Samwele 1
14 Likumbi limwe, Yonatane+ mwanaSaulu ambile kuli muka-kumukafwa uze amumbachililenga vitwa vyajita ngwenyi: “Tuzauke tuyenga musali kuchilombo chavaFwilishite.” Oloze kashikile iseko. 2 Saulu atwaminenga kusembwa yaNgiveya+ mwishi yamuloma muMingilone. Kaha apwile hamwe namalunga kafwe 600.+ 3 (Ahiya avwalilenga lipunu.+ Ahiya+ apwile mwanaAhituve, Ahituve ndumbwaIkavote,+ Ikavote mwanaFwinehase,+ Fwinehase mwanakapilishitu kaYehova Eli+ wakuShilo.)+ Vatu kavatachikijile ngwavo Yonatane nafumuhoko. 4 Jino muuhichilo muze asakile Yonatane kuhita mangana ayenga musali kuchilombo chavaFwilishite, kuluhachi lumwe kwapwile lilolwa lize lyalifwanyine nalizo, kaha kuluhachi lukwavo nawa kwapwile lilolwa lyeka lyalifwanyine nalizo. Limwe valivulukilenga ngwavo Mbozeze, kaha likwavo ngwavo Sene. 5 Lilolwa limwe lyapwile nge panda kumutamba wakunote chakutala kuMikimashe, kaha likwavo lyapwile kusulo chakutala kuNgeva.+
6 Ngocho Yonatane ambile kuli uze muka-kumumbachila vitwa vyajita ngwenyi: “Tuzauke tuyenga musali kuchilombo chavava vilima,+ pamo Yehova mwatukafwa. Mwomwo kakweshi chuma nachihonesa Yehova kutulwilako, numba tupwa tuvavavulu chipwe tuvavandende.”+ 7 Uze muka-kumumbachila vitwa vyajita amwambile ngwenyi: “Linga mweshomwo unayi muchima wove. Yako kweshokwo unasake kuya, ami nangukukavangiza kweshokwo naukutwala muchima wove.” 8 Ngocho Yonatane ambile ngwenyi: “Natuzauka tuyenga kuli ava malunga, kahomu natuheta kuze natulisolola kuli vakiko. 9 Kachi nge navatulweza ngwavo, ‘Imanenu oho muli, yetwovo natwiza,’ kaha natwimana, katweshi kukanduka kuli vakikoko. 10 Oloze nge navamba ngwavo, ‘Kandukenu kuno kuli etu,’ kaha natukanduka, mwomwo Yehova mwavahana mumavoko etu. Echi chikiko nachipwa chinjikizo chetu.”+
11 Ngocho vosena vavali valisolwele kuvatu vamuchilombo chavaFwilishite. Kaha vaFwilishite vambile ngwavo: “Talenu vaHepeleu vali nakulovoka jino mumena muze vaswamanga.”+ 12 Malunga vamuchilombo kana vambile kuli Yonatane nakuli muka-kumumbachila vitwa vyajita ngwavo: “Kandukenu kuno kuli etu, kaha namumona omu natumilinga.”+ Hahaze vene Yonatane ambile kuli uze muka-kumumbachila vitwa vyajita ngwenyi: “Ngukavangize, mwomwo Yehova mwahana vatu kana mumavoko avaIsalele.”+ 13 Jino Yonatane akalavile nakukanduka, kaha uze muka-kumumbachila vitwa vyajita amukavangijile munyima. Ngocho Yonatane aputukile kulindumuna vaFwilishite, kaha uze muka-kumumbachila vitwa vyajita amukavilenga munyima nakuvajiha. 14 Yonatane nauze muka-kumumbachila vitwa vyajita vajihile malunga 20 halwola kanelu lwakulivanga valukukile vaFwilishite. Vavajihilile mutunda yayindende kaha yakuteseka kafwe muchimbwa chawande.
