ກັບມາຄືນດີກັນໃຫ້ໄວທີ່ສຸດ!
ເຈົ້າເຄີຍຄຽດໃຫ້ພີ່ນ້ອງແຮງຈົນບໍ່ຢາກເປັນໝູ່ກັບລາວເລີຍບໍ? ຖ້າເປັນແນວນັ້ນ ຂໍໃຫ້ເຈົ້າຈັດການເລື່ອງນັ້ນໃຫ້ໄວທີ່ສຸດແລະເຮັດດ້ວຍເຈດຕະນາທີ່ຖືກຕ້ອງເພື່ອຈະຄືນດີກັນແລະກັບມາເປັນໝູ່ກັນຄືເກົ່າ.a
ຂໍໃຫ້ຄິດເຖິງຕົວຢ່າງນີ້. ຕອນທີ່ກະດູກຫັກ ເຮົາຊິຮູ້ສຶກເຈັບແຮງ. ຖ້າຢາກເຊົາເຈັບ ເຮົາກໍຕ້ອງໄປປົວ. ແຕ່ຖ້າເຮົາບໍ່ຟ້າວໄປປົວໃຫ້ໄວ ເຮົາກໍຊິເຈັບແບບນັ້ນໄປເລື້ອຍໆ. ຮ້າຍແຮງກວ່ານັ້ນກະດູກກໍຈະບິດຈະບ້ຽວແລະເຮັດວຽກໄດ້ບໍ່ດີຄືເກົ່າ.
ຄືກັບເລື່ອງກະດູກຫັກ ຖ້າເຮົາກັບພີ່ນ້ອງມີເລື່ອງຜິດໃຈກັນ ເຮົາກໍຕ້ອງຟ້າວຈັດການເລື່ອງນັ້ນໃຫ້ໄວທີ່ສຸດ. ຄັນບໍ່ຊັ້ນ ເຮົາກໍຈະຮູ້ສຶກເຈັບໃຈໄປເລື້ອຍໆ. ເຮົາອາດຈະຄຽດແຮງແລະເຖິງຂັ້ນເຊົາເປັນໝູ່ກັບພີ່ນ້ອງຄົນນັ້ນເລີຍ. ພະເຢຊູບອກວ່າຖ້າເຮົາມີເລື່ອງຜິດໃຈກັນກໍ “ໃຫ້ຟ້າວຕົກລົງ” ກັນ. (ມທ. 5:25) ສະນັ້ນ ໃຫ້ເຈົ້າເປັນຝ່າຍໄປຫາພີ່ນ້ອງຄົນນັ້ນ ແລະໃຫ້ເວົ້າແບບເປີດໃຈກ່ຽວກັບບັນຫາຢ່າງກະລຸນາ. ແຕ່ການເຮັດແບບນີ້ອາດຈະບໍ່ງ່າຍ. ຍ້ອນຫຍັງ? ໃຫ້ເຮົາມາເບິ່ງ 2 ເຫດຜົນນຳກັນ.
ເຫດຜົນທຳອິດ ເຈົ້າອາດຈະຢາກປ່ອຍບັນຫາໄວ້ແບບນັ້ນເພາະມັນເຮັດໃຫ້ອຶດອັດໃຈຖ້າຈະເວົ້າເຖິງເລື່ອງນັ້ນອີກ.b ລອງຄິດເຖິງເລື່ອງຂອງຢູໂອເດຍແລະຊີນຕີເຂ. ພີ່ນ້ອງຍິງ 2 ຄົນນີ້ມີບັນຫາກັນ ແລະເບິ່ງຄືວ່າບັນຫາຂອງເຂົາເຈົ້າມັນແກ່ຍາວ. ແມ່ນແຕ່ໂປໂລທີ່ຢູ່ໄກຮອດໂຣມກໍໄດ້ຍິນເລື່ອງທີ່ເຂົາເຈົ້າຜິດກັນ. ລາວເລີຍເຕືອນໃຫ້ເຂົາເຈົ້າເຮັດທຸກຢ່າງທີ່ເຮັດໄດ້ເພື່ອຈະຄືນດີກັນໃຫ້ໄວທີ່ສຸດ. (ຟລປ. 4:2) ຖ້າທັງສອງຄົນຖ່ອມໂຕ ລົມກັນດີໆແລະຍົກໂທດໃຫ້ກັນແທ້ໆເຂົາເຈົ້າກໍຈະຍັງເປັນໝູ່ກັນໄດ້ຄືເກົ່າ.
