Samwele 1
16 Jino Yehova ambile kuli Samwele ngwenyi: “Naulishonanga hali Saulu+ palanga nakumwaka uka, okunyi ami ngunamukane lyehi kupwa mwangana wavaIsalele?+ Haka maji+ mulumbinga lwove mangana uyenga. Nangukutuma kuli Yese+ wakuMbetelema mwomwo havana venyi ngunasakulaho umwe apwenga mwangana wami.”+ 2 Oloze Samwele ambile ngwenyi: “Nanguya ngachilihize? Nge Saulu mwevwako mwangujiha.”+ Yehova amwambile ngwenyi: “Mbata mwanangombe wachihwevo umwe uyenga nenyi, kaha ukamba ngwove, ‘Nguneza nakuhana chimuna wakuvatula kuli Yehova.’ 3 Ukasanyika Yese akeze kuze naukahanyina chimuna wakuvatula, kaha nangukakulweza vyuma mukalinga. Ukanguwavishila mutu uze nangukakulweza.”+
4 Samwele alingile vyuma amulwezele Yehova. Omu ahetele kuMbetelema,+ vakulwane janganda valichikiminyine hakulihumangana nenyi. Vambile ngwavo: “Kwahola?” 5 Ikiye avambile ngwenyi: “Kwahola. Nguneza nakuhana chimuna wakuvatula kuli Yehova. Lijilikenu, tuyenu hamwe kuchihela kuze nanguhanyina chimuna wakuvatula.” Kaha ajilikile Yese navana venyi, kufumaho avalwezele vayenga kuze ayile nakuhanyina chimuna wakuvatula. 6 Omu vahetele, amwene Elyave,+ ngocho alyambile mumuchima wenyi ngwenyi: “Ou nemana kumeso aYehova ikiye vene ou wenyi awavisa.” 7 Oloze Yehova ambile kuli Samwele ngwenyi: “Kanda nautala hakuwaha chenyi nahakusuhwa chenyiko,+ mwomwo ngunamukane. Yehova keshi kumona nge omu veji kumonanga vatuko. Mwomwo vatu veji kutalanga omu asoloka mutu, oloze Yehova eji kutalanga mumuchima.”+ 8 Kaha Yese asanyikile Avinatave,+ amuhichishile kumeso aSamwele. Oloze Samwele ambile ngwenyi: “Nayou nawa Yehova kamusakwileko.” 9 Kufumaho, Yese anehele Shama.+ Oloze Samwele ambile ngwenyi: “Nayou nawa Yehova kamusakwileko.” 10 Yese ahichishile vana venyi vamalunga 7 kumeso aSamwele. Oloze Samwele ambile kuli Yese ngwenyi: “Vosena ava Yehova kavasakwileko.”
11 Jino Samwele ambile kuli Yese ngwenyi: “Ava vakiko kaha vana vove vamalunga nyi?” Ikiye amukumbulwile ngwenyi: “Nduma, kunasale wakanyike,+ ali nakufunga mikoko.”+ Kaha Samwele ambile kuli Yese ngwenyi: “Tuma vatu vakamusake. Kuvanga ikiye neza numba tutwame nakulya vyakulya.” 12 Ngocho atumine vatu, vakamusakile. Jino ou mukweze apwile uchila, wamwaza. Meso enyi nawa apwile amwaza.+ Kaha Yehova ambile kuli Samwele ngwenyi: “Katuka, muwavise, mwomwo ou ikiye ngunasakula.”+ 13 Ngocho Samwele ambachile lumbinga lwamaji,+ amuwavishile hameso avandumbwenyi. Kaha shipilitu yaYehova yahanyine ngolo Ndavichi kufuma vene halikumbi lize.+ Kufumaho, Samwele akatukile nakuya kuLama.+
14 Jino shipilitu yaYehova yamufumine Saulu,+ kaha shipilitu yayipi yakufuma kuli Yehova yaputukile kumuyanjisa.+ 15 Vangamba jenyi vamwambile ngwavo: “Tala, shipilitu yayipi yakufuma kuli Kalunga yili nakukuyanjisa. 16 Ove mwata wetu, tulweze etu vangamba jove tuyenga nakutonda mutu uze atachikiza kanawa kwimba kalyalya.+ Kachi nge shipilitu yayipi yakufuma kuli Kalunga yineza hali ove, kaha mwakwimbila kalyalya mangana wivwengako kanawa.” 17 Ngocho Saulu ambile kuli vangamba jenyi ngwenyi: “Yenunga nakutonda mutu uze eji kwimbanga kanawa kalyalya mumunehe kuno.”
18 Jino muka-kumukafwa umwe ambile ngwenyi: “Ami ngwatachikizako mwanaYese umwe wakuMbetelema uze atachikiza kanawa kwimba kalyalya.+ Apwa muka-kwasa jita wakumika, wangolo. Eji kuhanjikanga kanawa, wamwaza,+ kaha nawa Yehova ali naikiye.”+ 19 Ngocho Saulu atumine valuwa kuli Yese, amwambile ngwenyi: “Ngutumine mwanove Ndavichi uze ali nakufunga mikoko.”+ 20 Kaha Yese ambachile mbolo, natuku yavinyo, namwanapembe, avihakile hachimbulu. Avihanyine mwanenyi Ndavichi ayenga navyo kuli Saulu. 21 Ndavichi ahetele kuli Saulu, kaha aputukile kumuzachila.+ Saulu amuzangile chikuma, ngocho amutongwele kupwa muka-kumumbachila vitwa vyajita. 22 Kutwala muze, Saulu atumine mazu kuli Yese ngwenyi: “Ndavichi atwame lika kuno mangana anguzachilenga, mwomwo ngunamuzange chikuma.” 23 Omu shipilitu yayipi yakufuma kuli Kalunga yejilenga hali Saulu, Ndavichi amwimbililenga kalyalya, ngocho Saulu evwilenga kumuchima to, nakwivwako jino kanawa. Kaha shipilitu yayipi yamufuminenga.+