Kuzatisha Njila Yapela Yakupulintilamu Nyikanda Kulonda Tukwashi “Antu Ejima”

Yehova Nzambi nakukeña “antu ejima eluki chalala.” (1 Timotewu 2:3, 4) Hela chochu, amanakwetu niahela kushilahu niantu twashimwinaña ahoshaña madimi ashiyashana, chaaka nichaaka twapulintaña nyikanda munawa madimi kwakwihi na 2 biliyoni. Yumanyi yitunakwila yinakutukwasha kwidisha yakuda yakuspiritu mumadimi amavulu chakadi kukisa mali imwahanaña?

Tunakeheshi Maluña aKupulintila Nawa Tunalandi Makina Akatataka

Hadi yaaka 40 yinahitihu, twapulintilileña magazini mumatuña 40. Kufuma haniyi mpinji, twadiña nakukehesha chovu-chovu maluña kwakupulintila nyikanda yetu nawa chayinu mpinji tunashali hohu namatuña 9 mutunakupulintila. Hela chochu, hayoyeniyi mpinji naambala yamadimi yitwapulintilaña nyikanda yetu yavuliliku kwakwihi namapampa 6! Yumanyi yinakutukwasha kupulinta nyikanda yetu mumadimi amavulu ilaña mumatuña antesha hohu? Chuma chatachi chinatukwashi hikuzatisha makina akatataka.

Makina akatataka anakutukwasha kupulinta nyikanda yayivulu mumpinji yantesha hohu. Makina itwazatishileña kunyima asendeleña mpinji yeneni hakuhimpa-himpa, dikwila nawu kufumisha heluña dimu nakutwala heluña dikwawu kulonda muzatilihu mudimu wunahiñiwu. Chineli tukweti makina akatataka, tunakuhimpaña swayi kapampa kawana kubadika kunyima. Ichi tunakumanishaña nyidimu yayivulu swayi kushilahu nikupulinta nyikanda mumadimi ahoshañawu kudi antu antesha. Kafwampi, hakuzata mudimu nimudimu twahimpaña yuma yitwatenaña netu printing plates. Hadi chaaka chamukuma chinamani twazatisha mali akushika ku 2 miliyoni kuma printing plates hohu.a Dichi, neyi tunakupulinta nyikanda yantesha twazatishaña makina abulaña kuzatisha maprinting plates. Awa makina apulintaña nyikanda yantesha dichi twazatishaña mali antesha nawa niyuma yakisikaña yantesha hohu.

Hadi yaaka yisatu yinahitihu, tunazatishi mali akubadika ha 10 miliyoni kumudimu wakuwahisha makina akupulinta nachu niakuzatisha hakubomba mafu amunyikanda mukaayi kejima. Talenu chitunakuzatisha awa makina amakwawu akwidisha maBayibolu. Kunyima, hakwila nawu amanakwetu edishi Bayibolu yimu kudi nyidimu kubadika ha 40 yazatileñawu hanyima yakupulinta, imu munabombeli kuyichima, kuyiketola, kuyesekeja, kuyilambwija, nikuyisha wulombu. Kubombela haniyi nyidimu, kakavulu twadiña nakututa maBayibolu namakasa nakuyilumbika heluña hitunakuzatila mudimu wukwawu wunalondelihu. Chayinu mpinji, amanakwetu azataña hohu nyidimu 10 muloña iyi nyidimu yikwawu yinashali ayizataña kudi makina akatataka nawa awa makina asendaña maBayibolu kuyifumisha heluña dimu nakuyitwala heluña dikwawu. Ichi mudimu wazatileña amanakwetu namakasa wakwidisha maBayibolu wunakehi kubadika namapesenti 55. Hakasanji kamuJapan ikina dabombaña mafu amunyikanda dedishileña maBayibolu 2,000 hadi maora 8 ilaña chayinu mpinji anakwidisha maBayibolu akushika 35,000 hadi maora 8 hohu!

