ໝວດ 20
ພະເຍຊູຄລິດຖືກປະຫານຊີວິດ
ພະເຍຊູຈັດຕັ້ງການສະຫຼອງໃໝ່; ພະອົງຖືກທໍລະຍົດແລະຖືກຕອກໃສ່ຫຼັກ
ຫຼັງຈາກສາມປີເຄິ່ງຂອງການປະກາດແລະການສັ່ງສອນ ພະເຍຊູຮູ້ວ່າຊີວິດຂອງພະອົງຢູ່ແຜ່ນດິນໂລກໃກ້ຈະຈົບສິ້ນລົງແລ້ວ. ພວກຫົວໜ້າສາສະໜາຊາວຢິວວາງແຜນຮ່ວມກັນເພື່ອຂ້າພະອົງ ແຕ່ພວກເຂົາເຈົ້າຢ້ານເກີດມີການປະທ້ວງໃນທ່າມກາງປະຊາຊົນທີ່ເຊື່ອວ່າພະອົງເປັນຜູ້ພະຍາກອນ. ໃນຂະນະນັ້ນ ຊາຕານໄດ້ຊັກນຳຄົນໜຶ່ງໃນຈຳນວນອັກຄະສາວົກ 12 ຄົນຂອງພະເຍຊູ ຜູ້ນັ້ນຄືຢູດາອີດສະກາລີໂອດເພື່ອໃຫ້ຫັກຫຼັງພະເຍຊູ. ພວກຫົວໜ້າສາສະໜາສະເໜີເງິນ 30 ຫຼຽນໃຫ້ແກ່ຢູດາເພື່ອທໍລະຍົດພະເຍຊູ.
ໃນຄືນສຸດທ້າຍຂອງພະອົງ ພະເຍຊູເຕົ້າໂຮມພວກອັກຄະສາວົກເພື່ອສະຫຼອງປັດສະຄາ. ພາຍຫຼັງທີ່ບອກໃຫ້ຢູດາອອກໄປແລ້ວ ພະອົງໄດ້ຕັ້ງການສະຫຼອງໃໝ່ຂຶ້ນ ນັ້ນແມ່ນການສະຫຼອງອາຫານແລງຂອງພະອົງເຈົ້າ. ພະອົງໄດ້ຈັບເອົາເຂົ້າຈີ່ກ້ອນໜຶ່ງ ອະທິດຖານ ແລະຍື່ນເຂົ້າຈີ່ໃຫ້ອັກຄະສາວົກທັງ 11 ຄົນທີ່ຍັງເຫຼືອຢູ່. ພະອົງກ່າວວ່າ “ອັນນີ້ເປັນກາຍຂອງເຮົາ ອັນເປັນທີ່ປະທານໃຫ້ສຳລັບທ່ານທັງຫຼາຍ. ທ່ານທັງຫຼາຍຈົ່ງກະທຳການນີ້ເປັນທີ່ລະນຶກຄຶດຮອດເຮົາ.” ພະອົງເຮັດແບບດຽວກັນກັບຈອກເຫຼົ້າແວງ ໂດຍກ່າວວ່າ “ຈອກນີ້ເປັນຄຳສັນຍາໃໝ່ໃນເລືອດຂອງເຮົາທີ່ຖອກອອກສຳລັບທ່ານທັງຫຼາຍ.”—ລືກາ 22:19, 20.
ພະເຍຊູມີຫຼາຍສິ່ງທີ່ຈະເວົ້າກັບພວກອັກຄະສາວົກໃນຄືນນັ້ນ. ພະອົງໄດ້ໃຫ້ຄຳສັ່ງໃໝ່ຂໍ້ໜຶ່ງກັບເຂົາເຈົ້າ ນັ້ນຄືເຂົາເຈົ້າຄວນສະແດງຄວາມຮັກແບບບໍ່ເຫັນແກ່ຕົວຕໍ່ກັນແລະກັນ. ພະອົງກ່າວວ່າ “ຄົນທັງປວງຈະຮູ້ຈັກວ່າທ່ານທັງຫຼາຍເປັນລູກສິດຂອງເຮົາດ້ວຍການນີ້ ຄືວ່າຖ້າທ່ານທັງຫຼາຍມີຄວາມຮັກໃນທ່າມກາງພວກທ່ານ.” (ໂຢຮັນ 13:34, 35) ພະອົງກະຕຸ້ນເຕືອນເຂົາເຈົ້າວ່າຢ່າວຸ່ນວາຍໃຈຕໍ່ເຫດການເປັນຕາໂສກເສົ້າທີ່ພວມຈະເກີດຂຶ້ນ. ພະເຍຊູອະທິດຖານຢ່າງຈິງຈັງເພື່ອເຂົາເຈົ້າ. ເຂົາເຈົ້າພາກັນຮ້ອງເພງສັນລະເສີນບົດໜຶ່ງແລະອອກໄປສູ່ສວນເຄດເຊມາເນນຳກັນໃນຄືນນັ້ນ.
