Tókolisa makoki na biso ya kosakola—Tóbongisaka maloba na biso ya kobanda lisolo

Mpo na nini ezali na ntina: Soki ndenge oyo tobandi lisolo ezali kobenda likebi ya moto oyo tozali kosolola na ye te, akoki kokata lisolo liboso tópesa ye litatoli. Yango wana, basakoli mingi bamonaka ete maloba na bango ya kobanda lisolo ezali na ntina mingi. Atako maloba mpo na ndenge ya kobanda lisolo ezalaka na Mosala na biso ya Bokonzi mpe na buku Ndenge ya kosolola, kasi yango ezalaka na makambo nyonso te oyo ekosala ete tóyokanisa yango na moto oyo tozali kosolola na ye. Ata soki maloba yango ezali mobimba, basakoli mosusu bakoki komona malamu bábongola yango mwa moke to bábongisa oyo ya bango moko. Na ndenge yango, tokosakola malamu soki tozali kobongisa maloba na biso ya ebandeli na esika ya koloba kaka oyo ekoyela biso ntango moto afungoli porte.—Mas. 15:28.

Ndenge ya kosala yango:

Poná lisolo oyo okolobela. Esengeli kouta na mokanda oyo ozali kokabola mpe esengeli kosepelisa bato ya teritware na yo.
Bongisá malamumalamu fraze moko to bafraze mibale oyo okoloba nsima ya kopesa bato mbote ndenge esalemaka epai na bino. Okoki kobanda boye: “Nayei awa mpo na . . . ,” “Bato mingi bazali komitungisa mpo na . . . ,” “Nalingi koyeba likanisi na yo mpo na . . . ,” to ndenge mosusu. Mbala mingi, maloba mokuse mpe ya mindɔndɔ te ezalaka malamu mingi. Basakoli mosusu bakangaka maloba na bango ya kobanda lisolo na motó.
Tuná motuna oyo ekotinda moto abimisa makanisi na ye mpo bósolola. (Mat. 17:25) Kobosana te ete ntango mosusu moto yango azalaki kokanisa makambo mosusu liboso yo oya; na yango motuna na yo esengeli kozala mpasi te mpo ebangisa ye te.

Meká kosala boye na boumeli ya sanza:

Na losambo na bino na kati ya libota, bózwa mwa miniti ya kobongisa mpe komekameka maloba ya kobanda lisolo.
Ntango bokei kosakola, yebisá basakoli mosusu makambo oyo okani koloba. (Mas. 27:17) Salelá maloba mosusu soki oyo obongisaki esepelisi mpenza bato te.