Luka

2 Jino hamakumbi aze, kuli Kesale Angusutu kwafumine lushimbi lwakulweza vatu hamavu hosena mangana vakalisonekese. 2 (Kulisonekesa kanechi chatete chapwileko omu Kulenyu apwile nguvulu waSulya.) 3 Kaha vatu vosena vayile mangana vakalisonekese, mutu himutu kunganda yenyi. 4 NaYosefwe+ nawa akatukile kufuma kuNgalileya, munganda yaNazaleta, nakuya kuYuleya kunganda yaNdavichi yize vavuluka ngwavo Mbetelema,+ mwomwo apwile wakuzuvo yaNdavichi kaha nawa afumine kutanga kaneyi. 5 Ayile akalisonekese hamwe naMaliya, pwevo lyenyi uze ambachile.+ Halwola kanelu Maliya apwile hanakulisa lyehi.+ 6 Shimbu vapwile kuze, lwola lwakusapuluka lwahetele. 7 Kaha asemene mwanenyi walunga watwatwa,+ amuvungilile hamahina nakumusavalika muulilo wavimuna,+ mwomwo muzuvo yavangeji kamwapwile namumwe mwakusavala vakikoko.

8 Jino mungalila yize nawa mwapwile tufunga vatwaminenga muchipapa nakulama vimuna javo naufuku. 9 Ava tufunga vakasumukile kangelo kaYehova* nemana kuli vakiko, kaha upahu waYehova* wamunyikile hosena haze vapwile, ngocho vevwile woma chikuma. 10 Oloze uze kangelo ambile kuli vakiko ngwenyi: “Kanda namwivwa womako, mwomwo nangumyambulila mujimbu wamwaza uze naukaneha kuwahilila chachinene kuvatu vosena. 11 Lelo lino munganda yaNdavichi+ munasemuka mulwilo wenu,+ ikiye Kulishitu, Mwata.+ 12 Echi chikiko chinjikizo namukejivilaho: Namukawana kemba wakuvungila hamahina, vanamusavalika muulilo wavimuna.” 13 Hahaze vene kuli uze kangelo kwapwile jino mayongomena amwilu+ ali nakumwalisa Kalunga nakwamba ngwavo: 14 “Vamutohwesenga Kalunga uze atwama mwilu, kaha hamavu hapwenga kuunda kuli vatu vaze eji kwivwilanga kuwaha.”

15 Kahomu vafumine vaze vangelo kuli vakiko nakuya mwilu, vaze tufunga vaputukile kulihanjikisa mwavomwavo ngwavo: “Tuyenu kuMbetelema tukamone chuma chinasolokako chize natujimbwila Yehova.”* 16 Kaha vayile washiwashi, vawanyine Maliya naYosefwe nauze kemba vanamusavalika muulilo wavimuna. 17 Omu vamwene chuma kana, vambulwile mazu aze vavalwezele kutalisa kuli ou mwana wamundende. 18 Kaha vosena vaze vevwileko valikomokelele havyuma vize vavalwezele kuli vaze tufunga, 19 oloze Maliya alamine mazu osena awa nakuwashinganyeka mumuchima wenyi+ amone muwalumbunukilile. 20 Jino vaze tufunga vakindulukile nakumutohwesa Kalunga nakumwalisa havyuma vyosena vize vevwile navize vamwene, nge muze vavalwezelevyo.

21 Jino omu mwahichile makumbi 8, lwola lwakumujihana lwahetele,+ kaha vamulukile lijina ngwavo, Yesu, lijina lize vamulukile kuli uze kangelo shimbu kanda vachimwimite.+

22 Omu nawa lwahetele lwola lwakuvatomesa nge mwaya Jishimbi jaMose,+ vanehele uze mwana kuYelusalema mangana vakamuhane kuli Yehova,* 23 nge muze vasoneka muJishimbi jaYehova* ngwavo: “Vatwatwa vamalunga vosena* vatela kupwa vajila kuli Yehova.”*+ 24 Kaha vahanyine nawa wana nge muze vamba muJishimbi jaYehova* ngwavo, vakahane “tutela vavali chipwe vana vatukwilimba vavali.”+