ຢູ່ໃນສວນເຄດເຊມາເນ ພະເຍຊູຄູ້ເຂົ່າລົງແລະອະທິດຖານເຖິງພະເຈົ້າຢ່າງຈິງຈັງ. ບໍ່ດົນທະຫານກຸ່ມໜຶ່ງພ້ອມກັບອາວຸດ ພວກປະໂລຫິດແລະຄົນອື່ນໆໄດ້ມາທີ່ນັ້ນເພື່ອຈັບພະອົງ. ຢູດາເຂົ້າໄປແລະຊີ້ຕົວພະເຍຊູໂດຍການຈູບພະອົງ. ໃນຂະນະທີ່ພວກທະຫານມັດພະເຍຊູໄວ້ ພວກອັກຄະສາວົກກໍພາກັນໜີໄປ.
ເມື່ອຢືນຢູ່ຕໍ່ໜ້າສານສູງຂອງຊາວຢິວ ພະເຍຊູລະບຸຕົວເອງວ່າເປັນລູກຊາຍຂອງພະເຈົ້າ. ສານຖືວ່າພະອົງກະທຳຜິດໃນສະຖານໝິ່ນປະໝາດພະເຈົ້າແລະມີຮັບຜິດຊອບເຖິງຕາຍໄດ້. ຈາກນັ້ນພະເຍຊູຖືກພາໂຕໄປຫາທ່ານປົນເຊພີລາດເຊິ່ງເປັນຜູ້ວ່າການລັດຈາກໂລມ. ເຖິງແມ່ນວ່າພີລາດບໍ່ພົບຄວາມຜິດໃດໆໃນພະເຍຊູ ລາວມອບພະອົງໃຫ້ກັບກຸ່ມຄົນທີ່ຮ້ອງໂວຍວາຍຢາກໃຫ້ພະອົງຕາຍ.
ພະເຍຊູຖືກພາໄປໂຄລະໂຄທາເຊິ່ງເປັນບ່ອນທີ່ພວກທະຫານໂລມຕອກພະອົງໃສ່ຫຼັກ. ມີຄວາມມືດປົກຄຸມກາງເວັນຢ່າງອັດສະຈັນ. ຕໍ່ມາໃນຕອນສວາຍຂອງມື້ນັ້ນພະເຍຊູໄດ້ສິ້ນຊີວິດ ແລະເກີດແຜ່ນດິນໄຫວທີ່ຮຸນແຮງຫຼາຍ. ສົບຂອງພະອົງຖືກວາງໄວ້ໃນຖ້ຳຫີນທີ່ເຈາະໄວ້ມ້ຽນສົບ. ມື້ຕໍ່ມາພວກປະໂລຫິດໄດ້ອັດປາກຖ້ຳນັ້ນແລະສັ່ງທະຫານໃຫ້ຍາມທາງເຂົ້າ. ພະເຍຊູຈະຍັງຢູ່ໃນຖ້ຳນັ້ນຕໍ່ໄປບໍ? ບໍ່. ການອັດສະຈັນທີ່ຍິ່ງໃຫຍ່ທີ່ສຸດພວມຈະເກີດຂຶ້ນ.
—ຂໍ້ມູນມາຈາກມັດທາຍບົດ 26 ແລະ 27; ມາລະໂກບົດ 14 ແລະ 15; ລືກາບົດ 22 ແລະ 23; ໂຢຮັນບົດ 12 ຫາ 19.