Makambo kitoko oyo ezali na buku Sepelá na bomoi libela na libela!

Osepelaka na bavideo mpe mituna ndenge na ndenge oyo ezali na buku Sepelá na bomoi libela na libela!? Bongo eteni “Soki moto alobi na yo,” “Oyo okoki kosala,” mpe “Makanisi mosusu”? Wapi makambo mosusu oyo ekoki kosalisa yo ntango ozali koyekola na moto Biblia?​—Mt 28:19, 20.

Bavideo, masolo mpe audio: Soki osepeli koyekola na moto na buku yango ya papye, ndenge nini okoki kozwa na pɛtɛɛ nyonso bavideo, ba-audio mpe masolo mosusu ya eteni oyo bozali kotalela? Soki ozali na buku yango na telefone to na tablɛti, kɔtá na moko ya biteni minei ya liboso ya buku yango. Na nsuka ya lokasa ya eteni oyo oponi, okomona bavideo, masolo mpe audio mpo na eteni yango. (Talá fɔtɔ 1.)

“Mode image”: Soki ozali koyekola na moto buku yango na telefone to na tablɛti, okoki mpe kopona kosalela buku yango lokola oyo ya papye. Kaka na lokasa ya liteya oyo bozali, finá na madodo misato oyo ezali na likoló na lobɔkɔ ya mobali, mpe kɔtá na “Mode image.” Yango ekosalisa yo omona malamu ndenge eteni mokomoko ya lisolo eyokani na motó ya likambo ya liteya oyo bozali koyekola. Soki olingi ozongela kosalela buku yango na ndenge ya telefone to tablɛti (digital), finá kaka na madodo wana misato mpe kɔtá na “Mode texte” to finá na elembo ya motane-bule oyo ezali na lobɔkɔ ya mobali na nse.

“Nakoki mpenza?”: Bitanda oyo ezali pene na nsuka ya eteni 4 ya buku yango, elobeli mwa makambo oyo moyekoli akoki kosala mpo na kobanda kosakola na bandeko ya lisangá mpe kozwa batisimo. (Talá fɔtɔ 2.)

Maloba na nsuka ya lisolo: Maloba na nsuka ya lisolo epesi bandimbola ya masolo mosusu ya ntina. Soki ozali kosalela buku yango na telefone to tablɛti, okomona lien na nsuka ya “Maloba na nsuka ya lisolo” ya eteni mokomoko oyo ekomema mbala moko na esika oyo osukaki na liteya yango. (Talá fɔtɔ 2.)