnu chuan, Jerusalem lam pan chhovin a kal zêl a. 29 Tin, Oliv Tlânga awm Bethphage leh Bethani khua a thlen dâwnin a zirtîrte zînga pahnih a tîr a. 30 An hnênah: “In hmaa khuaah sâwn va kal ula, in luh hnuah tu ma la chuan ngai lohna sabengtung tuai inthlung in hmu ang. Phelh ula, rawn kai ang che u. 31 Tu pawhin, ‘Engvângin nge in phelh?’ tia an zawh che u chuan, ‘Lalpa’n a mamawh a ni,’ tiin sawi ang che u,” a ti a. 32 Tichuan, a tirhte chu an kal ta a, Isua’n an hnêna a sawi ang chiah chuan an va hmu a. 33 Nimahsela, sabengtung tuai chu an phelh laiin, a neitute chuan an hnênah: “Engvângin nge sabengtung tuai kha in phelh?” an ti a. 34 Anni chuan: “Lalpa’n a mamawh a ni,” an ti a. 35 Tichuan, Isua hnênah an rawn kai a, sabengtung tuai chungah chuan an kawrfualte an phah a, Isua chu a chuang ta a.

36 Tin, a kal lai chuan an kawrfualte chu kalkawngah an lo phah zêl a. 37 Oliv Tlâng aṭanga kawng chhuk thla inṭanna a thlen dâwn hnaih chuan, zirtîr mipui zawng zawng chu a thil mak ropui tihte an hmuh avângin an lâwm hle a, ring taka Pathian fakin: 38 “Jehova* hminga Lal lo kal chu malsâwmin awm rawh se, vânah remna awm sela, chungnung bera awm Pathian hnênah khian ropuina awm rawh se!” an ti a. 39 Nimahsela, mipui zînga Pharisai ṭhenkhat chuan a hnênah: “Zirtîrtu, i zirtîrte hi ngawi tûrin thu pe rawh,” an ti a. 40 Ani erawh chuan: “Ka hrilh a che u, hêng mite hi an ngawih reng chuan, lungte an au chhuak ang,” tiin a chhâng a.

41 Tin, Isua’n Jerusalem a thlen dâwn hnaihin khawpui chu a thlîr a, a ṭah a. 42 Ani chuan: “Aw, nang hian thlamuanna* petu tûr thilte hi hre thiam la ka va ti êm! Nimahsela, chûngte chu tûnah chuan i lakah thup a ni si a. 43 I hmêlmate’n i vêlah thing suih zuma kulh siamin an hual ang che a, kil tin aṭangin mangang takin an siam ang che, chutiang nîte chu i chungah a lo la thleng ang. 44 I fate nên leiah an paih ang che a, i chhûnga lung inrem rêng rêng pakhat mah an zuah lo vang, enfiah i nih lai i hriat loh avângin,” a ti a.

45 Tichuan, biak inah a lût a, thil zuartute chu a hnawt chhuak a. 46 An hnênah: “‘Ka in chu ṭawngṭaina in a ni ang,’ tih ziak a ni; nimahsela, nangni erawh chuan suamhmangte pûkah in siam a nih hi,” a ti a.

47 Ani chuan biak inah nî tin a zirtîr ṭhîn a. Puithiam lal te, dân hre mi te leh, vântlâng hruaitute erawh chuan amah tih hlum dân kawng an zawng a; 48 mahse, an hmu lo, a thusawi ngaithla tûra mite a hnêna an awm reng ṭhin avângin.

20 Ni khat chu biak inah mite zirtîra chanchin ṭha a hrilh laiin, puithiam lalte leh dân hre mite chu upate nên an lo kal a. 2 A hnênah: “Tu thuneihnain nge hêng thilte hi i tih? A nih loh leh, tuin nge thuneihna pe che? Min hrilh rawh,” an ti a. 3 Isua’n an hnênah: “Kei pawhin zawhna pakhat ka zâwt ve ang che u, min han hrilh teh u: 4 Johana baptisma kha vâna mi thu nge mihring thu?” a ti a. 5 Tichuan, an ngaihtuahho va: “‘Vâna mi thu,’ kan tih chuan, ‘Engati nge ani chu in rin loh?’ a ti ang a. 6 Mahse, ‘Mihring thu,’ kan tih chuan mi zawng zawngin lungin min dêng mai ang, Johana chu zâwlneiah an ngai si a,” an ti a. 7 Tichuan, Johana’n tu hnên aṭangin nge thuneihna a dawn an hriat loh thu an hrilh a. 8 Isua’n an hnênah: “Hêng thilte hi tu thuneihnain nge ka tih ka hrilh bîk lo vang che u,” a ti a.

9 Tichuan, mipui hnênah he tehkhin thu hi a sawi a: “Pa pakhatin grêp huan a siam a, huan enkawltute chu hlawh neiin a enkawltîr a; tichuan, hun eng emaw chen châm tûrin hmun hla takah a zin ta a. 10 A rah lawh a lo hun chuan, huan enkawltute hnêna a rah ṭhenkhat va la tûrin grêp huanah chuan a bâwih pakhat a tîr a. Nimahsela, huan enkawltute chuan an vuak hnuah kut ruakin an hawtîr ta a. 11 Tin, bâwih dang a tîr leh a, ani pawh chu lo vuain, zahthlâk takin an siam a, kut ruakin an hawtîr ve leh ta a. 12 A pathumna a tîr leh a, ani pawh chu lo hliamin an paih chhuak a. 13 Tichuan, grêp huan neitupa chuan, ‘Engtin nge ka tih ang aw? Ka fapa duh tak hi ka tîr mai teh ang. Ani hi chu an lo zah mahna,’ a ti a. 14 Huan enkawltute’n ani chu an lo hmuh chuan, ‘Ro luahtu tûr a nih saw. That ila, a ro luah tûr hi kan ta a ni mai ang,’ tiin an inrâwn khâwm a. 15 Tichuan, grêp huan aṭangin an hnûk chhuak a, an ti hlum ta a. A nih chuan, grêp huan neitupa chuan anni chu engtin nge a tih ang? 16 Ani chu lo kalin, huan enkawltute chu a ti hlum ang a, a grêp huan chu mi dangte a enkawltîr ang,” a ti a.

