Fuukulenu Chachiwahi Neyi Munakukeña Kutañilahu Shikola Yikwawu yaKumujimba

1-2. (a) Yumanyi yatela kufuukulahu atwansi? (b) Mazu akwila nawu “shikola yikwawu yakumujimba” atalisha mudihi”? (Talenu “Mwatalisha Awa Mazu.”)

“MUDIMU wamuchidinyi wumunakukeña kuzata neyi munakuli?” Neyi mudi kansi, chakadi nikujina ayihulahu dehi ilu lwihu. Mudimu walema nankashi wumwatela kuzata muchihandilu chenu himudimu wampinji yejima. Hela chochu, mwakakeñekaña cheñi kuzata mudimu wakumujimba hakwila mwakekaleña namali akudikwashamu nachu. (2 Tes. 3:10) Tunakuhweleli mwatoñojokahu dehi hamudimu wakumujimba wumwakazataña kumbidi.

² Atwansi amakwawu hanyima yakuhanjekahu nawanvwali jawu hamudimu wakazatañawu neyi anakuli dehi, afuukulañahu kutañilahu shikola yikwawu yakumujimba hanyima yakumanisha shikola yasekondali.a Hadaha munakutoñojoka hakutañilahu shikola yikwawu yakumujimba. Neyi dichimunakutoñojoka, shikolanyi yikwawu yimunakukeña kutañilahu? Achinu chibaaba chikushimuna yishina yamuBayibolu yikuyikwasha kutoñojoka chiwahi hashikola yikwawu yimunakukeña kutañilahu. Kutoñojoka muniyi njila, kwaleteshaña kufuukula yuma chachiwahi. Achinu chibaaba chinakundami nankashi atwansi, ilaña nsañu yidimu yikukwasha nimukaKristu wejima wunakukeña kutañilahu shikola yikwawu yakumujimba. Iyi yishina yinateli kukwasha nianvwali hakwila akwashi anyanawu kufuukula chachiwahi.

KOMANA MUNAKUKEÑA KUTAÑILAHU SHIKOLA YIKWAWU YAKUMUJIMBA?

3. Yumanyi hadaha yaleteshaña akaKristu amakwawu kufuukulahu kutañilahu mashikola amakwawu akumujimba?

³ Mumaluña amu, muntu nateli kwiñila mudimu wakutambula wufwetu wawuwahi neyi yamanisha hohu shikola yasekondali. Ilaña mumaluña amakwawu, kutañilahu shikola yikwawu yakumujimba dikunateli kumukwasha muntu kuwana mudimu wakutambula wufwetu wawuwahi hela wakuzata maora antesha. Kutalisha hadi mukaKristu, chumichi chinateli kumukwasha kwikala nampinji yeneni yakuzata mumudimu wakushimwina hela munyidimu yikwawu yamu kuloñesha. Hela chochu, kutañilahu shikola yikwawu yakumujimba kwakeñekaña muntu kudihana nakuleka kwilahu yuma yikwawu, nawa kudi kukala kunateli kutachika kumonayi mukaKristu.

4. Hinyi watela kumufuukwila mukaKristu neyi chakwila nateli kutañilahu shikola yikwawu yakumujimba hela nehi? (Talenu nitumazu twaheshina.)

⁴ Bayibolu yahosha nawu muntu-himuntu watela “[kudisendela] chisenda chindi yomweni.” (Ñal. 6:5) Dichi mukaKristu wejima wakula dehi watela kudifuukwilahu yomweni neyi chakwila wukukeña kutañilahu shikola yikwawu yakumujimba.b Mudimu wukwawu wukwetiwu anvwali hikukwasha anyanawu anyanya kutonda chiwahi shikola yatela kutañawu. (Efwe. 6:1) Nawa wunlomboli wawu wunateli kumukwasha mwanawu kufuukula chachiwahi kutalisha hashikola yikwawu yakumujimba yinateli kutañayi neyi nakuli dehi.—Yish. 22:6.

5. Mpinjinyi yatela kutachikayi muntu kutoñojokahu neyi chakwila watela kutañilahu shikola yikwawu yakumujimba hela nehi, nawa muloñadi? (Talenu nimwevulu.)