15 Ngocho vatu vosena muze muchilombo, navaze vapwile muchilombo chamuchipapa vevwile woma chikuma. Vaka-kupupa+ navakiko valizuzukilile nawoma. Mavu andendele, kaha Kalunga anehele chiwomawoma muli vatu. 16 Vaka-kulama vaSaulu vaze vapwile muNgiveya,+ nganda yavaMbenjamine vevwile liuya lili nakutanda kumitamba yosena.+
17 Jino Saulu ambile kuli vatu apwile navo ngwenyi: “Lavenu vatu mangana tutachikize iya nafumuho.” Omu valavile, vawanyine Yonatane namuka-kumumbachila vitwa vyajita vauchiho. 18 Ngocho Saulu ambile kuli Ahiya+ ngwenyi: “Neha Chikasha chaKalunga wamuchano kuno.” (Mwomwo halwola kana* Chikasha chaKalunga wamuchano chapwile kuli vaIsalele.) 19 Shimbu Saulu apwile nakuhanjika nakapilishitu, liuya muchilombo chavaFwilishite lyatohwele chikuma. Kaha Saulu ambile kuli kapilishitu ngwenyi: “Echa ovyo uli nakulinga.”* 20 Ngocho Saulu navatu vosena vaze apwile navo valikungulwile, vayile kujita. Kaha vakawanyine vaFwilishite vali nakulijiha mwavomwavo najipoko jamikwale. Chimbalanganyi chatohwele chikuma. 21 Kaha vaHepeleu vaze vapwile muchilombo chavaFwilishite nakuvakundwiza, vakindulukile jino kuli vaIsalele vaze vapwile naSaulu naYonatane. 22 Malunga vavaIsalele vosena vaze vaswamine+ mungalila yajipili yaEfwalime vevwile ngwavo vaFwilishite vanachinyi, ngocho navakiko valimbilile hamukana wavaka-jita nakuhangasana vaFwilishite. 23 Jino Yehova alwilile vaIsalele halikumbi lize,+ kaha vaIsalele valwile jita palanga nakuMbete-avene.+
24 Chipwe ngocho, malunga vavaIsalele vazeyele chikuma halikumbi lize mwomwo Saulu ashingile vatu lushingo ngwenyi: “Weshowo mwalya vyakulya* shimbu kanda likumbi litoke, kaha nawa shimbu kanda nguchilinge sambanjinga kuli vaka-kole jami, mutu kana apwenga wakwangula.” Ngocho naumwe wauchi alile vyakulya.+
25 Jino vatu vosena* vayile mumusenge, kaha vawanyine uchi hamavu. 26 Vauwanyine uli nakusotoka muze mumusenge, oloze naumwe wauchi aulile, mwomwo vevwile woma luze lushingo. 27 Oloze Yonatane kevwileko omu ise ashingile vatu lushingo,+ ngocho atupikile songo yambwechi yize yapwile mulivoko lyenyi muze muuchi. Kahomu alileko, kumeso enyi kwataunukile. 28 Jino mutu umwe amwambile ngwenyi: “Iso ashinganga vatu ngwenyi, ‘Weshowo mwalya vyakulya likumbi lyalelo apwenga wakwangula.’+ Shikaho vatu vanazeyela ngana.” 29 Oloze Yonatane ambile ngwenyi: “Tata nanehe ukalu* waunene mulifuchi. Talenu omu kunataunuka kumeso ami mwomwo yakumakilako tuuchi. 30 Kachi nge vatu valyanga kuvyuma vapukulanga kuli vaka-kole javo likumbi lyalelo, kachi chinawahe chikuma.+ Mwomwo kachi tunajihi vaFwilishite vavavulu.”
31 Halikumbi kana, vajihile vaFwilishite kufuma kuMikimashe palanga nakuAiyalone.+ Kaha vatu vazeyele chikuma. 32 Ngocho valupukilile havyuma vyakupukula, vambachileho mikoko, navangombe, navana vavangombe. Vavajihilile hamavu, kaha valile nyama namanyinga ayo.+ 33 Kaha Saulu vamulwezele ngwavo: “Tala! Vatu vali nakulinga shili kuli Yehova hakulya nyama namanyinga ayo.”+ Ikiye ambile ngwenyi: “Kamwasolwele lufweleloko. Shindumunenu lilolwa lyalinene mulinehe kuno oholyapwa vene ngana.” 34 Kufumaho, ambile ngwenyi: “Limwangenu muyenga kuli vatu muvalweze ngwenu, ‘Mutu himutu anehe ngombe yenyi wakuji, namukoko wenyi, muvajihile kuno mulyenga. Kanda namulinga shili kuli Yehova hakulya nyama namanyinga ayoko.’”+ Ngocho mutu himutu anehele ngombe yenyi wakuji haufuku uze, amujihilile kuze. 35 Kaha Saulu atungilile Yehova lijiko lyakulumbila.+ Eli likiko lijiko lyakulumbila lyakulivanga lize Saulu atungilile Yehova.
