Kuputuka
3 Jino linoka+ alungulukile* chikuma kuhambakana tunyama vamuchipapa vosena vaze atengele Yehova Kalunga. Ngocho ambile kuli pwevo ngwenyi: “Uno Kalunga nambe chikupu ngwenyi kamwatela kulya kumitondo yoseneyi yili mumilembako nyi?”+ 2 Kaha pwevo ambile kuli linoka ngwenyi: “Tunahase kulya tuhu kumihako yamitondo yosena yili mumilemba.+ 3 Oloze kumihako yamutondo uze uli mukachi kamilemba,+ Kalunga nambe ngwenyi, ‘Kamwatela kulyakoko, chipwe kukwatako, mokomoko namufwa.’” 4 Kaha linoka ambile kuli pwevo ngwenyi: “Kufwa kamweshi kufwako.+ 5 Mwomwo Kalunga natachikiza ngwenyi halikumbi lize namukalyako, meso enu nawakatona, kaha namukapwanga nge Kalunga, kaha namukatachikizanga kuwaha nakupihya.”+
6 Ngocho uze pwevo amwene ngwenyi mutondo unawahe kulya, ngwenyi wamwaza kuutala nameso, himutondo mwevwila mutu kuwaha. Kaha aheleleko kumihako yawo, alile.+ Kufumaho ahanyineko nawa lunga lyenyi omu vapwile hamwe, kaha alile.+ 7 Kaha meso avo vosena vavali atonene, vatachikijile jino ngwavo vali uselesele. Shikaho vatongele mafwo amukuyu nakuvwala.+
8 Kutwala muze, vevwile lizu lyaYehova Kalunga omu apwile nakutambuka mumilemba halwola kwaunjile. Kaha uze lunga napwevo lyenyi vachinyine Yehova Kalunga nakuswama mumitondo yapwile mumilemba. 9 Kaha Yehova Kalunga asanyikilenga lika uze lunga ngwenyi: “Uli kulihi?” 10 Kutwala muze uze lunga ambile ngwenyi: “Ngwevwanga lizu lyove mumilemba, kaha ngwevwanga woma mwomwo ngwapwanga uselesele, ngocho ngwaswamanga.” 11 Kalunga ambile ngwenyi: “Iya nakulweze ngwenyi uli uselesele?+ Unali lyehi kumutondo uze ngwakulwezele ngwami kanda ukalyakoko nyi?”+ 12 Uze lunga ambile ngwenyi: “Ou pwevo wanguhanyine kupwa nenyi, ikiye anguhananga muhako wakumutondo, kaha ngwalyanga.” 13 Kaha Yehova Kalunga ambile kuli pwevo ngwenyi: “Ikaze unalingila chuma kanechi?” Pwevo akumbulwile ngwenyi: “Linoka ikiye angutangisanga, kaha ngwalyanga.”+
14 Kaha Yehova Kalunga ambile kuli linoka+ ngwenyi: “Hakuwana nge unalingi chumechi, unapu jino uwakwangula kuhambakana vimuna vosena natunyama vamuchipapa vosena. Nautambukilanga hajimo lyove, kaha naulyanga lukungu hamakumbi osena akuyoya chove. 15 Nanguhaka kole*+ mukachi kove+ napwevo,+ namukachi kamuka-tanga* yove+ namuka-tanga* yenyi.+ Ikiye mwakachika* mutwe wove,+ kahove naukatota* kukakukunya kenyi.”+
16 Kaha ambile kuli pwevo ngwenyi: “Nangutohwesa chikuma misongo yakwimita chove. Nawivwanga kukola hakusema vana, kaha naukajikanga muchima wove hali lunga lyove, kaha ikiye mwakuyulanga.”
17 Kaha ambile kuli Alama* ngwenyi: “Hakuwana nge unevwilila mulizu lyapwevo lyove nakulya kumutondo uze ngwakulwezele+ ngwami, ‘Kawatela kulyakoko,’ shikaho mavu nawapwanga akwangula mwomwo yayove.+ Kaha hamakumbi osena akuyoya chove mumonanga luyando hakuwananga vyakulya.+ 18 Hamavu nahasokanga mingonga namituvapoko, kaha naulyanga vyuma vyakusokaho. 19 Kulya chove nauchilyanga namavule akumeso ove, palanga nomu naukakinduluka cheka kumavu, mwomwo kukiko vene wafumine.+ Mwomwo unapu ulukungu, kaha naukakinduluka cheka kulukungu.”+
20 Kufumaho Alama alukile pwevo lyenyi ngwenyi, Eve,* mwomwo ikiye mwakapwa naye yavosena vaze navayoyanga.+ 21 Kaha Yehova Kalunga atungilile Alama napwevo lyenyi uvwalo wausuku wavilambu nakuvavwika.+ 22 Jino Yehova Kalunga ambile ngwenyi: “Mutu napu jino nganomu twapwa etu hakutachikiza kuwaha nakupihya.+ Ngocho, hakusaka kumuhonesa kuhela muhako kumutondo wakuyoya,+ nakulya nakuyoya haya myaka yosena,*—” 23 Shikaho Yehova Kalunga amuhangile mumilemba yaEtene,+ mangana alimenga hamavu haze vamufumishile.+ 24 Ngocho ahangile uze mutu mumilemba yaEtene, kaha ahakile vakeluve+ kumututuko wamilemba kana, napoko yamukwale yakukwata mulangi yize yajingwomwokelenga nakulama jila yakuya kumutondo wakuyoya.