Twalekenuhu Kwikala Akola kuSpiritu haMpinji Yimunakutañilahu Shikola Yikwawu yaKumujimba

1-2. (a) Neyi mutondahu kutañilahu shikola yikwawu yakumujimba, chumanyi chimwatela kutwalekahu kwila? (b) Mazu akwila nawu “[kutwalekahu] kwenda chiwahi muniyi njila yoyimu,” atalisha mudihi? (AFwilipi 3:16)

AMBUÑA aYehova amakwawu afuukulañahu kutañilahu mashikola amakwawu akumujimba hanyima yakumanisha shikola yasekondali. Anateli kutoñojoka nawu chatañawu shikola yamuchidiwu akawana mudimu wakayikwasha kumukalakela Yehova chiwahi. Neyi munatondihu kutañilahu shikola yikwawu, yumanyi yimunateli kwila hakwila mutwalekihu kwikala nawubwambu wakola naYehova? (Yak. 4:8a) Chakadi nikujina, kudi yuma yimwahitilimu yesekeli chikuhwelelu chenu hampinji yimwadiña kushikola yimwamanisha dehi. Ichi dinu mwatela “[kutwalekahu] kwenda chiwahi muniyi njila yoyimu,” dikwila nawu kutwalekahu kumukalakela Yehova nakashinshi neyi chochimunakwila.—Tañenu AFwilipi 3:16.

² MuchiGiriki, mukuku wamazu abalumunawu nawu “[kutwalekahu] kwenda chiwahi muniyi njila yoyimu,” waletesheleña antu kutoñojoka hadi amashidika endeleleña hamu nakuya hohu-u kumbidi chakadi kwimana hela kubalumuka. Neyi mufuukulahu kutañilahu shikola yikwawu yakumujimba, mwatela ‘kutwalekahu kwenda nakuya hohu-u kumbidi’ mumudimu waYehova chakadi kwimana hela kudifuntamu. Achinu chibaaba chikushimuna yishina yiwana yinateli kuyikwasha. Iyi yishina mwayiluka. Mwayizatishahu dehi kunyima, nawa mwatela kutwalekahu kuyizatisha hampinji yimudi kushikola nihanyima yakumanisha.

TWALEKENUHU KWILA YUMA YIKUYIKWASHA KWIKALA NAWUBWAMBU WAKOLA NAYEHOVA

3. Hampinji yimunakutañilahu shikola yikwawu yakumujimba, kukalanyi kumunateli kumona kutalisha hayuma yimwatela kwila hefuku-hefuku?

³ Kukala kunateli kufumamu. Kutañilahu shikola yikwawu yakumujimba kunateli kuyiletesha kwikala nayuma yayivulu yakwila chakwila mukukañanyaña nikwila yuma yalema yimwatela kwila hefuku-hefuku. Chineli mukukeñaña nenu mwileña chiwahi kushikola, munateli kutachika kutwamijaku shikola kubadika mudimu waYehova. Kubombelahu, munateli kutachika kujiña kukupompa kwetu, kukañanya kuya nakushimwina, kuleka kudiza Bayibolu nkawenu nikulomba.—Chim. 2:4.

4. Chumanyi chikuyikwasha kwikala “nayuma yayivulu yakuzata mumudimu waMwanta”? (1 AKorinda 15:58)

⁴ Tañenu 1 AKorinda 15:58. Hakwila nkinga yitwalekihu kwenda, mwatela kutwalekahu kuchova. Munjila yoyimu, hakwila mutwalekihu kwikala nawubwambu wakola naYehova, mwatela kutwalekahu kudikita mumudimu windi. Dihafuma Bayibolu yitulejeña nawu twikaleña “nayuma yayivulu yakuzata mumudimu waMwanta,” dikwila nawu mumudimu waYehova. Ichi hichinatalishi hohu mukwila nawu mwatela kwikalañaku nampinji yakwila yuma yakuspirituku, ilaña diyuma yimwatela kutwamijañaku muchihandilu chenu. Anukenu nenu kumukalakela Yehova dichuma chalema nankashi muchihandilu chenu, bayi shikola yumunakutañaku. (Mat. 22:37) Muhela wakansi wejina daSamantha wahosheli nindi, “Nadikanini ami aweni nami neyi shikola yikatachika kunkañesha kumukalakela chiwahi Yehova, nakayileka.”

