CHANCHIN ṬHA MARKA ZIAK

1 Pathian Fapa, Isua Krista chanchin ṭha inṭanna chu: 2 Zâwlnei Isaia’n: “(Ngai teh u! Ka chanchin kengtu chu i hmaah ka tîr ang a, ani chuan i kawng a sial ang.) 3 Thlalêra au ri chuan: ‘Jehova* kawng sial ula, a kawngte ti ngîl rawh u!’” tia a lo ziah ang kha a ni. 4 Thlalêra awm Baptistu Johana chuan mite hnênah an simzia târ lan nâna baptisma chang tûrin thu a hril a. 5 Tichuan, Judai ram leh Jerusalem khuaa mi zawng zawng chu a hnênah an lo kal a, vântlâng hmaah an sualte an puang a, ani chuan Jordan Luiah a lo baptis a.* 6 Tin, Johana chuan sanghâwngsei hmula siam thawmhnaw inbelin, savun kâwnghrên a hrêng a, khaukhuap leh ramhnuaia khawizu a ei ṭhîn a. 7 Ani chuan: “Ka hnua lo kal tûr chu kei aiin a ropui zâwk a, a pheikhawk hrui phelh tlâk pawh ka ni lo. 8 Kei chuan tuiin ka baptis ṭhîn che u a, ani erawh chuan thlarau thianghlimin a baptis ang che u,” tiin thu a hril a.

9 Chutih hun lai chuan, Isua chu Galili ram, Nazaret khua aṭangin a lo kal a, Jordan Luiah Johana’n a lo baptis a. 10 Tui ata a rawn chhuah veleh, vân inhawng leh thlarau thianghlim ṭhuro anga lo chhuk a, a chunga lo thleng a hmu a. 11 Tin, vân aṭangin: “Nang hi ka Fapa duh tak, min ti lâwm êm êmtu i ni,” tiin aw a lo chhuak a.

12 Chu veleh, thlarau thianghlimin thlalêra kal tûrin a chêttîr ta nghâl a. 13 Tin, thlalêrah chuan ni 40 a awm a, chutah chuan Setana’n a thlêm a. Isua chu ram sakawlhte zîngah a awm a; nimahsela, vântirhkohte’n a rawng an bâwlsak a.

14 Johana man a nih hnu chuan, Isua chu Pathian chanchin ṭha hril tûrin Galili ramah a kal ta a. 15 Tichuan: “Hun ruat chu a lo thleng ta, Pathian Ram chu a hnai tawh e. Sim ula, chanchin ṭha hi ring rawh u,” tiin a hril a.

16 Galili Dîl kama a kal laiin Simona leh a unaupa Andria a hmu a, anni chu sangha mantu an ni a, dîlah chuan an lênte an dêng a. 17 Tin, Isua’n an hnênah: “Mi zui rawh u, mihring mantuah ka siam ang che u,” a ti a. 18 Tichuan, an lênte chu hnutchhiahin an zui ta nghâl a. 19 Chuta ṭanga hla vak lo a kal hnu chuan, lawnga an lênte lo siam ṭha mêk Zebedaia fapa Jakoba leh a unaupa Johana a va hmu a, 20 anni pawh chu a ko nghâl a. Lawnga awm an pa Zebedaia leh an mi rawihte chu kalsanin ani chu an zui a. 21 Tichuan, Kapernaum khuaah an kal a.

Sabbath nî a inṭan veleh inkhâwmna inah kalin a zirtîr ṭan ta a. 22 Tin, mite chuan a zirtîr dân chu mak an ti hle a, dân hre mite* ang ni lova thunei taka a zirtîr avângin. 23 An inkhâwmna inah chuan ramhuai man mi pakhat hi a awm a, ani chu: 24 “Nazaret Isu, nang nên hian eng inzawmna nge kan neih? Min ti boral tûrin i lo kal em ni? Pathian Mi Thianghlima i ni tih chiang takin ka hria e!” tiin a au va. 25 Nimahsela, Isua chuan: “Ngawi la, a kawchhûng aṭang khân lo chhuak rawh!” tiin a hau va. 26 Tin, ramhuai chuan chu pa chu a tih tlûk hnuah a ti khûr chiam a, ring taka au chungin a chhuahsan ta a. 27 Mite chuan mak an ti hle a: “Hei hi eng nge ni ngai? A zirtîr dân hi a va danglam ve! Thunei takin ramhuaite pawh thu a pe a, a thu an âwih zêl hi,” an ti a. 28 Tichuan, a chanchin chu Galili ram pumah a thang chhuak ta nghâl a.

29 Tin, inkhâwmna in chu chhuahsanin, Simona leh Andria te inah Jakoba leh Johana te nên an kal a. 30 Simona pizawn* chu khawsikin a lo mu a, a dam loh thu chu Isua hnênah an hrilh nghâl a. 31 Isua’n ani chu a va pan a, a kut vawnsakin a kai tho va. A khawsik chu a reh ta a; tichuan, anni chu ei tûr a buatsaihsak a.

32 Tlai lam a lo niha nî a tlâk chuan, mite chuan dam lo leh ramhuai man zawng zawng chu a hnênah an rawn hruai a. 33 Khuaa mi zawng zawng chu kawngka bulah chuan an pung khâwm a. 34 Tichuan, natna tinrêng a ti dam a, ramhuai tam tak a hnawt chhuak bawk a; nimahsela, Krista a ni tih an hriat avângin ramhuaite chu an ṭawng a phal lo.

35 A tûkah chuan khawvâr hmain a tho va, hmun fianrial lam panin a chhuak a, chutah chuan a ṭawngṭai a. 36 Tin, Simona leh zirtîr dangte chuan ani chu hmun tinah an zawng a. 37 An hmuh chuan a hnênah: “Mi zawng zawngin an zawng che asin,” an ti a. 38 Nimahsela, an hnênah: “Khaw ṭhenawmahte pawh chanchin ṭha ka hrilh theih nân i kal ang u, chu chu ka rawn kal chhan a ni si a,” a ti a. 39 Tichuan, a kal a, Galili ram pum fang chhuakin an inkhâwmna inahte chanchin ṭha a hril a, ramhuaite a hnawt chhuak bawk a.

40 Phâr pakhat a lo kal a, ṭhingṭhiin a hnênah: “I duh chuan mi ti thianghlim thei e,” tiin a ngên a. 41 Tichuan, a khawngaih ta hle a, a ban a, a khawih a: “Ka duh e! Lo thianghlim tawh ang che,” a ti a. 42 Chu veleh a phâr chu lo dam nghâlin, a lo thianghlim ta a. 43 Nimahsela, khauh taka thu pein a kaltîr a, 44 a hnênah: “Tu hnênah mah sawi suh ang che; mahse, puithiam hnênah va inentîr la, i dam tawh tih an hriat theihna tûrin Mosia dânin kaihhruaina a pêk angin thilpêk chu va hlân ang che,” a ti a. 45 A kal hnu chuan, chumi chanchin chu nasa taka puang zârin a sawi darh a; chuvângin, Isua chu mite chîm buai lohvin khawpuiah chuan a lût thei tawh lo va; tichuan, hmun fianrialahte a awm ta a. Chuti chung pawhin, hmun tin aṭangin an la rawn pan reng tho a ni.

2 Nimahsela, ni eng emaw zât hnuah Isua chu Kapernaum khuaah a lût leh a, ina a awm thu chu a lo darh ta a. 2 Tichuan, kawngka bulah pawh awmna tûr awm lo khawp hialin mi an lo pung khâwm a, Isua chuan an hnênah Pathian thu a hrilh ṭan ta a. 3 Tin, mi paliin a hnênah zeng pakhat an rawn zâwn a. 4 Nimahsela, mipui an tam êm avângin Isua bul an thlenpui thei lo va; tichuan, Isua awmna zâwn in chung chu ṭhiatin, chuta ṭang chuan zeng chu a mutna chawpin muang chângin an thlâk thla a. 5 Isua’n an rinna chu a hmuhin zeng hnênah chuan: “Ka fapa, i sualte chu ngaihdam a ni tawh e,” a ti a. 6 Chuta ṭhu ve dân hre mi ṭhenkhat chuan: 7 “Engvângin nge he pa hian hetianga thu a sawi? Pathian a sawichhia a ni. Pathian chauh lo chu sualte ngaidam thei tu nge awm?” tiin an ngaihtuah a. 8 Nimahsela, Isua’n chutiang chuan an ngaihtuah tih a lo hre ta nghâl a; tichuan, an hnênah: “Engvângin nge in thinlungah khatiang khân in ngaihtuah? 9 Zeng hnênah, ‘I sualte chu ngaihdam a ni tawh e,’ tia sawi nge, ‘Tho la, i mutna kha la la, kal rawh,’ tia sawi hi awlsam zâwk? 10 Eng pawh ni se, mihring Fapa hian leia sual ngaihdam theihna a nei tih in hriat ka duh a ni,” a ti a. Zeng hnênah chuan: 11 “Ka hrilh a che, tho la, i mutna kha la la, haw rawh,” tiin a hrilh a. 12 Tichuan, a tho va, a mutna chu a la ta nghâl a, an zaa hmaah chuan a kal chhuak ta a. Mite chuan mak an ti hle a: “Hetiang hi kan la hmu ngai lo rêng rêng,” tia sawiin Pathian an chawimawi ta a.

13 Tin, dîl kamah chuan a kal leh a, mipui zawng zawng chu a hnênah an lo kal a, ani chuan a lo zirtîr a. 14 Tichuan, a kal zêl a, chhiah pêkna hmuna lo ṭhu Alphaia fapa Levia* chu a hmu a, a hnênah: “Min zui rawh,” a ti a. Ani chu a tho va, a zui ta nghâl a. 15 A hnuah, Levia ina chaw a ei laiin, amah zuitu tam takte zînga chhiahkhawntute leh mi sualte pawhin Isua leh a zirtîrte bulah chaw an ei ve a. 16 Nimahsela, Pharisaite zînga dân hre mite’n mi sualte leh chhiahkhawntute bula a ei an hmuh chuan a zirtîrte hnênah: “Chhiahkhawntute leh mi sualte bulah chaw a ei a ni maw?” an ti a. 17 Isua’n an thusawi a hriat chuan an hnênah: “Dam lote’n doctor an mamawh a, mi hrisêlte erawh chuan an mamawh lo. Mi felte tâna lo kal ka ni lo va, mi sualte simtîr tûr zâwka lo kal ka ni,” a ti a.

18 Johana zirtîrte leh Pharisaite chuan chaw an nghei ṭhîn a. Tin, anni chu a hnênah lo kalin: “Engvângin nge Johana zirtîrte leh Pharisaite zirtîrte’n chaw an nghei ṭhin laia i zirtîrte’n an nghei ve loh?” an ti a. 19 Isua’n an hnênah: “Mopa* ṭhiante chuan an bula mopa a awm laiin chaw an nghei a ngai dâwn em ni? An bula mopa a awm chhûng chuan an nghei thei lo vang. 20 Nimahsela, an hnên ata mopa an hruai bo nîte a lo la thleng ang a, chumi nîah chuan chaw an la nghei ang. 21 Tu mahin puan hlui ṭet lai chu puan tharin an bel ngai lo; chuti lo chuan, a belna puan thar chuan puan hlui chu a pawt mar ang a, a ti ṭet nasa lehzual ang. 22 Chu bâkah, tu man savun peng* hluiah uain thar an thun ngai lo. Chutianga an thun chuan uain thar chuan savun peng chu a ti puak ang a, uainte chu a bua ang a, savun peng chu a chhe mai ang. Nimahsela, uain thar chu savun peng tharah an thun zâwk ṭhîn,” a ti a.

23 Tin, Sabbath nîa buh hmunte a pal tlang laiin, a zirtîrte chuan kal pahin buh vuite chu an thliak a. 24 Pharisaite chuan a hnênah: “Engvângin nge i zirtîrte’n Sabbath nîa tih thiang lo an tih?” an ti a. 25 Ani chuan an hnênah: “Davida’n ei tûr a neih loh lai leh, a mite nêna an ril a ṭâm laia a thil tih kha in chhiar ngai lo vem ni? 26 Puithiam lal Abiathara chanchinah, Pathian ina Davida a luh dân leh, amah leh a mite tâna ei thian loh, puithiamte chauhvin an ei thian chhangdah a ei a, a hnêna awmte a pêk ve thu pawh kha in chhiar ngai lo vem ni?” a ti a. 27 Tichuan, an hnênah: “Pathianin Sabbath hi mihringte tân a siam a; nimahsela, mihringte hi Sabbath tân a siam lo. 28 Chuvângin, mihring Fapa hi Sabbath chungah pawh Lal a ni,” a ti a.

3 Tichuan, Isua chu inkhâwmna inah a lût leh a, chutah chuan kut zeng pakhat a lo awm a. 2 Tin, an hêk theih nân, chu pa chu Sabbath Nîa a tih dam dâwn leh dâwn loh ngun takin an lo enthla a. 3 Kut zeng hnênah chuan: “Tho la, a laiah hian lo kal rawh,” a ti a. 4 Tichuan, an hnênah: “Sabbath Nîa thil ṭha tih nge thiang a, thil ṭha lo tih? Chhandam nge thiang a, tih hlum?” a ti a. Nimahsela, anni chu an ngawi reng a. 5 An thinlung a sak êm avângin pawi a ti hle a, thinur taka anmahni a en hnuah kut zeng hnênah chuan: “I kut phar rawh,” a ti a; tichuan, a kut chu a phar a, a lo dam leh ta a. 6 Tin, Pharisaite chu an kal chhuak a, amah an tih hlum theih nân Heroda pâwla mite nên an inrâwn khâwm ta nghâl a.

7 Nimahsela, Isua chu a zirtîrte nên dîl lam panin an kal a, Galili leh Judai ram aṭangin mipui tam takin ani chu an zui a. 8 A thil tih tam tak chanchin an hriatin Jerusalem aṭang te, Idumai ram aṭang te, Jordan râl aṭang te leh, Tura leh Sidon chhehvêl aṭangte pawhin mi tam tak a hnênah an lo kal bawk a. 9 Tichuan, mipuiin an nêk buai loh nâna a chuanna tûr lawnglêng buatsaihsak tûrin a zirtîrte a hrilh a. 10 Mi tam tak a lo tih dam tawh avângin, natna khirh tak tak nei zawng zawngte chuan amah deh tumin an bâwr luih luih si a. 11 Ramhuai mante pawhin an hmuh apiangin a hmaah bawkkhupin: “Pathian Fapa i ni,” tiin an au ṭhîn. 12 Mahse, tu hnênah mah hrilh lo tûrin vawi tam tak anni chu uluk takin a chah a ni.