⁵ Atwansi kakavulu akeñekaña kufuukwilahu chadimu neyi chakwila akakeñekaña kutañilahu mashikola amakwawu hanyima yakumanisha shikola yasekondali. Hela chochu, chalema nankashi neyi mwana wuchidi kansi yahanjeka nawanvwali jindi haniyi nsañu henohu kanda yafuukuli. Kwila mwenimu kukuyikwasha kusandujolela hamu kulonda amoni shikola yikwawu yatela kutañilahu chamanishayi shikola yasekondali. Anateli kutonda nsañu yikudizañayi kushikola yikumukwasha kudiloñeshela chadimu kutalisha hamutapu washikola yakumujimba yakakeña kutañayi hela mudimu wakazatañayi. Komana chiña hohu afuukwila chadimu henohu mwanawu kanda yamanishi shikola yasekondali? Inehi. (Yish. 21:5) Atwansi amakwawu atondañahu kumanisha ntahi shikola, kutachika kuzata mudimu wakumujimba nimudimu wawupayiniya iku anakutoñojokahu neyi chakwila atela kutañilahu mashikola amakwawu akumujimba. Nihanyima yakuhitahu yaaka kufuma hamanishiliyi shikola, muntu nateli kutoñojokahu neyi chakwila wukukeña kutañilahu shikola yikwawu.

6. Yumanyi yinateli kumukwasha muntu kufuukula chachiwahi kutalisha hakutañilahu shikola yikwawu yakumujimba?

⁶ Yumanyi yinateli kuyikwasha kufuukula chachiwahi kutalisha hakutañilahu shikola yikwawu yakumujimba? Mulombenu Yehova kulonda ayikwashi kufuukula chachiwahi. (Yak. 1:5) Kubombelahu, ilenu yuma yinalondelihu. Chatachi, dihulenu chuma chinakuletesha mukeñi kutañilahu shikola yikwawu yakumujimba. (Mas. 26:2) Chamuchiyedi, toñojokenuhu chikupu hashikola yimunakukeña kutaña. (Yish. 14:15) Tuhanjekenu haniyi yuma chimu-chimu.

DIHULENU CHUMA CHINAKULETESHA MUKEÑI KUTAÑILAHU SHIKOLA YIKWAWU YAKUMUJIMBA

7. Yumanyi yatela kutoñojokahu akaKristu hampinji yinakukeñawu kutañilahu mashikola amakwawu akumujimba?

⁷ Neyi munakutoñojoka hakutañilahu shikola yikwawu yakumujimba, dihulenu ilu lwihu lwalema, ‘Muloñadi chinnakukeñela kutaña iyi shikola?’ Antu amavulu atañilañahu mashikola amakwawu akumujimba kulonda akeñili mudimu wakayizañaleshaña hela wakaletesha akatambuleña wufwetu wawuwahi. Komana yitoñojoka yamuchidiwu yatama? Inehi. (1 Tim. 5:8) Hela chochu, Bayibolu yatusoñamishaña wubanji wafumaña mukusweja kukeña maheta nikutoñojoka netu mali hohu diwu anateli kutukiña muyinu nshakaminu yamakonu. (Yish. 23:​4, 5; 1 Tim. 6:​8-10; 1 Yow. 2:17) Neyi chuma chinakuyiletesha mukeñeña kutañilahu shikola yikwawu yakumujimba hikwikala namaheta amavulu hela kuya mpuhu, mwakekala namuzañalu walala wanyi, nawa hadaha mwakakisañana niwubwambu wenu naYehova.

8-9. (a) AkaKristu atela kumona ñahi shikola? (Matewu 6:33) (b) Yumanyi yimunakudizila kumazu ahosheli Josefina, Morine, niIris?

⁸ Hanu dinu shikola mwatela kuyimona ñahi? Kwosi chuma chikwawu chitwatela kulemesha nankashi kubadika kumukalakela Yehovaku. (Mat. 22:​37, 38; Fwili. 3:8) Dichi monenuña kutañilahu shikola yikwawu yakumujimba nenu hinjila yinateli kuyikwasha kuwana mali akudikwashamu nachu hampinji yimunakumukalakela Yehova namuchima wenu wejima.—Tañenu Matewu 6:33.