Chûng thu an hriat chuan: “Chûng êm chu thleng suh se!” an ti a. 17 Nimahsela, anniho chu a en a: “A nih leh, ‘In satute lung duh loh kha a kila lung pawimawh ber a lo ni,’ tih thuziak awmzia hi eng nge ni ta ang? 18 Tu pawh chu lung chunga tla apiang chu a keh sawm ang a. A delh phei chu a râwt dip ang,” a ti a.

19 Dân hre mite leh puithiam lalte’n chu tehkhin thu chu anmahni a sawi chhan tih an hriat avângin man nghâl an tum a; nimahsela, mipui an hlau si a. 20 Chîk taka an enthlâk hnuah, thuneitute leh ram awptu hnêna an thlen theihna tûrin, thu an sawi sualtîr theih nân a rûka an rawih mi fel lema changte chu an tîr a. 21 Anni chuan heti hian an zâwt a: “Zirtîrtu, dik takin thu i sawiin i zirtîr ṭhîn a, duhsak bîk i nei lo va, Pathian chungchâng thutak i zirtîr tih kan hria: 22 A nih leh, Kaisara hnêna chhiah chawi hi kan tân a thiang* nge thiang lo?” an ti a. 23 Nimahsela, an vervêkzia a hria a, an hnênah: 24 “Denarii* khat min han hmuh teh u. Tu lem leh tu hming nge chuang hi?” a ti a. Anni chuan: “Kaisara,” an ti a. 25 Ani chuan an hnênah: “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. 26 Mipui hmaa a thusawiah a sual lai an hmu lo va, a chhânna chu mak an ti hle a, an ngawi ta reng a.

27 Tichuan, thawhlehna a awm lo titu Saddukai ṭhenkhat a hnênah lo kalin: 28 “Zirtîrtu, Mosia’n, ‘Tu emawin fa nei lovin a nupui thihsan sela, a unaupain a nupui chu a nei ang a, a unaupa tân fate a neihsak tûr a ni,’ tiin min ziahsak a. 29 Aw le, unau mipa pasarih an awm a. A upa ber chuan nupui a nei a; nimahsela, fa nei lovin a thi a. 30 A pahnihna chuan chu hmeichhia chu nupuiah a nei a, ani pawh chu a thi ve leh a, 31 a pathumna chungah pawh chutiang bawk chu a thleng a. Chutiang chuan, an pasarihin nupuiah an nei ṭheuh va, fa nei lovin an thi ta vek a. 32 A tâwpah, hmeichhia pawh chu a thi ta a. 33 A nih leh, thawhlehnaah chuan tu nupui ber nge ni ta ang? An pasarih chuan nupuiah an nei ṭheuh si a,” tiin an zâwt a.

34 Isua’n an hnênah: “He khawvêl* mite hi nupui pasal an innei ṭhîn. 35 Nimahsela, khawvêl lo la awm tûra awm tlâka ruatte leh, thawhlehnaa tel tlâka ruatte chu nupui pasal an innei tawh lo vang. 36 Thih pawh an thi leh thei tawh lo vang, vântirhkohte ang an ni dâwn si a; an thawhleh dâwn avângin Pathian fate an ni ang. 37 Nimahsela, mitthi kaihthawh chungchâng thu-ah chuan, Mosia pawhin hnimbuk chungchâng thu-ah khân Jehova* chu, ‘Abrahama Pathian, Isaaka Pathian leh, Jakoba Pathian,’ tia kovin a hriattîr kha. 38 Ani chu mitthi Pathian a ni lo va, mi nung Pathian a ni zâwk, ani ngaihah chuan an zavaiin an nung vek si a,” a ti a. 39 Dân hre mi ṭhenkhat chuan: “Zirtîrtu, i sawi dik khawp mai,” tiin an chhâng a. 40 Zawhna pakhat lek pawh an zâwt ngam tawh si lo.

41 Anni chu heti hian a zâwt lêt a: “Engvângin nge Krista chu Davida fapa a ni an tih? 42 Davida ngeiin Fakna Hla buah, ‘Jehova’n* ka Lalpa hnênah: “I hmêlmate ka rah behtîr* hma loh che chuan, 43 ka ding lamah ṭhu rawh,” a ti,’ tiin a sawi si a. 44 Davida’n ani chu Lalpa tia a koh si chuan, engtin nge a fapa a nih theih ang?” a ti a.

45 Tichuan, mi zawng zawng hriat laiin a zirtîrte hnênah: 46 “Dân hre mite lakah fîmkhur rawh u, anni chuan kawrfual haa lên kual te, bazâra chibai bûk te, inkhâwmna inah a hma lama* ṭhut te leh, ruai ṭhehnaa hmun ṭha bera ṭhutte an duh ṭhîn a. 47 Hmeithaite thil neih* an lâksak a, mi dangte ngaihsân an hlawh theih nân rei tak tak an ṭawngṭai ṭhîn. Anni chuan hremna nasa lehzual an tâwk ang,” a ti a.

21 Tin, a dâk chhuak a, mi hausate’n thawhlâwm bâwma thawhlâwm an thlâk lai chu a hmu a. 2 Hmeithai rethei tak pakhatin pawisa thîr pahnih hlutna nei tlêm tak* a thlâk lai a hmu bawk a. 3 Ani chuan: “Tih tak meuhvin ka hrilh a che u, he hmeithai rethei hian mi dang zawng zawng aiin a thlâk tam zâwk. 4 Hêng mi zawng zawngte hian an neih chuang liam an thlâk a, ani erawh hi chuan a mamawh ngawih ngawih, a neih chhun, a inchâwmna tûr a thlâk a ni,” a ti a.