5. Yumanyi yimwatela kwila hakwila mutwalekihu kudikita mumudimu waYehova?

⁵ Yuma yimwatela kwila henohu kanda mutachiki kutañilahu shikola yikwawu yakumujimba. Ilukenu yuma yimwatela kutwamijaku muchihandilu chenu. Dihulenu nenu, ‘Yumanyi yinnafuukuli yikunkwashaña kutwalekahu kupompa mpinji yejima, kushimwina nikudiza nkawami?’ (Yosh. 1:8; Mat. 28:​19, 20; Heb. 10:25) Dihulenu cheñi nenu: ‘Nekalileña ñahi nampinji yakwila yumiyi hinadiña kusekondali?’ Neyi munakutoñojoka nenu muyuma yikwawu mwazatili chiwahi wanyi, mwatela kwila ñahi hakwila nawu muzati chiwahi chayinu mpinji? Dikasenu mumuchima kutwalekahu kudikita mumudimu waYehova hampinji yimunakutañilahu shikola yikwawu yakumujimba. Shenuñaku maana kuyuma yimunakudiza kushikola ilaña bayi yiyiletesha mudiwuli kudifukula kwenuku.a—Mat. 6:24.

6. Yumanyi yimwatela kutoñojokahu hampinji yimunakudishinshika hachidi nzatilu yenu? (Talenu nimwevulu.)

⁶ Hampinji yimunakutañilahu shikola yikwawu, dishinshikenuña kulonda mumoni chimunakuzata, hadaha mukakweji nikakweji hela kwesekeja nachimunakeñi. Dihulenu nenu, ‘Komana nichidi kutwamijaku muchihandilu chami yuma yalema nankashi?’ Ikalenu asoñama neyi mutachika kumona iyi yinjikijilu. Chakutalilahu, talenu neyi munatachiki kwikala nachaaku chakujiña kukupompa hela kushika mukulaba, neyi hakupompa munakutoñojokaña hanyidimu yinayinkiwu kushikola, hela neyi chakwila munakusokankeshaña kukupompa chatela muyeña Kwitala daWanta. Talenu cheñi neyi munatachiki kwikala nakaneñawudi kakulomba nikutaña Bayibolu hela neyi nzatilu yenu mumudimu wakushimwina yinekali hohu yakudikanjikija. Neyi mumona yaaku yamuchiwu yinatachiki kumwekana, zatilenuhu swayi-swayi. Bayi mwiteja shikola yiyikañeshi kutwamijaku mudimu waYehovaku.

‘HEMBENUÑA WUSWA WENU WAKUTOÑOJOKA’

7. Hampinji yimunakutañilahu shikola yikwawu yakumujimba, yitoñojokanyi yatama yinateli kutachika kutaanda mudi enu?

⁷ Kukala kunateli kufumamu. Kwesekeja naprogilamu yimunatondihu kudiza kushikola, hadaha yikuyiletesha mutachiki kutoñojoka neyi chatoñojokaña antu amukaayi ahoshaña nawu yuma yahosha Bayibolu yakutwamba. Mukwikala nayitoñojoka yatenaña Bayibolu nawu “maana awantu, nintañishilu yamukunkulwayi.” Chakutalilahu, anateli kuyidizisha nawu kwekala Nzambi wanyi nawa antu adisefukilili hohu. (Kol. 2:8) Yuma yimunakudiza yikuyiletesha cheñi kwikala namuchima wakudishindamena. Manakwetu wumu wakansi wahosheli nindi: “Hiyatudizishileña hohu mudimuku, atudizishileña nichakutoñojoka, nawa iyi njila yakutoñojokelamu kakavulu yambukileña nachakeñañayi Yehova nindi tutoñojokeña. Chakutalilahu, atudizishileña nawu hakwila twiikali namuzañalu twatela kushindamena hawuswa wetu etu aweni. Iyi yitoñojoka yaletesheli nileki kumushindamena Yehova. Chafuminimu, natachikili kudishindamena nankashi ami aweni.”

