Kuputuka
34 Njina mwanaYakova wapwevo, uze asemene naLeya,+ ayilenga nakushikama* navana vamapwevo vamulifuchi lize.+ 2 Likumbi limwe, omu Shekeme mwanaHamole kaHivi,+ mwata walifuchi lize, amwene Njina, amumbachile nakuya nakumupika. 3 Muchima wenyi wapwilenga lika kuli Njina mwanaYakova, amuzangile chikuma ou mwanapwevo kaha ahanjikilenga nenyi nachilembekeshi.* 4 Ngocho Shekeme ambile kuli ise Hamole+ ngwenyi: “Ngumbachile ou mwanapwevo apwenga pwevo lyami.”
5 Halwola luze Yakova evwile ngwavo mwanenyi wapwevo Njina vanamupihisa kuli Shekeme, vana venyi vamalunga vapwile navimuna jenyi muchipapa. Ngocho Yakova aholele kulu palanga nomu vakindulukile. 6 Kutwala muze, Hamole ise yaShekeme, ayile kuli Yakova nakuhanjika nenyi. 7 Jino omu vana vaYakova vamalunga vevwile mujimbu kanou, hahaze vene vakindulukile kufuma muchipapa. Vasulakanyine nakupihilila chikuma, mwomwo Shekeme asawile Isalele hakulisavala namwanaYakova wapwevo,+ chuma chize kachatelelele kusolokako.+
8 Kaha Hamole ambile kuli vakiko ngwenyi: “Mwanami Shekeme nafwila* mwanenu wapwevo. Muhanenuyo apwenga pwevo lyenyi, 9 mangana tulimbachilenga. Namutuhananga vana venu vamapwevo, kahenu nawa namumbatanga vana vetu vamapwevo.+ 10 Namutwamanga nayetu, nakupwa kweshokwo munasake mungalila yino. Twamenu musekasanyinemo nakuhetelamo luheto.” 11 Jino Shekeme ahanjikile kuli ise yaNjina nakuli vandumbwenyi ngwenyi: “Ngwivwilenu uselewa, kaha vyeshovyo namungulomba, nangumihanavyo. 12 Munahase tuhu kungutomena ndando yayinene yamatemo naweshowo wana namusaka.+ Ngunalizange kumihana vyeshovyo namuvuluka. Enu nguhanenu kaha ou mwanapwevo apwenga pwevo lyami.”
13 Jino vana vaYakova vamalunga vakumbulwile Shekeme naise Hamole mujila yakumbembejeka, hakuwana nge Shekeme apihishile ndumbwavo Njina. 14 Vambile kuli vakiko ngwavo: “Katweshi kuhasa kulinga chuma kanako, kuhana ndumbwetu kuli chilima,*+ mwomwo natusauka. 15 Natumitavila kuvanga kaha nge namujihana malunga vamuli enu vosena nakupwa nge omu twapwa etu.+ 16 Nge namulinga ngocho, kaha natumihananga vana vetu vamapwevo, kahetu nawa natumbatanga vana venu vamapwevo. Natutwamanga nayenu nakupwa tuvatu vovamwe. 17 Oloze nge kamweshi kwivwilila mumazu etu nakumijihanako, kaha natuya nakumbata mwanetu nakwiza nenyi.”
18 Mazu avo evwishile Hamole+ namwanenyi Shekeme+ kuwaha. 19 Shekeme kalangishile kulinga chuma vamulwezeleko,+ mwomwo evwilile mwanaYakova wapwevo kuwaha. Kaha nawa Shekeme vamuvumbikilenga chikuma havatu vosena vakuzuvo yaise.
20 Ngocho Hamole namwanenyi Shekeme vayile kuchikolo changanda nakuhanjika navatu vamunganda yavo,+ ngwavo: 21 “Ava malunga vali nakusaka kutwama nayetu mukuunda. Vatwame tuhu mungalila yino nakusekasanyinamo, mwomwo ngalila yino yinapu yayinene, kaha vanahase kutwamamo. Natumbatanga vana vavo kupwa mapwevo jetu, kahetu nawa natuvahananga vana vetu kupwa mapwevo javo.+ 22 Oloze navetavila kutwama nayetu nakupwa tuvatu vovamwe kuvanga kaha nge lunga hilunga wamuli etu navamujihana nge omu vavajihana vakiko.+ 23 Kumana vikumba vyavo, naluheto lwavo, navimuna javo vosena kavyeshi kukapwa vyetuko numba? Ngocho tuvetavilenu mangana vatwamenga nayetu.” 24 Kaha vosena vaze vejilenga kuchikolo changanda vevwililile mumazu aHamole namwanenyi Shekeme. Malunga vosena vaze vejilenga kuchikolo changanda vavajihanyinenga.
25 Jino omu mwahichile makumbi atatu, shimbu vapwile nakwivwa kukola, vana vaYakova vavali, vaShimeyone naLevi vandumbwaNjina,+ vambachile mutu himutu poko yenyi yamukwale, vayile munganda chakuzeneka vatu kutachikiza, kaha vajihile malunga vosena.+ 26 Vajihile Hamole namwanenyi Shekeme najipoko jamikwale. Kaha vambachile Njina muzuvo yaShekeme nakuya nenyi. 27 Kaha vana vaYakova vakwavo vejile nakupupa nganda yamalunga vaze vajihile, mwomwo vapihishile ndumbwavo wapwevo.+ 28 Vambachile mautanga avo amikoko navapembe, namautanga avangombe, navimbulu javo, navyeshovyo vyapwile munganda, namumande avo. 29 Vambachile navikumba vyavo vyosena, navana vavo vosena, namapwevo javo, nakupupa nawa vyuma vyosena vize vyapwile mujizuvo javo.
30 Jino Yakova ambile kuli Shimeyone naLevi+ ngwenyi: “Munangunehela ukalu* waunene wakungujinjisa kuvatu vamungalila yino, kuli vaKanane navaPeliji. Vatu nguli navo vavandende, kaha vatu vamungalila yino navalikungulula nakwiza nakungulukuka nakungujiha hohamwe navava vakuzuvo yami vosena.” 31 Oloze vakiko vamwambile ngwavo: “Kutala chakutamo kulinga ndumbwetu nge omu navalinga muka-ujila numba?”