LITEYA 11

Mpo na nini tokendeke na mayangani na biso ya minene?

Liyangani ya etúká ya Batatoli ya Yehova na Mexique — Mexique

Mokanda ya sika ebimi na liyangani ya etúká na Allemagne — Allemagne

Batatoli ya Yehova na liyangani moko ya etúká na Botswana — Botswana

Elenge mobali moko azali kozwa batisimo na Nicaragua — Nicaragua

Drame oyo bato basanaki ezali kosalema na Italie — Italie

Mpo na nini bilongi ya bato oyo ezali esengo boye? Ezali mpo bazali na kati ya moko ya mayangani na biso. Ndenge moko na basaleli ya Nzambe na ntango ya kala, oyo bazwaki etinda ya koyanganaka mbala misato na mbula, biso mpe tozalaka na esengo ya kosala bongo. (Kolimbola Mibeko 16:16) Mbula na mbula, tozalaka na mayangani misato: mayangani ya zongazonga mibale ya mokolo moko mpe liyangani ya etúká ya mikolo misato. Matomba nini tozwaka na mayangani yango?

Ekómisaka bondeko na biso bakristo makasi. Kaka ndenge Bayisraele bazalaki kosepela kosanzola Yehova “na kati ya ebele ya bato oyo bayangani,” biso mpe tosepelaka kosambela ye elongo na bandeko na biso na mayangani. (Nzembo 26:12; 111:1) Na mayangani yango, tozwaka libaku ya kokutana mpe kolekisa ntango elongo na Batatoli ya masangá mosusu to mpe ya bikólo mosusu. Na ntango ya bopemi na midi, tolyaka mwa eloko elongo na baninga na esika ya liyangani, yango esalaka mpe ete mayangani ezala ntango moko ya esengo mpenza. (Misala 2:42) Kuna tomonaka mpenza na miso bolingo oyo esangisi “lisangá [na biso] mobimba ya bandeko” na mokili mobimba.—1 Petro 2:17.

Esalisaka biso tókolisa boyokani na biso ná Nzambe. Bayisraele bazalaki mpe kozwa matomba na mayangani na bango mpo kuna ‘bazalaki kokanga ntina ya maloba’ ya Makomami oyo bazalaki kolimbwela bango. (Nehemia 8:8, 12) Biso mpe tosepelaka mingi na mateya ya Biblia oyo tozwaka na mayangani na biso. Liyangani mokomoko ezalaka na motó ya likambo oyo euti na Biblia. Toyekolaka ndenge ya kosala mokano ya Nzambe na nzela ya badiskur oyo esimbaka motema, badiskur ya biteni ebele, mpe na nzela ya bilakiseli oyo emonisaka ndenge makambo oyo bandeko bakutanaki na yango elekaki. Koyoka masolo ya bakristo oyo balongaka mikakatano oyo bakutanaka na yango mpo bazali kotosa mitinda ya Nzambe na mikolo oyo ya mpasi, elendisaka biso mingi. Na mayangani ya etúká, badrame oyo basani balataka bilamba lokola bato ya kala to ya mikolo na biso, esalisaka biso tómona ndenge masolo mosusu ya Biblia elekaki mpenza, mpe epesaka biso mateya mingi. Na mayangani nyonso, bato bazwaka batisimo mpo na komonisa ete bamipesi na Nzambe.

Mpo na nini mayangani ezalaka ntango ya esengo?
Matomba nini okoki kozwa soki okei na liyangani moko?