8. Muloñadi chichalemena ‘kuhemba wuswa wenu wakutoñojoka’? (Yishimu 5:​1, 2)

⁸ Tañenu Yishimu 5:​1, 2. Bayibolu yayisoñamishaña nawu ‘muhembeña wuswa wenu wakutoñojoka.’ Twahembaña chuma neyi tuneluki netu kudi wunakukeña kuchikisañana hela kuchitambula. Dichimwatela nikuhemba wuswa wenu wakutoñojoka. (1 Pet. 5:8) Spiritu yamukaayi yinateli kuyiletesha mutachiki kudiwula yuma yimwakuhwelela yahosha hayilwilu yayiwahi, hachatachikili wumi, hela yahosha nawu Nzambi wekala kwoku. Antu anateli kutachika kumona yitoñojoka yawu nawu yabadika, komana yaya yamwishina chikupu. Kafwampi, “Nzambi wamonaña [yitoñojoka yamuchidiwu] nindi hiwusupi.”—1 Kor. 3:​18-20.

9. Yumanyi yimwatela kwila hakwila muhembi wuswa wenu wakutoñojoka?

⁹ Yuma yimwatela kwila henohu kanda mutachiki kutañilahu shikola yikwawu yakumujimba. Hakwila muhembi wuswa wenu wakutoñojoka, mwatela kukuhwelela chikupu nenu yuma yatañishaña Bayibolu yalala henohu kanda muyi kushikola. Dihulenu malwihu adi neyi: ‘Muloñadi chinamukuhwelela Nzambi? Neluka ñahi nami Bayibolu hiIzu daNzambi? Yumanyi yaletesha nikuhweleli chikupu nami nshimbi jamuBayibolu jahosha hayilwilu yayiwahi jabadika nshimbi jatuñañawu antu mukaayi?’ Chumichi chinateli cheñi kuyikwasha kutoñojoka hayuma yamwekeneña himwadiña kushikola yasekondali. Komana chikuhwelelu chenu chatachikili kuzeya muloña wakudikunda nawantu akuhweleleli nawu yuma yadisefukilili? Chayikalili kutondolwela yilwilu yawuzondu yadiñijileñamu akwenu akashikola? Neyi munakutoñojoka nenu mwazatili chiwahi wanyi kunyima, yumanyi yimwatela kwila chayinu mpinji hakwila mukuhweleli chikupu yuma yatañishaña Bayibolu? Dikasenu mumuchima kutwalekahu kuhemba wuswa wenu wakutoñojoka hampinji yimunakutañilahu shikola yikwawu yakumujimba.—2 Tim. 2:​16-18.b

10. Munateli kutwalekahu ñahi kukiña wuswa wenu wakutoñojoka?

¹⁰ Hampinji yimunakutañilahu shikola yikwawu yakumujimba, dishinshikenuña mpinji yejima kulonda mumoni chimunakuzata. Dihulenu nenu: ‘Komana anakunluwañesha kudi antu amwekeshaña yilwilu yakubula kumwakama Nzambi? Nateli kushikena kwiluka nami nsañu yinakundizishawu himaana awantu hohu amukaayi? Komana nakuhwelela chikupu nami Wanta waNzambi hohu diwakafumishahu kukala kunakumonawu antu?’ Hakwila muhembi wuswa wenu wakutoñojoka, twalekenuhu kwikala kadizi wamuwahi Wezu daNzambi. Kudiza Bayibolu nikutoñojokahu chikupu hayuma yimunadizi, kukuyikwasha kukuhwelela chikupu nenu yuma yimwadiza yalala.—1 Tim. 4:15.