13 Tin, tlângah a lâwn a, a zirtîr ṭhenkhat a ko va, anni chuan an zui ta a. 14 Tichuan, mi 12 a thlang chhuak a, tirhkohte tih hming a vuah a, anni chu amah zuitute leh thu hril tûra a tirh chhuahte an ni a. 15 Chu bâkah, ramhuaite an hnawh chhuah theih nân an hnênah thiltihtheihna a pe bawk.

16 Tin, 12 a thlante chu Simona, Petera tia a hming a phuahsak te, 17 Zebedaia fapa Jakoba leh a unaupa Johana te (anni chu Boanergea tih hming a phuahsak a, a awmzia chu, “Khawpuiri Fapate,” tihna a ni), 18 Andria te, Philipa te, Bartholomaia te, Matthaia te, Thoma te, Alphaia fapa Jakoba te, Thaddaia te, mi ṭhahnemngai tak Simona te leh, 19 a hnua Isua phatsantu Juda Iskariota te an ni.

Tichuan, Isua chu in pakhatah a lût a, 20 mipuite an rawn pun khâwm leh avângin chaw tak ngial pawh an ei hman lo va. 21 Nimahsela, a chhûngte’n chu chu an hriatin: “A â a nih chu le,” tia sawiin amah hruai tûrin an lo kal a. 22 Chu bâkah, Jerusalem aṭanga lo chhuk, dân hre mite chuan: “Ani hi Beelzebula’n* a ṭanpui a nih hi, ramhuaite a hnawh chhuah theih chhan chu ramhuai lal vâng a ni,” an ti a. 23 Tichuan, anni chu kovin an hnênah tehkhin thu a sawi a: “Engtin nge Setana’n Setana vêk a hnawh chhuah theih ang? 24 Ram pawh mahni a indo chuan a ding chhuak thei lo vang a; 25 chhûngkua pawh mahni a indo chuan a ding chhuak thei hek lo vang. 26 Setana pawh mahni a indo va, a inṭhen darh chuan a ding chhuak thei lo vang a, a boral zâwk ang. 27 Dik takin, mi chak ina lût tu mahin mi chak chu a phuar hmasak phawt loh chuan a thil neihte a lâksak thei lo vang a. A phuar hnuah chauh a thil neih zawng zawng a lâksak thei ang. 28 Tih tak meuhvin ka hrilh a che u, miin eng sual pawh tiin, engtiang khawpin Pathian sawichhe mah se, an sualna zawng zawng ngaihdam an ni ang a. 29 Nimahsela, tu pawh thlarau thianghlim sawichhia apiang chu ngaihdam an ni ngai lo vang a, chatuana thiam loh chantîr an ni zâwk ang,” a ti a. 30 Chûng thute chu: “Ramhuai a zâwl a ni,” tia an sawi avânga sawi a ni.

31 Tin, a nu leh a unaute an lo kal a, pâwnah dingin amah kohsak tûrin mi an tîr a. 32 Mipuiin an ṭhut hual ṭhup lai chuan a hnênah: “I nu leh i unaute’n pâwnah an nghâk che asin,” tiin an rawn hrilh a. 33 Nimahsela, ani chuan: “Ka nu leh ka unaute chu tute nge ni?” tiin a lo zâwt a. 34 Tichuan, amah ṭhut hualtute chu enin: “En teh u, ka nu leh ka unaute hi! 35 Tu pawh Pathian duh zâwng ti apiang chu, chu mi ngei chu ka unaupa te, ka farnu te, ka nute an ni,” a ti a.

4 Isua chuan dîl kamah a zirtîr leh a, mipui tam tak a hnênah an lo kal khâwm a. Tichuan, lawngah chuangin a ṭhu a, lawng chu vaukam aṭanga hla vak lovah an kar sawn a; nimahsela, mipui zawng zawng chu dîl kamah an awm a. 2 Tin, tehkhin thute hmangin anni chu thu tam tak a zirtîr a, an hnênah: 3 “Ngaithla teh u! Lo neitu pakhat buh chî theh tûrin a feh a. 4 A buh chi theh chu a ṭhen kawng sîrah a tla a; tichuan, savate’n an rawn ei zo ta mai a. 5 A ṭhen lung hmun lei panah a tla a, lei a chhah loh avângin rang takin a ṭo nghâl a. 6 Mahse, nî a lo sat tâk hnu chuan a lo vuai a, zung a kaih loh avângin a ro ta a. 7 A ṭhen hnimhlîngnei zîngah a tla a, hlîng chu lo ṭhangin buh chîte chu ṭhang thei lo tûrin a dîp a; tichuan, rah a chhuah ta lo va. 8 A ṭhen erawh chu lei ṭhaah a tla a; tichuan, rawn ṭovin a rawn ṭhang lian a, a lêt 30, a lêt 60 leh, a lêt 100-tein rah a rawn chhuah a,” a ti a. 9 Tichuan: “Beng nei tawh phawt chuan hre rawh se,” tiin a sawi belh a.

10 Amah chauhva a awm laiin, a bula awmte leh Sâwm Pahnihte chuan tehkhin thute awmzia chu an zâwt a. 11 Ani chuan an hnênah: “Pathian Ram thurûk thianghlim chu in tân zawng hriat phal a ni a, mi dangte tân erawh chuan an thu hriat zawng zawng chu tehkhin thu mai a ni. 12 An en pawha an hmuh lohna tûr leh, an hriat pawha a awmzia an hriatthiam lohna tûrin. Chuvângin, an hawikîr ngai lo vang a, ngaihdamna pawh an dawng ngai hek lo vang,” a ti a. 13 Tin, an hnênah: “He tehkhin thu awmzia hi in hre thiam lo maw? A nih chuan, engtin nge tehkhin thu dang zawng zawng chu in hriatthiam theih ang?

14 “Lo neitu chuan Pathian thu chu a theh a. 15 Tichuan, hêng mite hi kawng sîra thu thehnate chu an ni; nimahsela, an hriat veleh Setana lo kalin anmahnia thu theh chu a lâksak ṭhîn. 16 Chutiang bawkin, lung hmun lei pana tlate chu hêng mite hi an ni; thu chu an hriat veleh lâwm takin an pawm a. 17 Zung kaih lo mah se, eng emaw chen an dam a; nimahsela, Pathian thu avânga hrehawmna emaw, tih duhdahna emaw an tawh veleh an tlu mai ṭhîn. 18 Hlîng zînga tlate pawh an awm bawk a. Chûng mite chu Pathian thu hretute chu an ni. 19 Mahse, khawvêl lungkhamna te, hausakna bumna te leh, châkna tinrêngte chu an thinlungah a lût a, chûngte chuan Pathian thu chu dîpin rah lovin a awmtîr ṭhîn. 20 Lei ṭhaa tlate erawh chu Pathian thu chu hria a, lâwm taka pawmtute chu an ni a, a lêt 30 te, a lêt 60 te leh, a lêt 100-tein rah an chhuah a ni,” tiin a hrilhfiah a.

21 Chu bâkah, ani chuan an hnênah: “Khâwnvâr hi khuh bo tûrin emaw, khum hnuaia dah tûrin emaw an chhi ngai em ni? A dahna hmuna dah tûrin an chhi zâwk ṭhîn lo vem ni? 22 Hmuh chhuah loh tûra thuhrûk eng mah a awm lo va, fîmkhur taka thup pawh hriat chhuah loh tûr pakhat mah a awm lo. 23 Beng nei tawh phawt chuan hre rawh se,” a ti a.

24 Tin, an hnênah: “In thu hriatte hi ngun takin ngaithla rawh u. In tehna ngai bawkin an tehsak dâwn si che u a; ni e, chu aia nasa zâwk mah chuan an tehsak ang che u. 25 Tu pawh a nei apiang chu pêk belh a ni ang a; nimahsela, tu pawh a nei lo apiang chu a neih sa pawh lâksak a ni ang,” a ti a.

26 Heti hian a sawi chhunzawm a: “Pathian Ram chu miin leia chî a theh ang chu a ni. 27 Zânah a mu a, zîngah a tho va, chîte chu a hriat lohva lo ṭiakin, a lo ṭhang lian a. 28 Lei hian zawi zawiin rah a chhuah ṭhîn a, a hmasa berin a kûng; tichuan, a vui, a tâwpah a vuiah chuan buh fang pum. 29 Nimahsela, a hmin veleh seng a hun tawh avângin a ât nghâl ṭhîn,” tiin.

30 Ani chuan a sawi chhunzawm zêl a: “Pathian Ram chu eng nên nge kan tehkhin theih ang? A nih loh leh, eng tehkhin thuin nge kan hrilhfiah theih ang? 31 Chu chu anṭam chi fang khat ang hi a ni; theh a nih lai chuan leiah hian chî zawng zawnga tê ber a ni a. 32 Nimahsela, theh a nih hnu chuan a lo ṭhang lian a, thlai dang zawng zawng aiin a lo lian ta zâwk a, zâr lian tak takte a nei a, chunglêng savate’n a hlim chu an bêl ṭhîn,” a ti a.

33 Chutiang tehkhin thu tam tak hmang chuan an hnênah an hriatthiam theih tâwk tûrin Pathian thu a sawi a. 34 Tehkhin thu lovin an hnênah thu a sawi ngai lo. A zirtîrte erawh chu a hrangin a thusawi zawng zawngte a hrilhfiah leh ṭhîn.

35 Chumi nî tlai lamah chuan an hnênah: “Dîl râl lehlamah sâwn i kai ang u,” a ti a. 36 Tichuan, mipui an hawtîr hnuin ani chu lawngin an kalpui a, lawng dangte pawhin an zui a. 37 Tin, thlipui na tak a rawn tleh a, tuifâwnte chuan lawng chu a rawn khuh hlup hlup a, a pil dâwn ta mai a. 38 Nimahsela, ani chu lawng mei lamah chuan lukham khamin a lo muhîl a; tichuan, an kai tho va, a hnênah: “Zirtîrtu, kan boral dâwn hi pawi i ti lo vem ni?” an ti a. 39 Tin, a tho va, thlî chu a hau va, dîl hnênah pawh chuan: “Ngawi la, awm hle hle rawh!” a ti a. Tichuan, thlî chu a bâng a, a reh ta ṭhuap mai a. 40 An hnênah: “Engati nge in hlauh êm êm? Rinna in la nei lo cheu a ni maw?” a ti a. 41 Nimahsela, an la hlau hle a: “He mi hi tu nge maw a nih le? Thlî leh dîlte hial pawhin a thu an âwih hi!” an ti hlawm a.

5 Tichuan, dîl râl lehlam Gerasin ram chu an va thleng a. 2 Lawng aṭanga Isua a chhuk veleh, thlânmual aṭanga rawn chhuak ramhuai man mi pakhatin a tâwk a. 3 Ani chu thlânmualah a awm ṭhîn a, tu mahin khaidiat pawhin an thlung bet thei lo. 4 Kawlte buntîrin, khaidiatte’n thlung fo ṭhîn mah se, khaidiatte chu ti chatin kawlte chu a ti tliak ṭhîn a, tharuma thunun thei tu mah an awm lo. 5 Tin, a chhûn a zânin thlânmualah leh tlângahte chuan a au ṭhîn a, lungte pawhin a inzai ṭhîn. 6 Nimahsela, hla tak aṭanga Isua a hmuh chuan a lam panin a va tlân a, a hmaah a ṭhingṭhi a. 7 Tichuan, aw ring takin: “Isua, Pathian Chungnungbera Fapa, nang leh kei hian eng inzawmna nge kan neih? Min nghaisa lo tûra Pathian hminga chhechham tûrin ka ngên a che,” tiin a au va. 8 Isua’n a hnênah: “Nang ramhuai bawlhhlawh, kha pa kawchhûng aṭang khân chhuak rawh,” tiin a lo sawi tawh si a. 9 Tin, Isua’n a hnênah: “Tu nge i hming?” a ti a. Ani chuan: “Ka hming chu Legion* a ni, tam tak kan ni si a,” a ti a. 10 Tichuan, chumi ram aṭanga anmahni hnawt chhuak lo tûrin Isua hnênah a ngên chiam a.

11 Tin, tlângah chuan vawk rual an tla a. 12 Ramhuaite chuan: “Vawk kawchhûngah sâwn min luhtîr rawh,” tiin an ngên a. 13 Ani chuan a lo phalsak a. Tichuan, ramhuaite chu an chhuak a, vawk kawchhûngah chuan an lût a, vawk rual 2,000 vêlte chu dîl kam âwih pang lam panin chak takin an tlân a, dîlah chuan an tla hlum a. 14 Nimahsela, a vulhtute chu an tlân a, khawpuiah leh a chhehvêlahte chuan an va sawi a, mite chu thil thleng en tûr chuan an lo kal a. 15 Isua hnên an lo thlen a, ramhuai legion paia kha thawmhnaw inbel leh rilru pângngai taka ṭhua an rawn hmuh chuan an hlau ta hle a. 16 Chu bâkah, ramhuai man pa chunga thil thleng leh vawk chunga thil thleng hmutute chuan thil thlen dân chu an lo hrilh a. 17 Tichuan, an ram chhuahsan tûrin Isua chu an ngên a.

18 Tin, lawnga a chuan dâwn laiin, ramhuaite’n an chhuahsan tâka khân a hnêna kal ve a dîl a. 19 Nimahsela, a phal lo va, a hnênah: “I chhûngte hnênah va haw la, Jehova’n* i chunga a thil tih zawng zawng leh i chunga khawngaihna* a lantîr dân zawng zawng hi va hrilh rawh,” a ti a. 20 Chu pa chu a kal ta a, Isua’n thil a tihsak zawng zawng chu Dekapoli khuaahte* a tlângaupui ta a, mi zawng zawngin mak an ti hle a.

21 Isua chu lawnga râl lehlam a kai hnu chuan, mipui tam tak a hnênah an lo kal khâwm a, ani chu dîl kamah a awm a. 22 Inkhâwmna ina hotute zînga pakhat Jaira chu a lo kal a, Isua a hmuh chuan a hmaah a ṭhingṭhi a. 23 Ani chuan: “Ka fanu naupang tê nasa takin a dam lo va,* khawngaihin rawn kal la, a chungah i kut rawn nghat la, a dam leh mai ang,” tiin vawi tam tak a ngên a. 24 Tichuan, Isua chu Jaira rualin a kal ta a, mipui tam takin ani chu an zui a, an nêk huai huai a.

