Dizilenu Kudi “Nzambi Wakukundeja Kwejima”

1. Muloñadi chitwatela kudikundejela?

WEJIMA wetu twaneñaña ‘nakweseka kwashiyashana kutwahitañamu,’ dichi mpinji jikwawu twakeñekaña kutukundeja nikutukolesha. (1 Pet. 1:6) Neyi chochitwatiyaña kuwaha kutukundeja kudi akwetu, ninetu twatela kunyakala kukundeja anakumona kukala. (Mat. 7:12) Yehova, “Nzambi wakukundeja kwejima,” watulejaña njila yitwatela kwimbujola “[hakukundeja] antu amakwawu mukweseka kwejima kwamonañawu.” Tunateli kumwimbujola neyi ‘tudikundejaña wumu namukwawu.’ (2 Kor. 1:​3, 4; 1 Tes. 4:18) Twelaña mwenimu, bayi neyi muloña dichuma chitwatela kwilaku, ilaña muloña twayikeña amanakwetu niahela. Muchinu chibaaba tukuhanjeka (1) mwatalisha kukundeja neyi chakulumbululawu muBayibolu, (2) chitunateli kukundeja antu amakwawu, nawa (3) yuma yitwatela kwila hakwila atukundeji.

MWATALISHA KUKUNDEJA NEYI CHAKULUMBULULAWU MUBAYIBOLU

2. MuBayibolu, izu dakwila nawu “kukundeja” dinateli cheñi kutalisha kuyumanyi?

² MuBayibolu, izu dachiGiriki kwabalumunawu izu dakwila nawu “kukundeja” dinateli kutalisha kuyuma yashiyashana kushindamena hansañu yinakuhoshewahu. Dinateli kutalisha “kukukolesha,” “kukonkomwena,” hela “kushinjila.” (Rom. 12:8) Izu dadeni dachiGiriki dakukundeja, datalisha kudi “muntu wunayi nakwimana kwakwihi namukwawu muntu kulonda yamukwashi.” Dichi tunateli kufwikija ibwambu damuntu wunakunyakala kuya kudi ibwambu dindi wunakukabakana kulonda yamukwashi munjila yidi yejima hela kumwinka chuma chinakaankiliyi. Hichikweti muloña nawukwashu wunamukwashiwu muntu kudi ibwambu dindiku, kukundejewa kwalala kwaleteshaña muntu wunakukabakana kutiyaku chiwahi nikukoleshewa.

3. Chumanyi cheliliyi Baranaba chitwatela kwimbujola kutalisha hakukundeja antu amakwawu? (Talenu nimwevulu.)

³ Talenu muntu ashimunawu muBayibolu wakundejeleña akwawu. MukaKristu wejina daYosefu wakolesheleña nikukundeja chikupu akwawu chakwila apostolu amuteneneña nawu Baranaba, ijina daya mukwila nawu “Mwana kaNkundeji.” (Yilw. 4:36) Idi ijina damuteleleli chikupu chakwila muBayibolu hiyamutenahu cheñi nejina dindi dadeniku. Hampinji jashiyashana, Baranaba welileña kwesekeja namwatalisha ijina dindi kuhitila mukukwasha akwawu akakwitiya neyi anakukeñeka wukwashu. Chakutalilahu, chelili Sawulu iyala wabalumukili nakwikala kambanji yashiki muYerusalema, wakeñeleña kudimona nawakwawu atumbanji. Hela chochu, atiyili woma muloña amwilukili nawu himukakukabishana. Ilaña Baranaba wamukuhweleli Sawulu nawa wamutwalili kudi apostolu kulonda amwiluki.—Yilw. 9:​26-28.

CHITUNATELI KUKUNDEJA ANTU AMAKWAWU

4. Njilanyi yimu yayiwahi yitwatela kukundejelamu antu amakwawu? (ARoma 1:​11, 12)

⁴ Yihempulenuña neyi chinatwesheki. Yehova wazatishaña ambuñindi hakukundeja antu amakwawu. Chakutalilahu, hampinji kaprofwetu Elija yaneñeliyi chikupu, Yehova wazatishili kañelu kumukolesha. (1 Anya. 19:​4-7) Kapostolu Pawulu niyena welukili chichalemena kuya nakuyihempula amanakwindi kulonda ayikoleshi. (Tañenu ARoma 1:​11, 12.) Neyi munayi nakuhempula muntu kulonda mumukundeji, hanjekenu nindi hadi mpinji yeneni. (1 Kor. 16:7) Hela chochu, neyi mukutwesha wanyi kuhempula muntu wudi mukukala, bayi mudiwula kulema kwakumutemeshela foni, kumusonekela mukanda, kumutemeshela kaadi, hela kumusonekela meseji kulonda mumukoleshiku. Komana mukumwiteja Yehova yayizatisheña kukundeja antu amakwawu?