ZATISHENUÑA CHIWAHI MPINJI YENU

11. Muloñadi chichinateli kuyikalila kuzatisha chiwahi mpinji yenu hampinji yimunakutañilahu shikola yikwawu yakumujimba?

¹¹ Kukala kunateli kufumamu. Kutañilahu shikola yikwawu yakumujimba kunateli kutachika kuyidiila mpinji yeneni, sweje-e hampinji yimunakudiloñesha henohu kanda musoneki kweseka hela neyi anayinki mudimu kushikola wunayilejiwu nawu muzatilihu swayi-swayi. Neyi mubulaña kuzatisha chiwahi mpinji yenu, mukuzeyaña nankashi muyitoñojoka nikumujimba mpinji yejima. Dichi chalema nankashi kudakamena enu aweni kumujimba nimuyitoñojoka.

12. Yumanyi yikwawu yimwatela kwila hampinji ‘yimunakuzatisha mpinji yenu chiwahi’? (AEfwesesa 5:​15, 16)

¹² Tañenu AEfwesesa 5:​15, 16. Chinateli kuyikalila “kuzatisha chiwahi mpinji yenu.” Dichi mwatela kwila yuma nakwesekeja. Chakutalilahu, mwatela kusha maana kunsañu yimunakudiza kushikola, ilaña yuma yimwatela kusha nankashi muchima hikwikala hamu nachisaka chenu nikudikunda nawamanakwetu niahela muchipompelu mumwekala. (Mas. 133:1; Yish. 18:1) Hela chochu, yuma yakuspiritu diyimwatela kutwamijaku muchihandilu chenu. (Mat. 6:33) Hadaha mudi cheñi nachisaka chimwatela kwakamena nimudimu wakumujimba wumwazataña. Kubombelahu, mukukeñekaña kwikala nampinji yakunooka nikwolojola mujimba munjila yatelela hakwila mwiikali akola kumujimba. (Mukwa. 4:6; 1 Tim. 4:8) Hakwila muzati chiwahi yuma yejimiyi, mwatela kutanjika chiwahi mpinji yenu.

13. Chumanyi chimwatela kwila hakwila muzatisheña chiwahi mpinji yenu?

¹³ Yuma yimwatela kwila henohu kanda mutachiki kutañilahu shikola yikwawu yakumujimba. Bayibolu yahosha nawu mukufuukwila yuma chadimu mwafumaña yuma yayiwahi. (Yish. 21:5) Muloña wachumichi, fuukwilenu chadimu chimwakelaña yuma henohu kanda muyi kushikola. Munateli kutoñojoka hayuma yayimwekeneni himwadiña kusekondali kuhitila mukudihula nenu: ‘Komana natwesheleña kwikala nampinji yakwila yuma yejima yalema nankashi?’ Neyi munakutoñojoka nenu mwazatili chiwahi wanyi kunyima, yumanyi yimwatela kwila hakwila muzati chiwahi chayinu mpinji? Fwilenuña kuzatisha chiwahi mpinji yimukweti chatela mutoñojokeña nenu himukweti mpinji yakwililamu yuma yejimaku.c

14. Malwihwinyi imwatela kudihula hakwila ayikwashi kudishinshika kulonda mumoni chidi nzatilu yenu?

¹⁴ Hampinji yimunakutañilahu shikola yikwawu yakumujimba, dishinshikenuña kulonda mumoni chimunakuzata. Dihulenu nenu: ‘Inakutwesha kwikala nampinji yakunooka nikwolojola mujimba? Inakwikala nampinji yakudikunda nawamanakwetu niahela muchipompelu? Inakutwesha kumanisha mumpinji yuma yatwinkañawu kushikola yakuzatila kwitala? Neyi inakutwesha wanyi kwila mwenimu, komana muloña wakwila nidi nayuma yayivulu yakwila tahindi muloña wakaneñawudi? Komana amabwambu jami niantaña jami niwena anakumona nawu hadi hinatela kuhimpa?’ Neyi munamoni nenu hadi himwatela kuhimpa indi kwiji munakukeña kuwahishaku nzatilu yenu muyuma yimunakwila, zatilenuhu mukunyakashana. Munateli nikuhanjeka nanowu eluka chakuzatisha chiwahi mpinji.—Yish. 11:14.

