Yesu, bomoi na ye mpe mosala na ye

Koswana ya bayekoli mwa moke liboso na liwa ya Yesu

YESU na bayekoli na ye bauti kokatisa ebale Yordani, mpo na koleka na district ya Pérée mpe kokota na mokili na Yuda. Elongo na bango, bato mosusu mingi bakei kokumisa Elekeli ya mobu 33, oyo etikali bobele poso moko mpo esalema.

Yesu atamboli liboso na bayekoli na ye, mpe bakamwi na lolenge azali kokende kozanga kobanga. Bazali komikundola ete, mwa baposo liboso, ntango Yesu azalaki komibongisa mpo na kotika Pérée akende na Yuda na liwa ya Lazare, Toma alendisaki bayekoli mosusu na koloba: “Biso mpe tokende ete lokuta na ye elongo.” Bazali mpe komikundola ete bakonzi na Sanhédrin balukaki koboma Yesu nsima wana asekwisaki Lazare. Ezali bongo likambo na kokamwa te soki kobanga ekoteli bayekoli ntango balingi kokota lisusu na Yuda.

Mpo na kobongisa bango na makambo bakokutana na yango, Yesu akamati bazomi na mibale akei na bango pembeni mpe alobi na bango ete: “Tala tozali kobuta na Yelusaleme mpe Mwana na moto akokabama na banganga minene mpe na bakomeli mpe bakokweisa ye ete akufa, mpe bakokaba ye epai na bapakano ete atiolama mpe abetama mpe abomama likoló na nzete mpe mokolo na misato akosekwa na bakufi.”

Ezali mbala ya misato na boumeli ya mwa basanza Yesu alobeli bayekoli na ye mpo na liwa mpe kosekwa na ye. Ata soki bazali koyoka ye, kasi bazali kokanga ntina na maloba yango te. Mbala mosusu ezali mpo ete bandimi ete bokonzi na Yisraele ekozongisama na mabelé, mpe bazali kolikya makasi kozwa nkembo mpe lokumu kati na bokonzi na mabelé elongo na Klisto.

Kati na basali mobembo baoyo bakei kokumisa Elekeli, Salomé, mama na ntoma Yakobo na ntoma Yoane azali na kati. Yesu apesaki mibali oyo nkombo mosusu “Bana na Nkake”, ezali mpo na ezalela na bango ya molende to motema motomoto. Kasi, uta mwa ntango, bango mibale bazali kokolisa likanisi ya kozala na esika moko ya ntina to ya lokumu na Bokonzi ya Klisto, mpe bayebisaki mposa na bango epai ya mama na bango. Ye wana abelemi epai na Yesu mpo na koloba na nkombo na bango; angumbami liboso na ye mpe asengi ye likambo.

Yesu atuni “Olingi nini?”

“Pesa nzela ete bana na ngai mibale bafanda moko na loboko na yo na mobali mpe mosusu na loboko na yo na mwasi kati na bokonzi na yo.”

Na koyebaka epai na nani likanisi wana euti, Yesu alobi na Yakobo mpe Yoane ete: “Boyebi yango esengi bino te. Bokoki nde komela kopo ekomela ngai?”

Bango bazongisi ete “Tokoki”. Atako Yesu auti sikawa koyebisa bango ete azali kokende kokutana na monyokoli makasi mpe na nsuka kobomama, emonani lokola bakangi ntina te ete “kopo oyo alobeli bango ezali bongo liwa na ye.

Ata bongo, Yesu ayebisi bango ete: “Bokomela kopo na ngai, nde kofanda na loboko na ngai na mobali mpe na loboko na ngai na mwasi ezali na ngai kopesa te, kasi ezali mpo na bango babongisami mpo na yango na Tata na ngai.”

Nsima na yango, bantoma mosusu zomi bayebi likambo Yakobo na Yoane basengaki, mpe bayokeli bango nkanda. Mbala mosusu Yakobo na Yoane balobaki mingi koleka na kowelana oyo bayekoli bazalaki na yango kati na bango, liboso mwa moke, mpo na koyeba nani kati na bango aleki monene. Sikawa, lisengi na bango emonisi ete basalelaki te toli oyo Yesu apesaki mpo na likambo yango. Mawa! mposa na bango ya kozala na lokumu ezali naino makasi.

Mpo na kosilisa matata oyo mpe likunya oyo yango ebimisaki, Yesu asangisi bongo bazomi na mibale. Na bolingo nyonso, apesi bango toli oyo: “Boyebi ete mikolo na bapakano bazali mikonzi likolo na bango mpe bato minene bakonyokola bango na makasi. Nde kati na bino ezala bongo te. Ye oyo alingi kozala monene kati na bino, akoma mosali na bino, mpe ye oyo alingi kozala moto na liboso na bino, azala moombo na bino.”

Yesu apesaki ndakisa oyo basengeli komekola; alimboli yango boye: “Lokola Mwana na moto ayaki mpo na kosungama te kasi mpo na kosunga mpe kopesa molimo na ye lokola lisiko mpo na mingi.” Yesu asalelaki bazalani na ye, mpe lisusu akufaki mpo na mokili! Bayekoli bazali na mposa ya kozala na makanisi bobele oyo: basengeli koluka kosalela kasi kozela te ete bato basalela bango, kozala na komikitisa na esika ya koluka lokumu. Matai 20:17-28; Malako 3:17; 9:33-37; 10:32-45; Luka 18:31-34; Yoane 11:16.

◆ Mpo na nini kobanga ezwi bayekoli?

◆ Ndenge nini Yesu abongisi bayekoli na ye mpo na oyo ekoyela bango?

◆ Lisengi nini epesami epai na Yesu, mpe bantoma mosusu bamoni yango ndenge nini?

◆ Ndenge nini Yesu akati likambo oyo ekaboli bantoma na ye?