25 Chutah chuan, hmeichhe pakhat kum 12 lai thi pûta dam lo a awm a. 26 Doctor tam takte enkawlna aṭangin hrehawm tam tak a lo tuar tawh a, a neih zawng zawng pawh a hmang ral tawh a ni. Nimahsela, ṭhat lam pan ahnêkin a zual zâwk mah a. 27 Isua chanchin a lo hriat chuan Isua hnunga mipui zîngah chuan a lo kal a, a kawrfual chu a dek a. 28 “A kawrfual chauh pawh dek ila, ka dam mai ang,” tiin a ngaihtuah reng ṭhîn a ni. 29 Tichuan, chawplehchilhin a thi pût chu a lo reh ta nghâl a, a dam lohna nasa tak ata chu tih dam a ni ta tih a taksa awm dân aṭangin a lo inhre ta a.

30 Isua chuan amah aṭangin thiltihtheihna a chhuak tih a hre ta nghâl a; tichuan, mipui zîngah chuan hawi kualin: “Tu nge ka kawrfual dek?” tiin a zâwt a. 31 Nimahsela, a zirtîrte chuan a hnênah: “Mipuiin an nêk huai huai che tih i hmu si a, engtin nge, ‘Tu nge mi dek?’ i tih theih?” an ti a. 32 Nimahsela, amah dektu chu hmuh tumin a hawi kual vêl a. 33 A chunga thil thleng chu hriain hmeichhia chu hlau leh khûr chungin a lo kal a, Isua hmaah chuan ṭhingṭhiin thu dik chu a hrilh ta vek a. 34 Isua chuan a hnênah: “Ka fanu, i rinnain a ti dam che a ni, thlamuang takin kal la, i dam lohna nasa tak ata hi lo dam hlen tawh ang che,” a ti a.

35 A la ṭawng lai mêkin, Jaira in aṭang chuan mi ṭhenkhat an lo kal a: “I fanu chu a thi ta! Zirtîrtu hi ti buai duh tawh suh,” an ti a. 36 Nimahsela, Isua’n an thusawite a lo hriatin, Jaira hnênah chuan: “Hlau suh la, i rinna kha hloh hek suh,” a ti a. 37 Tichuan, Petera, Jakoba leh, Jakoba unaupa Johana te chauh lo chu tu man an zui a phal lo va.

38 Tin, Jaira in an thlen chuan Isua’n mi lo zi nuaih nuaih leh lungngaia ṭap vak vakte chu a hmu a. 39 A va luh hnu chuan an hnênah: “Engvângin nge in ṭah a, in zîk nuaih nuaih? Naupang hi a thi lo va, a muhîl a ni zâwk e,” a ti a. 40 Anni chuan deusawh takin an nuih a. Nimahsela, an vaia a chhuahtîr hnu chuan, naupang mutna hmunah chuan naupang nu leh pa leh a zirtîrte chauh a inzui luhtîr a. 41 Tichuan, naupang kut chu a vuan a, a hnênah: “Tal′i·tha cu′mi,” a ti a, chu chu: “Bawihtê, tho rawh ka ti a che,” tihna a ni. 42 Tin, hmeichhe naupang chu a lo tho va, a kal ta nghâl a. (Ani chu kum 12 mi a ni.) Tichuan, a nu leh pate chu sawi fiah theih rual lohvin an lâwm ta a. 43 Nimahsela, tu mah hrilh lo tûrin anni chu khauh takin thu a pe a; tichuan, ei tûr eng emaw pe tûrin a hrilh a.

6 Isua chu chuta ṭang chuan a chhuak a, a seilenna khuaah a kal a, a zirtîrte chuan an zui a. 2 Sabbath Nî a lo nih chuan, inkhâwmna inah a zirtîr ṭan a, a thusawi ngaithlatu tam tak chuan mak an ti hle a: “He mi hian hêng thilte hi khawi aṭangin nge a neih? Tuin nge finna leh thil mak tih theihnate hi pe? 3 Mistiri ve mai a ni lâwm ni? A nu pawh Mari, a unaute pawh Jakoba, Josefa, Juda leh, Simona te an ni lâwm ni? A farnute pawh kan zînga chêng ve tho an ni lâwm ni?” an ti a. Tichuan, ani chu an ring duh ta lo va.* 4 Nimahsela, Isua’n an hnênah: “Zâwlnei chu a seilenna khuaah te, a chhûngte zîngah te leh, ama inahte chawimawiin a awm ngai lo,” a ti a. 5 Tichuan, dam lo tlêm tê chunga kut nghat a, a tih dam bâk lo chu chutah chuan thil mak dang a ti lo. 6 Rinna an tlâkchham avângin mak a ti hle a. Tichuan, a chhehvêla awm khuate chu fangin a zirtîr a.

7 Tin, Sâwm Pahnihte chu a ko khâwm a, pahnih zêlin a tîr chhuak a, ramhuaite chunga thuneihna a pe bawk a. 8 An zin chhuahnaah tiang chauh lo chu chhang leh iptê keng lo tûr leh, an kâwnghrênah pawh pawisate pai lo tûrin thu a pe a. 9 Pheikhawk chu bun tûrin a ti a, kawr erawh chu hâk thlâk keng lo tûrin* a ti thung. 10 An hnênah heti hian a sawi belh a: “Khawi inah pawh in luhna apiangah, chu khua in chhuahsan hma loh zawng chutah chuan awm reng ang che u. 11 Tin, khawi hmunah pawh an dawngsawng duh lo che u emaw, in thusawi an ngaithla duh lo emaw a nih chuan, chuta ṭang chuan chhuak ula, in kephaha vaivut chu vaukhân an ni tawh tih hriattîr nân thing thla ang che u,” tiin. 12 Tichuan, an kal chhuak a, mite hnênah an sim a ngaih thu an puang chhuak a, 13 ramhuai tam tak an hnawt chhuak a, dam lo tam tak chu hriak chulhin an ti dam hlawm a.

14 Tin, Isua hming chu a lo than tâk êm avângin, Lal Heroda pawhin a lo hria a, mite chuan: “Baptistu Johana kha thihna ata a lo tho leh a; chuvângin, hêng thil makte hi a ti thei a ni,” an ti a. 15 Mi dangte erawh chuan: “Elija a ni,” an ti a. Mi dang lehte chuan: “Hmân laia zâwlneite zînga pakhat a ni,” an ti ve thung a. 16 Nimahsela, Heroda’n chu chu a lo hriatin: “A lû ka tansak tâk Johana kha a lo tho leh a nih chu,” a ti a. 17 Heroda ngei chuan nupuia a neih tâk, a unaupa Philipa nupui Herodi avângin Johana chu mantîrin, phuar chungin tân inah a lo khung tawh si a. 18 Johana’n Heroda hnênah: “I unaupa nupui i neih hi a thiang lo ve,” tia a lo hrilh tawh avângin. 19 Chuvângin, Herodi’n ani chu a haw hle a, tih hlum a duh a; nimahsela, a thei si lo. 20 Heroda chuan Johana chu mi fel leh thianghlim tak a ni tih a hriat avângin a hlau va, a humhim tlat a. Johana thusawite chu ngaihthlâk nuam a tih êm avângin, a thusawi a ngaihthlâk hnu chuan ani chu engtia tih tûr nge a hre ṭhîn lo a ni.

21 Tin, Heroda’n a pianchama thuneitu sâng te, sipai hotu te leh, Galili rama mi lian hote zanriah a kîlpui laiin, Herodi tân a ruahmannate ti puitling tûrin hun remchâng a lo awm a. 22 Tin, Herodi fanu chu lo lûtin a lâm a, Heroda leh a chaw kîlpuite chu a ti lâwm hle a. Lalin hmeichhe naupang hnênah chuan: “I duh apiang min dîl rawh, ka pe ang che,” a ti a. 23 A hnênah: “I duh apiang min dîl rawh, ka lalram zâtve pawh ni se, ka pe ang che,” tiin chhia a chham a. 24 Tichuan, a kal chhuak a, a nu hnênah: “Eng nge ka dîl ang?” a ti a. A nu chuan: “Baptistu Johana lû,” a lo ti a. 25 Hmanhmawh takin lal hnênah chuan a va lût leh a, a hnênah: “Thlêngin Baptistu Johana lû min pe nghâl la ka duh a ni,” tiin a dîl a. 26 Lal chu lungngai hle mah se, a chhechham leh a chaw kîlpuite avângin a dîlna chu a hnial duh lo va. 27 Tin, lal chuan vêngtu pakhat tîr nghâlin, Johana lû rawn la tûrin thu a pe a. Tichuan, a va kal a, tân inah Johana lû chu a va tan a, 28 thlêngin a lû chu a rawn la a. Hmeichhe naupang hnênah a pe a; tin, hmeichhe naupang chuan a nu a pe a. 29 A zirtîrte’n chu chu an hriatin a ruang chu an va hlâwm a, thlânah* an zalh ta a.

30 Isua hnêna tirhkohte an rawn lêt leh chuan, an thil tih leh an thu zirtîr zawng zawng chu an hrilh a. 31 Ani chuan an hnênah: “Hmun fianrialah nangmahni chauhvin lo kal ula, châwl rih rawh u,” a ti a. A hnêna mi tam tak an lo kal reng avângin, chaw tak ngial pawh an ei hman lo va. 32 Chuvângin, lawngin hmun fianrial lam chu an pan ta a. 33 Nimahsela, mite’n an kal lai chu an lo hmu a, mi tam takin chu chu an hriatin khaw hrang hrang aṭangin kêin an tlân khâwm a, chu hmun chu an lo thlen khalh a. 34 Isua lawng aṭanga a chhuk chuan, mipui tam tak a hmu a, vêngtu nei lo berâm ang an nih avângin a khawngaih ta êm êm a; tichuan, thu tam tak a zirtîr ta a.

35 Tin, tlai lamah chuan a zirtîrte chu a hnênah lo kalin: “He hmun hi a fianrial si a, khua a tlai tawh bawk nên, 36 kan chhehvêl khuaahte an ei tûr eng emaw an lei theih nân mipuite hi kaltîr rawh,” an ti a. 37 Ani chuan an hnênah: “Nangmahni’n ei tûr pe rawh u,” a ti a. Tin, anni chuan a hnênah: “Denarii* 200 man chhangpêr va leiin, an ei tûrin mipuite hnênah kan pe dâwn em ni ang?” an ti a. 38 Ani chuan an hnênah: “Chhangpêr eng zât nge in neih? Va en teh u!” a ti a. An neih zât an hriat hnuah: “Panga, sangha pahnih nên,” an ti a. 39 Tin, mipuite chu phûl hring dupah chuan a pâwl pâwla ṭhu tûrin a hrilh a. 40 Tichuan, pâwl khatah 100-te leh 50-tea inṭhenin an ṭhu a. 41 Chhangpêr panga leh sangha pahnih chu a la a, vân lam hawiin a ṭawngṭai a.* Chhangpêrte chu a phel a, mipuite hnêna sem tûrin zirtîrte chu a pe a; chutiang bawkin, sangha pahnih pawh chu an sem atân a pe bawk a. 42 Tin, an vaiin an ei a, an puar ta hlawm a. 43 Chhang bâng nawi chu bâwmrâng 12 khat lai an la khâwm a, sangha bâng nawi pawh an la khâwm bawk a. 44 Chhangpêr eitute chu patling 5,000 lai an ni.

45 Tichuan, amah ngeiin mipuite a hawtîr vêl chhûngin, a zirtîrte chu lawnga chuantîrin dîl râl lehlam, Bethsaida lama lo va kal hmasa tûrin a hrilh ta nghâl a. 46 Tin, mipuite a thlah liam hnu chuan ṭawngṭai tûrin tlângah a kal a. 47 Khua a thim chuan lawng chu dîl lai tak a thleng tawh a, ani erawh chu khawmualah amah chauhvin a la awm thung a. 48 Tichuan, thlîin an kal tum lohna lama a beng avângin, lawng chu kar harsa an ti hle tih a hmu a, zîng hma takah* tui chunga kalin anni chu a va pan a; nimahsela, anni chu kal pelh a tum a. 49 Tui chunga an lam pana a lo kal an hmuh chuan: “Saw saw eng thil nge ni ngai!” tiin ring takin an au ta chiam a. 50 An vaiin ani chu an hmu a, an thlaphâng ta hle a. Nimahsela, ani chuan a be nghâl a, an hnênah: “Hlau suh u! Keimah ka ni e,” a ti a. 51 Tin, an hnênah lawngah chuan a chuang ve a, thlî chu a bâng ta a. Tichuan, mak an ti ta hle mai a, 52 chhangpêr hmanga a thil mak tih awmzia kha an la hre thiam si lo, an thinlungah hriatthiamna an la neih loh avângin.

53 Râl lehlam an kai chuan Gennesaret ram an lo thleng a, a bul hnaiah chuan lawng chu an thlung a. 54 Lawng aṭanga an chhuah veleh mite chuan ani chu an lo hre nghâl a. 55 Tichuan, chumi rama awmte hrilh tûrin an tlân ta sup sup a, Isua a awm tih an hriatna hmun apiangah dam lote chu an mutna chawpin a hnênah an rawn zâwn a. 56 Khawpuiah te, khaw têah te, khawi hmunah pawh a luhna apiangah dam lote chu bazârahte an rawn hruai a, anni chuan a kawr hmâwr tal deh phalsak tûrin an dîl chiam a; tin, a dek apiangte chu an dam ta zêl a.

7 Tichuan, Jerusalem aṭanga lo kal Pharisaite leh dân hre mi ṭhenkhat chu Isua hnênah an lo kal khâwm a. 2 Anni chuan a zirtîr ṭhenkhatte’n kut bawlhhlawha chaw an ei chu an hmu a, chu chu kut sil lo tihna a ni.* 3 (Pharisaite leh Juda-ho zawng zawng chuan an pi leh pute thurochhiah an zui tlat avângin, kut an sil pawhin an kiu thlenga an sil loh chuan chaw an ei ngai lo va. 4 Bazâr aṭanga an haw pawhin, an insil fai hmasak phawt loh chuan thil an ei ngai lo. Thurochhiah dang tam tak inhlan chhâwn leh vawn tlat an nei a, chûngah chuan no te, bêl te leh, dâr bêlte tuia hnim pil khera sil ang chî a tel a ni.) 5 Tin, chûng Pharisaite leh dân hre mite chuan a hnênah: “Engvângin nge i zirtîrte’n pi pute thurochhiah zâwm lova kut bawlhhlawha chaw an ei?” tiin an zâwt a. 6 Ani chuan an hnênah: “Nangni mi vervêkte u, Isaia hian in chungchâng a lo hrilh lâwk dik tak zet mai, ‘Hêng mite hian an kâin min chawimawi a, an thinlung erawh chuan min hlat hle si. 7 Mihring thupêkte chauh an zirtîr avângin, an mi biak ṭhin hi a thlâwn mai a ni,’ tia a lo ziah hi. 8 Pathian thupêk ngai pawimawh lovin, mihring thurochhiah in vuan tlat zâwk a nih hi,” a ti a.

