Mosani azali kotala tike na ye ya tombola ntango bazali koyebisa na televizyo ndenge lisano esuki

Masano ya mbongo ezali lisumu?

Eyano ya Biblia

Atako Biblia elobeli masano ya mbongo na mozindo te, na kotalela mitinda ya Biblia tokoyeba ete Nzambe amonaka ete masano ya mbongo ezali lisumu.—Baefese 5:17.a

Lokoso nde etindaka na masano ya mbongo, likambo oyo Nzambe ayinaka. (1 Bakorinti 6:9, 10; Baefese 5:3, 5) Baoyo babɛtaka masano ya mbongo bazalaka na makanisi ya kozwa mbongo ya baoyo balongi te, kasi Biblia eboyi kolula biloko ya basusu.—Kobima 20:17; Baroma 7:7; 13:9, 10.
Kobɛta lisano ya mbongo ata mpo na oyo ya moke, ekoki kokolisa mposa mabe ya mbongo.—1 Timote 6:9, 10.
Mbala mingi bato ya masano ya mbongo batyaka motema na bikelakela to libaku malamu. Kasi, Nzambe atalelaka makanisi ya bongo lokola losambo ya bikeko, oyo eyokani te na losambo na ye.—Yisaya 65:11.
Na esika ya kokóma na mposa ya kozwa eloko kaka ofele, Biblia elendisaka biso tósala mosala makasi. (Mosakoli 2:24; Baefese 4:28) Baoyo balandaka toli ya Biblia bakoki ‘kolya bilei oyo bango moko bazwi.’—2 Batesaloniki 3:10, 12.
Masano ya mbongo ekoki kolendisa elimo ya kowelana, likambo oyo Biblia eboyi.—Bagalatia 5:26.

a Biblia elobeli polele masano ya ndenge wana kaka epai ya basoda ya Baroma oyo babwakaki mbɛsɛ, to “babɛtaki zeke” na bilamba ya Yesu mpo na koluka matomba na bango moko.—Matai 27:35; Yoane 19:23, 24; Biblia na lingala ya lelo.