ພໍ່ແມ່ບາງຄົນເວົ້າແນວໃດ?
ເມື່ອລູກເປັນໄວຮຸ່ນ ພໍ່ແມ່ຫຼາຍຄົນປະສົບຂໍ້ທ້າທາຍຫຼາຍຢ່າງທີ່ບໍ່ເຄີຍພົບມາກ່ອນ. ພໍ່ແມ່ຈະຊ່ວຍລູກແນວໃດໃຫ້ປະສົບຜົນສຳເລັດໃນໄລຍະນີ້ຂອງຊີວິດ ເຊິ່ງອາດເຮັດໃຫ້ທັງລູກແລະພໍ່ແມ່ສັບສົນ? ຂໍໃຫ້ສັງເກດສິ່ງທີ່ພໍ່ແມ່ບາງຄົນຈາກທົ່ວໂລກໄດ້ເວົ້າ.
ການປ່ຽນແປງ
“ເມື່ອຍັງນ້ອຍ ລູກຈະເຊື່ອຟັງໂດຍບໍ່ສົງໄສຫຍັງເລີຍ. ແຕ່ເມື່ອເປັນໄວຮຸ່ນ ເບິ່ງຄືວ່າລູກບໍ່ເຊື່ອໝັ້ນໃນສິ່ງທີ່ຂ້ອຍເວົ້າ. ລູກສົງໄສທັງໃນສິ່ງທີ່ຂ້ອຍເວົ້າແລະວິທີທີ່ຂ້ອຍເວົ້າ.”—ທ. ແຟັຣງ ຈາກປະເທດການາດາ.
“ລູກຊາຍຂອງຂ້ອຍບໍ່ເວົ້າຫຼາຍຄືແຕ່ກ່ອນ. ຂ້ອຍຕ້ອງຖາມວ່າລູກຄຶດຫຍັງຢູ່ແທນທີ່ຈະຖ້າໃຫ້ລູກບອກ. ຂ້ອຍຖາມຫຍັງລູກກໍບໍ່ມັກຕອບ ແລະຕ້ອງຖ້າບຶດໜຶ່ງລູກຈຶ່ງຕອບ.”—ທ. ຟຣານຊິດສ ຈາກປະເທດອົດສະຕຣາລີ.
“ຄວາມອົດທົນເປັນສິ່ງສຳຄັນຫຼາຍ. ບາງຄັ້ງເຮົາຢາກຮ້າຍລູກຍ້ອນຄວາມໃຈຮ້າຍ ແຕ່ການສະຫງົບໃຈແລະຄ່ອຍໆເວົ້າກັບລູກຈະແກ້ບັນຫາໄດ້ດີກວ່າສະເໝີ.”—ນ. ເຟລິເຊຍ ຈາກປະເທດສະຫະລັດອາເມຣິກາ.
ການເວົ້າລົມກັນ
“ບາງຄັ້ງລູກສາວໄວຮຸ່ນຈະຖຽງເພື່ອປົກປ້ອງຕົວເອງ ແລະລູກຄຶດວ່າຂ້ອຍມັກຕຳໜິລາວ. ຂ້ອຍເນັ້ນໃຫ້ລູກຮູ້ວ່າຂ້ອຍຮັກລາວ ແລະພວກເຮົາຢູ່ຝ່າຍດຽວກັນ ແລະຂ້ອຍສະໜັບສະໜູນລາວ.”—ນ. ລິຊາ ຈາກປະເທດສະຫະລັດອາເມຣິກາ.
“ເມື່ອຍັງນ້ອຍ ລູກຈະບອກຂ້ອຍທຸກສິ່ງທຸກຢ່າງ ຈຶ່ງຮູ້ໄດ້ເລີຍວ່າລູກຄຶດຫຍັງຢູ່. ຕອນນີ້ຂ້ອຍຕ້ອງພະຍາຍາມເຂົ້າໃຈຄວາມຮູ້ສຶກຂອງລູກແລະໃຫ້ກຽດເຂົາເຈົ້າ. ນີ້ເປັນວິທີດຽວທີ່ລູກຈະບອກຄວາມໃນໃຈໃຫ້ຂ້ອຍຟັງ.”—ນ. ນັນຮິ ຈາກປະເທດເກົາຫຼີ.
