Lushimbi lwamuchivali

4 “Enu vaIsalele, ivwililenu jindongi namazu akuyula nangumilweza mukavangize, mangana muyoyenga,+ mukahete lifuchi lize mwamihana Yehova Kalunga kavakakuluka jenu. 2 Kanda namukahakila kumazu awa nangumilweza chipwe kufumisako,+ mangana mulamenga jishimbi jaYehova Kalunga kenu eji nangumihana.

3 “Mwamwene vyuma alingile Yehova mwomwo yaMbale wakuPeyole. Yehova Kalunga kenu anongesele malunga vosena muli enu vaze valemesele Mbale wakuPeyole.+ 4 Oloze enu munakakachila kuli Yehova Kalunga kenu, muvosena muvavatonyi nakulikumbi lyalelo. 5 Talenu! Ngunamilweze mazu akuyula najindongi,+ nge omu nangulweze Yehova Kalunga kami, mangana mukavilamenga mulifuchi lize namutambula kupwa luheto lwenu. 6 Mukavikavangizenga,+ mwomwo echi nachikamisolola nge mukwechi mangana,+ muvakunangakana+ kumeso avatu vaze navakevwa jindongi josena eji. Kaha navakamba ngwavo, ‘Chamwenemwene muyachi kanou waunene ukwechi vatu vamangana, vakunangakana.’+ 7 Mwomwo muyachi muka waunene ukwechi tulunga vali hakamwihi nganomu apwa Yehova Kalunga ketu hakamwihi nayetu omu natumusanyika?+ 8 Kaha muyachi muka waunene ukwechi jindongi jakwoloka namazu akuyula nge Jishimbi eji nangumihana likumbi lyalelo?+

9 “Zangamenu, lilamenu chikuma enu vavene,* kuchina namukavulyama vyuma munamono nameso enu, kuchina navikafuma mumichima yenu hamakumbi osena namuyoyanga. Vyuma kana vinangulenunga nawa vana venu navazukulu jenu.+ 10 Halikumbi lize mwemanyine kumeso aYehova Kalunga kenu kuHoleve, Yehova ambile kuli ami ngwenyi, ‘Ngukungulwile vatu vosena vevwenga mazu ami,+ mangana valinangule kungwivwa woma+ makumbi osena aze navayoyanga hamavu, vawanangulenga nawa vana vavo.’+

11 “Ngocho mwejile kwakamwihi, mwemanyine kushina yapili, kaha yize pili yapwile nakwepuka kakahya mbwe namwilu.* Kaha kwapwile milima wi nalivwi lilava.+ 12 Yehova aputukile kuhanjika nayenu mukakahya.+ Mwevwile mazu, oloze kamwamwene omu afwanako,+ lizu kaha mwevwile.+ 13 Amishikile lushiko luze amilwezele ngwenyi mululamenga,+ jikiko Jishimbi Likumi.*+ Kufumaho awasonekele hamalolwa avali akuya muuhanda.+ 14 Halwola luze Yehova ambile kuli ami ngumilweze jindongi namazu akuyula aze namukalama mulifuchi lize namukatambula kupwa luheto lwenu.

15 “Shikaho, lilamenu chikuma enu vavene,* mwomwo kamwamumwene omu afwana halikumbi lize ahanjikile Yehova kuli enuko kuHoleve mukakahya. 16 Lilamenu kuchina namukalyenyeka enu vavene hakulitengela likombelo lyakufwana chuma chimwe, chakufwana lunga chipwe pwevo,+ 17 chipwe chakufwana kanyama wakutambuka hamavu, chipwe chakufwana kajila wakutuka mwilu,+ 18 chipwe chakufwana chuma chakuhalala hamavu, chipwe chakufwana ishi wamumeya.+ 19 Kahomu namukandula meso enu mwilu nakumona likumbi, nakakweji, navatanganyika, mayongomena amwilu osena, kanda navikamilingisa mukalifukule kuvikiko nakuvizachilako.+ Yehova Kalunga kenu navihane kuvatu vosena vahamavu. 20 Oloze enu yenu ambachile Yehova nakumilovola mulilungu lyakakahya, muEjipitu mangana mupwenga muluheto lwenyi*+ nganomu munapu likumbi lyalelo.

21 “Yehova angukwachilile matoto mwomwo yayenu,+ kaha alishingile ngwenyi kangweshi kukazauka Yotau chipwe kwingila mulifuchi lyamwaza lize mwamihana Yehova Kalunga kenu kupwa uswana wenuko.+ 22 Ami nangufwila mulifuchi lino. Kangweshi kuzauka Yotauko,+ oloze enu namuzauka nakuheta lifuchi kaneli lyamwaza. 23 Zangamenu kuchina namukavulyama lushiko amishikile Yehova Kalunga kenu.+ Kanda namukalitengela likombelo lyakufwana vyuma vyosena vize namikanyisa Yehova Kalunga kenuko.+ 24 Mwomwo Yehova Kalunga kenu apwa kakahya kakunongesa,+ hiKalunga uze asaka mulihane kuli ikiye namichima yenu yosena.+

25 “Omu namukalinga himunashimbula lyehi nakupwa navana navazukulu, kachi nge namukalipihisa enu vavene hakulitengela makombelo+ nakulinga vyuma vyavipi kumeso aYehova Kalunga kenu mangana mumwivwise kupihya,+ 26 ngunalishingi melu namavu kupwa unjiho kuli enu likumbi lyalelo ngwami, namukafwa washi mulifuchi lize namutambula mulihete omu namuzauka Yotau. Kamweshi kukashimbulamoko, namukanonga.+ 27 Yehova mwakamimwangila muli vatu veka naveka,+ ngocho vavandende kaha hali enu navakayovoka+ muli vaka-mafuchi muze mwakamimwangila Yehova. 28 Kaha namukazachila tulunga vamitondo, navava vamalolwa vakutenga kumavoko avatu,+ tulunga vaze kaveshi kumona chipwe kwivwa chipwe kulya chipwe kuhumbikako.

