Indi Izanvu Dalombolaña dawaYinsahu jaYehova hiChumanyi?

Izanvu Dalombolaña hizanvu danyanya mwekala akaKristu apama dahanaña nshimbi yalondela aYinsahu jaYehova mukaayi kejima. Azataña nyidimu yiyedi:

• Atalaña mudimu wakuloñesha yakuda yakuspiritu yashindamena haBayibolu kutila munyikanda, kupompa, nimashikola awaYinsahu jaYehova.—Luka 12:42.

• Atalaña mudimu wamukaayi kejima wawaYinsahu jayehova kuhitila mukulombola chakuzata mudimu wakushimwina nikutala chinakuzatika yuma yahanañawu amanakwetu.

Izanvu Dalombolaña dembujolaña chelileña “apostolu niakulumpi adiña muYerusalema” mumpinji yawakaKristu akusambila, afuukwileña yuma yalondeleleña chipompelu chawakaKristu ejima. (Yilwilu 15:2) Kufwana awa amayala ashinshika, amamembala Amwizanvu Dalombolaña hidiwu alomboli jakuloñesha kwetuku. Ashindamenaña haBayibolu muyuma yejima, nawa eluka nawu Yehova Nzambi wamutonda Yesu Kristu kulonda ekali Mutu wachipompelu chawakaKristu.—1 AKorinda 11:3; AEfwesesa 5:23.

Anyi adi Mwizanvu Dalombolaña?

Amamembala Amwizanvu Dalombolaña diwenawa Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, niaJeffrey Winder. Azatilaña hakasanji keneni mukaayi kejima muWarwick, New York, U.S.A.

Izanvu Dalombolaña dazataña ñahi?

Izanvu Dalombolaña dikweti makometi 6 atalaña nyidimu yashiyashana, membala himembala wazataña mukometi yimu hela kubadikahu.

• Kometi yawaNloñeshi: Yatalaña hansañu yejima yahoshaña hanshimbi jamukaayi, hawubanji wamwekanaña, makabisha nikukala kwamwekenaña aYinsahu jaYehova mukaayi kejima muloña wayuma yakuhwelelawu, yatalaña cheñi hansañu yikwawu yamwekenaña aYinsahu jaYehova yakeñekaña kuzatilahu swayi-swayi.

• Kometi Yatalaña akaBeteli: Yakamenaña amamembala amuchisaka chaBeteli.

• Kometi Yatalaña haMudimu waKupulinta: Yatalaña mudimu wakupulinta nyikanda yashindamena haBayibolu nikuyitemesha kumaluña ashiyashana nimudimu wakutuña Matala akupompela,tusanji twakubalumwina, nitusanji twanyitayi.

• Kometi yaMudimu: Yatalaña yuma yejima yakundama kumudimu wakushimwina “nsañu yayiwahi yaWanta.”—Matewu 24:14.

• Kometi Yadizishaña: Yatalaña mudimu wakuloñesha nsañu yitwatambwilaña hakupompa, kumashikola kushilahu mumazu akukwata nimaprogilamu ahamavidiyo.

• Kometi Yasonekaña: Yatalaña mudimu wakuloñesha yakuda yakuspiritu yakupulinta niyakutudika hawebu sayiti yetu kushilahu nimudimu wakubalumuna.

Kubombela hamudimu wazataña Izanvu dalombolaña kuhitila munawa makometi, Izanvu Dalombolaña dabulakanaña cheñi mulungu nimulungu nakuhanjeka hayuma yinakukeñeka mukuloñesha. Neyi anabulakani, amanakwetu amunidi izanvu ahanjekaña chahosha Nsona, nawa etejaña munakuyilombola spiritu yaNzambi yajila, alondelaña munaditejiwu wejima wawu.—Yilwilu 15:25

Indi ankwashi Amwizanvu Dalombolaña hiyanyi?

Awa hiyamanakwetu akaKristu ashindamenewa akwashanaña mumakometi Ezanvu Dalombolaña. (1 AKorinda 4:2) Eluka chikupu mudimu wazatañawu kudi makometi mwekalawu, nawa abulakanaña mulungu nimulungu munawa makometi. Hela chakwila wena hiyakweti mudimu wakufuukulaku, awa ankwashi aletaña yitoñojoka yalema ninsañu yayuma yinakumwekana, ashañaku muchima kulonda eli munafuukuli kometi, nikutala yuma yinakufuma muyuma yafuukwili oyu kometi. Ayitemeshaña cheñi kudi Izanvu Dalombolaña nakuhempula amanakwetu niahela mumatuña ashiyashana mukaayi hela kuhana jimpanji hakupompa kudi neyi kupompa kwahachaaka hela hakupompa kwawamanakwetu anamanishi shikola yagiliyadi.