Kuputuka
22 Jino omu vyakumine vyumevi, Kalunga wamuchano esekele+ Apalahama. Amusanyikile ngwenyi: “Apalahama!” Kaha amukumbulwile ngwenyi: “Yami uno mwane.” 2 Kaha Kalunga amwambile ngwenyi: “Mbata mwanove umwe kaha lyamunwe Isaka,+ ou wazanga chikuma,+ uyenga kungalila yaMoliya+ mangana ukamuhane kupwa wana wakulumba hapili yize nangukakulweza.”
3 Ngocho Apalahama ahindukile chimenemene, alemene chimbulu chenyi, kaha ambachile vangamba jenyi vavali namwanenyi Isaka mangana ayenga navo. Achavile jikunyi jakwochelaho wana wakulumba, kaha akatukile nakuya kuchihela kuze amulwezele Kalunga wamuchano. 4 Halikumbi lyamuchitatu lyaungeji wavo, Apalahama andwile meso enyi, kaha amwene chize chihela hahasuku. 5 Jino Apalahama ambile kuli vangamba jenyi ngwenyi: “Salenu hano nachimbulu, ami namwanami natuya kuze nakulemesa Kalunga, kaha natukinduluka cheka kuli enu.”
6 Ngocho Apalahama ambachile jize jikunyi jawana wakulumba nakumutwikajo mwanenyi Isaka. Ikiye ambachile kakahya napoko,* kaha vosena vavali vayile hamwe. 7 Jino Isaka ambile kuli ise Apalahama ngwenyi: “Ove tata!” Kaha ise etavile ngwenyi: “Yami uno e mwanami.” Isaka ambile ngwenyi: “Tunambate kakahya najikunyi, nyi mukoko wawana wakulumba ali kulihi?” 8 Kaha Apalahama ambile ngwenyi: “Ove mwanami, Kalunga mwatuhana mukoko wawana wakulumba.”+ Kaha vosena vavali vatwalilileho kutambuka.
9 Kutwala muze vahetele kuchihela chize amulwezele Kalunga wamuchano, kaha Apalahama atungile lijiko lyakulumbila nakwalaho jikunyi. Kaha akashile mwanenyi Isaka kumavoko nakumahinji nakumusavalika helu lyajikunyi halijiko lyakulumbila.+ 10 Jino Apalahama olovelele poko,* ayimbachile mangana ajihe mwanenyi.+ 11 Oloze kangelo kaYehova amutambakanyine kufuma mwilu ngwenyi: “Ove Apalahama, ove Apalahama!” Ikiye etavile ngwenyi: “Yami uno mwane.” 12 Kaha amwambile ngwenyi: “Kanda ujiha ou mukweze chipwe kumulinga mumweko mwomwo ngunatachikiza jino ngwami umuka-kwivwa ami Kalunga woma hakuwana nge kawakanyine kunguhana ou mwanove umwe kaha lyamunweko.”+ 13 Apalahama andwile meso enyi, kaha amwene chizamba chamukoko hahasuku naliswiki jimbinga mulifufwa. Ngocho ayile nakumbata uze mukoko, kaha amuhanyine kupwa wana wakulumba wakushishisa muli mwanenyi. 14 Apalahama alukile chihela kana ngwenyi Yehova-yile.* Shikaho veji kuhanjikilanga nakulelo lino ngwavo: “Kupili yaYehova kukiko mwahanyina vyuma vyasakiwa.”+
15 Kaha kangelo kaYehova atambikile Apalahama kamuchivali kufuma mwilu 16 ngwenyi: “Yehova nambe ngwenyi,+ ‘Ngunalishingi ami ivene ngwami, hakuwana nge unalingi chuma kanechi, kawakanyine kunguhana ou mwanove umwe kaha lyamunweko,+ 17 ngocho nangukakukisula chikupu nakuvulisa vaka-tanga* yove nge vatanganyika vamwilu, nge usekeseke wakungenge yakalungalwiji.+ Kaha muka-tanga* yove mwakatambula vikolo* vyavaka-kole jenyi.+ 18 Kaha vaka-mafuchi ahamavu vosena navakavakisula kuhichila muli muka-tanga* yove,+ mwomwo unevwilila mulizu lyami.’”+
19 Kufumaho Apalahama akindulukile kuli vaze vangamba jenyi, kaha vakatukile nakuhiluka kuMbele-sheva.+ Apalahama atwaminenga lika kuMbele-sheva.
20 Kutwala muze, Apalahama atambwile mujimbu ngwavo: “Milika naseme vana nandumbwove Nahole.+ 21 Mwana watwatwa ikiye Uze, kaha hinamushisa Mbuze, naKemwele ise yaAlame, 22 naKesete, naHazo, naPilitashe, naYitalafwe, naMbetwele.”+ 23 Kaha Mbetwele asemene Laveka.+ Ava vana 8 vakiko Milika asemene naNahole ndumbwaApalahama. 24 Kaha pwevo lyaNahole wakanyike Leume, naikiye asemene vana ava, Teva, naNgahame, naTahashe, naMaka.