Biblia elobi nini na likambo etali kosambela bililingi?

Ebongiseli moko (Catholic News Service) elobi ete na molulu moko oyo esalemaki na mokolo ya 25/03/2022 na ndako-nzambe Saint Pierre, Pápa Francis atɛlɛmaki liboso ya ekeko ya Maria, “akangaki miso, afukamaki mpe abondelaki na nse ya motema.” Abondelaki Maria atya kimya na mokili mobimba. Lisolo moko na site Internet ya Vatican (Vatican News) elobi lisusu ete “Pápa abondelaki mpo na kosɛnga Maria abatela na motema na ye bato ya mokili mobimba, mingimingi bato ya ekólo Russie mpe Ukraine.”

Okanisi nini? Ezali malamu kobondela liboso ya bililingi to kosalela yango na losambo? Tótalela bavɛrsɛ oyo ya Biblia:

• “Osengeli te komisalela ekeko oyo eyemami to elilingi oyo ekokani na eloko nyonso oyo ezali kuna na likoló to oyo ezali na mabele awa na nse to oyo ezali na mai na nse ya mabele. Osengeli te kogumbamela yango to kobendama mpo na kosalela yango, mpamba te ngai Yehova Nzambe na yo, nazali Nzambe oyo asɛngaka kokangama kaka na ye, nayeisaka etumbu mpo na libunga ya batata likoló ya bana, likoló ya libota ya misato mpe likoló ya libota ya minei ya baoyo bayinaka ngai.”​—Kobima 20:4, 5.a

• “Bikeko na bango ezali palata mpe wolo, Esalemi na mabɔkɔ ya moto ya mabele. Ezali na monɔkɔ, kasi elobaka te; ezali na miso, kasi emonaka te; ezali na matoi, kasi eyokaka te. Ezali na zolo, kasi eyokaka nsolo te. Ezali na mabɔkɔ, kasi esimbaka eloko te. Ezali na makolo, kasi etambolaka te; Ebimisaka ata liloba moko te na mongongo na yango. Baoyo bazali kosala yango bakokóma lokola yango, baoyo nyonso bazali kotyela yango motema.”​—Nzembo 115:4-8.

• “Ngai Yehova. Yango nde nkombo na ngai; mpe nakopesa nkembo na ngai na mosusu te, lisanzoli na ngai na bikeko oyo eyemami mpe te.”​—Yisaya 42:8.

• “Na yango, bandeko na ngai ya bolingo, bókima losambo ya bikeko.”​—1 Bakorinti 10:14.

• “Bana, bókeba na bikeko.”​—1 Yoane 5:21.

Mpo na koyeba makambo mosusu oyo Biblia elobi na likambo etali kosalela bililingi na losambo, tángá lisolo “Biblia elobi nini?​—Bililingi” to talá video Nzambe alingaka tósalela bililingi to bikeko mpo na kosambela ye?

Ntango mosusu okosepela mpe kotánga oyo Biblia elobi na makambo oyo elandi:

• “Ngɔndɔ Maria​—Biblia elobi nini mpo na ye?”

• “Devrait-on prier la Vierge Marie?”

• “Miracles et apparitions ​—Des manifestations divines?”

• “Ndenge nini kimya ekokɔta na mokili?”

Esika bafɔtɔ euti: Vincenzo Pinto/AFP via Getty Images