Belela nkombo na Jéhovah mpo okobika!
Liteya euti na Makomami: Yoele 1:1 kino 3:21
“SOKI TOSILISI mpasi oyo te ekolonga Afrike mobimba ya est mpe mikili minso ya epai na ebimelo na ntango. Ekozala libebi mpenza.” Likebisi wana esakolamaki epai na motambwisi moko ya Lisanga na Mabota Masangani mpo na bilei mpe bilanga, oyo atungisamaki mingi mpo na mbeba oyo esalemi sikawa na nord-est ya Afrike epai bamiliare ya banyama mikemike bazali kolya milona kati na bilanga: Mayoyo to mabanki.
Penepene na mobu 820 liboso ya ntango na biso, Yoele, mosakoli na Nzambe, alobelaki bolozi moko ya motindo oyo. Na maloba ya kokamwisa, ya sikisiki mpe na bosolo oyo eleki nyonso, alobelaki mbeba oyo kosopona ya mayoyo to mabanki esengelaki kosala kati na mokili ya Yuda. Nzokande bolozi yango ezalaki likambo moko ya monene koleka mbeba nyonso mosusu oyo ebebisaka ezingelo: “mokolo na Jéhovah”! Libota na biso ezali pene na komona ‘mokolo monene’ yango kati na libebi na yango ya mpasi koleka. Tokoki kozala na elikya ya kobika? Mpe liteya nini tokoki kozwa kati na mokanda ya esakweli na Yoele?
Kosopana ya mayoyo to mabanki oyo ezali kobangisa
Esengeli kobongola motema mpo na kobika na mokolo monene ya Jéhovah. Yoele alobeli mpasi oyo ezali kokwea likoló na mboka: Zamba to matiti nyonso esilisami na kolyama na ebele na mbinzo, na mabanki mpe bampese. Banganga, mibange mpe bafandi mosusu ya Yuda bapesamelaki toli ete babongola mitema mpe ‘basenga lisalisi epai na Jéhovah’. Magazini nyonso ebebisami, mpe bibombelo ebukami mokemoke wana ezali yango kotikala mpamba. Bibwele bazali kotelengana bipai na bipai, koluka matiti ya mobesu mpo na kolya nzokande ezali komonana te. Oyo mokolo nini ya mpasi boye eyeisami na Mozwi-na-Nguya-Nyonso!—1:1-20.
Kobelema ya mokolo na Jéhovah esengeli kopusa biso na kosala misala mibongi na etambweli na peto mpe na bizaleli ya moto na Nzambe. (2 Petelo 3:10-12) Yoele azali komonisa biso mokolo yango lokola mokolo na molili, na mapata mpe ya molili tuu. Mayoyo to mabanki bazali kosakola yango na lolenge ya kobangisa. Nsima na bango, mokili na Yuda oyo kala ekokanisamaki na Elanga ya Edene ekomi esobe ya mpasi. Makelele ya mayoyo to mabanki yango ezali likama: ezali kokundwela makelele ya makalo, makelele ya moto makasi oyo ezali kozikisa matiti. Wana ezali bango kopusama “lokola libota na nguya oyo etandami mpo na etumba”, mabanki to mayoyo bazali kopumbwa mapango milai, bazali komikotisa kati na bingumba mpe bazali kokota kati na bandako. Ata moi, sanza mpe minzoto ezali koyinda na boumeli ya ‘mokolo monene na Jéhovah’.—2:1-11.
Nzela na lobiko
Mpo na kozwa lobiko, tosengeli koyeba ‘ete Jehovah azali Nzambe mpe ete mosusu azali te’. Jéhovah apesi toli oyo, “Bozonga epai na ngai kati na motema na bino mobimba.” Azali kobianga bilenge mpe mibange na koyangana kati na likita monene mpo na kobondela lipamboli na ye. Akolimbisa, akozongisa biloko oyo mabanki babebisaki mpe akopambola libota na ye na kopesaka bango likoki ya kobuka milona mingi kati na bilanga. Baoyo bandimi ete Jéhovah azali bobele Nzambe moko, Mobikisi, bakoyoka nsoni te.—2:12-27.
