Mituna ya batángi

Bakolose 1:16 (NW) elobi na ntina na Mwana ya Nzambe ete “biloko mosusu nyonso ezalisamaki na nzela na ye mpe mpo na ye.” Na ndimbola nini biloko nyonso ezalisamaki “mpo na” Yesu, Mwana ya Nzambe?

Yehova asalelaki Mwana na ye mobotami-se-moko lokola mosali monene mpo na kozalisa biloko mosusu nyonso, elingi koloba, biloko nyonso, longola kaka Yesu ye moko. (Masese 8:27-30; Yoane 1:3) Yango wana, Mwana asepelaka na biloko yango, mpe ezali na ndimbola wana nde biloko yango ezali “mpo na” ye.

Toyebi ete moboti nyonso azalaka na elikya ete bana oyo aboti bakosepelisa ye, emonanaka mpe bongo mbala mingi. Yango wana, lisese moko ya Biblia elobeli “mwana oyo [tata] asepelaka na ye.” (Masese 3:12, NW; 29:17) Ndenge moko mpe, Yehova Nzambe azalaki kosepela na Yisalaele ntango bato na ye bazalaki sembo. (Nzembo 44:3; 119:108; 147:11) Tii na moi ya lelo, asepelaka mpe na bosembo ya bato na ye oyo bazali sembo.​—Masese 12:22; Baebele 10:38.

Na yango, ebongaki Nzambe asala ete Yesu, moto oyo asalaki na ye elongo, asepela na biloko oyo asalaki. Kutu, Masese 8:31 (NW) elobi ete Mwana ‘azalaki kosepela na biloko ya mabele na ye, mpe biloko oyo azalaki kolinga mingi ezalaki elongo na bana ya bato.’ Ezali na ndimbola wana nde Bakolose 1:16 (NW) elobi ete: “Biloko mosusu nyonso ezalisamaki na nzela na ye mpe mpo na ye.”