Nzambe ná Kristo bakopesa biso bonsomi na mikolo ezali koya

Makambo nini etungisaka yo mokolo na mokolo? Ozali tata ya libota mpe ozali kobunda mpo na kokokisa bamposa ya libota na yo? Ozali kobunda mpo na kobɔkɔla yo moko bana na yo mpe kokokisa bamposa na bango? Soki ozali elenge, baninga na yo ya kelasi batumolaka yo? Ozali kobunda na mikakatano ya sante to okómi mobange? Moto na moto azali na mikakatano na ye. Bakristo mingi bazali kokutana na mikakatano ndenge na ndenge na mbala moko. Ata bongo, toyebi ete mosika te tokosikolama na mikakatano wana nyonso.​—2Ko 4:16-18.

Kasi liboso ntango yango eya, tobɔndisamaka ndenge toyebaka ete Yehova ayebaka mikakatano na biso, mpe asepelaka na bosembo na biso mpe na ezaleli na biso ya koyika mpiko mpe akopambola biso mingi mpenza. (Yir 29:11, 12) Yesu mpe atyelaka biso mpenza likebi. Wana tozali kokokisa mikumba na biso ya bokristo, Yesu alendisi biso boye: “Nazali elongo na bino.” (Mt 28:20) Ntango totɛlɛmaka mpe tokanisaka na mozindo na bonsomi oyo tokozwa na Bokonzi ya Nzambe, yango ekómisaka makasi elikya mpe ekateli na biso ya koyika mpiko na mikakatano oyo tozali kokutana na yango.​—Ro 8:19-21.

TALÁ VIDEO LOKOLA MOPƐPƐ MAKASI EZALI KOYA, TYÁ LIKEBI NA YO EPAI YA YESU!​—MAPAMBOLI YA BOKONZI NA MIKOLO EZALI KOYA, MPE NA NSIMA YANOLÁ NA MITUNA OYO:

• Mpo na nini bato bakómá mosika na Nzambe, mpe yango ebimisi makambo nini?

• Makambo nini baoyo bazali sembo epai ya Yehova bazali kozela na mikolo ezali koya?

• Nini emonisi ete makambo yango ya malamu ekokokisama na mikolo ezali koya?

• Mapamboli nini oyo Nzambe alaki na mokili ya sika ozali kozela na mposa makasi?