5. Kukalanyi kutwatela kukuhwelela kumona?

⁵ Yuma chiyikuswejelañaku kutama munanu mafuku akukuminina, chikutukalilaña nankashi kuyihempula amanakwetu niahela kulonda tuyikundeji. Hampinji yadiñayi Pawulu mukaleya muRoma, Onesifwolu wakuEfwesesa, wamukeñakeñeli hela chakwila kwila mwenimu kwashili wumi windi muwubanji muloña niyena adi kumusha mukaleya indi kwiji kumujaha. (2 Tim. 1:​16-18) AYinsahu muRussia anakumwekesha iwu muchima yowumu hampinji amanakwawu niahela yinakuyikabishawu muloña wayuma yakuhwelelawu. Neyi aYinsahu anayileti muchota chanyiloña nakuyisompesha, amanakwawu niahela enzaña mukapeka munakuyisompeshelawu kulonda ayikoleshi, hela chakwila niwena anateli kuyikasa muloña wakwila mwenimu. Komana kwila mwimbujola chakutalilahu chawu chakuhamuka kuhitila mukudiza hadi antu jaNzambi akunyima niamakonu adikoleshaña wumu namukwawu nikwikala namuzañalu hela chakwila anakuyikabisha nehi?

6. Tunateli kumwimbujola ñahi Yehova hampinji yitunakukundeja akwetu? (Talenu nimwevulu.)

⁶ Yitiyililenuña. Kaprofwetu Elija chamweniyi nindi wumi windi wudi muwubanji, wamulejeli Yehova mukulomba yuma yejima yadiña kumuchima. Nzambi yetu wakukeña wamutiyilili Elija hampinji yashimwineñayi yuma yamwakamishileña hela chakwila Nzambi wadiña weluka dehi kukala kwamweneñayi. Nawa Yehova watiyilili nakudiwunjika hampinji Elija yalombeleñayi nakufuntisha-funtishahu yuma yoyimu. (1 Anya. 19:​9, 10, 14) Yehova cheñi wamwitejeli kaprofwetu Habakuki kushimuna yuma yamwakamishileña niyaletesheleña yajinokeña munjila yadi kumwekana neyi nakudiwula wuswa waNzambi. (Hab. 1:​2, 3) Makonu, Yehova watiyililaña nakanañachima kukulomba kwetu hela chakwila neluki yuma yitunakukeña. Tunateli kumwimbujola Yehova neyi tutiyililaña nakanañachima nikumwekesha kalemesha hampinji amanakwetu niahela yinakuhoshawu. ‘Nyakalenuña kutiya’ hampinji yinakuhoshawu nawa tondolwelenuña kuyiketwisha hela kuhila swayi, hela chakwila yuma yinakuhoshawu yidi chiwahi wanyi indi kwiji anakufuntisha-funtishahu yuma yoyimu.—Yak. 1:19; Mukwa. 7:9.

7. Tunateli kwiluka ñahi wukwashu wunakukeñayi muntu wunakumona kukala?

⁷ Ilukenu wukwashu wunakukeñayi muntu. Tunateli kwiluka wanyi yuma yidi munyichima yawantu neyi chelukañayi Yehova, dichi tunateli hohu kwiluka chakukundeja muntu chachiwahi nakukala kunakuhitamu neyi tumutiyilila nakanañachima hanakuhoshayi. Bayi mutoñojoka nenu muneluki yuma yinakukeñayi muntu muloña hohu wakwila muneluki yuma yimwadi kukeña neyi mwadiña mukukala kokumu kunakumonayiku. Etu antu twambuka. Dichi mwinkenu mpinji, tiyililenu nakanañachima, nawa mwihulenu malwihu mukubabala kulonda yayileji chinakutiyayi.—Yish. 20:5.

8. Yesu wayikundejeli ñahi aMata naMariya hanyima yakufwa kwaLazaru? (Talenu ninyevulu.)

⁸ Talenu Yesu chakundejeliyi aMata naMariya hanyima yakufwa kwamanakwawu, Lazaru. Awa ambanda ayedi afwishili manakwawu, hela chochu, Yesu wayikundejeli munjila jashiyashana. Hanyima yakwila Mata nahoshi nayena, Yesu wamulejeli chalala chahosha hakusañuka nawa wamukwashili kukuhwelela chikupu muniyi ntanjikilu yayiwahi. Ilaña Mariya chenjiliyi kudi yena iku nakudila, chakadi nikujina, Yesu wahoshelihu wanyi hansañu yakusañuka. Kafwampi, wadililili hamu naMariya nawa wamwihwili kwamukaamikiliwu Lazaru. (Yow. 11:​20-35) Yumanyi yitunakudizilaku? Neyi tunakukundeja antu anakukabakana, twatela kwiluka wukwashu wunakukeñawu hanoyu mpinji, bayi tukakela kunjila yoyimu yitweluka dehi yitwakundejelañamu antu amakwawuku.

