MALWIHU KUFUMA KUDI ANTAÑI

Yitiyañenwinyi yiyedi yateneneñayi kapostolu Pawulu yekala haAÑalija 4:24?

Chelili kapostolu Pawulu nalumbululi dehi wuntaña wadiña hakachi kaAbarahama naSara niHaga, wahosheli nindi: “Iyi yuma hichinjikijilu chayuma yikamwekana; muloña awa ambanda ayedi emenañaku yitiyañenu yiyedi.” (Ñal. 4:​22-24) Kunyima, twelukili netu iyi yitiyañenu yiyedi yemeneneñaku chitiyañenu chaNshimbi nichitiyañenu chachiha. Hela chochu, hanyima yakusandujolahu chikupu, tunawani netu iyi nsañu yatalisha mwacheñi. Chinamwekani neyi Pawulu watalishileña kuchitiyañenu chaAbarahama bayi neyi kuchitiyañenu chachihaku. Talenu yikuma yantesha yinaleteshi tukunkululi muniyi njila.a

Pawulu wamwesekejeli ñamba wamumbanda Haga naMpidi yaSinayi. (Ñal. 4:25) Haga wadiña chitiyañenu chaNshimbi chatiyañeniwu haMpidi yaSinayi mu 1513 B.C.E. (Kwid. 19:​5, 6) Kwosi muntu wabula kuwanina wadi kutwesha kwovwahila iyi Nshimbi chikupuku, dichi chumichi chayanukishileña aYudeya nawu adiña anduñu anshidi. Ichi chitiyañenu chadi kukwasha muza waIsarela kumwiluka Mesiya, muloña diyi hohu wateleli kwovwahila Nshimbi chikupu. Ilaña Mesiya chahaniniyi wumi windi wawanina, waletesheli antu abula kuwanina ayikuuli kunshidi nikukufwa. (Ñal. 3:​19, 24, 25) Yesu chashikijiliyi nkeñelu yaNzambi, Nshimbi jalekeli kuzatika.—Rom. 10:4.

Pawulu wamwaambwili Haga naSara, “[mumbanda] wasubuka”wavweli “kwesekeja nachikaninu.” (Ñal. 4:23) Ichi chikaninu chadiña hichitiyañenu chaAbarahama. (Ñal. 3:29; 4:​28, 30) Yehova watiyañeni ichi chitiyañenu naAbarahama. Achilumbulula muwihi haKutachika 22:18 nawu: “Nyuza yejima yahanu hamaseki yakatambwila nkisu kuhitila mudi mwaneyi [mwana kaAbarahama], muloña wunatiyilili mwizu dami.”

Ichi chitiyañenu chatiyañeniwu naAbarahama chinaleteshi twilukilihu nsañu yikwawu hachikaninu chakaniniyi Yehova muEdeni. (Kutach. 3:15) Chinakutukwasha kwiluka nawu ‘mwana’ ashimwineñawu dehi wakekala mwana kaAbarahama. Pawulu walumbulwili nindi iwu ‘mwana’ ateneneñawu hiYesu Kristu. Ilaña “antu jaKristu,” dikwila nawu a 144,000, akayuula hamu naYesu muWanta windi, niwena adi mbadi yaniwu mwana wachifwikija. (Ñal. 3:​16, 29; Chim. 14:​1-3) Antu amwitejaña nikumwovwahila Kristu, akayinka yuma yayivulu yayiwahi muloña wachikaninu chaNzambi chamukaniniyi Abarahama.

Pawulu wazatishililidi ichi “[chinjikijilu] chayuma yikamwekana”? Wamwekesheli nindi neyi aYudeya adiñaku mumafuku indi atwalekelihu kwovwahila Nshimbi, adi kutwalekahu kwikala muwuduñu neyi Haga. Hela chochu, neyi amwitejeli Yesu Kristu, wekala chibalu chatachi ‘chamwana’ kaAbarahama, adi kwikala asubuka neyi Sara. Chuma chadi kufumamu, adi kuyikuula chikupu kunshidi nikukufwa. (Yow. 8:​32-34) Ilaña neyi amwitejeli wanyi Yesu, adi kwiluka wanyi nkeñelu yayeni yaletesheli ashiku chitiyañenu chaNshimbi, dikwila nawu kuyilombola nakuyitwala kudi Kristu.

AÑalija amavulu asonekeleleñayi Pawulu iyi nsañu, adiña aYudeya wanyi nawa hiyayilombweleña kudi Nshimbiku. AYudeya amakwawu akanjikijileña akaKristu abulili kwikala aYudeya nawu ovwahileña Nshimbi, nilushimbi lwahosheleña hakwalama. Pawulu walumbulwili nindi neyi atwalekahu kwila chumichi, adi kumwekesha kubula maana. Hiyateleleli kutwalekahu kwikala ‘muwuduñu’ waNshimbiku. Adiña ‘ayisubula’ dehi muniwu wuduñu muloña ekalili antu jaKristu.—Ñal. 5:​1, 10-14.