“ສຳລັບໄວຮຸ່ນ ການຫ້າມບໍ່ໃຫ້ເຮັດນັ້ນຍັງບໍ່ພໍ ແຕ່ຕ້ອງຫາເຫດຜົນແລະລົມກັນຈົນເຂົ້າໃຈ. ເພື່ອຈະໃຫ້ລູກເວົ້າອອກມາ ເຮົາຕ້ອງເຕັມໃຈຟັງສິ່ງທີ່ລູກຈະເວົ້າ ລວມທັງສິ່ງທີ່ເຮົາອາດບໍ່ຢາກໄດ້ຍິນ.”—ນ. ດາລິລາ ຈາກປະເທດເບຣຊີນ.
“ຖ້າຂ້ອຍຕ້ອງແກ້ໄຂຕັກເຕືອນລູກ ຂ້ອຍຈະບໍ່ເຮັດຕໍ່ໜ້າຄົນອື່ນ.”—ນ. ເອັດນາ ຈາກປະເທດນີເຊເຣຍ.
“ບາງຄັ້ງເມື່ອກຳລັງລົມກັບລູກຊາຍ ກໍມີວຽກອື່ນໃນເຮືອນເຂົ້າມາຂັດຈັງຫວະແລະຂ້ອຍຈຶ່ງບໍ່ໄດ້ຕັ້ງໃຈຟັງ. ລູກຮູ້ວ່າຂ້ອຍບໍ່ໄດ້ຟັງ ແລະຂ້ອຍຄຶດວ່ານັ້ນເປັນເຫດຜົນໜຶ່ງທີ່ລູກບໍ່ເວົ້າລົມກັບຂ້ອຍຫຼາຍ. ຂ້ອຍຕ້ອງພະຍາຍາມຟັງຫຼາຍຂຶ້ນເມື່ອເຮົາລົມກັນເພື່ອລູກຈະເປີດເຜີຍຄວາມຮູ້ສຶກຂອງລາວຕໍ່ໆໄປ.”—ນ. ມິຣິອາມ ຈາກປະເທດເມັກຊິກ.
ການມີອິດສະຫຼະ
“ຂ້ອຍເຄີຍກັງວັນເລື່ອງການໃຫ້ອິດສະຫຼະກັບລູກທີ່ເປັນໄວຮຸ່ນ ແລະນັ້ນຄົງຈະເປັນຕົ້ນເຫດຂອງການຂັດແຍ່ງກັນໃນບາງຄັ້ງ. ຂ້ອຍລົມເລື່ອງນີ້ກັບລູກແບບກົງໄປກົງມາ. ຂ້ອຍບອກເຫດຜົນທີ່ເປັນຫ່ວງ ຈາກນັ້ນລູກກໍບອກເຫດຜົນທີ່ເຂົາເຈົ້າຢາກໄດ້ອິດສະຫຼະຫຼາຍຂຶ້ນ. ເຮົາສາມາດຕົກລົງກັນໄດ້ ຄືໃຫ້ລູກມີອິດສະຫຼະຫຼາຍຂຶ້ນແຕ່ຕ້ອງຢູ່ໃນຂອບເຂດທີ່ກຳນົດໄວ້.”—ທ. ເອັດວິນ ຈາກປະເທດການາ.
