Amose
3 “Enu vaIsalele, enu muyachi ngwalowele mulifuchi lyaEjipitu, ivwililenu mazu awa ngunahanjika ami Yehova hali enu:
2 ‘Enu yenu kaha ngwatachikiza hajitanga jahamavu josena.+
Shikaho nangumisopesa hakuhenga chenu chosena.+
3 Kutala vatu vavali vanahase kutambukila hamwe kachi nge kavalishikileko* nyi?
4 Kutala ndumba nahase kutahwoka mumusenge kachi nge kakwachile kanyamako nyi?
Kutala mwevu wandumba nahase kwanganyina muliuku lyenyi kachi nge kakwachile chuma chimweko nyi?
5 Kutala kajila nahase kufwa mumuheto uli hamavu kachi nge kavauteleko nyi?*
Kutala muheto unahase kusovoka kachi nge kamwafwile chuma chimweko nyi?
6 Kachi nge vanembi luneta munganda, uno vatu kaveshi kulichikiminako nyi?
Kachi nge munganda muneza lupi, uno keshi Yehova ikiye naluneheko nyi?
7 Mwata Wakulitulaho Yehova keshi kulinga chuma chimweko,
Kuvanga nalweze vangamba jenyi vapolofweto+ chuma chakusweka mwalinga.
8 Ndumba natahwoka,+ iyaze mwazeneka kwivwa woma?
Mwata Wakulitulaho Yehova nahanjika, iyaze mwazeneka kupolofweta?’+
9 ‘Vilikenu vyumevi mutuposhi vakukola vamuAshatote
Namutuposhi vakukola vamulifuchi lyaEjipitu,
Vilikenu ngwenu: “Likungululenu mangana munyemukile jipili jaSamaliya.+
Ivwenu vyema vilimo,
Talenu vilinga vyakulilyapula vilimo.+
10 Kavatachikiza kulinga vyuma vyakwolokako.
Vanasweze ulyanyi nalwenyeka mutuposhi twavo vakukola.” Omu mukiko mwanambe Yehova.’
11 Shikaho Mwata Wakulitulaho Yehova nambe ngwenyi,
‘Muka-kole mwakalukuka lifuchi lyenu,+
Kaha mwakamikumisa ngolo,
Tuposhi twenu vakukola navakavapupa.’+
12 Yehova nambe ngwenyi,
‘Nganomu kafunga mwanyanga litwitwi chipwe mahinji avali achimuna kukanwa kandumba,
Mukiko navakavanyanga navaIsalele
Vaze vali nakusavala hatuhela twaulangaji muSamaliya nakutwama havitwamo* vyamwaza.’+
13 Mwata Wakulitulaho Yehova, Kalunga wamayongomena nambe ngwenyi, ‘Ivwililenu, huhumunenu* vaze vakuzuvo yaYakova.