KUDIZA 18
Ikalaku Ibwambu daNzambi Haya Nyaka!
Kwekala kuzata nañovu hakukwata wubwambu; kwekala kuzata nañovu hakukolesha wubwambu. Ñovu zheyi zhakutwalekahu kwikala ibwambu daNzambi akazhikiswila chikupu. Yesu wayilezheli owu amukuhweleleli nindi: “Nsañu yalala yikuyifumisha muwuduñu.” (Yowanu 8:32) Indi ichi chinakulubululadi?
Wunateli kulubuka katataka. Wunateli kulubuka kufuma kuntañishilu yakutwamba nimakudi anawanishiyi Satana. Wunateli kulubuka kukubula chikuhwelelu kunenzali muyihita yawantu owu abula kumwiluka Yehova. (Aroma 8:22) Amabwambu zhaNzambi alubuka kufuma “[ku]woma wakufwa.”—Aheberu 2:14, 15.
Wunateli kuluña hakulubuka mwituña daNzambi dadiha. Okuwaha kwabadika kuwunateli kudiluñisha hakulubuka kudi kumbidi! Mu Paradisa hanu heseki, kwakekala kulubuka kufuma ku nzhita, kukata, niwubanzhi. Kulubuka kufuma kuwuzweñi ninzala. Kulubuka kufuma kuwushinakazhi nikufwa. Kulubuka kufuma kuwoma, makabi, niwuñazhi waheña. Bayibolu yahoshaña hadi Nzambi nawu: “Wakamununaña muchikasa cheyi, yuma yezhima yikweti wumi wayikutishaña nayuma yakeñawu.”—Masamu 145:16.
Amabwambu zhaNzambi akashakama haya nyaka. Wumi wahaya nyaka hichawana chawuseya chakahanayi Nzambi kudi ezhima akukwata wubwambu nindi. (Aroma 6:23) Toñozhokaku ochu wumi wahaya nyaka chiwunakulumbulukili!
Wakekala nampinji yakuzata yuma yayivulu. Hekwawu wakakeña kudiza chakwimba yisanzhi. Hekwawu wakakeña kuleña nyevulu hela kwikala mukwakusoña. Hekwawu wakakeña kudiza hadi anyama hela nyitondu. Hekwawu wakakeña kwenda nakumona mpata yadambuzhola niantu. Kwikala nawumi wahaya nyaka kwakaletesha yuma yezhimiyi kushikizhewa!
Wakekala nampinji yakukwata amabwambu amavulu. Kushakama haya nyaka chakaletesha kwilukilahu antu amakwawu anekali amabwambu zhaNzambi. Wakeluka yuma yelukishawu niyililu yawu yayiwahi, nawa akekala amabwambu zheyi. Wakayikeña, niwena nawa akakukeña. (1 Akorinda 13:8) Kwikala nawumi wahaya nyaka kukakwinka mpinji yakukwata wubwambu namuntu wudi wezhima hanu heseki! Chabadikahu, mukuhita kwa yaaka wubwambu weyi naYehova wukakolelañaku. Wunateli kwikala ibwambu daNzambi haya nyaka!