Lushimbi lwamuchivali
18 “Vapilishitu vavaLevi, muyachi wavaLevi wosena, kaveshi kukapwa nachazano chipwe uswana muli vaIsaleleko. Navakalyanga mawana aYehova akwocha hakakahya, aze apwa chazano chenyi.+ 2 Kanda vakapwa nauswana muli vandumbwavoko. Yehova ikiye uswana wavo nge muze avalwezele.
3 “Evi vikiko navakatambulanga vapilishitu kuvatu kupwa chazano chavo: Weshowo mwakahana chimuna wakuvatula, numba apwa ngombe, chipwe mukoko, akahane vapilishitu mavoko, najimbangi, nalufu. 4 Mukavahana nawa manona akulivanga kujimbuto jenu, navinyo vyenu vyakulivanga, namaji enu akulivanga, namangona akulivanga kuteula kuvimuna jenu.+ 5 Yehova Kalunga kenu nasakula vaLevi navana vavo hamiyachi yenu yosena mangana vazatenga mulijina lyaYehova shimbu yosena.+
6 “Kachi nge kaLevi umwe mwakafuma munganda muze natwamenga muIsalele+ nakuya kuchihela chize mwakasakula Yehova,*+ 7 kaha akazachile tuhu kuze mulijina lyaYehova Kalunga kenyi, nge muze veji kulinganga vandumbwenyi vaLevi vaze veji kwimananga kumeso aYehova.+ 8 Mwakatambulanga chazano chavyakulya chakweseka hamwe navakwavo,+ numba tuhu ali najimbongo jize nawane hakulanjisa luheto lwavakakuluka jenyi.
9 “Omu namwingila mulifuchi lize mwamihana Yehova Kalunga kenu, kanda namukalondezeza vyuma vyaunyengwe vize veji kulinganga vaka-mafuchi azeko.+ 10 Muli enu kanda mukapwa mutu mwakahichisa mwanenyi walunga chipwe wapwevo mukakahyako,+ chipwe muka-kutaha ngombo,+ chipwe muka-kulinga visava,+ chipwe muka-kutahisa vitaho,+ chipwe muka-kupanda,+ 11 chipwe muka-kuhelama vakwavo, chipwe muka-kutahisa vashipilitu,+ chipwe muka-kulweza vyuma vyakulutwe,+ chipwe muka-kwihula vafuko.+ 12 Weshowo mwalinga vyuma kanevi napu waunyengwe kumeso aYehova. Kaha vyuma kanevi vyaunyengwe vikiko Yehova Kalunga kenu mwahangila vaka-mafuchi kumeso enu. 13 Pwenunga vazeneka chuma chakumihanyina mulonga kumeso aYehova Kalunga kenu.+
14 “Vaka-mafuchi vaze namuhanga veji kwivwililanga kuli vaka-kulinga visava,+ nakuli vaka-kutaha jingombo.+ Oloze enunyi Yehova Kalunga kenu kamitavishile kulinga vyuma kaneviko. 15 Yehova Kalunga kenu mwakamikatwila kapolofweto wamuli vandumbwenu, wakufwana nge ami, kaha mukamwivwililenga.+ 16 Mwakamikatwila kapolofweto kutesa namuze mwalombele Yehova Kalunga kenu kuHoleve, halikumbi lize mwalikungulwile+ nakwamba ngwenu, ‘Kanda natwivwa lizu lyaYehova Kalunga ketuko, chipwe kumona cheka aka kakahya kakaneneko, kuchina natufwa.’+ 17 Kaha Yehova ambile kuli ami ngwenyi, ‘Vyuma vanahanjika vinawahe. 18 Nangukavahana kapolofweto wamuli vandumbwavo wakufwana nge ove.+ Nangukahaka mazu ami mukanwa kenyi,+ kaha mwakavalweza vyuma vyosena nangukahanjika kuli ikiye.+ 19 Kaha weshowo mwakakana kwivwilila mazu mwakahanjika kapolofweto mulijina lyami mwakapwa namulonga.+
20 “‘Kachi nge kapolofweto, mukazamuzamu kenyi mwakahanjika mazu mulijina lyami aze kangwamulwezeleko, chipwe kuhanjika mulijina lyatulunga veka, kapolofweto kana vakamujihe.+ 21 Oloze munahase kukalyamba mumichima yenu ngwenu, “Uno natukatachikiza ngachilihi mazu aze kahanjikile Yehovako?” 22 Kachi nge kapolofweto mwakahanjika mulijina lyaYehova, oloze vyuma vize nahanjika kavyateselemo, chipwe kavyasolokeleko, kaha Yehova kavihanjikangako. Vyuma ahanjikanga ou kapolofweto, avihanjikanga mukazamuzamu kenyi. Ngocho kanda namukamwivwa womako.’