Mibeko Ya Bokonzi Koluka boyengebene ya Nzambe

KANISÁ ete ntango bozali koleka na balabala, opesi moninga moko ya kartye mbote na mosika. Mikolo eleki, omonaki ete atalaka yo ná libota na yo mingi. Ye mpe apɛpi yo mbote mpe abengi yo. Alobi na yo: “Natuna yo naino: Mpo na nini bozalaka lokola bato nyonso te?” Yo otuni ye: “Na ndenge nini?” Ye azongisi: “Bozali Batatoli ya Yehova, nakosi? Bokeseni na bato mosusu. Bosalaka makambo lokola bato ya mangomba mosusu te​—bosalaka fɛti ya Noele te, Bonane te, ata fɛti moko te ya ekólo, bokɔtaka na makambo ya politiki te mpe bokendaka bitumba te. Bomɛlaka makaya te. Mpe namonaka lokola ete na libota na bino bozalaka na bizaleli ya malamu mpenza. Nini esalaka bongo?”

Yo moko oyebi eyano na motuna yango: Bokonzi ya Nzambe ezali kotambwisa biso. Mokonzi Yesu azali mpenza kopɛtola biso. Azali kosalisa biso tólanda ndakisa na ye mpe na ndenge yango, tókesana na bato mosusu ya mokili oyo mabe. Na eteni oyo, tokomona ndenge oyo Bokonzi ya Masiya epɛtoli basaleli ya Nzambe na elimo, na bizaleli mpe na ndenge ya kotambwisa makambo na lisangá​—nyonso wana mpo na nkembo ya Yehova.