Kuputuka
17 Omu Apalama apwile namyaka yakusemuka 99, Yehova alisolwele kuli ikiye nakumwamba ngwenyi: “Ami yami Kalunga Wangolo Josena. Tambukanga mukulonga kumeso ami, twamanga chakuzeneka katenga.* 2 Nangulishika lushiko nayove,+ kaha nangukamivulisa chikumakuma.”+
3 Apalama afukamine chameso hamavu, kaha Kalunga amulwezele cheka ngwenyi: 4 “Tala! Ami ngunakushiki lyehi lushiko,+ kaha naukapwa usevo yavaka-mafuchi amavulu.+ 5 Lijina lyove kalyeshi kupwa cheka Apalamako,* oloze nalipwa jino Apalahama* mwomwo nangukulingisa kupwa usevo yavaka-mafuchi amavulu. 6 Nangukuhana vana vavavulu chikuma, nakuvalingisa nawa kupwa vaka-mafuchi amavulu, kaha kuli ove kukiko nakukasemuka vamyangana.+
7 “Nangulama lushiko lwami ngunalishiki nayove,+ namuka-tanga* yove uze mwakeza hanyima yove swi nakuvisemunwino vyenyi. Kaha lushiko kana nalupwanga lwahaya myaka yosena, mangana ngupwenga nguKalunga kove, namuka-tanga* yove uze mwakeza hanyima yove. 8 Lifuchi lino lyaKanane wazuzumanyine mwamwiza,+ nangulihana kuli ove nakuli muka-tanga* yove uze mwakeza hanyima yove mangana likapwenga luheto lwenyi haya myaka yosena. Kaha nangukapwanga nguKalunga kenyi.”+
9 Kalunga alwezele cheka Apalahama ngwenyi: “Ove namuka-tanga* yove uze mwakeza hanyima yove swi nakuvisemunwino vyenyi vyosena mulamenga lushiko lwami. 10 Lushiko ngunalishiki nayove namuka-tanga* yove uze mwakeza hanyima yove shina elu: Malunga vosena muli enu vamijihane.+ 11 Vamyenge mivumbo yenu mangana chikapwe chinjikizo chalushiko ngunalishiki nayenu.+ 12 Malunga vosena muli enu vaze vali namakumbi akusemuka 8 vatela kuvajihana+ muvisemunwino vyenu vyosena, numba vapwa vakusemukila mujizuvo jenu, chipwe vaze kavapwa vaka-tanga* yenuko, vaze mwalanjile najimbongo kuli vaka-mafuchi eka. 13 Malunga vosena vakusemukila muzuvo yenu chipwe vakulanda najimbongo jenu vatela kuvajihana.+ Kaha lushiko lwami elu nalupwanga kumijimba yenu, lupwenga lwahaya myaka yosena. 14 Kachi nge mutu wachilima mwatwama chakuzeneka kumwenga muvumbo wenyi, kaha mutu* kana vamujihe. Mutu kana najihi lushiko lwami.”
15 Kalunga ambile kuli Apalahama ngwenyi: “Pwevo lyove Salai*+ kanda ukamuvuluka cheka ngwove Salaiko, mwomwo lijina lyenyi ikiye jino Sala.* 16 Nangumukisula, kaha nangukuhana mwana walunga wakusemena kuli ikiye.+ Nangumukisula nakumulingisa kupwa nevo yavaka-mafuchi, kaha kuli ikiye kukiko nakukasemuka vamyangana javatu veka naveka.” 17 Ngocho Apalahama afukamine chameso hamavu, kaha aputukile kuseha nakulyamba mumuchima wenyi+ ngwenyi: “Kutala lunga uze ali namyaka yakusemuka 100 mwahasa kusema mwana numba? Kaha nawa Sala uze ali namyaka yakusemuka 90 mwahasa kusema mwana numba?”+
18 Apalahama ambile kuli Kalunga wamuchano ngwenyi: “Mukisule Ishimele mukuyoya chenyi chosena.”+ 19 Kaha Kalunga ambile ngwenyi: “Chikupu vene pwevo lyove Sala mwakasema nove mwana walunga, kaha ukamuluka lijina ngwove Isaka.*+ Kahami nangukazamisa lushiko lwami naikiye, luze nalukapwanga lwahaya myaka yosena kuli vaka-tanga* yenyi vaze navakeza hanyima yenyi.+ 20 Oloze vyuma unavuluka hali Ishimele ngunavivu. Nangumukisula, kaha nangukamuhana vana nakuvavulisa chikumakuma. Mwakasema vamyata 12, kaha nangukamulingisa kupwa muyachi waunene.+ 21 Oloze lushiko lwami nangukaluzamisa hali Isaka+ uze navakasema kuli Sala halwola vene nge luno mwaka nawizaho.”+
22 Omu Kalunga akumishile kuhanjika naApalahama, amusezele. 23 Jino Apalahama ambachile mwanenyi walunga Ishimele, namalunga vosena vaze vasemukilile muzuvo yenyi, namalunga vosena vaze alanjile najimbongo jenyi, kaha engele mivumbo yavo halikumbi vene lize ngana muze vamulwezele kuli Kalunga.+ 24 Apalahama apwile namyaka yakusemuka 99 omu vamwengele muvumbo wenyi.+ 25 Kaha mwanenyi Ishimele apwile namyaka yakusemuka 13 omu vamwengele muvumbo wenyi.+ 26 Halikumbi vene lize, Apalahama vamujihanyine hamwe namwanenyi Ishimele. 27 Namalunga vosena vakuzuvo yenyi, navaze vakusemukila muzuvo yenyi, navaze vakulanda najimbongo jenyi kuli vaka-mafuchi eka, vavajihanyine hamwe naikiye.