⁹ Yumanyi yayikwashili akaKristu amakwawu atwansi kumona shikola neyi chayimonañayi Yehova? Josefina, wakuChile, wahosheli nindi: “Nafuukwilihu kutañilahu shikola yikwawu yakumujimba yinamweni nami yakankwasha kuwana mudimu wakanshilañaku mpinji yakumukalakela chiwahi Yehova. Hinetejeli shikola kunkañesha kwila yuma yakuspirituku, ilaña natwamijiliku kumukalakela Yehova.” Muhela wejina daMorine wafuukwilihu kuya kushikola hadi chaaka chimu nakudiza chakuyinda nsuki. Muloñadi? Wahosheli nindi: “Chikonkwanyi chami chadiña chakuya nakuzatila kudi kukaankila kwawakakushimwina. Dichi natondeli shikola yakumujimba yinamweni nami yakankwasha kuzata chiwahi iwu mudimu. Chinamanishili iyi shikola, natachikili kuzata mudimu wakuyinda nsuki nawa nahembelihu mali akudikwashamu nachu kunayileña nakuzatila kwadiña kukaankila. Nawa chinayili nakuzatila kwadiña kukaankila kweneni, yuma yinadizili kuniyi shikola yankwashili kuwana mudimu.” Iris, wamanishili shikola yakwikala ndotolu wamazewu nawa yamusendeleli yaaka yayivulu. Wahosheli nindi: “Kutañilahu shikola yikwawu yakumujimba kunateli kuyikwasha, ilaña hikunateli kuyiletela muzañalu walala muchihandiluku. Ichi dichuma chalema chitwatela kwanukaña: Neyi tumutwamijaku Yehova muchihandilu chetu, wakatukwasha kwikala namuzañalu walala nikutwinka yuma yejima yitunakukaankila.” Mwamweni, neyi tulemesha nankashi wubwambu wetu naYehova muchihandilu chetu, twakafuukulaña yuma yakatukwashaña kwikala namuzañalu wahaya nyaaka.

TOÑOJOKENUHU HASHIKOLA YIMUNAKUKEÑA KUTAÑA

10. Munateli kuzatisha ñahi chishina chekala haKuhituluka 32:29 hampinji yimunakufuukula neyi chakwila mukukeña kutañilahu shikola yikwawu yakumujimba hela nehi?

¹⁰ Hekwawu kudi mudimu indi kwiji progilamu yimwatonda dehi nenu mwakadizi. Hela chochu, mukwila chiwahi neyi mufuukulahu kudiza nyidimu yadifwanaku nanowu mudimu indi kwiji nyidimu yacheñi. (Esekejenu Yishimu 18:17.) Makonu kudi njila jajivulu jakudizilamu nyidimu yakumujimba jabulili kwikalaku kunyima, chidi neyi kudizila nyidimu haintaneti. Nawa neyi munakukeña kutañilahu wanyi shikola yikwawu yakumujimba, toñojokenuhu kulonda mumoni neyi mukutweshaña kuwana mali akudikwashamu nachu . Chakutalilahu, muhela Johanna wakuFinland, hatañilihu shikola yikwawu yakumujimbaku. Wahosheli nindi: “Chinamanishili shikola yasekondali, natachikili kuzata mudimu wakuzata mafuku antesha mumulungu niwupayiniya. Nazati nyidimu yashiyashana, nawa namoni Yehova chinatwalekihu kushikija chikaninu chindi chakutwinka yuma yejima yitunakukaankila.” Mwatela kwanuka nenu neyi mufuukula kutañilahu shikola yikwawu yakumujimba yidi yejima, mwakafuma hohu yuma yayiwahi wanyi ilaña niyatama. Dichi dihulenu nenu: ‘Komana mwakafuma yuma yayiwahi yayivulu kubadika yatama?’ (Tañenu Kuhituluka 32:29; 1 Kor. 10:23) Tuhanjekenu hayuma yikuyikwasha kwakukala ilu lwihu.

