ເຈົ້າຮູ້ບໍ?
ປະໂລຫິດຢູ່ວິຫານໃນເມືອງເຢຣູຊາເລັມເຮັດແນວໃດກັບເລືອດຂອງສັດທີ່ຖືກເຜົາເປັນເຄື່ອງບູຊາຢູ່ເທິງແທ່ນບູຊາ?
ໃນແຕ່ລະປີ ພວກປະໂລຫິດໃນສະໄໝອິດສະຣາເອນບູຮານເຜົາສັດຫຼາຍພັນໂຕເປັນເຄື່ອງບູຊາຢູ່ເທິງແທ່ນບູຊາຂອງວິຫານ. ນັກປະຫວັດສາດຊື່ໂຢເຊຟຸດຂຽນວ່າ ໃນວັນປັດສະຄາ ແກະນ້ອຍຫຼາຍກວ່າ 250.000 ໂຕຖືກເຜົາເປັນເຄື່ອງບູຊາ. ສະນັ້ນຈຶ່ງມີເລືອດຈຳນວນຫຼາຍທີ່ຕ້ອງກຳຈັດ. (ລລວ. 1:10, 11; ຈຊບ. 28:16, 19) ເລືອດທັງໝົດນີ້ໄຫຼໄປໃສ?
ນັກບູຮານຄະດີໄດ້ຄົ້ນພົບລະບົບລະບາຍນ້ຳທີ່ໃຫຍ່ໆຢູ່ອ້ອມວິຫານທີ່ເຮໂຣດສ້າງເຊິ່ງໃຊ້ຈົນຮອດຕອນທີ່ວິຫານຖືກທຳລາຍໃນປີ 70. ລະບົບລະບາຍນ້ຳນີ້ໃຊ້ເພື່ອກຳຈັດເລືອດອອກຈາກວິຫານ.
ຂໍໃຫ້ເບິ່ງ 2 ສິ່ງທີ່ຊ່ວຍເຮັດໃຫ້ແທ່ນບູຊາສະອາດ:
ຮູທີ່ຢູ່ພື້ນແທ່ນບູຊາ: ປຶ້ມເກົ່າແກ່ຫົວໜຶ່ງກ່ຽວກັບກົດໝາຍແລະປະເພນີຂອງຄົນຢິວທີ່ຂຽນໃນຕົ້ນສະຕະວັດທີ 3 ເວົ້າເຖິງລະບົບລະບາຍນ້ຳສຳລັບແທ່ນບູຊາ. ປຶ້ມຫົວນັ້ນເວົ້າວ່າ: “ຢູ່ແຈໜຶ່ງຂອງແທ່ນບູຊາມີຮູ 2 ຮູ. ເລືອດຂອງສັດທີ່ເຜົາເປັນເຄື່ອງບູຊາກັບນ້ຳທີ່ໃຊ້ລ້າງແທ່ນບູຊາຈະໄຫຼອອກໄປຕາມ 2 ຮູນີ້ ແລະໄຫຼລົງໄປຈົນຮອດຮ່ອມພູກິດໂຣນ.”
ນັກບູຮານຄະດີເຫັນດີກັບສິ່ງທີ່ຂຽນໃນປຶ້ມຫົວນັ້ນ. ປຶ້ມກ່ຽວກັບປະຫວັດສາດຂອງຄົນຢິວຢືນຢັນວ່ານັກບູຮານຄະດີໄດ້ຄົ້ນພົບທາງລະບາຍນ້ຳລະໜາດໃຫຍ່ຢູ່ໃກ້ໆວິຫານເຊິ່ງອາດຈະມີການໃຊ້ທາງລະບາຍນ້ຳເຫຼົ່ານີ້ເພື່ອໃຫ້ນ້ຳທີ່ປົນກັບເລືອດຂອງສັດທີ່ເຜົາເປັນເຄື່ອງບູຊາໄຫຼອອກໄປຈາກວິຫານ.
ນ້ຳຈຳນວນຫຼາຍ: ປະໂລຫິດຕ້ອງການນ້ຳຫຼາຍໆເພື່ອລ້າງພື້ນແທ່ນບູຊາແລະຮູລະບາຍໃຫ້ສະອາດ. ເພື່ອເຮັດໜ້າທີ່ທີ່ສຳຄັນນີ້ ປະໂລຫິດໄດ້ນ້ຳປະລິມານທີ່ເຂົາເຈົ້າຕ້ອງການຈາກເມືອງເຢຣູຊາເລັມ. ນ້ຳຈາກໃນເມືອງມາຮອດແທ່ນບູຊາໂດຍທາງຄອງນ້ຳ ລະບົບສົ່ງນ້ຳ ມີການເຮັດບ່ອນເກັບນ້ຳ ແລະຂຸດສະ. ນັກບູຮານຄະດີຊື່ໂຈເຊັບ ແພັດທຣິກເວົ້າວ່າ: “ເບິ່ງຄືວ່າບໍ່ມີວິຫານໃດໃນສະໄໝນັ້ນມີລະບົບນ້ຳທີ່ດີແບບນີ້ເພື່ອໃຫ້ມີນ້ຳໄປຮອດວິຫານແລະເພື່ອກຳຈັດນ້ຳທີ່ບໍ່ສະອາດ.”