9 Heti hian a sawi chhunzawm a: “In thurochhiah in vawn reng theih nân Pathian thupêk chu fing vervêk takin in hnâwl a ni. 10 Mosia’n: ‘I nu leh i pa chawimawi rawh,’ tih leh, ‘A nu emaw, a pa emaw sawichhia chu tih hlum tûr a ni,’ tih a sawi a. 11 Nangni erawh chuan, ‘Tu pawhin a nu emaw, a pa emaw hnênah: “Ka ṭanpuina tûr zawng zawng che u chu korban a ni tawh (chu chu Pathian hnêna hlan a ni tawh tihna a ni),”’ a tih chuan 12 a nu emaw, a pa emaw thil eng mah a tihsak in phal tawh lo. 13 Chutiang chuan, in inhlan chhâwn ṭhin in thurochhiah avângin, Pathian thu chu eng mah lovah in chantîr a ni. Chutiang thil chu tam tak in ti ṭhîn,” tiin. 14 Tichuan, mipuite chu a ko leh a, an hnênah: “In zain min ngaithla ula, ka thusawi hi a awmzia hre thiam rawh u. 15 Mihring ti bawlhhlawhtu chu a kâa lût ni lovin, a kâ aṭanga chhuak zâwk hi a ni,” a ti a. 16* ——

17 Tin, mipuite kalsana ina a luh chuan, a zirtîrte chuan tehkhin thu awmzia chu an zâwt a. 18 Ani chuan an hnênah: “Nangni pawhin anmahni angin in la hre thiam lo a ni maw? Mihring ti bawlhhlawhtu chu a kâa lût a ni lo tih in hre lo vem ni? 19 Kâa lût chu thinlungah ni lovin, pumpuiah a lût thla a, inthiarnaah a chhuak leh mai ṭhîn,” a ti a. Tichuan, ei tûr zawng zawng a thianghlim thu a sawi a. 20 Heti hian a sawi belh a: “Mihring ti bawlhhlawhtu chu a kâ aṭanga chhuak a ni. 21 Mihring chhûng lam, a thinlung aṭang chuan ngaihtuahna sual: nungchang bawlhhlawhna te,* rûkrûkna te, tualthahna te, 22 uirêna te, duhâmna te, suahsualna te, bumna te, tîmna nei lova thil sual tihna te,* îtsîkna te, sawichhiatna te, chapona te leh, âwm leh mawi hriat lohnate hi a lo chhuak ṭhîn. 23 Chûng thil sual zawng zawng chu chhûng lam aṭanga lo chhuak a ni a, chu chuan mihring a ti bawlhhlawh ṭhîn,” a ti a.

24 Chu hmun aṭang chuan Tura leh Sidon ramah a kal ta a. Chutah chuan in pakhatah a lût a, tu ma hriat duh lo mah se, a inthup thei si lo va. 25 Chu veleh, a fanu naupang tê ramhuaiin a man hmeichhe pakhatin a chanchin a lo hria a, a hnênah lo kalin a ke bulah a bawkkhup a. 26 Hmeichhia chu Grik mi, Suria rama Phoiniki biala mi a ni. Ani chuan a fanu kawchhûnga ramhuai awm chu hnawh chhuahsak tûrin a ngên a ngên a. 27 Isua erawh chuan a hnênah: “Fate chu lo puar hmasa phawt rawh se; fate chhang lâksak a, ui tête hnêna pêk chu thil dik a ni si lo,” tiin a chhâng a. 28 Hmeichhia chuan: “A dik alâwm ka pu; nimahsela, ui tête pawhin dawhkân hnuaia naupangte chhang them tla chu an ei ṭhîn asin,” tiin a chhâng a. 29 Ani chuan a hnênah: “I thusawi avâng hian kal tawh rawh; i fanu kawchhûng aṭangin ramhuai chu a chhuak tawh e,” a ti a. 30 Tichuan, a inah a haw a, naupang chu khuma lo muin a va hmu a, ramhuai chuan a lo chhuahsan tawh a.

31 Tin, Tura ram aṭangin a chhuak a, Sidon khua tlawhin Dekapoli ram* kal tlang zêlin Galili Dîl chu a thleng ta a. 32 Bengngawng pakhat ṭawng pawh ṭawng fiah thei lo hi a hnênah an rawn hruai a, a chunga a kut nghat tûrin an ngên a. 33 Isua’n ani chu mipui zîng aṭangin a hruai hrang a. A kutzungṭangin a beng kuate chu a khawihsak a. Chil a chhâk hnuah a lei a dehsak a. 34 Tin, vân lam enin thâwk a han la a, a hnênah: “Eph′pha·tha,” a ti a, chu chu, “Lo inhawng rawh,” tihna a ni. 35 Tichuan, a bengte chu a lo inhawng a, a ṭawng fiah lo pawh chu lo rehin fiah takin a ṭawng thei ta a. 36 Tu hnênah mah sawi lo tûrin anni chu thu a pe a; nimahsela, chutianga a tih nasat poh leh an puang zâr nasa lehzual sauh va. 37 Mite chuan mak an ti hle a: “A thil tih zawng zawngte chu a ropui tak zet a ni. Bengngawngte meuh pawh an beng ti vârin, ṭawng thei lote pawh a ṭawngtîr ṭhîn,” an ti a.

8 Tin, Isua awmnaah mipuite chu an lo kal khâwm leh a, anni chuan eng mah ei tûr an nei lo va. Tichuan, zirtîrte chu a ko khâwm a, an hnênah: 2 “Mipuite hi ka khawngaih hle mai, ka hnênah ni thum lai an awm tawh a, ei tûr eng mah an nei si lo. 3 Rilṭâma* ka hawtîr chuan an chau mai ang, ṭhenkhat phei chu hla tak aṭanga lo kal an ni si a,” a ti a. 4 Nimahsela, a zirtîrte chuan a hnênah: “Hetiang hmun fianrialah hian mipui heti zât kham khawp chhang tuin nge hmu thei tehlul ang?” an ti a. 5 An hnênah: “Chhangpêr eng zât nge in neih?” a ti a. Anni chuan: “Pêr sarih,” tiin an chhâng a. 6 Tin, mipuite chu leia ṭhu tûrin a hrilh a. Tichuan, chhangpêr pasarih chu a la a, lâwmthu a sawi zawhin a phel a, zirtîrte hnênah a pe a, anni chuan mipuite chu an sem ta a. 7 Chu bâkah, nghatê tlêm azâwng an nei bawk a, Pathian hnêna lâwmthu a sawi zawhin chûngte pawh chu sem tûrin a hrilh a. 8 Tichuan, an ei a, an puar ta hlawm a; tin, an ei bâng nawi chu an la khâwm a, bâwmrâng lian tak pasarih khat a ni. 9 Tin, chutah chuan patling 4,000 vêl an tel a. Tichuan, anni chu a hawtîr ta a.

10 A zirtîrte nên lawngah an chuang ta nghâl a, Dalmanutha ram an thleng a. 11 Pharisaite an lo kal a, amah fiah nân vân aṭanga chhinchhiahna hmuhtîr tûra phûtin ani chu an hnial a. 12 Isua chu a lungngai ta hle a: “Engvângin nge he chhuan hian chhinchhiahna a zawn? Tih tak meuhvin ka hrilh a che u, he chhuan hnênah hian eng chhinchhiahna mah pêk a ni lo vang,” a ti a. 13 Anni chu kalsanin lawngah a chuang leh a, râl lehlamah a kal ta a.

14 Nimahsela, chhang an ken theihnghilh a, chhangpêr pakhat chauh lo chu lawngah chuan ei tûr dang eng mah an nei lo va. 15 Isua’n anni chu vaukhânin: “Invêng ula, Pharisaite dawidim leh Heroda dawidim lakah chuan fîmkhur rawh u,” a ti a. 16 Tichuan, zirtîrte chu chhang an neih loh avângin an inhnial ta a. 17 Chu chu a hriatin an hnênah: “Engati nge chhang in neih loh avânga in inhnial? Ka thusawi hi in tân a la fiah tâwk lo vem ni? In la hre thiam lo fo a ni maw? 18 ‘Mit nei siin in hmu lo vem ni? Beng nei siin in hre lo vem ni?’ 19 Chhangpêr pangaa patling 5,000 ka hrai khân a bâng nawi bâwmrâng eng zât khat nge in lâk khâwm kha in la hria em?” a ti a. Anni chuan a hnênah: “Sâwm pahnih,” an ti a. 20 “Chhangpêr pasariha patling 4,000 ka hrai khân a bâng nawi bâwmrâng lian tak eng zât khat nge in lâk khâwm kha?” a ti a. Anni chuan a hnênah: “Bâwmrâng sarih,” an ti a. 21 Tichuan, an hnênah: “In la hre thiam lo fo a ni maw?” a ti a.

22 Tin, Bethsaida khua an thleng a. Chutah chuan mite’n mitdel pakhat a hnênah an rawn hruai a, ti dam tûrin an ngên a. 23 Mitdel chu kaiin khua aṭangin a hruai chhuak a. A mita a chil a chhâk hnuah a chungah a kut a nghat a, a hnênah: “Eng nge i hmuh?” a ti a. 24 Chu pa chu a dâk chhuak a: “Mihring ka hmu; nimahsela, thing kal ang maiin ka hmu,” a ti a. 25 Tin, Isua’n a mit chu a khawihsak leh a, chu pa chu lo damin engkim fiah takin a hmu leh thei ta a. 26 Tichuan: “He khuaah hian lût suh ang che,” tia hrilhin, a in lamah a hawtîr ta a.

27 Isua leh a zirtîrte chu Philipa Kaisari biala khuate tlawh tûrin an kal chhuak a, kawnga an kal lai chuan a zirtîrte hnênah: “Mite’n tu nge a ni min tih?” tiin a zâwt a. 28 Anni chuan: “‘Baptistu Johana a ni,’ an ti che a; mi dangte chuan, ‘Elija a ni,’ an ti che a; mi dang lehte chuan, ‘Zâwlneite zînga pakhat a ni,’ an ti che,” tiin an chhâng a. 29 Tichuan, an hnênah: “A nih leh, nangni’n tu nge a ni min tih?” tiin a zâwt a. Petera chuan: “Krista chu i ni,” tiin a chhâng a. 30 Chu veleh, tu hnênah mah a nihna sawi lo tûrin khauh takin thu a pe a. 31 Chu bâkah, mihring Fapa chuan hrehawm tam tak a tuar tûr thu te, upa te, puithiam lal te leh, dân hre mite’n an hnâwl tûr thu te, tih hlum a nih tûr thu te leh, ni thum nîa a thawhleh tûr thute a hrilh* ṭan a. 32 Chûng thute chu zêp nei hauh lovin a sawi a. Nimahsela, Petera chuan hruai hrangin a zilh ta a. 33 Isua erawh chu a lehhawi a, a zirtîrte en chungin Petera chu: “Setan, min kalsan rawh! Pathian ngaihtuah dân ni lovin, mihring ngaihtuah dânin i ngaihtuah a ni,” tiin a zilh a.

34 Tin, ani chuan mipuite chu a zirtîrte nên a ko va, an hnênah: “Tu pawhin mi zui a duh chuan mahni tâna nung tawh lovin, a nghaisakna ban* puin mi zui reng rawh se. 35 Tu pawh a nun chhanhim tum apiangin a chân ang a; nimahsela, tu pawh keimah avâng leh chanchin ṭha avânga a nun chân apiang chu a nung leh ang. 36 Miin khawvêl hi a pumin nei se, a nun chân si sela, a tân eng hlâwkna nge awm ang? 37 A nih loh leh, miin a nunna aiah eng nge a pêk ang? 38 Tu pawh he chhuan uirê hmang* leh suaksual takte hmaa keimah leh ka thute zahpui apiang chu mihring Fapa, a Pa ropuina leh vântirhkoh thianghlimte nêna a lo kal hunah ani chu a zahpui ve ang,” a ti a.

9 Tichuan, an hnênah: “Tih tak meuhvin ka hrilh a che u, heta ding ṭhenkhat hi Pathian Ram an hmuh thlenga thi hauh lo tûr an awm,” tiin a sawi belh a. 2 Ni ruk hnuah chuan Isua’n Petera te, Jakoba te leh, Johana te chu tlâng sâng takah a hruai a. Tichuan, a lan dân chu an hmaah a lo danglam ta a. 3 A silhfênte chu a lo vâr ta sur mai a, leia thawmhnaw sutu tu mahin chutiang chuan thawmhnawte an su vâr thei lo. 4 Elija leh Mosia chu an hnênah an rawn inlâr bawk a, Isua nên an inbia a. 5 Tichuan, Petera’n Isua hnênah: “Rabbi, heta awm hi kan tân a ṭha e. Chuvângin, bûktê pathum i sa ang u, i tân pakhat, Mosia tân pakhat, Elija tân pakhat,” a ti a. 6 A nihna takah chuan, an hlauh êm avângin Petera chuan sawi mai tûr a hre lo a ni. 7 Tin, chhûm a lo zîng a, anni chu a hliah ta a, chhûm aṭang chuan: “Hei hi ka Fapa duh tak a ni. A thusawi ngaithla rawh u,” tiin aw a lo chhuak a. 8 Tin, an han hawi kual chuan, Isua chauh lo chu tu mah an hmu ta lo va.

9 Tlâng aṭanga an chhuk laiin, thihna ata mihring Fapa a thawhleh hma loh chuan, an thil hmuhte chu tu hnênah mah sawi lo tûrin ngun takin a hrilh a. 10 Chu thu chu an thinlungah an vawng tlat a;* nimahsela, thihna ata thawhlehna chungchâng a sawi awmzia chu an sawiho va. 11 Tichuan, a hnênah: “Engvângin nge dân hre mite’n ‘Elija chu Krista aiin a lo kal hmasa tûr a ni,’ an tih?” tiin an zâwt a. 12 Ani chuan an hnênah: “Elija chu a lo kal hmasa ngei ang a, engkim a siam ṭha leh ang; nimahsela, engvângin nge mihring Fapa chungchângah hrehawm tam tak a tawrh tûr thu leh zahthlâk taka siam a nih tûr thu ziah a nih? 13 Ka hrilh a che u, Elija chu a lo kal daih tawh a; amaherawhchu, a chanchin ziah a nih ang ngei khân, an duh dân dânin a chungah thil an ti ta zâwk a ni,” a ti a.