9. Tunateli kuzatisha ñahi Bayibolu hakwila tukundeji antu? (ARoma 15:​4, 5)

⁹ Zatishenu Bayibolu. Neyi mumukundeja muntu “[nakukundeja] kwamuNsona,” mukumukwasha kwikala nakuchiñeja. (Tañenu ARoma 15:​4, 5.) Chikufumamu, iku kuchiñeja kukumukundeja nikumukolesha. (Isa. 40:31) Munateli kuwana ñahi Nsona jimukuzatisha hakwila mukundeji muntu? Amakwawu ahembañahu mavasi azatishañawu neyi anakukeña kukundeja muntu, chidi neyi ana ekala hamutu wakwila nawu “Kukundeja” mumukanda waNsona Jatukwashaña Kumukalakela Yehova. Mulombenu Yehova ayikwashi muzatishi chiwahi Izu dindi kulonda mukoleshi antu anakumona kukala. Spiritu yindi yinateli kuyikwasha kwanuka nsona jimunakukeña kuzatisha hakwila mukundeji muntu.—Yow. 14:26.

10. Muloñadi chitwatela kuhoshela munjila yaluwi hampinji yitunakukolesha muntu?

¹⁰ Hoshenu munjila yaluwi. Izu dadeni dachiGiriki kwabalumunawu izu dakwila nawu “kukundeja,” anateli cheñi kudibalumuna nawu “kukonkomwena” hela “kushinjila.” Mpinji jikwawu munateli kumukonkomwena hela kumushinjila muntu imunakukundeja hakwila nawu yahimpi yitoñojoka yindi. Neyi dichinakukeñeka nawu mwili, toñojokenuhu chiwahi henohu kanda muhoshi kulonda mazu imukuhosha ekali akukolesha bayi akumukatisha kumuchimaku. (Yish. 12:18) Yehova welili chuma chachiwahi chitwatela kwimbujola hampinji yahosheleñayi naElija, wamweneña nindi diyi hohu wamukalakeleleña Yehova hayina mpinji nawa nindi hashikililimu kwikala kaprofwetu kindiku. Yehova wamukwashili Elija munjila yayiwahi kwolola yitoñojoka yindi chakadi kumuleja nindi naluwañeshi. (1 Anya. 19:​15-18) Ninenu munateli kukwasha amanakwenu niahela neyi mwikala naluwi nikutoñojokahu chiwahi hayuma yimunakukeña kuhosha. Neyi munakuhana mpanji indi kwiji munakwakula hakupompa kwetu kwawakaKristu, mpinji yejima hoshenuña naluwi nawa munjila yayiwahi hampinji yimunakufwila kukundeja nikukolesha amanakwenu niahela.

11. Yumanyi yakeñekaña nankashi kwilila antu anakukabakana? (1 Yowanu 3:18)

¹¹ Yikwashenu muyuma yakumujimba. Antu anakukabakana twatela kuyikwasha munjila yikwawu bayi kuyileja hohu mazu akukundejaku. (Tañenu 1 Yowanu 3:18.) Baranaba welili chuma chachiwahi chitwatela kwimbujola. Hampinji yalandishiliyi iha dindi, mali atambwiliyi wayihanini kulonda ayizatishi kukwashamu nachu amanakwindi niahela afumini tuhu nakupapatishewa nawa adiña mukukaankila. (Yilw. 4:​36, 37) Amanakwetu niahela amavulu amwekeshaña kukeña kwokumu kwamwekesheliyi Baranaba kuhitila mukukwasha amanakwawu niahela muyuma yakumujimba yinakaankiliwu. Muhela Gabriela, wakuPoland, waneñeli nankashi chelili dibaji dikisañani itala dindi. Wahosheli nindi: “Natiyili woma chikupu nikwakama, nawa anvwali jami inashakamineña nawu niwena dichatiyiliwu. Mutu wanyeñumukili. Ilaña amanakwetu amuyipompelu yamukamwihi enjili nawa awahishili itala dami mwifuku dimu hohu. Ichi chuma chamwekeni chankwashili kukuhwelela chikupu nami Yehova nakulombola antu jindi kulonda akundejeña anakukabakana.”