11. Chalemenadi kutoñojoka hampinji yimwakazatishaña hakutaña shikola indi kwiji hakudiza mudimu? (Talenu ninyevulu.)

¹¹ Mpinji yimwakazatishaña. Toñojokenu mpinji imwakazatishaña mulungu-himulungu kwikala mushikola nakutaña, kudiza chakuzata owu mudimu nihanyidimu yakayinkañawu yakuzatila kwitala. Komana mwakatwalekahu kwikala nampinji yakwila yuma yakuspiritu nikuzata nyidimu yakukwasha chisaka chenu? (Fwili. 1:10) Shikola yimwakatañaña yakayizeyeshaña nankashi muyitoñojoka chakwila mwakakañanyaña kuloñesha kupompa hela kudiza nkawenu? Dichuma chamumwekeneni Jeroz, wakuIndia. Wahosheli nindi: “Chankalilileña kusha muchima hakwila yuma yakuspiritu. Mpinji jikwawu, najiñileña kukupompa. Neyi nanuka, namonaña nami iyi shikola yinayili nakudiza yanmanishilili kwampinji yami niñovu.” Ilaña kudi maprogilamu amakwawu akudiza kushikola anateli kubula kumudiila muntu mpinji yeneni, amakwawu akudiza hohu mafuku antesha mumulungu, nawa amakwawu akeñekaña hohu yuma yantesha yakuzatilahu kwitala. Chakutalilahu, Rabeca, wakuMozambique, waditoñeshaña wanyi kutalisha hashikola yakumujimba yatondeliyi nawa yadiziliyi. Wahosheli nindi: “Twatañileña hohu hadi maora ayedi hefuku. Chumichi chankwashili kutwalekahu kuzata wupayiniya wampinji yejima.”

12. Malwihwinyi imwatela kudihula enu aweni hakwila muzatishi chiwahi mpinji yenu? (Mukwakutañisha 12:1)

¹² Tukweji hela yaaka yakahitahu. Toñojokenu hatukweji hela yaaka yakahitahu hakwila mwakamanishi kutaña oyu shikola. Munakutoñojoka nenu kutaña oyu shikola kwakamwekesha nawu munakuzatisha chiwahi mpinji yenu? (Efwe. 5:​15-17) Neyi mutondahu kutañilahu shikola yikwawu, komana mwakatweshaña kwikala nampinji yakumukalakela Yehova hakumina ñovu jenu hampinji yimuchidi kansi, hadaha kumukalakela mumudimu wampinji yejima? (Tañenu Mukwakutañisha 12:1.) Kudihu maprogilamu amehi imwatela kudiza akuyikwasha kwiluka chakuzata chiwahi mudimu wumunakukeña? Chakutalilahu, kumashikola amakwawu kwadizishañawu nyidimu hela kumudimu kumwazatilaña, munateli kudiza nyidimu swayi nawa mukuzatisha hohu mali antesha kubadika kumayunivesiti. Mario, wakuChile, wahosheli nindi: “Natondelihu kuya kushikola nakudiza mudimu wayaaka yiyedi hohu nawa wakufweta mali antesha chatela niyi kuyunivesiti. Nayileña hohu kushikola mafuku awana mumulungu, nawa chumichi chankwashili kutwalekahu kuzata wupayiniya.”

13. Yumanyi yinateli kufumamu neyi muntu yashiya chisaka chindi nakuya nakushakama kwacheñi hampinji yinakutañilahu shikola yikwawu yakumujimba?

¹³ Iluña kumwakatañilaña. Munateli kuwana shikola yidi kukamwihi nakumwashakamaña himwatela kudizila progilamu yimunakukeña. Indi neyi progilamu yimunakukeña kudiza yidi hashikola yidi mutawuni yacheñi? Hela mukwila ñahi neyi progilamu yimunakukeña kudiza yikukeñekaña enu kushakama hohashikola? Anukenuña nenu kubuuka nakushiya chisaka chenu munateli kufuma wubanji weneni wakuspiritu, sweje-e neyi munakushakama nawantu abula kukuhwelela yuma yimwakuhwelela. (Yish. 22:3; 1 Kor. 15:33) Matias, wakuMozambique, wamanishili kudiza mudimu wakufweta mali antesha nawa wakudiza hohu hadi chaaka chimu. Hela chochu, waditoñeshaña mwafuukwiliyi. Muloñadi? Wahosheli nindi: “Hinadiña haniyi shikola nashakamineña mubodiñi. Hefuku-hefuku nekalileña mukweseka kwakukeña kwila yuma yatama. Inakuyikolesha nami mukwila chiwahi nankashi neyi mubula kutonda progilamu yimunakukeña kudiza yikuyiletesha kuya nakutañila kwakulehi nakushiya chisaka chenu.” Muhela wakuRussia wahosheli nindi: “Natondolweleli wubanji nikweseka kuhitila mukutwalekahu kushakama nawanvwali jami chatela niyi nakushakama hashikola hela mwitala dimu nawakwetu akashikola.” Munateli nikufuukulahu kudizila mudimu haintaneti.

