‘Tozali na mposa ya bato ya sembo’

BOSEMBO emonanaka lisusu mingi te na mokili oyo. Nzokande, ezali lisɛngami ya moboko mpo na baklisto. Paulo akomaki ete: “Tozali na mposa kosalaka malamu [“na bosembo,” NW] na makambo nyonso.” (Baebele 13:18) Ezali yango nde Wilma, Motatoli moko ya Yehova na engumba Faenza na mboka Italie, asepelaki kosala.

Zulunalo Il Resto del Carlino ekomi ete ntango amonaki pɔtɔmɔni oyo ezalaki na mbongo mingi na libándá ya magazini moko monene ya engumba na bango, atindaki yango na biro ya bapolisi “kozanga kokakatana” mpo ete ekoka kozongisama epai na nkolo na yango.

Ntango mokambi ya engumba ayokaki likambo yango, nokinoki atindaki mwa nkomá ya matɔ́ndi epai na Wilma. Akomaki ete: “Na nkombo ya engumba, natɔ́ndi yo mingi mpenza mpo na likambo malamu oyo osali. Faenza, engumba na biso ya lokumu ezali na mposa ya bato malamu mpe ya sembo.”

Ata soki misala malamu miyebani na bato to miyebani te, tosengeli ntango nyonso kosala molende ya kozala sembo. Lokola Makomami Mosantu mazali kolendisa, “tolingi kosala yango ezali malamu bobele na miso na Nkolo te nde na miso na bato lokola.”​—2 Bakolinti 8:21.