“ລູກຊາຍຢາກໄດ້ລົດຈັກ ແຕ່ຂ້ອຍບໍ່ເຫັນດີນຳ. ຂ້ອຍຮ້າຍລູກແລະເວົ້າເຖິງແຕ່ຈຸດບໍ່ດີຂອງລົດຈັກໂດຍບໍ່ໃຫ້ລູກມີໂອກາດອະທິບາຍ. ນັ້ນເຮັດໃຫ້ລູກຄຽດແລະຕັ້ງໃຈທີ່ຈະຊື້ລົດຈັກໃຫ້ໄດ້! ຂ້ອຍຈຶ່ງລອງໃຊ້ວິທີໃໝ່. ຂ້ອຍຂໍໃຫ້ລູກໄປຄົ້ນຄວ້າຢ່າງລະອຽດໃນເລື່ອງອັນຕະລາຍ ຄ່າໃຊ້ຈ່າຍ ຂໍ້ຮຽກຮ້ອງໃນການເຮັດໃບຂັບຂີ່ແລະຕໍ່ໃບຂັບຂີ່. ຂ້ອຍບອກລູກໃຫ້ໄປຂໍຄຳແນະນຳຈາກຄລິດສະຕຽນທີ່ອາວຸໂສໃນປະຊາຄົມ. ຂ້ອຍສຳນຶກວ່າແທນທີ່ຈະບັງຄັບລູກ ຈະດີກວ່າຖ້າໃຫ້ລູກບອກໃນສິ່ງທີ່ລູກຕ້ອງການ. ໂດຍວິທີນີ້ຂ້ອຍສາມາດເຂົ້າເຖິງຫົວໃຈຂອງລູກໄດ້.”—ນ. ຫາຍຢັງ ຈາກປະເທດເກົາຫຼີ.
“ເຮົາຕັ້ງຂໍ້ຈຳກັດ ແຕ່ກໍໃຫ້ອິດສະຫຼະລູກເທື່ອລະເລັກລະໜ້ອຍ ເມື່ອລູກປະພຶດດີຂຶ້ນກໍຈະໄດ້ອິດສະຫຼະຫຼາຍຂຶ້ນ. ເຮົາໃຫ້ລູກພິສູດຕົວວ່າສົມຄວນທີ່ຈະໄດ້ອິດສະຫຼະຫຼາຍຂຶ້ນ ແລະກໍບອກໃຫ້ລູກຮູ້ວ່າເຮົາຢາກໃຫ້ລູກໄດ້ສິ່ງນັ້ນ ແຕ່ຖ້າລູກໃຊ້ມັນໃນທາງທີ່ຜິດກໍຕ້ອງໄດ້ຮັບຜົນ.”—ນ. ໂດໂຣຕີ ຈາກປະເທດຝຣັ່ງ.
“ຂ້ອຍບໍ່ເຄີຍຜ່ອນຜັນກົດທີ່ວາງໄວ້. ແຕ່ຖ້າລູກເຊື່ອຟັງ ຂ້ອຍກໍຈະຍອມຜ່ອນສັ້ນຜ່ອນຍາວໃຫ້ລູກ. ຕົວຢ່າງເຊັ່ນ ໃນບາງໂອກາດຂ້ອຍຈະອະນຸຍາດໃຫ້ລູກເມືອເຮືອນເດິກໄດ້. ແຕ່ຖ້າຫຼາຍເທື່ອລູກບໍ່ເມືອເຮືອນຕາມເວລາທີ່ກຳນົດໄວ້ ລູກກໍຈະຖືກລົງໂທດ.”—ທ. ອີນຢວນ ຈາກປະເທດເກົາຫຼີ.
“ແຮ່ງລູກຈ້າງເຊື່ອຟັງແລະຮັບຜິດຊອບຫຼາຍເທົ່າໃດ ນາຍຈ້າງກໍແຮ່ງຈະໃຫ້ຄວາມເຊື່ອຖືຫຼາຍເທົ່ານັ້ນ. ໃນທຳນອງດຽວກັນ ລູກຊາຍຮູ້ວ່າຖ້າເຊື່ອຟັງແລະມີຄວາມຮັບຜິດຊອບຕາມຂໍ້ກຳນົດທີ່ເຮົາຕັ້ງໄວ້ ລາວກໍຈະໄດ້ອິດສະຫຼະຫຼາຍຂຶ້ນເລື້ອຍໆ. ເຊັ່ນດຽວກັບລູກຈ້າງທີ່ຖືກລົງໂທດຍ້ອນຂາດຄວາມຮັບຜິດຊອບ ລູກກໍຮູ້ວ່າອາດສູນເສຍອິດສະຫຼະຍ້ອນຂາດຄວາມຮັບຜິດຊອບ.”—ທ. ຣາມອນ ຈາກປະເທດເມັກຊິກ.
