Lushimbi lwamuchivali
20 “Omu namukaya nakulwa jita navaka-kole jenu, kachi nge namukamona ngwenu vali natuvalu vavavulu, namatemba amavulu, namaswalale vavavulu kumihambakanenu, kanda namukavevwa womako mwomwo Yehova Kalunga kenu uze amilowele mulifuchi lyaEjipitu ali nayenu.+ 2 Omu namukalinga hinamusaka kulwa jita, kapilishitu akapandame kuvatu nakuhanjika navo.+ 3 Akavalweze ngwenyi, ‘Ivwililenu enu vaIsalele. Kalinwomu muputuke kulwa jita navaka-kole jenu. Kanda namwivwa woma, chipwe kulizuzukila, chipwe kuhomba, chipwe kulichikimina mwomwo yavakikoko. 4 Mwomwo Yehova Kalunga kenu ali kulutwe lwenu mangana amyashile jita nakumilwila kuli vaka-kole jenu.’+
5 “Kaha vakulwane nawa vakehule vatu ngwavo, ‘Iya natungu zuvo yayihya yize kanda asokolole? Akinduluke kuzuvo yenyi, kuchina pamo mwakafwa kujita kaha mutu weka mwakayisokolola. 6 Iya nawa nalimi wande wenyi wamivinyo uze kanda ahenga mihako yawo? Akinduluke kuzuvo yenyi kuchina pamo mwakafwa kujita, kaha mutu weka mwakawaha. 7 Iya nahuhu lyehi pwevo uze kanda ambate? Akinduluke kuzuvo yenyi+ kuchina pamo mwakafwa kujita, kaha mutu weka mwakamumbata.’ 8 Kaha vakulwane vakahulise nawa vatu ngwavo, ‘Iya nevu woma nakulizuzukila?+ Akinduluke kuzuvo yenyi kuchina mwevwisa vandumbwenyi woma nge omu nevu ikiye.’*+ 9 Omu vakulwane navakakumisa kuhanjika navatu, vakatongole tupitau vajita mangana vakatwaminyine maswalale.
10 “Omu namukapandama kunganda yize namukalwa nayo jita, kavilikenu mazu akuneha kuunda navakiko.+ 11 Kachi nge navaketavila mazu enu nakumisokolwela vikolo vyanganda yavo, kaha vatu vosena vakapwe vandungo jenu vakumizachilanga.+ 12 Oloze nge navakakana mazu enu akuneha kuunda nakusaka kulwa nenu jita, kaha kayihakenu muchingombela. 13 Yehova Kalunga kenu mwakayihana mumavoko enu, ngocho kajihenumo malunga vosena najipoko jamikwale. 14 Oloze kakwatenu mapwevo, navana, navimuna, kaha kapupenu vyuma vyosena vyamunganda kana.+ Kalyenu vyuma vyakupukula vyavaka-kole jenu vaze namihane Yehova Kalunga kenu.+
15 “Mukalinga ngocho kujinganda josena jize jili kwakusuku nayenu, jize kajeshi mumafuchi aze ali mwakamwihi nayenuko. 16 Oloze mujinganda eji jili mwakamwihi, eji mwamihana Yehova Kalunga kenu kupwa uswana wenu, kanda namukasezamo mutu numba umweko.+ 17 Kanongesenu vosena ndolokoto, vaHete, navaAmole, navaKanane, navaPeliji, navaHivi, navaYevuse+ nge muze namilweze Yehova Kalunga kenu, 18 kuchina navakaminangula vilinga vyavo vyaunyengwe vyosena vize vanalinginga kutulunga twavo, nakumilingisa mulinge shili kuli Yehova Kalunga kenu.+
19 “Omu namukahaka nganda muchingombela nakulwa nayo jita hamakumbi amavulu nakuyitambula, kanda namukateta mitondo yize yilimo nakuyenyekako. Kalyenu tuhu mihako yamitondo kana, kanda namukayitetako.+ Ikaze namukahakila mitondo yamuchipapa muchingombela kwijiva nge mutu? 20 Mukateta kaha mitondo yize munamono ngwenu kayatwama namihako yakulyako. Mukayiteta nakuyishita chipato kunganda yize namukalwa nayo jita, palanga nomu namukayilalisa.