Mpo na kobikisama tosengeli mpe kobelela nkombo na Jéhovah na motema moko. Liboso na “mokolo na Jéhovah, mokolo monene mpe na nsomo”, Nzambe ‘akosopa elimo na ye likoló na bato ya motindo nyonso’. Bilenge, mibange, mibali mpe basi, bakosala bikamwiseli. Na yango, mingi bakoyekola ete “moto na moto oyo akobelela nkombo na Jéhovah akobika’.—2:28-32.
Kosambisama ya mabota
Jéhovah akobatela basembwi na ye ntango akoyeisa lisambisi na ye likoló na mabota (Tala Ezekiele 38:18-23; Emoniseli 16:14-16) Tyr, Sidon mpe Filistia basengeli kofuta mpo banyokolaki basaleli na Nzambe mpe mpo batekisaki bango na boombo. Jéhovah akozongisa bakangemi na Yuda mpe ya Yelusaleme. Azali koyebisa boye epai na banguna na ye: “Bobulisa etumba!” Nzokande bakoki te mpo na kobunda elongo na ye, mpe azali koyeisa lisambisi likoló na bango kati na “lobwaku na Yosafata”, lobwaku na elilingi. Atako likoló mpe mabelé ekolimwa, Jéhovah akozala ebombamelo mpo na libota na ye. Basembwi na ye bakobika na lisambisi oyo akoyeisa likoló na mabota mpe bakozala na esengo ya kobika kati na makambo kitoko na paradis.—3:1-21.
Liteya tosengeli kosimba: Tosengeli kobongola motema mpo na masumu na biso liboso na mokolo monene na Jéhovah soki tolingi kobika. Kobelema ya mokolo yango esengeli kopusa biso na kokokisa misala oyo mibongi na etambweli na bulee mpe ya bizaleli na moto na Nzambe. Ya solo, mpo na kozwa lobiko, tosengeli koyeba ete bobele Jéhovah nde azali Nzambe. Soki tobeleli nkombo na ye na motema moko, akobikisa biso ntango akokokisa lisambisi na ye likoló na mabota.
Esakweli na Yoele ezali komema biso na kokanisa likoló na likambo mosusu oyo: “Mokolo na Jéhovah, mokolo monene mpe ya nsomo”, esili kobelema, mpe bato basengeli kobebisama. Lokola mayoyo to mabanki oyo esakweli na Yoele ezali kolobela ba Témoins de Jéhovah bazali kotalisa bolumbu ya boklisto na mokili kozanga kobanga na komonisaka polele bobola na yango kati na elimo. Bakambi na yango bazali na nkanda mpe bazali kotemela mosala na bango, kasi mikakatano to botemeli yango oyo ekokani na mapango milai oyo bazali komeka kotia na nzela ya mayoyo to mabanki yango ya elilingi ezali komonisa ata nguya moke te. Jehovah asopaki elimo na ye likolo na basaleli na ye. Azali kopesa bango bisaleli mpo ete basakola bikateli na ye. Na ntina yango, na boumeli ya mwa ntango oyo etikali liboso, na mokolo monene na Nzambe, tosalisa na molende nyonso mozalani na biso na ‘kobelela nkombo na Jéhovah mpo ete amibikisa’.
[Etanda na lokasa 15]
KOTALELAMA YA MWA MIKAPO NA BIBLIA
○ 1:2—Yoele azalaki koloba epai na ‘’mibange” oyo bakosaki libota. Lokola bazalaki kolanda batambwisi mabe wana, “bafandi na mboka” bazalaki bango na ngámbo liboso na Jéhovah. Motindo moko, na mokoló na biso, bakonzi na mangomba ya boklisto na mokili bazali kokosa bato na bango. Lokola Yoele, ba Témoins de Jehovah bazali koyebisa bango nsango, kasi basengeli mpe kosakola Liloba na Nzambe epai na bato nyonso, mpamba te bango nyonso bakozala na makambo ya kozongisa epai na Jéhovah.—Yisaya 9:15-17; Baloma 14:12.