[ຖ້ອຍຄຳທີ່ຍົກມາໜ້າ 22]
“ຈົ່ງເຝິກຫັດເດັກນ້ອຍຕາມລະບຽບຮີດຄອງແຫ່ງຕົນ ແລະເມື່ອເຖິງເຖົ້າແລ້ວເພິ່ນຈະບໍ່ເວັ້ນໜີຈາກຮີດຄອງນັ້ນ.”—ສຸພາສິດ 22:6
[ຮູບພາບໜ້າ 23]
ປະສົບການຂອງຄອບຄົວ
“ການລ້ຽງດູລູກໄວຮຸ່ນເປັນປະສົບການທີ່ດີຫຼາຍ”
ທ້າວ ໂຈເຊບ: ລູກສາວຜູ້ທີໜຶ່ງແລະຜູ້ທີສອງເປັນໄວຮຸ່ນ ແລະຂ້ອຍເຫັນວ່າເປັນເລື່ອງສຳຄັນທີ່ຈະຟັງແລະຍອມຮັບຄວາມຄິດເຫັນຂອງລູກ. ການຍອມຮັບຂໍ້ຜິດພາດຂອງຕົວເອງ ແລະສະແດງຄວາມນັບຖືເມື່ອເວົ້າກັບລູກຊ່ວຍໃຫ້ມີການເວົ້າລົມກັນຢູ່ສະເໝີ. ສະຫຼຸບແລ້ວ ຂ້ອຍຮູ້ສຶກວ່າການລ້ຽງດູລູກໄວຮຸ່ນເປັນປະສົບການທີ່ດີຫຼາຍເນື່ອງຈາກເຮົາໄດ້ຮັບຄຳແນະນຳຈາກຄຳພີໄບເບິນ.
ນາງ ລິຊາ: ຂ້ອຍສັງເກດເຫັນວ່າເມື່ອລູກສາວກົກເປັນໄວຮຸ່ນ ລາວຢາກໃຫ້ແມ່ສົນໃຈລາວຫຼາຍຂຶ້ນ. ຂ້ອຍຈື່ໄດ້ວ່າຕ້ອງໃຊ້ເວລາຫຼາຍໃນການຟັງ ການລົມກັນ ແລະໃຫ້ກຳລັງໃຈລູກ. ຂ້ອຍກັບຜົວບອກໃຫ້ລູກຮູ້ວ່າມີຫຍັງກໍໃຫ້ເວົ້າກັບພໍ່ແມ່ໂລດ ແລະເຮົາເຂົ້າໃຈຄວາມຮູ້ສຶກຂອງລູກ. ຂ້ອຍພະຍາຍາມເຮັດຕາມຄຳແນະນຳທີ່ດີໃນຢາໂກໂບ 1:19 ທີ່ບອກວ່າ “ໃຫ້ຄົນທຸກຄົນວ່ອງໄວໆຈະຟັງ ໃຫ້ຊ້າໆຈະເວົ້າ.”
ນາງ ວິກຕໍເລຍ: ແມ່ເປັນໝູ່ທີ່ດີທີ່ສຸດຂອງຂ້ອຍ. ຂ້ອຍບໍ່ເຄີຍເຫັນຜູ້ໃດທີ່ອ່ອນຫວານແລະຫ່ວງໃຍຄົນອື່ນຫຼາຍສ່ຳແມ່ ແລະແມ່ຈະເປັນແບບນັ້ນກັບໝົດທຸກຄົນ. ແມ່ເປັນຄົນທີ່ຈິງໃຈທີ່ສຸດ ແລະຂ້ອຍດີໃຈທີ່ມີແມ່ແບບນີ້.
ນາງ ໂອລິເວຍ: ພໍ່ຂອງຂ້ອຍຫ່ວງໃຍຄົນອື່ນແລະໃຈກວ້າງ. ພໍ່ຍິນດີຊ່ວຍເຫຼືອຄົນອື່ນສະເໝີທາງດ້ານວັດຖຸ ເຖິງວ່າເຮົາເອງຈະບໍ່ມີຫຼາຍ. ບາງຄັ້ງພໍ່ເປັນຄົນທີ່ຈິງຈັງ ແຕ່ບາງຄັ້ງກໍເປັນຄົນມ່ວນຊື່ນແທ້ໆ. ພໍ່ເປັນພໍ່ທີ່ດີເລີດ ແລະຂ້ອຍກໍດີໃຈທີ່ມີພໍ່ແບບນີ້!