14 Zirtîr dangte hnên an thlen chuan, anni chu mipui tam takin an hual vêl tih leh dân hre mite’n an lo hnial tih an hmu a. 15 Nimahsela, mipui zawng zawngin Isua an hmuh veleh mak an ti hle a, chibai bûk tûrin a hnênah an tlân nghâl a. 16 Isua’n an hnênah: “Eng chungchângah nge in lo inhnial?” tiin a zâwt a. 17 Mipui zînga mi pakhat chuan: “Zirtîrtu, ka fapa hi a ramhuai paiin ṭawng thei lova* a siam avângin i hnênah ka rawn hruai a. 18 Amah a beih apiangin leiah a ti tlu a, a chil phuante tlain a hate a ṭhial a, a zawi vek ṭhîn. I zirtîrte hnênah min hnawh chhuahsak tûrin ka ngên a; nimahsela, an thei si lo,” a ti a. 19 An hnênah: “Chhuan rinna nei lote u, eng chen nge in zîngah ka awm zêl ang? Engtia rei nge ka dawh ang che u? Ka hnênah rawn hruai rawh u,” a ti a. 20 Tin, mipa naupang chu a hnênah an rawn hruai a; nimahsela, ramhuaiin Isua a hmuh veleh naupang chu ti tluin, a ti khûr chiam a. Leia a tlûk hnu chuan, chil phuan tla zawih zawihin a tâl ta chiam mai a. 21 Tin, Isua’n naupang pa hnênah chuan: “Hetiang hian engtia rei nge a awm tawh?” tiin a zâwt a. Ani chuan: “Naupang tê a nih lai aṭang tawhin; 22 amah ti hlum tûrin meiah leh tuiahte vawi tam tak a paih ṭhîn. Tih theih eng emaw i nei a nih chuan, min khawngaih la, min ṭanpui hrâm rawh,” tiin a ngên a. 23 Isua’n a hnênah: “‘Tih theih i neih chuan,’ i ti elo? Rinna neitu tân chuan engkim tih theih a ni asin,” a ti a. 24 Chu veleh naupang pa chu: “Ka ring e! Rinna ka tlâkchhamnaah hian min ṭanpui rawh!” tiin a au chhuak ta nghâl a.

25 Isua’n an lam pana hmanhmawh taka lo kal mipuite a hmuh chuan, ramhuai chu hauvin: “Nang, mite ṭawng thei lo leh bengngawnga siamtu ramhuai, thu ka pe a che, a kawchhûng ata kha lo chhuak la, lût leh tawh suh!” a ti a. 26 Ring taka auva nasa taka a tih khurh hnu chuan a lo chhuak a, naupang chu thi ang maiin a awm a; tin, mi tam zâwk chuan: “A thi a nih hi!” an ti a. 27 Nimahsela, Isua’n a kutah vuanin a kai tho va. 28 Ina a luh hnuin, zirtîrte chu a hrangin a hnênah an lo kal a: “Engvângin nge keini’n kan hnawh chhuah theih loh?” an ti a. 29 Ani chuan an hnênah: “Hetiang chi ramhuai hi chu, ṭawngṭaina nên chauh lo chuan hnawh chhuah theih an ni lo,” a ti a.

30 Chuta ṭang chuan an kal chhuak a, Galili ram an kal tlang a; nimahsela, tu man a awmna chin an hriat a duh lo va. 31 A zirtîrte hnênah: “Mihring Fapa hi phatsan a ni ang a, a hmêlmate kutah pêk a ni ang; tin, an ti hlum ang a, tih hlum a nih aṭanga ni thum nîah* a tho leh ang,” tiin a lo zirtîr tawh si a. 32 Nimahsela, anni chuan a thusawi awmzia chu an hre thiam lo va, an zâwt fiah ngam bawk si lo.

33 Tin, Kapernaum khua an thleng a. In chhûnga an awm laiin Isua’n an hnênah: “Kawngah khân eng chungchângah nge in inhnial?” tiin a zâwt a. 34 An zînga ropui ber chungchânga inhnial an nih avângin an ngawi ta reng a. 35 Tichuan, a ṭhu a, Sâwm Pahnihte chu kovin an hnênah: “Tu pawh ropui ber nih duh chu hnuaihnung berah a awm tûr a ni a, mi zawng zawng rawngbâwltuah a awm bawk tûr a ni,” a ti a. 36 Tichuan, naupang tê kovin an zîngah a dintîr a; naupang chu kuahin an hnênah: 37 “Tu pawh ka hming avânga he naupang tê ang hi lâwm apiang chu, kei mi lâwm a ni; tin, tu pawh kei mi lâwm chu, keimah chauh ni lovin, mi Tîrtu lâwm a ni bawk,” a ti a.

38 Johana’n a hnênah: “Zirtîrtu, tu emaw i hminga ramhuaite hnawt chhuak kan hmu a, kan zînga mi a nih loh avângin chutianga ti lo tûr chuan kan khap asin,” a ti a. 39 Isua erawh chuan: “Khap duh tawh suh u, tu mah ka hminga thil mak* ti si a, mi sawichhe nghâl thei an awm lo. 40 Tu pawh min dodâl lotu chu kan lama ṭang a ni si a. 41 Tu pawh Krista zuitute in nih avânga tui in tûr no khat pe apiang che u chu, tih tak meuhvin ka hrilh a che u, chu mi chuan a lâwmman dawn tûr chu a chân tawp lo vang. 42 Nimahsela, rinna lantîrtu hêng naupang tê ang mite zînga pakhat lek pawh ti tlu apiang chu, buh râwt sawmna lung* awrhtîrin, tuifinriat thûk takah thlâk sela a tân a ṭha zâwk ang.

43 “I kutin a tih tlûk che chuan tan daih rawh. Kut pahnih neia mei mit thei lo Gehenna-a* paiha awm ai chuan, ramtuileilova nunnaa luh i tân a ṭha zâwk e. 44* —— 45 I kêin a tih tlûk che chuan tan daih rawh. Ke pahnih neia Gehenna-a* paiha awm ai chuan, ke pakhat neia nunnaa luh i tân a ṭha zâwk e. 46* —— 47 Tin, i mitin a tih tlûk che chuan paih daih rawh. Mit pahnih neia Gehenna-a* paiha awm ai chuan, mit pakhat chauh neia Pathian Rama luh i tân a ṭha zâwk e, 48 Gehenna-ah* chuan thil lung chu a thi ngai lo va, mei pawh a mit ngai hek lo.

49 “Miin chi a phul angin, mi zawng zawng* chungah mei sûrtîr a ni ang. 50 Chi hi a ṭha e; nimahsela, chi hi a dâk tawh chuan engtin nge in tih al leh ang? Nangmahni ngeiah chi nei ula, inrem takin awm rawh u,” a ti a.

10 Chuta ṭang chuan a tho va, Jordan Lui râla Judai ramri a lo thleng a, mipui tam tak a hnênah an rawn kal khâwm leh a. A tih ṭhin dân pângngaiin anni chu a lo zirtîr leh a. 2 Tin, Pharisaite a hnênah an lo kal a, amah fiah nân: “Miin a nupui a ṭhen a thiang em?” tiin an zâwt a. 3 Anmahni chhân nân: “Mosia’n eng thu nge a pêk che u?” tiin a zâwt lêt a. 4 Anni chuan: “Mosia’n inmâkna lehkha ziaka ṭhen a phal,” an ti a. 5 Nimahsela, Isua’n an hnênah: “He thupêk a ziahsak chhan che u chu in luhlul êm vâng a ni. 6 Nimahsela, a tîr aṭangin, ‘Pathianin mipa leh hmeichhiaah a siam a. 7 Chumi avâng chuan, mipain a nu leh a pa a kalsan ang a, 8 tisa pumkhat an lo ni tawh ang,’ pahnih ni tawh lo va, tisa pumkhat an nih theihna tûrin. 9 Chuvângin, Pathianin a zawm tawh chu mihringin ṭhen suh se,” tiin a chhâng a. 10 Tin, inah chuan zirtîrte’n chumi chungchâng chu an zâwt a. 11 Ani chuan an hnênah: “Tu pawh a nupui ṭhena mi dang neitu chuan a nupui a uirêsan a ni. 12 Hmeichhia pawhin a pasal ṭhen a, mi dang a nei a nih chuan, ani pawh chu a uirê a ni,” a ti a.

13 Tin, mite chuan naupangte chu a deh atân a hnênah an rawn hruai a; nimahsela, zirtîrte chuan an lo hau va. 14 Chumi a hmuh chuan Isua chu a lungni lo hle a, an hnênah: “Naupangte kha ka hnênah rawn kaltîr ula, lo dang suh u; Pathian Ram chu hetiang mite ta hi a ni si a. 15 Tih tak meuhvin ka hrilh a che u, Pathian Ram chu naupang têin a lawm anga lâwm lo apiang a chhûngah an lût tawp lo vang,” a ti a. 16 Tichuan, naupangte chu a kuah a, an chungah kut nghatin mal a sâwm ta a.

17 Tin, kawnga a kal laiin, mi pakhat a lo tlân a, a hmaah ṭhingṭhiin: “Zirtîrtu ṭha, chatuana nunna ka neih theih nân eng nge ka tih ang?” tiin a zâwt a. 18 Isua chuan a hnênah: “Engvângin nge Zirtîrtu ṭha tia min koh? Pathian chauh lo chu tu mah ṭha an awm lo. 19 Thupêkte chu i hriat kha: ‘Tual that suh, uirê suh, ru suh, thuhretu derah ṭang suh, bum suh, i nu leh i pa chawimawi rawh,’ tihte hi,” a ti a. 20 Chu pa chuan a hnênah: “Zirtîrtu, chûng zawng zawng chu naupang tê ka nih lai aṭang tawhin ka zâwm reng ṭhîn alâwm,” a ti a. 21 Tin, Isua’n ani chu a en a, a hmangaih ta hle a, a hnênah, “Thil pakhat tih tûr i la nei: Kal la, i thil neihte va hralh la, i hralhna sum chu mi retheite hnênah pe ang che; tichuan, vânah ro i nei ang; tin, lo kal la, mi zui ang che,” a ti a. 22 Nimahsela, chu chhânna avâng chuan a ngui ta hle a, mi hausa tak a nih avângin lungngai takin a kal ta a.

23 A hawi kual vêl hnuin Isua chuan a zirtîrte hnênah: “Sum tam tak neite tân Pathian Rama luh a va harsa dâwn êm!” a ti a. 24 Nimahsela, zirtîrte chuan a thusawi chu mak an ti hle a. Isua erawh chuan: “Ṭhiante* u, Pathian Rama luh chu a va harsa dâwn êm! 25 Mi hausa Pathian Rama luh aiin, sanghâwngsei hriau benga luh tlang a awl zâwk ang,” a ti a. 26 A hma aiin mak an ti lehzual a, a hnênah: “Tu nge chhandam ni thei ta ang?” an ti a. 27 Isua’n anni chu enin: “Chu chu mihring tih theih rual a ni lo; nimahsela, Pathian chuan thil engkim a ti thei a ni,” a ti a. 28 Tin, Petera’n: “Ngai teh! Engkim kalsanin kan zui ta che a,” tia a han sawi ṭan chuan 29 Isua’n: “Tih tak meuhvin ka hrilh a che u, tu pawh keimah avâng leh chanchin ṭha avânga a in emaw, a unaupate emaw, a farnute emaw, a nu emaw, a pa emaw, a fate emaw, a ramte emaw kalsan apiang chuan 30 tûn dam chhûngah ngei hian in te, unaupa te, farnu te, nu te, fate a leh zain a dawng ang, tihduhdahnate nên. Hun lo la awm tûra chatuana nunna pawh a hmu bawk ang. 31 Nimahsela, mi tam tak a hmasa bera awm mêkte hi a hnuhnûng berah an la awm ang a, a hnuhnûng bera awm mêkte pawh hi a hmasa berah an la awm ang,” a ti a.

32 Tin, Jerusalem pana an chhoh laiin, Isua chu an hmaah a kal a, anni chuan mak an ti hle a. Nimahsela, anmahni zuitute chu an hlauthâwng ta hle a. Sâwm Pahnihte chu hruai hrang lehin, an hnênah hêng thil a chunga thleng tûrte hi a hrilh leh a ni: 33 “Ngai teh u! Jerusalem khuaah kan chhoh dâwn hi, mihring Fapa hi puithiam lalte leh dân hre mite hnênah pêk a ni ang. Anni chuan thi tûrin ro an rêlsak ang a, hnam dangte hnênah an pe ang. 34 Chûng mite chuan nuihza siam nâna hmangin, chil an chhâk ang a, savun hruihruala vuain an ti hlum ang. Nimahsela, ni thum nîah* a tho leh ang,” tiin.

35 Zebedaia fapa Jakoba leh Johana te chuan rawn panin, a hnênah: “Zirtîrtu, kan dîl apiang che min tihsak tûrin kan duh che a ni,” an ti a. 36 Ani chuan an hnênah: “Eng nge tihsak che u ila in duh?” tiin a zâwt a. 37 Anni chuan: “I Lalrama ro i rêl hunah pakhat i ding lamah, pakhat i vei lamah min ṭhuttîr ang che,” tiin an chhâng a. 38 Isua erawh chuan an hnênah: “In thil dîl hi in hre lo a ni. Ka no in tûr hi min ṭâwmpui thei em ni? A nih loh leh, ka baptisma chan tûr pawh in chang thei em ni?” a ti a. 39 Anni chuan a hnênah: “Thei e,” an ti a. Isua’n an hnênah: “Ka no in tûr chu in in ang a, ka baptisma chan tûr pawh in chang ang. 40 Nimahsela, ka ding lam emaw, ka vei lam emawa ṭhu tûra thupêk chu ka tih theih a ni lo. An tâna buatsaihsakate tân zâwk a ni,” a ti a.

41 Mi dang sâwmte’n chu chu an hriat chuan, Jakoba leh Johana chungah chuan an lâwm lo hle a. 42 Mahse, Isua’n anniho chu kovin, an hnênah: “Hnam dangte chu an chungah an rorêltute an inti lal hle a, an mi ropuite pawhin an chungah thu an nei hle bawk tih in hria. 43 Chutiang chu in zîngah erawh chuan a ni tûr a ni lo; tu pawh in zînga ropui duh chuan in rawng a bâwl zâwk tûr a ni a, 44 tu pawh in zînga hmasa ber nih duh chu, in vaia chhiahhlawhah a awm tûr a ni. 45 Mihring Fapa meuh pawh rawngbâwlsaka awm tûr ni lovin, rawngbâwl tûr leh mi tam tak tlan nâna a nun pe tûr zâwka a lo kal ang hian,” a ti a.