5 A hnuah mi ṭhenkhatin biak in chu lung ṭha tak tak leh Pathian hnêna thilpêktea cheimawi a nih dân an sawi laiin, 6 ani chuan: “Hêng thil tûna in hmuh mêkte hi, lung inrem pakhat mah zuah lova tih chim vek nîte a lo la thleng ang,” a ti a. 7 Tin, anni chuan a hnênah: “Zirtîrtu, chûng thilte chu engtikah nge a lo thlen ang? Chûng thilte lo thlen hun tûr chhinchhiahna chu eng nge ni ang?” tiin an zâwt a. 8 Ani chuan: “Bum in nih loh nân fîmkhur rawh u, ‘Ani chu ka ni,’ tih leh, ‘A hun a thleng dâwn ta,’ tia sawiin ka hming chhâlin mi tam tak an lo kal ang. Anni chu zui suh u. 9 Chu bâkah, indo thu leh buai thu in hriat hunah hlau suh ang che u. Chûngte chu thleng hmasa tûr rêng a ni si a; nimahsela, tâwpna erawh chu a thleng nghâl lo vang,” a ti a.

10 Tichuan, an hnênah: “Hnam hrang leh hnam hrang an indo vang a, ram hrang leh ram hrang an indo vang a, 11 lîr nasa takin a nghîng a nghîng ang a, hmun hrang hrangah ṭâmte a tla ang a, hrite a lêng bawk ang. Thil hlauhawm tak takte leh vânah chhinchhiahna râpthlâk tak takte a lo awm ang.

12 “Nimahsela, chûng zawng zawng chu a thlen hmain mite’n an man ang che u a, an ti duhdah ang che u a, inkhâwmna inahte hruai che uin, tân inahte an la khung ang che u. Ka hming avângin lalte leh rorêltute hmaa hruai in la ni ang. 13 Chu chuan thu hrilh theihna hun remchâng a pe ang che u. 14 Chuvângin, in thiamthu sawi dân tûr ngaihtuah lâwk lo tûrin in rilru siam tlat ang che u. 15 In hmêlma zawng zawngin an dova an hnial theih lohna tûr che uin, thusawi tûr leh finna ka pe dâwn si che u a. 16 Chu bâkah, in nu leh pa te, in unau te, in chhûngkhat laina te leh, in ṭhiante’n an la mantîr* ang che u a, in zînga ṭhenkhat an la ti hlum ang che u. 17 Ka hming avângin mi zawng zawng huat in la ni ang a. 18 Nimahsela, in samzai khat tê pawh a boral lo vang. 19 Chhel taka in awm chuan in nun in chhanhim ang.

20 “Nimahsela, sipaihote’n Jerusalem an hual in hmuh hunah, tih chhiat a ni thuai dâwn tih hria ang che u. 21 Chutih hunah chuan, Judai rama awmte chu tlângahte tlânchhia sela, a chhûnga awmte chuan chhuahsan rawh se; a chhehvêla awmte chu a chhûngah lût hek suh se. 22 Chûng nîte chu phuba lâkna nî a ni dâwn si a, thuziak zawng zawng a thlen famkim theihna tûrin. 23 Chûng nîte chu raipuarte leh nau pawmte tân a va hrehawm lehzual dâwn êm! He ramah hian hrehawm nasa tak a lo thlen dâwn avâng leh he mite chungah hian thinurna a lo thlen dâwn avângin. 24 Tichuan, ngûnhnâma tih hlum an ni ang a, hnam zawng zawng hnênah sala hruai an ni ang. Tin, hnam dangte* tâna hun ruat a kim hma loh Jerusalem chu hnam dangte* rah behin a awm ang.

25 “Tin, nîah te, thlaah te leh, arsiahte chhinchhiahnate a awm ang a, leia hnamte chu mangang leh tuifinriat rûm leh a fâwn avânga tih tûr hre lovin an awm ang. 26 Hlauh avâng leh leia thil lo thleng tûrte ngaihtuah avângin mite an thidang ang, vân thiltihtheihnate a nghîng dâwn si a. 27 Tin, mihring Fapa hi thiltihtheihna leh ropuina nasa tak nêna chhûm zînga a lo kal an la hmu ang. 28 Nimahsela, chûng thilte a thlen ṭan hunah chuan ngîl taka dingin dâk chhuak rawh u, in chhandamna chu a hnaih tawh avângin,” a ti a.

29 Tichuan, an hnênah tehkhin thu a sawi a: “Theipui kûng leh thingkûng dang zawng zawngte hi ngaihtuah teh u. 30 A chawr no in hmuh chuan nipui a hnai tih in hre ṭhîn. 31 Chutiang bawkin, chûng thilte chu a lo thleng in hmuh hunah, Pathian Ram a hnai tih hria ang che u. 32 Tih tak meuhvin ka hrilh a che u, chûng zawng zawng chu a thlen hma loh chuan he chhuan hi a boral tawp lo vang. 33 Lei leh vân a boral ang a, ka thu erawh chu a boral tawp lo vang.

34 “Amaherawhchu, ei puar lutuk te, zu ruih te leh, nuna lungkhamnate’n in rilru a tih hah lutuk ngai lohna tûrin fîmkhur rawh u. Chu nî chu in chungah a lo thleng thut ang, 35 thang âwk ang maiin. Lei pum puia awmte chungah chutiang chuan a lo thleng dâwn si a. 36 Chûng thil lo thleng tûr zawng zawngte laka in dam khawchhuah theih nân leh, mihring Fapa hmaa in din theih nân eng lai pawhin ṭawngṭai ula, inring rengin awm rawh u,” a ti a.

