Mokanda ya Lisangani ya Mikóló-Bakambi

Bandeko ya bolingo,

Tozali mpenza na esengo ya kokomela bino mokanda oyo! Tozali koyoka lokola ntoma Yoane oyo alobaki ete azalaki ‘kolinga solosolo mpenza’ bandeko na ye baklisto mpe kosepela mpo ‘bazalaki kotambola na kati ya solo.’ (2 Yoa. 1, 4) Koyeba solo ezali mpenza lipamboli mpo na biso baklisto! Solo esikoli biso na Babilone Monene mpe na mateya na yango mpe na mimeseno na yango oyo ebebisaka lokumu ya Nzambe. Kotosa mateya ya Biblia esalisi biso tókóma bato ya bolingo, ya boboto mpe ya motema mawa. Lisusu, solo epesi biso libaku ya kozala pɛto na miso ya Nzambe mpe kokóma na elikya ya bomoi ya seko.

Tozali mpe na botɔndi mpo na elimo ya Yehova, oyo etambwisaka biso mpe epesaka biso makasi mokolo na mokolo! Ntembe ezali te ete bosepelaki mingi na liyangani ya etúká “Totambwisami na elimo ya Nzambe,” oyo esalisaki biso tóyeba makambo ndenge na ndenge oyo Yehova asalaka mpo na kotambwisa biso mpe kopesa biso makasi na nzela ya elimo na ye. Lokola mokili ezali kobeba se kobeba, ezali na ntina mingi ete tótika elimo santu ya Yehova etambwisa biso na mikolo mabe oyo ezali koya.

Tondimi mpenza ete masolo ya bandeko na biso oyo bayikaki mpiko na bosembo nyonso mpe banyokwamaki mpo na kondima na bango, oyo ebimaki na Annuaire, esimbaki mpenza mitema na bino. Ezali likambo ya kokamwa mpamba te bandeko mingi kati na bango bakutanaki na mikakatano yango mwa moke nsima ya kozwa batisimo to liboso ete bábatisama. Tosepelaka na bango mingi mpo na bosembo na bango mpe ndenge bakangami na boyengebene! Na ntembe te, ndakisa malamu na bango elendisi lisusu ekateli na biso ya kotikala sembo na mosala ya Bokonzi, ata soki tokutani na mikakatano nini.​—1 Tes. 1:6-8.

Bandeko, toyebi ete mikakatano ezali mingi, ezala ya mbongo to ya makambo mosusu, oyo bosengeli kolonga mpo na kokoba kosalisa mabota na bino ezala na bolingo mpe na bomoko. Mpo na basusu kati na bino, kobima pɔsɔ na pɔsɔ na mosala ya kosakola Bokonzi mpe koyangana na makita nyonso ya lisangá ezali pɛtɛɛ te. Yango wana, nsima ya kotalela likambo yango na mozindo mpe kobondela mingi, tobongoli programɛ ya makita ya lisangá kobanda na 1 Yanuali 2009. Tozali kolikya ete mbongwana yango ekopesa bino ntango mingi ya koyekolaka bino moko mpe na libota.

Na mayangani ndenge na ndenge oyo esalemaki na mobu oyo eleki, ezalaki esengo mingi komona ebele ya bato oyo bazwaki batisimo. Basusu kati na bango bazalaki mpenza bilenge. Baboti, topesi bino longonya na ndenge bobɔkɔli bana malamu, bosalisi bango báyeba solo, mpe bolendisi bango bámipesa na Yehova mpe básalela ye ntango bazali naino bilenge. Lokola bana yango bazali kokokisa masɛngami mpo na kozwa batisimo atako bazali kokutana na ebele ya mikakatano na kelasi, yango emonisi ete baboti na bango bateyaki bango malamu.​—Nz. 128:1-6.

Tolingi mpe kolobela bokoli oyo emonani na motángo ya bayekoli ya Biblia. Bokoli yango emonani mingi mpo na mosala makasi oyo bandeko na biso bamisionɛrɛ mpe babongisi-nzela monene bazali kosala. Biso bandeko na bino ya Lisangani ya Mikóló-Bakambi tozwaka na motuya mingi mosala monene oyo bandeko mibali mpe basi ya mokili mobimba bazali kosala. Bazali koloba “Yaká!” mpo na kobenga bato ya mitema sembo, oyo bazali na mposa ya mai ete ‘bákamata mai ya bomoi ofele.’ (Emon. 22:17) Tozali na esengo ya kotombela boyei malamu na bandeko 289 678 oyo bazwaki batisimo na mobu oyo eleki mpo na komonisa ete bamipesi na Yehova!

Tosengeli ntango nyonso kobosana te maloba ya ntoma Yoane, oyo akomaki ete: “Mokili ezali koleka mpe ndenge moko mposa na yango, kasi moto oyo azali kosala mokano ya Nzambe azali kotikala libela na libela.” (1 Yoa. 2:17) Tosengeli mpe koyeba ete mosika te mokili oyo esengeli “koleka”! Tokomonisa ete tozali na bwanya soki tomipesi mobimba na kosala mokano ya Nzambe mpe totiki te ‘kokɛngɛla.’ (Mat. 24:42) Soki tosali bongo, tokoyoka mawa te, mpe tokozwa mapamboli mingi mpo na motema-boboto ya Yehova.​—Yis. 63:7.

Tozali kolikya ete masolo ya kolendisa oyo euti na bikólo mosusu, oyo ezali na Annuaire ya mobu oyo, ekolendisa bino nyonso bótya matomba ya Bokonzi na esika ya liboso. Tolingi bóyeba ete tokanisaka bino ntango nyonso, tobondelaka mpo na bino, mpe tolingaka bino mingi. Tiká ete Yehova asopela bino ebele ya mapamboli.

Bandeko na bino,

Lisangani ya Mikóló-Bakambi ya Batatoli ya Yehova