46 Tichuan, Jeriko khua an lo thleng a. Nimahsela, amah leh a zirtîrte leh mipui tam tak Jeriko khua aṭanga an kal chhuah chuan, Bartimaia (Timaia fapa), mitdel, kutdawh chu kawng sîrah a lo ṭhu a. 47 Nazaret Isua a ni tih a hriatin: “Isu, Davida Fapa, min khawngaih rawh!”* tiin ring takin a au va. 48 Mi tam takin ngawi tûra hrilhin an hau va, ani erawh chu ring lehzualin: “Davida Fapa, min khawngaih* rawh!” tiin a au chhunzawm zêl a. 49 Tichuan, Isua chu a ding a: “Rawn ko rawh u,” a ti a. Tin, mitdel chu an ko va, a hnênah: “Hlau suh! Tho rawh, a ko che a nia,” an ti a. 50 Tichuan, a kawrfual chu a paih a, a zuang tho va, Isua hnênah chuan a kal ta a. 51 Isua’n a hnênah: “Eng nge tihsak che ila i duh?” tiin a zâwt a. Mitdel chuan a hnênah: “Rab·bo′ni,* ka mit hian khua hmu leh thei se ka duh a ni,” tiin a chhâng a. 52 Tin, Isua’n a hnênah: “Kal tawh rawh. I rinnain a ti dam che a ni,” a ti a. Khua a lo hmu leh thei ta nghâl a; tichuan, kawngah Isua chu a zui ta a.

11 Tin, Jerusalem khua an thlen hma, Oliv Tlânga awm Bethphage leh Bethani khua an thlen chuan, Isua’n a zirtîrte zînga pahnih a tîr a. 2 An hnênah: “In hmaa khuaah sâwn va kal ula, in luh veleh tu ma la chuan ngai lohna sabengtung tuai inthlung in hmu ang. Phelh ula, rawn kai ang che u. 3 Tu pawhin, ‘Engvângin nge in phelh? an tih che u chuan, ‘Lalpa’n a mamawh a ni, a rawn dahtîr leh thuai ang,’ ti ang che u,” a ti a. 4 Tichuan, an kal ta a, kawng bula in pakhat kawngkhâr hmaa sabengtung tuai inthlung chu an va hmu a, an phelh ta a. 5 Nimahsela, chuta ding ṭhenkhat chuan an hnênah: “Engvângin nge sabengtung tuai kha in phelh?” an ti a. 6 Isua’n a hrilh ang chiahin an hnênah an sawi a; tichuan, an kaltîr ta a.

7 Tin, sabengtung tuai chu Isua hnênah an rawn kai a, an kawrfualte a chungah an phah a, ani chu a chuang ta a. 8 Mi tam takin an kawrfualte chu kalkawngah an lo phah a, mi dangte chuan kawng sîra mi chhâwl sâtin an phah bawk a. 9 Tin, a hma lama kalte leh a hnung lama zuitute chuan: “Aw Pathian, ani hi chhandam rawh! Jehova* hminga lo kal chu malsâwmin awm rawh se! 10 Kan pa Davida Lalram lo thleng tûr chu malsâwmin awm rawh se! Chungnung bera awm aw Pathian, ani hi chhandam rawh!” tiin an au va. 11 Tichuan, Jerusalemah lûtin biak inah a kal a, engkim a en kual vêl a. Tin, khua a tlai tawh avângin Sâwm Pahnihte nên Bethani khuaah an kal a.

12 A tûka Bethani khua aṭanga an kal chhuah chuan a ril a lo ṭâm ta a. 13 Tin, hla tak aṭangin theipui kûng hnah nei a hmu a, a rah a awm beiseiin a va pan a. Nimahsela, a va thlen chuan a hnah chauh lo chu eng mah a hmu lo, theipui rah hun lai a ni si lo va. 14 Tichuan: “Tu man i rah ei leh tawh ngai suh se,” a ti a. A zirtîrte’n chu chu an hria a.

15 Tichuan, Jerusalem an lo thleng a. Isua chu biak inah a lût a, sumdâwngte leh anmahni dâwrtute chu a hnawt chhuak a. Pawisa thlengtute dawhkânte leh ṭhuro zuartute ṭhutthlêngte chu a nam thlûksak a. 16 Tu mahin biak in hung chhûnga bungrua an phurh tlang a phal hek lo. 17 Ani chuan zirtîrin an hnênah: “‘Ka in chu hnam zawng zawng ṭawngṭaina in tia koh a ni ang,’ tih ziak a ni lo vem ni? Nimahsela, nangni erawh chuan suamhmangte pûkah in siam a nih hi,” a ti a. 18 Tichuan, puithiam lalte leh dân hre mite’n chu chu an lo hriatin, amah tih hlum dân kawng an zawng ta a. Mipui zawng zawngin a zirtîrna chu mak an tih êm avângin ani chu an hlau si a.

19 Tlai lam a lo nih chuan, Jerusalem khua aṭangin an kal chhuak a. 20 Tin, a tûk zîngah chuan kawnga an kal pahin, theipui kûng kha a zung chawpin a ro vek tih an hmu a. 21 Petera chuan theipui kûng hnêna Isua thusawi kha hre chhuakin, a hnênah: “Rabbi, en teh! Theipui kûng ânchhia i lawh kha a ro ta vek mai,” a ti a. 22 Isua’n anni chu chhângin: “Pathian ring rawh u. 23 Tih tak meuhvin ka hrilh a che u, tu pawhin he tlâng hnênah hian, ‘Insawn la, tuifinriatah tla lût rawh,’ a tih a, ringhlel hauh lo va, a thusawi ang chuan a thleng ngei ang tih a rin tlat chuan, a sawi ang ngei chuan a thleng ang. 24 Chuvângin, ka hrilh a che u, engkim ṭawngṭaia in dîl apiang chu rinna nên dîl ula, hmu tawh angah inngai rawh u; tichuan, in hmu ang. 25 Tin, dinga in ṭawngṭai hunah, in Pa vâna miin in bawhchhiatnate a ngaihdam theihna tûrin, in chunga thil ti sualtu apiangte chu ngaidam ang che u,” a ti a. 26* ——

27 Jerusalem khua an lo thleng leh a. Biak in pana a kal laiin puithiam lal te, dân hre mi te leh, upate an lo kal a. 28 A hnênah: “Tu thuneihnain nge hêng thilte hi i tih? A nih loh leh, hêng thil ti tûr hian tuin nge thuneihna pe che?” tiin an zâwt a. 29 Isua’n an hnênah: “Kei pawhin zawhna pakhat ka zâwt ve ang che u. Min chhâng ula; tichuan, hêng thilte hi tu thuneihnaa ti nge ka nih ka hrilh ang che u. 30 Johana baptisma kha, vâna mi thu nge mihring thu? Min chhâng teh u,” a ti a. 31 Tichuan, an ngaihtuahho va: “‘Vâna mi,’ kan tih chuan, ‘A nih leh, engati nge ani chu in rin loh?’ a ti ang a. 32 Mahse, ‘Mihring thu,’ tiin kan sawi ngam ang em?” an ti a. Mi zawng zawngin Johana chu zâwlnei ni ngeia an ngaih avângin mipuite chu an hlau si a. 33 Tichuan, Isua chu chhângin: “Kan hre lo,” an ti a. Isua’n an hnênah: “Hêng thilte hi tu thuneihnain nge ka tih ka hrilh bîk lo vang che u,” a ti a.

12 Tichuan, an hnênah tehkhin thute hmangin thu a sawi a: “Pa pakhatin grêp huan a siam a, a hung a, grêp sâwrna khur a lai a, a vênna tûr in sâng a sa bawk a; tichuan, huan enkawltute chu hlawh neia enkawltîrin hmun hla takah a zinsan ta a. 2 A rah lawh a lo hun chuan, a rah ṭhenkhat va la tûrin huan enkawltute hnênah a bâwih pakhat a tîr a. 3 Nimahsela, ani chu an lo man a, an vua a, kut ruakin an hawtîr ta a. 4 Tin, an hnênah bâwih dang a tîr leh a, ani pawh chu a lûah vuain, zahthlâk takin an lo siam a. 5 Bâwih dang a tîr leh a, ani chu an lo ti hlum a; tichuan, mi dang tam tak a tîr a, ṭhenkhat an lo vua a, ṭhenkhat an lo ti hlum a. 6 Tichuan, grêp huan neitu chuan, ‘Ka fapa hi chu an lo zah mahna,’ tiin huan enkawltute hnênah chuan a fapa duh tak chu a tîr ta a. 7 Nimahsela, huan enkawltute chuan, ‘Ro luahtu tûr a nih saw. That ila, a ro luah tûr hi kan ta a ni mai ang,’ an ti a. 8 Tichuan, an man a, an ti hlum a, grêp huan pâwnah an hnûk chhuak a. 9 Grêp huan neitupa chuan eng nge a tih tâk ang? Ani chu a rawn kal ang a, huan enkawltute chu ti hlumin, grêp huan chu mi dangte a enkawltîr ang. 10 Pathian Lehkha Thu-ah hei hi in chhiar ngai lo vem ni? ‘In satute lung duh loh kha a kila lung pawimawh ber* a lo ni. 11 Chu lung chu Jehova* hnên aṭanga lo kal a ni a, kan mit hmuhah a mak ropui hle,’ tih hi,” tiin.

12 Tin, tehkhin thu chu anmahni a sawi chhan tih an hriat avângin man an duh a; nimahsela, mipuite an hlau bawk si. Tichuan, ani chu kalsanin an kal bo ta a.

13 A hnuah, thu an sawi sualtîr theih nân Pharisai ṭhenkhat leh Heroda pâwla mite a hnênah an tîr a. 14 An va thlen chuan, a hnênah: “Zirtîrtu, mi dik tak i ni tih leh mi duhsak bîk i nei lo va, mi dangte duhsakna i zawng hek lo va; tin, Pathian chungchâng thutak i zirtîr tih kan hre bawk. A nih leh, Kaisara hnêna chhiah chawi hi a thiang* nge thiang lo?” an ti a. 15 Isua’n an vervêkzia a hriatin, an hnênah: “Engvângin nge min fiah? Denarii* khat min han lâk teh u, ka lo en ang e,” a ti a. 16 Tichuan, denarii khat chu an rawn la a, ani chuan an hnênah: “Tu lem leh tu hming nge chuang hi?” tiin a zâwt a. Anni chuan: “Kaisara,” tiin an chhâng a. 17 Tin, Isua chuan: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. Anni chuan mak an ti hle a.

18 Tichuan, thawhlehna a awm lo titu Saddukaite a hnênah an lo kal a: 19 “Zirtîrtu, Mosia’n: ‘Tu emawin fa nei lo va, a nupui a thihsan chuan a unaupain a nupui chu a nei ang a, a unaupa tân fate a neihsak tûr a ni,’ tiin min ziahsak a. 20 Unau mipa pasarih an awm a. A upa ber chuan nupui a nei a; nimahsela, fa nei lovin a thi a. 21 Tichuan, a pahnihnain a u nupui chu a nei a; nimahsela, fa nei lovin a thi ve leh a. A pathumna chungah pawh chutiang bawk chuan a thleng a. 22 An pasarih chuan fa nei lovin an thi ta vek a. A tâwpah, hmeichhia pawh chu a thi ta a. 23 An thawhleh hunah tu nupui ber nge ni ta ang? An pasarih chuan nupuiah an nei ṭheuh si a,” tiin an zâwt a. 24 Isua’n an hnênah: “Pathian Lehkha Thu leh Pathian thiltihtheihna in hriatthiam loh avângin in hre sual ṭhîn a ni. 25 Thihna ata tho lehte chuan nupui pasal an innei tawh lo vang a, vâna vântirhkohte ang an ni tawh zâwk ang. 26 Nimahsela, mitthi kaihthawh chungchâng thu-ah chuan Pathianin: ‘Kei hi Abrahama Pathian, Isaaka Pathian leh, Jakoba Pathian ka ni,’ tia hnimbuk chungchâng thua Mosia lehkhabua inziak hi in chhiar lo vem ni? 27 Ani chu mitthi Pathian a ni lo va, mi nung Pathian a ni zâwk. In hre sual hle a ni,” a ti a.

28 Tin, dân hre mite zînga pakhat a lo kal a, an inhnialna chu a lo ngaithla a, Isua’n anniho chu ṭha takin a chhâng tih a hriat chuan a hnênah: “Thupêk zawng zawng zîngah a eng hi nge pawimawh ber?” tiin a zâwt a. 29 Isua chuan: “A pawimawh ber chu hei hi a ni, ‘Israel mite u, ngaithla rawh u, kan Pathian Jehova* chu Jehova* pakhat chauh a ni a. 30 I Pathian Jehova* chu i thinlung zawng zawngin, i nunna* zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi. 31 A dawttu chu hei hi a ni, ‘Nangmah i inhmangaih angin, i vêngte pawh i hmangaih tûr a ni,’ tih hi. Hêngte aia thupêk ropui zâwk hi a awm lo,” tiin a chhâng a. 32 Dân hre mi chuan a hnênah: “Zirtîrtu, i sawi dik khawp mai, ‘Ani chu Pakhat chauh a ni a, amah lo chu tu mah dang an awm lo.’ 33 Amah chu thinlung zawng zawng, rilru* zawng zawng, chakna zawng zawnga hmangaih leh, mahni inhmangaih anga vêngte hmangaih chu pum hâl thilhlan leh inthawina zawng zawng aiin a hlu zâwk daih a ni,” a ti a. 34 Fing takin a chhâng tih Isua’n a hriatin a hnênah: “Pathian Ram i hlat lo ve,” a ti a. Tichuan, tu mahin Isua chu zawhna an zâwt ngam tawh lo.

35 Tin, Isua’n biak ina a la zirtîr mêk laiin: “Engvângin nge dân hre mite’n Krista chu Davida fapa a ni an tih? 36 Davida ngeiin thlarau thianghlim thâwkkhumin, ‘Jehova’n* ka Lalpa hnênah: “I hmêlmate i ke hnuaia ka dah hma loh zawng ka ding lamah ṭhu rawh,” a ti,’ tiin a sawi si a. 37 Davida ngeiin ani chu Lalpa tia a koh si chuan, engtin nge a fapa a nih theih ang?” a ti a.

Tin, mipui tam takin a thusawi chu ngaihthlâk nuam an ti hle a. 38 Tichuan, zirtîr pahin heti hian a sawi chhunzawm zêl a: “Dân hre mite* lakah fîmkhur rawh u, anni chuan kawrfual haa lên kual te, bazâra chibai bûk te, 39 inkhâwmna inah a hma lama* ṭhut te leh, ruai ṭhehnaa hmun ṭha bera ṭhutte an duh ṭhîn. 40 Hmeithaite thil neih* an lâksak a, mi dangte ngaihsân an hlawh theih nân rei tak tak an ṭawngṭai ṭhîn. Anni chuan hremna nasa lehzual an tâwk ang,” a ti a.