Kubula Kuhemba Yipapilu niNyikanda Yayivulu Kwatukwashaña Kuhemba Mali

Iyi yuma yitunashimuni yinakutukwasha kuhemba mali imwahanaña. Chakutalilahu, chineli tunakupulintaña nyikanda yantesha nawa nyidimu yinakwendaña swayi, tunakuhembaña hohu nyikanda yantesha hamaluña hitwapulintilaña, aGary azatilaña hakasanji kamuUnited States ahosheli nawu “Hakusambila chamwekeneña neyi chikutukwasha wanyi kupulintaña nyikanda yantesha mumpinji-mumpinji, twamweneña neyi kupulinta nyikanda yayivulu hampinji yimu, dikunateli kukwashana.” AGary atwalekelihu nawu: “Chaaka chatachi chitwatachikili kupulinta nyikanda yantesha mumpinji-mumpinji, mali itwalandileña nachu yipapilu nimaprinting plates avuliliku na 60,000. Hela chochu, twahembeli mali akubadika ha 1.5 miliyoni muchaaka chochimu kumali itwateleli kuzatisha kumudimu wakuhemba yipapilu ninyikanda!” Awa mali twayizatishaña kunyidimu yikwawu yalema yidi neyi kutuña Matala aWanta nikukwasha nachu amanakwetu anaholokeli muwubanji.

Chineli twakehesheliku kuhemba yipapilu ninyikanda, twashalili namaluña amakwawu hatusanji twetu. Maluña ashalili munitu tusanji anakuzatilamu nyidimu yikwawu yahaBeteli. Kubombelahu, chineli tunakupulintilaña hatusanji twantesha hohu tunakukeheshañaku kutoha kwatusanji twatuha hampinji yitunakutuña. Chakutalilahu, mudimu wakupulinta hakasanji kamuBritain atachikili kuwuzata kudi kasanji kaCentral Europe nitusanji tukwawu mu 2018. Ichi chuma chatukwashili kuhemba mali amavulu hampinji yitwatuñileña kasanji kakaha muChelmsford, England.

“Wunantoñihu!”

Chuma chasweja kulema, chineli tunapeleshiku njila yakupulintilamu nyikanda, tunakwashi antu amavulu kuswina kwakwihi naNzambi. Ichi tunakupulinta nyikanda mumadimi amavulu hela chakwila kunakukeñeka hohu nyikanda yantesha munowu madimi. Chakutalilahu, antu 35,000 hohu diwu ahoshaña idimi daWallisian ashakamaña muCaledonia, Wallis nimuFutuna. Ilaña muAugust 2024, twedishili Bayibolu yaNsona jaKaayi Kakaha mwidimi daWallisian. Mukakushimwina wejina daSelafina wahoshaña idimi daWallisian wahosheli nindi: “Natiyileña wanyi mazu inatañileña muBayibolu yamwidimi daFrench. Dichi, chedikili Bayibolu yaNsona jaKaayi Kakaha mwidimi daWallisian, nawulumwini madilu nawa nalombeli nami, ‘Eyi Yehova, wunantoñihu! Hiwukweti chaambuku.’”

Hela chakwila antu kwakwihi na 500,000 mwituña daDemocratic Republic of Congo diwu ahoshaña idimi daSanga, twedishili mukanda wamukuma waMunateli Kwikala naMuzañalu Haya Nyaaka! munidi idimi. Josué wekala muchipompelu chazatishaña idimi daSanga wahosheli nindi “Twakabakeneña kubalumuna hela kulumbulula mazu amakwawu kudi atudizi etu aBayibolu. Hela chochu, mpinji yikwawu atudizi ami atiyileña wanyi yikuma yadiña mumukanda. Tunatiyi kuwaha kwikala naniwu mukanda mwidimi daSanga! Ichi atudizi ami anakutiya yikuma chiwahi nawa nakabakanaña wanyi kuyilumbulwila munatalishi mazu.”

Ichi tunakupulinta nikuhana nyikanda mumadimi amavulu kubadika kunyima. Yawaana yimwahanaña niyimwahanaña kuzatisha donate.jw.org, yinakutukwasha kuzata iwu mudimu. Kusakililaku hamuchima wenu wakuhana.