KUDIZA 17

Hakukolesha Wubwambu, Chiña Wikali Ibwambu

Wubwambu wemena hakukeña. Neyi wudiza yuma yayivulu hadi Yehova, kukeña kweyi kwakudi yena kukukolelaku. Kukeña kweyi kwakudi Nzambi chikwatwalekahu, mpwila yeyi yakukeña kumuzatila yikuswezhelaku. Ichi chikukuletesha kwikala kambanzhi kaYesu Kristu. (Matewu 28:19) Hakudibomba nachisaka chamuzañalu chawa Yinsahu zhaYehova, wunatweshi kwikala ibwambu daNzambi haya nyaka. Chumanyi chiwunateli kwila?

Watela kumwekesha kukeña kweyi kudi Nzambi kuhitala mukwovwahila nshimbi zhindi. “Kumukeña Nzambi yowu kwila mwatulezhañayi; mwatulezhañayi himwakalaku.”—1 Yowanu 5:3.

Zatishaku yuma yiwunakudiza. Yesu watili chishimu chinakulumbululichi. Muntu mukwamaana watuñilili itala dindi helola. Muntu wabula maana watuñilili itala dindi hawusekulula. Chezhili mpepela yeneni, itala diyatuñilili helola hidahumukiliku, ilaña itala diyatuñilili hawusekulula dahumukili buvu-u. Yesu hakuhosha nindi owu atiyaña kulezha kwindi nakwilamu adi neyi mukwamaana watuñilili helola. Ilaña owu atiyililaña kulezha kwindi nikwilamu nehi adi neyi muntu wabula maana watuñilili hawusekulula. Muntu wumu yodi yiwunakukeña kudifwana nindi?—Matewu 7:24-27.

Kudihana. Ichi chinakulumbulula nawu wudihani mukulomba kudi Yehova nakumulezha neyi wunakukeña kwila mwaya kukeña kwindi haya nyaka. Kwila mwaya kukeña kwa Nzambi chikumwekesha nawu wudi kambazhi kaYesu Kristu.—Matewu 11:29.

Chipapatishu. “Akupapatishi, wutooki kutooka kwakukufuma nyiloña yeyi chiwukutambika izhina dindi.”—Yililu 22:16.

Dibombimu chikupu mukukalakela Nzambi. “Yuma yezhima yimukwila yilenu namuchima wakukalakela Mwanta, bayi chakukalakela antu hohuku.”—Akolose 3:23.