36 Kutwala muze, Saulu ambile ngwenyi: “Tushikumukenu tuvalukuke vaFwilishite naufuku nakupupa vyuma vyavo palanga nomu nakucha. Katweshi kusezaho mutu numba umweko, vosena natuvajiha.” Kaha vatu vamwambile ngwavo: “Linga mweshomwo unamono ngwove mwamwaza.” Jino kapilishitu ambile ngwenyi: “Tuvangilenu kwihula Kalunga wamuchano.”+ 37 Kaha Saulu ehwile Kalunga ngwenyi: “Uno nguhangasane vaFwilishite tahi?+ Kutala muvahana mumavoko avaIsalele nyi?” Oloze Kalunga kamukumbulwileko halikumbi lize. 38 Ngocho Saulu ambile ngwenyi: “Enu vamyata javatu muvosena, twayenu kuno mangana tuwane shili vanalingi vatu likumbi lyalelo. 39 Omu ayoya Yehova tu, ou apululwile vaIsalele, numba nge mwanami Yonatane ikiye nalingi shili kana, kaha afwenga.” Oloze naumwe wauchi amukumbulwile. 40 Jino Saulu ambile kuli vaIsalele vosena ngwenyi: “Likungulwilenu kusali yimwe, ami namwanami Yonatane nawa natupwa kusali yimwe.” Ngocho vatu vambile kuli Saulu ngwavo: “Linga mweshomwo unamono ngwove mwamwaza.”
41 Saulu ambile jino kuli Yehova ngwenyi: “Ove Kalunga kaIsalele, tukumbulule kuhichila muTumime.”+ Ngocho vasakwileho Yonatane naSaulu, kaha vatu vasambile. 42 Kufumaho, Saulu ambile ngwenyi: “Zachisenu tutachikijilo+ mangana tuwane nge yami ngunalingi shili nyi mwanami Yonatane.” Kaha vasakwileho Yonatane. 43 Shikaho Saulu ambile kuli Yonatane ngwenyi: “Ngulweze, vyuma muka unalingi?” Yonatane amulwezele ngwenyi: “Ngwamakilanga kaha tuuchi twapwanga kusongo yambwechi yami.+ Yami uno, ngunalisuula ngufwenga.”
44 Saulu ambile ngwenyi: “Ove Yonatane, Kalunga anguzangamise mwamunene kachi nge kaweshi kufwako.”+ 45 Oloze vatu vambile kuli Saulu ngwavo: “Kutala chinapu chakutamo Yonatane, ou nalwili+ vaIsalele afwenga? Nduma, kacheshi kutamoko. Omu ayoya Yehova tu, numba lukambu lumwe lwakumutwe wenyi kalweshi kuholokela hamavuko. Mwomwo Kalunga ikiye amukafwanga numba afungulule vaka-kole likumbi lyalelo.”+ Ngocho vatu vapululwile* Yonatane, kaha kafwileko.
46 Shikaho Saulu alitwaminyine kuhangasana vaFwilishite, kaha vaFwilishite vayile kungalila yavo.
47 Jino Saulu azamishile wangana wenyi hali vaIsalele. Alwilenga jita navaka-kole jenyi kumitamba yosena. Alwile navaMowave,+ navaAmone,+ navaEtome,+ navamyangana vakuZova,+ navaFwilishite.+ Kaha afungulwilenga kweshokwo ayilenga. 48 Alwilenga jita mwaungazule nakufungulula vaAmaleke,+ kaha apululwile vaIsalele mumavoko avatu vaze vapupilenga vyuma vyavo.
49 Jino vana vaSaulu vamalunga vapwile Yonatane, naIshivi, naMalaki-shuwa.+ Apwile nawa navana vamapwevo vavali. Wamukulwane apwile Melave,+ kaha wakanyike apwile Mikale.+ 50 Pwevo lyaSaulu apwile ikiye Ahinowame, mwanaAhimaze. Kapitau kamaswalale jenyi apwile ikiye Avanele,+ mwanaNele. Avanele apwile ndumbwaise yaSaulu. 51 Kishe+ ikiye ise yaSaulu, kaha Nele,+ ise yaAvanele apwile mwanaAviyele.
52 Hamakumbi osena ayulilenga Saulu,+ alwilenga jijita jakwivwisa woma navaFwilishite. Saulu ambachilenga weshowo lunga amwenenga ngwenyi wangolo, wakumika, amuhakilenga hamukana wamaswalale jenyi.+