Bamisionɛrɛ “tii na esika eleki mpenza mosika na mabele”

Yesu ayebisaki bayekoli na ye ete: “Bokozala batatoli na ngai . . . tii na esika eleki mpenza mosika na mabele.” (Misala 1:8) Lelo oyo, Batatoli ya Yehova bazali kokokisa etinda yango na molende mpenza. Nzokande, na bisika mosusu awa na mabele, ata na bamboka ya minene mpenza, oyo etondi na bato, bazwi naino litatoli malamumalamu te. Kutu, na bamboka mosusu, Batatoli ya Yehova bazali moke mpenza. (Matai 9:37, 38) Tozali kosala nini mpo bato ebele mpenza bázwa litatoli?

Mpo na kotosa etinda yango ya Yesu, Departema ya mosala ya Komite ya Lisangani ya Mikóló-Bakambi ya Batatoli ya Yehova ezali kotinda bamisionɛrɛ na bateritware oyo ezali na bosɛnga ya basakoli na mokili mobimba. Sikoyo, na mokili mobimba, teritware yango ezali 3 090.a Bandeko yango mingi bazwá formasyo na biteyelo ya Biblia, na ndakisa na Eteyelo ya bapalanganisi ya nsango malamu ya Bokonzi. Bamisionɛrɛ bazali kondima kotika bamboka na bango mpo na kokende na mboka-mopaya. Lokola bamisionɛrɛ yango ya sembo bakɔmeli na elimo, bazwi formasyo, mpe bayebi makambo mingi, bazali kosalisa na kopalanganisa nsango malamu mpe kopesa bayekoli ya sika ndakisa malamu.

Kosalisa bamisionɛrɛ mpo básalisa basusu

Na Betele nyonso, Biro ya mosala ya kosakola ya Departema ya mosala esalaka elongo na Komite ya filiale mpo na kosalisa bamisionɛrɛ; na ndakisa, basalisaka bango na kozwa ndako oyo ebongi, na kokende epai ya monganga, mpe na kopesa bango mwa mbongo ya kobikela. Na mobu ya mosala 2020, Batatoli ya Yehova babimisaki mbongo dolare pene na milio 27 mpo na kosalisa bamisionɛrɛ. Na lisalisi ya bibongiseli yango, bamisionɛrɛ bazali na likoki ya kotya makanisi na bango nyonso mpe makasi na bango nyonso na mosala ya kosakola, mpe na kokómisa masangá makasi.

Ndenge nini bamisionɛrɛ oyo bazali na teritware bazali kosalisa na mosala ya kosakola? Ndeko Frank Madsen, oyo asalaka na Komite ya filiale ya Malawi, alobi boye: “Lokola bamisionɛrɛ bazali na mpiko mpe bayebi mosala, bazali kosalisa masangá mpo ebanda kosakola na bateritware ya mindɔndɔ, epai kokɔta ezali mpasi mpe epai balobaka minɔkɔ ya bapaya. Lisusu, lokola bazali kosala makasi báyeba monɔkɔ ya mboka mpe mimeseno ya bato, bazali kopesa basusu ndakisa ya malamu, mpe bazali kosalisa bilenge bákɔta na mosala ya ntango nyonso. Tozali kopesa Yehova matɔndi mingi mpo na bamisionɛrɛ oyo bazali na teritware.”

Ndeko moko oyo azali na Komite ya filiale na mboka mosusu alobi boye: “Bamisionɛrɛ bazali mpenza ndakisa oyo ezali komonisa mpenza polele ete basaleli ya Yehova na mokili mobimba bazali na bomoko. Ata bato oyo bazali Batatoli ya Yehova te bazali komona polele ete mimeseno ya bamboka na biso ekaboli biso te, mpe ete mateya ya Biblia esalisi biso tókóma na bomoko ndenge bandeko bazalaka na yango.”

Ndenge nini bamisionɛrɛ bazali kosalisa bandeko na masangá epai batindi bango? Ndeko Paulo, oyo afandaka na Timor oriental, azali mpenza kosepela na bamisionɛrɛ oyo batindá na lisangá na bango. Alobi boye: “Mboka na biso ezali na molunge makasi mpenza. Atako bamisionɛrɛ bauti na bamboka ya malili, molunge ezali ata moke te kopekisa bango kosakola. Bazangaka te na likita ya ntɔngɔ mpo na mosala ya kosakola. Namonaka bango mbala na mbala na midi, na ntango ya moi makasi, ata mpe na bampokwa, bazali kozongela bato. Basalisi bato ebele báyeba mateya ya Biblia, ezala mpe ngai. Na molende mpe na nsai, bazali kolekisa bomoi na bango mobimba mpo na kosalela Yehova, mpe yango ezali kotinda lisangá mobimba básalela Yehova na motema mobimba.”

Ketti, oyo azali mobongisi-nzela ya sanza na sanza na Malawi, ayebisi ndenge bamisionɛrɛ moko boye, mwasi ná mobali, basalisaki libota na bango: “Ntango batindaki bamisionɛrɛ na lisangá na biso, kaka ngai moko moto nazalaki Motatoli ya Yehova na libota na biso. Kasi, bamisionɛrɛ yango basalisaki ngai mingi, mpe bakómaki baninga ya libota na biso. Ndakisa malamu na bango esalisaki bana na ngai bámona ete kosalela Yehova ebongisaka bomoi ya libota mpe epesaka esengo. Ndakisa malamu ya bamisionɛrɛ wana etindá bana na ngai misato ya basi bákóma babongisi-nzela ya sanza na sanza mpe mobali na ngai abanda koyangana na makita.”

Mbongo ya kosalisa bamisionɛrɛ wana eutaka wapi? Eutaka na makabo oyo bato bapesaka mpo na mosala ya kosakola na mokili mobimba, oyo mingi na yango bapesaka yango na nzela ya mayele ndenge na ndenge oyo ezali na donate.jw.org. Makabo yango ezali na motuya mingi mpenza.