37 Tin, chhûnah biak inah a zirtîr ṭhîn a, zânah erawh chuan kal chhuakin Oliv Tlângah a riak ṭhîn a. 38 Zîng hma takah a thusawi ngaithla tûrin mi zawng zawng biak inah a hnênah an lo kal ṭhîn.

22 Tin, Chhang Dawidim Telh Loh Kût, Kalhlên Kût tia koh chu a lo hnai ta a. 2 Puithiam lalte leh dân hre mite chuan mipui an hlauh avângin, amah tih hlum dân tûr kawng ṭha ber an zawng a. 3 Tichuan, Sâwm Pahnihte zînga mi Juda Iskariota kawchhûngah chuan Setana a lût a. 4 A kal a, Isua phatsan tûrin puithiam lalte leh biak in hotute chu a va bia a. 5 Anni chu an lâwm hle a, tangkaraw pawisa pêk an remti a. 6 Tin, ani pawhin rem a ti a, mipui awm lohna hmuna a phatsan theihna tûr hun remchâng a zawng ṭan ta a.

7 Chhang Dawidim Telh Loh nî, Kalhlên Kût inthawina hlanna tûr nî chu a lo thleng a. 8 Isua’n Petera leh Johana tîrin an hnênah: “Kal ula, Kalhlên Kût chaw kan ei tûrin va buatsaih rawh u,” a ti a. 9 Anni chuan a hnênah: “Khawiah nge va buatsaih ila i duh?” an ti a. 10 Ani chuan an hnênah: “Ngai teh u! Khawpuia in luh hunah, mi pakhat hlum bêla tui puin a tâwk ang che u a, a luhna inah zui lût ang che u. 11 Tin, in neitupa hnênah chuan, ‘Zirtîrtuin: “Ka zirtîrte nêna Kalhlên Kût chaw kan eina tûr mikhual pindan chu khawiah nge?” a ti a che,’ ti ang che u. 12 Ani chuan in chung pindan zau tak, in chhûng bungraw peih sa diam awmna a kawhhmuh ang che u. Chutah chuan in buatsaih dâwn nia,” a ti a. 13 Tichuan, an kal a, an hnêna a sawi ang chiah chuan an va hmu a, Kalhlên Kût chaw an buatsaih ta a.

14 Tin, an chaw ei hun a lo thlen chuan tirhkohte nên dawhkân an kîlho va. 15 Ani chuan an hnênah: “Hrehawm ka tawrh hmain, Kalhlên Kût chaw eipui che u hi ka duh êm êm a ni. 16 Ka hrilh a che u, Kalhlên Kûtin a entîr zawng zawng Pathian Rama a thlen famkim vek hma loh chuan, ka ei leh tawh lo vang,” a ti a. 17 Tichuan, no a la a, lâwmthu a sawi zawhin: “Hei hi la ula, inpe chhâwng zêl rawh u. 18 Ka hrilh a che u, tûn aṭang chuan Pathian Ram a lo thlen hma loh uain ka in leh tawh lo vang,” a ti a.

19 Tin, chhang a la a, lâwmthu a sawi zawhin a phel a, an hnênah a pe a: “Hei hi ka taksa, in aia pêk tûra chu a ni. Min hriat reng nân hei hi ti ṭhîn rawh u,” a ti a. 20 Chutiang bawkin, zanriah an ei zawhin no pawh chu a la a: “He no hi in aia chhuak tûr ka thisen hmanga siam thuthlung thar chu a ni.

21 “Nimahsela, ngai teh u! Mi phatsantu tûra kut chu ka hnênah, dawhkân chungah hian a awm a ni. 22 Mihring Fapa hi sawi lâwk tawh ang ngeiin a thi dâwn a ni; amaherawhchu, amah phatsantu chunga thleng tûr chu a va râpthlâk dâwn êm!” a ti a. 23 Tichuan, ‘Kan zîngah chutiang thil tih tum chu tu nge ni ang?’ tiin an inzâwt a.

24 Tin, an zîngah tu nge ropui ber ang tih chungchângah inhnialna nasa tak a lo chhuak a. 25 Nimahsela, Isua’n an hnênah: “Hnam dangte chu an lalte an chungah an inti lal hle a, an chunga thuneitute pawh mi dangte tâna thil ṭha titute anga hriat an ni ṭhîn. 26 Nangni erawh chutiang chu in ni tûr a ni lo. In zînga ropui ber chu naupang ber angin awm zâwk sela, hma hruaitu pawh rawngbâwltu angin awm rawh se. 27 Tu nge ropui zâwk, chaw kîltu nge rawngbâwltu? Chaw kîltu a ni lo vem ni? Nimahsela, kei erawh chu in zîngah rawngbâwltu angin ka awm hi.

28 “Amaherawhchu, nangni hi fiahna ka tawh laia mi awmpui tlattute in ni a; 29 ka Pain thu mi thlunpui angin, lalrama chanvo in neih theih nân thu ka thlunpui a che u. 30 Ka Lalrama ka dawhkâna in ei a, in in theihna tûr leh, Israel hnam 12-te chunga rorêl tûra lalṭhutthlênga in ṭhut theihna tûrin.

31 “Simon, Simon, en teh! Setana’n buh thlei anga a thlei theihna tûr che uin, in vai hian a dîl che u asin. 32 Nimahsela, i rinna a bo loh nân ka ṭawngṭaisak che a ni; inchhîra i lêt leh hunah i unaute ti chak ang che,” a ti a. 33 Tin, ani chuan a hnênah: “Lalpa, lung in tân leh thih ngai hial pawh ni se, i hnênah chuan kal ve zêl ka inhuam asin,” a ti a. 34 Isua erawh chuan: “Peter, ka hrilh a che, vawiinah hian âr a khuan hmain vawi thum mi phat ang,” a ti a.

