Kuputuka

29 Kufumaho Yakova akatukile cheka ungeji wenyi, kaha atwalilileho kuya kulifuchi lyavatu vakuMututuko. 2 Jino amwene lishima muchana, namautanga amikoko atatu anautamako, mwomwo kulishima kana kukiko vanwishililenga mikoko meya. Kaha kukanwa kalishima vahakilengako lilolwa lyalinene. 3 Omu vakungulwilenga mautanga osena kuze, vashindumwinenga lize lilolwa kulishima, kaha vanwishilenga mikoko meya, kufumaho valishindumwinyinenga cheka kukanwa kalishima.

4 Yakova ambile kuli tufunga ngwenyi: “Enu vandumbwami, munafumu kulihi?” Vakiko vamukumbulwile ngwavo: “Tunafumu kuHalane.”+ 5 Kaha avambile cheka ngwenyi: “Lavane+ muzukulu lyaNahole+ mwamutachikiza nyi?” Vakiko vamwambile ngwavo: “Twamutachikiza.” 6 Kaha avambile ngwenyi: “Ali kanawa tahi?” Vakiko vamukumbulwile ngwavo: “Ali kanawa. Mwanenyi Lakele+ ou mwezomu namikoko.” 7 Yakova avambile ngwenyi: “Likumbi lichili hamulungu. Lwola lwakukungulula vimuna kanda luhete. Hanenu mikoko meya, kufumaho muyenga nakuvalisa.” 8 Vakiko vamwambile ngwavo: “Kavatwitavisa kulinga ngochoko, kuvanga vanakungulula mautanga osena, nakushindumuna lilolwa kukanwa kalishima numbanyi tuhane mikoko meya.”

9 Shimbu apwile nakuhanjika navo, Lakele ejile namikoko jaise, mwomwo apwile kafunga. 10 Omu Yakova amwene Lakele mwanaLavane ndumbwanaye, navaze mikoko, apandamine washiwashi kulishima nakushindumunako lize lilolwa, kaha ahanyine meya mikoko jaLavane ndumbwanaye. 11 Jino Yakova asweswenyele Lakele nakulila nalizu lyakukanguka. 12 Yakova aputukile kulweza Lakele ngwenyi ikiye apwa kausoko kaise,* kaha nawa ngwenyi apwa mwanaLaveka. Kaha Lakele ayile jimbushi nakulweza ise.

13 Omu Lavane+ evwile ou mujimbu waYakova mwanandumbwenyi, ayile jimbushi kuli ikiye. Amupakachile mukasamba nakumusweswenya, kaha amutwalile kuzuvo yenyi. Jino Yakova aputukile kulweza Lavane vyuma vyosena. 14 Kaha Lavane amwambile ngwenyi: “Ove unapu ukausoko kami wahalinyinga.” Ngocho atwamine nenyi kakweji wamuundu.

15 Lavane ambile kuli Yakova ngwenyi: “Uno unguzachile tuhu chawana mwomwo ngwami ukausoko kami* nyi?+ Ngulweze, fweto yove nayikapwa ika?”+ 16 Jino Lavane apwile navana vamapwevo vavali. Ou wamukulwane lijina lyenyi ikiye Leya, kahou wakanyike ikiye Lakele.+ 17 Meso aLeya kawapwile amwazako,* oloze Lakele apwile wamwaza chikuma mujimba nachihanga. 18 Yakova azangile Lakele, ngocho ambile kuli Lavane ngwenyi: “Nangulisuula kukuzachila myaka 7 mangana ukanguhane mwanove wakanyike Lakele.”+ 19 Kaha Lavane amwambile ngwenyi: “Chinawahe ngumuhangise kuli ove, kuhambakana kumuhangisa kuli lunga weka. Twamanga lika nayami.” 20 Yakova azachililile Lakele myaka 7,+ oloze myaka kana ayimwene nge himakumbi amandende kaha, mwomwo amuzangile chikuma.

21 Kufumaho Yakova ambile kuli Lavane ngwenyi: “Nguhane pwevo lyami, mwomwo makumbi ngunakuzachila anatemo lyehi, mangana ngulisavale nenyi.” 22 Ngocho Lavane akungulwile vatu vosena vakungalila yize, kaha avawahishilile chiwanyino chakulya. 23 Oloze omu kwatokele, Lavane ambachile mwanenyi Leya nakumutwala kuli Yakova mangana alisavale nenyi. 24 Lavane ambachile nawa ngamba yenyi wapwevo Zelepa nakumuhana kuli mwanenyi Leya kupwa ngamba yenyi.+ 25 Jino omu kwachele nachimene, Yakova amwene ngwenyi vanamunehela Leya. Ngocho ambile kuli Lavane ngwenyi: “Ikaze unalingila chuma kanechi? Kumana kangwazachililile Lakeleko numba? Mwomwo ika unanguzangamina ngana?”+ 26 Kaha Lavane amwambile ngwenyi: “Kuno katweshi kuvangila kuhangisa ou wakanyike shimbu kanda tuhangise ou wamukulwaneko. 27 Achiwahilile nayou pwevo chalumingo chamuundu. Kufumaho natukuhana ou pwevo mukwavo mangana unguzachile nawa myaka yikwavo 7.”+ 28 Yakova etavilile, kaha awahililile nayou pwevo chalumingo chamuundu, kufumaho Lavane amuhanyine mwanenyi Lakele kupwa pwevo lyenyi. 29 Lavane ambachile nawa ngamba yenyi wapwevo Mbiliha+ nakumuhana kuli mwanenyi Lakele kupwa ngamba yenyi.+

30 Ngocho Yakova alisavalile naLakele nawa, amuzangile chikuma kuhambakana Leya. Kaha amuzachilile Lavane myaka yikwavo 7.+ 31 Omu Yehova amwene ngwenyi Leya kavamuzangileko,* amuhanyine lusemo,* kaha emichile lijimo,+ oloze Lakele apwile mumba.+ 32 Leya emichile lijimo nakusema mwana walunga, kaha amulukile lijina ngwenyi Luvene,*+ mwomwo ngwenyi: “Yehova namono luyando lwami,+ kaha lunga lyami mwanguzanga jino.” 33 Emichile lijimo likwavo, kaha asemene mwana walunga. Ambile ngwenyi: “Yehova nangwivu, shikaho nanguhane mwana mukwavo hakuwana nge kavanguzangileko.” Ngocho amulukile lijina ngwenyi Shimeyone.*+ 34 Leya emichile cheka lijimo, kaha asemene mwana walunga. Ambile ngwenyi: “Lunga lyami mwalipanjika nayami jino, mwomwo ngunamusemena vana vamalunga vatatu.” Ngocho amulukile lijina ngwenyi Levi.*+ 35 Emichile cheka lijimo likwavo, kaha asemene mwana walunga. Ambile ngwenyi: “Nangumwalisa jino Yehova.” Ngocho amulukile lijina ngwenyi Yuta.*+ Kaha alitwaminyine kusema.