ເຫດຜົນທີ 2 ເຈົ້າອາດຈະຄິດວ່າພີ່ນ້ອງຄົນນັ້ນຄວນຈະຍອມຮັບວ່າລາວເປັນຝ່າຍຜິດ. ແຕ່ຢ່າລືມວ່າເປົ້າໝາຍຂອງເຈົ້າແມ່ນຢາກຈະກັບມາຄືນດີກັນຄືເກົ່າ ບໍ່ແມ່ນຢາກພິສູດວ່າໃຜຜິດໃຜຖືກ. ໝໍທີ່ປົວກະດູກຫັກຈະສົນໃຈແຕ່ເລື່ອງການປົວກະດູກ ບໍ່ແມ່ນສົນໃຈຢາກຮູ້ລາຍລະອຽດທີ່ເຮັດໃຫ້ກະດູກຫັກ. ຄ້າຍຄືກັນ ຕອນທີ່ໄປລົມກັບພີ່ນ້ອງ ເຈົ້າກໍບໍ່ຕ້ອງສົນໃຈວ່າຜູ້ໃດຜິດຜູ້ໃດຖືກ. ແທນທີ່ຈະເປັນແນວນັ້ນ ໃຫ້ຈື່ວ່າສາຍສຳພັນຂອງທັງສອງຄົນມີຄ່າຫຼາຍ ແລະໃຫ້ພະຍາຍາມເຮັດທຸກຢ່າງເພື່ອຈະກັບມາຄືນດີກັນຄືເກົ່າ.
ຖ້າເຈົ້າກຳລັງມີບັນຫາກັບພີ່ນ້ອງ ລອງໄປລົມກັບລາວມື້ນີ້ເບິ່ງເພື່ອຈະກັບມາດີກັນຄືເກົ່າ. ຄຳພີໄບເບິນແນະນຳວ່າ: “ຢ່າໃຈຮ້າຍຈົນຮອດຕາເວັນຕົກດິນ.” (ອຟຊ. 4:26) ຖ້າເຈົ້າພະຍາຍາມຈະຄືນດີກັບພີ່ນ້ອງໃຫ້ໄວທີ່ສຸດ ເຈົ້າກໍກຳລັງຮັກສາ “ສັນຕິສຸກທີ່ຜູກພັນຄົນເຮົາໃຫ້ເປັນອັນໜຶ່ງອັນດຽວກັນ.”—ອຟຊ. 4:1-3
a ຖ້າພີ່ນ້ອງມີບັນຫາກັນໃນເລື່ອງເລັກໆນ້ອຍໆກໍຄວນໄປລົມກັນເປັນສ່ວນໂຕແລະຍົກໂທດໃຫ້ກັນຢ່າງໃຈກວ້າງ. (ມທ. 5:23, 24) ຖ້າ ເປັນເລື່ອງໃຫຍ່ ລາວອາດຈະຂໍໃຫ້ຜູ້ເບິ່ງແຍງຊ່ວຍ. (ມທ. 18:17) ແຕ່ລາວຄວນເຮັດຕາມຄຳແນະນຳໃນມັດທາຍ 18:15, 16 ກ່ອນ.
b ຖ້າພີ່ນ້ອງຄລິດສະຕຽນເຮັດໃຫ້ເຮົາຄຽດ ແຕ່ບໍ່ເຖິງຂັ້ນບໍ່ຢາກເປັນໝູ່ກັນ ເຮົາອາດຈະເລືອກທີ່ຈະເບິ່ງຂ້າມຄວາມຜິດນັ້ນລະກະແລ້ວ.—ສພສ. 26:20