35 Tichuan, an hnênah: “Pawisa ip te, iptê te, pheikhawkte keng lova ka tirh chhuah che u khân tlâkchham in nei em?” a ti a. Anni chuan: “Nei lo!” an ti a. 36 Tin, an hnênah: “Tûnah chuan pawisa ip neiin keng sela, chutiang bawkin iptê nei pawhin keng rawh se; tin, ngûnhnâm nei lo chuan a kawr hralh sela, lei rawh se. 37 Ka hrilh a che u, ‘Ani chu dân bawhchhetute zîngah chhiar tel a ni ta,’ tia ziak kha ka chungah a thleng famkim tûr a ni. Ka chungchâng an lo ziahte kha a thleng famkim dâwn ta,” a ti a. 38 Tin, anni chuan: “Lalpa, en teh! Heta hi ngûnhnâm pahnih a awm,” an ti a. Ani chuan an hnênah: “A tâwk e,” a ti a.

39 Tin, chuta ṭang chuan a chhuak a, a tih ṭhin dân pângngaiin Oliv Tlângah a kal a, a zirtîrte pawhin an zui a. 40 A hmun an thlen chuan, Isua’n an hnênah: “Thlêmnaa in tlûk luh loh nân ṭawngṭai reng rawh u,” a ti a. 41 Tichuan, lung vawm phâk lekah a va kal hrang a, ṭhingṭhiin a ṭawngṭai a: 42 “Ka Pa, rem i tih chuan he no hi mi lâk bosak rawh. Nimahsela, ka duh dân ni lovin, i duh angin ni zâwk rawh se,” a ti a. 43 Tichuan, vân aṭangin vântirhkoh pakhat a hnênah rawn inlârin a rawn ti chak a. 44 Nimahsela, a thlaphâng êm êm a, ṭhahnemngai lehzualin a ṭawngṭai zêl a, a thlan chu thisen ang maiin leiah a far a. 45 A ṭawngṭai zawh chuan a tho va, a zirtîrte hnênah a kal a, anni chu lungngaia an chauh êm avânga muhîlin a va hmu a. 46 Ani chuan an hnênah: “Engvângin nge in muthilh? Tho ula, thlêmnaa in tlûk luh loh nân ṭawngṭai reng rawh u,” a ti a.

47 A la ṭawng lai mêkin, mipui an lo kal a, anni chu tirhkoh Sâwm Pahnihte zînga pakhat Juda chuan a rawn hruai a, Isua chu fawh tumin a pan a. 48 Nimahsela, Isua’n a hnênah: “Juda, mihring Fapa hi fâwpin i phatsan dâwn em ni?” a ti a. 49 A bula awmte’n thil thleng tûr an hmuh chuan: “Lalpa, ngûnhnâmin kan sât dâwn em ni?” an ti a. 50 An zînga pakhat chuan puithiam lalber bâwih chu a sât ta mai a, a beng ding lam a sah thlâksak a. 51 Isua erawh chuan: “A tâwk e,” a ti a. Tichuan, a beng chu khawihin, a tih damsak a. 52 Isua chuan a hnêna lo kal puithiam lal te, biak in hotu te leh, upate hnênah chuan: “Suamhmang man tûr ang maiin, ngûnhnâmte leh talhtumte kengin in lo kal a ni maw? 53 Nî tin biak ina ka awm lai khân min man in tum si lo va. Nimahsela, tûn hi in hun a ni, thim thuneihna nên,” a ti a.

54 Tichuan, ani chu an man a, an hruai a, puithiam lalber inah an kalpui a; Petera erawh chuan hla tak aṭangin a zui a. 55 In hung chhûng kawtlaiah chuan mei an chhêm a, an ṭhu khâwm a, Petera pawh an zîngah a va ṭhu ve a. 56 Nimahsela, chhiahhlawh hmeichhe pakhatin mei lum aia a ṭhu lai a hmuh chuan, ngun taka enin: “He pa hi a hnêna awm ve kha a ni,” a ti a. 57 Ani erawh chuan: “Hmeichhia, ani chu ka hre lo,” tiin a pha a. 58 A hnu lawkah, mi dang pakhatin a rawn hmu a: “Nang pawh hi an zînga mi i ni,” a ti a. Petera erawh chuan: “Mihring, ka ni lo ve,” a ti a. 59 Dârkâr khat hnu vêlah mi dang pakhatin inring tâwk takin: “He pa pawh hi a hnêna awm ve kha a ni chiang mai, Galili mi a ni si a!” a ti a. 60 Nimahsela, Petera chuan: “Mihring, i thusawi chu ka hre lo ve,” a ti a. Tin, a la ṭawng lai mêk chuan âr a khuang ta nghâl a. 61 Chu veleh Lalpa chu a hawi a, Petera chu a en a, Petera chuan Lalpa’n a hnêna: “Vawiinah hian âr a khuan hmain vawi thum mi phat ang,” tia a sawi kha a hre chhuak a. 62 Tin, a kal chhuak a, a ṭap ta zawih zawih a.

63 Isua vêngtute chuan ani chu nuihzatin, an vua a. 64 Tichuan, a hmai an tuamsak hnuah: “Tuin nge vua che? Min han hrilh teh!” tiin an zâwt an zâwt a. 65 Tin, nasa takin an sawichhe bawk a.

66 Khua a lo vâr chuan vântlâng upaho te, puithiam lal te leh, dân hre mite chu an kal khâwm a, Isua chu Sanhedrin-ah* an hruai a: 67 “Krista i nih chuan, min hrilh rawh,” an ti a. Ani erawh chuan: “Hrilh che u mah ila, in âwih chuang lo vang. 68 Chu bâkah, zâwt che u mah ila, min chhâng lo vang. 69 Nimahsela, tûn aṭang chuan mihring Fapa hi Pathian thiltithei tak ding lamah a ṭhu tawh ang,” a ti a. 70 Tichuan, an vaiin: “A nih chuan, Pathian Fapa i ni em?” an ti a. Ani chuan an hnênah: “Nangmahni ngeiin ka nih thu in sawi alâwm,” a ti a. 71 Anni chuan: “Thuhretu dang kan ngai tawh em ni? Ama kâ ngeiin a sawi kan hre tawh alâwm,” an ti a.