14. Chishina chekala haLuka 14:28 chinateli kuyikwasha ñahi hampinji yimunakutoñojoka kutañilahu shikola yikwawu yakumujimba?

¹⁴ Mali akakeñekaña. Maprogilamu amakwawu akeñekaña mali amavulu wanyi, hela anateli kuyifwetelaku kudi nfulumendi. Neyi dichidi yuma, kutañilahu shikola yikwawu kunateli kuyikwasha kwilukilahu yuma nikwiluka chakuzata mudimu chiwahi hakwila mwakatweshi kuwana mudimu. Ilaña maprogilamu amakwawu, akeñekaña mali amavulu hakuyidiza. Kunateli cheñi kwikala mali amakwawu akukeñekaña, chidi neyi kufwetaku muntu wumu indi kwiji ntañishi wukuyidizishaña mumpinji yenu kulonda mwakashikihu kuyiteja hashikola. Maprogilamu amakwawu akeñekaña kufweta mali amavulu chakwila atudizi ashalaña nanyikudi yafwetañawu hadi yaaka yayivulu. Adilson, wakuMozambique, waditoñeshaña hashikola yakumujimba yafuukwiliyi kutañilahu. Wahosheli nindi: “Ankaaka anhembeleña atwesheleña wanyi kulanda yakuda niyuma yikwawu yakeñekeleña muloña anfweteleleña kushikola yasendeli yaaka yiwana hakwila nimanishi.” Hampinji yimunakutoñojoka hamudimu hela progilamu yimwatela kudiza, dihulenu nenu: ‘Mali añahi akakeñekaña? Chisaka chami chakatwesha kuwana awa mali hela ami aweni? Kudihu mudimu hela progilamu yinatela kudiza yabula wuseya nankashi?’ (Tañenu Luka 14:28.) ‘Neyi nidiñija mumukudi, hakahita yaaka yiñahi hakwila nakamanishi kuwufweta? Komana mudimu wunakazataña wakanyinkaña mali ashikila akankwashaña kwikala nayuma yakeñekaña muchihandilu nikufweta mukudi?’—Yish. 22:7.

15. Muloñadi chimwatela kutoñojokahu neyi chaswayi kuwana owu mudimu henohu kanda mutondi mudimu wumwatela kuya nakudiza kushikola?

¹⁵ Toñojokenuhu neyi chaswayi kuwana owu mudimu. Toñojokenu hanyidimu yinakwiñijawu antu nankashi kwiluña kumwashakamaña hela kumunakukeña kubuukila. Kutañilahu shikola yikwawu yakumujimba mwamweni kwakayikwasha kuwana mudimu? Muloña mumaprogilamu amakwawu adizishaña wanyi yuma yejima yakeñekaña hakwila wiluki chakuzata mudimu chiwahi. Ilaña ashaña hohu muchima hakukudizisha kulonda wiluki chekala owu mudimu chatela akudizisheña yuma yikukukwasha kwiluka chakuwuzata chiwahi. (Kol. 2:8) Muhela wumu wakuIndia wahosheli nindi: “Progilamu yinadizileña kushikola hiyankwashili kwiluka chakuzata mudimu kwesekeja nachakeñeleñawu akanyidimuku. Chafuminimu, natwesheli wanyi kuwana mudimu wesekeni nayuma yinadizili.” Mumaprogilamu amakwawu adizishaña yuma yakeñekaña hakwila wiluki chakuzata mudimu chiwahi, ilaña chakalaña kuwana mudimu. Sublime, wakuCentral African Republic, wamanishili kudiza mudimu wakuloñesha makina atuutishaña mwitala neyi munataati. Hela chochu, wahosheli nindi: “Kunashakamaña, antu amavulu adiloñeshelaña yuma awenawu, dichi chakalaña kuwana mudimu.”

