Bato bazali koluka kosepelisa Nzambe

NA BUKU Mwa lisolo ya makambo ya Nzambe (na Lingelesi), mokomi John Bowker alobaki boye: “Ezali na mboka moko te oyo bato na yango batángaka nkombo ya Nzambe te, mingimingi balobaka ete ye nde motambwisi ya molɔ́ngɔ́ mpe mokeli ya biloko nyonso. Ezali bongo ata na mikili oyo bato bazali kokipe lisusu mpenza makambo ya Nzambe te.” Ezala na ndenge nini, banda kala bato nyonso bazalaka kaka na mposa ya koyeba Nzambe mpe kosepelisa ye. Na mokili mobimba, ebele ya bato bazali mpenza na mposa ya kosepelisa Nzambe. Kasi, bato na bato bazali na ndenge na bango oyo balukaka kosepelisa Nzambe, na kolanda bindimeli na bango.

Bato mosusu bakanisaka ete mpo moto asepelisa Nzambe, asengeli kaka kosalaka malamu na bomoi na ye. Bamosusu bakanisaka ete mpo Nzambe asepela na moto, asengeli kosalisaka babola. Ebele mpe bamonaka ete kosambela mpe kokokisa milulu ya mangomba ezali na ntina mpo na kosepelisa Nzambe.

Kasi, ezali mpe na baoyo bakanisaka ete moto akoki koyeba Nzambe te; Nzambe azali mosika mingi to mpe azali na makambo mingi ya kosala, yango wana, atyelaka bato likebi te. Balobaka ete Épicure, filozofe moko ya Grèce ya kala, azalaki koloba ete ‘banzambe bazali mosika mpenza, yango wana bakoki kosala bato mabe moko to mpe bolamu moko te.’ Atako bongo, bato mingi oyo bakanisaka ndenge wana basambelaka. Bamosusu kutu bapesaka bambeka to basalaka milulu na makanisi ete yango ekokitisa mitema ya bankɔkɔ na bango oyo bakufá.

Yo okanisaka nini? Nzambe amonaka mpenza milende nyonso oyo tosalaka mpo na kosepelisa ye? Biso bato tokoki mpenza kobenda likebi ya Nzambe mpe kosepelisa ye?