23 Tin, mipuite chu an vaiin an tho va, Isua chu Pilata hnênah an hruai ta a. 2 Anni chuan: “He pa hian kan hnam a ti khawlo va, Kaisara hnêna chhiah chawi a khap a, Krista, lal a nih thu a sawi kan hria,” tiin an hêk a. 3 Pilata’n a hnênah: “Judate Lal i ni em?” tiin a zâwt a. Ani chuan a hnênah: “I sawi ang ngei chu a ni e,” tiin a chhâng a. 4 Tin, Pilata’n puithiam lalte leh mipuite hnênah chuan: “He paah hian sualna eng mah ka hmu lo,” a ti a. 5 Nimahsela, anni chu: “Galili aṭanga he lai hmun thleng hian, Judai ram pumah mite zirtîrin a fuihpawrh a ni,” tiin an ṭang tlat a. 6 Chu chu a hriatin, Pilata chuan ani chu Galili mi a nih leh nih loh a zâwt a. 7 Heroda rorêlna huam chhûnga awm a ni tih a hriat hnu chuan, chutih laia Jerusalema awm Heroda hnênah a tîr ta a.

8 Heroda’n Isua a hmuh chuan a lâwm hle a. A chungchâng tam tak a lo hriat tawh avângin, hun rei tak chhûng Isua chu hmuh a lo duh tawh a, a thil mak tih ṭhenkhat hmuh a inbeisei bawk a ni. 9 Tichuan, zawhna tam tak a zâwt a; nimahsela, pakhat mah a chhâng lo. 10 Puithiam lalte leh dân hre mite chu an ding reng a, nasa takin ani chu an hêk a. 11 Tin, Heroda leh a sipaite chuan hmusit takin an cheibâwl a, Heroda chuan puan ropui tak sintîrin nuihza siam nân a hmang a; tichuan, Pilata hnênah a tîr lêt leh a. 12 Chumi nî ngei chuan Heroda leh Pilata chu ṭhian an lo ni ta a, a hma zawng chuan an inngeih lo ṭhîn hle.

13 Pilata chuan puithiam lal te, rorêltu te leh, mipuite chu a ko khâwm a. 14 An hnênah: “He mi hi mite hel tûra fuihtu angin ka hnênah in rawn hruai a. Ngai teh u! In hmaah ka zâwt chiang a; nimahsela, in puhnaah hian a sualna eng mah ka hmu lo. 15 Heroda pawhin a hmuh loh avângin, kan hnênah a rawn tîr lêt leh a nih hi. En teh u, thihna khawp thil eng mah a ti lo. 16 Chuvângin, ka hrem ang a, ka chhuah mai ang,” a ti a. 17* —— 18 Nimahsela, mipuite chu: “He pa hi ti hlum la,* Barabba kha min chhuahsak rawh!” tiin an au va. 19 (Barabba chu khawpuia helna chhuak avâng leh tual thah avânga tân ina tâng a ni.) 20 Pilata chuan Isua chu chhuah a duh avângin anniho chu a be leh a. 21 Anni chu: “Banah khêngbet rawh! Banah khêngbet rawh!”* tiin an au va. 22 A vawi thumna atân: “Engvângin maw? He mi hian eng thil ṭha lo nge a tih? Amahah thihna khawp sual eng mah ka hmu lo; chuvângin, ka hrem ang a, ka chhuah mai ang,” a ti a. 23 Chu veleh nasa lehzuala nawrin, bana ti hlum tûrin ring takin an au va, an aw chuan a hneh ta a. 24 Tin, Pilata chuan an ngenna ang chuan thu a ti tlu ta a. 25 Helna avâng leh tual thah avânga tâng, chhuahsak tûra an ngen chu a chhuahsak a, Isua erawh chu an duh duha an tih atân a pe ta a.

26 Tin, an hruai laiin khawpui pâwn aṭanga lo kal Kurini khuaa mi Simona chu an lo ti ding a, nghaisakna ban* pu-a Isua zui tûrin thu an pe a. 27 Mipui tam takin Isua chu an zui a, chûng zîngah chuan hmeichhia lungngai taka an âwm inchûm inchûmte leh amah ṭahtute pawh an tel ve a. 28 Isua’n hmeichhiate lam chu hawiin an hnênah: “Jerusalem fanute u, min ṭah tawh suh u, nangmahni leh in fate tân ṭap zâwk rawh u. 29 Ngai teh u! Mite’n, ‘Hmeichhe ching te, naupai ngai lo pum te leh, nau hnêk ngai loh hnutê chu a nihlawh e!’ an tih nîte a lo la thleng ang. 30 Tichuan, tlâng hnênahte, ‘Min delh rawh!’ an la ti ang a, mual hnênahte, ‘Min khuh rawh!’ an la ti ang. 31 Thing a hrin lai maha chutianga an tih chuan, a ro hunah phei chuan engtin tak ti ang maw?” a ti a.

32 Tichuan, Isua ruala tih hlum tûrin dân bawhchhetu mi pahnih an hruai ve a. 33 Tin, Luruh an tih hmun an thlen chuan Isua chu banah an khêngbet a, dân bawhchhetute chu pakhat a ding lamah, pakhat a vei lamah an khêngbet tel ve a. 34 Isua erawh chuan: “Ka Pa, anni hi ngaidam rawh, an thil tih hi an hre lo a ni,” a ti a. Tin, a silhfênte insem tûrin ṭhum an vâwr a. 35 Mite chuan dingin an thlîr a. Nimahsela, rorêltute chuan nuihzatin: “Mi dang mah a chhandam alâwm; Pathian thlan Krista a nih chuan inchhandam ang hmiang,” an ti a. 36 Sipaite pawhin nuihza siam nân an hmang a, a hnênah lo kalin uain thûr an pe a: 37 “Judate Lal i nih chuan inchhandam ta che,” an ti a. 38 A chungah chuan: “Hei hi Judate Lal a ni,” tih inziak a awm bawk a.