○ 2:1-10, 28—Bayisraele bakebisamaki ete mayoyo to mabanki mpe banyama mosusu ya mikemike bakolya bilanga to milona na bango soki bakoboya kotosa Nzambe. (Deteronome 28:38-45) Mpo ete Makomami mazali koyebisa kobebisama moko te ya nsomo mingi epai na banyama mikemike kati na mokili ya Kanana koleka oyo Yoele azali kolobela, bolozi oyo eyebisami na mosakoli yango ezalaki mpenzampenza ya elilingi. Ezali kolobama ete, esakweli na ye ebandaki kokokisama na Pantekote ya mobu 33 ntango Jehovah abandaki ‘kosopa elimo na ye’ likoló na bayekoli ya Yesu, baoyo bazalaki kotungisa basambeli na lokuta ya Nzambe na kosakolaka nsango ya Nzambe oyo epesamelaki bango. (Misala 2:1, 14-21; 5:27-29) Na mikoló na biso, ba Témoins de Jéhovah bazali kokokisa mosala ya motindo moko oyo ezali komonisa bokosi nyonso polele.
○ 2:12, 13—Na kala, bato bazalaki kopasola bilamba na bango mpo na komonisa polele mpasi to mawa na bango. (Genese 37:29, 30; 44:13) Kasi bamoko bazalaki kosala bongo na mitema mibale to mpo na kokosa bato. Yoele amonisaki polele ete ekokaki te na komonisa mpasi to mawa na yo bobele na libanda. Bayisraele basengelaki ‘kopasola mitema na bango’ na komonisaka kobongwana ya motema ya solosolo mpenza.
○ 2:31, 32 Jehovah abikisaki basaleli na ye na ntango ya Yoele. Lelo mpe, na boumeli ya “mikolo na nsuka”, Nzambe azali kopesa nzela na lobiko na nsima na Yesu Klisto. (2 Timote 3:1; Baloma 5:8, 12; 6:23) Ntango nyonso ezali bobele nkombo na Jéhovah nde bato na masumu basengeli kobelela mpo na kozwa lobiko ya seko. Na bongo esengeli na bango koyeba nkombo na Nzambe, komemya ye na bozindo mpe komipesa mobimba epai na Ye oyo azali komema bango. Na yango baoyo bazali kobelela nkombo na Jéhovah na motema moko ’bakobikisama’ ntango Nzambe akokokisa lisambisi na ye likoló na mabota na ntango ya ‘mokolo monene’ na ye.—Sofoni 2:2, 3; 3:12; Baloma 10:11-13.
○ 3:2, 14—Esika na elilingi ya kokokisa lisambisi na Nzambe na ‘’mokolo na Jéhovah” ebengami ”lobwaku na kokata likambo”, mpe ‘’lobwaku na Yosafata”. Ebongi mpenza na nkombo yango, mpamba te nkombo Yosafata elimboli “Jéhovah azali mosambisi”. Na boumeli ya boyangeli na Yosafata, Nzambe abikisaki Yuda mpe Yelusaleme na maboko ya mampinga na Moabe, na Amona mpe ya mokili na Seilo na kokotisaka mobulungano kati na bango mpe na kobendaka bango ete babomana bango na bango. (2 Ntango 20:1-30) Na mikoló na biso, ‘’lobwaku na Yosafata” ezali ekamoli ya elilingi na vinyo oyo kati na yango mabota babwakami lokola bitape na vinyo mpo banyokolaki basaleli na Nzambe.
○ 3:6—Tyr, Sidon mpe Filistia bazalaki na ngámbo mpo batekaki bafandi na Yuda mpe ya Yelusaleme na boombo epai na Bagreke, mbala mosusu Bayuda oyo bakangamaki na mabota mosusu bakweaki na maboko ya bato na Tyr, Sidon mpe Filistia oyo bazalaki koteka bato. To mpe, oyo eleki mabe mpenza, ekoki kozala ete mabota yango bazwaki Bayuda na boombo ntango bazalaki kokima liboso na banguna na bango. Ezala ata motindo nini, Nzambe akosambisa bateki wana na bato baoyo banyokolaki libota na ye. Yango ezali koyebisa to kosakola likambo oyo ekoyela mabota oyo bazali konyokola basaleli na Jéhovah na eleko na biso.