25 Jino kuYelusalema kwapwile mutu umwe lijina lyenyi ikiye Shimeyone. Mutu kana apwile wakwoloka, muka-kulemesa Kalunga, kaha apwile nawa nakuvandamina omu navakavendejeka vaIsalele.+ Kaha shipilitu yajila yapwile hali ikiye. 26 Kaha nawa vamulwezele lyehi kuli Kalunga kuhichila mushipilitu yajila ngwavo keshi kukafwako kuvanga namono Kulishitu yaYehova.* 27 Hakumutwaminyina nangolo jashipilitu, engilile jino mutembele. Kahomu visemi vanehele ou mwana wamundende, Yesu, mangana vamulinge nge omu jahanjikile Jishimbi,+ 28 ikiye atambwile uze mwana nakumusata hamavoko enyi, kaha alishile Kalunga ngwenyi: 29 “Ove Mwata Wakulitulaho, unasuula jino ami ndungo yove nguyenga mukuunda+ kweseka namazu ove, 30 mwomwo meso ami anamono lyehi jila naukanehelamo ulwilo wove+ 31 yize unalongesa lyehi kumeso avatu vosena,+ 32 unapu mumunyi+ wakufumisa chiwuva hali vaka-mafuchi,+ kaha nawa hiupahu wavatu jove vaIsalele.” 33 Kaha ise nanaye valikomokelele havyuma apwile nakuhanjika hali uze kemba. 34 Kufumaho Shimeyone avakiswile, kaha ambile kuli Maliya, naye yakemba ngwenyi: “Tala! Ou mwana vanamutongola mangana akalingise vatu vavavulu muIsalele+ vakalimbuke+ nakuvakatula cheka, mwakapwa chinjikizo chize navakalumbilisa+ 35 (poko yamukwale yayisuku nayikakutuvasana*)+ mangana vishinganyeka vyamumichima yavatu vavavulu vikasoloke hatoma.”

36 Jino kwapwile nawa kapolofweto Ana, mwanaFwanwele, wakumuyachi waAshele. Ou pwevo ashinakajiwile chikuma, kaha atwamine nalunga lyenyi myaka 7 kaha kufuma hakulimbata chavo. 37 Apwile jino tuliwe wamyaka yakusemuka 84. Ikiye ejilenga shimbu yosena kutembele nakuzatanga mulimo wajila naufuku namusana, nakulijilikanga kulya nakulembelela Kalunga. 38 Haola vene yize, apandamine kwakamwihi nakuputuka kulomba kuli Kalunga, kaha ahanjikile vyayauze mwana kuli vosena vaze vapwile nakuvandamina kusokoka chaYelusalema.+

39 Kahomu vakumishile kulinga vyuma vyosena kweseka naJishimbi jaYehova,*+ vahilukile kunganda yavo yaNazaleta,+ kuNgalileya. 40 Uze mwana ayilenga lika nakukula nakujikiza, nakupwa namangana, kaha Kalunga atwalilengaho lika kumwivwila uselewa.+

41 Jino visemi jenyi vayilenga kuYelusalema mwaka himwaka kuchiwanyino chaPaseka.+ 42 Kahomu Yesu apwile namyaka yakusemuka 12, vakatukile nakuya kweseka nomu valingilenga halwola lwachiwanyino.+ 43 Omu akumine makumbi achiwanyino, vakatukile nakukinduluka, oloze uze kanyike Yesu asalile kunyima muYelusalema chakuzeneka visemi jenyi kuchitachikiza. 44 Hakushinganyeka ngwavo ali navo hachendo, vatambukile tunda yalikumbi limwe, kaha vaputukile kumutondela kuvausoko wavo nakuli venyembo javo. 45 Omu vahonene kumuwana, vahilukile cheka kuYelusalema nakumutondatonda chikuma. 46 Kahomu mwahichile makumbi atatu, vamuwanyine mutembele, natwame mukachi kavaka-kunangula, ali nakuvevwilila nakuvehwojola. 47 Kaha vosena vaze vapwile nakumwivwilila valikomokelele chikuma hakunangakana chenyi nomu akumbulwilenga vihula.+ 48 Jino omu visemi jenyi vamumwene, valikomokelele, kaha naye ambile kuli ikiye ngwenyi: “Ove mwanami, ikaze unatulingila ngana? Tala, ami naiso tunayanjiwa nakukutondatonda.” 49 Ikiye ambile kuli vakiko ngwenyi: “Uno mwapwanga nakungutondela ika? Kamwatachikijile ngwenu ami ngwatela kupwa muzuvo yaTatako nyi?”+ 50 Oloze vakiko kavamwene mwalumbunukilile mazu ahanjikile kuli vakikoko.

51 Jino akatukile nakuhiluka navo kuNazaleta, kaha atwalileho lika nakuliluula* kuli vakiko.+ Naye nawa alamine mazu osena awa mumuchima wenyi.+ 52 Yesu apwile nakuya lika nakuzovoloka mumangana, nakukula, nakumwivwila nawa uselewa kuli Kalunga nakuli vatu.