39 Tin, dân bawhchhia an khai kân pakhat chuan Isua chu ânkhumin: “Krista i ni lo vem ni? Inchhandam la, keini pawh min chhandam ta che!” a ti a. 40 Pakhat zâwk chuan chhâng lêtin heti hian a hau va: “Pathian i hlau miah na nge? Thuhmun renga rorêlsak i nih hi. 41 Keini zawng hrem phû rêng kan ni, kan thil tih man kan hmu a ni si a; ani erawh hi chuan eng mah a ti sual lo,” a ti a. 42 Tin, ani chuan: “Isu, i Lalram i thlen hunah min hre reng ang che,” a ti a. 43 Isua’n a hnênah: “Vawiinah hian tih tak meuhvin ka hrilh a che, ka hnênah Paradis-ah i la awm ve ang,” a ti a.

44 Tichuan, chhûn dâr sâwm pahnih vêl* a ni a, chumi hun aṭang chuan tlai lam dâr thum vêl* thlengin lei pum pui chu a lo thim ta vek a. 45 Ni a êng ta lo va; tichuan, biak ina puanzâr chu a lai takah a thlêr ta a. 46 Tin, Isua chu: “Ka Pa, i kutah ka thlarau ka kawltîr e,” tiin ring takin a au va. Chu thu a sawi zawh chuan a thi ta a. 47 Thil thleng chu a hmuhin sipai za hotu chuan: “He mi hi mi fel tak a nih ngei hi,” tiin Pathian a chawimawi a. 48 Isua an tih hlum lai en tûra lo kal khâwm zawng zawngte’n thil thleng chu an hmuhin an âwmte chûm chungin an haw a. 49 A hmêlhriat zawng zawng leh Galili aṭanga amah rawn zuitu hmeichhiate chu hla takah an ding a, chûng thilte chu an thlîr a.

50 Tin, ngai teh! Judate Rorêlna Sâng Bera tel, mi ṭha leh fel tak Josefa a awm a. 51 (Ani chuan an ruahmanna leh an thil tih chu a thlâwp lo.) Ani chu Judai rama Arimathai khuaa mi a ni a, Pathian Ram nghâktu a ni. 52 Pilata hnênah kalin Isua ruang chu a dîl a. 53 Tichuan, a la thla a, puan zai sînin a tuam a, thlân,* lung ker kuak, tu mah an la zalh ngai lohnaah chuan a zalh ta a. 54 Chu chu Inbuatsaihna nî a ni a, Sabbath Nî a inṭan dâwn tawh a. 55 Tichuan, Galili aṭanga lo kal hmeichhiate chuan an zui zêl a, thlân* chu enin a ruang zalh a nih dân chu an hmu a. 56 Thil rimtuite leh hriak rimtuite buatsaih tûrin an kîr leh a; nimahsela, Sabbath Nîah chuan thupêk angin an châwl a.

24 Tin, chawlhkâr khata ni hmasa berah chuan zîng hma takah thil rimtui an buatsaihte chu kengin thlânah* an kal a. 2 Nimahsela, lung chu thlân* aṭanga lum sawnin an hmu a. 3 Tin, an va luh chuan Lalpa Isua ruang chu an hmu ta hauh lo mai a. 4 Hrilhhai taka an awm lai chuan, ngai teh! Puan êng tak sin mi pahnih hi an bulah an lo ding a. 5 Hmeichhiate chuan an hlau ta êm êm a, hnuai lam enin an kûn tlat a; tichuan, mi pahnihte chuan an hnênah: “Engvângin nge mitthi zîngah mi nung in zawn? 6 Hetah a awm tawh lo, a tho leh tawh. Galili rama a awm laia in hnêna a thusawi kha ngaihtuah lêt rawh u. 7 Mihring Fapa hi mi sualte kuta mantîr a nih tûr thu te, bana tih hlum a nih tûr thu te leh, ni thum nîa a thawhleh tûr thute a sawi kha,” tiin an sawi a. 8 Tichuan, Isua thusawite chu an hre chhuak leh ta a. 9 Thlân* aṭang chuan an lêt leh a, chûng thil zawng zawngte chu Sâwm Pakhatte leh mi dang zawng zawng hnênah an hrilh a. 10 Chûng hmeichhiate chu Mari Magdalini te, Joani te, Jakoba nu Mari te an ni a. An hnêna awm hmeichhe dangte pawhin, chûng thilte chu tirhkohte hnênah an hrilh ve bawk a. 11 Nimahsela, chûng thu chu thu lawi lo maiah an lo ngaihsak a, hmeichhiate chu an ring lo va.

12 Petera erawh chu a tho va, thlân* lam panin a tlân a, kûnin thlân chhûng chu a bih a, puan zai sînte chauh chu a hmu a. Tichuan, thil thleng chu ngaihtuah chung zêlin a haw leh ta a.

13 Ngai teh! Chumi nî tak chuan an zînga pahnih Emmau khaw lam panin an kal a, chu chu Jerusalem aṭanga mêl sarih vêla* hla a ni. 14 Tichuan, thil thleng zawng zawngte chu an sawi dûn a.