TWALEKENUHU “KWENDA NAWAKAMAANA”

15. Hampinji yimunakutañilahu shikola yikwawu yakumujimba, munateli kwikala mukweseka kwamuchidinyi?

¹⁵ Kukala kunateli kufumamu. Hampinji yimunakutañilahu shikola yikwawu yakumujimba, akwenu akashikola anateli kuyileja nawu mwilileña hamu nawu yuma yelañawu chakombokawu kushikola. Hadaha munateli kwikala mukweseka kwakukeña kudibomba nawu. Chumichi chinateli kumwekana muloña mudi muyaaka yakuvwalika yoyimu, munakwila yuma yoyimu nawa munakwikala hamu mpinji yejima mushikola nakutaña. Hadaha munateli nikutachika kutoñojoka nenu yuma yimunakwilila hamu nawakwenu akashikola yayiwahi kubadika yimwelilaña hamu nawakwenu akakwitiya. Dichi neyi dichimunakutoñojoka, mwatela kwikala ansoñama. Hela chakwila mwatañilaña hamu nawakwenu akashikola, ilaña hiyalemesha yuma yimwalemeshaku. Nawa neyi muwanikaña nawu mpinji yeneni, mukutachika kutoñojoka neyi chatoñojokañawu. (1 Kor. 15:33) Dichuma chamumwekeneni manakwetu Michael, wadizili mudimu wamalayiti hadi yaaka 4. Wahosheli nindi, “Hadi maora kubadika 40 mumulungu, nawanikileña nawakwetu inazatileña nawu adiña nanhoshelu yatama, atiyilileña kutumina twatama nawa abulileña kulemesha ambanda. Nkumininaku, natachikili kutoñojoka nami nhoshelu yawu niyuma yelileñawu yadiña yatama wanyi.”

16. “Kwenda nawakamaana” kwatalisha mudihi? (Yishimu 13:20)

¹⁶ Tañenu Yishimu 13:20. Bayibolu yatusoñamishaña hawubanji wafumaña mukudikunda nawantu akweti yilwilu yatama. Ilaña “muntu wunakwenda nawakamaana wakekala namaana.” Ichi dichuma chalema chitwatela kwanuka: Twatachikaña kwila yuma yelaña antu itwadikundaña nawu hadi mpinji yeneni, chili kwila yuma yayiwahi hela yatama. Dichi twalekenuhu kwikala amabwambu nawantu amukeña Yehova neyi chimwamukeña enu nawa anakukeña nawu mwiikali namuzañalu walala.—Mas. 101:​6, 7; 119:63.

17. Yumanyi yimwatela kwila hakwila mutondolweli kudikunda nawantu akweti yilwilu yatama?

¹⁷ Yuma yimwatela kwila henohu kanda mutachiki kutañilahu shikola yikwawu yakumujimba. Fuukwilenu chadimu yuma yimwakelilaña hamu nawakwenu akashikola niyimwakabulaña kwilila hamu nawu. Chinsahu wejina daTrenton wahosheli nindi: “Natiyañanaña nawakwetu akashikola, ilaña chitwakomboka natwalekañahu kwikala hamu nawu wanyi. Nayimonaña nami hiyakwetu inatañaña hohu nawu, bayi amabwambu jamiku.” Yumanyi yimwatela kwilila hamu nawakwenu akashikola? Hakwila mwakuli ilu lwihu, dihulenu nenu: ‘Yumanyi yinelilileña hamu nawakwetu akashikola hinadiña kusekondali?’ Neyi munakutoñojoka nenu mwazatili chiwahi wanyi kunyima, yumanyi yimwatela kwila hakwila muzati chiwahi chayinu mpinji? Dikasenu mumuchima kutwalekahu ‘kwenda nawakamaana’ nikutondolwela kudikunda nawantu abula kumukeña Yehova.d

