Kuputuka
12 Yehova ambile kuli Apalama ngwenyi: “Fuma mulifuchi lyove, nakuli vausoko wove, nakuzuvo yaiso, uyenga kulifuchi lize nangukulweza kuya.+ 2 Nangukakulingisa kupwa umuyachi waunene, nangukakukisula, kaha nangukafumakanyisa lijina lyove, kaha vakwenu navakavakisula kuhichila muli ove.+ 3 Nangukakisula vaze navakakukisula ove, nangukangula uze mwakakushinga ove,+ kaha jitanga jahamavu josena navakajikisula kuhichila muli ove.”+
4 Ngocho Apalama ayile ngana muze vamulwezele kuli Yehova, naLote ayile nenyi hamwe. Apalama apwile namyaka yakusemuka 75 omu afumine kuHalane.+ 5 Apalama ambachile pwevo lyenyi Salai,+ naLote mwanandumbwenyi,+ naluheto lwosena ahetele,+ navandungo* vaze ahetele muHalane, nakuya kulifuchi lyaKanane.+ Kahomu vahetele kulifuchi lyaKanane, 6 Apalama apulasanyine mulifuchi kana nakuheta kungalila yaShekeme+ kwakamwihi namitondo yayinene yakuMole.+ Hamakumbi aze mulifuchi kana mwapwile vaKanane. 7 Jino Yehova alisolwele kuli Apalama nakwamba ngwenyi: “Lifuchi lino+ nangulihana kuli vaka-tanga* yove.”+ Kaha kuze, Apalama atungileko lijiko lyakulumbila wana kuli Yehova uze alisolwele kuli ikiye. 8 Kutwala muze, afumine kuze nakuya kungalila yajipili yapwililile kumututuko kuhambakana Mbetele.+ Jino kuze, ajikile mbalaka yenyi hakachi, oku Mbetele yili kumulauko, kaha Ai+ kumututuko. Kaha atungileko lijiko lyakulumbila wana kuli Yehova+ nakuputuka kwalisa lijina lyaYehova.+ 9 Kufumaho, Apalama atutwile chilombo chenyi, kaha ayilenga nakunungwojoka lika swi nakuNengeve.+
10 Jino mulifuchi kana mwengilile zala yakalombolombo, kaha Apalama ayile kuEjipitu akazuzumaneko,*+ mwomwo zala yakalombolombo yatohwele chikuma.+ 11 Kahomu ahetele kwakamwihi nakwingila muEjipitu, ambile kuli pwevo lyenyi Salai ngwenyi: “Ivwilila! Ngunatachikiza ngwami ove wapwa upwevo wamwaza.+ 12 Ngocho omu navakumona vaEjipitu navamba vene ngwavo, ‘Ou ikiye pwevo lyenyi.’ Kahami navangujiha, oloze ove kaveshi kukujihako. 13 Shikaho amba ngwove ami ngundumbwove, mangana vyuma vyosena vipwenga kanawa, vazeneke kungunongesa.”*+
14 Kahomu Apalama engilile muEjipitu, vaEjipitu vamwene pwevo lyenyi ngwavo wamwaza chikuma. 15 Vilolo jaFwalo navakiko vamumwene, kaha vaputukile kumwalisa kuli Fwalo, ngocho uze pwevo vamutwalile kuzuvo yaFwalo. 16 Fwalo alamine Apalama mujila yamwaza mwomwo yaSalai, kaha Apalama apichile mikoko navangombe, navimbulu vavihwevo navava vavilunga, navangamba vamalunga navava vamapwevo, navangamela.+ 17 Jino Yehova anehele vipupu vyavinene chikuma kuli Fwalo, navakuzuvo yenyi vosena mwomwo yaSalai, pwevo lyaApalama.+ 18 Ngocho Fwalo asanyikile Apalama nakumwamba ngwenyi: “Ikaze unalingila chuma kanechi kuli ami? Mwomwo ika wazenekele kungulweza ngwove pwevo lyove? 19 Ika wahanjikilile ngwove ‘Ou ndumbwami’?+ Ngwetu hasalanga hahandende kachi ngunamumbate kupwa pwevo lyami. Mbata pwevo lyove, yako nenyi.” 20 Fwalo alwezele vangamba jenyi vashinjikize Apalama napwevo lyenyi vayenga navyuma vyavo vyosena vize vapwile navyo.+