15 Chûng thilte sawia an tî tî dun lai chuan, Isua ngei chuan rawn panin an rualin a kal ve a. 16 Nimahsela, amah an hriat theih loh nân an mitte chu tih vaihin a awm a. 17 Ani chuan an hnênah: “Eng chungchângah nge in inhnial a?” a ti a. Tichuan, lungngai takin an ding ta reng a. 18 Kleopa zâwk chuan ani chu chhângin a hnênah: “Jerusalem khuaah mikhual nangmah chauhva chêng em ni i nih? Tûn lai thil thlengte hi engtin nge i hriat loh theih?”* a ti a. 19 Ani chuan an hnênah: “Eng thil maw?” a ti a. Anni chuan a hnênah: “Nazaret Isua, Pathian leh mi zawng zawng hmaa a thusawi leh thil tiha zâwlnei thiltithei tak a nihzia lantîrtu chungchâng maw le; 20 kan puithiam lalte leh rorêltute’n thi tûra an pêk dân leh bana an khenbeh tâk dânte kha. 21 Ani kha Israelte chhan chhuaktu tûr a nih kan lo beisei tehlul nên. Tûnah chuan chûng thilte thlenna chu ni thum lai a ni tawh. 22 Chu bâkah, kan zînga hmeichhe ṭhenkhat pawhin min ti mangang hle, zîngah thlânah* an va kal a, 23 a ruang an hmuh tâk lovah chuan anni chu rawn kalin, ani chu a nung leh tawh tia hrilhtu vântirhkohte an hmuh thu an rawn sawi a. 24 Tichuan, kan zînga ṭhenkhat thlânah* chuan an va kal a, hmeichhiate sawi ang chiah chuan an va hmu a, ani erawh chu an hmu si lo,” an ti a.

25 Ani chuan an hnênah: “Aw, mi âte u, zâwlneite thusawi zawng zawng kha in thinlung hian a va âwih mawh tak êm! 26 Krista’n chûng thilte chu tuarin a ropuinaah a lût tûr a ni lo vem ni?” a ti a. 27 Tichuan, Mosia leh Zâwlnei zawng zawngte thu aṭanga ṭanin, Pathian Lehkha Thua a chanchin ziak zawng zawngte chu a hrilhfiah ta a.

28 Tichuan, an kalna tûr khua chu an thleng dâwn ta a, ani chu la kal zêl tûr angin a awm a. 29 Nimahsela, châm tûrin an ngên a, a hnênah: “Kan hnênah riak ve ta che, khua a tlai dâwn tawh si a, nî pawh a tlâk dâwn tawh hi,” an ti a. Tichuan, an hnêna riak tûrin a lût ta a. 30 An bula chaw a kîl lai chuan chhang a la a, mal a sâwm a, a phel a, an hnênah a pe a. 31 Tin, an mitte chu a lo vâr a, ani chu an hre ta a. Nimahsela, an lak aṭang chuan a bo ta a. 32 Tin, anni chuan: “Kawnga min biak laia Pathian Lehkha Thu min hrilhfiah lai khân, a thusawite khân kan thinlung a khawih hle a ni lâwm ni?” an ti a. 33 Chutih lai tak chuan an tho va, Jerusalemah an lêt leh a. Sâwm Pakhatte leh an hnêna awmhote chu an va hmu a. 34 Anni chuan: “Lalpa chu a tho leh tak zet a ni, Simona hnênah a inlâr asin!” an lo ti a. 35 Anni pawhin kawnga thil thlengte leh chhang a phel laia amah an lo hriat tâk dânte chu an hrilh ve a.

36 Chûng thilte an la sawi lai mêk chuan, amah ngei chu an zîngah rawn dingin, an hnênah: “In chungah thlamuanna* awm rawh se,” a ti a. 37 Nimahsela, râpthlâk an tih êm avâng leh an hlauh êm avângin thlarau hmu-ah an inngai a. 38 Tichuan, an hnênah: “Engvângin nge in hlauh va, in thinlungah rinhlelhna in neih? 39 Ka kut leh kête hi en rawh u, keimah ngei ka ni e; min khawih ula, min en teh u, thlarau ni ila in hmuh ang hian tisa leh ruh ka nei lo vang,” a ti a. 40 Chu chu a sawi zawhin a kut leh a kête chu a entîr a. 41 Tin, an lâwm êm avâng leh mak an tih êm avânga an la rin loh cheu lai chuan an hnênah: “Ei tûr eng emaw in nei em?” a ti a. 42 Tichuan, sangha hem hmin hrang khat an pe a, 43 ani chuan a la a, an hmuh lai ngei chuan a ei ta a.

44 Ani chuan an hnênah: “Hêngte hi Mosia Dân leh Zâwlneite thu leh Fakna Hla Bu-a ka chungchâng ziak zawng zawngte a thlen famkim tûrzia, in hnêna ka awm laia ka hrilh che u kha a ni,” a ti a. 45 Tichuan, Pathian Lehkha Thu awmzia chiang taka hre thiam tûrin an rilru a hawnsak a. 46 An hnênah, “Hetianga ziak a ni: Krista chuan hrehawm a tuar ang a, ni thum nîah mitthi zîng ata a tho leh ang. 47 Jerusalem aṭanga ṭanin, hnam zawng zawng hnênah sual simte ngaihdamna thu ama hmingin hrilh a ni ang. 48 Nangni hi chûng thilte puang chhuaktu tûrte chu in ni. 49 Tin, ngai teh u! Ka Pa thutiam chu in chungah ka rawn thlentîr ang. Nimahsela, chung lam aṭanga thiltihtheihna in dawn hma chu he khuaah hian awm reng rawh u,” a ti a.

50 Tichuan, Bethani thlengin anni chu a hruai a. Tin, a bân a phar a, mal a sâwm a. 51 Mal a sâwm lai mêk chuan, an zîng aṭanga tih hrana lo awmin vânah lâk chhoh a ni ta a. 52 Anni chuan bawkkhupin chibai an bûk a; tichuan, Jerusalemah lâwm takin an lêt leh ta a. 53 Tin, Pathian fakin biak inah an awm reng ṭhîn a.