Samwele 1
22 Ndavichi afumine kuze,+ achinyinyine kuwina wakusendeveka wakuAtulame.+ Omu vandumbwenyi navaze vakuzuvo yaise vosena vevwile mujimbu kana, vamukavile. 2 Kaha vatu vosena vaze vapwile nakuyanda, navaze vapwile namikuli, navaze vapwile nakulyonyinga, valikungulwilile kuli ikiye, ngocho apwile jino hikapitau kavo. Kaha apwile navatu 400 kuze.
3 Jino Ndavichi afumine kuze, ayile kuMijipe mulifuchi lyaMowave. Kaha ambile kuli mwangana waMowave+ ngwenyi: “Ngwitavise nguseze tata namama vatwame kuno kuli ove palanga nomu nangutachikiza vyuma mwangulingila Kalunga.” 4 Ngocho asezele visemi jenyi kuli mwangana waMowave, kaha vatwamine kuli ikiye hamakumbi osena aze Ndavichi apwilenga kuchihela chachikalu kuheta.+
5 Kutwala muze, kapolofweto Ngate+ ambile kuli Ndavichi ngwenyi: “Kanda nautwama lika kunoko. Fumako uyenga kulifuchi lyaYuta.”+ Ngocho Ndavichi afumine kuze, ayile mumusenge waHelete.
6 Jino Saulu evwile ngwavo Ndavichi navatu jenyi vanavawane. Halwola kana, Saulu apwile kuNgiveya.+ Atwamine mumutondo wamutamalishike, hachihela chakulunduka oku nakwate likunga lyenyi mulivoko. Kaha vangamba jenyi vosena vemanyine kuli ikiye jingulwishi. 7 Saulu ambile kuli vangamba jenyi vaze vamujingilikile ngwenyi: “Enu vaMbenjamine, ivwililenu. Uno mwanaYese+ mwamihana muvosena mande ajimbuto jamanona namande amivinyo nyi? Kutala muvosena mwamitongola mupwenga mutupitau twamakombakaji, natupitau twamakulukaji nyi?+ 8 Muvosena munangutwame punga mungufumbukile. Naumwe wauchi angulwezanga ngwenyi mwanami nalikase chivwasano namwanaYese.+ Naumwe wauchi nangwivwila keke nakungulweza ngwenyi mwanami nasowangiza ngamba yami anguswaminyine mangana angulukuke, nge omu chinapu oholyapwa.”
9 Jino Ndowenge+ kaEtome uze apwile hali vangamba jaSaulu ambile ngwenyi:+ “Ami ngwamonanga mwanaYese mweza kuNove kuli Ahimeleke mwanaAhituve.+ 10 Amwihwilangako kuli Yehova, kaha amuhananga navyakulya. Amuhananga nawa poko yamukwale yaNgolyate, uze kaFwilishite.”+ 11 Hahaze vene, mwangana Saulu atumine vatu vakasake kapilishitu Ahimeleke mwanaAhituve navapilishitu vakuzuvo yaise vosena vaze vapwile kuNove. Shikaho vosena vejile kuli mwangana.
12 Jino Saulu ambile ngwenyi: “Ove mwanaAhituve, ngwivwilile.” Kaha Ahimeleke ambile ngwenyi: “Hanjika, ove mwata wami.” 13 Saulu amwambile ngwenyi: “Ove namwanaYese munangutwamina ika punga mungufumbukile? Ika unamuhanyina vyakulya, napoko yamukwale, nakumwihwilako kuli Kalunga? Mutu kana angwimanyina nakole, kaha ali nakunguswaminyina mangana angulukuke, nge omu chinapu oholyapwa.” 14 Kaha Ahimeleke akumbulwile mwangana ngwenyi: “Iya hali vangamba jove ashishika ngana mwaNdavichi?+ Ove mwangana, Ndavichi apwa isowenu,+ apwa mukulwane wavaka-kukulama, kaha nawa vamuvumbika chikuma muzuvo yove.+ 15 Uno likumbi lyalelo likiko lyakulivanga ngunamwihwilako kuli Kalunga tahi?+ Ami kangweshi kuhasa kukufumbukilako. Kanda nauhana mulonga ami ngamba yove navava vakuzuvo yatatako, mwomwo ami ngamba yove kangwatachikijile chuma numba chimwe hachihande kanechiko.”+
16 Oloze mwangana ambile ngwenyi: “Ove Ahimeleke, ove navaze vakuzuvo yaiso+ muvosena kuvanga mufwenga.”+ 17 Ngocho mwangana alwezele vaka-kumulama* vaze vamujingilikile ngwenyi: “Alumukenu mujihe vapilishitu jaYehova, mwomwo vali nakukundwiza Ndavichi. Vatachikizanga ngwavo Ndavichi ali nakunguchinwojoka, oloze vakiko kungulweza pimbi.” Chipwe ngocho, vangamba jenyi kavasakile kwolola mavoko avo vajihe vapilishitu jaYehovako. 18 Kaha mwangana ambile kuli Ndowenge+ ngwenyi: “Alumuka ujihe vapilishitu.” Hahaze vene uze kaEtome+ Ndowenge alumukile, ajihile vapilishitu. Halikumbi kana ajihile malunga 85 vaze vavwalile mapunu.+ 19 Ayile nawa napoko yamukwale muNove,+ nganda yavapilishitu, kaha ajihile malunga namapwevo, vanyike navakemba, vangombe navimbulu, namikoko.
20 Oloze Aviyatale+ mwanaAhimeleke, Ahimeleke mwanaAhituve achinyinyine kuli Ndavichi. 21 Aviyatale alwezele Ndavichi ngwenyi: “Saulu najihi vapilishitu jaYehova.” 22 Kaha Ndavichi ambile kuli Aviyatale ngwenyi: “Omu ngwamwene Ndowenge kaEtome ali kuze halikumbi lize,+ ngwatachikijile ngwami mwaya nakulweza Saulu. Ami yami ngunajihisa vatu vosena* vamuzuvo yaiso. 23 Ove twama nayami kuno. Kanda nawivwa womako, mwomwo weshowo mweza nakukujiha mwajiha nayami nawa. Ami nangukukinga.”+