Mitángo

3 Sikoyo talá mabota ya Arona ná Moize na mokolo oyo Yehova asololaki na Moize na Ngomba Sinai.+ 2 Mpe talá nkombo ya bana mibali ya Arona: mwana ya liboso Nadabe ná Abihu,+ Eleazare+ ná Itamare.+ 3 Wana nde nkombo ya bana mibali ya Arona, banganga-nzambe oyo batyamaki mafuta, oyo mabɔkɔ na bango etondisamaki na nguya* mpo na kosala mosala ya banganga-nzambe.+ 4 Nzokande, Nadabe ná Abihu bakufaki na miso ya Yehova ntango bapesaki liboso ya Yehova mɔtɔ oyo endimami na mobeko te,+ na esobe ya Sinai; babotaki mpe bana te. Kasi Eleazare+ ná Itamare+ bakobaki kosala mosala ya banganga-nzambe elongo na Arona tata na bango.

5 Mpe Yehova alobaki na Moize ete: 6 “Bɛlɛmisá libota ya Levi,+ mpe osengeli kotɛlɛmisa bango liboso ya Arona nganga-nzambe, mpe basengeli kosalela+ ye. 7 Mpe basengeli kokokisa mokumba na bango epai na ye mpe mokumba na bango epai ya liyangani mobimba liboso ya hema ya kokutana na kosaláká mosala ya tabernakle. 8 Mpe basengeli kotalela bisaleli+ nyonso ya hema ya kokutana, ɛɛ mokumba ya bana ya Yisraele na kosaláká mosala ya tabernakle.+ 9 Mpe osengeli kopesa Balevi na Arona ná bana na ye ya mibali. Bango bazali bato oyo bapesami, bapesami epai na ye kati na bana ya Yisraele.+ 10 Mpe okotya Arona ná bana na ye ya mibali, mpe basengeli kokokisa mosala na bango ya bonganga-nzambe;+ mpe mopaya nyonso oyo akobɛlɛma, asengeli kobomama.”+

11 Mpe Yehova akobaki koloba na Moize: 12 “Mpo na ngai, talá! nazwi mpenza Balevi na kati ya bana ya Yisraele na esika ya bana nyonso ya liboso+ oyo bafungoli libumu kati na bana ya Yisraele; mpe Balevi basengeli kokóma ya ngai. 13 Mpo mwana nyonso ya liboso azali ya ngai.+ Na mokolo oyo nabɛtaki mwana nyonso ya liboso na mokili ya Ezipito,+ nasantisaki mpo na ngai mwana nyonso ya liboso na Yisraele banda na moto tii na nyama.+ Bakokóma ya ngai. Ngai nazali Yehova.”

14 Mpe Yehova alobaki lisusu na Moize na esobe ya Sinai+ ete: 15 “Komá bana ya Levi nkombo engebene ndako ya batata na bango na kolanda mabota na bango. Okokoma mobali nyonso nkombo banda na sanza moko tii na likoló.”+ 16 Mpe Moize abandaki kokoma bango nkombo na kolanda etinda ya Yehova, kaka ndenge azwaki mitindo. 17 Mpe talá bana mibali ya Levi+ na kolanda bankombo na bango: Gereshone ná Kohate mpe Merari.+

18 Sikoyo talá nkombo ya bana mibali ya Gereshone na kolanda mabota na bango: Libini ná Shimei.+

19 Mpe bana mibali ya Kohate+ na kolanda mabota na bango, bango oyo: Amirame ná Yizare,+ Hebrone ná Uziele.

20 Mpe bana mibali ya Merari+ na kolanda mabota na bango, bango oyo: Maheli+ ná Mushi.+

Wana nde mabota ya Balevi engebene ndako ya batata na bango.

21 Na Gereshone: libota ya Balibini+ ná libota ya Bashimei.+ Wana nde mabota ya Bagereshone. 22 Bato na bango oyo bakomisamaki nkombo bazalaki na kotalela motángo ya mibali nyonso, banda na oyo azali na sanza moko tii na likoló.+ Bato na bango oyo bakomisamaki nkombo bazalaki nkóto nsambo na nkama mitano (7 500).+ 23 Mabota ya Bagereshone ezalaki na nsima ya tabernakle.+ Yango ezalaki kotya kaa na wɛsti. 24 Mpe nkumu ya ndako ya batata ya Bagereshone ezalaki Eliasafe mwana ya Laele. 25 Mpe mokumba ya bana mibali ya Gereshone+ na hema ya kokutana ezalaki tabernakle ná hema,+ ezipeli+ na yango ná elamba ya kozipa+ monɔkɔ ya hema ya kokutana, 26 barido+ ya lopango ná elamba ya kozipa+ monɔkɔ ya lopango oyo ezali zingazinga ya tabernakle ná etumbelo, ná bansinga na yango ya hema,+ mpo na mosala na yango nyonso.

