Kuputuka
44 Kufumaho, Yosefwe alwezele muka-kumulamina zuvo yenyi ngwenyi: “Zalisa jinjeke javava malunga navyakulya nge omu navahashila kumbata mutu himutu. Kaha haka jimbongo jamutu himutu munjeke yenyi.+ 2 Haka nawa lupasa lwami lwapalata munjeke yayou wakanyike, najimbongo jenyi jandando yatiliku.” Kaha alingile nge muze vamulwezele kuli Yosefwe.
3 Omu kwachele nachimene, vaze malunga vavasuwile vayenga navimbulu javo hamwe. 4 Kahomu vatambukile tunda yayindende kufuma munganda, Yosefwe alwezele muka-kumulamina zuvo yenyi ngwenyi: “Katuka ukavangize vaze malunga. Omu muvawana, vehule ngwove, ‘Ika munalingila mwamupi okunyi enu vanamilingi mwamwaza? 5 Elu lukiko lupasa eji kunwinanga mwata wami, luze nawa eji kutahisanga nakutachikiza vyakulutwe. Munalingi chuma chachipi.’”
6 Kaha avawanyine nakuvalweza mazu kana awa. 7 Oloze vakiko vamwambile ngwavo: “Ove mwata wetu, unahanjikila ika mazu awa? Etu vangamba jove katweshi kuhasa kulinga chuma kanechiko. 8 Jimbongo jize twawanyine mujinjeke jetu twakunehelangajo kufuma kulifuchi lyaKanane.+ Kaha natwiva ngachilihi palata chipwe ulu muzuvo yamwata wove? 9 Weshowo nauwana nalupasa kana afwenga, kahetu tuvosena nawa natupwa tuvandungo jove ove mwata wetu.” 10 Ikiye avambile ngwenyi: “Chipwenga nge omu munahanjika. Ou nanguwana nalupasa mwapwa ndungo yami, kahenu muvosena kamweshi kupwa namulongako.” 11 Ngocho mutu himutu atulile washi njeke yenyi hamavu nakukasununako. 12 Kaha ikiye akekesele mujinjeke javo, kuputukila kuli ou wamukulwane nakukumishila kuli ou wakanyike. Luze lupasa aluwanyine munjeke yaMbenjamine.+
13 Ngocho vapihililile nakupula uvwalo wavo, kaha mutu himutu azundwile chiteli chenyi nakuchihaka hachimbulu chenyi, kaha vakindulukile kunganda. 14 Jino Yuta+ navandumbwenyi vayile kuzuvo yaYosefwe, vamuwanyine achili kuze. Kaha valifukwile kuli ikiye.+ 15 Yosefwe ambile kuli vakiko ngwenyi: “Ika munalingila chuma kanechi? Enu kamwatachikijile ngwenu mutu wakufwana nge ami nahase kutahisa vitaho+ nakutachikiza chuma munalingiko nyi?” 16 Yuta amukumbulwile ngwenyi: “Natwamba mukaze kuli ove mwata wami? Natuhanjika ikaze? Natuhasa kulisambisa ngachilihize? Kalunga wamuchano nasolola mulonga wayetu vandungo jove.+ Ngocho etu, nayou vanawane nalupasa, tunapu jino tuvandungo jove, ove mwata wetu.” 17 Oloze Yosefwe ambile ngwenyi: “Ami kangweshi kuhasa kulinga chuma kanechiko. Ou vanawane nalupasa, ikiye mwapwa ndungo yami.+ Oloze enu muvosena yenunga mukuunda kuli senu.”
18 Jino Yuta apandamine kuli ikiye nakwamba ngwenyi: “Ove mwata wami, achingwitavile nguhanjike kalizu kamwe kuli ove mwata wami. Kanda upihilila nayami ndungo yoveko, mwomwo ove unapu nge Fwalo ivene.+ 19 Ove mwata wami watwihwile etu vandungo jove ngwove, ‘Muli nasenu chipwe ndumbwenu walunga tahi?’ 20 Kaha twambile kuli ove mwata wetu ngwetu, ‘Tuli nasetu, oloze kashinakaji. Ali namwanenyi wahaushinakaji wenyi, ikiye kanyike hali etu tuvosena.+ Ndumbwenyi wamujimo limwe+ afwa,+ kaha ikiye asala uka wenyi, ise nawa amuzanga chikuma.’ 21 Kufumaho wambile kuli etu vandungo jove ngwove, ‘Munehenu kuli ami mangana ngumumone.’+ 22 Oloze twambile kuli ove mwata wetu ngwetu, ‘Uze mukweze keshi kuhasa kuseza iseko. Kachi nge mwamuseza, kaha ise mwafwa.’+ 23 Kahove wambile kuli etu vandungo jove ngwove, ‘Kanda namukeza cheka kuli ami chakuzeneka songo yenuko.’+
24 “Ngocho twayile kuli ndungo yove setu, twamulwezele mazu ayove mwata wetu. 25 Kutwala muze, setu atwambile ngwenyi, ‘Yenu cheka mukatulanjile vyakulya.’+ 26 Kaha twambile ngwetu, ‘Katweshi kuyako. Oloze nge musuula songo yetu, kaha natuya, mwomwo katweshi kuhasa kuya kuli uze lungako, kuvanga tuli nasongo yetu.’+ 27 Kaha ndungo yove setu atwambile ngwenyi, ‘Enu munatachikiza kanawa ngwenu ngwasemene vana vamalunga vavali napwevo lyami.+ 28 Mwanami umwe angusele, kaha ngwambile ngwami, “Atela vanamutanye vene.”+ Kaha kangwamumonako nakulelo lino. 29 Kachi nge namumbata nayou nawa, kaha ponde hinayimuwana, namungulingisa ami kashinakaji ngushikumuke muFuka*+ naushona wami.’+
30 “Jino kachi nge natukinduluka kuli ndungo yove setu chakuzeneka ou mukweze azanga chikuma nge omu alizanga ivene, 31 kaha setu mwafwa hakumona ngwenyi mukweze nasale. Ngocho etu vandungo jove natumulingisa ndungo yove wakashinakaji ashikumuke muFuka* naushona wenyi. 32 Mwomwo ami ndungo yove ngwashikanga tata ngwami ou mukweze nangumulama kanawa. Ngwamwambanga ngwami, ‘Kachi nge kangweshi kumukindulwisa kuli oveko, kaha nangupwa namulonga wahaya myaka yosena kuli ove.’+ 33 Ngocho jino, ngwitavile ami ngusale kupwa ngundungo yayove mwata wami muchishishisa chayou mukweze, mangana ikiye akinduluke navandumbwenyi hamwe. 34 Nanguhasa kukinduluka ngachilihi kuli tata chakuzeneka kuya nayou mukweze? Kangweshi nakusaka ngukamone lupi luze nalukawana tatako.”