‘Landá ngai ntango nyonso’
1 Bato mingi bamipesaka na koluka bolamu na bango moko, atako bongo bazalaka na esengo te. Nzokande, Yesu asɛngi biso tókabaka na motema mobimba mpo yango epesaka esengo ya solo. (Mis. 20:35) Alobaki boye: “Soki moto alingi kolanda ngai, tiká amiboya ye moko . . . mpe alanda ngai ntango nyonso.” (Mko. 8:34) Yango esɛngi kaka te tómipimela makambo mosusu na bantango mosusu. Kasi ezali kosɛnga tósepelisaka Nzambe mokolo na mokolo na esika ya komisepelisa biso moko.—Lom. 14:8; 15:3.
2 Tótalela ndakisa ya ntoma Paulo. Ntango Paulo amonaki “motuya monene ya boyebi ya Klisto Yesu,” atikaki koluka kokokisa bamposa na ye moko mpe amipesaki na koluka matomba ya Bokonzi. (Filp. 3:7, 8) Alobaki ete: “Mpo na ngai, na esengo ya koleka mpenza, nakopesa mpe nakopesama mobimba” mpo na kosalela basusu. (2 Kol. 12:15) Ekozala malamu soki mokomoko na biso amituni boye: ‘Ndenge nini nasalelaka ntango na ngai, makasi na ngai, mayele na ngai, mpe biloko oyo nazali na yango? Namipesaka kaka na koluka bolamu na ngai moko, to nalukaka nde kosepelisa Yehova?’
3 Mabaku ya kopesa: Mbula na mbula, basaleli ya Nzambe balekisaka ngonga koleka miliare moko na mosala ya kosakola, mosala oyo ebikisaka bato. Na lisangá, mikóló mpe bana basalaka misala ndenge na ndenge mpo na bolamu ya basusu. Basalaka mpe misala mingi na mayangani. Bapesaka mpe mabɔkɔ na misala ya kotonga mpe kobatela bandako oyo esalelamaka mpo na kotombola losambo ya solo. Lisusu, kanisá ndenge bandeko oyo basalaka na Bakomite mpo na boyokani na minganga mpe Bituluku ya bandeko mpo na kotala bato ya maladi, basalisaka bandeko na bolingo mpenza. Milende oyo basalaka mpe ndenge oyo bamipimelaka makambo mosusu ezali mpenza lipamboli mpo na bandeko na biso baklisto na mokili mobimba!—Nz. 110:3.
4 Tokoki mpe kosalisa basusu ntango likama moko to likambo moko ya mbalakaka ebimi. Nzokande, mbala mingi esɛngaka kaka bososoli mpo na koyeba ete ndeko moko azali na mposa básalisa ye to bálendisa ye. (Mas. 17:17) Ntango tozali komipesa na motema mobimba mpo na kosalela basusu mpe kotombola misala ya Bokonzi, tozali kolanda ndakisa ya Yesu. (Filp. 2:5-8) Tiká ete tókoba kosala yango ntango nyonso.