Sianse ekweisi nde makamwisi?

Makamwisi oyo malobelami kati na Biblia, masalemaki solo? Bato mingi bakondimaka te, kati na bango bato na sianse mpe bakonzi ya mangomba. Mpo na bango, makamwisi mandimamaki nde na eleko oyo bato bazalaki na biyambayamba mingi, mpe sianse na ntango na biso esili komonisa ete makambo motindo yango makoki kosalema te. Ezali ntina na kotalela mokanda oyo molandi, moye mobimisamaki na zulunalo The Times ya mboka Londres mpe motyamaki mabɔkɔ na ebele na bato ya sianse. Totangi ete:

“Tokoki kosalela sianse te mpo na kokweisa makamwisi. Kondima to mpe koboya kondima ete makamwisi makoki kosalema, etali likambo ya kondimela. . . . Makamwisi ezali makambo oyo masalemá naino liboso te. Atako makanisi nini mabimisami lelo na filozofi to matomba oyo mazwami na baankete, ebongi mpenza koloba ete sianse (oyo ekotalaka bobele makambo oyo masilá kosalema) elongi te kati na likambo oyo. ‘Malako’ na yango mauti bobele na makambo oyo biso tozali komona. Nzokande, kondima etongami likoló na miboko misusu.” (Biso nde tolalisi maloba oyo mazali likoló.) Na yango, sianse ya lelo ekoki te kokweisa masoló ya makamwisi oyo malobelami kati na Biblia.