16. Chalemenadi kutoñojoka hamutapu wamudimu wumwakazataña neyi munamanishi shikola?

¹⁶ Toñojokenu cheñi hayuma yadibombela munowu mudimu wumwakazataña neyi munamanishi kuwudiza. Komana mwakawuzataña namuzañalu? (Mukwa. 3:​12, 13) Indi iluña kumwakazatilaña kwakekala ñahi, nawa mwakazataña nawantu amuchidinyi? Himudimu welukawu nawu mwekala wubanji, mwekala kudibecha hela mwekala yuma yayivulu yakwila? Antu azataña iwu mudimu ayifwetaña mali añahi? Komana akekala ashikila chakwila mwakatweshaña kulanda yuma yejima yimwakakeñekaña? Mwakakeñekaña kutwalekahu kutañilahu mashikola amakwawu hakwila mwakatwalekihu kuzata owu mudimu? Chasweja kulema, owu mudimu wakayikwashaña kutwamijaku yuma yaWanta hambidi? (Mukwa. 12:13) Hela chochu, neyi nyidimu yinakehi, chinateli kukala kuwana mudimu wutunakukeñesha. Ilaña progilamu yimukutondahu kudiza kushikola yakumujimba hadaha yakaletesha chakayikalili kuwana mudimu kumbidi. Tabitha, wakuIndia, watondelihu kudiza mudimu wakwiluka chakuchima nawa wakudiza hohu hadi tukweji 6. Wahosheli nindi: “Natoñojokeli nami mudimu wakuchima wakankwasha kuzata chiwahi mudimu wawupayiniya. Wakankwashaña cheñi kwikala najakwila mpinji yejima nikuzata mpinji yinnakeñi, nawa kwakakeñekaña mali amavulu nankashi wanyi.” Iyi progilamu yadiziliyi Tabitha yamukwashili kuwana mudimu wamukwashileña kuzata chiwahi wupayiniya.

17. (a) MukaKristu nateli kuwana ñahi nsañu yinakukeñayi hakwila yafuukuli chachiwahi kutalisha haprogilamu yinakukeña kudizayi? (b) Yishinanyi yamuBayibolu yinateli kumukwasha kufuukula chachiwahi? (Talenu chikasha chinakwila nawu “Yishina yamuBayibolu Yakutoñojokahu.”)

¹⁷ Tunahanjeki hayuma yayivulu yalema yitwatela kutoñojokahu yinakundami hakutañilahu mashikola amakwawu akumujimba. Munateli kuwana ñahi nsañu yimunakukeña kwiluka hakwila mufuukuli chachiwahi? Yenu hashikola nakwihujola hadizishañawu owu maprogilamu imunakukeña hela sandujolenu hawebusayiti yanoyu shikola. Talenu hanyidimu yinakudizishawu mumoni neyi chaswayi kuwana nyidimu munoyu progilamu yimunakukeña kudiza. Munateli cheñi kwihula amanisha kudiza owu mudimu hela atachika dehi kuwuzata. (Yish. 13:10) Yihulenu nenu, “Yumanyi yayiwahi niyatama yekala mukudiza iyi progilamu hela mukuzata iwu mudimu?” Hanjekenu nawamanakwetu niahela adi namuzañalu muloña wakumukalakela Yehova. (Yish. 15:22) Shikola yamuchidinyi ninyidimu yinayilejiwu nawu yayiwahi? Anateli kuyileja ninyidimu yimwabulahu dehi kutoñojokahu.

18. Chumanyi chitwatela kwanukaña?

¹⁸ Neyi chitunamoni, kutañilahu mashikola amakwawu akumujimba mwafumaña yuma yayiwahi niyatama. Dichi lombelenuhu nikutoñojokahu chikupu hachuma chimunakukeña kufuukula. Anukenuña nenu kutañilahu shikola yikwawu yakumujimba kunateli kuyikwasha kwikala namali amavulu akudikwashamu nachu, ilaña chuma chikuyiletela muzañalu walala hikwikala nawubwambu wakola naYehova. (Mas. 16:​9, 11) Yehova wayakamenaña antu jindi mpinji yejima, hichikweti muloña nashikola yakumujimba yatañawuku. (Heb. 13:5) Hanu dinu yumanyi yimwatela kwila neyi munafuukulihu dehi kutañilahu shikola yikwawu yakumujimba? Yumanyi yinateli kuyikwasha kutwalekahu kuswina kwakwihi naYehova hampinji yimudi kushikola? Twakahanjeka haniyi yuma muchibaaba chinalondelihu.