27 Mpe na Kohate: libota ya Baamirame ná libota ya Bayizare ná libota ya Bahebrone mpe libota ya Bauziele. Wana ezalaki mabota ya Bakohate.+ 28 Kati na motángo ya mibali nyonso, banda na oyo azali na sanza moko tii na likoló, bazalaki nkóto mwambe na nkama motoba (8 600), oyo bazalaki kokokisa mokumba ya esika mosantu.+ 29 Mabota ya bana ya Kohate bazalaki kotya kaa na mopanzi ya tabernakle oyo ezali na sudi.+ 30 Mpe nkumu ya ndako ya batata ya mabota ya Bakohate ezalaki Elizafane mwana ya Uziele.+ 31 Mpe mokumba+ na bango ezalaki Sanduku+ ná mesa,+ etɛlɛmiselo ya miinda+ ná bitumbelo,+ bisaleli+ ya esika mosantu oyo bazalaki kosala na yango mosala, ná elamba ya kozipa,+ ná mosala na yango nyonso.

32 Mpe nkumu ya bankumu ya Balevi ezalaki Eleazare+ mwana ya Arona nganga-nzambe, oyo azalaki kokamba baoyo bazalaki kokokisa mokumba ya esika mosantu.

33 Na Merari: libota ya Bamaheli+ ná libota ya Bamushi.+ Wana ezalaki mabota ya Merari.+ 34 Mpe bato na bango oyo bakomisamaki nkombo na kotalela motángo ya mibali nyonso, banda na oyo azali na sanza moko tii na likoló, bazalaki nkóto motoba na nkama mibale (6 200).+ 35 Mpe nkumu ya ndako ya batata ya mabota ya Merari ezalaki Zuriele mwana ya Abihaile. Bazalaki kotya kaa na mopanzi ya tabernakle oyo ezali na nɔrdi.+ 36 Mpe mokumba oyo bana ya Merari bazalaki na yango etalelaki bakadrɛ+ ya tabernakle mpe bikangiseli+ na yango mpe makonzí+ na yango mpe bitɛlɛmiselo na yango, oyo ezali na mabulu, mpe bisaleli+ na yango nyonso mpe mosala+ na yango nyonso, 37 mpe makonzí+ ya lopango oyo ezali zingazinga mpe bitɛlɛmiselo na yango, oyo ezali na mabulu,+ mpe bapike na yango mpe bansinga na yango.

38 Mpe baoyo bazalaki kotya kaa liboso ya tabernakle na ɛsti, liboso ya hema ya kokutana epai moi ebimaka, ezalaki Moize ná Arona ná bana na ye ya mibali, baoyo bazalaki kokokisa mokumba ya esika mosantu,+ oyo ezalaki mokumba ya bana ya Yisraele. Mpe mopaya nyonso oyo akobɛlɛma, akobomama.+

39 Bato nyonso oyo bakomisamaki nkombo kati na Balevi, oyo Moize ná Arona bakomaki nkombo na kolanda etinda ya Yehova, na kolanda mabota na bango, mibali nyonso, banda na oyo azali na sanza moko tii na likoló, bazalaki nkóto ntuku mibale na mibale (22 000).

40 Na nsima, Yehova alobaki na Moize ete: “Komá bana mibali nyonso ya liboso nkombo kati na bana ya Yisraele, banda na oyo azali na sanza moko tii na likoló,+ mpe zwá motángo ya nkombo na bango. 41 Mpe osengeli kozwa Balevi mpo na ngai—ngai nazali Yehova—na esika ya bana nyonso ya liboso kati na bana ya Yisraele,+ mpe banyama ya mboka ya Balevi na esika ya bana nyonso ya liboso kati na banyama ya mboka ya bana ya Yisraele.”+ 42 Mpe Moize abandaki kokoma bana nyonso ya liboso nkombo kati na bana ya Yisraele, kaka ndenge Yehova apesaki ye mitindo. 43 Mpe bana mibali nyonso ya liboso, na kotalela motángo ya bankombo, banda na oyo azali na sanza moko tii na likoló, kati na bato oyo bakomisamaki nkombo, bazalaki nkóto ntuku mibale na mibale na nkama mibale na ntuku nsambo na misato (22 273).

44 Mpe Yehova akobaki koloba na Moize ete: 45 “Zwá Balevi na esika ya bana nyonso ya liboso kati na bana ya Yisraele, mpe banyama ya mboka ya Balevi na esika ya banyama na bango ya mboka; mpe Balevi basengeli kokóma ya ngai.+ Ngai nazali Yehova. 46 Mpe mpo na motuya ya lisiko+ ya bato nkama mibale na ntuku nsambo na misato (273) kati na bana ya liboso ya Yisraele, oyo baleki motángo ya Balevi,+ 47 osengeli kozwa shekele mitano mpo na moto mokomoko.+ Okozwa yango na kolanda shekele ya esika mosantu. Shekele moko ezali gera ntuku mibale (20).+ 48 Mpe osengeli kopesa Arona ná bana na ye ya mibali mbongo yango ezala motuya ya lisiko ya baoyo baleki motángo na bango.” 49 Bongo Moize azwaki mbongo ya motuya ya lisiko epai ya baoyo balekaki motángo ya motuya ya lisiko ya Balevi. 50 Azwaki mbongo epai ya bana ya liboso ya Yisraele: shekele nkóto moko na nkama misato na ntuku motoba na mitano (1 365), na kolanda shekele ya esika mosantu. 51 Na nsima, Moize apesaki Arona ná bana na ye ya mibali mbongo ya motuya ya lisiko, na kolanda etinda ya Yehova, kaka ndenge Yehova apesaki Moize mitindo.