18. Malwihu amuchidinyi imwatela kudihula hampinji yimunakudishinshika enu aweni? (Talenu nimwevulu.)

¹⁸ Mumpinji-mumpinji, dishinshikenuña kulonda mumoni chimunakuzata. Dihulenu nenu: ‘Natachiki kudikunda nankashi nawakwetu akashikola? Komana yaaku yawu, nhoshelu yawu niyilwilu yinatachiki kuluwañesha nhoshelu yami niyitoñojoka? Komana Yehova wukutiya kuwaha nawantu inakudikunda nawu?’ (Mas. 1:1) Neyi mumona nenu hadi himwatela kuhimpa, zatilenuhu swayi-swayi. Amabwambu imwadikunda nawu chikupu atela kwikala antu amukeña Yehova neyi chimwamukeña enu. Nawa bayi mushintajala kuyishimwina akwenu akashikolaku. Yenu munateli kuyikwasha hakwila adizi chalala.

DILOÑESHELENU CHADIMU

19. Munateli kushinda ñahi kukala kunateli kuyikañesha kuzata chiwahi kuspiritu hampinji yimunakutoñojoka kutañilahu shikola yikwawu yakumujimba? Shimunenu chakutalilahu.

¹⁹ Muntu wababala wunakukeña kuya mwisaña nakuzomba, wadiloñeshelaña chadimu henohu kanda yatachiki lwendu lwindi. Hela chakwila neluki wanyi jiika kukala kwejima kunateli kumumwekena, watela kwikala wakola kumujimba, kuvwala yakuvwala yikumukiña nikwiluka chuma chacheni chinakufwilayi, dikwila nawu kuya nakuzomba. Dichuma chimwatela kwila ninenu hampinji yimunakutoñojoka kutañilahu shikola yikwawu yakumujimba. Twalekenuhu kwikala nachikuhwelelu chakola, vwalenu “yitwa yanjita yejima yafuma kudi Nzambi,” nawa ilukenu chuma chacheni chinakuletesha mukeñeña kutañilahu shikola yikwawu. Chuma chacheni chimwatela kufwilaña hikumutiyisha Yehova kuwaha muyuma yejima yimukwilaña, bayi kwikala namali amavulu hela kuya mpuhuku.—Efwe. 6:​11-13; 1 Kor. 9:​26, 27; 10:31.

20. Munateli kutwalekahu ñahi “[kudeseka] kulonda mwiluki neyi mudi muchikuhwelelu”?

²⁰ Bayibolu yatukonkomwenaña nawu: “Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.” (2 Kor. 13:5) Munateli kwila mwenimu hampinji yimunakutañilahu shikola yikwawu yakumujimba. Dishinshikenuña mpinji yejima muniyi yuma yitunahanjekihu muchinu chibaaba. Komana munatwalekihu kwila yuma yakuspiritu? Munakuhemba yitoñojoka yenu kulonda yibuli kuluwankana namaana amukanu kaayi? Komana munakuzatisha mpinji yenu chiwahi? Munakutonda amabwambu hakachi kawakwenu akaKristu nakutondolwela kudikunda nawantu akweti yilwilu yatama? Awa diwu malwihu imwatela kudihula enu aweni, chili mudi kushikola, kumudimu hela kudi kwejima. Dikasenu mumuchima kutwalekahu kwikala nachikuhwelelu chakola muyuma yejima yimunakwila. Kuhwelelenu chikupu nenu Yehova wakayikiswila neyi mwilaña mwenimu.—Yish. 3:​5, 6.