Video ya sika mpo na kobanda koyekola na bato Biblia

Na site jw.org, bato mingi bazali kotala video moko ya mokuse, oyo ezali na motó ya likambo Mpo na nini koyekola Biblia? Video yango ebongisami mpo na kolendisa bato oyo basepelaka na mateya ya solo bándima koyekola Biblia ofele elongo na biso. Okoki kotala video yango na Internet, soki kaka ofungoli, na nse, esika bakomi “Sɛngá koyekola Biblia,” to soki osaleli kode (QR) oyo ezali na lokasa ya nsuka ya batrakte nyonso ya sika. Tótalela ndenge mosusu oyo tokoki kosalela malamu video yango.

• Ntango ozongeli moto, okoki koloba na ye boye: “Nakoki kolakisa yo video moko ya mokuse oyo elimboli ndenge oyo okoki kozwa biyano na mituna ya Biblia oyo omitunaka?” Soki andimi, lakisá ye video yango na aparɛyi na yo to na ordinatɛrɛ na ye.

• Soki opesi moto trakte moko ya sika ntango ozali kopesa litatoli ya libaku malamu to na esika ya bato mingi, lakisá ye kode oyo ezali na lokasa ya nsuka mpe lendisá ye asalela kode yango na aparɛyi na ye. Lokola na minɔkɔ mingi kode yango ezali komema moto mbala moko esika video yango ezali na Internet, okoki kolakisa moto video yango na aparɛyi na yo.

• Lobelá video yango epai ya baninga ya mosala, ya kelasi, bandeko ya libota, mpe bato mosusu oyo oyebani na bango mpe sɛngá ete olakisa bango yango. Okoki mpe kotindela bango mesaje oyo soki bafungoli ekomema bango na video yango, mpe sɛngá bango bátala yango bango moko.

Soki tosaleli malamu video yango ya sika, tokoki kobanda koyekola na bato ebele Biblia, mpe kosalisa ‘baoyo bazali na ezaleli oyo ebongi mpo na bomoi ya seko.’​—Mis. 13:48.