29 “Kachi nge namukasakasaka Yehova Kalunga kenu kuze namukaya, kachi nge namukamutondatonda namichima yenu yosena namyono*+ yenu yosena, kaha namukamuwana.+ 30 Omu navikamisolokela vyumevi kumakumbi akulutwe nakupwa jino muukalu waunene, namukakinduluka kuli Yehova Kalunga kenu, nakwivwilila mulizu lyenyi.+ 31 Mwomwo Yehova Kalunga kenu hiKalunga wakeke.+ Keshi kukamimbilako chipwe kuminongesa chipwe kuvulyama lushiko luze ashikile vakakuluka jenuko.+

32 “Ihulenu vyuma vyalingiwile kumakumbi akunyima shimbu mwapwile enu muvauchiko, kulwola luze Kalunga atengele mutu hano hamavu. Hehwojolenu kufuma kusongo yamavu swi nakusongo yikwavo. Kutala kwasolokaho lyehi chuma chachinene chakufwana ngana nyi? Uno kuli mutu umwe evwaho lyehi chuma kana tahi?+ 33 Uno kwatwama vatu veka vevwaho lyehi lizu lyaKalunga nalihanjika mukakahya nganomu mwalivwa lyehi enu nakuyoya lika nyi?+ 34 Kutala Kalunga asokolaho lyehi vaka-lifuchi limwe muli vaka-lifuchi likwavo kuzachisa vipupu,* navinjikizo, navyuma vyakukomwesa,+ najita,+ nalivoko lyenyi lyaundume,+ lyangolo, navilinga vyakwivwisa woma+ nganomu mwamwene nameso enu omu amisokwele Yehova Kalunga kenu muEjipitu tahi? 35 Enu vanamimwenesa vyuma kanevi mangana mutachikize ngwenu Yehova apwa Kalunga wamuchano,+ kakweshi wekako shina ikiye kaha.+ 36 Amilingishile mwivwenga lizu lyenyi mwilu mangana amyolole. Hano hamavu amilingishile mumone kakahya kenyi kakanene, kaha mwevwile mazu enyi mukakahya.+

37 “Hakuwana nge Kalunga azangile vakakuluka jenu, kaha asakwile vaka-tanga* yavo vaze vejile munyima yavo,+ shikaho avalowele muEjipitu nangolo jenyi jajinene oku navashishika nameso enyi. 38 Ahangile vaka-mafuchi vakumihambakanenu kuvula nangolo, mangana amingisemo nakumihana lifuchi lyavo kupwa uswana wenu nge omu chili oholili.+ 39 Ngocho tachikizenu chumechi likumbi lyalelo, nakuchilama mumichima yenu ngwenu, Yehova apwa Kalunga wamuchano mwilu nahano hamavu,+ kaha kakweshi wekako.+ 40 Lamenunga jindongi najishimbi jenyi nangumihana likumbi lyalelo, mangana vyuma vimiwahilenga, navana venu vaze navakeza hanyima yenu, mangana mukashimbule mulifuchi lize mwamihana Yehova Kalunga kenu.”+

41 Jino Mose asakwile jinganda jitatu kumututuko waYeliko.+ 42 Kachi nge mutu keshi nachijindo namukwavoko, kaha himwamujiha chakuzeneka kuchisakula,+ akachinyine kunganda yimwe hajinganda kaneji mangana ayoyenga.+ 43 Nganda yaMbezele+ yize yapwila hachihela chakusalama mupambo yikiko yakuchinyina vaLuvene, nganda yaLamote+ yize yapwila kuNgileyate yikiko yakuchinyina vaNgate, nganda yaNgolane+ yize yapwila kuMbashane yikiko yakuchinyina vaManase.+

44 Eji jikiko Jishimbi+ jize Mose ahanyine vaIsalele. 45 Awa akiko mazu akwanukisa, namazu akuyula, najindongi jize Mose ahanyine vaIsalele omu valovokele muEjipitu.+ 46 Avahanyinyinevyo mungalila yaYotau muchinema chalitalasana naMbete-peyole,+ mulifuchi lyamwangana Shihone wavaAmole uze atwaminenga muHeshevone,+ uze nawa vafungulwile kuli Mose navaIsalele hakulovoka muEjipitu.+ 47 Kaha vahetele lifuchi lyenyi, nalifuchi lyaOnge mwangana+ waMbashane. Ava vamyangana vavali vavaAmole vatwaminenga kumututuko waYotau. 48 Ngalila yavo yafumine kuAlowele,+ kukulo yaChinema chaAlanone* swi nakuPili yaShiyone chipwe ngwavo Helemone,+ 49 nalifuchi lyaAlava lyosena mungalila yakumututuko waYotau swi nakuKalungalwiji waAlava,* kumingulunga yaPishinga.+