ເຮົາບໍ່ມີເວລາທີ່ຈະເບື່ອເລີຍ!”
ທ້າວ ຊັນນີ: ຖ້າລູກມີບັນຫາ ເຮົາຈະນັ່ງລົມກັນເປັນຄອບຄົວ. ເຮົາບໍ່ມີເລື່ອງຫຍັງປິດບັງກັນ ແລະເຮົາຕັດສິນໃຈໂດຍໃຊ້ຫຼັກການໃນຄຳພີໄບເບິນ. ຂ້ອຍກັບເມຍພະຍາຍາມໃຫ້ລູກຄົບຫາກັບຄົນທີ່ມີນິດໄສດີເຊິ່ງມີຄວາມຄຶດເປັນຜູ້ໃຫຍ່. ໝູ່ຂອງເຮົາກໍເປັນໝູ່ຂອງລູກ ແລະໝູ່ຂອງລູກກໍເປັນໝູ່ຂອງເຮົາຄືກັນ.
ນາງ ອິເນສ: ເຮົາບໍ່ຢູ່ລ້າໆ ແລະເຮົາເຮັດສິ່ງຕ່າງໆນຳກັນເປັນຄອບຄົວ. ເນື່ອງຈາກເປັນພະຍານພະເຢ ໂຫວາ ເຮົາມີວຽກປະກາດ ສຶກສາຄຳພີໄບເບິນສ່ວນຕົວ ແລະສຶກສາປະຈຳຄອບຄົວ ແລະຍັງມີວຽກອາສາສະໝັກເຊັ່ນ ວຽກບັນເທົາທຸກແລະການສ້າງຫໍປະຊຸມ. ເຮົາຍັງເຮັດສິ່ງເຫຼົ່ານີ້ໃຫ້ພໍດີກັບການພັກຜ່ອນ. ເຮົາບໍ່ມີເວລາທີ່ຈະເບື່ອເລີຍ!
ນາງ ເຄວຊີ: ພໍ່ເປັນຜູ້ຟັງທີ່ດີ ແລະປຶກສາກັບຄອບຄົວສະເໝີກ່ອນຕັດສິນໃຈໃນເລື່ອງທີ່ສຳຄັນ. ແມ່ພ້ອມທີ່ຈະຊ່ວຍແລະຟັງເມື່ອໃດກໍຕາມທີ່ຂ້ອຍຕ້ອງການເພິ່ນ.
ນາງ ສະແມນທາ: ແມ່ເຮັດໃຫ້ຂ້ອຍຮູ້ສຶກວ່າຂ້ອຍເປັນຄົນພິເສດ ຄົນສຳຄັນ ແລະເປັນຄົນທີ່ແມ່ຮັກຫຼາຍ ແຕ່ບາງຄັ້ງແມ່ກໍບໍ່ຮູ້ດອກວ່າເຮັດໃຫ້ຂ້ອຍຮູ້ສຶກແບບນັ້ນ. ແມ່ຫ່ວງໃຍແລະພ້ອມທີ່ຈະຮັບຟັງ. ຂ້ອຍຈະບໍ່ຍອມໃຫ້ສິ່ງໃດມາທຳລາຍຄວາມໃກ້ຊິດຂອງເຮົາ.
[ຮູບພາບ]
ທ້າວ ໂຈເຊບແລະນາງ ລິຊາພ້ອມກັບລູກສາມຄົນຊື່ ນາງ ວິກຕໍເລຍ ນາງ ໂອລິເວຍ ແລະນາງ ອິດສະແບວລາ
ຄອບຄົວຂອງທ້າວ ຊັນນີແລະນາງ ອິເນສພ້ອມກັບລູກສາວຊື່ນາງ ເຄວຊີແລະນາງ ສະແມນທາ
[ຮູບພາບໜ້າ 22]
ພໍ່ແມ່ອາດຈະໃຫ້ອິດສະຫຼະໃນລະດັບໃດໜຶ່ງ ແຕ່ຕ້ອງມີຂໍ້ກຳນົດທີ່ສົມເຫດສົມຜົນ