41 Tin, thawhlâwm bâwm hmuh theihna hmunah a ṭhu a, mite’n thawhlâwm bâwma pawisa an thlâk lai leh mi hausate’n pawisa thîr tam tak an thlâk laite chu a lo thlîr reng a. 42 Hmeithai rethei tak pakhat a lo kal a, pawisa thîr hlutna nei tlêm tak* pahnih a thlâk a. 43 Tichuan, a zirtîrte chu kovin an hnênah: “Tih tak meuhvin ka hrilh a che u, he hmeithai rethei hian thawhlâwm bâwma pawisa thlâktu dang zawng zawngte aiin a thlâk tam zâwk a ni. 44 Mi dang zawng zawng chuan an neih chuang liam an thlâk a, ani erawh hi chuan a mamawh ngawih ngawih, a neih chhun, a inchâwmna tûr a thlâk a ni,” a ti a.

13 Biak in aṭanga a kal chhuah laiin, a zirtîrte zînga pakhatin a hnênah: “Zirtîrtu, en teh! A lungte hi a lianin, a sak dânte hi a ropui teh a nia!” a ti a. 2 Nimahsela, Isua’n a hnênah: “Hêng in ropui takte hi i hmu maw? He hmuna lung inrem rêng rêng hi tih chim loh pakhat mah a awm lo vang,” a ti a.

3 Tin, Oliv Tlânga biak in lan theihnaa a ṭhut laiin, Petera te, Jakoba te, Johana te leh, Andria te chu anmahni chauhvin a hnênah an lo kal a: 4 “Chûng thilte chu engtikah nge a lo thlen ang? Chûng thil zawng zawng tâwpna chu a hnai tih chhinchhiahna chu eng nge ni ang? Min hrilh rawh,” an ti a. 5 Tin, Isua chuan an hnênah: “Tu mahin an bum loh nân che u fîmkhur rawh u. 6 ‘Ani chu ka ni,’ tiin ka hming chhâlin mi tam tak an lo kal ang a, mi tam tak an bum ang. 7 Tin, indo thâwmte leh indo thuthangte in hriat hunah mangang suh ang che u, chûngte chu lo thleng tûr rêng a ni; nimahsela, tâwpna chu a la ni rih lo vang.

8 “Hnam hrang leh hnam hrang an indo vang a, ram hrang leh ram hrang an indo vang a, hmun hrang hrangah lîrte a nghîng ang a, ṭâmte a tla bawk ang. Chûngte chu hrehawm* inṭanna a ni ang.

9 “Nangni erawh chu fîmkhur rawh u. Mite’n rorêlna inahte an hruai ang che u a, inkhâwmna inahte vuak in la tuar ang a, keimah avângin rorêltute leh lalte hmaah dintîr in la ni ang, an hnêna thu in hrilh theihna tûrin. 10 Tin, hnam zawng zawng hnênah chanchin ṭha hi hrilh hmasak tûr a ni. 11 Mantîr tûra an hruai hunah che u chuan, in thusawi tûr chu lo lungkham suh u; chumi huna hriattîr in nih apiang chu sawi ang che u, a sawitu chu nangmahni ni lovin thlarau thianghlim a ni zâwk dâwn si a. 12 Miin a unaupa a tih hlumtîr ang a, pain a fa a tih hlumtîr ang a, fate’n an nu leh pate dodâlin an la tih hlumtîr ang. 13 Ka hming avângin mi zawng zawng huat in la ni ang. Nimahsela, a tâwp thlenga chhel taka tuar apiang chu chhandam an ni ang.

14 “Tin, ti boraltu tenawm a din lohna tûr hmuna a ding in hmuh hunah (a chhiartuin hriatthiamna hmang rawh se), Judai rama awmte chu tlângahte tlânchhe rawh se. 15 In chunga awm chu chhuk lo sela, a thil neihte la tûrin in chhûngah lût suh se; 16 lova hnathawk chu a silhfên la tûrin haw hek suh se. 17 Chûng nîte chu raipuarte leh nau pawmte tân a va hrehawm lehzual dâwn êm! 18 In tlânchhiat hun chu thlasikah a thlen loh nân ṭawngṭai reng rawh u. 19 Chûng nîte chu hrehawmna nî a ni dâwn si a, chutiang chu Pathianin thil a siam ṭan tirh aṭanga tûn thlengin a la awm ngai lo va, awm pawh a awm leh tawh hek lo vang. 20 Tin, chûng nîte chu Jehova’n* ti tawi lo sela chuan, tu mah an dam khawchhuak lo vang. Nimahsela, a mi thlante avângin chûng nîte chu a ti tawi ang.

21 “Tin, tu pawhin, ‘En teh u! Krista chu heta hi a awm e!’ emaw, ‘En teh u! Sawta saw a awm e!’ emaw tia an hrilh che u chuan âwih suh ang che u. 22 Krista derte leh zâwlnei derte an lo chhuak ang a, thlante chu bum tumin chhinchhiahnate leh thil makte an la ti dâwn si a. 23 Nangni erawh chu fîmkhur rawh u, thil zawng zawng ka hrilh lâwk tawh che u hi.

24 “Nimahsela, chûng ni hrehawm tak hnuah chuan, nî a thim ang a, thla a êng lo vang a, 25 arsite vân aṭangin a tla ang a, vân thiltihtheihnate pawh a nghîng ang. 26 Tichuan, mihring Fapa hi thiltihtheihna nasa tak leh ropuina nêna chhûm zînga a lo kal an la hmu ang. 27 Tin, vântirhkohte chu a tîr chhuak ang a, a thlante chu lei tâwp aṭanga vân tâwp thleng, chhim leh hmâr, chhak leh thlang aṭangin a hruai khâwm ang.

28 “Theipui kûng tehkhin thu aṭang hian inzir rawh u: A zîk a lo no va, a hnah a lo chawr chuan nipui a hnai tih in hre ṭhîn. 29 Chutiang bawkin, chûng thilte chu a lo thleng in hmuh hunah, ani chu kawngka bulah a ding tih hria ang che u. 30 Tih tak meuhvin ka hrilh a che u, chûng thil zawng zawng chu a thlen hma loh chuan he chhuan hi a boral tawp lo vang. 31 Lei leh vân a boral ang a, ka thu erawh chu a boral tawp lo vang.

32 “Nimahsela, chumi nî leh dârkâr chu Pa lo chuan, vâna vântirhkohte pawhin, Fapa pawhin an hre lo. 33 Ngaihven reng ula, inring rengin awm rawh u, Pathian hun ruat chu in hre si lo va. 34 Chu chu mi pakhat a in aṭanga zin chhuak tûrin a bâwihte hnêna thuneihna pe a, an hnathawh tûr ṭheuh sem a, kawngkhâr vêngtu hnêna inring renga awm tûra thu a pe ang chu a ni. 35 Chuvângin, inring rengin awm rawh u, in neitupa chu tlaiah nge, zan laiah nge, khawvâr hmain nge,* zîngah a lo haw dâwn in hre si lo. 36 A nih loh chuan, a rawn haw thut hunah muhîlin a rawn hmu palh ang che u. 37 In hnêna ka sawi hi mi zawng zawng hnêna sawi ka ni: Inring rengin awm rawh u,” a ti a.

14 Tin, Kalhlên Kût leh Chhang Dawidim Telh Loh Kût chu ni hnih hnuah a thleng dâwn a. Puithiam lalte leh dân hre mite* chuan dâwt hmanga Isua an man theihna tûr leh an tih hlum theihna tûr kawng an zawng a. 2 Nimahsela: “Kût chhûng chuan ni suh se; chuti lo chuan, mipuite zîngah buaina a chhuak palh ang e,” an ti a.

3 Tin, Isua chu Bethani khuaa phâr vei dam ta Simona ina chaw a ei laiin, hmeichhe pakhat alabasta ûma nard hriak rimtui eng mah pawlh loh, man to tak kengin a lo kal a. Alabasta ûm chu hawngin, Isua lûah chuan a leih a. 4 Chu chu an hmuhin, ṭhenkhat chu an lâwm lo hle a: “Engvângin nge he hriak rimtui hi a tih rîral mai mai? 5 He hriak rimtui hi denarii* 300 aia tama hralh a, a hralhna man chu mi retheite hnênah pêk theih a ni asin!” an ti a. Tichuan, a chungah an lungni lo* ta hle a. 6 Isua’n an hnênah: “Engtin mah ti suh u. Engvângin nge a chungah hian in lungnih loh? Ka chungah thil ṭha tak a ti a ni. 7 Mi retheite chu in hnênah an awm reng a, in duh hun hunah an chungah thil ṭha in ti thei alâwm, kei erawh chu in hnênah ka awm reng lo vang. 8 A tih theih tâwk a ti a ni; ka taksa hi phûm tûrin hriak rimtui a lo leih lâwk a nih hi. 9 Tih tak meuhvin ka hrilh a che u, khawvêl zawng zawnga chanchin ṭha hrilh a nihna apiangah, he hmeichhe thil tih hi amah hriat reng nân sawi a ni ve zêl ang,” a ti a.

10 Tichuan, Sâwm Pahnihte zînga pakhat Juda Iskariota chu, Isua phatsan tûrin puithiam lalte hnênah a kal a. 11 A thusawi an han hriat chuan an lâwm hle a, a hnênah tangkaraw pawisa pêk an tiam a. Tichuan, Isua a phatsan theihna tûr hun remchâng a zawng ṭan ta a.

12 Chhang Dawidim Telh Loh Kût ni hmasa ber, Kalhlên Kût inthawina an hlan ṭhinna nîah chuan a zirtîrte’n a hnênah: “Khawiah nge Kalhlên Kût chaw va buatsaihsak che ila i duh?” an ti a. 13 Tichuan, a zirtîrte zînga pahnih tîrin, an hnênah: “Khawpuiah va kal ula, mi pakhat hlum bêla tui puin a tâwk ang che u a, ani chu zui ang che u. 14 Khawi inah pawh lût se, chu in neitupa hnênah chuan, ‘Zirtîrtuin: “Ka zirtîrte nêna Kalhlên Kût chaw kan eina tûr mikhual pindan chu khawiah nge?” a ti,’ tiin zâwt ang che u. 15 Ani chuan in chung pindan zau tak, in chhûng bungraw peih sa diam awmna a kawhhmuh ang che u. Chutah chuan kan tân in buatsaih dâwn nia,” a ti a. 16 Tichuan, zirtîrte chu kal chhuakin khawpuiah chuan an va lût a, Isua’n an hnêna a sawi ang chiah chuan an va hmu a, Kalhlên Kût chaw an buatsaih ta a.

17 Nî a tlâk hnu chuan, Sâwm Pahnihte nên chu hmunah chuan an va kal a. 18 Tin, dawhkân kîla an ei laiin, Isua’n: “Tih tak meuhvin ka hrilh a che u, in zînga pakhat ka chaw kîlpui hian min phatsan ang,” a ti a. 19 Tichuan, an lungngai ta êm êm a, a mal malin: “Keimah em ni?” an ti ṭheuh va. 20 Ani chuan an hnênah: “Nangni Sâwm Pahnihte zînga pakhat, thlênga chhang mi chiah ṭâwmtu chu min phatsantu tûr a ni. 21 Mihring Fapa hi a chanchin ziak a nih ang tak khân a thi dâwn a ni; nimahsela, mihring Fapa phatsantu chunga thleng tûr chu a va râpthlâk dâwn êm! Chu mihring chu piang lo se, a tân a ṭha zâwk tûr,” a ti a.

22 An la ei laiin chhang a la a, mal a sâwm a, a phel a, an hnênah a pe a: “La rawh u; hei hi ka taksa aiawhtu a ni,” a ti a. 23 Tin, no a la a, lâwmthu a sawi zawhin an hnênah a pe a; tichuan, an vaiin an in ta a. 24 Ani chuan an hnênah: “Hei hi ka ‘thuthlunna thisen’ aiawhtu, mi tam tak tâna chhuak tûr chu a ni. 25 Tih tak meuhvin ka hrilh a che u, Pathian Rama uain thar ka in nî a thlen hma loh chuan, uain ka in leh tawh lo vang,” a ti a. 26 Tichuan, Pathian fakna hla an sak zawhin Oliv Tlângah an kal ta a.

27 Tin, Isua’n an hnênah: “In zain min thlahthlam ang: ‘Berâm vêngtu ka vua ang a, berâmte chu an darh ang,’ tih ziak a ni si a. 28 Nimahsela, ka thawhleh hnuah Galili ramah in hmaah ka kal ang,” a ti a. 29 Petera erawh chuan a hnênah: “Mi dang zawng zawngin an thlahthlam che a nih pawhin ka thlahthlam lo vang che,” a ti a. 30 Chu veleh, Isua’n a hnênah: “Tih tak meuhvin ka hrilh a che, vawiin hian, zânin ngeiah hian âr vawi hnih a khuan hmain vawi thum mi phat ang,” a ti a. 31 Ani erawh chuan inringtâwk takin: “I rualin thi ve dâwn mah ila, ka phat tawp lo vang che,” tiin a sawi a. An vaiin chutiang chuan an sawi ta ṭheuh va.

32 Tin, Gethsemane huanah an kal a, a zirtîrte hnênah: “Ka ṭawngṭai chhûng zawng hetah hian lo ṭhu rawh u,” a ti a. 33 Tichuan, Petera te, Jakoba te leh, Johana te chu a hruai a, a lungngaiin a mangang ta êm êm a. 34 An hnênah: “Ka lungngai hle a, thihna khawp hial a ni. Hetah hian awm ula, harhvâng takin awm reng rawh u,” a ti a. 35 Tlêmin hma lamah a va kal hrang a, leiah a ṭhingṭhi a, theih ni sela, chumi hun chuan amah pêl tûrin a ṭawngṭai a. 36 Ani chuan: “Abba,* Ka Pa, i tân chuan engkim tih theih a ni; he no hi mi lâk bosak rawh. Nimahsela, ka duh ang ni lovin, i duh angin ni zâwk rawh se,” a ti a. 37 A va lêt leh chuan, anni chu muhîlin a va hmu a, Petera hnênah: “Simon, i muhîl a ni maw? Dârkâr khat lek pawh harhvâng takin i awm thei lo a ni maw? 38 Thlêmnaa in tlûk luh loh nân harhvâng taka awmin ṭawngṭai reng rawh u. Thlarau zawngin a peih* ngei mai; nimahsela, tisa erawh a chak lo a ni,” a ti a. 39 Tichuan, kal hrang lehin, a sawi ngai sawiin a ṭawngṭai leh a. 40 A rawn lêt leh chuan, muhîlin a rawn hmu leh a, anni chu an mut a chhuak hle si a; tin, ani chu chhân ngaihna rêng an hre lo va. 41 A vawi thumna atân rawn lêt lehin, an hnênah: “Engvângin nge hetiang hun pawimawh takah hian muhîla in lo chawlh hahdam? A tâwk ta e! A hun a thleng ta! Ngai teh u! Mihring Fapa hi mi sualte kuta mantîr tûra phatsan a ni ta. 42 Tho ula, i kal ang u. En teh u! Mi phatsantu pawh a lo hnaih tâk hi,” a ti a.