12. Munateli kuyikwasha ñahi akwenu akaKristu neyi muumika nakashinshi kukala kumunakumona?

¹² Twalekenuhu kuumika hampinji yimunakumona kukala. Pawulu wayilejeli aTesalonika nindi wakundejeweli nikukoleshewa chatiyiliyi nawu anatwalekihu kuumika nakashinshi. Welukili nindi kudikita kwadikitiliyi hakuyikwasha hikwayili hohu mumenjiku. (1 Tes. 3:​5-8) Pawulu niyena welukili nindi neyi yatwalekahu kwikala washinshika kudi Yehova hampinji yinakumonayi kukala, chumichi chikukolesha amanakwindi niahela niwena kutwalekahu kwikala ashinshika. (Kol. 2:​1, 2) Munjila yoyimu, neyi akwetu akaKristu amona Yehova chinakutukwashayi kuumika nakashinshi kukala kutunakumona, chumichi chikuyikolesha nankashi.

13. Chumanyi chitwatela kutwalekahu kwila hampinji yitunakukolesha akwetu?

¹³ Diwunjikenu. Amanakwetu niahela ananeñi, mpinji jikwawu hiyanateli kushikena kutiyaku chiwahi hanyima yakuyikundejaku. Ilaña Nsona jatukonkomwenaña nawu “[tudikolesheña] wumu namukwawu.” Izu dakwila nawu “dikoleshenuña” datalisha kuchuma chinakutwalekahu hohu-u. (1 Tes. 5:11) Diwunjikenuña hampinji yimunakutwalekahu kukundeja antu anakukeñeka nawu muyikwashi. (1 Tes. 5:14) Hela chochu, mpinji jikwawu ninetu tukukeñekaña kutukundeja. Yumanyi yitwatela kwila hakwila atukundeji?

YUMA YIMWATELA KWILA HAKWILA AYIKUNDEJI

14-15. Yumanyi yitwatela kwila hampinji yitunakumona yuma yinakutwakamisha nankashi hela makabi?

¹⁴ Lombenu kudi Yehova. Mulombenu kulonda ayikundeji hampinji yimunakwakama nankashi hela himunakukabakana. (Mas. 94:19) Mulejenu mukulomba chakadi kuhita mumbadi kukala kumunakuhitamu, nakumulumbulwila yuma yejima yidi kumuchima. (Mas. 62:8) Kafwampi, Yehova neluki chimunakutiya henohu kanda mumulombi nikumulomba. Ilaña neyi mumuleja mukulomba yitoñojoka yenu yayeni yamukachi, mukumwekesha nenu mwamukuhwelela. Nawa Yehova wakañanyaña wanyi kwakula munjila yinakeñiyi kulomba kunalombiyi muntu muloña wakumukuhwelela. (Maku 11:24) AFwilipi 4:​6, 7 yatukonkomwenaña nawu: “Mulejenuña Nzambi yuma yejima yimunakukeña; nawa kuwunda kwaNzambi kwabadika kwiluka kwejima kwakahemba nyichima yenu niyitoñojoka yenu.”

¹⁵ Lombenu wukwashu kudi akwenu. Lejenu ibwambu denu wapama indi kwiji mukulumpi muchipompelu imwakuhwelela chimunakutiya. Amanakwenu niahela anateli kuyikundeja, ilaña neyi munayileji wanyi hiyanateli kwiluka chimunakutiya hela yuma yimunakukeñaku. (Yish. 14:10) Munateli kuyileja nenu ayitiyilili nakanañachima hampinji yimukuyilejaña chimunakutiya hela nenu ayitañili Nsona indi kwiji chibaaba chinateli kuyikundeja.

16. Chumanyi chinateli kumwekana neyi akwenu anakuyikundeja, ilaña chumanyi chimwatela kwanuka?

¹⁶ Diwunjikenuña nikwanakena. Amanakwenu niahela hadaha anateli kuluwañesha hampinji yinakuyikoleshawu. Chakutalilahu, anateli kuhosha indi kwiji kwila chuma chikuyiletesha muneñi nankashi chatela mutiyiku chiwahi. Neyi chuma chamuchidiwu chimwekana, mwekeshenuña kudiwunjika. (1 Kor. 13:​4, 7) Nawa anukenuña mazu ekala haYakoba 3:​2, ahosha nawu: “Neyi kudi muntu wabulaña kuhukana mumazu, himuntu wawanina.” Shenuña muchima hayuma yayiwahi yinakufwila kwilawu amanakwenu niahela. Anukenuña nenu “chalala spiritu yinakukeña, ilaña mujimba wunazeyi.”—Mat. 26:41.

17. Chumanyi chitwatela kufwilaña kwila?

¹⁷ Wejima wetu twakeñaña kutukundeja nikutukolesha, nawa munanu mafuku akukuminina tukukeñekaña nankashi kutukundeja nikutukolesha muloña yuma yikuswejelañaku kutama nawa ayilumbu jaNzambi akuswejelañaku kutukabisha. Dichi tufwileña kuzata nañovu kudikundeja wumu namukwawu.