43 A la ṭawng lai mêkin, Sâwm Pahnihte zînga pakhat Juda chu a lo thleng ta nghâl a, puithiam lal te, dân hre mi te leh, upate rawn tirh ngûnhnâm leh talhtum keng mipuiin an rawn zui a. 44 Amah phatsantu chuan: “Ka fawh* apiang chu Isua a ni ang; man ula, ṭha taka vêngin hruai bo vang che u,” tiin chhinchhiahna a lo hrilh tawh a ni. 45 Tichuan, a va pan ta nghâl a, a hnênah: “Rabbi!” a ti a, a fâwp ta ngawih ngawih a. 46 Tichuan, Isua chu an hual a, an man ta a. 47 Nimahsela, chuta dingte zînga pakhat chuan a ngûnhnâm a phawi a, puithiam lalber bâwih chu a sât a, a beng a sah thlâksak a. 48 Isua erawh chuan an hnênah: “Suamhmang man tûr ang maiin, ngûnhnâmte leh talhtumte kengin min man tûrin in lo kal a ni maw? 49 Nî tin biak inah zirtîrin in hnênah ka awm ṭhîn a; nimahsela, min man si lo. Amaherawhchu, Pathian Lehkha Thu a famkim theih nân hetiang hian a thleng a ni,” a ti a.

50 Tichuan, a zirtîr zawng zawngte chuan ani chu thlahthlamin an tlânchhe ta a. 51 Amaherawhchu, puan zai sîn chauh inbel tlangvâl tu emawin a hnung lawkah a zui a; tin, mite chuan ani chu man an lo tum a. 52 Nimahsela, a puan zai sîn chu kalsanin, saruakin* a tlân bo ta a.

53 Tichuan, Isua chu puithiam lalber hnênah an hruai a, chutah chuan puithiam lal te, upa te leh, dân hre mi zawng zawngte pawh an kal khâwm ve a. 54 Nimahsela, Petera chuan a âwm tâwka hla aṭangin puithiam lalber kawtlai thlengin a zui a; chutah chuan chhiahhlawhte zîngah ṭhuin an meipui chheh chu a ai a. 55 Tichuan, puithiam lalte leh Sanhedrin-a* ṭhuho zawng zawng chuan Isua chu an tih hlum theih nân, puhna tûr an zawng a; mahse, pakhat mah an hmu lo. 56 Mi tam takin ani chu dik lo takin an puh a; nimahsela, an puhna thute chu a inmil thei lo va. 57 Tin, mi tute emaw an rawn ding chhuak a, dik lo taka amah puhin: 58 “‘He biak in kuta sak hi ṭhiatin, ni thum chhûngin kuta sak loh a dang ka sa leh ang,’ tia a sawi kan hria,” an ti a. 59 Nimahsela, chumi chungchânga an puhna pawh chu a inmil thei chuang lo.

60 Tichuan, puithiam lalber chu an zîng ata a rawn ding chhuak a, Isua hnênah: “Engtin mah i chhâng lo maw? Hêng mite hêkna che hi i hre lo vem ni?” tiin a zâwt a. 61 Nimahsela, ani chu a ngawi reng a, engtin mah a chhâng lo. Tin, puithiam lalber chuan a hnênah: “Krista, Chungnungbera Fapa chu i ni em?” tiin a zâwt leh a. 62 Isua chuan: “Ni e, mihring Fapa hi Pathian thiltithei tak ding lama a ṭhu leh vân chhûm zînga a lo kal in la hmu ang,” a ti a. 63 Chu veleh, puithiam lalber chuan a kawrfual pawt thlêrin: “Thuhretu dang kan ngai tawh em ni? 64 Pathian a sawichhiatzia chu in hria e. Engtin nge in ngaih?” a ti a. An vaiin ani chu thi tlâkah an ngai hlawm a. 65 Tichuan, ṭhenkhatin chil an chhâk a, a hmai tuamin an hnek bawk a, a hnênah: “Zâwlnei i nih chuan, tuin nge hnek che? Min han hrilh teh!” an ti a. Tin, rorêlna ina vêngtute chuan a hmaiah an bêng a, an hruai ta a.

66 Petera chu hnuai lam kawt laia a awm laiin, puithiam lalber chhiahhlawh hmeichhiate zînga pakhat a rawn kal a. 67 Petera mei lum ai lai chu a hmuhin ani chu a en reng a, a hnênah: “Nang pawh hi Nazaret mi Isua bula awm kha i ni,” a ti a. 68 Nimahsela: “Ani chu ka hre lo va, i thusawi awmzia pawh ka hre hek lo,” tiin a pha a; tichuan, in hungna kawngka lamah chuan a kal ta a. 69 Chutah chuan, chhiahhlawh hmeichhe pakhatin ani chu a hmu a, a bula dingte hnênah chuan: “He pa hi an zînga mi a ni,” a lo ti leh a. 70 Ani chuan a pha leh a. A hnu lawkah, a bula dingte chuan Petera hnênah: “Nang hi an zînga mi i ni chiang mai, Galili mi i ni si a,” an ti a. 71 Tin, ani chuan ânchhia inlawha chhechhamin: “In sawia chu ka hre hauh lo mai!” a ti a. 72 Tichuan, a vawi hnihna atân âr a khuang ta nghâl a; tin, Petera chuan a hnêna Isua thusawi: “Ar vawi hnih a khuan hmain vawi thum mi phat ang,” tih thu kha a hre chhuak a. Tichuan, lungchhe takin a ṭap ta zawih zawih a.

15 Khua a vâr veleh puithiam lalte chu upa te, dân hre mi te leh, Sanhedrin-a* awm zawng zawngte nên an inrâwn khâwm a, Isua kut chu phuarin, Pilata hnênah an hruai a. 2 Pilata chuan: “Judate Lal i ni em?” tiin a zâwt a. Isua chuan: “I sawi ang ngei chu a ni e,” tiin a chhâng a. 3 Nimahsela, puithiam lalte chuan kawng tam takin an hêk a. 4 Tin, Pilata chuan a hnênah: “I chhâng dâwn lo vem ni? An hêkna che zozai hi i hre na nge?” tiin a zâwt leh a. 5 Nimahsela, Isua’n ṭawngkam khat maha a chhân loh avângin Pilata chuan mak a ti hle a.

6 Tin, Kalhlên Kût apiangin Pilata chuan mi tâng pakhat an ngen apiang a chhuahsak ṭhîn a. 7 Chutih lai chu hel dangte nêna Barabba tân ina a tân lai a ni a, anni chuan an helnaah tual an that a ni. 8 Tichuan, mipuite chu lo kalin Pilata’n an tâna a tihsak ṭhin anga tihsak tûrin an ngên ta a. 9 Ani chuan: “Judate Lal hi chhuahsak che u ila in duh em?” a ti a. 10 An îtsîk avângin puithiam lalte chuan a hnênah an rawn hruai tih a hre si a. 11 Nimahsela, puithiam lalte chuan Barabba chhuahsak zâwk tûra ngên tûrin mipuite chu an fuihpawrh a. 12 Pilata chuan an hnênah: “A nih chuan, Judate Lal tia in koh hi engtin nge ka tih ang?” tiin a zâwt leh a. 13 Anni chu: “Banah khêngbet rawh!” tiin an au leh a. 14 Pilata chuan an hnênah: “Engvângin maw? Eng thil ṭha lo nge a tih?” a ti a. Nimahsela, anni chu: “Banah khêngbet rawh!” tiin nasa lehzualin an au va. 15 Tin, Pilata chuan mipuite tih lungawi a duh avângin, Barabba chu a chhuahsak ta a, Isua erawh chu a vuaktîr hnuah bana tih hlum tûrin sipaite hnênah a pe a.

16 Tin, sipaite chuan Isua chu Pilata in kawtah an hruai chhuak a, sipai zawng zawngte chu an ko khâwm a. 17 Tichuan, puan sen duk an sintîr a, hlîng lukhum phiarin an khumtîr a: 18 “Chibai, nang Judate Lal!” an ti a. 19 Tin, a lûah tianga vuain chil an chhâk a, an ṭhingṭhi a, kûnin chibai an bûk a. 20 Tichuan, nuihza siam nâna an hman hnuah puan sen duk a sin chu hlihsakin, a thawmhnawte chu an hâktîr leh a. Tichuan, bana khenbeh tûrin an hruai chhuak ta a. 21 Khawpui pâwn aṭanga lo kal mi pakhat Kurini khuaa mi Simona, Aleksandra leh Rufa te pa chu Isua nghaisakna ban* an put luihtîr a.

22 Tichuan, Gol′go·tha an tih hmunah an hruai a, chu chu “Luruh Hmun,” tihna a ni. 23 Tin, murra nêna chawhpawlh uain* an pe a; nimahsela, a in duh lo va. 24 Tichuan, banah an khêngbet a, a thawmhnawte chu an chan tûr ṭheuh hriat nân ṭhum an vâwr a, an insem ta a. 25 Zîng dâr kua* vêlah chuan banah an khêngbet a. 26 Amah an puhna “Judate Lal,” tih inziak chu a lu chungah an târ bawk a. 27 Tin, a bulah suamhmang pahnih, pakhat a ding lamah, pakhat a vei lamah an khêngbet tel ve a. 28* —— 29 Chu hmun kal pêltute chuan ani chu sawichhiain, an lû an thin khum a: “Nang, biak in ṭhiat a, ni thum chhûnga sa ṭha leh theia insawitu, 30 nghaisakna ban* aṭang khân rawn chhukin, inchhandam ta che,” an ti a. 31 Chutiang bawkin, puithiam lalte leh dân hre mite chuan ani chu nuihsawhin: “Mi dangte a chhandam a, mahni a inchhandam thei si lo! 32 Kan hmuha kan rin theih nân Krista, Israel Lal chu tûnah hian nghaisakna ban* aṭang khian rawn chhuk ang hmiang,” an ti a. A bula an khenbehte pawhin an deusawh ve a.

33 Tichuan, chhûn dâr sâwm pahnih vêl* aṭanga tlai lam dâr thum vêl* thlengin lei pum pui chu a lo thim ta vek a. 34 Tlai lam dâr thumah Isua chu aw ring takin: “E′li, E′li, la′ma sa·bach·tha′ni?” tiin a au chhuak a, chu chu: “Ka Pathian, ka Pathian, engati nge mi kalsan?” tihna a ni. 35 Tin, a bul hnaia ding ṭhenkhat chuan, chu chu an hriatin: “En teh u! Elija a ko a ni,” an ti a. 36 Tichuan, tu emaw a tlân a, uain thûrah sponge* a chiah a, tiangah târin a in atân a pe a: “Tikhian awm mai mai rawh se! Amah la thla tûrin Elija a lo kal nge kal lo kan en ang chu,” a ti a. 37 Tichuan, Isua chu ring takin a au va, a thi ta a.* 38 Tin, biak ina puanzâr chu a chung lam aṭanga a hnuai lam thlengin a lo thlêr chhuak ta a. 39 A bula ding sipai za hotu chuan thilthlengte leh Isua a thi ta tih a hmuhin: “He mi hi Pathian Fapa a ni chiang mai,” a ti a.

40 Hla tak aṭanga thlîrtu hmeichhiate pawh an awm bawk a, an zîngah chuan Mari Magdalini te, Jakoba Tê Zâwk* leh Josea nu Mari te leh, Salomi te an tel a, 41 anni chu Galili rama a awm laia amah zui a, a rawngbâwlsak ṭhîntute an ni a, Jerusalema amah zui chhotu hmeichhe tam tak an tel ve bawk.

42 Tin, Sabbath ni hma, Inbuatsaihna Nî tlai lamah chuan, 43 Josefa, Arimathai khuaa mi, Judate Rorêlna Sâng Bera tel mi zahkai tak, Pathian Ram nghâktu ve bawk chu a lo kal a. A huaisenna sâwm khâwmin Pilata hmaah a va kal a, Isua ruang chu a dîl a. 44 Tin, Pilata chuan Isua thih tawh leh tawh loh hriat a duh avângin, sipai za hotu chu kovin a zâwt a. 45 Tin, sipai za hotu hnên aṭanga a hriat chian hnuin, Josefa’n ruang a lâk chu a phalsak ta a. 46 Josefa chuan puan zai sîn a lei hnuah, Isua ruang chu a la thla a, puan zai sîn chuan tuamin thlân lung ker kuakah chuan a zalh ta a; tichuan, thlân kawngkâ chu lungin a khâr ta a. 47 Nimahsela, Mari Magdalini leh Josea nu Mari te chuan a zalhna hmun chu an en reng a.

16 Tin, Sabbath Nî a zawh chuan Mari Magdalini te, Jakoba nu Mari te leh, Salomi te chuan Isua ruanga hnawih tûr hriak rimtui chawhpawlh an lei a. 2 Tin, chawlhkâr khata ni hmasa ber zîng tak, ni chhuah hlimah thlânah* chuan an kal a. 3 Anni chuan: “Thlân kawngkâa lung kha tuin nge min lum sawnsak ang?” an ti a. 4 Nimahsela, thlân kawngka lam an han en chuan, lung lian tak chu lum sawn sain an hmu a. 5 Thlân chhûnga an han luh chuan tlangvâl pakhat, ding lam panga kawrfual vâr haa lo ṭhu chu an hmu a, mak an ti ta hle a. 6 Ani chuan an hnênah: “Mak ti suh u. Bana an tih hlum tâk Nazaret Isua kha in zawng tih ka hria. A tho leh tawh. Hetah a awm tawh lo. En teh u, amah an zalhna hmun hi. 7 Nimahsela, kal ula, a zirtîrte leh Petera hnênah, ‘Galili lam panin in hmaah a kal mêk e. A hrilh tawh che u ang ngei khân, chutah chuan ani chu in hmu ang,’ tiin va hrilh rawh u,” a ti a. 8 Tichuan, hlauh avânga khûr leh mangang êm êmin thlân aṭang chuan an chhuak a, hmanhmawh takin an tlân ta a. An hlauh êm avângin tu ma hnênah eng mah an sawi lo.*